← Back
The Comprehensive Aramaic Lexicon
← Return to the Text Browser
click on the file description for more information
51001: TgO Gn

Click on a word for lexical analysis.
Click on a red-colored coordinate for comments and/or translations of the line
View in supralinear Babylonian pointing
Ask AI about a passage
Hide manuscript variants

previous chapter


21:01 )1( [ai]וַיוי דְכִיר יָת שָׂרָה כְמָא דַאֲמַר וַעֲבַד יוי לְשָׂרָה כְמָא דְמַלֵיל׃
21:02 )1( [ai]וְעַדִיאַת וִילֵידַת שָׂרָה לאברהם בַר לְסֵיבְתוֹהִי לְזִמנָא דְמַלֵיל יָתֵיה/עימיה#3#/ יוי׃
21:03 )1( [ai]וֻקרָא אברהם יָת שֵם בְרֵיה דְאִתִילֵיד לֵיה דִילֵידַת לֵיה שָׂרָה יִצחָק׃
21:04 )1( [ai]וֻגזַר אברהם יָת יִצחָק בְרֵיה בַר תְמָניָה יוֹמִין כְמָא דְפַקֵיד \יָתֵיה יוי /ייי יתיה#3#/׃
21:05 )1( [ai]ואברהם בַר מְאָה שְנִין כַד אִיתִילֵיד לֵיה יָת יִצחָק בְרֵיה׃
21:06 )1( [ai]וַאֲמַרַת שָׂרָה חַדוָא עֲבַד לִי יוי כֹל דְשָמַע יִחדֵי לִי׃
21:07 )1( [ai]וַאֲמַרַת <מאן#3#> מְהֵימָן דַאֲמַר/דמליל#3#/ לְאַברָהָם וְקַיֵים דְתוֹנִיק בְנִין שָׂרָה אֲרֵי יְלֵידִית בַר לְסֵיבְתוֹהִי׃
21:08 )1( [ai]וֻרבָא רָביָא וְאִתחֲסִיל וַעֲבַד אברהם מִשתִיָא רַבָא בְיוֹמָא דְאִתחֲסִיל <ית#3#> יִצחָק׃
21:09 )1( [ai]וַחזָת שָׂרָה יָת בַר הָגָר מִצרֵיתָא דִילֵידַת לאברהם מְחָאִיך׃
21:10 )1( [ai]וַאֲמַרַת לאברהם תָרֵיך <ית#3#> אַמתָא הָדָא וְיָת בְרַה אֲרֵי לָא יֵירַת בַר אַמתָא הָדָא עִם בְרִי עִם יִצחָק׃
21:11 )1( [ai]וֻבאֵיש פִתגָמָא לַחדָא בְעֵינֵי אברהם עַל עֵיסַק בְרֵיה׃
21:12 )1( [ai]וַאֲמַר יוי לאברהם לָא יִבאַש בְעֵינָך עַל עוּלֵימָא וְעַל אַמתָך כֹל דְתֵימַר לָך שָׂרָה קַבֵיל מִינַה/למימרה#3#/ אֲרֵי בְיִצחָק יִתקְרוֹן לָך בְנִין׃
21:13 )1( [ai]וְאַף יָת בַר אַמתָא לְעַמָא אֲשַוֵינֵיה אֲרֵי בְרָך הוּא׃
21:14 )1( [ai]וְאַקדֵים אברהם בְצַפרָא וֻנסֵיב לַחמָא וְרוּקבָא דְמַיָא וִיהַב לְהָגָר שַוִי עַל כִתפַה/כַתפַה#3#/ וְיָת רָביָא וְשַלְחַה וַאֲזַלַת וֻטעָת בְמַדבַר בְאֵר שָבַע׃
21:15 )1( [ai]וֻשלִימוּ מַיָא מִן רוּקבָא וֻרמָת/וטלקת#3#/ יָת רָביָא/טליא#3#/ תְחוֹת חַד מִן אִילָנַיָא׃
21:16 )1( [ai]וַאֲזַלַת וִיתֵיבַת לַה מִקְבַל/מלקביל#3#/ אַרחֵיקַת כְמִגַד בְקַשתָא אֲרֵי אֲמַרַת לָא אִחזֵי בְמוֹתֵיה דְרָביָא וִיתֵיבַת מִקְבַל וַאֲרֵימַת יָת קָלַה וֻבכָת׃
