← Back
The Comprehensive Aramaic Lexicon
← Return to the Text Browser
click on the file description for more information
51014: TgJ Ez

Click on a word for lexical analysis.
Click on a red-colored coordinate for comments and/or translations of the line
View in supralinear Babylonian pointing
Ask AI about a passage
Hide manuscript variants

previous chapter


07:01 )1( [ai]וַהֲוָה פִתגָם נְבוּאָה מִן קֳדָם יוי עִמִי/עלי#3#/ לְמֵימַר׃
07:02 )1( [ai]וְאַת בַר אָדָם כִדנָן אֲמַר יוי אֲלֹהִים לְאַרעָא דְיִשרָאֵל קִצָא מְטָא מְטָת פוֹרעָנוּת קִצָא לְמֵיתֵי עַל אַרבַע רוּחֵי אַרעָא׃
07:03 )1( [ai]כְעַן מְטָת פוֹרעָנוּת קִצָא לְמֵיתֵי עֲלַך וְאַשלַח רֻגזִי בִיך וְאַתפְרָע מִנִיך כְאוֹרחָתִיך/באורחתיך#3#/ וְאַתֵין עֲלַך יָת כָל תוֹעֵיבָתִיך׃
07:04 )1( [ai]וְלָא יְחוּס מֵימְרִי עֲלָך וְלָא אֲרַחֵים אֲרֵי חוֹב אוֹרחָתִיך עֲלַך אַתֵין וֻפוֹרעָנוּת תוֹעֵיבָתִיך בְגַוִיך יִהוְיָן וְתִדְעִין אֲרֵי אֲנָא יוי׃
07:05 )1( [ai]כִדנָן אֲמַר יוי אֲלֹהִים בִשתָא בָתַר בִשתָא הָא אָתְיָא׃
07:06 )1( [ai]קִצָא/קיצת#3#/ מְטָא מְטָת פוֹרעָנוּת קִצָא לְמֵיתֵי עֲלַך הָא אָתְיָא׃
07:07 )1( [ai]אִתגְלִיאַת מַלכוּתָא <למיתי#3#> עֲלָך יָתֵיב אַרעָא/בארעא#3#/ מְטָא עִדָן תְבָרָא קָרִיב יוֹם אִתרְגוֹשָא/אתרגושת#3#/ וְלֵית/דלית#3#/ לְאִשתֵיזָבָא בְמצָדֵי טוּרַיָא׃
07:08 )1( [ai]כְעַן מִקָרִיב אַשפוֹך חִמתִי עֲלַך וִיחוּל רֻגזִי בִיך וְאַתפְרַע מִנִיך כְאוֹרחָתִיך וְאַתֵין עֲלַך יָת כָל תוֹעֵיבָתִיך׃
07:09 )1( [ai]וְלָא יְחוּס מֵימְרִי עֲלַך וְלָא אֲרַחֵים כְחוֹבֵי אוֹרחָתִיך עֲלַך אַתֵין וֻפוֹרעָנוּת תוֹעֵיבָתִיך בְגַוִיך יִהוְיָן וְתִידְעוּן אֲרֵי אֲנָא יוי אֵיתִיתִי עֲלֵיכוֹן מַחָן׃
07:10 )1( [ai]הָא יוֹם פוֹרעָנוּתָא <מטא#3#> הָא אָתיָא אִתגְלִיאַת מַלכוּתָא צְמַח שֻלטָנָא הוֹפַע רִשעָא׃
07:11 )1( [ai]חָטוֹפִין קָמוּ לְמִסעַד רַשִיעִין לָא מִנְהוֹן וְלָא מֵאִתרְגוֹשַתהוֹן וְלָא מִבְנֵיהוֹן וְלָא מִבְנֵי בְנֵיהוֹן׃
07:12 )1( [ai]מְטָא עִדָן תֻשלְמַת חוֹבִין קָרִיב יוֹם פוֹרעָנוּת חֲטָאִין זָבְנָא לָא יִחדֵי וֻמזוֹבְנָנָא/וֻמזַבנָנָא#3#/ לָא יִדוֵי אֲרֵי רְגַז מִן קֳדָמַי עַל כָל אִתרְגוֹשַתהוֹן׃
