← Back
The Comprehensive Aramaic Lexicon
← Return to the Text Browser
click on the file description for more information
51002: TgO Ex

Click on a word for lexical analysis.
Click on a red-colored coordinate for comments and/or translations of the line
View in supralinear Babylonian pointing
Ask AI about a passage
Hide manuscript variants

previous chapter


27:01 )1( [ai]וְתַעְבֵיד יָת מַדבְחָא דְאָעֵי שִטִין חַמֵיש אַמִין אוּרכָא וְחַמֵיש אַמִין פֻתיָא מְרַבַע יְהֵי מַדבְחָא וֻתלָת אַמִין רוּמֵיה׃
27:02 )1( [ai]וְתַעְבֵיד קַרנוֹהִי עַל אַרבַע זָויָתֵיה מִינֵיה יִהוִיָן/יִהוְיָן#3#/ קַרנוֹהִי וְתִחפֵי יָתֵיה נְחָשָא׃
27:03 )1( [ai]וְתַעְבֵיד פְסַכתֵירְוָתֵיה לְמִספֵי קִטמֵיה וֻמַגרוֹפיָתֵיה וֻמִזרְקוֹהִי וְצִנוֹריָתֵיה וֻמַחתִיָתֵיה לְכֹל מָנוֹהִי תַעְבֵיד נְחָשָא׃
27:04 )1( [ai]וְתַעְבֵיד לֵיה סְרָדָא עוֹבָד מְצָדְתָא דִנחָשָא וְתַעְבֵיד עַל מְצָדְתָא אַרבַע עִזקָן דִנחָשָא עַל אַרבְעָה סִטרוֹהִי׃
27:05 )1( [ai]וְתִתֵין יָתַה תְחוֹת סוֹבֵיבָא דְמַדבְחָא מִלְרַע וֻתהֵי מְצָדְתָא עַל פַלגוּת מַדבְחָא׃
27:06 )1( [ai]וְתַעְבֵיד אְרִיחַיָא לְמַדבְחָא אְרִיחֵי דְאָעֵי שִטִין וְתִחפֵי יָתְהוֹן נְחָשָא׃
27:07 )1( [ai]וְתַעֵיל אְרִיחוֹהִי בְעִזקָתָא וִיהוֹן אְרִיחַיָא עַל תְרֵין סִטרֵי מַדבְחָא בְמִיטַל יָתֵיה׃
27:08 )1( [ai]חְלִיל לוּחִין תַעְבֵיד יָתֵיה כְמָא דְאַחזִי יָתָך בְטוּרָא כֵין יַעבְדוּן׃
27:09 )1( [ai]וְתַעְבֵיד יָת דָרַת מַשכְנָא לְרוּחַ עֵיבַר דָרוֹמָא סְרָדֵי לְדָרְתָא דְבוּץ שְזִיר מְאָה אַמִין אוּרכָא לְרוּחָא חְדָא׃
27:10 )1( [ai]וְעַמוּדוֹהִי עַסרִין וְסָמְכֵיהוֹן דִנחָשָא וָוֵי עַמוּדַיָא וְכִבוּשֵיהוֹן כְסַף׃
27:11 )1( [ai]וְכֵן לְרוּחַ צִפוּנָא בְאוּרכָא סְרָדֵי מְאָה אוּרכָא וְעַמוּדוֹהִי עַסרִין וְסָמְכֵיהוֹן עַסרִין דִנחָשָא וָוֵי עַמוּדַיָא וְכִיבוּשֵיהוֹן כְסַף׃
27:12 )1( [ai]וְפוּתיָא דְדָרְתָא לְרוּחַ מַעַרבָא סְרָדֵי חַמשִין אַמִין עַמוּדֵיהוֹן עַסרָה וְסָמְכֵיהוֹן עַסרָה׃
27:13 )1( [ai]וְפוּתיָא דְדָרְתָא לְרוּחַ קִדוּמָא מַדִנחָא חַמשִין אַמִין׃
27:14 )1( [ai]וַחְמֵיש עַסרֵי אַמִין סְרָדֵי לְעִברָא עַמוּדֵיהוֹן תְלָתָה וְסָמְכֵיהוֹן תְלָתָה׃
27:15 )1( [ai]וֻלעִברָא תִניָנָא חַמֵיש עַסרֵי סְרָדִין עַמוּדֵיהוֹן תְלָתָה וְסָמְכֵיהוֹן תְלָתָה׃
27:16 )1( [ai]וְלִתרַע דָרְתָא פְרָסָא עַסרִין אַמִין דְתַכלָא וְאַרגְוָנָא וֻצבַע זְהוֹרִי וְבוּץ שְזִיר עוֹבָד צִיוּר עַמוּדֵיהוֹן אַרבְעָה וְסָמְכֵיהוֹן אַרבְעָה׃
27:17 )1( [ai]כֹל עַמוּדֵי דָרְתָא סחור סחור מְכַבְשִין כְסַף וָוֵיהוֹן כְסַף וְסָמְכֵיהוֹן דִנחָשָא׃
27:18 )1( [ai]אוּרכָא דְדָרְתָא מְאָה אַמִין וְפוּתיָא חַמשִין בְחַמשִין וְרוּמָא חַמֵיש אַמִין דְבוּץ שְזִיר וְסָמְכֵיהוֹן דִנחָשָא׃
27:19 )1( [ai]לְכֹל מָנֵי מַשכְנָא בְכֹל פוּלחָנֵיה וְכֹל סִיכוֹהִי וְכֹל סִכֵי דָרְתָא דִנחָשָא׃
27:20 )1( [ai]וְאַת תְפַקֵיד יָת בְנֵי ישראל וְיִסְבוּן לָך מְשַח זֵיתָא דַכיָא כָתִישָא לְאַנהָרָא לְאַדלָקָא בוֹצִינַיָא תְדִירָא׃
27:21 )1( [ai]בְמַשכַן זִמנָא מִבַרָא לְפָרוּכתָא דְעַל סָהְדוּתָא יְסַדַר יָתֵיה אהרן וֻבנוֹהִי מֵרַמשָא עַד צַפרָא קדם יוי קְיָם עָלַם לְדָרֵיהוֹן מִן בְנֵי ישראל׃

next chapter