| par. 104 | , ࡊࡅࡔࡈࡀ ࡀࡎࡉࡍࡊࡅࡍ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡉࡀ ࡀࡁ ࡀࡁࡅࡄࡅࡍ ࡌࡀࡋࡊࡀ ࡐࡉࡓࡉࡀࡅࡉࡎ ࡉࡀࡓࡃࡍࡀ ࡓࡁࡀ ࡖࡌࡉࡀ ࡄࡉࡉࡀ , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡄࡀࡋࡉࡋࡍࡉࡍ ࡏࡃࡀࡍ ࡁࡊࡅࡔࡈࡀ ࡅࡎࡐࡀࡍ ࡁࡄࡀࡉࡌࡀࡍࡅࡕࡀ ࡅࡌࡀࡋࡉࡋࡍࡉࡍ ࡁࡌࡀࡋࡀࡋࡉࡀ ࡖ ࡆࡉࡅࡀ ࡅࡏࡎࡄࡉࡈࡀࡁࡅࡍ ࡁࡏࡅࡑࡓࡀࡉ ࡖࡍࡄࡅࡓࡀ , ࡁࡓࡉࡊ ࡔࡅࡌࡀࡊ ࡅࡌࡔࡀࡁࡀ ࡔࡅࡌࡀࡊ ࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡁࡓࡉࡊ ࡅࡌࡔࡀࡁࡀ ࡄࡀࡊ ࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡖࡌࡍ ࡍࡀࡐࡔࡉࡀ ࡐࡓࡀࡔ , ࡕࡋࡀࡕࡀ ࡆࡉࡁࡍࡉࡀ , ࡀࡍࡀ ࡐࡋࡀࡍ ࡁࡓ ࡐࡋࡀࡍࡉࡕࡀ ࡓࡔࡉࡌࡍࡀ ࡁࡓࡅࡔࡌࡀ ࡖࡄࡉࡉࡀ ࡔࡅࡌࡀ ࡖࡄࡉࡉࡀ ࡅࡔࡅࡌࡀ ࡖࡌࡀࡍࡃࡀ ࡖࡄࡉࡉࡀ ࡌࡀࡃࡊࡀࡓ ࡏࡋࡀࡉ , ࡕࡋࡀࡕࡀ ࡆࡉࡁࡍࡉࡀ , ࡏࡅࡃࡍࡀࡉ ࡔࡀࡌࡅࡍ ࡒࡀࡋࡀ ࡖࡄࡉࡉࡀ , ࡕࡋࡀࡕࡀ ࡆࡉࡁࡍࡉࡀ , ࡍࡄࡉࡓࡀࡉ ࡀࡓࡉࡄ ࡓࡉࡄࡀ ࡖࡄࡉࡉࡀ , ࡕࡋࡀࡕࡀ ࡆࡉࡁࡍࡉࡀ , ࡓࡅࡔࡅࡌࡀࡉ ࡏࡋࡀࡅࡀࡉ ࡋࡀࡄࡅࡀ ࡁࡍࡅࡓࡀ ࡅࡋࡀࡄࡅࡀ ࡁࡌࡉࡔࡀ ࡅࡋࡀࡄࡅࡀ ࡖࡌࡔࡉࡄࡀ ࡌࡔࡀ ࡓࡅࡔࡅࡌࡀࡉ ࡁࡉࡀࡓࡃࡍࡀ ࡓࡁࡀ ࡖࡌࡉࡀ ࡄࡉࡉࡀ ࡖࡏࡍࡉࡔ ࡁࡄࡀࡉࡋࡉࡀ ࡋࡀࡌࡑࡉࡀ ࡔࡅࡌࡀ ࡖࡄࡉࡉࡀ ࡅࡔࡅࡌࡀ ࡖࡌࡀࡍࡃࡀ ࡖࡄࡉࡉࡀ ࡌࡀࡃࡊࡀࡓ ࡏࡋࡀࡉ , ࡊࡁࡉࡔ ࡄࡔࡅࡊࡀ ࡅࡕࡓࡉࡑ ࡍࡄࡅࡓࡀ ࡔࡅࡌࡀ ࡖࡄࡉࡉࡀ ࡅࡔࡅࡌࡀ ࡖࡌࡀࡍࡃࡀ ࡖ ࡄࡉࡉࡀ ࡌࡀࡃࡊࡀࡓ ࡏࡋࡀࡉ , ࡐࡅࡌࡀࡉ ࡁࡅࡕࡀ ࡅࡕࡅࡔࡁࡉࡄࡕࡀ ࡌࡋࡀ , ࡕࡋࡀࡕࡀ ࡆࡉࡁࡍࡉࡀ , ࡁࡅࡓࡊࡀࡉ ࡌࡀࡓࡁࡉࡊࡀ ࡅࡎࡀࡂࡃࡀ ࡋࡄࡉࡉࡀ ࡓࡁࡉࡀ , ࡕࡋࡀࡕࡀ ࡆࡉࡁࡍࡉࡀ , ࡋࡉࡂࡓࡀࡉ ࡌࡀࡃࡓࡉࡊࡀ ࡃࡉࡓࡊࡉࡀ ࡖࡊࡅࡔࡈࡀ ࡅࡄࡀࡉࡌࡀࡍࡅࡕࡀ , ࡕࡋࡀࡕࡀ ࡆࡉࡁࡍࡉࡀ , ࡀࡍࡀ ࡐࡋࡀࡍ ࡁࡓ ࡐࡋࡀࡍࡉࡕࡀ ࡑࡁࡉࡍࡀ ࡁࡌࡀࡑࡁࡅࡕࡀ ࡖ ࡁࡉࡄࡓࡀࡌ ࡓࡁࡀ ࡁࡓ ࡓࡅࡓࡁࡉࡀ ࡌࡀࡑࡁࡅࡕࡀࡉ ࡕࡉࡍࡀࡈࡓࡀࡉ ࡅࡕࡉࡎࡀࡒ ࡋࡓࡉࡔ ࡔࡅࡌࡀ ࡖࡄࡉࡉࡀ ࡅࡔࡅࡌࡀ ࡖࡌࡀࡍࡃࡀ ࡖࡄࡉࡉࡀ ࡌࡀࡃࡊࡀࡓ ࡏࡋࡀࡉ , ࡕࡋࡀࡕࡀ ࡆࡉࡁࡍࡉࡀ , ࡋࡉࡂࡓࡀࡉ ࡏࡃࡀࡉࡄࡅࡍ ࡖࡔࡅࡁࡀ ࡅࡕࡓࡉࡎࡀࡓ ࡋࡀࡕࡉࡔࡕࡀࡋࡀࡈ ࡏࡋࡀࡉ ࡔࡅࡌࡀ ࡖࡄࡉࡉࡀ ࡅࡔࡅࡌࡀ ࡖࡌࡀࡍࡃࡀ ࡖࡄࡉࡉࡀ ࡌࡀࡃࡊࡀࡓ ࡏࡋࡀࡉ ࡎ_____ࡀ , |
| par. 105 | ࡊࡅࡔࡈࡀ ࡀࡎࡉࡍࡊࡅࡍ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡉࡀ ࡁࡀࡁࡀ ࡓࡁࡀ ࡖࡁࡉࡕ ࡓࡀࡄࡌࡉࡀ ࡉࡀࡒࡉࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡀࡁࡀࡄࡀࡕࡀࡍ ࡒࡀࡃࡌࡀࡉࡉࡀ ࡉࡀࡒࡉࡓࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡉࡊ ࡂࡉࡍࡆࡀ ࡖ ࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡉࡀࡒࡉࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡌࡀࡓࡀ ࡖࡓࡀࡁࡅࡕࡀ ࡏࡋࡀࡉࡕࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡅࡔࡀࡌࡉࡍ ࡃࡀࡊࡉࡀ ࡁࡓ ࡍࡉࡑࡉࡁࡕࡅࡍ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡌࡀࡍࡃࡀ ࡖ ࡄࡉࡉࡀ ࡁࡓ ࡍࡉࡑࡉࡁࡕࡅࡍ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡄࡉࡁࡉࡋ ࡆࡉࡅࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡍࡅࡔ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡔࡉࡔࡋࡀࡌ ࡓࡁࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡎࡄࡀࡒ ࡆࡉࡅࡀ ࡓࡁࡀ ࡒࡀࡃࡌࡀࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡎࡀࡌ ࡆࡉࡅࡀ ࡃࡀࡊࡉࡀ ࡁࡅࡊࡓࡀ ࡄࡀࡁࡉࡁࡀ ࡓࡁࡀ ࡒࡀࡃࡌࡀࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡀࡃࡀࡕࡀࡍ ࡅࡉࡀࡃࡀࡕࡀࡍ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡔࡉࡋࡌࡀࡉ ࡅࡍࡉࡃࡁࡀࡉ ࡏࡅࡕࡓࡉࡀ ࡍࡀࡈࡓࡉࡀ ࡖࡉࡀࡓࡃࡍࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡎࡓࡉࡍ ࡅࡀࡓࡁࡀ ࡏࡅࡕࡓࡉࡀ ࡁࡍࡉࡀ ࡍࡄࡅࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡀࡓࡁࡀ ࡂࡅࡁࡓࡉࡀ ࡁࡍࡉࡀ ࡔࡋࡀࡌࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡍࡑࡀࡁ ࡅࡀࡍࡀࡍ ࡍࡑࡀࡁ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡎࡀࡓ ࡅࡎࡀࡓࡅࡀࡍ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡆࡄࡉࡓ ࡅࡆࡉࡄࡓࡅࡍ ࡁࡄࡉࡓ ࡅࡁࡉࡄࡓࡅࡍ ࡅࡕࡀࡓ ࡅࡕࡀࡓࡅࡀࡍ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡀࡓࡐࡏࡉࡉࡋ ࡅࡌࡀࡓࡐࡏࡉࡉࡋ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡉࡅࡐࡉࡍ ࡅࡉࡅࡐࡀࡐࡉࡍ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡄࡀࡁࡔࡀࡁࡀ ࡅࡊࡀࡍࡀ ࡖࡆࡉࡃࡒࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡁࡉࡄࡓࡅࡍ ࡅࡊࡀࡍࡐࡏࡉࡉࡋ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡃࡓࡀࡁࡔࡉࡀ ࡕࡀࡒࡍࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡔࡉࡄࡋࡁࡅࡍ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡁࡀࡓࡁࡀࡂ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡔࡉࡍࡂࡀࡋࡀࡍ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡋࡉࡄࡃࡀࡉࡀ ࡓࡁࡀ ࡆࡀࡃࡉࡒࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡏࡕࡉࡍࡑࡉࡁ ࡆࡉࡅࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡃࡀࡊࡀࡎ ࡌࡀࡍࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡃࡀࡊࡀࡎ ࡌࡀࡋࡀࡋࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡉࡀࡓ ࡃࡀࡊࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡉࡀࡓ ࡎࡀࡂࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡌࡀࡄࡆࡉࡀࡍ ࡌࡀࡋࡀࡋࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡀࡅࡀࡓ ࡊࡁࡀࡓ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡀࡅࡀࡓ ࡓࡁࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡅࡊࡀࡁࡀࡓ ࡓࡁࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡅࡊࡀࡔࡀࡓ ࡊࡀࡍࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄ{ࡅ}ࡉࡋࡀࡊ ࡌࡀࡋࡊࡀ ࡍࡁࡀࡈ ࡆࡉࡅࡀ ࡓࡁࡀ ࡒࡀࡃࡌࡀࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡎࡀࡌ ࡌࡀࡍࡀ ࡎࡌࡉࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡁࡀ ࡓࡁࡀ ࡖࡏࡒࡀࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡐࡀࡓࡑࡅࡐࡀ ࡓࡁࡀ ࡖ ࡏࡒࡀࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡃࡀࡌ ࡎࡄࡀࡒ ࡆࡉࡅࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡁࡉࡄࡓࡀࡌ ࡓࡁࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡅࡆࡀࡈࡀࡒ ࡌࡀࡍࡃࡀ ࡖ ࡄࡉࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡀࡅࡀࡓ ࡂࡀࡍࡆࡏࡉࡋ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡆࡉࡄࡓࡅࡍ ࡓࡀࡆࡀ ࡊࡀࡎࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡎࡀࡌࡀࡍࡃࡀࡓࡏࡉࡋ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡑࡀࡍࡀࡑࡏࡉࡉࡋ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡕࡀࡅࡓࡏࡉࡉࡋ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡂࡅࡁࡓࡀࡍ ࡏࡅࡕࡓࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡉࡊ ࡎࡉࡌࡀࡕ ࡄࡉࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡉࡊ ࡏࡆࡋࡀࡕ ࡓࡀࡁࡕࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡉࡊ ࡔࡀࡓࡀࡕ ࡍࡉࡈࡅࡐࡕࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡉࡊ ࡊࡀࡍࡀࡕ ࡍࡉࡈࡅࡐࡕࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡉࡊ ࡁࡉࡄࡓࡀࡕ ࡀࡍࡀࡍࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡉࡊ ࡌࡀࡓࡂࡀࡍࡉࡕࡀ ࡃࡀࡊࡉࡕࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡁࡀࡕࡅࡓ ࡓࡀࡌࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡏࡑࡈࡅࡍࡀ ࡓࡁࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡁࡀࡕࡅࡓ ࡌࡅࡆࡀࡍࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡐࡕࡀࡄࡉࡋ ࡁࡓ ࡆࡀࡄࡓࡏࡉࡉࡋ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡉࡀࡄࡉࡀ ࡉࡅࡄࡀࡍࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡀࡃࡀࡌ ࡂࡀࡁࡓࡀ ࡒࡀࡃࡌࡀࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡀࡊ ࡌࡀࡋࡊࡀ ࡔࡉࡕࡉࡋ ࡁࡓ ࡀࡃࡀࡌ ࡂࡀࡁࡓࡀ ࡒࡀࡃࡌࡀࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡍࡉࡄࡅࡉࡋࡊࡅࡍ ࡉࡀ ࡌࡀࡋࡊࡉࡀ ࡅࡏࡅࡕࡓࡉࡀ ࡅࡌࡀࡔࡊࡍࡉࡀ ࡅࡉࡀࡓࡃࡍࡉࡀ ࡅࡓࡄࡀࡈࡉࡀ ࡅࡔࡊࡉࡍࡀࡕࡀ ࡖࡀࡋࡌࡉࡀ ࡖࡍࡄࡅࡓࡀ ࡊࡅࡋࡀࡉࡊࡅࡍ ࡀࡎࡅࡕࡀ ࡅࡆࡀࡊࡅࡕࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡄࡀࡆࡀ ࡍࡉࡔࡉࡌࡕࡀࡉ ࡋࡃࡉࡋࡉࡀ ࡐࡋࡀࡍ ࡁࡓ ࡐࡋࡀࡍࡉࡕࡀ ࡖࡄࡀࡆࡀ ࡁࡅࡕࡀ ࡅࡓࡀࡄࡌࡉࡀ ࡁࡉࡕ ࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡎ_____ࡀ ࡌࡀࡓࡀࡉ ࡌࡔࡀࡁࡀ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖࡍࡄࡅࡓࡀ ࡉࡀࡕࡉࡓࡉࡀ ࡖࡏࡋࡀࡅࡉࡀ ࡅࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡄࡀࡉࡋࡀ ࡅࡔࡓࡀࡓࡀ ࡅࡏࡌࡓࡀ ࡅࡔࡉࡌࡀ ࡄࡀࡃࡅࡀࡕ ࡋࡉࡁࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ,, ࡁࡓ ,, ࡍࡉࡍࡄࡀࡓࡋࡉࡀ ࡏࡅࡑࡓࡀࡉ ࡅࡌࡀࡃࡀࡉ ࡅࡌࡀࡃࡉࡄࡕࡀࡉ ࡁࡄࡀࡆࡉࡍ ࡂࡉࡍࡆࡀ ࡅࡎࡀࡊࡀ ࡖࡓࡀࡄࡌࡉࡀ ࡅࡁࡄࡀࡉࡋࡇ ࡖࡉࡀࡅࡀࡓ ࡆࡉࡅࡀ ࡅࡎࡉࡌࡀࡕ ࡄࡉࡉࡀ ࡎ_____ࡀ |
