The Comprehensive Aramaic Lexicon

11:01 )1( [ai]	וְיִפתָח גִלעְדָאָה הְוָה גִבָר חֵילָא וְהוּא בַר אִתְתָא פֻנדְקֵיתָא וְאוֹלֵיד גִלעָד יָת יִפתָח׃
11:01 )5( [ai]	דא היא נימוסא הות בישראל מלקדמין דלא מסתחרא אחסנתא משבטא לשבטא ובכן לא הוה יכיל גבר למיסב איתתא דלא הות משבטיה וכד הות אתתא דרחימת גברא נפקת מבית נשא בלא אחסנתא והוו אנשי קרן יתה פונדקיתא דרחימת גברא דלא משבטא וכן הות ליה לאמיה דיפתח
11:02 )1( [ai]	וִילֵידַת אִתַת גִלעָד לֵיה בְנִין וֻרבִיאוּ בְנֵי אִתְתָא וְתָרִיכוּ יָת יִפתָח וַאְמַרוּ לֵיה לָא תַחסֵין בְבֵית אְבוּנָא אְרֵי בַר אִתְתָא/איתא#3#/אתתא משבטא#3#/ אָחֳרִי אַת׃
11:03 )1( [ai]	וַעְרַק יִפתָח מִן קֳדָם אְחוֹהִי וִיתֵיב בַאְרַע טָב וְאִתכְנִישוּ לְוָת יִפתָח גֻברִין סְרִיקִין וֻנפַקוּ/והוו#3#/ עִמֵיה׃
11:04 )1( [ai]	וַהְוָה לִזמַן יוֹמִין וַאְגִיחוּ קְרָבָא בְנֵי עַמוֹן עִם יִשׂרָאֵל׃
11:05 )1( [ai]	וַהְוָה כַד אְגִיחוּ קְרָבָא בְנֵי עַמוֹן עִם יִשׂרָאֵל וַאְזַלוּ סָבֵי גִלעָד לְמִדבַר יָת יִפתָח מֵאְרַע טָב׃
11:06 )1( [ai]	וַאְמַרוּ לְיִפתָח אֵיתַא וֻתהֵי לַנָא לְרַבָא וֻנגִיחַ קְרָבָא בִבנֵי עַמוֹן׃
11:07 )1( [ai]	וַאְמַר יִפתָח לְסָבֵי גִלעָד הְלָא אַתוּן סְנֵיתוֹן יָתִי וְתָרֵיכתוּנִי מִבֵית אַבָא וֻמָדֵין אְתֵיתוֹן לְוָתִי כְעַן כַד עַקַת לְכוֹן׃
11:08 )1( [ai]	וַאְמַרוּ סָבֵי גִלעָד לְיִפתָח בְכֵין כְעַן תַבנָא לְוָתָך וֻתהָך עִמַנָא וֻתגִיחַ קְרָבָא בִבנֵי עַמוֹן וֻתהֵי לַנָא לְרֵיש לְכֹל יָתְבֵי גִלעָד׃
11:09 )1( [ai]	וַאְמַר יִפתָח לְסָבֵי גִלעָד אִם מְתִיבִין אַתוּן יָתִי לְאָגָחָא קְרָבָא בִבנֵי עַמוֹן וְיִמסַר יְיָ יָתְהוֹן קֳדָמַי אְנָא אַהוֵי לְכוֹן לְרֵיש׃
11:10 )1( [ai]	וַאְמַרוּ סָבֵי גִלעָד לְיִפתָח מֵימְרָא דַיְיָ יְהֵי סָהִיד בֵינַנָא אִם לָא כְפִתגָמָך כֵין נַעְבֵיד׃
11:11 )1( [ai]	וַאְזַל יִפתָח עִם סָבֵי גִלעָד וֻמַנִיאוּ/וְשַוִיוּ#3#/ עַמָא יָתֵיה עְלֵיהוֹן לְרֵיש וֻלרַבָא וְסַדַר יִפתָח יָת כָל פִתגָמוֹהִי קֳדָם יְיָ בְמִצפְיָא׃
11:12 )1( [ai]	וֻשלַח יִפתָח אִזגַדִין לְוָת מַלכָא דִבנֵי עַמוֹן לְמֵימַר מָא לִי וָלָך אְרֵי אְתֵיתָא לְוָתִי לְאָגָחָא קְרָבָא בְאַרעִי׃
11:13 )1( [ai]	וַאְמַר מַלכָא דִבנֵי עַמוֹן לְאִזגַדֵי יִפתָח אְרֵי נְסֵיב יִשׂרָאֵל יָת אַרעִי בְמִסְקֵיה/במפקיה#3#/ מִמִצרַיִם מֵאַרנוֹנָא וְעַד יֻבקָא וְעַד יַרדְנָא וכעַן אְתֵיב יָתְהוֹן בִשלָם׃
