The Comprehensive Aramaic Lexicon

01:03.06 [ai]	עובדא הוה בחד חסידא ושמיה טובי בר טוביאל משבטא דנפתלי
01:03.07 [ai]	דאשתבי ביומי שלמנאצר מלכא דאתור והוה יתיב בתשבי קרתא
01:03.08 [ai]	דנפתלי דבגלילא וכל יומוי הליך טובי באורחא תקנא וזכוון סגיאן עבד
01:03.09 [ai]	לאחוהי ולעמיה דהוו עמיה בגלותא בננוה בארעא דאתור; וכד הוה
01:03.10 [ai]	טליא בארעא דישראל כל שבטא דנפתלי מרדו במלכותא דדוד ומנעו
01:03.11 [ai]	גרמיהון למיסק לירושלם והוו דבחין לעגליא דעבד ירבעם מלכא דישראל
01:03.12 [ai]	בבית אל ובדן והוא בלחודוהי אזל לירושלם בזמני מועדיא כמה
01:03.13 [ai]	דכתוב בספר אוריתא דמשה והוה מוביל לתמן בכוריא ואפרשותא
01:03.14 [ai]	ומעשריא ויהיב להון לכהניא ולליואי לכל חד וחד מאי דחזי ליה
01:03.15 [ai]	ומעשרא תניינא ומעשרא עניא הוה אכיל ויהיב ככל מה דכתו׳
01:03.16 [ai]	בספרא דמשה והדין טובי אשתאר יתמא מאבוהי ורבת יתיה דבורה
01:03.17 [ai]	אמיה דאבוהי והיא אדרכתיה באורחא קשיטא וכד הוה גבר נסב
01:03.18 [ai]	אתתא מזרעיתה ושמה חנה וילידת ליה בר וקרא שמיה טוביה׃ כד
01:04.01 [ai]	אשתבי טובי יתב בנינוה קרתא רבתא וכל אחוהי וקריבוהי הוו מסאבין
01:04.02 [ai]	נפשיהון ואכלין לחמא מן בני עממיא והוא לא אכל דהוה דחיל מן
01:04.03 [ai]	אלהא ורחם יתיה בכל לביה׃ ועל דא יהב ליה אלהא חנא וחסדא
01:04.04 [ai]	בעיני שלמנאצר מלכא דאתור ומני יתיה רבא על כל מה דהוה ליה
01:04.05 [ai]	עד יום מותיה׃ ובההיא זימנא אפקיד בידא דגבאל אחוהי דקברי
01:04.06 [ai]	קריביה בארעא דמדי בקורי רגש עשר ככרין דכסף׃ וביומי טובי מית
01:04.07 [ai]	שלמנאצר מלכא דאתור ומלך סנחריב בריה תחתוהי ובהלין יומיא
01:04.08 [ai]	סגיאו אנגרייתא ולא יכיל טובי למיזל לארעא דמדי דפסקו עברי אורחא
01:04.09 [ai]	מטול ביהלתא ולא נסב כספיה מידא דגבאל׃ וביומי סנחריב עבד
01:04.10 [ai]	טובי זכוון סגיאן לחשיכיא והוה זיין כפנין ויתמין ומלביש ערטילאין
01:04.11 [ai]	והוה גמיל חסדא סגי וכד הוה חזי קטילא רמי באורחא דיהודאי הוה
01:04.12 [ai]	קביר ליה׃ וכד תב סנחריב בביהות אפין מיהודה אזל לנינוה בתקוף רגז
01:04.13 [ai]	על עשר שיבטיא דבארעא דאתור וקטל מנהון סגי והות נבילתהון
01:04.14 [ai]	רמיין באורחא ולית קביר כד חמא טובי כדין סגי באיש עליה וקם
01:04.15 [ai]	בליליא וגנב פגריהון וקבר יתהון וכדין עבד זימנין סגיאין׃ זימנא חדא
01:04.16 [ai]	תבע סנחריב פגרי קטיליא ולא אשכח יתהון ואזלו אנשי נינוה ואכלו
01:04.17 [ai]	קורציה למלכא דטובי דקבר יתהון פקיד מלכא למקטליה כד שמע
01:04.18 [ai]	טובי קם וערק ופקיד מלכא למישלל ית ביתיה ואיטמר מקמיה חמשה
01:04.19 [ai]	וארבעין יומין עד דאדרמלך ושראצר בנוהי קטלוניה בחרבא ואינון
01:04.20 [ai]	אישתזבו לארע קרדו ומלך אסרחדון בריה תחותיה ומני מלכא אסרחדון
01:04.21 [ai]	לאקיקר בר חמאל אחוהי רבא על כל דליה ושליט בכל ארעא דאתור
01:04.22 [ai]	ומליל אקיקר מלין טבין על טובי למלכא ובעא מיניה ואתביניה לנינוה
01:04.23 [ai]	מטול דהוה אקיקר רחימיה וקריביה ובאנונה ההיא אהדרו ליה חנה
01:04.24 [ai]	איתתיה וטוביה בריה׃
02:05.01 [ai]	והוה כד מטא חגא דשבועיא אתקין אריסטוון רב וכד יתיב
02:05.02 [ai]	על פתורא אמ׳ לטוביה בריה זיל ואייתי לי מאחנא מסכניא מן
