← Back
The Comprehensive Aramaic Lexicon
← Return to the Text Browser
click on the file description for more information
51001: TgO Gn

Click on a word for lexical analysis.
Click on a red-colored coordinate for comments and/or translations of the line
View in supralinear Babylonian pointing
Ask AI about a passage
Hide manuscript variants

previous chapter


18:01 )1( [ai]וְאִתגְלֵי לֵיה יוי בְמֵישְרֵי מַמרֵא וְהוּא יָתֵיב בִתרַע מַשכְנָא כְמֵיחַם יוֹמָא׃
18:02 )1( [ai]וֻזקַף עֵינוֹהִי וַחזָא וְהָא תְלָתָה גֻברִין קָיְמִין עִלָווֹהִי וַחזָא וֻרהַט לְקַדָמוּתְהוֹן מִתְרַע מַשכְנָא וֻסגֵיד עַל ארעא׃
18:03 )1( [ai]וַאֲמַר יוי אִם כְעַן אַשכַחִית רַחמִין בְעֵינָך/קֳדָמָך#3#/ לָא כְעַן תְעִיבַר מֵעַל עַבדָך׃
18:04 )1( [ai]יִסְבוּן כְעַן זְעֵיר מַיָא וְאַסחוֹ רַגלֵיכוֹן וְאִסתְמִיכוּ תְחוֹת אִילָנָא׃
18:05 )1( [ai]וְאִסַב פִתָא דְלַחמָא וֻסעוּדוּ לִבְכוֹן בָתַר כֵין תִעבְרוּן אֲרֵי עַל כֵין עֲבַרתוּן עַל עַבדְכוֹן וַאֲמַרוּ כֵין תַעֲבֵיד כְמָא דְמַלֵילתָא׃
18:06 )1( [ai]וְאוֹחִי אַברָהָם לְמַשכְנָא לְוָת שָׂרָה וַאֲמַר אוֹחַא תְלָת סָאוָן קַמחָא סוּלתָא לוּשִי וַעֲבִידִי גְרִיצָן/גריסן#3#/׃
18:07 )1( [ai]\וֻלבֵית תוֹרֵי /ולבקרותא#3#/ רְהַט אַברָהָם וֻנסֵיב בַר תוֹרֵי רַכִיך וְטָב וִיהַב לְעוּלֵימָא וְאוֹחִי לְמַעֲבַד יָתֵיה׃
18:08 )1( [ai]וֻנסֵיב שְמַן וַחלַב וֻבַר תוֹרֵי דַעֲבַד וִיהַב קְדָמֵיהוֹן וְהוּא מְשַמֵיש עִלָוֵיהוֹן תְחוֹת אִילָנָא וַאֲכַלוּ׃
18:09 )1( [ai]וַאֲמַרוּ לֵיה אָן שָׂרָה אִיתְתָך וַאֲמַר הָא בְמשַכְנָא׃
18:10 )1( [ai]וַאֲמַר מְתָב אֵיתוּב לְוָתָך כְעִדָן דְאַתוּן קַיָימִין וְהָא בְרָא לְשָׂרָה אִיתְתָך וְשָׂרָה שְמַעַת בִתרַע מַשכְנָא וְהוּא אֲחוֹרוֹהִי׃
18:11 )1( [ai]וְאַברָהָם וְשָׂרָה סִיבוּ עָלוּ בְיוֹמִין פְסַק מִלְמִהוֵי לְשָׂרָה אוֹרַח כְנשַיָא׃
18:12 )1( [ai]וְחַיִיִכַת שָׂרָה בְמעַהָא לְמֵימַר בָתַר דְסֵיבִית תְהֵי לִי עוּלֵימוּ וְרִבוֹנִי סִיב׃
18:13 )1( [ai]וַאֲמַר יוי לאברהם לְמָא דְנָן חַיֵיכַת שָׂרָה לְמֵימַר הַבְקוּשטָא/הברם בקושטא#3#/ אוֹלֵיד וַאֲנָא סֵיבִית׃
18:14 )1( [ai]הֲיִתכַסַא מִן קדם יוי פִתגָמָא לִזמַן אֵיתוּב לְוָתָך כְעִידַן דְאַתוּן קַיָימִין וֻלשָׂרָה בַר׃
18:15 )1( [ai]וְכַדֵיבַת שָׂרָה לְמֵימַר לָא חַיֵיכִית אֲרֵי דְחֵילִית וַאֲמַר לָא בְרַם/אלהין#3#/ חַיֵיכת׃
18:16 )1( [ai]וְקָמוּ מִתַמָן גֻברַיָא וְאִסתַכִיוּ עַל אַפֵי סְדֹם וְאַברָהָם אָזֵיל עִמְהוֹן לְאַלוֹאֵיהוֹן׃
18:17 )1( [ai]ויוי/ומן קדם ייי#3#/ אֲמַר הַמְכַסֵי/היתכסי#3#/ אֲנָא מאברהם דַאֲנָא עָבֵיד׃