| par. 106 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡒࡅࡌ ࡒࡅࡌ ࡁࡄࡉࡓࡉࡀ ࡆࡉࡃࡒࡀ ࡒࡅࡌ ࡔࡀࡋࡌࡀࡍࡉࡀ ࡅࡌࡄࡀࡉࡌࡍࡉࡀ ࡒࡅࡌ ࡎࡂࡅࡃ ࡅࡔࡀࡁࡀ ࡋࡄࡉࡉࡀ ࡓࡁࡉࡀ ࡅࡔࡀࡁࡀ ࡋࡌࡀࡋࡊࡀ ࡓࡁࡀ ࡅࡔࡀࡁࡀ ࡋࡕࡀࡍࡀ ࡊࡀࡎࡉࡀ ࡄࡀࡌ ࡆࡉࡅࡀ ࡅࡔࡀࡁࡀ ࡋࡉࡀࡅࡀࡓ ࡓࡁࡀ ࡅࡏࡆࡋࡀࡕ ࡓࡀࡁࡕࡉࡀ ࡅࡔࡀࡁࡀ ࡋࡎࡉࡌࡀࡕ ࡄࡉࡉࡀ ࡖ ࡌࡉࡍࡀ ࡄࡅࡍ ࡊࡅࡋࡄࡅࡍ ࡀࡋࡌࡉࡀ ࡅࡔࡀࡁࡀ ࡏࡋ ࡀࡉࡍࡀ ࡅࡎࡉࡍࡃࡉࡓࡊࡀ ࡖࡀࡁࡀ ࡖࡏࡅࡕࡓࡉࡀ ࡖࡌࡉࡍࡀ ࡄࡅࡀ ࡀࡍࡀ ࡎࡀࡂࡃࡉࡍࡀࡋࡇ ࡅࡌࡔࡀࡁࡉࡍࡀࡋࡇ ࡋࡄࡀࡄࡅ ࡌࡀࡋࡊࡀ ࡓࡀࡌࡀ ࡓࡁࡀ ࡖࡍࡄࡅࡓࡀ ࡄࡀࡉࡀࡎࡀ ࡖࡌࡋࡉࡀ ࡓࡀࡄࡌࡉࡀ ࡎ_____ࡀ ࡄࡀࡆࡉࡍ ࡁࡅࡕࡀ ࡁࡅࡉࡀ ࡁࡓࡀࡄࡌࡉࡀ ࡖ ࡒࡀࡃࡅࡌࡉࡀ ࡀࡌࡉࡍࡈࡅࡋ ࡖࡐࡕࡀࡄࡀ ࡖࡓࡀࡄࡌࡉࡀ ࡄࡏ ࡄࡀࡊࡀ ࡒࡓࡉࡀ ࡔࡂࡀࡍࡃࡀࡉ ࡈࡀࡁࡀ ࡅࡋࡄࡉࡉࡀ ࡎࡀࡂࡉࡃࡍࡀ ࡅࡒࡓࡉࡀ ࡁࡔࡅࡌࡀࡉࡄࡅࡍ ࡎ_____ࡀ |
| par. 107 | , ࡁࡔࡅࡌࡀ ࡖࡄࡉࡉࡀ ࡓࡁࡉࡀ ࡔࡂࡀࡍࡃࡀࡉ ࡈࡀࡁࡀ ࡖࡍࡄࡅࡓࡀ ࡖࡌࡀࡎࡂࡉࡀ ࡋࡁࡉࡕ ࡓࡀࡄࡌࡉࡀ ࡀࡕࡀ ࡅࡕࡓࡀࡑࡋࡉࡀ ࡌࡀࡋࡀࡋࡀࡉ ࡅࡏࡐࡉࡄࡕࡇ ࡋࡐࡅࡌࡀࡉ ࡁࡕࡅࡔࡁࡉࡄࡕࡀ ࡅࡏࡔࡀࡁࡉࡍࡅࡍ ࡋࡄࡉࡉࡀ ࡓࡁࡉࡀ ࡌࡍ ࡓࡉࡔ ࡁࡓࡉࡔ ࡎ_____ࡀ |
| par. 108 | , ࡁࡔࡅࡌࡀ ࡖࡄࡉࡉࡀ ࡓࡁࡉࡀ ࡋࡄࡉࡉࡀ ࡎࡀࡂࡉࡃࡍࡀ ࡅࡋࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡌࡔࡀࡁࡀࡍࡀ ࡅࡋࡄࡀࡊ ࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡖࡌࡍ ࡍࡀࡐࡔࡉࡇ ࡐࡓࡀࡔ ࡎ_____ࡀ , ࡄࡀࡋࡉࡍ ࡕࡀࡓࡕࡉࡍ ࡁࡀࡅࡀࡕࡀ ࡁࡉࡍࡅࡍ ࡀࡁࡀࡕࡀࡓ ࡒࡅࡌ ࡒࡅࡌ ࡁࡄࡉࡓࡉࡀ ࡆࡉࡃࡒࡀ ࡁࡓࡀࡄࡌࡉࡀ ࡖࡒࡀࡃࡅࡌࡉࡀ ࡄࡀࡉࡆࡀࡊ ࡒࡓࡉࡀ ࡁࡔࡅࡌࡀࡉࡄࡅࡍ ࡅࡁࡔࡅࡌࡀ ࡖࡄࡀࡄࡅ ࡂࡀࡁࡓࡀ ࡒࡀࡃࡌࡀࡉࡀ ࡎ_____ࡀ |
| par. 109 | , ࡁࡔࡅࡌࡀ ࡖࡄࡉࡉࡀ ࡓࡁࡉࡀ ࡀࡍࡀ ࡋࡄࡉࡉࡀ ࡒࡀࡃࡌࡀࡉࡉࡀ ࡎࡀࡂࡉࡃࡍࡀ ࡅࡋࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡌࡔࡀࡁࡀࡍࡀ ࡅࡋࡄࡀࡊ ࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡖࡌࡍ ࡍࡀࡐࡔࡉࡇ ࡐࡓࡀࡔ ࡎ_____ࡀ ࡄࡀࡆࡉࡍ ࡁࡅࡕࡀ ࡁࡅࡉࡀ ࡁࡓࡀࡄࡌࡉࡀ ࡖࡔࡀࡁࡀ ࡔࡀࡉࡉࡀ ࡄࡀࡉࡆࡀࡊ ࡒࡓࡉࡀ ࡁࡔࡅࡌࡀࡉࡄࡅࡍ ࡅࡁࡔࡅࡌࡀ ࡖࡄࡀࡄࡅ ࡎ_____ࡀ |
| par. 110 | , ࡁࡔࡅࡌࡀ ࡖࡄࡉࡉࡀ ࡓࡁࡉࡀ ࡏࡃࡀࡍ ࡏࡃࡀࡍ ࡖࡓࡀࡄࡌࡉࡀ ࡌࡀࡈࡉࡀ ࡅࡏࡃࡀࡍ ࡖࡓࡀࡁ ࡁࡀࡅࡀࡕࡀ ࡌࡈࡀ ࡌࡀࡉࡀࡓࡀࡍࡀࡉ ࡄࡉࡁࡉࡋ ࡅࡃࡀࡓࡅࡔࡀࡉࡀࡉ ࡔࡉࡕࡉࡋ ࡓࡀࡌࡉࡀ ࡏࡍࡉࡀࡍࡉࡀ ࡀࡍࡅࡔ ࡑࡀࡁࡀ ࡁࡌࡀࡑࡁࡅࡕࡀࡉ ࡔࡉࡋࡌࡀࡉ ࡅࡌࡒࡀࡉࡌࡀࡍࡀ ࡖࡁࡀࡅࡀࡕࡀ ࡍࡉࡃࡁࡀࡉ ࡎ_____ࡀ |
| par. 111 | , ࡁࡔࡅࡌࡀ ࡖࡄࡉࡉࡀ ࡓࡁࡉࡀ ࡔࡂࡀࡍࡃࡀࡉ ࡈࡀࡁࡀ ࡖࡍࡄࡅࡓࡀ ࡖࡌࡀࡎࡂࡉࡀ ࡋࡁࡉࡕ ࡓࡀࡄࡌࡉࡀ ࡀࡕࡀ ࡅࡕࡓࡀࡑࡋࡉࡀ ࡌࡀࡋࡀࡋࡀࡉ ࡅࡏࡐࡉࡄࡕࡇ ࡋࡐࡅࡌࡀࡉ ࡁࡕࡅࡔࡁࡉࡄࡕࡀ ࡅࡏࡔࡀࡁࡉࡍࡅࡍ ࡋࡄࡉࡉࡀ ࡓࡁࡉࡀ ࡌࡍ ࡓࡉࡔ ࡁࡓࡉࡔ ࡎ_____ࡀ |
| par. 112 | , ࡁࡔࡅࡌࡀ ࡖࡄࡉࡉࡀ ࡓࡁࡉࡀ ࡋࡄࡉࡉࡀ ࡎࡀࡂࡉࡃࡍࡀ ࡅࡋࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡌࡔࡀࡁࡀࡍࡀ ࡅࡋࡄࡀࡊ ࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡖࡌࡍ ࡍࡀࡐࡔࡉࡇ ࡐࡓࡀࡔ ࡎ_____ࡀ ࡄࡀࡆࡉࡍ ࡁࡅࡕࡀ ࡖࡏࡃࡀࡍࡀ ࡖࡓࡀࡄࡌࡉࡀ ࡄࡏ ࡐࡕࡀࡄࡀ ࡖࡓࡀࡄࡌࡉࡀ ࡖ ࡋࡐࡀࡉࡍࡀ ࡄࡀࡉࡆࡀࡊ ࡒࡓࡉࡀ ࡁࡔࡅࡌࡀࡉࡄࡅࡍ ࡅࡁࡔࡅࡌࡀ ࡖࡄࡀࡄࡅ ࡅࡕࡓࡅࡑ ࡕࡀࡂࡀࡊ ࡅࡒࡓࡉࡀ ࡏࡋ ࡀࡂࡀࡍࡁࡉࡀ ࡕࡀࡂࡀࡊ ࡄࡉࡉࡀ ࡒࡉࡓࡉࡅࡉࡀ ࡅࡍࡄࡅࡓ ࡍࡄࡅࡓࡀ ࡅࡌࡀࡍࡃࡀ ࡒࡓࡀࡍ ࡄࡀࡉࡆࡀࡊ ࡒࡓࡉࡀ ࡓࡉࡄࡀ ࡖࡁࡀࡎࡉࡌ ࡅࡄࡀࡋ ࡄࡉࡉࡀ ࡒࡀࡃࡌࡀࡉࡉࡀ ࡋࡓࡉࡄࡀ ࡅࡓࡌࡉࡀ ࡋࡍࡅࡓࡀ ࡄࡀࡊࡀ ࡒࡓࡉࡀ ࡁࡅࡕࡀ ࡖࡄࡀࡁࡔࡀࡁࡀ ࡎ_____ࡀ |
| par. 113 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡀࡎࡅࡕࡀ ࡕࡉࡄࡅࡉࡋࡉࡀ ࡋࡃࡉࡋࡉࡀ ࡁࡄࡀࡆࡀ ࡁࡅࡕࡀ ࡖࡄࡀࡁࡔࡀࡁࡀ ࡏࡋ ࡍࡄࡅࡓ ࡀࡉࡀࡓ ࡒࡀࡉࡉࡌࡍࡀ ࡅࡏࡋ ࡍࡄࡅࡓࡀ ࡓࡁࡀ ࡖࡁࡆࡀࡊࡅࡀࡕࡇ ࡀࡍࡀ ࡄࡅ ࡌࡀࡍࡃࡀ ࡖࡄࡉࡉࡀ ࡁࡓ ࡍࡉࡑࡅࡁࡕࡅࡍ ࡖࡄࡉࡉࡀ ࡓࡅࡓࡁࡉࡀ ࡒࡀࡃࡌࡀࡉࡉࡀ ࡒࡓࡉࡕࡉࡋࡇ ࡋࡄࡀࡁࡔࡀࡁࡀ ࡔࡁࡉࡄࡀ ࡍࡀࡈࡓࡀ ࡃࡀࡊࡉࡀ ࡖࡍࡄࡅࡓࡀ ࡖࡌࡀࡍࡄࡀࡓ ࡏࡅࡕࡓࡉࡀ ࡅࡀࡌࡀࡓࡍࡀࡋࡇ ࡒࡅࡌ ࡀࡎࡂࡉࡀ ࡏࡆࡉࡋ ࡍࡄࡅࡕ ࡋࡀࡓࡒࡀ ࡖࡕࡉࡁࡉࡋ ࡋࡀࡋࡌࡀ ࡄࡀࡆࡉࡍ ࡖࡊࡅࡋࡇ ࡌࡀࡅࡃࡀࡋࡀ ࡋࡅࡀࡕࡀࡉࡅࡍ ࡖࡁࡄࡉࡓࡉࡀ ࡆࡉࡃࡒࡀ ࡂࡅࡁࡓࡉࡀ ࡂࡁࡉࡋࡉࡀ ࡁࡉࡎࡓࡀ ࡅࡆࡌࡀ ࡅࡋࡂࡅࡈࡅࡍࡅࡍ ࡁࡋࡉࡂࡅࡈࡕࡀࡊ ࡅࡀࡔࡀࡓࡁࡅࡍ ࡅࡒࡅࡌࡁࡅࡍ ࡅࡏࡆࡃࡀࡄࡀࡓࡁࡅࡍ ࡅࡏࡄࡀࡁࡋࡅࡍ ࡄࡀࡉࡋࡀ ࡅࡔࡓࡀࡓࡀ ࡖࡍࡉࡒࡌࡅࡍ ࡅࡍࡉࡎࡉࡂࡃࡅࡍ ࡅࡍࡉࡔࡀࡁࡅࡍ ࡋࡄࡉࡉࡀ ࡓࡅࡓࡁࡉࡀ ࡍࡅࡊࡓࡀࡉࡉࡀ ࡄࡀࡉࡆࡀࡊ ࡌࡀࡋࡉࡋ ࡄࡀࡁࡔࡀࡁࡀ ࡅࡋࡌࡀࡍࡃࡀ ࡖࡄࡉࡉࡀ ࡖࡍࡉࡌࡀࡓࡋࡇ ࡄࡀࡉࡆࡉࡍ ࡌࡔࡀࡃࡓࡀࡕࡋࡉࡀ ࡋࡀࡋࡌࡀ ࡄࡀࡆࡉࡍ ࡖࡊࡅࡋࡇ ࡌࡀࡅࡃࡀࡋࡀ ࡋࡅࡀࡕࡀࡉࡅࡍ ࡖࡁࡄࡉࡓࡉࡀ ࡆࡉࡃࡒࡀ ࡂࡁࡉࡋࡉࡀ ࡁࡉࡎࡓࡀ ࡅࡆࡌࡀ ࡖࡋࡀࡌࡀࡅࡒࡉࡓࡉࡋࡉࡀ ࡅࡌࡀࡔࡉࡈࡉࡋࡉࡀ ࡅࡁࡏࡒࡀࡓࡀ ࡓࡁࡀ ࡋࡀࡋࡀࡂࡈࡉࡋࡉࡀ ࡄࡀࡈࡀࡉࡉࡀ ࡅࡄࡀࡅࡁࡀࡉ ࡋࡀࡔࡀࡁࡒࡉࡋࡉࡀ ࡄࡀࡉࡆࡀࡊ ࡌࡀࡋࡉࡋ ࡌࡀࡍࡃࡀ ࡖࡄࡉࡉࡀ ࡅࡋࡄࡀࡁࡔࡀࡁࡀ ࡖࡍࡉࡌࡀࡓࡋࡇ ࡀࡍࡀࡕ ࡒࡅࡌ ࡀࡎࡂࡉࡀ ࡏࡆࡉࡋ ࡍࡄࡅࡕ ࡋࡀࡓࡒࡀ ࡖ ࡕࡉࡁࡉࡋ ࡋࡀࡋࡌࡀ ࡄࡀࡆࡉࡍ ࡖࡊࡅࡋࡇ ࡌࡀࡅࡃࡀࡋࡀ ࡋࡅࡀࡕࡀࡉࡅࡍ ࡖࡁࡄࡉࡓࡉࡀ ࡆࡉࡃࡒࡀ ࡂࡅࡁࡓࡉࡀ ࡂࡁࡉࡋࡉࡀ ࡁࡉࡎࡓࡀ ࡅࡆࡌࡀ ࡅࡋࡂࡅࡈࡅࡍࡅࡍ ࡁࡋࡉࡂࡅࡈࡕࡀࡊ ࡅࡀࡔࡀࡓࡁࡅࡍ ࡅࡒࡅࡌࡁࡅࡍ ࡅࡏࡆࡃࡀࡄࡀࡓࡁࡅࡍ ࡊࡓࡅࡊ ࡅࡃࡄࡉࡀ ࡌࡉࡍࡀࡉࡄࡅࡍ ࡔࡅࡁࡀ ࡔࡉࡁࡉࡀࡄࡉࡀ ࡖࡄࡉࡍࡅࡍ ࡎࡀࡄࡓࡀࡉࡄࡅࡍ ࡅࡃࡀࡉࡅࡀࡉࡄࡅࡍ ࡅࡄࡅࡌࡓࡀࡉࡄࡅࡍ ࡅࡒࡉࡓࡉࡀࡕࡅࡍ ࡁࡉࡔࡀࡕࡀ ࡖࡄࡉࡍࡅࡍ ࡄࡀࡈࡀࡉࡀࡊ ࡅࡄࡀࡅࡁࡀࡊ ࡔࡀࡁࡒࡉࡋࡀࡊ ࡅࡁࡏࡒࡀࡓࡀ ࡓࡁࡀ ࡋࡀࡂࡈࡉࡋࡀࡊ ࡅࡆࡀࡊࡅࡕࡀ ࡋࡅࡀࡕࡀࡍ ࡃࡉࡋࡀࡍ ࡄࡀࡅࡉࡀࡋࡀࡊ ࡄࡀࡉࡆࡀࡊ ࡌࡀࡋࡉࡋ ࡌࡀࡍࡃࡀ ࡖࡄࡉࡉࡀ ࡅࡀࡌࡀࡓࡋࡅࡍ ࡏࡋ ࡁࡄࡉࡓࡉࡀ ࡆࡉ{ࡓ}<ࡃ>ࡒࡀ ࡏࡆࡃࡀࡄࡓࡅࡋࡉࡀ ࡁࡄࡀࡁࡔࡀࡁࡀ ࡌࡀࡍࡄࡉࡓࡀࡍࡀ ࡖࡀࡍࡀ ࡋࡅࡀࡕࡀࡉࡊࡅࡍ ࡃࡉࡋࡊࡅࡍ ࡔࡀࡃࡉࡓࡕࡇ ࡏࡋ ࡌࡀࡍࡄࡉࡓࡉࡍࡊࡅࡍ ࡅࡋࡌࡉࡒࡀࡉࡌࡉࡍࡊࡅࡍ ࡅࡏࡋ ࡌࡉࡕࡓࡉࡑࡉࡍࡊࡅࡍ ࡋࡌࡉࡕࡉࡋࡊࡅࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡄࡀࡈࡀࡉࡉࡇ ࡅࡄࡀࡅࡁࡇ ࡔࡁࡉࡒࡅࡋࡇ ࡅࡁࡏࡒࡀࡓࡀ ࡓࡁࡀ ࡋࡅࡂࡈࡅࡉࡀ ࡀࡐࡓࡉࡔ ࡅࡂࡀࡋࡉࡋ ࡅࡀࡌࡀࡓ ࡌࡀࡍࡃࡀ ࡖࡄࡉࡉࡀ ࡊࡅࡋࡌࡀࡍ ࡖࡋࡀࡔࡀࡁࡉࡒࡋࡇ ࡄࡀࡈࡀࡉࡉࡇ ࡅࡄࡀࡅࡁࡇ ࡋࡄࡀࡁࡔࡀࡁࡀ ࡅࡁࡏࡒࡀࡓࡀ ࡓࡁࡀ ࡋࡀࡋࡀࡂࡉࡈࡋࡇ ࡊࡅࡓࡎࡉࡀ ࡁࡉࡍࡉࡀ ࡏࡅࡕࡓࡉࡀ ࡋࡉࡕࡋࡇ ࡅࡋࡀࡄࡀࡆࡉࡋࡇ ࡋࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡀࡌࡉࡍࡈࡅࡋ ࡖࡄࡀࡁࡔࡀࡁࡀ ࡉࡀࡒࡉࡓ ࡅࡊࡀࡁࡉࡓ ࡅࡉࡀࡉࡉࡀ ࡅࡌࡀࡍࡄࡀࡓ ࡌࡍ ࡊࡅࡋࡄࡅࡍ ࡏࡅࡕࡓࡉࡀ ࡁࡓࡉࡊ ࡅࡌࡔࡀࡁࡀ ࡌࡀࡍࡃࡀ ࡖ ࡄࡉࡉࡀ ࡅࡌࡒࡀࡉࡌࡀࡍࡀ ࡅࡄࡉࡉࡀ ࡆࡀࡊࡏࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡎ_____ࡀ |
