← Back
The Comprehensive Aramaic Lexicon
← Return to the Text Browser
click on the file description for more information
81002: TgPs (Targum Psalms)

Click on a word for lexical analysis.
Click on a red-colored coordinate for comments and/or translations of the line
Ask AI about a passage
Hide manuscript variants

previous chapter


078:001 [ai]שכלא דרוח קודשא על ידוי דאסף אצית עמי אוריתי אצלון אודניכון למימרי פומי׃
078:002 [ai]אפתח במתל פומי אביעא חדון דמן לקדמין׃
078:003 [ai]די שמענן וידעינן להון ואבהתן תניאו לנא׃
078:004 [ai]לא נכסי מבניהון לדר בתראי משתעיין תושבחתא דייי ועושניה ופרישוותיה די עבד׃
078:005 [ai]ואקים סהדותא בדבית יעקב ואוריתא גזר בדבית ישראל די פקיד לאבהתן להודעותהון לבניהון׃
078:006 [ai]מן בגלל די ידעון דר בתראי בנין דמתילדין יקומון ויתנון לבניהון׃
078:007 [ai]וישוון באלהא סוברהון ולא יתנשון עובדי אלהא ופיקודוי ינטרון׃
078:008 [ai]ולא יהוון היך אבהתהון דר מסרהבן ומרגיז דר דלא מתקן לביה למריה ולא הות מהימנא באלהא רוחיה׃
078:009 [ai]כד הוו יתיבין במצרים איתרברבו בני אפרים מ{יני}<נו> קיצא וטעו ונפקו תלתין שנין קדם/עד לא#1#/ קיצא בזיני קרבא וגיברין נטלי קשתא אפיכו/הפכו#1#/ קדל ואיתקטלו ביום סידרי קרבא׃
078:010 [ai]מטול דלא נטרו קיים אלהא ובאוריתיה סריבו להלכא׃
078:011 [ai]ואתנשיאו עובדוי עמא בית ישראל ופרישותיה די אחמי יתהון׃
078:012 [ai]קביל /אבהתהון#1#/ אברהם יצחק ויעקב ושיבטיא דאבהתהון/#1#/ עבד פרישן בארעא דמצרים חקל טאניס׃
078:013 [ai]בזע ימא בחוטרא דמשה רבהון ואעבירינון ואוקים מיא צרירין היך זיקא׃
078:014 [ai]ודברינון בעננא ביממא וכל ליליא בנהור אשא׃
078:015 [ai]בזע טורין/טינרין#1#/ בחוטריה דמשה רבהון במדברא ואשקי כד בתהומיא רברבן׃
078:016 [ai]ואפיק נוזליא דמיא מן כיפא ואוחית היך נהרין דנגדין מיא׃
078:017 [ai]ואוסיפו תוב/עוד#1#/ למיחטי קדמוי למרגז קדם עילאה \במדברא צחי /במדבר צהי#1#/׃
078:018 [ai]ונסיאו אלהא בליבהון למישאל אוכלא/מיכלא#1#/ לנפשיהון׃
078:019 [ai]ואיתרעמו קדם ייי/אלהא#1#/ אמרו האית יוכלא קדם אלהא/ייי#1#/ לסדרא פתורא במדברא׃
078:020 [ai]הא כבר מחא בטינר ודיבו מיא ונחליא /נגדין#1#/ הלחוד לחמא יכיל למיתן אם יתכן מזונא לעמיה׃
078:021 [ai]בכן שמיע קדם אלהא/ייי#1#/ ורגיז ואישתא איתסקת בדבית יעקב ולחוד תקוף רוגזא סליק בישראל׃
078:022 [ai]ארום לא הימינו באלהא ולא איתרחיצו בפורקניה׃
078:023 [ai]ופקיד שחקי מלעיל ודשי שמיא פתח׃
078:024 [ai]ואחית עליהון/עילויהון#1#/ מנא למיכל ועבור שמיא יהב להון׃
078:025 [ai]מזון דנחת ממדור מלאכיא אכלו בני נשא זוודין שלח/יהב#1#/ להון לשבעא׃
078:026 [ai]אטיל רוח קידומא בשמיא ודבר בעושניה רוח דרומא׃
078:027 [ai]ואחית עליהון/עילויהון#1#/ היך כעפרא בסרא והיך חלא דימא עופא דפרח׃
078:028 [ai]ואפיל/ואשרי#1#/ במצע משיריתיה חזור חזור למשכנוי׃
078:029 [ai]ואכלו ושבעו לחדא וריגוגיהון איתי להון׃
078:030 [ai]לא זרו מן ריגוגיהון עד כדין/כדון#1#/ מיכלהון בפומהון׃
078:031 [ai]ורוגזא דאלהא סליקת בהון וקטיל בגיבריהון ועולימי ישראל אחמיט/אחמטו#1#/׃
078:032 [ai]בכל דא חבו תוב ולא הימינו בפרישותוי׃
078:033 [ai]ושיצי בלמא יומיהון ושנתיהון בבהולתא׃