11:14 )1( [ai]	וְאוֹסֵיף עוֹד יִפתָח וֻשלַח אִזגַדִין לְוָת מַלכָא דִבנֵי עַמוֹן׃
11:15 )1( [ai]	וַאְמַר לֵיה כִדנָן אְמַר יִפתָח לָא נְסֵיב יִשׂרָאֵל יָת אְרַע מוֹאָב וְיָת אְרַע בְנֵי עַמוֹן׃
11:16 )1( [ai]	אְרֵי בְמִסַקהוֹן מִמִצרָיִם וַאְזַל יִשׂרָאֵל בְמַדבְרָא עַד יַמָא דְסוּף וַאְתָא לִרקַם׃
11:17 )1( [ai]	וֻשלַח יִשׂרָאֵל אִזגַדִין לְוָת מַלכָא דַאְדוֹם לְמֵימַר אַעבַר כְעַן בְאַרעָך וְלָא קַבֵיל מַלכָא דַאְדוֹם וְאַף לְוָת מַלכָא דְמוֹאָב שְלַח וְלָא אְבָא/קבל#3#/ וִיתֵיב יִשׂרָאֵל בִרקַם׃
11:18 )1( [ai]	וַאְזַל בְמַדבְרָא וְאַקֵיף יָת אְרַע אְדוֹם וְיָת אְרַע מוֹאָב וַאְתוֹ מִמַדנַח שִמשָא לְאַרעָא דְמוֹאָב וֻשרוֹ בְעִברָא דְאַרנוֹן וְלָא עָלוּ בִתחוּם מוֹאָב אְרֵי אַרנוֹן תְחוּם מוֹאָב׃
11:19 )1( [ai]	וֻשלַח יִשׂרָאֵל אִזגַדִין לְוָת סִיחוֹן מַלכָא אְמוֹרָאָה מַלכָא דְחַשבוֹן וַאְמַר לֵיה יִשׂרָאֵל נִעבַר כְעַן בְאַרעָך/בְאַתרָך#3#/ עַד אַתרִי׃
11:20 )1( [ai]	וְלָא הֵימֵין סִיחוֹן יָת יִשׂרָאֵל לְמִעבַר בִתחוּמֵיה וֻכנַש סִיחוֹן יָת כָל עַמֵיה וֻשרוֹ בְיָהַץ וַאְגִיחַ קְרָבָא עִם יִשׂרָאֵל׃
11:21 )1( [ai]	וֻמסַר יְיָ אְלָהָא דְיִשׂרָאֵל יָת סִיחוֹן וְיָת כָל עַמֵיה בִידָא דְיִשׂרָאֵל וֻמחוֹנוּן וִירֵית יִשׂרָאֵל יָת כָל אְרַע אְמוֹרָאָה יָתֵיב אַרעָא הַהִיא׃
11:22 )1( [ai]	וִירִיתוּ יָת כָל תְחוּם <ארע#3#> אְמוֹרָאָה מֵאַרנוֹנָא וְעַד יֻבקָא ומִן מַדבְרָא וְעַד יַרדְנָא׃
11:23 )1( [ai]	וֻכעַן יְיָ אְלָהָא דְיִשׂרָאֵל תָרֵיך יָת אְמוֹרָאָה מִן קֳדָם עַמֵיה יִשׂרָאֵל וְאַתְ מְדַמֵי לְמֵירְתַה׃
11:24 )1( [ai]	הְלָא יָת דְיַחסְנִנָך כְמוֹש טָעוּתָך יָתֵיה תַחסֵין וְיָת כָל דִיתָרֵיך יְיָ אְלָהַנָא מִן קֳדָמַנָא יָתֵיה נֵירַת׃
11:25 )1( [ai]	וֻכעַן הְטָב טָב אַתְ מִבָלָק בַר צִפוֹר מַלכָא דְמוֹאָב הַמְדָן דָן עִם יִשׂרָאֵל אִם קְרָבָא אְגִיחַ בְהוֹן׃
11:26 )1( [ai]	כַד יְתֵיב יִשׂרָאֵל בְחַשבוֹן וֻבכַפרָנַהָא וֻבעַרעוֹר וֻבכַפרָנַהָא וֻבכָל קִרוַיָא דְעַל תְחוּמֵי אַרנוֹן תְלָת מְאָה שְנִין וֻמָדֵין לָא שֵיזֵיבתוּן בְעִדָנָא הַהוּא׃
11:27 )1( [ai]	וַאְנָא לָא חְטֵית/חבית#3#/ לָך וְאַתְ עָבֵיד עִמִי בִישָא לְאָגָחָא קְרָבָא בִי/עמי#3#/ יְדִין יְיָ דְעָבֵיד דִינָא יוֹמָא דֵין בֵין בְנֵי יִשׂרָאֵל וֻבֵין בְנֵי עַמוֹן׃
