← Back
The Comprehensive Aramaic Lexicon
← Return to the Text Browser
click on the file description for more information
51014: TgJ Ez

Click on a word for lexical analysis.
Click on a red-colored coordinate for comments and/or translations of the line
View in supralinear Babylonian pointing
Ask AI about a passage
Hide manuscript variants

previous chapter


26:01 )1( [ai]וַהֲוָה בַחדַא עִסרֵי שְנִין בְחַד לְיַרחָא הֲוָה פִתגָם נְבוּאָה מִן קֳדָם יוי עִמִי/עלי#3#/ לְמֵימַר׃
26:02 )1( [ai]בַר אָדָם חֲלָף דַאֲמַרַת צֹר עַל יְרוּשלַם חַדוָא אִתְבַרַת דַהְוָת מְסַפְקָא סְחוֹרָא לְעַמְמַיָא/לכל עממיא#3#/ אִסתְחַרַת לְמֵיתֵי לְוָתִי דַהְוָת מַליָא חֲרוֹבַת׃
26:03 )1( [ai]בְכֵין כִדנָן אֲמַר יוי אֲלֹהִים הָאֲנָא שָלַח רוּגזִי עֲלַך צֹר וְאַסֵיק עֲלַך מַשרְיָת עַמְמִין סַגִיאִין כְמִיסַק יַמָא בְאִתרְגוֹשָת גַלוֹהִי׃
26:04 )1( [ai]וִיחַבְלוּן שוּרֵי צוֹר וִיפַגְרוּן מִגדָלַהָא וַאֲעַקַר עַפרַה מִנַה וְאַתֵין יָתַה לִשעִיעוּת כֵיף גְלוֹ/גְלֵי#3#/׃
26:05 )1( [ai]מִשטַח צַיָידִין תְהֵי בְגוֹ יַמָא אֲרֵי אֲנָא גְזַרִית בְמֵימְרִי אֲמַר יוי אֲלֹהִים וֻתהֵי לְבִזָא לְעַמְמַיָא׃
26:06 )1( [ai]וְיָתְבֵי כַפרָנַהָא דִבחַקלָא בְחַרבָא יִתקַטלוּן וְיִדְעוּן אֲרֵי אֲנָא יוי׃
26:07 )1( [ai]אֲרֵי כִדנָן אֲמַר יוי אֲלֹהִים הָאֲנָא מֵיתֵי עַל צֹר נְבוּכַדנַצַר מַלכָא דְבָבַל מִצִפוּנָא מַלַך מַלכַיָא בְסוּסָוָן וֻבִרתִכִין וֻבפָרָשִין וֻמַשרְיָן וְעַם סַגִי׃
26:08 )1( [ai]יָתְבֵי כַפרָנַך דִבחַקלָא בְחַרבָא יִקַטֵיל וְיִבנֵי עֲלַך כַרקוֹם וְיִצבַר עֲלַך מִלֵיתָא וִיקוּם עֲלַך דִמזָיְנִין בִתרִיסִין׃
26:09 )1( [ai]וֻמַחַת פָגוֹזוֹהִי יתֵן/יהב#3#/ בְשוּרַך וֻמִגדְלַך יְתָרַע בְאַבנֵי בַרזְלֵיה׃
26:10 )1( [ai]מֵרִפסַת/מפרסת#3#/ סוּסָוָתֵיה יִחפֵינָך/יִחפוֹנִיך#2#/ אַבקְהוֹן מִקַל פָרָשִין וְגִלגְלִין וֻרתִיכִין יְזוּעוּן שוּרַך בְמֵיעֲלוֹהִי בְתַרעַך כְמָא דְעָלִין בְקַרתָא דִמתָרְעָא מִשוּר׃