02:05.03 [ai]	דחליא דאלהא למיכל עמנא ואנא אמתין לך עד מייתך׃ ואזל טוביה
02:05.04 [ai]	ואשכח גברא חד קטיל רמא באורחא וחוי לאבוהו וכד שמע
02:05.05 [ai]	טובי כן קם מן פתורא ולא אכל ואזל ונטליה מן רחובא
02:05.06 [ai]	דקרתא ואעליה בחד ביתא עד מיעל שמשא דיכיל למקבריה ותב
02:05.07 [ai]	לביתיה ואכל לחמיה באיל{ו}<י>א ובדוונא ואמר ווי דאיתקיים בנא
02:05.08 [ai]	"והפכתי חגיכם לאבל" ובכא בכיה רבא לחדא׃ וכד על שימשא
02:05.09 [ai]	אזל וקבריה וקריבוהי גחכין עלוהי ואמרין לית דין דחיל מן נפשיה
02:05.10 [ai]	והוא קבר מיתיא׃ ובליליא ההוא לא טבל מן מיתא ושכב על
02:05.11 [ai]	ערסיה סטר כותלא ואפוהי גליין ולא ידע דצפרין קיימין עלוהי בכותלא
02:05.12 [ai]	ונפל מצואתהון על עינוהי והות חילוז בעיניה וכל צפר וצפר הוה אזיל
02:05.13 [ai]	לאסייא לאסאה עיינוה ולא איתסי אלא אסגי חיורא בעינוי עד דאיסתמי
02:05.14 [ai]	והוה סמיא ארבע שנין וכל אחוהי וקריבוהי הוו עציבין עליה ואקיקר
02:05.15 [ai]	הוה מפרנס יתיה׃ ליומין סגיאין חנה אתתיה הוה עבדה עבידיא
02:05.16 [ai]	לנשייא חורנייתא ויהבו ליה גדיא חד בגין אגרה והוה שמע גדיא זעיק
02:05.17 [ai]	בביתא ושאל יתה מנן ליך גדיא הדין דילמא גניב הוא אהדר יתיה
02:05.18 [ai]	למריה דלא כשר לנא למיכל מן גניבתא ענת יתיה ליתוי מן גניבתא
02:05.19 [ai]	ברם באגר עובד ידאי קבילתיה ולא האמין טובי למילתא ונצא עמיה
02:05.20 [ai]	על גדיא; ענת חנה אנתתיה ואמרת ליה אן טובך וזכוותך וקלנך
02:05.21 [ai]	אתגלי לכולא׃
03:05.22 [ai]	כד שמע טובי אתאלץ סגי ובכא ושרא לצלאה בעקת נפשיה וכדין
03:05.23 [ai]	אמר זכאי את אלהא רבא וכל עובדך גבורתא וכל אורחתך טיבו וקשוט
03:06.01 [ai]	ואת דיין כל ארעא לא תנקום מינאי כחובאי וכחובי אבהתאי ואנא
03:06.02 [ai]	ואבהתאי חבנא קדמך ואעדינא מפקודך ויהבתה יתנא לשביא ולבזה
03:06.03 [ai]	לקלנא ולשועי לכל עממיא דאגליתא יתנא ביניהון וכען אלהא רחמך
03:06.04 [ai]	נפישין ודינך קשוט לא תגמול עמי כחובאי ברם כחסדך סגיא עביד
03:06.05 [ai]	עמי וקביל נפשי מן ידאי ארום טב לי מותי מחיי במסכנות רבתא
03:06.06 [ai]	ובחיסודא אלין ולא אשמע קלנא עוד׃ וביומא ההוא שרה בת רעואל
03:06.07 [ai]	דהות באגבתניס מדינתא בארעא דמדי שמעת חיסודא רבתא מטול
03:06.08 [ai]	דאתיהבת לשבעה גוברין לאינתו ולא על עלה אינש כאורח כל ארעא
03:06.09 [ai]	ארום אשמדאי מלכא דשידי קטיל יתהון עד לא יעלון עלה כאורח כל
03:06.10 [ai]	ארעא אמרת ליה אמהה אנת היא דקטלת ית גובריא דיליך מטול
03:06.11 [ai]	דאתיהיבת לשבעה גוברין וחד מנהון לא עאל עלך דאנת מלקה יתהון
03:06.12 [ai]	ובדיל גובריא דקטלת לואי דתימות אנת כמה דמיתו אינון ולא נחזי
03:06.13 [ai]	מנך לא ברא ולא ברתא לעלם׃ והוה כד שמעת שרה מיליא אילין
03:06.14 [ai]	אתאלצת סגי ובכת וסליקת לעיליתא דאבוהא וצבת למצלב גרמה
03:06.15 [ai]	ולאחתא שיבתא דאבוהא בדוונא לשאול מטול כן לית לי טב למצלב
03:06.16 [ai]	גרמי ברם טב לי לצלאה קדם אלהא ולא אשמע חיסודא תוף׃ בעידנא
03:06.17 [ai]	ההיא פריסת ידהא בצלו קדם אלהא וכדין אמרת בריך את יי׳ אלהים
03:06.18 [ai]	רחמנא וחננא ובריך שם קדשך דמפרש בכל עלמיא יברכונך כל עובדי
03:06.19 [ai]	ידך לעלם ולעלמי עלמין וכען יי׳ קדמך ארימית אפאי ועינאי לוותך