| par. 114 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡌࡍ ࡔࡉࡍࡕࡀࡉ ࡒࡀࡃࡌࡉࡕ ࡅࡒࡀࡌࡉࡕ ࡁࡆࡉࡅࡀ ࡖࡍࡐࡉࡔ ࡄࡆࡉࡕ ࡄࡆࡉࡕ ࡁࡆࡉࡅࡀ ࡖࡍࡐࡉࡔ ࡅࡁࡀࡍࡄࡅࡓࡀ ࡖࡎࡀࡊࡀ ࡋࡉࡕࡋࡇ ࡗ ࡋࡁࡉࡔ ࡏࡅࡑࡈࡋࡇ ࡖ ࡆࡉࡅࡀ ࡅࡍࡄࡅࡓࡀ ࡌࡓࡀࡌࡀࡉ ࡋࡊࡀࡃࡐࡀࡉ ࡊࡋࡉࡋ ࡀࡉࡀࡓ ࡕࡓࡀࡑࡋࡉࡀ ࡁࡓࡉࡔࡀࡉ ࡅࡕࡓࡀࡑࡋࡉࡀ ࡋࡊࡅࡋࡇ ࡔࡅࡓࡁࡕࡇ ࡃࡀࡓࡉࡔ ࡅࡃࡀࡓࡔࡉࡀ ࡏࡅࡕࡓࡉࡀ ࡋࡅࡀࡕࡇ ࡅࡀࡍࡉࡋࡇ ࡐࡀࡎࡉࡌࡊࡉࡀ ࡋࡒࡀࡋࡇ ࡅࡌࡓࡀࡍࡃࡉࡃ ࡅࡌࡀࡒࡉࡌ ࡔࡀࡊࡁࡉࡀ ࡌࡍ ࡔࡉࡍࡕࡅࡍ ࡀࡌࡀࡓࡋࡅࡍ ࡒࡅࡌ ࡔࡀࡊࡁࡉࡀ ࡖࡔࡊࡉࡁࡉࡀ ࡒࡅࡌ ࡀࡊࡔࡉࡋࡉࡀ ࡖࡏࡕࡀࡊࡔࡀࡋ ࡒࡅࡌ ࡎࡂࡅࡃ ࡅࡔࡀࡁࡀ ࡋࡄࡉࡉࡀ ࡓࡁࡉࡀ ࡅࡔࡀࡁࡀ ࡋࡃࡌࡅࡕࡇ ࡖࡃࡌࡅࡕ ࡄࡉࡉࡀ ࡖࡁࡀࡉࡓࡀ ࡅࡌࡉࡕࡀࡐࡓࡉࡔࡀ ࡁࡀࡍࡄࡅࡓࡀ ࡔࡀࡍࡉࡀ ࡅࡌࡔࡀࡁࡉࡍ ࡄࡉࡉࡀ ࡎ_____ࡀ |
| par. 115 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡄࡀࡋࡉࡋࡍࡉࡍ ࡏࡃࡀࡍ ࡁࡊࡅࡔࡈࡀ ࡅࡏࡎࡐࡀࡍ ࡁࡄࡀࡉࡌࡀࡍࡅࡕࡀ ࡅࡌࡀࡋࡉࡋࡍࡉࡍ ࡁࡌࡀࡋࡀࡋࡉࡀ ࡖࡆࡉࡅࡀ ࡅࡏࡎࡄࡉࡈࡉࡁࡅࡍ ࡁࡏࡅࡑࡓࡉࡀ ࡖࡍࡄࡅࡓࡀ ࡁࡓࡉࡊࡉࡕ ࡅࡌࡔࡀࡁࡉࡕ ࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡅࡌࡒࡀࡉࡌࡀ ࡕࡅࡔࡁࡉࡄࡕࡀࡊ ࡍࡐࡉࡔ ࡄࡀࡉࡋࡀ ࡖࡄࡉࡉࡀ ࡅࡊࡀࡁࡉࡓ ࡆࡉࡅࡀ ࡖࡓࡅࡓࡁࡉࡀ ࡔࡓࡉࡀ ࡏࡒࡀࡓࡀ ࡏࡋ ࡏࡅࡕࡓࡉࡀ ࡖࡉࡀࡕࡁࡉࡀ ࡁࡏࡒࡀࡓࡀ ࡄࡀࡆࡀ ࡄࡏ ࡁࡅࡕࡀ ࡅࡕࡅࡔࡁࡉࡄࡕࡀ ࡖࡀࡕࡀࡕࡀࡋࡉࡍ ࡌࡍ ࡀࡕࡓࡀ ࡓࡁࡀ ࡖࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡌࡔࡀࡁࡉࡍࡀࡁࡇ ࡗ ࡒࡀࡉࡌࡉࡍࡉࡍ ࡌࡍ ࡔࡉࡍࡕࡀࡍ ࡌࡍ ࡒࡅࡃࡀࡌ ࡖࡏࡍࡉࡔ ࡁࡔࡉࡒࡓࡀ ࡍࡉࡔࡕࡀࡉࡉࡀ ࡊࡅࡋ ࡌࡀࡍ ࡖࡁࡄࡀࡆࡀ ࡁࡅࡕࡀ ࡍࡉࡁࡉࡀ ࡔࡀࡁࡉࡒ ࡄࡀࡈࡀࡉࡉࡀ ࡅࡄࡀࡅࡁࡉࡀ ࡍࡉࡄࡅࡉࡋࡇ ࡁࡀࡕࡓࡀ ࡓࡁࡀ ࡖࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |
| par. 116 | , ࡁࡓࡉࡊ ࡔࡅࡌࡀࡊ ࡅࡌࡔࡀࡁࡀ ࡔࡅࡌࡀࡊ ࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡁࡉࡓࡊࡅࡊ ࡈࡅࡓࡉࡀ ࡃࡀࡊࡉࡉࡀ ࡖࡋࡀࡍࡀࡉࡃࡉࡀ ࡅࡏࡅࡐࡀࡍࡉࡀ ࡊࡅࡔࡈࡀ ࡖࡋࡀࡌࡉࡔࡕࡀࡍࡉࡀ ࡁࡉࡓࡊࡅࡊ ࡁࡍࡉࡀ ࡔࡋࡀࡌࡀ ࡖࡀࡋࡅࡀࡕࡀࡊ ࡉࡀࡕࡁࡉࡀ ࡁࡉࡓࡊࡀࡊ ࡉࡀࡅࡀࡓ ࡆࡉࡅࡀ ࡌࡀࡋࡊࡀ ࡓࡁࡀ ࡖ ࡍࡀࡑࡉࡓࡅࡕࡀ ࡁࡉࡓࡊࡀࡊ ࡀࡉࡀࡓ ࡍࡄࡅࡓࡀ ࡃࡀࡊࡉࡀ ࡐࡀࡓࡅࡀࡍࡒࡀ ࡖࡊࡅࡋࡇ ࡆࡉࡃࡒࡀ ࡖࡀࡍࡀ ࡎࡀࡂࡃࡉࡍࡀࡋࡇ ࡅࡌࡔࡀࡁࡉࡍࡀࡋࡇ ࡋࡄࡀࡊ ࡀࡂࡉࡀ ࡖࡍࡄࡅࡓࡀ ࡅࡋࡔࡂࡀࡍࡃࡀ ࡖࡊࡅࡋࡄࡅࡍ ࡐࡀࡎࡉࡌࡊࡉࡀ , ࡁࡓࡉࡊ ࡔࡅࡌࡀࡊ ࡅࡌࡔࡀࡁࡀ ࡔࡅࡌࡀࡊ ࡂࡀࡁࡓࡀ ࡖࡏࡋ ࡔࡊࡉࡍࡀࡕࡀ ࡔࡓࡉࡀ ࡅࡏࡋ ࡔࡊࡉࡍࡀࡕࡀ ࡔࡓࡉࡀ ࡔࡅࡌࡇ ࡊࡅࡋ ࡉࡅࡌ ࡅࡊࡅࡋ ࡉࡅࡌࡀ ࡋࡃࡌࡅࡕࡇ ࡄࡀࡆࡉࡋࡇ ࡅࡏࡋ ࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡌࡔࡀࡁࡉࡋࡇ ࡅࡌࡔࡀࡁࡉࡍ ࡄࡉࡉࡀ ࡎ_____ࡀ ࡄࡀࡋࡉࡍ ࡀࡓࡁࡉࡀ ࡁࡀࡅࡀࡕࡀ ࡁࡀࡉࡍࡅࡍ ࡋࡍࡄࡅࡓ ࡀࡉࡀࡓ ࡒࡀࡉࡀࡌࡍࡀ ࡅࡌࡍ ࡔࡉࡍࡕࡀࡉ ࡒࡀࡃࡌࡉࡕ ࡅࡒࡀࡌࡉࡕ ࡅࡄࡀࡋࡉࡋࡍࡉࡍ ࡏࡃࡀࡍ ࡁࡊࡅࡔࡈࡀ ࡅࡁࡓࡉࡊ ࡔࡅࡌࡀࡊ ࡅࡌࡔࡀࡁࡀ ࡔࡅࡌࡀࡊ ࡒࡓࡉࡍࡅࡍ ࡁࡓࡀࡄࡌࡉࡀ ࡖࡐࡉࡓࡔࡀ ࡀࡁࡀࡕࡀࡓ ࡓࡉࡄࡀ ࡎ_____ࡀ |
| par. 117 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡔࡓࡀࡓ ࡂࡅࡐࡍࡀ ࡓࡁࡀ ࡊࡀࡎࡉࡀ ࡒࡀࡃࡌࡀࡉࡀ ࡖࡀࡋࡉࡐ ࡀࡋࡉࡐ ࡄࡀࡅࡉࡍ ࡏࡁࡉࡁࡇ ࡅࡓࡅࡁࡀࡍ ࡓࡅࡁࡀࡍ ࡄࡀࡅࡉࡍ ࡋࡅࡀࡕࡇ ࡖࡒࡓࡉࡋࡇ ࡅࡏࡍࡉࡀࡍ ࡕࡅࡌ ࡖࡒࡓࡉࡋࡇ ࡅࡍࡉࡍࡉࡀࡍ ࡖ ࡄࡅ ࡍࡉࡕࡉࡀ ࡅࡍࡀࡎࡉࡀࡍ ࡅࡍࡉࡃࡀࡋࡉࡀࡍ ࡅࡍࡉࡒࡀࡉࡌࡀࡍ ࡅࡍࡉࡕࡉࡓࡑࡀࡍ ࡅࡍࡉࡕࡓࡀࡑࡋࡉࡀ ࡀࡉࡍࡀࡉ ࡁࡉࡍࡄࡅࡓࡀ ࡅࡋࡉࡂࡓࡀࡉ ࡁࡉࡔࡓࡀࡓࡀ ࡅࡐࡅࡌࡀࡉ ࡁࡄࡅࡊࡅࡌࡕࡀ ࡅࡋࡉࡁࡀࡉ ࡁࡏࡓࡅࡕࡀ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡔࡊࡉࡍࡕࡀ ࡓࡀࡁࡕࡉࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡖࡁࡉࡕ ࡉࡅࡓࡉࡀ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡔࡊࡉࡍࡕࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡖࡀࡁࡀࡄࡀࡕࡀࡉ ࡉࡀࡕࡁࡀ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡓࡅࡀࡆ ࡂࡅࡐࡍࡀ ࡓࡁࡀ ࡊࡀࡎࡉࡀ ࡒࡀࡃࡌࡀࡉࡀ ࡖࡄࡋࡉࡁࡇ ࡌࡉࡀ ࡁࡃࡀࡓࡉࡀ ࡔࡀࡁࡉࡒࡋࡇ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡓࡅࡀࡆ ࡍࡄࡅࡓࡀ ࡓࡁࡀ ࡒࡀࡃࡌࡀࡉࡀ ࡖࡄࡅ ࡌࡔࡀࡋࡀࡈ ࡋࡊࡅࡋࡄࡅࡍ ࡀࡋࡌࡉࡀ ࡖࡍࡄࡅࡓࡀ ࡕࡅࡌ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ ࡋࡄࡀࡊ ࡔࡊࡉࡍࡕࡀ ࡓࡀࡁࡕࡉࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡖࡀࡉࡍࡀࡉࡄࡅࡍ ࡖࡍࡀࡑࡅࡓࡀࡉࡉࡀ ࡅࡐࡓࡉࡔࡀࡉࡉࡀ ࡅࡁࡄࡉࡓࡉࡀ ࡆࡉࡃࡒࡀ ࡌࡎࡀࡊࡉࡋࡇ ࡋࡌࡉࡎࡀࡒ ࡌࡉࡄࡆࡉࡇ ࡋࡀࡕࡓࡀ ࡓࡁࡀ ࡖࡍࡄࡅࡓࡀ ࡅࡃࡀࡅࡓࡀ ࡕࡀࡒࡍࡀ ࡅࡌࡔࡀࡁࡉࡍ ࡄࡉࡉࡀ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ ࡄࡀࡆࡉࡍ ࡁࡅࡕࡀ ࡁࡅࡉࡀ ࡁࡓࡀࡄࡌࡉࡀ ࡖࡔࡀࡁࡀ ࡔࡀࡉࡉࡀ ࡀࡁࡀࡕࡀࡓ ࡓࡉࡄࡀ ࡅࡋࡍࡄࡅࡓ ࡀࡉࡀࡓ ࡒࡀࡉࡉࡌࡍࡀ ࡎ_____ࡀ |