07:13 )1( [ai]אֲרֵי מְזוֹבְנָנָא/מזַבְנָנָא#3#/ לְזָבְנֵיה לָא יְתוּב וְעַד דְאִינוּן חַיִין יִדְדָנוּן/יִרדִנוּן#3#/ידרנון#3#/ בְגִויָתְהוֹן אֲרֵי נְבִיַיָא מִתנַבַן עַל כָל אִתרְגוֹשַתהוֹן \וְלָא תָיְבִין /למיתב בתיובתא וְלַא תָיְבִין#3#/ וֻגבַר בְחוֹבֵי נַפשֵיה מִתרְעַן וְעַד דְאִנוּן קַיָימִין בִתיוּבָא לָא מְתַקְפִין׃
07:14 )1( [ai]נָפְקִין בְאַצוָחֻת קַרנָא וֻמִיתַקְנִין/דמתקנין#3#/ בְמָנֵי זֵינָא וְלֵית דְאָזֵיל לִקרָבָא/בקרבא#3#/ אֲרֵי רְגַז מִן קֳדָמַי עַל כָל אִתרְגוֹשַתהוֹן׃
07:15 )1( [ai]חַרבָא מִלְבָרָא וֻמוֹתָא וְכַפנָא מִלְגָיו דִבחַקלָא בְחַרבָא יִתקְטִיל וְדִבקַרתָא כַפנָא וֻמוֹתָא יְשֵיצוּנֵיה׃
07:16 )1( [ai]וֻמשֵיזְבַיָא יִשתֵיזְבוּן מִנְהוֹן וִיהוֹן עַל טוּרַיָא כְיוֹנֵי חִלַיָא כֻלהוֹן מְנָהֲמִין גְבַר בְחוֹבֵי נַפשֵיה׃
07:17 )1( [ai]כָל יְדַיָא יִתרַשְלָן וְכָל רְכוּבַיָא יִתאַשדָן כְמַיָא׃
07:18 )1( [ai]וְיֵיסְרוּן סַקִין וְתִחפֵי יָתְהוֹן אִתכְנָעוּתָא וְעַל כַל אַפֵיהוֹן בַהתָא וֻבכָל רֵישֵיהוֹן מְרַט׃
07:19 )1( [ai]כַספְהוֹן בְשוּקִין יִרמוֹן וֻדהַבהוֹן לְבוּסרָן יְהֵי כַספְהוֹן וֻדהַבהוֹן לָא יִכוֹל לְשֵיזָבוּתְהוֹן בְיוֹם רֻגזָא דַיוי נַפשְהוֹן לָא יִסבְעוּן וֻמעֵיהוֹן לָא יְמַלוֹן אֲרֵי לְתַקלַת חוֹבִין יְהֵי׃
07:20 )1( [ai]וְחַדוַת תְקוּנֵיה לִיקָר יְהַבתֵיה וְאִנוּן צַלמֵי תוֹעֵיבָתהוֹן שִקוּצֵיהוֹן עֲבַדוּ בֵיה עַל כֵין יְהַבתֵיה לְהוֹן לְבוּסרָן׃
07:21 )1( [ai]וְאַמסְרִנֵיה בְיַד רַשִיעִין לְמִבַז וֻלחַייָבֵי אַרעָא לְעָדֵי וְיַחֲלוּנֵיה׃
07:22 )1( [ai]וַאֲסַלֵיק שְכִינְתִי מִנְהוֹן עַל דַאֲחִילוּ יָת אֲרַע/ארעא#3#/ בֵית שְכִינְתִי וְיֵיעֲלוּן בַה רַשִיעִין וְיַחֲלוּנַה׃
07:23 )1( [ai]עֲבֵיד שֵישְלָן/שילשלן#3#/ אֲרֵי אַרעָא אִתמְלִיאַת חַיָיבֵי קְטוֹל וְקַרתָא אִתמְלִיאַת חָטוֹפִין׃
07:24 )1( [ai]וְאַיתִי מַבאֲשֵי עַמְמַיָא וְיַחסְנוּן יָת בָתֵיהוֹן וַאֲבַטֵיל רְבוּת רַשִיעִין וְיִתַחֲלוּן מְקַדְשֵיהוֹן׃
07:25 )1( [ai]אִתקְפַדַת/קפדא#3#/ מְטָת/מטא#3#/ וְיִבעוֹן שְלָמָא וְלֵית׃
07:26 )1( [ai]תְבָר עַל תְבָר יֵיתֵי וֻבסוֹרְתָא עַל בְסוֹרְתַא תְהֵי וְיִבעוֹן אֻלפָן מִסָפַר וְאוֹרָאָה תִפסוּק מִכָהִין וֻמֵילַך מֵחַכִים׃
07:27 )1( [ai]מַלכָא יִתאַבַל וְרַבָא יִלבַש צָדוּ וִידֵי עַמָא דְאַרעָא יִתבַהלָן מֵאוֹרַחהוֹן אַעֲבֵיד עִמְהוֹן וֻבנִמוֹסֵיהוֹן אַתפְרַע מִנְהוֹן וְיִדְעוּן אֲרֵי אֲנָא יוי׃

next chapter