03:06.20 [ai]	תליין אימר דאתיב לעפרי ולא אשמע חיסודאי עוד גלי קדמך יי׳
03:06.21 [ai]	דדכיא אנא מכל סואבת גבר ולא סאיבית ית שמאי וית שמא דאבא
03:06.22 [ai]	בארע תותבותי; יחידה אנא לאבא ולית ליה בר למירת אחסנתיה ולא
03:06.23 [ai]	קריב אית ליה די ישארינני ליה והרי מיתו בגיני שבעה גוברין ומה
03:06.24 [ai]	אית לי תוף חיי ואם לית טב קדמך למיקטל יתי חוס עלאי ולא
03:07.01 [ai]	אשמע חיסודא תוף׃ ביומא ההוא עלת צלותא דתרויהון קדם כורסי
03:07.02 [ai]	יקרא דאלהא רבא ושלח מלאכא רפאל לאסאה תרויהון ית טובי
03:07.03 [ai]	לאעדאה חיורא מעינוי וית שרה בת רעואל למיתן לטוביה בר טובי
03:07.04 [ai]	לאינתו ולאעדאה אשמדאי מלכא דשידי מינה׃ וכד שיצי טובי ית
03:07.05 [ai]	צלותיה תב לביתיה ושרה בת רעואל נחתת מעיליתא דאבוהא כד
03:07.06 [ai]	שיציאת לצלאה׃
04:07.07 [ai]	בה בשעתא דכר טובי ית כספא דאפקיד בידא דגבאל בקורי ריגש
04:07.08 [ai]	בארעא דמדי ואמר בליביה הא שאלית ית נפשי ליממת איקרי ית ברי
04:07.09 [ai]	טוביה ואודע ליה עסקא דכספא עד לא אימות׃ וקרא טוביה בריה
04:07.10 [ai]	ואמר ליה ברי כד אימות קבר יתי ביקר וייקר ית אימך ולא תשבקינה
04:07.11 [ai]	כל יומי חייהא ועביד לה כל דתקין בעינהא ולא תסרב על מימר
04:07.12 [ai]	פומהא אידכר כמה אתעיקת עלך וכד מיתא קבר יתה עמי בקברא חד׃
04:07.13 [ai]	וכל יומך יי׳ אלהך תדחל ולא תצבי למיחטי ולא תעבר על תפקדתייא
04:07.14 [ai]	עביד צדקתא כל יומך ולא תהך עם גבר חטוף ארום אם תעביד קשוט
04:07.15 [ai]	טב לך בכל דלך וכל עבדי צדקתא טוביהון׃ ברי מנכסך עביד צדקתא
04:07.16 [ai]	ולא תתכסי מן גבר חסיך ואלהא לא יכסה שכינתיה מינך; ברי עד
04:07.17 [ai]	דאית יוכלא בידך למעבד צדקתא עביד ואם מתרחק מינך עותרא
04:07.18 [ai]	עביד צדקתא ותקנה נכסין ואם תעביד צדקתא דרופתק טב תקנה ביום
04:07.19 [ai]	ריתחא ארום היא משיזבא מן מותא ולא תשבוק למרה למיחת חשוכא
04:07.20 [ai]	טבתא וכל מאן דעביד לה יתקיים בדילה הלא אבהתנא לא אישתבחו
04:07.21 [ai]	אילהין בצדקתא באברהם אבונא כתבא מפרש "כי ידעתיו למען אשר
04:07.22 [ai]	יצוה את בניו ואת ביתו אחריו וגו׳ לעשות צדקה ומשפט ביצחק כת׳
04:08.01 [ai]	ויזרע יצחק בארץ ההיא ביעקב כת׳ וכל אשר תתן עשר אעשרנו
04:08.02 [ai]	לך"׃ ברי מכל עצת חטאין ומכל טעותא מנע גרמך וסב לך אתתא
04:08.03 [ai]	מזרעיתך ולא תיסב מן בני עממיא ארום בני נביאי אנן מטול דנביאי
04:08.04 [ai]	קדמאי הוו נח ואברהם יצחק ויעקב אבהתאנא מעלמא הוי דכיר כל
04:08.05 [ai]	אילין נסיבו נשין מזרעא דאחוהון ואתבריכו בבניא וזרעייהו אחסינו
04:08.06 [ai]	ארעא׃ וכען ברי רחם ית אחך ולא יזוח לבך בבניא ובבנתא ברי הב
04:08.07 [ai]	לבך לכל עובדך ודסאני לך לחורני לא תעביד ארום בזדונא שגושיא
04:08.08 [ai]	אית והיא מרחק קדם יי׳ לא תבית אגרת אגירא עמך ופולחנך ישלם
04:08.09 [ai]	לך אלהא מלחמך הב לכפנין ומלבושך הב לערטילאין ולא יקשה
04:08.10 [ai]	בעינך׃ ברי לחמך וחמרך אשוד על קברי זכאין ושמע למלכא טבא
04:08.11 [ai]	בכל עידן שאל אלהך והוא יכשר אורחותך ארום לית לאיניש מלך
04:08.12 [ai]	טב אלהין אלהא ארום כל דצבי מרים וכל דצבי מהשפיל׃ ברי טר
04:08.13 [ai]	אמרי פומי ופקודי ולא י<ז>ל{ז}ון מעינך׃ וכען ברי אודעך עסק כספי עשר
