← Back
The Comprehensive Aramaic Lexicon
← Return to the Text Browser
click on the file description for more information
81006: TgRuth

Click on a word for lexical analysis.
Click on a red-colored coordinate for comments and/or translations of the line
Ask AI about a passage
Hide manuscript variants

previous chapter


3:01 [ai]ואמרת לה נעמי חמותה ברתי בשבועה לא/לית#1#/ אנא אנוח עד זמן דיתבע ליך נייחא דיוטיב לך׃
3:02 [ai]וכען הלא בועז דאישתמודע לנא דהוית בחקלא עם עולימתוי הא הוא מבדר ית אידר דשׂערין ברוחא /עד צפרא#1#/ דליליא׃
3:03 [ai]ותחלילי במיא ותסוכי בוסמנין ותשויאי תכשיטיך עליך ותחתין לאדר[א] לא תיתפרסמי לגבר עד זמן שיצאיתיה למיכל ולמשתי׃
3:04 [ai]והוי בעידן דמכיה ותדעין ית אתרא דדמוך תמן ותעילי ותגליאי ית ריגלוי ותדמיכי/ותדמוכי#1##2#/ ותהא שאילא מיניה עיטא והוא יחו<י> לך בחכמתי[ה] ית דתעבדין׃
3:05 [ai]ואמרת לה כל די תימרין לי אעביד׃
3:06 [ai]ונחתת לאדרא ועבדת ככל די פקדת חמותה׃
3:07 [ai]ואכל בעז ושתי ואוטיב ליביה ובריך שמא דייי דקבל צלותיה ואעדי כפנא מארע[א] דישר[אל] ואתא לדמכא בסטר ערימתא ועלת רות ברז וגליא[ת] רגלוי ודמכת׃
3:08 [ai]והוה בפלגות ליליא ותהווא/ותוה#1##2#/ גברא ורתת ואיתרכיך בישׂריה כליפתא מן רתיתא וחמא והא איתתא דמכא כל קבל רגלוי ותקף/וכבש#1##2#/ יצריה ולא קריב לותה היכמא דעבד יוסף צדיקא דסרב למיקרב לות מצרית[א] איתת ריבוניה והיכמא דעבד פלטיאל בן/בר#1##2#/ ליש חסידא דדעץ סייפא בין מימריה/בסריה#1#/ ובין מיכל בת שאול איתת דוד דסרב למיקרב לותה׃
3:09 [ai]ואמר מאן את/אנת#2#/ /ברתי#1##2#/ ואמרת אנא רות אמתך ויתקרי שמך על אמתך למסבי לאינתו/לאתו#1#/ ארי פריק את/אנת#2#/׃
3:10 [ai]ואמ[ר] בריכא את/אנת#1##2#/ קדם ייי ברתי אוטבת טבותיך בתראי מן קדמאי דאיתגיירת ובתראי דעבדת /גרמיך#1##2#/ כאית[א] דנטרא ליבם עד זמן דיירבי דלא למהך בתר רובין למעבד זנו עמהון אם מסכן אם עתיר׃
3:11 [ai]וכען ברתי לא תדחלין כל די תימרין לי אעביד ליך ארום גלי קדם כל דיתבי תרע סנהדרין רבא דעמי ארום אינתתא צדיקת[א] את/אנת#1##2#/ ואית ביך חילא לסוברא ניר פיקודיא דייי׃
3:12 [ai]וכע[ן] ארום בקושטא ארום פריק אנא ואף אית פריק דחמי ליה למפרק יתר/יתיר#1##2#/ מני׃
3:13 [ai]ביתי בליליא ויהא בצפר[א] אם יפרקינך טוב דחמי/דחזי#2#/ למפרקך מן אוריתא הרי טב ויפרוק לחיי ואין לא צבי למפרקך ואפרקינך אנא אמרית בשבועה קדם ייי כמא דמלילת כן אעביד דמוכי עד עידן צפרא׃
3:14 [ai]ודמכת כל קבל רגלוי עד צפרא וקמת בקריצתא עד לא אישתמודע גבר ית חבריה מן קדם חשוכ[א] ואמר לעולימוי לא <א>ישתמודע ארום אתת איתתא לאידרא׃
3:15 [ai]ואמר הבי סודרא דעליך ואחדי בה ואחדת בה וכל שית סאין דשׂערי[ן] ושוי עלהא ואיתיהיב לה כח וגבורא מן קדם ייי לסוברא יתהון ומן יד איתאמר לה בנבוא[ה] דעתידין למיפק מנה שיתא צדיקי עלמ[א] דכל חד וחד מתברך בשיתא ברכן דויד ודניאל וחברוהי ומלכא משיחא ועל בועז לקרתא׃
3:16 [ai]ואתת לות חמותה בקריצתא ואמרת מאן /את#1##2#/ ברתי וחואה לה ית כל מאן דעבד לה גברא על פום מימר נבואה דאיתגליאת ליה עבד לה׃
3:17 [ai]ואמרת שית סאין דסערין יהב לי גברא ארום אמר לי לא תיהכי ריקניא לות חמותך׃
3:18 [ai]ואמרת תיבי ברתי עמי בביתא עד די תדעין אבית דינא דתגזר מן שמיא ואכדין יתפרש פתגם ארום לא ינוח גברא אילהין ישיצי לטב פתגמא יומא דין׃

next chapter