← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
74429: Diuan uTafsir DRaza DAbahata

Click on a word for lexical analysis.
Click on a red-colored coordinate for comments and/or translations of the line
Ask AI about a passage
Hide manuscript variants

000a ࡌࡀࡓࡀࡉ ࡌࡔࡀࡁࡀ
000b ࡊࡅࡔࡈࡀ ࡀࡎࡉࡍࡊࡅࡍ
001 ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡒࡀࡃࡌࡀࡉࡉࡀ ࡍࡅࡊࡓࡀࡉࡉࡀ ࡌࡍ ࡀࡋࡌࡉࡀ ࡖࡍࡄࡅࡓࡀ ࡉࡀࡕࡉࡓࡉࡀ ࡖࡏࡋࡀࡅࡉࡀ ࡊࡅࡋࡄࡅࡍ ࡏࡅࡁࡀࡃࡉࡀ ࡀࡎࡅࡕࡀ ࡅࡆࡀࡊࡅࡕࡀ ࡅࡄࡀࡉࡋࡀ ࡅࡔࡓࡀࡓࡀ
002 ࡅࡏࡌࡓࡀ ࡅࡔࡉࡌࡀ ࡅࡄࡀࡃࡅࡀࡕ ࡋࡉࡁࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡃࡉࡋࡉࡀ ࡁࡀࡉࡀࡍ ࡁࡓࡄࡀࡅࡀࡕࡅࡌ ࡉࡀࡃࡉࡕࡅࡍ ࡉࡀ ࡀࡄࡀࡍ ࡖࡀࡕࡉࡕࡅࡍ ࡌࡍ ࡀࡁࡀࡕࡓࡀࡍ ࡗ
003 ࡀࡍࡎࡀࡉࡕࡇ ࡋࡄࡀࡆࡉࡍ ࡃࡉࡅࡀࡍ ࡌࡍ ࡃࡉࡅࡀࡍ ࡖࡉࡀࡄࡉࡀ ࡉࡅࡄࡀࡍࡀ ࡁࡓ ࡔࡀࡓࡀࡕ ࡌࡀࡌࡀࡍࡉࡀ {{ࡅࡄࡉࡀ}}ࡅࡉࡀࡄࡉࡀ ࡉࡅࡄࡀࡍࡀ ࡀࡍࡎࡀ ࡌࡍ ࡃࡉࡅࡀࡍ ࡖࡓࡁࡀࡉ ࡌࡄࡀࡕࡀࡌ ࡁࡓࡉࡀࡄࡉࡀ
004 ࡅࡀࡔࡊࡀ ࡖࡊࡃࡀࡁࡋࡇ ࡁࡂࡀࡅࡇ ࡅࡀࡌࡀࡓ ࡖࡄࡀࡆࡉࡍ ࡃࡉࡅࡀࡍ ࡋࡀࡄࡅࡀࡋࡇ ࡓࡉࡔࡀ ࡅࡃࡉࡍࡁࡀ ࡊࡕࡀࡁ ࡀࡌࡅࡃ ࡖࡄࡆࡀࡕ ࡀࡉࡍࡀࡉ ࡅࡋࡀࡄࡅࡀ ࡋࡁࡓ ࡌࡍ ࡄࡀࡆࡉࡍ ࡃࡉࡅࡀࡍ ࡁࡔࡀࡓࡔࡀ
005 ࡖࡄࡉࡉࡀ ࡁࡄࡀࡋࡉࡍ ࡃࡅࡊࡕࡀ ࡅࡀࡍࡀ ࡀࡍࡎࡉࡕ ࡌࡍ ࡀࡍࡎࡀࡕࡇ ࡅࡄࡉࡉࡀ ࡌࡀࡋࡀࡉࡉࡀ ࡄࡉࡍࡅࡍ ࡁࡄࡀࡉࡋࡇ ࡖࡉࡀࡅࡀࡓ ࡆࡉࡅࡀ ࡅࡎࡉࡌࡀࡕ ࡄࡉࡉࡀ
006 ࡄࡀࡆࡉࡍ ࡏࡕࡉࡁࡉࡅࡍ ࡄࡀࡍࡀࡕࡅࡍ ࡏࡅࡕࡓࡉࡀ ࡋࡅࡀࡕࡇ ࡖࡄࡀࡍࡀࡕࡇ ࡍࡉࡈࡅࡁࡕࡀ ࡏࡌࡀࡉࡄࡅࡍ ࡖࡌࡀࡋࡊࡉࡀ ࡏࡔࡕࡀࡉࡅࡍ ࡌࡉࡍࡀ ࡔࡅࡕࡀ ࡁࡓࡀࡉࡕࡀ ࡖࡕࡀࡒࡍࡀ ࡌࡍ
007 ࡊࡅࡋࡄࡅࡍ ࡌࡉࡌࡓࡉࡀ ࡅࡋࡉࡁࡀࡉࡅࡍ ࡄࡀࡒࡉࡋࡅࡍ ࡅࡎࡀࡄࡀࡒࡋࡅࡍ ࡋࡄࡀࡆࡉࡍ ࡐࡀࡓࡑࡅࡐࡀ ࡔࡁࡉࡄࡀ ࡄࡀࡆࡉࡍ⊚ ࡅࡄࡀࡉࡆࡀࡊ ࡌࡀࡋࡉࡋ ࡅࡀࡌࡀࡓࡋࡇ ࡌࡉࡕࡉࡀ ࡀࡕࡉࡍࡀ ࡅࡌࡀࡎࡂࡅࡉࡉࡀ
008 ࡎࡀࡂࡉࡍࡉࡍ ࡋࡔࡀࡁࡀ ࡔࡀࡉࡉࡀ ࡀࡕࡉࡍ ࡋࡌࡉࡄࡆࡉࡀ ࡆࡉࡅࡉࡀ ࡔࡀࡋࡉࡉࡀ ࡅࡏࡋࡀࡉ ࡃࡉࡋࡉࡀ ࡋࡔࡀࡌࡉࡍࡉࡍ ࡖࡏࡅࡃࡍࡀࡉࡀࡍ ࡋࡀࡔࡅࡌࡀ ࡅࡁࡀࡉࡉࡍࡉࡍ ࡌࡀࡌࡋࡀࡋࡉࡀ ࡉࡀࡄࡁࡀࡕࡋࡀࡍ
009 ࡖࡋࡀࡁࡀࡄࡀࡕࡀࡍ ࡊࡅࡋࡄࡅࡍ ࡌࡀࡎࡒࡀࡕࡀ ࡅࡃࡅࡊࡓࡀࡍࡉࡀ ࡌࡀࡐࡓࡀࡔ ࡖࡏࡅࡑࡓࡀࡉࡀࡍ ࡌࡉࡎࡕࡌࡉࡊ ࡅࡋࡉࡁࡀࡉࡀࡍ ࡄࡀࡃࡉࡀ ࡅࡄࡀࡉࡋࡀࡉࡀࡍ ࡈࡀࡐࡉࡀ ࡋࡄࡀࡃ ࡕࡓࡉࡍ