| par. 118 | , ࡄࡅࡀ ࡆࡉࡁࡍࡀ ࡋࡌࡉࡁࡉࡀ ࡓࡀࡄࡌࡉࡀ ࡅࡏࡃࡀࡍࡀ ࡓࡁࡀ ࡋࡌࡉࡃࡍࡅࡉࡉࡀ ࡌࡉࡕࡉࡍ ࡄࡉࡋࡉࡕࡀ ࡋࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡋࡌࡉࡕࡉࡀࡉࡅࡓࡉࡀ ࡁࡄࡉࡓࡉࡀ ࡆࡉࡃࡒࡀ ࡀࡌࡓࡉࡋࡇ ࡕࡀࡓࡌࡉࡃࡉࡀ ࡋࡌࡀࡍࡃࡀ ࡖࡄࡉࡉࡀ ࡖࡏࡕࡋࡀࡍ ࡌࡍ ࡀࡂࡓࡀ ࡅࡌࡍ ࡆࡉࡃࡒࡀ ࡅࡌࡍ ࡈࡀࡁࡅࡕࡀ ࡖࡍࡉࡔࡉࡁࡒࡇ ࡋࡀࡋࡀࡄࡅࡕࡀ ࡖ ࡁࡀࡉࡕࡀ ࡅࡍࡉࡕࡉࡀ ࡅࡍࡉࡕࡄࡀࡉࡌࡀࡍ ࡀࡌࡀࡓࡋࡅࡍ ࡌࡀࡍࡃࡀ ࡖࡄࡉࡉࡀ ࡋࡕࡀࡓࡌࡉࡃࡉࡀ ࡖࡏࡕࡋࡇ ࡋࡀࡁࡅࡄࡊࡅࡍ ࡄࡀࡉࡋࡀ ࡍࡀࡐࡔࡀ ࡖࡏࡍࡐࡉࡔ ࡌࡍ ࡎࡀࡊࡀ ࡊࡅࡋࡇ ࡅࡌࡍ ࡏࡅࡑࡓࡉࡀ ࡄࡉࡌࡉࡀ ࡁࡀࡈࡋࡉࡀ ࡅࡌࡍ ࡏࡔࡀࡕࡀ ࡏࡊࡉࡋࡕࡀ ࡄࡅࡍ ࡅࡌࡀࡋࡁࡉࡔࡉࡋࡅࡍ ࡈࡀࡁࡀ ࡋࡁࡍࡇ ࡅࡌࡊࡀࡎࡉࡋࡅࡍ ࡅࡌࡀࡎࡉࡒ ࡅࡌࡀࡄࡅࡉࡋࡅࡍ ࡏࡉࡕ ࡓࡅࡀࡄࡀ ࡓࡁࡀ ࡖࡄࡉࡉࡀ ࡅࡓࡀࡅࡆࡉࡍ ࡍࡉࡔࡌࡀࡕࡊࡅࡍ ࡌࡍ ࡀࡍࡀࡍࡉࡀ ࡖࡍࡄࡅࡓࡀ ࡅࡌࡀࡉࡕࡀࡍ ࡍࡉࡔࡌࡀࡕࡀ ࡄࡅࡓࡉࡍࡉࡀࡕࡀ ࡅࡄࡀࡅࡉࡀࡍ ࡗ ࡆࡀࡍ ࡖ ࡋࡀࡄࡅࡍ ࡕࡉࡒࡀࡁࡋࡅࡍ ࡏࡅࡑࡈࡋࡀࡉࡊࡅࡍ ࡅࡕࡉࡒࡀࡁࡋࡅࡍ ࡊࡋࡉࡋࡀࡉࡊࡅࡍ ࡒࡅࡃࡀࡌ ࡓࡁࡉࡀ ࡓࡁࡉࡀ ࡕࡉࡄࡅࡍ ࡅࡁࡉࡍࡉࡀ ࡏࡅࡕࡓࡉࡀ ࡏࡅࡕࡓࡉࡀ ࡕࡉࡕࡉࡒࡓࡅࡍ ࡅࡕࡉࡌࡓࡅࡍ ࡒࡀࡉࡀࡌࡉࡍ ࡄࡉࡉࡀ ࡁࡔࡊࡉࡍࡀࡕࡅࡍ ࡅࡄࡉࡉࡀ ࡆࡀࡊࡏࡉࡍ ࡋࡊࡅࡋࡄࡅࡍ ࡏࡅࡁࡀࡃࡉࡀ ࡎ_____ࡀ ࡄࡀࡆࡉࡍ ࡁࡅࡕࡀ ࡁࡅࡉࡀ ࡁࡓࡀࡄࡌࡉࡀ ࡖ ࡋࡐࡀࡉࡍࡀ ࡀࡁࡀࡕࡀࡓ ࡓࡉࡄࡀ ࡅࡀࡁࡀࡕࡀࡓ ࡋࡍࡄࡅࡓ ࡀࡉࡀࡓ ࡒࡀࡉࡉࡌࡍࡀ ࡎ_____ࡀ |
| par. 119 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡁࡄࡀࡁࡔࡀࡁࡀ ࡁࡓࡉࡔ ࡉࡅࡌࡉࡀ ࡌࡀࡍࡅ ࡄࡆࡀ ࡖࡀࡍࡀ ࡄࡆࡉࡕ ࡌࡀࡍ ࡄࡉࡆࡉࡇ ࡋࡌࡀࡍࡃࡀ ࡖࡄࡉࡉࡀ ࡖࡀࡎࡂࡉࡀ ࡀࡕࡀࡋࡇ ࡋࡀࡋࡌࡀ ࡀࡎࡂࡉࡀ ࡋࡀࡋࡌࡀ ࡀࡕࡀࡋࡇ ࡓࡌࡉࡀ ࡀࡓࡒࡀ ࡅࡔࡕࡀࡓࡄࡆࡀ ࡃࡀࡓࡉࡔ ࡅࡁࡀࡎࡉࡌ ࡒࡀࡋࡇ ࡅࡕࡓࡀࡑࡋࡇ ࡁࡐࡅࡌࡇ ࡌࡀࡌࡋࡀ ࡌࡀࡌࡋࡀ ࡕࡓࡀࡑࡋࡇ ࡁࡐࡅࡌࡇ ࡅࡒࡀࡓࡒࡉࡋ ࡔࡉࡁࡒࡇ ࡋࡀࡋࡌࡀ ࡒࡀࡓࡒࡉࡋ ࡋࡀࡋࡌࡀ ࡔࡉࡁࡒࡇ ࡅࡓࡅࡄࡀ ࡁࡌࡀࡋࡉࡀ ࡉࡀࡕࡁࡀ ࡓࡅࡄࡀ ࡉࡀࡕࡁࡀ ࡁࡌࡀࡋࡉࡀ ࡅࡔࡅࡁࡀ ࡁࡕࡉࡄࡌࡀ ࡉࡀࡕࡁࡉࡀ ࡁࡀࡊࡉࡍ ࡅࡍࡀࡂ<ࡃ>ࡉࡍ ࡏࡁࡋࡀࡉࡄࡅࡍ ࡀࡌࡉࡍࡈࡅࡋ ࡖࡓࡀࡆࡀࡉࡄࡅࡍ ࡏࡕࡉࡂࡋࡉࡀ ࡀࡌࡉࡍࡈࡅࡋ ࡖࡏࡕࡉࡂࡋࡉࡀ ࡓࡀࡆࡀࡉࡄࡅࡍ ࡌࡉࡎࡀࡐ ࡎࡀࡉࡐࡉࡀ ࡋࡉࡅࡌࡀ ࡓࡁࡀ ࡖࡎࡅࡐ ࡄࡀࡒࡀࡕ ࡅࡆࡀࡄࡀࡕ ࡍࡀࡌࡓࡅࡎ ࡆࡀࡉࡍࡀ ࡌࡍ ࡊࡀࡃࡐࡀ ࡍࡐࡀࡋ ࡆࡀࡉࡍࡀ ࡍࡐࡀࡋ ࡌࡍ ࡊࡀࡃࡐࡀ ࡅࡒࡀࡔࡕࡀࡕࡀ ࡌࡍ ࡐࡎࡀࡍ ࡏࡃࡀ ࡓࡅࡄࡀ ࡋࡁࡍࡉࡀ ࡕࡉࡌࡀࡓ ࡋࡌࡀࡔࡕࡅࡑࡉࡀ ࡁࡀࡈࡋࡉࡀ ࡕࡉࡌࡀࡓࡋࡅࡍ ࡁࡍࡀࡉ ࡗ ࡏࡌࡀࡉࡊࡅࡍ ࡄࡀࡅࡒࡀ ࡌࡉࡈࡉࡀ ࡀࡍࡀࡕࡅࡍ ࡔࡅࡁࡀ ࡌࡀࡄࡅ ࡕࡉࡁࡃࡅࡍ ࡗ ࡀࡕࡉࡀ ࡂࡁࡀࡓ ࡍࡅࡊࡓࡀࡉࡀ ࡌࡀࡍ ࡍࡉࡒࡌࡉࡋࡇ ࡏࡋ ࡒࡅࡃࡀࡌࡇ ࡀࡊࡋࡀ ࡖࡆࡉࡅࡀ ࡁࡏࡃࡇ ࡖࡌࡀࡍࡃࡀ ࡖࡄࡉࡉࡀ ࡌࡊࡀࡁࡉࡔ ࡅࡀࡕࡉࡀ ࡌࡀࡓࡃࡉࡀ ࡁࡓ ࡄࡉࡉࡀ ࡕࡉࡓࡑࡇ ࡋࡒࡀࡋࡇ ࡅࡋࡐࡀࡈࡅࡓ ࡔࡅࡁࡀ ࡖࡍࡉࡌࡀࡓࡋࡅࡍ ࡀࡍࡀ ࡆࡉࡁࡍࡀ ࡋࡓࡀࡄࡌࡀࡉ ࡀࡕࡉࡕ ࡅࡌࡀࡋࡀࡋࡀࡉ ࡊࡔࡉࡈࡉࡀ ࡋࡌࡄࡀࡉࡌࡍࡉࡀ ࡂࡅࡁࡓࡉࡀ ࡖࡆࡀࡁࡍࡉࡀ ࡆࡉࡁࡍࡀࡉ ࡆࡀࡊࡅࡀࡕࡅࡍ ࡁࡓࡉࡔࡀࡉࡄࡅࡍ ࡌࡉࡕࡂࡀࡃࡋࡉࡍ ࡆࡀࡊࡅࡀࡕࡅࡍ ࡅࡒࡀࡓࡍࡀࡉࡄࡅࡍ ࡌࡉࡕࡂࡀࡃࡋࡉࡍ ࡁࡓࡉࡔࡀࡉࡄࡅࡍ ࡅࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎ_____ࡀ |
| par. 120 | , ࡉࡅࡌࡀࡉ ࡌࡀࡄࡅ ࡁࡉࡅࡌࡉࡀ ࡉࡅࡌࡀ ࡉࡅࡌࡀࡉ ࡌࡀࡄࡅ ࡁࡔࡀࡉࡉࡀ ࡔࡉࡕࡀ ࡄࡃࡀ ࡉࡅࡌࡀࡉ ࡌࡀࡄࡅ ࡁࡉࡅࡌࡉࡀ ࡉࡅࡌࡀ ࡖࡆࡉࡅࡇ ࡖࡌ<ࡀ>ࡍࡃࡀ ࡖࡄࡉࡉࡀ ࡃࡍࡀ ࡉࡅࡌࡀࡉ ࡄࡀࡁࡔࡀࡁࡀ ࡁࡓࡉࡔ ࡉࡅࡌࡉࡀ ࡉࡅࡌࡀ ࡖࡆࡉࡅࡇ ࡖࡌࡀࡍࡃࡀ ࡖࡄࡉࡉࡀ ࡃࡍࡀ ࡉࡅࡌࡀࡉ ࡃࡍࡀ ࡆࡉࡅࡇ ࡖ ࡄࡀࡁࡔࡀࡁࡀ ࡏࡋࡀࡅࡀࡉࡀࡍ ࡅࡀࡍࡄࡀࡓࡉࡍࡀࡍ ࡌࡍ ࡓࡉࡔ ࡁࡓࡉࡔ ࡎ_____ࡀ |
| par. 121 | , ࡌࡍ ࡒࡀࡃࡌࡅ ࡖࡔࡉࡍࡉࡀ ࡀࡉࡍࡉࡀ ࡅࡌࡍ ࡒࡀࡃࡌࡅ ࡖࡕࡉࡓࡀࡕࡀ ࡋࡁࡀࡓ ࡌࡍ ࡒࡀࡃࡌࡅ ࡖࡀࡍࡀࡕࡅࡍ ࡄࡀࡅࡀࡉࡕࡅࡍ ࡀࡍࡀ ࡄࡅࡉࡕࡉࡁࡇ ࡁࡀࡋࡌࡀ ࡒࡀࡋࡀࡉࡄࡅࡍ ࡖࡌࡉࡀ ࡄࡉࡉࡀ ࡖࡀࡐࡊࡉࡍ ࡋࡌࡉࡀ ࡕࡀࡄࡌࡉࡀ ࡔࡀࡐࡉࡍ ࡅࡍࡀࡎࡁࡉࡍ ࡕࡅࡒࡍࡀ ࡀࡔࡃࡉࡍ ࡅࡓࡀࡌࡉࡍ ࡃࡅࡓࡃࡉࡀ ࡋࡉࡌࡀࡋࡇ ࡋࡒࡀࡃࡌࡀࡉࡀ ࡖࡌࡍ ࡃࡅࡓࡃࡉࡀ ࡁࡀࡉࡉࡀ ࡁࡍࡉࡀ ࡌࡉࡒࡓࡉࡀ ࡒࡓࡏࡉࡉࡀ ࡒࡀࡋࡉࡀ ࡅࡌࡉࡄࡔࡀࡁ ࡄࡔࡉࡁࡉࡀ ࡌࡀࡌࡋࡀࡋࡉࡀ ࡊࡅࡋࡄࡅࡍ ࡀࡕࡉࡀ ࡄࡃࡀ ࡒࡀࡋࡀ ࡅࡌࡀࡐࡓࡉࡔ ࡋࡒࡀࡋࡉࡀ ࡊࡅࡋࡄࡅࡍ ࡀࡕࡉࡀ ࡄࡃࡀ ࡌࡀࡌࡋࡀ ࡅࡌࡀࡐࡓࡉࡔ ࡋࡌࡀࡋࡀࡋࡉࡀ ࡊࡅࡋࡄࡅࡍ ࡀࡕࡉࡀ ࡄࡃࡀ ࡂࡀࡁࡓࡀ ࡅࡌࡀࡐࡓࡉࡔ ࡏࡋ ࡃࡇ ࡅࡃࡇ ࡀࡍࡉࡍ ࡖࡌࡔࡀࡁࡉࡍࡉࡍ ࡌࡀࡓࡀࡍ ࡄࡀࡈࡀࡉࡀࡍ ࡅࡄࡀࡅࡁࡀࡍ ࡕࡉࡔࡁࡅࡒࡋࡀࡍ ࡆࡊࡉࡕ ࡌࡀࡍࡃࡀ ࡖࡄࡉࡉࡀ ࡅࡆࡀࡊࡉࡕ ࡊࡅࡋࡄࡅࡍ ࡓࡀࡄࡌࡀࡊ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |
| par. 122 | , ࡉࡀ ࡌࡀࡓࡉࡀ ࡓࡀࡄࡌࡉࡀ ࡉࡀ ࡌࡀࡓࡉࡀ ࡁࡀࡅࡀࡕࡀ ࡅࡃࡓࡀࡔࡉࡀ ࡅࡎࡉࡃࡓࡉࡀ ࡕࡀࡒࡍࡉࡀ ࡉࡀࡌࡀࡓࡉࡀ ࡁࡅࡕࡀ ࡅࡕࡅࡔࡁࡉࡄࡕࡀ ࡔࡅࡌࡇ ࡋࡒࡀࡋࡀࡉ ࡅࡋࡀࡕࡀࡂࡆࡀࡓ ࡏࡋࡀࡉ ࡎ_____ࡀ |
| par. 123 | , ࡋࡁࡀࡓ ࡌࡍ ࡔࡉࡕ ࡅࡔࡀࡁࡀ ࡀࡌࡀࡌࡉࡀ ࡐࡉࡓࡀ ࡋࡏࡋࡀࡍࡀ ࡕࡓࡉࡑ ࡐࡉࡓࡀ ࡕࡓࡉࡑ ࡋࡏࡋࡀࡍࡀ ࡅࡏࡋࡀࡍࡉࡀ ࡀࡋࡅࡀࡕࡇ ࡊࡀࡍࡐࡉࡀ ࡏࡋࡀࡍࡉࡀ ࡊࡀࡍࡐࡉࡀ ࡀࡋࡅࡀࡕࡇ ࡅࡊࡅࡓࡎࡉࡀ ࡋࡓࡀࡁ ࡆࡉࡅࡉࡀ ࡕࡓࡉࡑ ࡊࡅࡓࡎࡉࡀ ࡕࡓࡉࡑ ࡋࡓࡀࡁ ࡆࡉࡅࡉࡀ ࡅࡓࡀࡁ ࡆࡉࡅࡇ ࡉࡀࡕࡉࡁ ࡏࡋࡇ ࡕࡓࡉࡑ ࡋࡒࡅࡃࡀࡌࡇ ࡕࡅࡔࡋࡉࡌࡉࡀ ࡖࡋࡔࡀࡋࡌࡀࡍࡉࡀ ࡌࡔࡀࡋࡉࡌࡋࡅࡍ ࡌࡔࡀࡋࡉࡌࡋࡅࡍ ࡋࡔࡀࡋࡌࡀࡍࡉࡀ ࡅࡀࡌࡀࡓ ࡊࡅࡋ ࡏࡍࡉࡔ ࡀࡊࡅࡀࡕ ࡏࡅࡁࡀࡃࡉࡀ ࡏࡃࡇ ࡉࡀࡄࡉࡁࡋࡇ ࡅࡀࡌࡀࡓ ࡊࡅࡋ ࡌࡀࡍ ࡖࡄࡋࡀ ࡅࡏࡕࡀࡍࡂࡀࡓ ࡍࡉࡕࡉࡀ ࡅࡍࡉࡎࡀࡁ ࡁࡕࡀࡓࡕࡉࡍ ࡏࡃࡇ ࡅࡃࡋࡀࡄࡋࡀ ࡅࡋࡀࡏࡕࡀࡍࡂࡀࡓ ࡓࡉࡒࡀࡍ ࡒࡀࡉࡉࡌ ࡁࡉࡕ ࡌࡀࡊࡎࡉࡀ ࡁࡀࡉࡉࡀ ࡅࡋࡀࡌࡀࡔࡊࡀ ࡅࡔࡀࡉࡉࡋ ࡅࡋࡀࡌࡉࡕࡄࡉࡁࡋࡇ ࡀࡌࡉࡍࡈࡅࡋ ࡖࡄࡅࡀࡋࡇ ࡁࡏࡃࡇ ࡅࡋࡀࡏࡄࡀࡁ ࡄࡀࡕࡀࡌ ࡁࡀࡄࡉࡔ ࡁࡊࡀࡍࡐࡇ ࡅࡋࡀࡌࡀࡔࡊࡀ ࡌࡔࡀࡁࡉࡕ ࡌࡀࡍࡃࡀ ࡖࡄࡉࡉࡀ ࡖࡏࡋ ࡓࡀࡄࡌࡀࡊ ࡋࡀࡌࡀࡂࡆࡉࡓࡉࡕ ࡎ_____ࡀ |
| par. 124 | , ࡀࡍࡀ ࡁࡅࡕࡀ ࡌࡍ ࡄࡉࡉࡀ ࡁࡀࡉࡉࡍࡀ ࡁࡀࡉࡉࡍࡀ ࡌࡉࡍࡀࡉࡊࡅࡍ ࡄࡉࡉࡀ ࡓࡅࡓࡁࡉࡀ ࡀࡍࡀ ࡁࡅࡕࡀ ࡌࡍ ࡄࡉࡉࡀ ࡁࡀࡉࡉࡍࡀ ࡖࡕࡉࡕࡓࡉࡑࡅࡍࡀ ࡋࡕࡅࡔࡁࡉࡄࡕࡀࡉࡊࡅࡍ ࡏࡋࡀࡉ ࡎ_____ࡀ ࡄࡀࡋࡉࡍ ࡕࡋࡀࡕࡀ ࡏࡍࡉࡀࡍࡉࡀ ࡅࡕࡋࡀࡕࡀ ࡃࡓࡀࡔࡉࡀ ࡉࡅࡌࡀ ࡖࡄࡀࡁࡔࡀࡁࡀ ࡄࡉࡍࡅࡍ ࡎ_____ࡀ |
