← Back
The Comprehensive Aramaic Lexicon
← Return to the Text Browser
click on the file description for more information
51019: TgJ Jonah

Click on a word for lexical analysis.
Click on a red-colored coordinate for comments and/or translations of the line
View in supralinear Babylonian pointing
Ask AI about a passage
Hide manuscript variants

previous chapter


03:01 )1( [ai]וַהֲוָה פִתגָם נְבוּאָה מִן קֳדָם יוי עִם יוֹנָה תִניָנוּת לְמֵימַר׃
03:02 )1( [ai]קוּם אִיזֵיל לְנִינְוֵה קַרתָא רַבְתָא וְאִתנַבִי עֲלָה יַת נְבוּאֲתָא דַאֲנָא מְמַלֵיל עִמָך׃
03:03 )1( [ai]וְקָם יוֹנָה וַאֲזַל לְנִינְוֵה כְפִתגָמָא דַיוי וְנִינְוֵה הֲוָת קַרתָא רַבְתָא קֳדָם יוי מַהלַך תְלָתָה יוֹמִין׃
03:04 )1( [ai]וְשָרִי יוֹנָה לְמֵיעַל בְקַרתַא מַהלַך יוֹמָא חַד וְאַכרֵיז וַאֲמַר בְסוֹף אַרבְעִין יוֹמִין וְנִינְוֵה מִתהַפכָא׃
03:05 )1( [ai]וְהֵימִינוּ אֲנָשֵי נִינְוֵה בְמֵימְרָא דַיוי וֻגזַרוּ צוֹמָא וֻלבַשוּ/אסרו#3#/ סַקִין מֵרַבְהוֹן וְעַד זְעֵירְהוֹן׃
03:06 )1( [ai]וֻמטָא פִתגָמָא לְוָת מַלכָא <לות פרעה דהוה מלכא ביומיא האינון בנינוה#3#> דְנִינְוֵה וְקָם מִכוּרסֵי מַלכוּתֵיה וְאַעדִי לְבוּש יְקָרֵיה מִנֵיה וְאִתכַסִי סַקָא וִיתֵיב עַל קִטמָא׃
03:07 )1( [ai]וְאַכרֵיז וַאֲמַר בְנִינְוֵה מִגְזֵירַת מַלכָא וְרַברְבָנוֹהִי לְמֵימַר אֲנָשָא וֻבעִיָרא תוֹרֵי וְעָנָא לָא יִטעֲמוּן מִדָעַם לָא יִרעוֹן וֻמַיָא לָא יִשתוֹן׃
03:08 )1( [ai]וְיִתכַסוֹן סַקִין אֲנָשָא וֻבעִירָא <ותורי וענא#3#> וִיצַלוֹן קֳדָם יוי בִתקוֹף וִיתוּבוּן גְבַר מִאוֹרחֵיה בִשתָא וֻמִן חִטפָא דְבִידֵיהוֹן׃
03:09 )1( [ai]מַן יְדַע דְאִית בִידֵיה/ביה#3#/ חוֹבִין יְתוּב מִנְהוֹן וְיִתרַחַם עֲלַנָא מִן קֳדָם יוי וִיתוּב מִתְקוֹף רוּגזֵיה וְלָא נֵיבַד׃
03:10 )1( [ai]וֻגלַן קֳדָם יוי <ית#3#> עוֹבָדֵיהוֹן אֲרֵי תָבוּ מֵיאוֹרחָתְהוֹן בִישָתָא וְתָב יוי <מימריה#3#> מִן בִשתָא דְמַלֵיל/דגזר#3#/ לְמַעֲבַד לְהוֹן/עימהון#3#/ וְלָא עֲבַד׃

next chapter