21:17 )1( [ai]וֻשמִיַע קדם יוי יָת קָלֵיה דְרָביָא וֻקרָא מַלאֲכָא דַיוי לְהָגָר מִן שְמַיָא וַאֲמַר לַה מָא לִיך הָגָר לָא תִדחֲלִין אֲרֵי שְמִיַע קדם יוי <ית#3#> קָלֵיה/לקליה#3#/ דְרָביָא בַאֲתַר דְהוּא תַמָן׃
21:18 )1( [ai]קוּמִי טוּלִי יָת רָביָא וְאַתקִיפִי יָת יְדִיך בֵיה אֲרֵי לְעַם <רב#3#> סַגִי אֲשַוֵינֵיה׃
21:19 )1( [ai]וֻגלָא יוי יָת עֵינַהָא וַחזָת בֵירָא דְמַיָא וַאֲזַלַת וֻמלָת יָת רוּקבָא מַיָא וְאַשקִיאַת יָת רָביָא׃
21:20 )1( [ai]וַהֲוָה מֵימְרָא דַיוי בְסַעֲדֵיה דְרָביָא וֻרבָא וִיתֵיב בְמַדבְרָא וַהֲוָה רָביָא/רָבֵי#3#/ קַשָתָא׃
21:21 )1( [ai]וִיתֵיב בְמַדבְרָא דְפָראָן וֻנסֵיבַת לֵיה אִימֵיה אִיתְתָא מארעא דמצרים׃
21:22 )1( [ai]וַהֲוָה בְעִידָנָא הַהוּא/ההיא#3#/ וַאֲמַר אבִימַלַך וְפִיכֹל רַב חֵילֵיה לְאַברָהָם לְמֵימַר מֵימְרָא דַיוי בְסַעֲדָך בְכֹל דְאַת עָבֵיד׃
21:23 )1( [ai]וֻכעַן קַיָים לִי בְמֵימְרָא דַיוי הָכָא דְלָא/אם#3#/ תְשַקַר בִי/לי#3#/ וֻבִברִי/וֻלִברִי#3#/ וֻבבַר בְרִי/וֻלבַר בְרִי#3#/ כְטֵיבוּתָא דַעֲבַדִית עִמָך תַעֲבֵיד עִמִי וְעִם ארעא דְאִתוֹתבַת בַה׃
21:24 )1( [ai]וַאֲמַר אַברָהָם אֲנָא אֲקַיֵים׃
21:25 )1( [ai]וְאוֹכַח/והוחך#3#/ אַברָהָם יָת/עם#3#/ אֲבִימַלַך עַל עֵיסַק בֵירָא דְמַיָא דַאֲנַסוּ עַבדֵי אֲבִימַלַך׃
21:26 )1( [ai]וַאֲמַר אֲבִימַלַך לָא יְדַעִית מַן עֲבַד יָת פִתגָמָא הָדֵין וְאַף אַת לָא חַוֵית לִי וְאָף אֲנָא לָא שְמַעִית אֲלָהֵין יוֹמָא דֵין׃
21:27 )1( [ai]וֻדבַר אַברָהָם עָן וְתוֹרִין וִיהַב לַאֲבִימָלָך וֻגזַרוּ תַרוֵיהוֹן קְיָם׃
21:28 )1( [ai]וַאֲקֵים אברהם יָת שְבַע חוּרפָן דְעָן בִלחוֹדֵיהוֹן׃
21:29 )1( [ai]וַאֲמַר אבִימַלַך לאברהם מָא אִינִין שְבַע חוּרפַן אִלֵין/האלין#3#/ דַאֲקֵימתָא בִלחוֹדֵיהוֹן׃
21:30 )1( [ai]וַאֲמַר אֲרֵי יָת שְבַע חוּרפָן תְקַבֵיל/תיסב#3#/ מִן יְדִי בְדִיל דִתהֵי לִי לְסָהֲדוּ/לסהיד#3#/ אֲרֵי חֲפַרִית יָת בֵירָא הָדָא/הדין#3#/׃
21:31 )1( [ai]עַל כֵין קְרָא לְאַתרָא הַהוּא בְאֵר שָבַע אֲרֵי תַמָן קַיִימוּ תַרוֵיהוֹן׃
21:32 )1( [ai]וֻגזַרוּ קְיָם בִבאֵר שָבַע וְקָם אֲבִימַלַך וֻפִיכֹל רַב חֵילֵיה וְתָבוּ לַאֲרַע פְלִשתָאֵי׃
21:33 )1( [ai]וֻנצַב אִילָנָא בִבאֵר שָבַע וְצַלִי תַמָן בִשמָא דַיוי אֲלָה עָלְמָא׃
21:34 )1( [ai]וְאִתוֹתַב אברהם בְאַרַע פְלִשתָאֵי יוֹמִין סַגִיאִין׃

next chapter