04:08.14 [ai]	ככרין דאפקדית בידא דגבאל בקורי ריגש במדי ארום לא ידעית יום
04:08.15 [ai]	מותי׃ וכען קדם יי׳ תדחל ותיטר גרמך מכל חובא ובצנעה תהך עימיה
04:08.16 [ai]	ויתן לך עותר רב׃
05:08.17 [ai]	ענה טוביה לאבוהי כל דפקדתני אעביד אבל איכדין איכול למיסב
05:08.18 [ai]	כספא מידא דגבאל דהוא לא חכים לי ואנא לא חכים ליה ומה סימנא
05:08.19 [ai]	איהב ליה ויהימין לי ויתן לי ית כספא ואורחא דיובילני למדי לא
05:08.20 [ai]	ידענא׃ אתיב טובי ואמר לטוביה ברי דין לך סימנא טועניה יהב לי
05:08.21 [ai]	וטועני יהבית ליה כמה דשויתי כספא ופקדתיניה בידיה ומן יומא
05:08.22 [ai]	ההוא עד יומא דין עשרין שנין׃ וכען ברי פשפש גבר מהימן מן דיהך
05:08.23 [ai]	עמך וניהב ליה אגריה זיל ברי עד דאנא קיים וסב ית כספא׃ ונפק
05:08.24 [ai]	טוביה למיבלש גבר דיהך עמיה ואשכח ית רפאל מלאכא קאים ולא
05:09.01 [ai]	חכמיה דמלאכא דיי׳ הוא שאליה מנן את אתיביה מבני ישראל חד
05:09.02 [ai]	מאחך אמר ליה טוביה חכים את למיזל למדי אמ׳ ליה מלאכא ידענא
05:09.03 [ai]	אורחיה ובמדי הוינא אושפיזא עם גבאל אחונא דיתיב באגבתניס עד
05:09.04 [ai]	ראגיש והיא בנויה בטורא ואגבתניס במישרא אמ׳ ליה טוביה אמתין
05:09.05 [ai]	לי ציבחר ואחוי לאבא דרגיג אנא דתהך עמי ואתן לך אגר אורחא
05:09.06 [ai]	אמ׳ ליה אנא עכיבנא עד דתיתי׃ אזל טוביה וחוי לאבוהי אשכחית
05:09.07 [ai]	גבר חד מאחנא דיהך עמי נם ליה טובי זיל קרא ליה ואידע מאידין
05:09.08 [ai]	שבטא הוא אם מהימן הוא למיהך עמך נפק טוביה וקרא ליה ואזל
05:09.09 [ai]	רפאל לטובי ואמר ליה שלם עלך אמר טובי ואית שלם עלי למה אירע
05:09.10 [ai]	לי כל דא ואנא לא חזינא נהורא דשמיא קל מלין אנא שמע וגברא
05:09.11 [ai]	לא חזינא ואנא שכיב בחשוכא אמר רפאל יכיל אלהא לאסאה עינך
05:09.12 [ai]	ארום גבר חסידא את׃ אמר ליה טובי טוביה ברי צבי למהך למדי את
05:09.13 [ai]	יכיל למהך עמיה וניתן אגרך אמר ליה יכילנא גברא שליחא אנא
05:09.14 [ai]	וחכימנא שביליא ותחומיא וטוריא ידענא׃ אמר טובי חוי לי מאידין
05:09.15 [ai]	שבטא את ושום קרתא דאת דייר בה אמר רפאל אם לית אנא כשר
05:09.16 [ai]	בעינך זיל ובליש גברא חורנא דיהך עם ברך אמ׳ ליה טובי אחי לא
05:09.17 [ai]	תכעוס עלי דצבינא למידע בקושטא ית שמך ומאידין זרעיתא את אמר
05:09.18 [ai]	ליה אנא עזריה בר חננאל מביתא דשלמיה רבה מאחך ואמר טובי
05:09.19 [ai]	בהשקט ובשליותא תיתי אחי לא תרגז עלי על דבעינא למידע זרעיתא
05:09.20 [ai]	דילך והא אחי מזרעיתא טבא הוא ואנא חכמית חננאל ונתן תרין בני
05:09.21 [ai]	דשלמיה רבא והוון סלקין עמי לירושלם כד יתיבנא בארעא דישראל
05:09.22 [ai]	וסגדין עמי תמן ולא שגו אילין באנונא דטעו אחנא מזרעיתא טבתא
05:09.23 [ai]	את עול בשלם ואתן לך אגרך טרפעיקא כל יומא ומיכלך שוה לברי
05:09.24 [ai]	ותוף אטפי על אגרך׃ ענא רפאל לא תדחל דאנא אהך עם ברך וניתוב
05:10.01 [ai]	בשלם׃ קרא טובי לטוביה בריה נם ליה ברי אתקין גרמך ופוק לאורחא
05:10.02 [ai]	עם אחך אלהא דשמיא ידבר יתכון לתמן לשלם וישלח מלאכיה עמכון
05:10.03 [ai]	ויצלח אורחכון ויתיבכון לשלם׃ נשק טובי[ה] לאבוה ולאמיה ואמרו ליה
05:10.04 [ai]	זיל לשלם ונפקו למהך ובכת אמיה ואמרת לטובי מטול מנא לא
05:10.05 [ai]	דחילתא למשלח טליא ארום בר יחידאי הוא לנא והוא יפוק וייעול