18:18 )1( [ai]וְאַברָהָם מִהוָה יִהוֵי לְעַם סַגִי/רב#3#/ וְתַקִיף וְיִתבָרְכוּן בְדִילֵיה כֹל עַמְמֵי ארעא׃
18:19 )1( [ai]אֲרֵי \גְלֵי קדמי /ידעתיניה#3#/ בְדִיל דִיפַקֵיד יָת בְנוֹהִי וְיָת אֲנָש בֵיתֵיה בָתְרוֹהִי וְיִטְרוּן אוֹרחָן דְתָקְנָן <מן#3#> קְדָם יוי לְמַעֲבַד צְדַקתָא וְדִינָא בְדִין דְיֵיתֵי/לאייתאה#3#/ יוי עַל/עם#3#/ אברהם יָת דְמַלֵיל <לאיתאה#3#> עֲלוֹהִי׃
18:20 )1( [ai]וַאֲמַר יוי קְבֵילַת/קְבִילַת#3#/ סְדֹם וַעֲמֹרָה אֲרֵי סְגִיאַת וְחוֹבַתהוֹן אֲרֵי תְקֵיפַת לַחדָא׃
18:21 )1( [ai]אִתגְלִי/איתפני#3#/ כְעַן וַאֵידִין הֲכִקבִילתְהוֹן דעלַת לִקדָמַי עֲבַדוּ אַעֲבֵיד עִמְהוֹן גְמֵירָא אִם <לָא#3#> תָיְבִין וְאִם <תָיְבִין#3#> לָא אִתפָרַע׃
18:22 )1( [ai]וְאִתפְנִיוּ מִתַמָן גֻברַיָא וַאֲזַלוּ לִסדוֹם ואברהם עַד כְעַן <הוא#3#> מְשַמֵיש בִצלוֹ קְדָם יוי׃
18:23 )1( [ai]וֻקרֵיב אַברָהָם וַאֲמַר הֲבִרגַז תְשֵיצֵי זַכָאָה עִם חַיָיבָא׃
18:24 )1( [ai]מָא אִם אִית חַמשִין זַכָאִין בְגוֹ קַרתָא הֲבִרגַז תְשֵיצֵי וְלָא תִשבוֹק לְאַתרָא בְדִיל חַמשִין זַכָאִין דִבגַוַה׃
18:25 )1( [ai]קוּשטָא אִינוּן דִינָך מִלְמַעֲבַד כְפִתגָמָא הָדֵין לְשֵיצָאָה/לקטלא#3#/ זַכָאָה עִם חַיָיבָא וִיהֵי זַכָאָה כְחַייָבָא קוּשטָא אִינוּן דִינָך דַיָין/הְדַיָין#3#/דדאין#3#/ כֹל/דכל#3#/ ארעא <לא#3#> בְרַם/לא#3#/ יַעֲבֵיד דִינָא׃
18:26 )1( [ai]וַאֲמַר יוי אִם אַשכַח בִסדוֹם חַמשִין זַכָאִין בְגוֹ קַרתָא וְאִשבוֹק לְכֹל אַתרָא בְדִילְהוֹן׃
18:27 )1( [ai]וַאֲתֵיב אַברָהָם וַאֲמַר הָא כְעַן אַסגִיתִי/שריתי#3#/ לְמַלָלָא קְדָם יוי וַאֲנָא עֲפַר וֻקטַם׃
18:28 )1( [ai]מָא אִם יַחסְרוּן חַמשִין/מחמשין#3#/ זַכָאִין חַמשָה הַתְחַבֵיל בְחַמשָה/בדיל חמשה#3#/ יָת כֹל קַרתָא וַאֲמַר לָא אֲחַבֵיל אִם אַשכַח תַמָן אַרבְעִין וְחַמשָה׃
18:29 )1( [ai]וְאוֹסֵיף עוֹד לְמַלָלָא קְדָמוֹהִי/עמיה#3#/ וַאֲמַר מָא אִם יִשתַכחוּן תַמָן אַרבְעִין וַאֲמַר לָא אַעֲבֵיד גְמֵירָא בְדִיל אַרבְעִין׃
18:30 )1( [ai]וַאֲמַר לָא כְעַן יִתקַף \רוּגזָא דַיוי /קדם ייי#3#/ וַאֲמַלֵיל מָא אִם יִשתַכחוּן תַמָן תְלָתִין וַאֲמַר לָא אַעֲבֵיד <גְמֵירָא#3#> אִם אַשכַח תַמָן תְלָתִין׃
18:31 )1( [ai]וַאֲמַר הָא כְעַן אַסגִיתִי לְמַלָלָא קדם יוי מָא אִם יִשתַכחוּן תַמָן עַסרִין וַאֲמַר לָא אֲחַבֵיל בְדִיל עַסרִין׃
18:32 )1( [ai]וַאֲמַר לָא כְעַן יִתקַף \רוּגזָא דַיוי /קדם ייי#3#/ וַאֲמַלֵיל בְרַם זִמנָא/בזימנא#3#/ הָדָא מָא אִם יִשתַכחוּן תַמָן עַסרָא וַאֲמַר לָא אֲחַבֵיל בְדִיל עַסרָה׃
18:33 )1( [ai]וְאִסתַלַק יְקָרָא דַיוי כַד שֵיצִי לְמַלָלָא עִם אַברָהָם וְאַברָהָם תָב לְאַתרֵיה׃

next chapter