← Back
The Comprehensive Aramaic Lexicon
← Return to the Text Browser
click on the file description for more information
51014: TgJ Ez

Click on a word for lexical analysis.
Click on a red-colored coordinate for comments and/or translations of the line
View in supralinear Babylonian pointing
Ask AI about a passage
Hide manuscript variants

previous chapter


45:01 )1( [ai]וֻבפַלָגוּתְכוֹן יָת אַרעָא בְאַחסָנָא תַפְרשוּן אַפרָשוּתָא קֳדָם יוי קוּדשָא מִן אַרעָא אוּרכָא עַסרִין וְחַמשָה אַלפִין אוּרכָא וֻפֻתיָא עַסרָא אַלפִין קוּדשָא הוּא בְכָל תְחוּמָה סְחוֹר סְחוֹר׃
45:02 )1( [ai]יְהֵי מִדֵין לְקוּדשָא חֲמֵיש מְאָה <אמין#3#> בַחֲמֵיש מְאָה <אמין#3#> מְרֻבַע סְחוֹר סְחוֹר וְחַמשִין אַמִין רַוחָא לֵיה סְחוֹר סְחוֹר׃
45:03 )1( [ai]וֻמִן מִשחֲתָא הָדָא תִמשַח אוּרכָא עִסרִין וְחַמשָה אַלפִין וֻפוּתיָא עַשׂרָה אַלפִין וֻבֵיה יְהֵי מַקדְשָא קוֹדַש קוּדשִין׃
45:04 )1( [ai]קוּדשָא מִן אַרעָא הוּא לְכָהֲנַיָא דִמשַמְשִין בְבֵית מַקדְשָא <דייי#3#> יְהֵי דְקָרִיבִין לְשַמָשָא קֳדָם יוי וִיהֵי לְהוֹן אֲתַר שְבִיק לְבָתַיָא וְכִבשָא לְמַקדְשָא׃
45:05 )1( [ai]וְעַשרִין וְחַמשָה אַלפִין אוּרכָא וְעַשׂרָא אַלפִין פוּתיָא וִיהֵי לְלֵיוָאֵי מְשַמְשֵי בֵיתָא/בְבֵית מַקדְשָא#3#/ לְהוֹן לְאַחסָנָא עַסרִין לִשכָן׃
45:06 )1( [ai]וְאַחסָנַת קַרתָא תִיתְנוּן חַמשָה אַלפִין פוּתיָא וְאוּרכָא עַסרִין וְחַמשָה אַלפִין לִקבֵיל אַפרָשוּת קֻדשָא לְכָל בֵית יִשרָאֵל יְהֵי׃
45:07 )1( [ai]וֻלרַבָא מִכָא וֻמִכָא לְאַפרָשוּת קוּדשָא וֻלאַחסָנַת קַרתָא לִקבֵיל אַפרָשוּת קוּדשָא וְלִקבֵיל אַחסָנַת קַרתָא מֵרוּחַ מַערְבָא מַערְבָא וֻמֵרוּחַ מַדנְחָא מַדנְחָא וְאוּרכָא לִקבֵיל חַד מִן חֳלָקַיָא מִתְחוּם מַערְבָא עַל/עד#3#/ תְחוּם מַדנְחָא׃
45:08 )1( [ai]דָא אַרעָא תְהֵי לְרַבָא לְאַחסָנָא בְיִשרָאֵל וְלָא יֵינְסוּן/יונון#3#/ עוֹד רַברְבַי יָת עַמִי וְאַרעָא יִתְנוּן לְבֵית יִשרָאֵל לְשִבטֵיהוֹן׃
45:09 )1( [ai]כִדנָן אֲמַר יוי אֲלֹהִים סַגִי לְכוֹן רַברְבֵי יִשרָאֵל חִטפָא וֻבִזָא אַעדוֹ וְדִין דִקשוֹט וְזָכוּ עֲבִידוּ סַלִיקוּ תַקלָתְכוֹן מִגוֹן עַמִי אֲמַר יוי אֲלֹהִים׃
45:10 )1( [ai]מוֹזְנָוָן דִקשוֹט וֻמכִילָן דִקשוֹט וֻבִתִין דִקשוֹט יְהוֹן לְכוֹן׃