05:10.06 [ai]	קדמנא בלא כספא פרנסנא אלהא אמר לה טובי לא תדחלין בשלם
05:10.07 [ai]	ייזיל ובשלם יתוב ומלאך טב ייזיל עמיה ויצלח אורחיה ועינך תחזון
05:10.08 [ai]	יתיה דיתוב בשלם ומנעי מלמבכי׃
06:10.09 [ai]	אזל טליא ורפאל עמיה ואתו עד נחל תיגרין ברמשא ובתו תמן
06:10.10 [ai]	ורהט טוביה לנהרא למשזגא רגלוי ובשלו נפק נון חד מן נהרא ואכל
06:10.11 [ai]	לחמא דטליא וצווח טליא אמר ליה רפאל אחיד נונא ולא תשבקיניה
06:10.12 [ai]	ותפש ית נונא ואפקיה ליבשתא אמר ליה רפאל בזע נונא במציע וסב
06:10.13 [ai]	ליביה הוא טב לאקטרא מיניה קדם גברא דאית ביה רוח שידא ורוחא
06:10.14 [ai]	בישתא וייערקון מניה ומררתא למימשח מיניה עיינין דאית בהון חיורא
06:10.15 [ai]	ויתסון׃ עבד כן טוביה ונסב ליבא ומררתא ונונא אפה ואכל ומותרא
06:10.16 [ai]	שבק באורחא ואזלו עד מדי ואתו באגבתניס ואמר רפאל לטוביה אחי
06:10.17 [ai]	עם רעואל תיתי דהוא גבר סב וליה ברתא חדא שפירתא לחדא ושמה
06:10.18 [ai]	שרה ואימר ליה דיתנינה לך לאנתו והיא יחידה לאבוהא והוא רחים
06:10.19 [ai]	לה טובא והיא איתתא טבתא ודחלת שמיא וכד נתוב מן ראגיש
06:10.20 [ai]	נעביד חופתא וידענא ארום לא יסרב רעואל פומך ויתן יתה לך
06:10.21 [ai]	ונובלינה עמנא לאבוך׃ אמר טוביה לרפאל שמעית דהיא אתיהיבת
06:10.22 [ai]	לשבעה גברין ומיתו עד לא עלו לוותה ושמעית דאשמדאי מלכא דשידי
06:10.23 [ai]	קטיל יתהון וכען אנא דחיל מן שידא דילמא יקטלינני ואחית שיבתא דאבא
06:10.24 [ai]	[ואמא] בדוונא לשאול ולית להון בר חורן ולא ברתא למקברינון במותהון׃
06:11.01 [ai]	אמר ליה רפאל לית את דכיר תפקדתא דאבוך דפקדך דתסב אתתא
06:11.02 [ai]	מזרעיתא דאבוך וכען קביל מני ולא תדחל מן שידא ידענא דתסבינה
06:11.03 [ai]	ליליא הדין לאינתו וכד תיעול באנדרונא עמה סיב ליבא דנונא ואפטר
06:11.04 [ai]	מיניה תחות לבושה ושידא מורח והוא עריק ולא יתוב לעלם וכד תצבי
06:11.05 [ai]	למיעל לותה קומו מן ערסא וצלו ובעו רחמין מן קדם אלהא דאפקיד
06:11.06 [ai]	עליכון טיבותיה ויתן לך אסותא ובכן תיעול לותה ותוליד מינה בנין
06:11.07 [ai]	לא תדחל ארום לך הות מחזיא מיומא דעלמא ואת תפרקינה מן
06:11.08 [ai]	שידא׃ כד שמע טוביה מיליא האילין עלת רחימתא דשרה בלביה׃
07:11.09 [ai]	ועלו בבית רעואל באגבתניס ואשכחו יתיה סטר תרע ביתיה ושאילו
07:11.10 [ai]	בשלמיה אמר להון עולו בשלם לביתא ועלו לביתא אמר רעואל לעדנה
07:11.11 [ai]	אתתיה כמה דמי הדין טליא לדמותא דטובי אחי שאילת להון עדנה מנן
07:11.12 [ai]	אתון אתיבו לה מן שביתא דבנינוה משיבטא דנפתלי אמרת להון הידעתון
07:11.13 [ai]	טובי אחונא אמרו לה ידענא דשלם ליה אמר טוביה טובי אבא הוא
07:11.14 [ai]	רהט רעואל לקדמותיה וגפיף ליה ונשיק ליה ובכו׃ אמר רעואל בריך
07:11.15 [ai]	טובי ואת בר זכאי וקשיט ורפיונא דידיא הוא לנשי חיסדא על דאתעוור
07:11.16 [ai]	גבר זכאי ועביד זכוותא ומצוותא סגיאן וגפיף רעואל לטוביה בר אחוהי
07:11.17 [ai]	ובכא על צואריה ועדנה אנתתיה ושרה ברתיה בכו עלוהי׃ נכס רעואל
07:11.18 [ai]	דיכרא חד ואתקינו להון שירו ואכלו ושתו עד לא אכלו אמר טוביה
07:11.19 [ai]	לרפאל מליל עם רעואל על שרה ברתיה ויתנינה לי לאינתו׃ מליל
07:11.20 [ai]	רפאל עם רעואל פתגמי טוביה אתיב רעואל לטוביה ברי ידענא טב