11:28 )1( [ai]	וְלָא קַבֵיל מַלכָא דִבנֵי עַמוֹן לְפִתגָמֵי יִפתָח דִשלַח לְוָתֵיה׃
11:29 )1( [ai]	וֻשרָת עַל יִפתָח רוּחַ גְבוּרָא/נבואה#3#/ מִן קֳדָם יְיָ וַעְבַר יָת גִלעָד וְיָת מְנַשַה וַעְבַר יָת מִצפְיָא דְגִלעָד וֻמִמִצפְיָא דְגִלעָד עְבַר לְוָת/ית#3#/ בְנֵי עַמוֹן׃
11:30 )1( [ai]	וְקַיֵים יִפתָח קְיָם קֳדָם יְיָ וַאְמַר אִם מִמסָר תִמסַר יָת בְנֵי עַמוֹן בִידִי׃
11:31 )1( [ai]	וִיהֵי <"מי"#3#> דְיִפוֹק מִפָק בָר בֵיתִי לְקַדָמוּתִי כַד אְתוּב בִשלָם מִבְנֵי עַמוֹן וִיהֵי קֳדָם יְיָ וְאַסְקִנֵיה עְלָתָא׃
11:32 )1( [ai]	וַעְבַר יִפתָח לְוָת בְנֵי עַמוֹן לְאָגָחָא קְרָבָא בְהוֹן וֻמסַרִנוּן יְיָ בִידֵיה׃
11:33 )1( [ai]	וֻמחָנוּן מֵעְרוֹעֵר וְעַד מַעְלַנָא דְמִנִית עַסרִין קִרוִין וְעַד מֵישַר כַרמַיָא מַחְתָא רַבְתָא/סגי#3#/ לַחדָא וְאִתְבַרוּ בְנֵי עַמוֹן מִן קֳדָם בְנֵי יִשׂרָאֵל׃
11:34 )1( [ai]	וַאְתָא יִפתָח לְמִצפְיָא לְבֵיתֵיה וְהָא בְרַתֵיה נָפְקָא לְקַדָמוּתֵיה בְתֻפִין וֻבחִנגִין וֻלחוֹד הִיא יְחִידָא <לאימהא#3#> לֵית לֵיה מִנַה בַר אוֹ בְרָת׃
11:35 )1( [ai]	וַהְוָה כַד חְזָא יָתַה וֻבַזַע יָת לְבוּשוֹהִי וַאְמַר וָי בְרַתִי אַכרָעָא אַכרַעתִינִי וְאַתְ הְוֵית בְעָכְרַי וַאְנָא פְתַחִית פוּמִי בִנדַר קֳדָם יְיָ וְלָא אִכוֹל לִמתָב׃
11:36 )1( [ai]	וַאְמַרַת לֵיה אַבָא פְתַחתָא יָת פוּמָך בִנדַר קֳדָם יְיָ עְבֵיד לִי כְמָא דִנפַק מִפוּמָך בָתַר דַעְבַד לָך יְיָ <יָת#3#> פוֹרעָנוּתָא מִבַעְלֵי דְבָבָך מִבְנֵי עַמוֹן׃
11:37 )1( [ai]	וַאְמַרַת לַאְבוּהָא יִתעְבֵיד לִי פִתגָמָא הָדֵין שְבוֹק מִנִי תְרֵין יַרחִין וַאְהָך וְאִתנְגִיד עַל טוּרַיָא וְאַבכֵי עַל בְתוּלַי אְנָא וְחַברָתָי׃
11:38 )1( [ai]	וַאְמַר אִיזִילִי וְשַלַח יָתַה תְרֵין יַרחִין וַאְזַלַת הִיא וְחַברָתַהָא וֻבכָת עַל בְתוּלַהָא עַל טוּרַיָא׃
11:39 )1( [ai]	וַהְוָה מִסוֹף תְרֵין יַרחִין וְתַבַת לְוָת אְבוּהָא וַעְבַד לַה יָת נִדרֵיה דִנדַר וְהִיא לָא יָדְעָא גְבַר וַהְוָת לִגזֵירָא בְיִשׂרָאֵל/בישא#3#/ בְדִיל דְלָא לְאַסָקָא גְבַר יָת בְרֵיה וְיָת בְרַתֵיה לַעְלָתָא כְמָא דַעְבַד יִפתָח גִלעְדָאָה דְלָא שַאֵיל לְפִנחָס כָהְנָא וְאִלוּ שְאֵיל לְפִנחָס כָהְנָא הְוָה פָרֵיק יָתַה בִדמִין׃
11:40 )1( [ai]	מִזְמָן לִזמָן אָזְלָן בְנָת יִשׂרָאֵל לְאַלָאָה לְבַת יִפתָח גִלעְדָאָה אַרבְעָה יוֹמִין בְשַתָא׃

next chapter