45:11 )1( [ai]מְכִילְתָא וֻבִיתָא טֵיקַס חַד יְהֵי לְכוֹן סְכוֹם תְלַת סְאִין לְמִסַב מַעסַר כוֹרָא/כוֹלָא#3#/ בִמכִילַת רַטִיבָא בִיתָא וַעֲסַר כוֹרָא יַבִישָא מְכִילְתָא מִן כוֹרָא הָוֵי טִקוּסֵיה׃
45:12 )1( [ai]וְסִלעָא עִסרִין מָעִין תַלתוּת מַניָא עִסרִין סִלעִין מְנֵי כַספָא עִסרִין וַחֲמֵיש סִלעִין רַבעוּת מַניָא חְמֵיש עַסרֵי סִלעִין כוּלְהוֹן שִתִין מַניָא רַבָא/דבה#3#/ מְנֵי קוּדשָא יְהֵי לְכוֹן׃
45:13 )1( [ai]דָא אַפרָשוּתָא דְתַפרְשוּן חַד מִן שִיתָא בִמכִילְתָא מִכוֹר חִטִין וְחַד מִן שִתָא בִמכִילְתָא מִכוֹר סְעָרִין׃
45:14 )1( [ai]וֻדחָזֵי לְמִסַב מִן מִשחָא בִמכִילַת רַטִיבָא מַעסְרָא בִיתָא מִן כוֹרָא חַד מִן עַסרָא הָויָא בִיתָא בְכוֹרָא אֲרֵי עֲסַר בִתִין כוֹרָא׃
45:15 )1( [ai]וְאִימַר חַד מִן עָנָא מִן מָאתַן דְחָזֵי לְמִסַב מִפִטמָא דְיִשרָאֵל לְמִנחָתָא וֻלעֲלָתָא וֻלנִכסַת קוּדשַיָא לְכַפָרָא עֲלֵיהוֹן אֲמַר יוי אֲלֹהִים׃
45:16 )1( [ai]כָל עַמָא דְאַרעָא יְהוֹן עָבְדִין יָת אַפרָשוּתָא הָדָא לְרַבָא בְיִשרָאֵל׃
45:17 )1( [ai]וְעַל רַבָא תְהֵי עֲלָתָא וֻמִנחָתָא וְנִסכַיָא בְחַגַיָא וֻביַרחַיָא וֻבשַבַיָא בְכָל מוֹעֲדֵי בֵית יִשרָאֵל הוּא יַעֲבֵיד יָת חַטָתָא וְיָת מִנחָתָא וְיָת עֲלָתָא וְיָת נִכסַת קוּדשַיָא לְכַפָרָא עַל בֵית יִשרָאֵל׃
45:18 )1( [ai]כִדנָן אֲמַר יוי אֲלֹהִים בְקַדמָאָה בְחַד לְיַרחָא תִסַב תוֹר בַר תוֹרֵי שְלִים וֻתדַכֵי/ותרבי#3#/ יָת מַקדְשָא׃
45:19 )1( [ai]וְיִסַב כָהֲנָא מִדְמָא דְחַטָתָא וְיִתֵין עַל סְקוּפַת בֵיתָא וְעַל אַרבַע זָויָת מְסָמְתָא לְמַדבְחָא וְעַל סְקוּפַת תְרַע דָרְתָא גָוָיתָא׃
45:20 )1( [ai]וְכֵין תַעֲבֵיד בְשִבעָה בְיַרחָא מִגְבַר דְמִשתְלֵי וֻמִטַפַש וֻתכַפְרוּן עַל בֵיתָא׃
45:21 )1( [ai]בְנִיסָן בְאַרבְעַת עַסרָא יוֹמָא לְיַרחָא יְהֵי לְכוֹן פִסחָא חַגָא שִבעָה יוֹמִין פַטִירָא יִתאֲכִיל׃
45:22 )1( [ai]וְיַעֲבֵיד רַבָא בְיוֹמָא הַהוּא חֲלִיפוֹהִי וֻחלַף כָל עַמָא דְאַרעָא תוֹרָא לְחַטָתָא׃
45:23 )1( [ai]וְשִבעָה יוֹמֵי חַגָא יַעֲבֵיד עֲלָתָא קֳדָם יוי שִבעָה תוֹרִין וְשִבעָה דִכרִין שַלמִין לְיוֹמָא שִבעָה יוֹמַיָא וְחַטָתָא צְפִיר בַר עִזִין לְיוֹמָא׃
45:24 )1( [ai]וֻמִנחָתָא מְכִילְתָא לְתוֹרָא וֻמכִילְתָא לְדִכרָא יַעֲבֵיד וֻמִשחָא מְלֵי הִינָא לִמכִילְתָא׃
45:25 )1( [ai]בִשבִיעָאָה בַחֲמֵישְת עַסרָא יוֹמָא לְיַרחָא בְחַגָא יַעֲבֵיד כְאִלֵין שִבעָה יוֹמַיָא כְחַטָתָא כַעֲלָתָא וֻכמִנחָתָא וֻכמִשחָא׃

next chapter