07:11.21 [ai]	דאתן יתה לך מדאתן יתה לגבר חורן ברם אמרנא לך קושטא כבר
07:11.22 [ai]	יהבית יתה לשבעה גברין וכלהון מיתו עד לא עלו לותה וכען אכול
07:11.23 [ai]	ושתי אמר טוביה לא איכול עד דתיתנינה לי׃ אמר רעואל סב כען יתה
07:11.24 [ai]	ארום את אחוהא והיא אחתך וכען יהיבה לך לאנתו כהלכת אוריתא
07:12.01 [ai]	דמשה יי׳ אלהא דשמיא יפרוקינכון בליליא דין ויפקיד עליכון טיבותיה
07:12.02 [ai]	ושלמיה׃ ודבר רעואל ית שרה ברתיה ויהב יתה לטוביה לאנתו אמר
07:12.03 [ai]	ליה סיב יתה כהלכת אוריתא דמשה ודבר יתה לאבוך׃ וקרא רעואל
07:12.04 [ai]	לעדנה אתתיה לאיתאה ניירא למכתב עלוהי כתובתא לברתיה ועבדת
07:12.05 [ai]	כן וכתבו כתובתא וחתמו יתה סהדין ואכלו ושתו׃ אמר רעואל לעדנה
07:12.06 [ai]	אנתתיה אתקיני אידרון בית משכבא ואעלי ברתך ועבדת כן וגפיפת
07:12.07 [ai]	עדנה לשרה ברתה ובכת ואמרת ברתי יעביד עמך אלהא דשמיא
07:12.08 [ai]	בליליא הדין חיסדא וישגח עליכי ויתן לך חדווא על דוונא דהוו לך
07:12.09 [ai]	בעידנין דעברו׃
08:12.10 [ai]	והוה כד שלימו לאתקנא אידרונא וערסא ועלו לתמן טוביה ושרה
08:12.11 [ai]	אנתתיה ודכר טוביה מלוי רפאל ונסיב ליבא דנונא ושוי על מחתה
08:12.12 [ai]	וקטר תחות גלימת שרה ואשמדאי קביל ריחא וערק בסייפי ארעא
08:12.13 [ai]	דמצרים ורפאל קטריה ואסריה לתמן׃ ונפקו מן אידרונא ואחדו דשא
08:12.14 [ai]	בדיל תרויהון וקם טוביה מן ערסא ואמר לשרה אחתי קומוי ונירמי
08:12.15 [ai]	תחנונא קדם אלהא דיפקיד עלנא חיסדיה וטיבותיה וצלי טוביה קדם
08:12.16 [ai]	אלהא ואמר בריך את יי׳ אלהיה דישראל ובריך שמך לעולם יברכונך
08:12.17 [ai]	שמיא וכל ברייתך את בריתא אדם ויהבת ליה סמ[ך] ית חוה
08:12.18 [ai]	אתתיה ומינהון כל בני אינשא ואמרת לא תקין למיהוי אדם בלחודוהי
08:12.19 [ai]	אעביד ליה סמך לקבליה וכען אלהא את ידעת ארום לא בדיל זנותא
08:12.20 [ai]	נסבית אחתי דא אלהין כהלכת אוריתא חוס עלנא והב לנא חסדך
08:12.21 [ai]	לאתחברא אך חדא בשלם והב לנא בנין טבין ואתיבת שרה ואמרת
08:12.22 [ai]	אמן׃ ועל לוותה בליליא הוא והות בפילגות ליליא קם רעואל ואמר
08:12.23 [ai]	לעבדוהי לחפרא קברא בליליא ואמר להון אם מית טליא נקבריניה
08:12.24 [ai]	בליליא ואינש לא יידע ולא יהא לנא חיסודא וקרא לעדנה אנתתיה
08:12.25 [ai]	ואמר לה שדרי חדא מן אמתין לאידרונא דבוצינא בידה ותחזי אם
08:13.01 [ai]	הוא קיים ואם לא ונקבריניה ואינש לא ירגיש׃ ושלחת עדנה אמתה
08:13.02 [ai]	לאידרונא וחזת והא שכבין תרויהון ונפקת ואמרת להון בריכו מרי
08:13.03 [ai]	עלמא ארום קיים הוא ואמר רעואל בריך את יי׳ אלהא דשמיא וארעא
08:13.04 [ai]	את מחי ומסי וברכתך קדישא ודכיא יברכונך חסידך וכל יציר ידך
08:13.05 [ai]	ומלאכך יודונך לעולם ובריך שום יקרך ארום יהבת לנא חדותא
08:13.06 [ai]	בסגיאות טיבותך ולא כמה דאנן חשבין בריך את אלהא ארום חסתא
08:13.07 [ai]	על תרויהון הב להון שלמא וחסדא וחדוה בחייהון לעלם׃ ואתו עבדוהי
08:13.08 [ai]	ואמר להון כסיאו ית קברא עד לא ירגיש בנא בר נש ואמר לאנתתיה
08:13.09 [ai]	אתקיני לחם סגי ורהוטי לעדרא וסיבי מתמן עגלין וערבין ופקידי
08:13.10 [ai]	למעבד אריסטוון טב ועבדת כן׃ ואמר לטוביה לא תפוק מן ביתי עד