| par. 125 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡌࡍ ࡓࡉࡔ ࡁࡀࡍࡀࡍࡀ ࡍࡉࡐࡒࡉࡕ ࡌࡉࡍࡀࡊ ࡃࡀࡅࡓࡀ ࡕࡀࡒࡍࡀ ࡌࡍ ࡓࡉࡔ ࡁࡀࡍࡀࡍࡀ ࡍࡉࡐࡒࡉࡕ ࡌࡍ ࡁࡀࡍࡀ ࡖࡁࡀࡍࡀࡍ ࡓࡁࡉࡀ ࡌࡍ ࡁࡀࡍࡀ ࡖࡓࡁࡉࡀ ࡁࡀࡍࡀࡍ ࡀࡕࡉࡕ ࡅࡍࡉࡑࡁࡀࡍ ࡍࡀࡑࡁࡀࡉ ࡀࡕࡉࡕ ࡅࡍࡀࡑࡁࡀࡉ ࡍࡉࡑࡁࡀࡍ ࡁࡌࡉࡋࡊࡀ ࡖ ࡌࡍ ࡓࡁࡉࡀ ࡌࡋࡉࡊ ࡌࡍ ࡌࡀࡋࡊࡀ ࡖࡌࡋࡉࡊ ࡌࡍ ࡓࡁࡉࡀ ࡅࡔࡀࡃࡓࡅࡍ ࡖࡏࡁࡅࡍ ࡁࡉࡍࡕࡀ ࡁࡉࡍࡕࡀ ࡏࡁࡅࡍ ࡋࡈࡀࡁࡉࡀ ࡋࡂࡅࡁࡓࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡁࡀࡍࡕࡀ ࡅࡁࡀࡍࡀࡍࡕࡀ ࡅࡕࡉࡓࡑࡉࡕ ࡁࡓࡉࡔ ࡁࡀࡍࡀࡍࡀ ࡔࡕࡀࡋࡉࡁࡀ ࡔࡉࡕࡋࡉࡀ ࡖࡄࡉࡉࡀ ࡂࡅࡁࡓࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡀࡍࡀ ࡋࡁࡀࡍࡀࡉ ࡌࡐࡀࡒࡉࡃࡍࡀࡋࡇ ࡖࡀࡉࡍࡀࡊ ࡏࡋ ࡔࡉࡕࡋࡀࡉ ࡕࡓࡅࡑ ࡀࡉࡍࡀࡊ ࡕࡓࡅࡑ ࡋࡔࡉࡕࡋࡀࡉ ࡖࡏࡃࡉࡋࡌࡀ ࡖࡍࡀࡉࡌࡉࡀ ࡅࡔࡀࡊࡁࡉࡀ ࡅࡌࡉࡍࡉࡔࡉࡉࡍ ࡈࡀࡁࡉࡀ ࡖࡌࡐࡀࡒࡃࡉࡀ ࡀࡋࡌࡀ ࡖࡀࡍࡉࡍࡉࡌࡅࡍ ࡅࡀࡋࡌࡀ ࡖࡍࡉࡔࡉࡊࡁࡅࡍ ࡅࡀࡋࡌࡀ ࡍࡉࡍࡉࡔࡉࡅࡍ ࡈࡀࡁࡉࡀ ࡖࡌࡐࡀࡒࡃࡉࡀ ࡀࡋࡌࡀ ࡖࡍࡉࡍࡉࡔࡉࡅࡍ ࡋࡃࡉࡋࡉࡀ ࡍࡉࡉࡅࡋ ࡏࡋࡀࡅࡀࡉࡄࡅࡍ ࡎࡉࡈࡉࡀ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡏࡆࡃࡀࡄࡓࡅࡋࡉࡀ ࡓࡀࡄࡌࡀࡉ ࡏࡆࡃࡀࡄࡓࡅࡋࡉࡀ ࡀࡄࡀࡉ ࡌࡍ ࡏࡔࡅ ࡌࡔࡉࡄࡀ ࡁࡀࡈࡋࡀ ࡅࡌࡍ ࡖࡀࡐࡉࡊ ࡃࡌࡀࡅࡀࡕࡀ ࡅࡌࡔࡀࡍࡉࡀ ࡌࡀࡋࡀࡋࡉࡀ ࡖࡐࡅࡌ ࡏࡅ ࡕࡉࡆࡃࡀࡄࡓࡅࡋࡉࡀ ࡀࡄࡀࡉ ࡏࡅ ࡕࡉࡆࡃࡀࡄࡓࡅࡋࡉࡀ ࡓࡀࡄࡌࡀࡉ ࡏࡅ ࡕࡉࡆࡃࡀࡄࡓࡅࡋࡉࡀ ࡀࡄࡀࡉ ࡗ ࡕࡉࡐࡒࡅࡍ ࡌࡍ ࡐࡀࡂࡓࡀࡉࡊࡅࡍ ࡀࡍࡀ ࡏࡄࡀࡅࡉࡋࡊࡅࡍ ࡁࡀࡄࡉࡃ ࡏࡃࡀ ࡀࡄࡉࡃ ࡏࡃࡀ ࡅࡎࡉࡌࡀࡊࡀ ࡌࡍ ࡀࡕࡓࡀ ࡖࡄࡔࡅࡊ ࡋࡀࡕࡀࡓ ࡍࡄࡅࡓ ࡆࡊࡉࡕ ࡌࡀࡍࡃࡀ ࡖࡄࡉࡉࡀ ࡅࡆࡀࡊࡉࡕ ࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡀࡊ ࡎ_____ࡀ |
| par. 126 | , ࡋࡓࡉࡔ ࡊࡉࡌࡑࡀ ࡃࡀࡊࡉࡀ ࡀࡋࡅࡀࡕࡇ ࡖࡐࡀࡎࡉࡌࡊࡀ ࡔࡀࡍࡉࡀ ࡏࡎࡕࡊࡉࡕ ࡄࡆࡀࡉࡕࡇ ࡋࡍࡉࡁࡈࡀ ࡎࡀࡂࡉࡀ ࡌࡍ ࡂࡅ ࡉࡀࡓࡃࡍࡀ ࡓࡁࡀ ࡖࡄࡉࡉࡀ ࡒࡀࡃࡌࡀࡉࡉࡀ ࡏࡕࡉࡍࡑࡉࡁ ࡔࡀࡍࡉࡀ ࡒࡀࡋࡇ ࡅࡓࡉࡄࡇ ࡁࡀࡎࡉࡌ ࡅࡃࡌࡅࡕࡇ ࡁࡀࡉࡓࡀ ࡅࡌࡉࡕࡓࡀࡅࡓࡉࡁࡀ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |
| par. 127 | ࡂࡀࡁࡓࡀ ࡁࡄࡉࡓ ࡆࡉࡃࡒࡀ ࡍࡁࡀࡈ ࡅࡀࡍࡄࡀࡓ ࡁࡀࡋࡌࡀ ࡍࡁࡀࡈ ࡁࡀࡋࡌࡀ ࡅࡀࡍࡄࡀࡓ ࡅࡌࡀࡋࡉࡋ ࡁࡄࡉࡉࡀ ࡓࡅࡓࡁࡉࡀ ࡁࡄࡉࡉࡀ ࡓࡅࡓࡁࡉࡀ ࡌࡀࡋࡉࡋ ࡅࡂࡀࡋࡉࡋ ࡓࡀࡆࡉࡀ ࡖࡌࡎࡀࡕࡓࡉࡀ ࡓࡀࡆࡉࡀ ࡖࡌࡎࡀࡕࡓࡉࡀ ࡂࡀࡋࡉࡋ ࡅࡑࡀࡅࡕࡀ ࡔࡀࡓࡉࡀ ࡋࡓࡀࡄࡌࡇ ࡑࡀࡅࡕࡀ ࡋࡓࡀࡄࡌࡇ ࡔࡀࡓࡉࡀ ࡅࡓࡀࡃࡐࡉࡋࡇ ࡊࡅࡋࡄࡅࡍ ࡀࡋࡌࡉࡀ ࡗ ࡄࡀࡆࡀ ࡖࡓࡉࡃࡐࡅࡉࡀ ࡀࡋࡌࡉࡀ ࡀࡉࡍࡇ ࡔࡒࡀࡋ ࡋࡀࡕࡀࡓ ࡍࡄࡅࡓ ࡁࡀࡁࡀ ࡖࡍࡄࡅࡓࡀ ࡏࡐࡕࡀࡋࡇ ࡅࡀࡎࡉࡒ ࡁࡄࡉࡉࡀ ࡀࡎࡌࡊࡅࡉࡀ ࡄࡉࡉࡀ ࡎࡌࡀࡊ ࡋࡄࡉࡉࡀ ࡄࡉࡉࡀ ࡃࡉࡋࡅࡍ ࡀࡔࡊࡀ ࡄࡉࡉࡀ ࡀࡔࡊࡀ ࡃࡉࡋࡅࡍ ࡅࡀࡔࡊࡉࡕ ࡍࡉࡔࡌࡀࡕ ࡖࡌࡎࡀࡊࡉࡀ ࡆࡊࡉࡕ ࡌࡀࡍࡃࡀ ࡖ ࡄࡉࡉࡀ ࡅࡆࡀࡊࡉࡕ ࡊࡅࡋࡄࡅࡍ ࡓࡀࡄࡌࡀࡊ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |
| par. 128 | , ࡉࡀ ࡂࡀࡁࡓࡀ ࡖࡊࡀࡋࡅࡆࡀ ࡁࡄࡉࡓࡀ ࡖࡏࡕࡀࡁࡄࡀࡓࡕ ࡌࡉࡍࡇ ࡌࡍ ࡀࡋࡌࡀ ࡍࡉࡍࡄࡀࡓࡅࡋࡀࡊ ࡀࡉࡍࡀࡊ ࡈࡀࡁࡀ ࡖࡀࡋࡁࡔࡅࡊ ࡖࡉࡀࡉࡉࡀ ࡏࡑࡈࡋࡀࡊ ࡌࡍ ࡒࡀࡋࡀࡊ ࡅࡒࡀࡋ ࡃࡓࡀࡔࡀࡊ ࡄࡉࡉࡀ ࡓࡁࡉࡀ ࡒࡀࡁࡋࡅࡉࡀ ࡋࡁࡅࡕࡀࡊ ࡅࡕࡅࡔࡁࡉࡄࡕࡀࡊ ࡎ_____ࡀ |
| par. 129 | ࡋࡉࡀ ࡀࡆࡋࡉࡕ ࡁࡄࡉࡓ ࡆࡉࡃࡒࡀ ࡖࡁࡀࡉࡉࡋࡀࡊ ࡊࡅࡋࡄࡅࡍ ࡓࡀࡄࡌࡀࡊ ࡊࡅࡋࡄࡅࡍ ࡓࡀࡄࡌࡀࡊ ࡁࡀࡉࡉࡋࡀࡊ ࡅࡁࡀࡉࡉࡍ ࡃࡌࡅࡕࡀࡊ ࡁࡉࡍࡀࡕࡅࡍ ࡀࡍࡀ ࡏࡆࡋࡉࡕ ࡋࡌࡉࡁࡀࡍ ࡁࡉࡍࡕࡀ ࡋࡄࡉࡋ ࡁࡂࡀࡅࡇ ࡖࡀࡋࡌࡀ ࡁࡀࡍࡕࡇ ࡅࡁࡀࡍࡀࡍࡕࡀ ࡅࡕࡉࡓࡑࡉࡕ ࡁࡓࡉࡔ ࡁࡀࡍࡀࡍࡀ ࡔࡕࡀࡋࡉࡁࡇ ࡔࡉࡕࡋࡉࡀ ࡖࡄࡉࡉࡀ ࡋࡂࡅࡁࡓࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡀࡍࡀ ࡋࡁࡀࡍࡀࡉ ࡌࡐࡀࡒࡃࡉࡍࡀࡋࡇ ࡋࡂࡀࡁࡓࡀ ࡖࡍࡀࡈࡀࡓ ࡁࡉࡍࡕࡀ ࡀࡍࡀ ࡋࡁࡀࡍࡀࡉ ࡌࡐࡀࡒࡃࡉࡍࡀࡋࡇ ࡖࡀࡉࡍࡀࡊ ࡏࡋ ࡔࡉࡕࡋࡀࡉ ࡕࡓࡅࡑ ࡀࡉࡍࡀࡊ ࡕࡓࡅࡑ ࡋࡔࡉࡕࡋࡀࡉ ࡖࡏࡃࡉࡋࡌࡀ ࡖࡍࡀࡉࡌࡉࡀ ࡅࡔࡀࡊࡁࡉࡀ ࡅࡌࡉࡍࡉࡔࡉࡉࡍ ࡈࡀࡁࡉࡀ ࡖࡌࡐࡀࡒࡃࡉࡀ ࡀࡋࡌࡀ ࡖ ࡍࡉࡍࡉࡌࡅࡍ ࡅࡀࡋࡌࡀ ࡍࡉࡔࡉࡊࡁࡅࡍ ࡅࡀࡋࡌࡀ ࡖࡍࡉࡍࡉࡔࡉࡅࡍ ࡈࡀࡁࡉࡀ ࡖࡌࡐࡀࡒࡃࡉࡀ ࡂࡀࡁࡓࡀ ࡋࡀࡋࡌࡀ ࡒࡓࡀࡋࡉࡀ ࡌࡍ ࡓࡉࡔࡉࡇ ࡋࡓࡉࡔࡉࡇ ࡖࡀࡋࡌࡀ ࡂࡀࡁࡓࡀ ࡖࡋࡀࡋࡌࡀ ࡒࡓࡀࡋࡇ ࡅࡀࡌࡀࡓ ࡈࡅࡁࡇ ࡋࡌࡀࡍ ࡖࡁࡍࡀࡐࡔࡉࡇ ࡍࡉࡆࡃࡀࡄࡀࡓ ࡂࡀࡁࡓࡀ ࡖ ࡌࡉࡆࡃࡀࡄࡀࡓ ࡁࡍࡀࡐࡔࡉࡇ ࡋࡀࡉࡉࡕ ࡀࡊࡅࡀࡕࡇ ࡁࡀࡋࡌࡀ ࡕࡅࡌ ࡂࡅࡁࡓࡉࡀ ࡖࡌࡀࡔࡓࡉࡀ ࡄࡉࡉࡀ ࡌࡉࡎࡀࡐ ࡎࡀࡉࡐࡉࡀ ࡖࡀࡐࡊࡉࡀ ࡄࡀࡋࡉࡍ ࡖࡀࡐࡊࡉࡀ ࡌࡀࡉࡕࡉࡀ ࡅࡃࡌࡀࡔࡓࡉࡀ ࡔࡓࡀࡓࡀ ࡌࡀࡔࡊࡉࡀ ࡀࡄࡀࡉ ࡀࡔࡀࡓ ࡁࡌࡀࡓࡂࡍࡀࡉࡊࡅࡍ ࡅࡎࡅࡁࡋࡅࡉࡀ ࡋࡓࡉࡃࡐࡀ ࡖࡀࡋࡌࡀ ࡋࡓࡉࡃࡐࡀ ࡖ ࡀࡋࡌࡀ ࡎࡅࡁࡋࡅࡉࡀ ࡁࡋࡉࡁࡀ ࡊࡔࡉࡈࡀ ࡅࡌࡄࡀࡉࡌࡍࡀ ࡎࡂࡃࡅࡋࡉࡀ ࡁࡉࡕࡓࡉࡑࡕࡀ ࡖࡏࡒࡅࡌ ࡏࡄࡅࡉࡋࡊࡅࡍ ࡁࡀࡄࡉࡃ ࡏࡃࡀ ࡀࡄࡉࡃ ࡏࡃࡀ ࡅࡎࡉࡌࡀࡊࡀ ࡌࡍ ࡀࡕࡓࡀ ࡖࡄࡔࡅࡊ ࡋࡀࡕࡀࡓ ࡍࡄࡅࡓ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |
| par. 130 | , ࡌࡍ ࡉࡅࡌࡀ ࡖࡐࡕࡀ ࡁࡀࡁࡀ ࡓࡁࡀ ࡖࡄࡉࡋࡁࡅࡍࡉࡀ ࡏࡕࡀࡅࡆࡀࡐ ࡆࡉࡅࡀ ࡖࡌࡀࡋࡊࡀ ࡋࡏࡅࡕࡓࡉࡀ ࡉࡀࡒࡓࡉࡀ ࡀࡕࡀࡋࡅࡍ ࡁࡅࡕࡀ ࡅࡕࡅࡔࡁࡉࡄࡕࡀ ࡋࡂࡅࡁࡓࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡄࡀࡃࡉࡁࡇ ࡅࡌࡉࡕࡂࡀࡉࡉࡁࡇ ࡅࡌࡀࡎࡒࡉࡍ ࡁࡅࡕࡅࡍ ࡅࡕࡅࡔࡁࡉࡄࡕࡅࡍ ࡋࡀࡕࡀࡓ ࡍࡄࡅࡓ ࡎ_____ࡀ ࡄࡀࡋࡉࡍ ࡕࡋࡀࡕࡀ ࡏࡍࡉࡀࡍࡉࡀ ࡅࡕࡋࡀࡕࡀ ࡃࡓࡀࡔࡉࡀ ࡉࡅࡌࡀ ࡖࡕࡓࡉࡍ ࡄࡀࡁࡔࡀࡁࡀ ࡄࡉࡍࡅࡍ ࡎ_____ࡀ |
| par. 131 | ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡏࡕࡉࡕ ࡌࡍ ࡁࡉࡕ ࡄࡉࡉࡀ ࡏࡕࡉࡕ ࡌࡀࡄࡅ ࡖࡀࡉࡕࡉࡕࡋࡀࡍ ࡀࡉࡕࡉࡕࡋࡊࡅࡍ ࡖࡋࡀࡕࡉࡌࡉࡕࡅࡍ ࡅࡋࡀࡕࡉࡎࡕࡀࡊࡓࡀ ࡍࡉࡔࡌࡀࡕࡊࡅࡍ ࡀࡉࡕࡉࡋࡊࡅࡍ ࡋࡉࡅࡌࡀ ࡖࡌࡅࡕࡀ ࡄࡉࡉࡀ ࡅࡋࡉࡅࡌࡀ ࡖࡍࡎࡉࡎࡀ ࡄࡀࡃࡅࡀ ࡀࡉࡕࡉࡕࡋࡊࡅࡍ ࡍࡉࡄࡅࡕࡀ ࡖࡌࡀࡓࡂࡅࡔ ࡖࡀࡌࡀࡌࡉࡀ ࡋࡉࡕࡁࡇ ࡄࡀࡃࡀ ࡄࡀࡃࡀ ࡀࡉࡕࡉࡕ ࡈࡀࡁࡀ ࡋࡂࡀࡁࡓࡀ ࡊࡔࡉࡈࡀ ࡌࡀࡄࡅ ࡖࡀࡉࡕࡉࡕࡋࡇ ࡂࡀࡍࡆࡉࡁࡓࡀࡉ ࡔࡀࡅࡉࡕࡇ ࡅࡔࡀࡋࡉࡈࡕࡇ ࡏࡋ ࡊࡅࡋ ࡖࡏࡕࡋࡉࡀ ࡐࡅࡂࡃࡀࡌࡉࡀ ࡖࡊࡅࡔࡈࡀ ࡏࡄࡀࡁࡋࡇ ࡖࡀࡉࡉࡋࡁࡅࡍ ࡅࡍࡀࡐࡉࡒࡁࡅࡍ ࡗ ࡂࡀࡁࡓࡀ ࡖ ࡑࡅࡁࡉࡀࡍࡇ ࡋࡂࡀࡈ ࡁࡀࡉࡉࡕࡅࡍ ࡅࡀࡔࡊࡀࡕࡅࡍ ࡁࡄࡉࡓࡀࡉ ࡕࡅࡌ ࡕࡉࡁࡅࡍ ࡅࡕࡀࡔࡊࡅࡍ ࡁࡀࡉࡉࡕࡅࡍ ࡅࡀࡔࡊࡀࡕࡅࡍ ࡁࡄࡉࡓࡀࡉ ࡀࡊࡅࡀࡕ ࡒࡀࡃࡌࡀࡉࡉࡀ ࡁࡅࡍ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |
| par. 132 | , ࡀࡕࡀ ࡀࡕࡀ ࡌࡀࡋࡊࡀ ࡖࡏࡅࡕࡓࡉࡀ ࡔࡂࡀࡍࡃࡀ ࡓࡀࡌࡀ ࡀࡕࡀ ࡌࡍ ࡁࡉࡕ ࡀࡁࡅࡉࡀ ࡀࡕࡀ ࡅࡒࡀࡁࡋࡀ ࡋࡁࡅࡕࡀࡉ ࡅࡕࡅࡔࡁࡉࡄࡕࡀࡉ ࡅࡀࡎࡒࡀ ࡁࡔࡋࡀࡌ ࡋࡀࡕࡀࡓ ࡍࡄࡅࡓ ࡎ_____ࡀ |
| par. 133 | , ࡏࡕࡉࡕ ࡌࡍ ࡁࡉࡕ ࡈࡀࡁࡉࡀ ࡏࡃࡉࡋࡌࡀ ࡁࡒࡉࡋࡅࡌࡀ ࡏࡕࡉࡕ ࡏࡃࡉࡋࡌࡀ ࡏࡕࡉࡕ ࡁࡒࡉࡋࡅࡌࡀ ࡁࡎࡀࡉࡍࡀ ࡅࡆࡉࡐࡀ ࡖࡄࡀࡆࡉࡍ ࡀࡋࡌࡀ ࡏࡃࡉࡋࡌࡀ ࡏࡕࡉࡕ ࡁࡒࡉࡋࡅࡌࡀ ࡏࡃࡉࡋࡌࡀ ࡁࡀࡉࡍࡉࡀ ࡋࡀࡌࡉࡕࡀࡄࡆࡉࡕ ࡄࡉࡍ ࡋࡌࡉࡕࡉࡀ ࡏࡕࡉࡕ ࡄࡉࡍ ࡋࡏࡕࡉࡂࡋࡅࡉࡉࡀ ࡏࡕࡉࡂࡋࡉࡕ ࡀࡉࡍࡀࡊ ࡀࡉࡍࡉࡀ ࡖࡔࡉࡒࡓࡀ ࡅࡀࡉࡍࡀࡉ ࡃࡉࡋࡉࡀ ࡖࡊࡅࡔࡈࡀ ࡌࡉࡄࡔࡀࡊ ࡄࡀࡔࡊࡉࡀ ࡀࡉࡍࡉࡀ ࡖࡔࡉࡒࡓࡀ ࡅࡋࡀࡄࡀࡆࡉࡋࡇ ࡋࡊࡅࡔࡈࡀ ࡏࡅ ࡁࡀࡉࡉࡕ ࡋࡌࡉࡄࡆࡉࡀ ࡋࡓࡅࡄࡀ ࡏࡆࡉࡋ ࡋࡁࡉࡕ ࡉࡀࡃࡀࡉ ࡄࡆࡉࡀ ࡁࡉࡕ ࡉࡀࡃࡀࡉ ࡖࡉࡀࡃࡉࡋࡉࡀ ࡖࡀࡍࡀ ࡔࡓࡉࡍࡀ ࡁࡉࡍࡀࡕࡀࡉࡄࡅࡍ ࡁࡋࡉࡁࡀࡉࡄࡅࡍ ࡖࡓࡀࡄࡌࡀࡉ ࡅࡁࡏࡅࡑࡓࡀࡉࡄࡅࡍ ࡖࡕࡀࡓࡌࡉࡃࡀࡉ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |
| par. 134 | ࡀࡕࡀ ࡀࡕࡀ ࡌࡀࡋࡊࡀ ࡖࡏࡅࡕࡓࡉࡀ ࡔࡂࡀࡍࡃࡀ ࡓࡀࡌࡀ ࡖࡀࡉࡍࡀࡉ ࡌࡎࡀࡊࡉࡀࡋࡇ ࡑࡅࡕ ࡅࡔࡅࡌࡀ ࡒࡀࡋࡀࡉ ࡅࡀࡎࡒࡀ ࡋࡁࡅࡕࡀࡉ ࡅࡕࡅࡔࡁࡉࡄࡕࡀࡉ ࡋࡀࡕࡀࡓ ࡍࡄࡅࡓ ࡎ_____ࡀ |
| par. 135 | ࡓࡉࡄࡀ ࡀࡕࡀ ࡌࡍ ࡀࡕࡓࡇ ࡀࡕࡀ ࡔࡓࡀࡓࡀ ࡌࡍ ࡃࡅࡊࡕࡇ ࡓࡉࡄࡀ ࡀࡕࡀ ࡌࡍ ࡀࡕࡓࡇ ࡀࡕࡀ ࡁࡂࡅ ࡁࡀࡉࡕࡀ ࡔࡓࡀ ࡒࡀࡓࡉࡀ ࡅࡌࡄࡀࡉࡉࡀ ࡌࡉࡕࡉࡀ ࡅࡌࡓࡀࡍࡃࡉࡃ ࡖࡌࡀࡉࡕࡉࡀ ࡅࡔࡀࡊࡁࡉࡀ ࡌࡀࡉࡀࡓࡋࡉࡍ ࡋࡍࡉࡔࡌࡀࡕࡀ ࡖࡔࡉࡄࡉࡀ ࡅࡔࡀࡅࡉࡀ ࡋࡀࡕࡀࡓ ࡍࡄࡅࡓ ࡄࡀࡃࡀ ࡄࡀࡃࡀ ࡀࡁࡀࡃ ࡈࡀࡁࡀ ࡅࡕࡓࡀࡑ ࡖ ࡄࡉࡉࡀ ࡓࡅࡔࡅࡌࡀ ࡏࡕࡊࡀࡍࡀࡐ ࡔࡉࡁࡉࡀࡄࡉࡀ ࡀࡆࡀࡋ ࡒࡀࡌࡋࡇ ࡋࡔࡀࡋࡉࡈࡅࡍ ࡀࡌࡓࡉࡋࡇ ࡋࡀࡄࡆࡉࡕ ࡀࡋࡀࡄࡀ ࡀࡋࡉࡄࡅࡍ ࡖࡓࡉࡄࡀ ࡌࡍ ࡀࡕࡓࡇ ࡀࡕࡀ ࡓࡉࡄࡀ ࡀࡕࡀ ࡌࡍ ࡀࡕࡓࡇ ࡓࡄࡉࡔ ࡌࡀࡍࡀ ࡌࡍ ࡃࡅࡊࡕࡇ ࡒࡀࡓࡉࡀ ࡅࡌࡄࡀࡉࡉࡀ ࡌࡉࡕࡉࡀ ࡅࡌࡓࡀࡍࡃࡉࡃ ࡌࡉࡕࡉࡀ ࡅࡔࡀࡊࡁࡉࡀ ࡌࡀࡉࡀࡓࡋࡉࡍ ࡋࡍࡉࡔࡌࡀࡕࡀ ࡖࡔࡉࡄࡀ ࡅࡔࡀࡅࡉࡀ ࡋࡀࡕࡀࡓ ࡍࡄࡅࡓ ࡄࡀࡃࡀ ࡄࡀࡃࡀ ࡀࡁࡀࡃ ࡈࡀࡁࡀ ࡅࡕࡓࡀࡑ ࡖࡄࡉࡉࡀ ࡓࡅࡔࡅࡌࡀ ࡀࡋࡀࡄࡀ ࡀࡋࡉࡄࡅࡍ ࡐࡉࡄࡕࡇ ࡋࡐࡅࡌࡇ ࡅࡋࡁࡍࡇ ࡁࡅࡊࡓࡇ ࡖࡍࡉࡌࡀࡓࡋࡅࡍ ࡀࡕࡅࡍ ࡀࡕࡅࡍ ࡁࡍࡀࡉ ࡁࡅࡊࡓࡀࡉ ࡅࡔࡉࡕࡋࡀࡉ ࡌࡉࡍࡃࡀࡌ ࡖࡏࡌࡀࡓࡋࡊࡅࡍ ࡔࡅࡌࡀ ࡏࡅ ࡌࡀࡔࡊࡉࡕࡅࡍ ࡂࡀࡁࡓࡀ ࡆࡀࡃࡉࡒࡀ ࡎࡂࡉࡃࡅࡋࡇ ࡖࡓࡁࡀ ࡎࡉࡂࡅࡃࡕࡀ ࡄࡃࡀ ࡋࡃࡉࡋࡇ ࡎࡂࡉࡃࡅࡋࡇ ࡅࡕࡀࡓࡕࡉࡍ ࡋࡓࡉࡄࡀ ࡖࡄࡉࡉࡀ ࡏࡋࡇ ࡔࡓࡉࡀ ࡄࡆࡅࡍ ࡖࡄࡉࡉࡀ ࡆࡀࡊࡉࡍ ࡅࡄࡉࡉࡀ ࡆࡉࡊࡉࡅࡉࡀ ࡋࡄࡀࡆࡉࡍ ࡀࡋࡌࡀ ࡎ_____ࡀ |
| par. 136 | , ࡀࡕࡀ ࡀࡕࡀ ࡌࡀࡍࡃࡀ ࡖࡄࡉࡉࡀ ࡈࡅࡓࡀ ࡖࡄࡔࡅࡊࡀ ࡍࡉࡍࡄࡀࡓ ࡍࡉࡍࡄࡀࡓ ࡈࡅࡓࡀ ࡖࡄࡔࡅࡊࡀ ࡅࡌࡉࡀ ࡕࡀࡄࡌࡉࡀ ࡍࡉࡓࡉࡅࡆࡀࡍ ࡎ_____ࡀ ࡄࡀࡋࡉࡍ ࡕࡋࡀࡕࡀ ࡏࡍࡉࡀࡍࡉࡀ ࡅࡕࡋࡀࡕࡀ ࡃࡓࡀࡔࡉࡀ ࡉࡅࡌࡀ ࡖࡕࡋࡀࡕࡀ ࡄࡀࡁࡔࡀࡁࡀ ࡄࡉࡍࡅࡍ ࡎ_____ࡀ |
| par. 137 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡒࡀࡋࡀ ࡄࡅࡀ ࡁࡏࡔࡅࡌࡉࡀ ࡅࡓࡉࡌࡀ ࡄࡅࡀ ࡁࡉࡕ ࡊࡅࡊࡁࡉࡀ ࡓࡅࡄࡀ ࡅࡔࡉࡁࡉࡀࡄࡉࡀ ࡄࡉࡍࡅࡍ ࡁࡌࡀࡋࡉࡀ ࡉࡀࡕࡁࡉࡀ ࡄࡉࡍࡅࡍ ࡉࡀࡕࡁࡉࡀ ࡁࡌࡀࡋࡉࡀ ࡋࡂࡀࡁࡓࡀ ࡖࡌࡍ ࡕࡉࡁࡉࡋ ࡔࡅࡀࡓ ࡋࡂࡀࡁࡓࡀ ࡖࡔࡅࡀࡓ ࡌࡍ ࡕࡉࡁࡉࡋ ࡅࡐࡓࡀࡈ ࡁࡁࡀࡉࡕࡀ ࡐࡅࡓࡈࡕࡀ ࡐࡅࡓࡈࡕࡀ ࡐࡓࡀࡈ ࡁࡁࡀࡉࡕࡀ ࡅࡓࡌࡀ ࡁࡂࡀࡅࡇ ࡕࡉࡂࡓࡀ ࡕࡉࡂࡓࡀ ࡓࡌࡉࡀ ࡁࡂࡀࡅࡇ ࡋࡃࡀࡓ ࡃࡀࡓࡉࡀ ࡋࡀࡌࡉࡔࡕࡓࡉࡀ ࡏࡋࡇ ࡖࡀࡕࡉࡀ ࡌࡀࡍࡃࡀ ࡖࡄࡉࡉࡀ ࡅࡕࡋࡀࡕࡀ ࡁࡄࡉࡓࡉࡀ ࡌࡉࡍࡇ ࡍࡀࡎࡁࡉࡀ ࡌࡉࡍࡇ ࡍࡀࡎࡁࡉࡀ ࡕࡋࡀࡕࡀ ࡁࡄࡉࡓࡉࡀ ࡅࡌࡀࡎࡉࡒࡋࡅࡍ ࡋࡃࡀࡅࡓࡀ ࡕࡀࡒࡍࡀ ࡋࡀࡕࡓࡀ ࡖ ࡍࡀࡄࡅࡓ ࡅࡕࡀࡒࡅࡍ ࡒࡓࡏࡉࡀ ࡅࡌࡆࡀࡌࡍࡀ ࡍࡉࡔࡌࡀࡕࡊࡅࡍ ࡅࡍࡉࡔࡌࡀࡕࡀ ࡖࡀࡄࡀࡍ ࡈࡀࡁࡉࡀ ࡅࡄࡀࡋࡉࡍ ࡀࡄࡅࡀࡕࡀࡍ ࡖࡌࡄࡀࡉࡌࡍࡉࡀ ࡆࡊࡉࡕ ࡌࡀࡍࡃࡀ ࡖࡄࡉࡉࡀ ࡈࡀࡁࡀ ࡖࡌࡒࡀࡉࡀࡌ ࡓࡀࡄࡌࡇ ࡅࡄࡉࡉࡀ ࡆࡀࡊࡉࡍ ࡎ_____ࡀ |
| par. 138 | , ࡒࡀࡋࡀ ࡖࡍࡉࡁࡈࡀ ࡊࡀࡎࡉࡀ ࡖࡌࡀࡋࡉࡋ ࡌࡍ ࡕࡉࡁࡉࡋ ࡅࡃࡓࡀࡔ ࡌࡀࡋࡉࡋ ࡅࡃࡓࡀࡔ ࡌࡍ ࡕࡉࡁࡉࡋ ࡅࡄࡉࡉࡀ ࡓࡁࡉࡀ ࡌࡍ ࡊࡉࡎࡉࡀ ࡏࡍࡉࡅࡉࡀ ࡄࡉࡉࡀ ࡓࡁࡉࡀ ࡏࡍࡉࡅࡉࡀ ࡌࡍ ࡊࡉࡎࡉࡀ ࡅࡍࡑࡀࡁ ࡔࡂࡀࡍࡃࡀ ࡅࡔࡀࡃࡀࡓࡋࡇ ࡔࡂࡀࡍࡃࡀ ࡍࡑࡀࡁ ࡔࡀࡃࡀࡓࡋࡇ ࡅࡌࡊࡀࡁࡉࡔ ࡄࡀࡉࡋࡀࡉࡄࡅࡍ ࡖࡌࡀࡓࡃࡉࡀ ࡎ_____ࡀ |
| par. 139 | , ࡋࡈࡅࡓ ࡊࡀࡓࡉࡌࡋࡀ ࡎࡉࡋࡒࡉࡕ ࡎࡋࡉࡒࡉࡋࡀࡊ ࡈࡅࡓࡀ ࡈࡅࡓ ࡊࡀࡓࡉࡌࡋࡀ ࡋࡈࡅࡓ ࡊࡀࡓࡉࡌࡋࡀ ࡎࡉࡋࡒࡉࡕ ࡏࡎࡕࡀࡊࡅࡍ ࡕࡓࡉࡎࡀࡓ ࡂࡅࡐࡍࡉࡀ ࡄࡉࡆࡉࡅࡍ ࡂࡅࡐࡍࡉࡀ ࡌࡉࡄࡉࡆࡉࡀ ࡖࡄࡉࡆࡉࡅࡍ ࡂࡅࡐࡍࡉࡀ ࡍࡐࡉࡔ ࡀࡅࡐࡀࡉࡄࡅࡍ ࡐࡀࡓࡎࡉࡀ ࡍࡐࡉࡔ ࡐࡀࡓࡎࡉࡀ ࡀࡅࡐࡀࡉࡄࡅࡍ ࡅࡍࡐࡉࡔ ࡈࡅࡍࡀࡉࡄࡅࡍ ࡋࡎࡉࡌࡀࡃࡓࡅࡍ ࡋࡀࡏࡃࡅࡍ ࡅࡋࡀࡐࡉࡓࡔࡅࡍ ࡅࡋࡀࡍࡉࡎࡁࡅࡍ ࡋࡁࡀࡋࡅࡍ ࡋࡀࡏࡃࡅࡍ ࡅࡋࡀࡐࡉࡓࡔࡅࡍ ࡖࡌࡀࡍ ࡀࡍࡀ ࡅࡁࡓ ࡌࡀࡍ ࡀࡍࡀ ࡀࡍࡀ ࡂࡀࡁࡓࡀ ࡖࡄࡉࡆࡉࡀࡍ ࡅࡐࡉࡓࡔࡀࡍ ࡋࡀࡕࡓࡀ ࡖࡄࡉࡉࡀ ࡌࡉࡆࡋࡇ ࡆࡊࡉࡕ ࡌࡀࡍࡃࡀ ࡖࡄࡉࡉࡀ ࡅࡆࡀࡊࡉࡕ ࡊࡅࡋࡄࡅࡍ ࡓࡀࡄࡌࡀࡊ ࡎ_____ࡀ |
| par. 140 | , ࡁࡉࡍࡉࡀ ࡕࡓࡉࡍ ࡈࡅࡓࡉࡀ ࡅࡁࡉࡍࡉࡀ ࡔࡊࡉࡍࡀࡕࡀ ࡕࡋࡀࡕ ࡁࡉࡍࡉࡀ ࡕࡓࡉࡍ ࡈࡅࡓࡉࡀ ࡉࡀࡅࡀࡓ ࡁࡄࡉࡓࡀ ࡔࡊࡉࡍࡕࡀ ࡔࡊࡀࡍ ࡔࡊࡉࡍࡕࡀ ࡔࡊࡀࡍ ࡉࡀࡅࡀࡓ ࡅࡁࡄࡉࡓࡉࡀ ࡆࡉࡃࡒࡀ ࡁࡂࡀࡅࡇ ࡌࡉࡕࡒࡀࡉࡌࡉࡀ ࡌࡉࡕࡒࡀࡉࡌࡉࡀ ࡁࡄࡉࡓࡉࡀ ࡆࡉࡃࡒࡀ ࡅࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡎ_____ࡀ |