010 ࡅࡏࡍࡉࡔ ࡌࡍ ࡏࡅࡕࡓࡉࡀ ࡐࡀࡓࡔࡉࡂࡍࡀ ࡋࡀࡍࡉࡕࡉࡋࡀࡍ {{ࡅࡓࡀࡆࡀࡊ}} ࡅࡓࡀࡆࡀࡊ ࡊࡀࡎࡉࡀ ࡍࡀࡈࡀࡓࡋࡇ ࡋࡄࡀࡃ ࡌࡍ ࡓࡅࡁࡀࡍ ࡉࡀࡄࡁࡉࡍࡀࡋࡇ ࡄࡀࡍࡀࡕࡇ ࡖࡌࡔࡀࡋࡀࡌ ࡅࡋࡀࡉࡉࡕ
011 ࡁࡂࡀࡅࡇ ࡄࡀࡓࡂࡕࡀ ࡉࡀࡄࡁࡀࡋࡀࡍ ࡄࡀࡆࡉࡍ ࡓࡀࡆࡀ ࡖࡌࡀࡎࡂࡅࡉࡉࡀ ࡁࡀࡉࡉࡍࡉࡍ ࡏࡅࡄࡓࡀࡍ ࡓࡀࡄࡉࡒࡀ ࡗ ࡖࡂࡋࡉࡋࡀࡊ ࡅࡀࡍࡉࡍ ࡁࡔࡂࡀࡍࡃࡉࡀ ࡋࡅࡂࡅࡈࡀࡉࡍࡉࡍ ࡌࡀࡄࡅ
012 ࡐࡀࡓࡔࡉࡂࡍࡀ ࡋࡀࡍࡉࡕࡉࡋࡀࡍ ࡉࡀࡄࡁࡀࡕࡋࡀࡍ ࡗ ࡄࡀࡉࡆࡉࡍ ࡀࡌࡀࡓ ࡕࡓࡉࡍ ࡏࡅࡕࡓࡉࡀ ࡍࡉࡄࡉࡀ ࡖࡄࡉࡍࡅࡍ ࡔࡅࡓࡁࡀ ࡓࡁࡀ ࡌࡉࡕࡒࡉࡓࡉࡉࡀ ࡌࡀࡋࡀࡋࡀࡕ ࡅࡀࡌࡓࡀࡋࡅࡍ
013 ࡉࡀ ࡁࡍࡀࡉ ࡁࡅࡊࡓࡀࡉࡉࡀ ࡔࡉࡕࡋࡉࡀ ^ࡖ^ࡁࡉࡀࡌࡉࡍࡀࡉ ࡔࡉࡕࡋࡉࡕ ࡆࡉࡅࡀࡉࡊࡅࡍ ࡋࡅࡀࡕࡀࡉ ࡉࡀࡒࡉࡓ ࡅࡍࡄࡅࡓࡀࡉࡊࡅࡍ ࡋࡅࡀࡕࡀࡉ ࡋࡀࡏࡎࡕࡀࡉࡀࡊ ࡄࡀࡆࡉࡍ ࡔࡅࡉࡀࡋࡀ ࡖࡀࡍࡀࡕࡅࡍ
014 ࡔࡀࡉࡀࡋࡕࡅࡍ ࡏࡋࡇ ࡀࡍࡀ ࡋࡀࡉࡀࡃࡀࡍࡀ ࡅࡁࡎࡉࡐࡓࡉࡀ ࡋࡏࡃࡀࡉ ࡋࡀࡃࡀࡓ ࡄࡉࡍࡉࡋࡀ ࡒࡅࡌ ࡀࡎࡂࡅࡍ ࡏࡆࡉࡋ ࡋࡀࡋࡌࡀ ࡄࡀࡆࡉࡍ ࡖࡋࡉࡀࡌࡉࡍࡀࡉ ࡖࡄࡅ ࡀࡋࡌࡉࡀ ࡖࡉࡀࡅࡀࡓ
015 ࡓࡁࡀ ࡌࡀࡋࡊࡀࡉࡄࡅࡍ ࡖࡍࡀࡑࡅࡓࡀࡉࡉࡀ ࡌࡀࡓࡉࡀ ࡏࡅࡌࡒࡉࡀ ࡖࡊࡅࡋࡇ ࡍࡀࡑࡉࡓࡅࡕࡀ ࡏࡅࡋ ࡏࡆࡉࡋ ࡁࡀࡁࡀ ࡖࡏࡍࡃࡓࡅࡍࡀ ࡋࡅࡀࡕ ࡍࡀࡈࡓࡀ ࡖࡀࡋࡌࡀ ࡏࡅࡋ ࡀࡕࡅࡕࡉࡀ