26:11 )1( [ai]בְפַרסַת סוֹסָוָתֵיה יְדוּש יָת כָל שוּקַך עַמִיך בְחַרבָא יְקַטֵיל וְקָמַת תוּקפִיך לְאַרעָא יְמַגַר׃
26:12 )1( [ai]וְיִבזוּן נִכסַך וְיִשבוֹן סְחוֹרְתִיך וִיפַגְרוּן שוּרַך וֻבָתֵי חַמדְתִיך יִתָרעוּן וְאַבנַך וְאָעַך וְעַפרִיך בְגוֹ מַיָא/ימא#3#/ יְשַווֹן׃
26:13 )1( [ai]וַאֲבַטֵיל אִתרְגוֹשַת זְמָרִיך וְקָל נִיגוּן כִינָרַך לָא יִשתְמַע עוֹד׃
26:14 )1( [ai]וְאַתְנֵינִיך לִשעִיעוּת כֵיף גְלֵי מִשטַח צַיָידִין תְהַן לָא תִתבְנַן עוֹד אֲרֵי אֲנָא <ייי#3#> גְזַרִית בְמֵימְרִי אֲמַר יוי אֲלֹהִים׃
26:15 )1( [ai]כִדנָן אֲמַר יוי אֲלֹהִים לְצוֹר הְלָא מִקָל מַפְלַת קְטִילַך בְנֵיהוֹם מְטָעֲנֵי חֲרַב כַד יִתרְמוֹן קְטִילִין בְגַוִיך יְזוּעוּן פַרוָרַיָא׃
26:16 )1( [ai]וְיֵיחֲתוּן מֵעַל כוּרסָוָתְהוֹן כָל רַברְבֵי יַמָא וְיַעדוֹן יָת מְעִילֵיהוֹן וְיָת לְבוּשֵי צִיוּרֵיהוֹן יַשלְחוּן זְיָע יִלבְשוּן עַל אַרעָא יִתְבוּן וְיזוּעוּן מִן קֳדָם תְבָרְהוֹן וְיִצדוֹן עֲלַך׃
26:17 )1( [ai]וְיִטְלוּן עֲלַך אִליָא וְיֵימְרוּן לִיך אֵיכְדֵין אֲבַדת דַהְוֵית יָתְבָא \בְגוֹ יַמְמַיָא /בתקוף ימא#3#/ קַרתָא מְשַבַחתָא דַהֲוָת יָתְבָא בִתקוֹף יַמָא הִיא וְיָתְבַהָא אֵיכְדֵין אִתמְסַרוּ לִתבָר כָל יָתְבַהָא׃
26:18 )1( [ai]כְעַן יְזוּעוּן פַרוָרַיָא בְיוֹם מַפְלַת קְטִילַך וְיִתבַהְלוּן נגָוָתָא דִביַמָא בְמִיפַק גָלְוָתִיך׃
26:19 )1( [ai]אֲרֵי כִדנָן אֲמַר יוי אֲלֹהִים כַד אַתֵין יָתִיך קִריָא/קרתא#3#/ חָרבָא כְקִרוִין דְלָא אִתיַתַבָא בְאַסָקוּתִי עֲלַך מַשרְיָת עַמְמִין דְסַגִיאִין/סַגִיאִין#2#/ כְמֵי תְהוֹמָא וְיִחפוֹנִיך עַמְמִין סַגִיאִין׃
26:20 )1( [ai]וְאַחֲתִנִיך עִם נָחֲתֵי גוֹב בֵית אַבדָנָא לְוָת עַמָא דְמִן עָלמָא וַאֲצַדֵינִיך בְאַרעָא אַרעִיתָא כְחָרבָתָא דְמִן עָלְמָא עִם נָחֲתֵי גוּב בֵית אַבדָנָא בְדִיל דְלָא תִתיַתְבִין וְאַתֵין חִדוָא בְאַרעָא דְיִשרָאֵל׃
26:21 )1( [ai]כִיד לָא הֲוֵית אַתְנִינִיך וְכֵין תְהַן וְתִתבְעַן וְלָא תִשתַכחִין עוֹד לְעָלַם אֲמַר יוי אֲלֹהִים׃

next chapter