| par. 141 | , ࡌࡀࡍ ࡍࡉࡕࡉࡀ ࡅࡌࡀࡍ ࡍࡉࡌࡀࡓࡋࡉࡀ ࡌࡀࡍ ࡍࡀࡅࡃࡀࡍ ࡅࡌࡀࡍ ࡍࡀࡐࡓࡉࡔࡀࡍ ࡌࡀࡍ ࡍࡉࡕࡉࡀ ࡅࡌࡀࡍ ࡍࡉࡌࡀࡓࡋࡉࡀ ࡏࡅࡕࡓࡉࡀ ࡋࡌࡀࡄࡅ ࡃࡀࡌࡉࡍ ࡋࡌࡀࡄࡅ ࡃࡀࡌࡉࡍ ࡏࡅࡕࡓࡉࡀ ࡅࡋࡌࡀࡄࡅ ࡃࡀࡌࡉࡍ ࡐࡀࡎࡉࡌࡊࡉࡀ ࡏࡅࡕࡓࡉࡀ ࡋࡆࡉࡅࡀ ࡃࡀࡌࡉࡍ ࡅࡋࡍࡄࡅࡓࡀ ࡃࡀࡌࡉࡍ ࡐࡀࡎࡉࡌࡊࡉࡀ ࡌࡉࡌࡀ ࡉࡀࡌࡉࡍ ࡏࡅࡕࡓࡉࡀ ࡏࡅࡕࡓࡉࡀ ࡌࡉࡌࡀ ࡉࡀࡌࡉࡍ ࡅࡋࡀࡌࡊࡀࡃࡁࡉࡍ ࡍࡉࡊࡀࡃࡁࡅࡍ ࡔࡉࡁࡉࡀࡄࡉࡀ ࡌࡉࡎࡀࡐ ࡎࡀࡉࡐࡉࡀ ࡋࡉࡅࡌࡀ ࡓࡁࡀ ࡖࡎࡅࡐ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎ_____ࡀ |
| par. 142 | , ࡌࡉࡕࡉࡀ ࡖࡄࡉࡁࡉࡋ ࡏࡅࡕࡓࡀ ࡗ ࡔࡉࡕࡉࡋ ࡌࡀࡎࡂࡉࡀ ࡋࡁࡉࡕ ࡓࡀࡄࡌࡇ ࡕࡀࡓࡌࡉࡃࡉࡀ ࡖࡔࡅࡌࡅࡉࡀ ࡋࡒࡀࡋࡇ ࡖࡀࡍࡅࡔ ࡏࡅࡕࡓࡀ ࡎࡀࡂࡉࡀ ࡎࡀࡂࡃࡉࡀ ࡅࡌࡔࡀࡁࡉࡋࡅࡍ ࡋࡄࡉࡉࡀ ࡓࡁࡉࡀ ࡌࡍ ࡓࡉࡔ ࡁࡓࡉࡔ ࡎ_____ࡀ , ࡄࡀࡋࡉࡍ ࡕࡋࡀࡕࡀ ࡏࡍࡉࡀࡍࡉࡀ ࡅࡕࡋࡀࡕࡀ ࡃࡓࡀࡔࡉࡀ ࡉࡅࡌࡀ ࡖࡀࡓࡁࡀ ࡄࡀࡁࡔࡀࡁࡀ ࡄࡉࡍࡅࡍ ࡎ_____ࡀ |
| par. 143 | ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡁࡆࡉࡅࡇ ࡖࡀࡁ ࡒࡀࡉࡉࡌࡍࡀ ࡅࡁࡕࡅࡔࡁࡉࡄࡕࡇ ࡖࡂࡀࡁࡓࡀ ࡍࡀࡑࡁࡀࡉ ࡁࡆࡉࡅࡇ ࡖࡀࡁ ࡒࡀࡉࡉࡌࡍࡀ ࡅࡕࡀࡓࡑࡉࡍࡀࡁࡇ ࡁࡉࡕ ࡕࡅࡔࡋࡉࡌࡀ ࡀࡓࡒࡀ ࡁࡒࡀࡋࡀࡉ ࡆࡀࡄࡀࡕ ࡅࡏࡔࡅࡌࡉࡀ ࡁࡆࡉࡅࡀࡉ ࡏࡆࡃࡀࡓࡀࡍࡁࡉࡀࡕ ࡌࡉࡁࡀࡔ ࡉࡀࡁࡔࡉࡀ ࡉࡀࡌࡀࡌࡉࡀ ࡅࡆࡀࡁࡉࡀ ࡁࡑࡀࡃࡉࡀ ࡍࡀࡐࡋࡉࡀ ࡌࡉࡕࡐࡀࡎࡅࡎࡉࡀ ࡌࡉࡕࡐࡀࡎࡀࡎࡉࡀ ࡀࡒࡓࡉࡀ ࡅࡂࡀࡁࡀࡓࡉࡀ ࡖࡕࡉࡁࡉࡋ ࡌࡉࡕࡍࡀࡍࡂࡓࡉࡀ ࡈࡅࡓࡉࡀ ࡖࡄࡀࡉࡆࡉࡍ ࡓࡀࡌࡉࡀ ࡗ ࡕࡀࡕࡅࡓࡉࡀ ࡌࡉࡕࡌࡀࡊࡀࡊࡉࡀ ࡁࡉࡔࡉࡀ ࡖࡆࡀࡒࡐࡉࡀ ࡀࡋࡀࡍࡐࡀࡉ ࡏࡉࡕ ࡂࡀࡁࡓࡀ ࡖ ࡌࡍࡀࡍࡂࡀࡓࡋࡅࡍ ࡋࡀࡅ ࡁࡄࡀࡉࡋࡀࡉ ࡃࡉࡋࡉࡀ ࡄࡉࡍࡉࡋࡀ ࡁࡄࡀࡉࡋࡀࡉࡄࡅࡍ ࡖࡄࡉࡉࡀ ࡓࡅࡓࡁࡉࡀ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎ_____ࡀ |
| par. 144 | , ࡀࡍࡀ ࡁࡆࡉࡅࡀࡉ ࡃࡀࡊࡉࡀ ࡍࡈࡉࡓࡍࡀ ࡅࡏࡅࡕࡓࡉࡀ ࡀࡄࡀࡉ ࡁࡀࡍࡄࡅࡓࡀ ࡊࡎࡉࡍ ࡌࡍ ࡏࡓࡅࡕࡅࡍ ࡅࡌࡍ ࡕࡅࡔࡁࡉࡄࡕࡅࡍ ࡖࡏࡅࡕࡓࡉࡀ ࡀࡄࡀࡉ ࡀࡕࡉࡀ ࡑࡀࡅࡕࡀ ࡖࡄࡉࡉࡀ ࡅࡔࡀࡓࡉࡀ ࡏࡋࡀࡉ ࡎ_____ࡀ |
| par. 145 | , ࡗ ࡌࡀࡌࡋࡉࡋࡉࡀ ࡊࡀࡁࡉࡓࡉࡀ ࡁࡀࡕࡓࡀ ࡎࡀࡂࡉࡀ ࡁࡉࡕ ࡕࡅࡔࡋࡉࡌࡀ ࡎࡀࡂࡉࡉࡀ ࡅࡊࡀࡁࡉࡓࡉࡀ ࡋࡔࡉࡋࡌࡀࡉ ࡅࡍࡉࡃࡁࡀࡉ ࡍࡀࡑࡁࡉࡀ ࡍࡑࡀࡁࡉࡍࡅࡍ ࡋࡔࡉࡋࡌࡀࡉ ࡅࡍࡉࡃࡁࡀࡉ ࡅࡋࡍࡑࡀࡁ ࡆࡉࡅࡀ ࡏࡄࡀࡁࡉࡍࡅࡍ ࡁࡀࡃࡉࡀࡅࡓࡉࡀ ࡗ ࡌࡉࡎࡕࡌࡉࡊ ࡍࡑࡀࡁ ࡆࡉࡅࡀ ࡋࡏࡅࡕࡓࡉࡀ ࡕࡅࡔࡋࡉࡌࡉࡀ ࡖࡍࡑࡀࡁࡋࡅࡍ ࡌࡀࡋࡉࡋ ࡁࡒࡀࡋࡇ ࡍࡉࡄࡀ ࡅࡁࡄࡉࡓࡉࡀ ࡀࡋࡀࡍࡐࡇ ࡍࡀࡐࡒࡉࡀ ࡁࡄࡉࡓࡉࡀ ࡍࡀࡐࡒࡉࡀ ࡀࡋࡀࡍࡐࡇ ࡅࡌࡍ ࡕࡅࡔࡁࡉࡄࡕࡇ ࡉࡀࡄࡉࡁࡋࡅࡍ ࡉࡀࡄࡉࡁࡋࡅࡍ ࡌࡍ ࡕࡅࡔࡁࡉࡄࡕࡇ ࡅࡁࡄࡉࡓࡉࡀ ࡁࡕࡉࡁࡉࡋ ࡌࡉࡕࡒࡀࡉࡌࡉࡀ ࡌࡉࡕࡒࡀࡉࡌࡉࡀ ࡁࡄࡉࡓࡉࡀ ࡆࡉࡃࡒࡀ ࡅࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖ ࡀࡎࡂࡉࡀ ࡋࡊࡀ ࡎ_____ࡀ |
| par. 146 | , ࡀࡍࡀ ࡁࡆࡉࡅࡀࡉ ࡃࡀࡊࡉࡀ ࡍࡈࡉࡓࡍࡀ ࡗ ࡊࡀࡁࡉࡓࡉࡀ ࡁࡕࡅࡔࡁࡉࡄࡕࡀࡉࡄࡅࡍ ࡋࡁࡅࡔࡀࡉ ࡃࡍࡀ ࡁࡂࡅ ࡁࡀࡉࡕࡀ ࡅࡁࡅࡕࡀࡉ ࡅࡕࡅࡔࡁࡉࡄࡕࡀࡉ ࡋࡀࡕࡓࡇ ࡎࡀࡋࡒࡀ ࡎ_____ࡀ |
| par. 147 | , ࡀࡍࡉࡀ ࡀࡍࡀ ࡋࡏࡌࡀࡕ ࡏࡆࡉࡋ ࡋࡉࡁࡀࡉ ࡖࡊࡀࡉࡅࡁ ࡍࡉࡕࡀࡐࡀ ࡍࡉࡕࡀࡐࡀ ࡋࡉࡁࡀࡉ ࡖࡊࡀࡉࡅࡁ ࡅࡕࡉࡐࡔࡀࡒ ࡍࡉࡔࡌࡀࡕ ࡖࡌࡍࡀࡊࡓࡉࡀ ࡁࡀࡕࡓࡀ ࡖࡍࡐࡉࡔ ࡍࡉࡔࡕࡀࡉࡋࡅࡍ ࡑࡀࡅࡕࡀࡉࡄࡅࡍ ࡖࡄࡉࡉࡀ ࡔࡀࡓࡉࡀ ࡏࡋࡀࡉ ࡅࡕࡉࡔࡓࡉࡀ ࡋࡕࡀࡓࡌࡉࡃࡀࡉ ࡖࡓࡀࡃࡐࡉࡍࡅࡍ ࡔࡅࡁࡀ ࡁࡄࡀࡆࡉࡍ ࡀࡋࡌࡀ ࡌࡉࡓࡃࡀࡐ ࡓࡀࡃࡐࡉࡀ ࡔࡅࡁࡀ ࡀࡋࡌࡉࡀ ࡖࡓࡀࡃࡐࡉࡀ ࡅࡋࡀࡊࡀࡔࡓࡉࡀ ࡔࡅࡁࡀ ࡄࡉࡍࡅࡍ ࡅࡌࡀࡋࡊࡀࡉࡅࡍ ࡋࡉࡀࡒࡃࡀࡍࡉࡀ ࡖࡍࡅࡓࡀ ࡀࡆࡋࡉࡀ ࡈࡀࡁࡉࡀ ࡅࡁࡄࡉࡓࡉࡀ ࡅࡊࡉࡍࡉࡀ ࡅࡔࡀࡋࡌࡀࡍࡉࡀ ࡎࡀࡋࡒࡉࡀ ࡄࡀࡆࡉࡋࡇ ࡋࡀࡕࡀࡓ ࡍࡄࡅࡓ ࡌࡉࡔࡕࡀࡉࡉࡍ ࡄࡉࡉࡀ ࡆࡀࡊࡉࡍ ࡅࡆࡀࡊࡉࡀ ࡂࡀࡁࡓࡀ ࡖࡀࡎࡂࡉࡀ ࡋࡊࡀ ࡎ_____ࡀ |
| par. 148 | ࡀࡍࡉࡀ ࡀࡍࡀ ࡅࡌࡀࡃࡍࡉࡍࡀ ࡁࡄࡉࡓ ࡆࡉࡃࡒࡀ ࡑࡅࡕ ࡅࡔࡅࡌࡀ ࡋࡒࡀࡋࡀࡉ ࡀࡍࡀࡕ ࡀࡍࡉࡀ ࡅࡁࡍࡀࡊ ࡅࡔࡉࡕࡋࡀࡊ ࡅࡕࡀࡓࡌࡉࡃࡀࡊ ࡕࡉࡎࡀࡒ ࡕࡉࡄࡉࡆࡉࡇ ࡋࡀࡕࡀࡓ ࡍࡄࡅࡓ ࡎ_____ࡀ ࡄࡀࡋࡉࡍ ࡕࡋࡀࡕࡀ ࡏࡍࡉࡀࡍࡉࡀ ࡅࡕࡋࡀࡕࡀ ࡃࡓࡀࡔࡉࡀ ࡉࡅࡌࡀ ࡖࡄࡀࡌࡔࡀ ࡄࡀࡁࡔࡀࡁࡀ ࡄࡉࡍࡅࡍ ࡎ_____ࡀ |
| par. 149 | , ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡌࡓࡀࡅࡓࡀࡁ ࡍࡄࡅࡓࡀ ࡔࡀࡍࡉࡀ ࡋࡁࡀࡁࡀ ࡖࡁࡉࡕ ࡀࡌࡀ ࡏࡌࡀ ࡁࡌࡉࡓࡉࡀࡉ ࡕࡉࡁࡂࡀ ࡏࡌࡀ ࡕࡉࡁࡂࡀ ࡁࡌࡉࡓࡉࡀࡉ ࡅࡔࡀࡉࡅࡋࡉࡀ ࡕࡉࡔࡀࡉࡋࡀ ࡌࡍࡀ ࡏࡕࡉࡕ ࡁࡓࡀࡕ ࡌࡉࡓࡉࡀࡉ ࡖࡀࡍࡐࡉࡊ ࡅࡀࡓࡃࡀ ࡂࡀࡈࡐࡉࡀ ࡀࡍࡐࡉࡊ ࡂࡀࡈࡐࡉࡀ ࡅࡀࡓࡃࡀ ࡅࡀࡉࡍࡉࡊ ࡌࡋࡏࡉࡀ ࡌࡍ ࡔࡉࡍࡕࡅࡍ ࡀࡉࡍࡉࡊ ࡌࡍ ࡔࡉࡍࡕࡅࡍ ࡌࡋࡏࡉࡀ ࡅࡋࡁࡉࡕ ࡂࡁࡉࡍࡉࡊ ࡔࡀࡄࡀࡓࡕࡀ ࡅࡀࡌࡓࡀࡋࡀ ࡄࡀ ࡕࡓࡉࡍ ࡕࡋࡀࡕࡀ ࡉࡅࡌࡉࡀ ࡀࡄࡀࡉ ࡋࡁࡉࡕ ࡀࡁ ࡔࡓࡅࡍ ࡀࡄࡀࡉ ࡔࡓࡅࡍ ࡋࡁࡉࡕ ࡀࡁ ࡅࡃࡀࡓࡔࡉࡍ ࡃࡓࡀࡔࡉࡀ ࡔࡀࡍࡉࡉࡀ ࡋࡒࡀࡋࡀࡉࡅࡍ ࡅࡒࡀࡋ ࡃࡓࡀࡔࡀࡉࡅࡍ ࡖࡏࡅࡕࡓࡉࡀ ࡀࡄࡀࡉ ࡔࡉࡍࡕࡀ ࡋࡀࡉࡍࡀࡉ ࡋࡀࡕࡉࡀ ࡔࡉࡍࡕࡀ ࡋࡀࡕࡉࡀ ࡋࡀࡉࡍࡀࡉ ࡅࡋࡀ ࡔࡀࡄࡀࡓࡕࡀ ࡋࡁࡉࡕ ࡂࡁࡉࡍࡀࡉ ࡋࡀࡔࡉࡌࡉࡕ ࡁࡓࡀࡕ ࡌࡉࡓࡉࡀࡉ ࡖࡉࡀࡄࡅࡈࡀࡉࡉࡀ ࡌࡀࡄࡅ ࡀࡌࡓࡉࡀ ࡏࡋࡉࡊ ࡀࡌࡓࡉࡀ ࡉࡀࡄࡅࡈࡀࡉࡉࡀ ࡖࡁࡓࡀࡕࡉࡊ ࡂࡀࡁࡓࡀ ࡓࡉࡄࡌࡀࡕ ࡎࡍࡀࡕࡀ ࡋࡉࡀࡄࡉࡃࡅࡕࡀ ࡅࡍࡀࡑࡉࡓࡅࡕࡀ ࡓࡉࡄࡌࡀࡕ ࡎࡍࡀࡕࡇ ࡋࡁࡀࡁࡀ ࡖࡁࡉࡕ ࡀࡌࡀ ࡅࡓࡉࡄࡌࡀࡕ ࡁࡀࡁࡀ ࡖࡌࡀࡔࡊࡍࡀ ࡎࡍࡀࡕࡀ ࡋࡈࡅࡈࡉࡐࡕࡀ ࡅࡓࡉࡄࡌࡀࡕ ࡊࡋࡉࡋࡉࡀ ࡓࡀࡅࡆࡉࡀ ࡁࡔࡀࡐࡕࡀ ࡀࡁࡃࡀ ࡏࡁࡉࡃࡀࡕࡀ ࡅࡁࡄࡀࡁࡔࡀࡁࡀ ࡍࡀࡈࡓࡀ ࡏࡃࡀ ࡌࡉࡓࡉࡀࡉ <ࡀ>ࡎࡋࡉࡕࡇ ࡋࡍࡉࡌࡅࡎࡀ ࡖࡀࡎࡀࡓ ࡔࡅࡁࡀ ࡁࡏࡅࡓࡀࡔࡋࡀࡌ ࡋࡀࡕࡓࡀ ࡗ ࡒࡀࡉࡌࡀ ࡌࡉࡓࡉࡀࡉ ࡀࡒࡀࡐࡓࡀ ࡁࡋࡉࡂࡓࡀ ࡃࡀࡓࡀ ࡅࡀࡌࡓࡀ ࡀࡒࡀࡐࡓࡀ ࡋࡐࡅࡌࡀࡉࡄࡅࡍ ࡖ ࡉࡀࡄࡅࡈࡀࡉࡉࡀ ࡅࡂࡉࡈࡌࡀ ࡋࡐࡅࡌࡀࡉࡄࡅࡍ ࡖࡊࡅࡋࡄࡅࡍ ࡊࡀࡄࡍࡉࡀ ࡅࡎࡀࡓࡒࡉࡍࡀ ࡖࡀࡕࡅࡕࡉࡀ ࡋࡉࡂࡓࡀࡉࡄࡅࡍ ࡖࡓࡀࡊࡔࡉࡀ ࡋࡒࡀࡔࡉࡔࡉࡀ ࡖࡏࡕࡁࡇ ࡁࡏࡅࡓࡀࡔࡋࡀࡌ ࡀࡍࡀ ࡖࡓࡄࡀࡌࡕࡇ ࡋࡀࡎࡍࡀࡉࡕࡇ ࡅࡃࡏࡎࡉࡍࡉࡉࡇ ࡋࡀࡏࡓࡉࡄࡌࡇ ࡋࡁࡀࡓ ࡓࡄࡀࡌࡕࡇ ࡋࡌࡀࡓࡀࡉ ࡌࡀࡍࡃࡀ ࡖࡄࡉࡉࡀ ࡖࡍࡉࡒࡅࡌ ࡍࡉࡄࡅࡉࡋࡉࡀ ࡁࡀࡄࡉࡃ ࡏࡃࡀ ࡀࡄࡉࡃ ࡏࡃࡀ ࡅࡎࡉࡌࡀࡊࡀ ࡌࡍ ࡀࡕࡓࡀ ࡖࡄࡔࡅࡊࡀ ࡋࡀࡕࡀࡓ ࡍࡄࡅࡓ ࡆࡊࡉࡕ ࡌࡀࡍࡃࡀ ࡖࡄࡉࡉࡀ ࡅࡆࡀࡊࡉࡕ ࡊࡅࡋࡄࡅࡍ ࡓࡀࡄࡌࡉࡀ ࡔࡅࡌࡀࡊ ࡅࡄࡉࡉࡀ ࡆࡀࡊࡏࡉࡍ ࡎ_____ࡀ |