016 ࡎࡓࡀࡃࡒࡀ ࡅࡀࡆࡀࡋ ࡌࡉࡆࡋࡇ ࡖࡏࡅࡕࡓࡉࡀ ࡎࡒࡉࡋࡉࡀ ࡅࡏࡔࡕࡀࡉࡅࡍ ࡋࡅࡀࡕ ࡄࡀࡍࡀࡕࡇ ࡌࡀࡋࡊࡀ ࡌࡀࡋࡀࡋࡉࡀ ࡔࡁࡉࡄࡉࡀ ࡅࡍࡈࡉࡓࡉࡀ ࡅࡎࡂࡅࡃࡋࡇ ࡖࡓࡁࡀ ࡅࡃࡍࡅࡋࡇ
017 ࡅࡌࡓࡀࡅࡓࡀࡁ ࡀࡍࡀࡕ ࡄࡉࡁࡉࡋࡆࡉࡅࡀ ࡊࡀࡃࡐࡀࡊ ࡅࡔࡅࡋ ࡔࡅࡋࡕࡀ ࡋࡕࡓࡉࡍ ࡃࡓࡀࡉࡀࡊ ࡔࡀࡁࡇ ࡀࡍࡀࡕ ࡉࡀࡒࡓࡇ ࡅࡒࡀࡉࡌࡇ ࡋࡄࡀࡆࡉࡍ ࡉࡀࡅࡀࡓ ࡆࡉࡅࡀ ࡅࡁࡆࡉࡅࡇ ࡍࡉࡋࡂࡀࡈ
018 ࡀࡕࡅࡕࡉࡀ ࡌࡀࡓࡂࡍࡉࡀ ࡍࡉࡕࡊࡀࡓࡀࡊ ࡖࡄࡅ ࡉࡀࡄࡀࡁࡋࡊࡅࡍ ࡌࡀࡋࡀࡋࡉࡀ ࡅࡎࡀࡌࡉࡊࡋࡇ ࡋࡏࡅࡑࡓࡀࡉࡊࡅࡍ ࡌࡍ ࡓࡉࡔ ࡁࡓࡉࡔ ⊚ࡅࡄࡀࡉࡆࡀࡊ ࡒࡀࡌ ࡄࡉࡁࡉࡋ ࡆࡉࡅࡀ
019 ࡅࡉࡀࡅࡀࡓ ࡆࡉࡅࡀ {{ࡖ}} ࡌࡍ ࡒࡅࡃࡀࡌࡇ ࡖࡍࡉࡈࡅࡐࡕࡀ ࡓࡀࡁࡕࡉࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡋࡅࡀࡕ ࡉࡀࡅࡀࡓ ࡓࡁࡀ ࡌࡉࡆࡋࡅࡍ ࡀࡕࡅࡍ ࡅࡀࡋ ࡋࡅࡀࡕ ࡄࡀࡍࡀࡕࡇ ࡀࡋࡌࡀ ࡅࡏࡋ
020 ࡄࡉࡋࡁࡅࡍࡀ ࡊࡀࡎࡉࡀ ࡀࡎࡂࡅࡍ ࡅࡊࡁࡉࡔ ࡒࡅࡌࡕࡀࡉࡄࡅࡍ ࡅࡎࡉࡂࡅࡃࡕࡀ ࡎࡂࡉࡃ ࡒࡅࡌࡕࡀࡉࡄࡅࡍ ࡅࡔࡀࡁࡀࡕࡇ ࡅࡌࡉࡃࡍࡉࡋࡉࡀ ࡃࡍࡅࡕࡀ ࡓࡀࡁࡕࡉࡀ ࡅࡄࡅ ࡓࡁࡀ ࡋࡅࡀࡕࡀࡉࡄࡅࡍ