08:13.11 [ai]	ארבסר יומין ותחדי ברתי עגינתא ותיסב פלגות ניכסאי כען וכד נמות
08:13.12 [ai]	אנא ואנתתי תיסב כולא את תהא לי לבר יקיר ואנא אהא לך לאבא
08:13.13 [ai]	ועדנה אנתתי לאימא עד עלם׃
09:13.14 [ai]	בכן קרא טוביה לרפאל ואמר ליה עזריה אחי דבר עמך מכא
09:13.15 [ai]	ארבעה עבדין ותרין גמלין וזיל לראגיש סטר גבאל והב ליה מרצופיה
09:13.16 [ai]	ויתן לך כספא וזמין יתיה לכילתי מטול דאנא לא יכילנא למיזל לתמן
09:13.17 [ai]	בדיל דקיים רעואל דלא אפוק מן ביתיה עד ארבסר יומין ואבא מני
09:13.18 [ai]	יומיא ואם יעבר עדנא יומא חד אציף נפשא דאבא ולא יכילנא
09:13.19 [ai]	לבטלא קיים רעואל׃ אזל רפאל עם תרין גמלין וארבעה עבדין
09:13.20 [ai]	לקורי ראגיש ובתו בביתא דגבאל ויהב ליה מרצופיה וחוי ליה דטוביה
09:13.21 [ai]	בר טובי נסב שרה בת רעואל וטוביה הוה זמין ליה דיזיל לחופתיה
09:13.22 [ai]	כד שמע גבאל כן טען כספא על גמליא ואתא לכילתא ואשכח טוביה
09:13.23 [ai]	יתיב על פתורא ונשק ליה ובכא עלוהי מסגיאות חדואתא וברכיה
09:13.24 [ai]	ואמר אלהא דשמיא יברך גבר טב וקשיט עביד צדקתא סגיא ובריך
09:13.25 [ai]	אלהיה דטובי קריבי דיהב לך ולאבוך ולאמך אתתא טבתא הדא׃
10:14.01 [ai]	ובכל יומא ויומא טובי חשיב יומי בריה כמה יומין יכיל למיזל
10:14.02 [ai]	לקבלא כספא וכמה יומין למהדר וכד שלימו יומי חושבניה וטוביה
10:14.03 [ai]	בריה לא תב אמר בנפשיה דילמא עכבוניה תמן או מית גבאל ולא
10:14.04 [ai]	יהבו ליה כספא ושרי לאתענאה וחנה אתתיה אמרת ליה אבד ברי
10:14.05 [ai]	ולית נפשיה בחיין ועל דין הוא מתאחר ושרי למספד ולמבכי על ברה
10:14.06 [ai]	ואמרת ווי לי ברי דשלחיתך למיזל לארע רחיקתא נהור עינין למה
10:14.07 [ai]	שבקתיה למיזל וטובי הוה אמר לה שתיקי לא תתבהלין יתי ברך
10:14.08 [ai]	בשלם ברם מורע הוה ליה וגברא דאזל עמיה מהימן הוא לא תנסיסי
10:14.09 [ai]	גרמיך ארום ייתי בשלם וחנה אמרת ליה שתוק ולא תנחמינני על ברי
10:14.10 [ai]	והות נפקת לפרשת אורחיא ביממא ובליליא אתר דברה ייתי ביה ולא
10:14.11 [ai]	טעימת מדם אילהן דמעתא בליליא ולא נח לבה׃ וכד שלימו ארבסר
10:14.12 [ai]	יומי חופתא אמר טוביה לרעואל שלחנא ארום אבא ואמא לא סברין
10:14.13 [ai]	למחזי יתי וכען במטו מינך שלח יתי דלא יכילנא לאיתעכבא תוף׃
10:14.14 [ai]	אמר ליה רעואל אוחר עמי תוף ואשגר לחוואה לאבוך כל דעבדת׃
10:14.15 [ai]	אתיב ליה טוביה הב לי רשו למיתב לאבא בכן קם רעואל ותהב שרה
10:14.16 [ai]	ברתיה לטוביה ופלגות נכסיה עבדין וחמרין וגמלין עאן ותורין ולבושין
10:14.17 [ai]	ומאנין דכסף ודהב ושלח יתהון בשלוה ובהשקט וברכינון ואמר להון
10:14.18 [ai]	אלהא ישוי עליכון שלמא ויחזי לי מנכון בנין עד לא אימות וגפיף
10:14.19 [ai]	להון ונשיק להון ואמר לשרה ברתיה איז<ד>הירי ביקרא דחמוך וחמותיך
10:14.20 [ai]	דתרויהון קריביך זיל לשלם ונשמע מנך בשרתא טבתא וחדוא רבתא
10:14.21 [ai]	ונשק לה ושלחה׃ ועדנה אמרת לטוביה ברי ואחי את אלהא דשמיא
10:14.22 [ai]	ידברינך בשלם ויחזינני בנין קשיטין קדמוי מן שרה ברתי והא שרה
10:14.23 [ai]	ברתי בידך לא תעני יתה כל יומי חייה זיל בשלם אנא אימך ושרה
10:14.24 [ai]	אתתך אלהנא יצלח ארחיכון כל ימי חייכון ונישקת להון ושלחתנון׃
10:14.25 [ai]	ואזל טוביה חדי ובריך אלהא דשמיא וארעא דשלח מלאכיה ואצלח