078:034 [ai]בזמן דקטלינון תייבין ותבעו יתיה ויתובון ויצלון קדם אלהא׃
078:035 [ai]ואדכרו ארום אלהא תקיפיהון ואלהא עילאה פרקינון׃
078:036 [ai]ושרגיגון ליה בפומהון ובלישנהון מכדבין ליה /בעידן צלותהון#1#/׃
078:037 [ai]מטול דלבהון לא מהימן/מכוון#1#/ עימיה ולא הימינו בקיימיה׃
078:038 [ai]והוא רחמנא מכפר עוייתהון ולא מחבל יתהון ומסגי למיתב מן רוגזיה ולא יוחי בהון כל חימתיה/ריתחיה#1#/׃
078:039 [ai]ודכיר ארום בני בסרא הינון/אינון#1#/ רוחא דאזיל ולא תאיב/אתיב#1#/׃
078:040 [ai]כמה יסרבון ליה במדברא ירגזון קדמוי באתר צדיא׃
078:041 [ai]ותבו ונסיאו /קדם#1#/ אלהא וקדישא דישראל איתיו תיוהא׃
078:042 [ai]לא אידכרו ית ניסא דידיה ויומא דפרקינון מן מעיקא׃
078:043 [ai]דשוי במצרים אתוהי ותימהוי בחקל טאניס׃
078:044 [ai]והפך לדמא/לאדם#1#/ אריתיהון ונוזליהון לא שתן מנהון׃
078:045 [ai]יגרי בהון עירבובי חיות ברא וגמיר יתהון ועורדעניא ויחביל יתהון׃
078:046 [ai]ויהב ומסר לזחלא עיבוריהון וליעותהון לגובאי׃
078:047 [ai]וקליף בברדא גופניהון ושקמתהון בכרזובא׃
078:048 [ai]ומסר לברדא בעירהון וגיתיהון לרישפין די נור׃
078:049 [ai]יגרי בהון מאתן וחמשין מחן בתקוף רוגזיה בריתחא ובתריכותא ובעקא דמשתלחן בעידן בידיהון דאזגדין/דעבדין#1#/ בישין׃
078:050 [ai]יטייל בכביש תוקפיה לא מנע ממותא נפשהון ובעירהון ל{מ}מות<נ>א מסר׃
078:051 [ai]וקטל כל בוכרא במצרים שירוי/שיורי#1#/ צעריהון במשכניהון דחם׃
078:052 [ai]ואטיל היך ענא עמיה ודברינון היך \ענא עדרא/רעיא#1#/ במדברא׃
078:053 [ai]ואשרינון לרוחצן ולא דחלין וית בעלי דבביהון חפא ימא׃
078:054 [ai]ואעלינון לתחום אתר בית מקדשיה טור דין די קנת ימיניה׃
078:055 [ai]ותריך מן קדמיהון עמיא/עממיא#1#/ ואשרי יתהון בעדב אחסנתיה ואשרי במשכנהון שבטיא דישראל׃
078:056 [ai]ו{א}נסיאו וארגיזו קדם אלהא עילאה וסהידותיה לא נטרו׃
078:057 [ai]וזורו וארשיעו היך אבהתהון אתהפיכו היך קשתא דרמיא גיררין׃
078:058 [ai]וארגיזו קדמוי בנסכיהון ובפסיליהון ובצילמוניהון אקנון יתיה׃
078:059 [ai]שמיע קדם אלהא ורגז ורחקת נפשיה לחדא בישראל׃
078:060 [ai]ושבק משכנא דשילו משכן די שרת תמן שכינתיה בגו בני נשא׃
078:061 [ai]ומסר לשיביתא אורייתיה ושיבהוריה ביד מעיקא׃
078:062 [ai]ומסר לקטלין בחרבא עמיה ובאחסנתיה ארגיז׃
078:063 [ai]עולימוהי אכלת אשתא ובתולתיה לא אשתבחן/משבחן#1#/׃
078:064 [ai]כהנוי בקטלא דחרבא יפלון וארמלתוי לא ספיקן/ספיקו#1#/ דתבכוון׃ {ת׳׳} בעידן דשבו פלשתאי ארונא דייי בחרבא נפלו כהני שילו חפני ופנחס ובעידן דבשרו נשוהי לא בכיין ארום מיתו אוף אינון בהדא יומא׃
078:065 [ai]ואיתער היך דמיך ייי היך גברא/גיברא#1#/ דמתפקח מן חמרא׃
078:066 [ai]ומחא מעיקוי בטחוריא באחוריהון קלנא דעלמא יהב להון׃
078:067 [ai]ורחיק במשכנא דפריס על תחומיה דיוסף ובשבט אפרים לא רעא׃
078:068 [ai]ואיתרעי ית שבט יהודה ית טורא דציון די רחים׃
078:069 [ai]ובנא היך קרנא דרימנא מקדשיה מעתד היך ארעא דיסדה לעלמי עלמין׃
078:070 [ai]ואתרעי בדוד עבדיה ודבריה מן עדריא דענא׃
078:071 [ai]ומן בתר מיינקן אייתיה למשלט ביעקב עמיה ובישראל אחסנתיה׃
078:072 [ai]ומלך עליהון/עילויהון#1#/ בשלימות ליבביה ובסוכלתנות אידוי ידברינון׃

next chapter