10:15.01 [ai]	אורחיה ובריך רעואל ועדנה אנתתיה ואמר אלהא יסעדינני ליקרא
10:15.02 [ai]	יתכון כל יומי חייכון׃
11:15.03 [ai]	ואזל טוביה עד אקריס קרתא די קבל נינוה אמר רפאל לטוביה
11:15.04 [ai]	אחי את ידע איכדין שבקת ית אבוך וכען תיזיל אנתתך בתרנא עם
11:15.05 [ai]	גובריא דילן ואנא ואת ניזיל לפנאה ביתא ואזלו תרויהון קדמאין
11:15.06 [ai]	ואשכחו אמיה יתבא בפרשת אורחיא מסכייא ית ברה וכד חזת יתיה
11:15.07 [ai]	רהטת לקדמותיה וגפיפת ונשקת ליה ואמרת בריך אלהא דאתיבך
11:15.08 [ai]	בשלם דאנא לא חשיבית למיחזי אפך לעלם וכען ברי מה אוחרת
11:15.09 [ai]	למיתי וחוי ליה כל עובדיא וחדיאת סגיא ואמרת לה זיל את לאבוך
11:15.10 [ai]	ואנא קאימנא הכא עד דתיתי אנתתך ואזל טוביה ורפאל עמיה וכד
11:15.11 [ai]	שמע טובי ארום אתא בריה חדי סגי ואמר ליה ברי תב לותי ואנשק
11:15.12 [ai]	לך דאנא לא יכילנא למיזל לותך׃ אמר ליה רפאל לטוביה סב
11:15.13 [ai]	מררתא דנונא ושוי בעינוי ואסי אלהא ית עינוהי כיד מן אוולא וחדי
11:15.14 [ai]	טובי על חסדא רבה דעבד עמיה אלהא ובריך טובי ית אלהא ואמר
11:15.15 [ai]	בריך אלהא דלא מנע טיבותיה מני ואפקינני מחשוכא לנהורא את
11:15.16 [ai]	הוא מחי ומסי לית כותך אסי מגן ולית אלהא בשמיא ובארעא דיעבד
11:15.17 [ai]	כעובדך וכגברוותך׃ ואשתעי טוביה לאבוי כל דעבד ופניו ביתא ונפק
11:15.18 [ai]	טובי עם טוביה בריה לקדמות כלתיה ורפאל עמהון והוי כד חזאה
11:15.19 [ai]	חדי עלה ואעלה לביתיה ובריך ואמר יתן אלהא לך מן אנתתא הדא
11:15.20 [ai]	בנין קשיטין ועיני ועיני אמך חמן׃
12:15.21 [ai]	וכד עלו לביתא לא על עמהון רפאל ואזל ליה׃ בתר שעתא אמר
12:15.22 [ai]	טובי לטוביה פוק לשוקא וקרא עזריה אחונא וניתן ליה אגריה ועוד
12:15.23 [ai]	נוסיף עליה ארום גבר מהימן וקשיט הוא׃ ונפק טוביה לשוקא ובלש
12:16.01 [ai]	ולא אשכח לרפאל ושאל עלוי לכל אינשי קרתא ולא אשכח בר נש
12:16.02 [ai]	די חזייה׃ תב לאבוי ואמר ליה לא אשכחתיה וידע אבוי ארום מלאכא
12:16.03 [ai]	רפאל הוה דשדר אלהא לאסאה שרה מידוי דשידא ולאסאה עינוי
12:16.04 [ai]	ובריך אלהא ואמר בריך אלהא דשלח מלאכיה טב עם ברי ואצלח
12:16.05 [ai]	אורחיה ואסי תרין חסיכין מרעין כותנא׃ ומיומא ההוא ולהלא אצלח
12:16.06 [ai]	אלהא לטובי ולטוביה בריה ויהב ליה בנין מן שרה אנתתיה ומית
12:16.07 [ai]	רעואל ועדנה אנתתיה וירת טוביה כל נכסיהון׃
12:16.08 [ai]	בתר יומין אתמרע טובי וקרא לטוביה בריה ופקדיה על מצוותא
12:16.09 [ai]	דאלהא ואמר לה ברי הוי גמיל חיסדא כל יומך עם חסיכי ועתירי
12:16.10 [ai]	ועביד צדקתא כל יומך דבגין כן יברך אלהא כל עובדי ידך אברהם
12:16.11 [ai]	אבונא בדיל צדקתא ומעשרא דיהב ברכיה יי׳ וכן יצחק על דיהב
12:16.12 [ai]	מעשרא ועבד צדקתא וכן יעקב כד אזל לביתא דלבן וצלי צלותיה לא
12:16.13 [ai]	נדר אלא למיהב מעשרא [ו]צדקתא לחסיכי ובכן אצלחיה אלהא ויהב
12:16.14 [ai]	ליה כל מה דשאיל ונטריה מלבן ומעשו אחוהי ואת אם תעביד
12:16.15 [ai]	כעובדיהון יברכך כמה דבריך יתהון׃ ופקיד יתהון על שאר מצוותא
12:16.16 [ai]	ושלים לפקדא יתיה ואתכנש לעמיה וקבריה טוביה בריה ביקר רב
12:16.17 [ai]	ובתר מותיה בריך אלהא לטוביה על דקיים מצוותא דאבוי ואצלחיה
12:16.18 [ai]	סגי ויהב ברכתא בכל עובדי ידוי׃