021 ࡋࡀࡌࡀࡋࡉࡋ ࡖࡀࡋࡌࡀ ࡖࡎࡀࡉࡉࡊ ࡔࡀࡍࡉࡍ ࡓࡀࡄࡌࡇ ࡊࡅࡔࡈࡀ ࡐࡔࡀࡈ ࡅࡏࡔࡕࡀࡈࡉࡀ ࡋࡅࡀࡕ ࡀࡁࡀࡄࡀࡕࡇ ࡅࡄࡀࡉࡆࡀࡊ ࡊࡀࡓࡎࡀࡅࡀࡕࡀ ࡕࡓࡀࡑࡋࡅࡍ ࡋࡏࡅࡕࡓࡉࡀ ࡀࡕࡅࡕࡀࡉࡅࡍ
022 ࡅࡏࡅࡑࡈࡋࡉࡀ ࡖࡆࡉࡅࡀ ࡀࡋࡁࡉࡔࡉࡍࡅࡍ ࡅࡀࡈࡐࡉࡋࡅࡍ ࡁࡏࡒࡀࡓࡀ ࡊࡅࡋ ࡄࡀࡃ ࡌࡉࡍࡀࡉࡅࡍ ࡀࡋࡉࡐ ࡓࡅࡁࡀࡍ ࡗ ࡖࡏࡕࡋࡇ ࡅࡀࡌࡀࡓࡋࡅࡍ ࡌࡀࡋࡉࡋ ࡏࡅࡕࡓࡉࡀ ࡅࡌࡀࡌࡋࡀࡋࡊࡅࡍ ࡁࡏࡒࡀࡓࡀ
023 ࡍࡉࡕࡉࡓࡑࡅࡍ ࡅࡊࡅࡋ ࡌࡀࡄࡅ ࡖࡁࡀࡉࡉࡕࡅࡍ ࡕࡀࡔࡊࡅࡍ ࡅࡊࡅࡋ ࡖࡔࡀࡉࡋࡉࡕࡅࡍ ࡍࡉࡕࡍࡅࡋࡊࡅࡍ ࡀࡍࡀࡕࡅࡍ ࡀࡉࡍࡀࡍ ࡃࡉࡋࡀࡍ ࡅࡉࡀࡒࡉࡓ ࡌࡉࡍࡀࡉࡊࡅࡍ ࡋࡅࡀࡕࡀࡍ ࡋࡀࡍࡉࡕࡀࡔࡊࡀ ࡅࡄࡀࡉࡆࡀࡊ ࡗ
024 ࡀࡌࡀࡓ ࡉࡀࡅࡀࡓ ࡓࡁࡀ ࡄࡀࡆࡉࡍ ࡌࡉࡌࡓࡀ ࡎࡕࡀࡄࡀࡐ ࡏࡅࡕࡓࡉࡀ ࡏࡋ ࡀࡍࡐࡀࡉࡄࡅࡍ ࡍࡐࡀࡋ ࡅࡏࡔࡕࡀࡈࡉࡍ ࡅࡀࡌࡓࡉࡍ ࡀࡍࡀࡕ ࡌࡀࡋࡊࡀ ࡖࡏࡅࡕࡓࡉࡀ ࡀࡁࡀ ࡖࡌࡀࡋࡊࡉࡀ
025 ࡊࡅࡋࡄࡅࡍ ࡀࡍࡀࡕ ࡌࡉࡃࡀ ࡉࡀࡃࡉࡕ ࡅࡊࡀࡎࡉࡀࡕࡀ ࡊࡅࡋࡄࡉࡍ ࡋࡒࡅࡃࡀࡌࡀࡊ ࡌࡂࡀࡋࡀࡋࡀ ࡂࡋࡉࡋࡀࡍ ࡀࡍࡉࡍ ࡌࡀࡄࡅ ࡖࡍࡉࡌࡀࡓ ࡅࡗ ࡀࡍࡀࡕ ࡑࡀࡓࡉࡕ ࡆࡉࡌࡕࡀ ࡅࡉࡀࡃࡉࡕ ࡌࡀࡄࡅ
026 ࡖࡁࡇ ࡄࡉࡍࡉࡋࡀ ࡀࡍࡉࡍ ࡀࡌࡀࡓࡍࡉࡍ ࡖࡔࡅࡋࡕࡀ ࡃࡉࡋࡀࡍ ࡄࡀࡅࡉࡀ ࡅࡀࡍࡀࡕ ࡁࡌࡀࡈࡅࡕ ࡏࡋࡀࡅࡀࡉࡀࡍ ࡕࡉࡄࡅࡉࡀ⊚ ࡅࡄࡀࡉࡆࡀࡊ ࡌࡀࡋࡉࡋ ࡄࡉࡁࡉࡋࡆࡉࡅࡀ ࡅࡋࡉࡀࡅࡀࡓ ࡓࡁࡀ ࡖࡍࡉࡌࡀࡓࡋࡇ
027 ࡀࡕࡉࡍࡉࡍ ࡋࡅࡀࡕࡀࡊ ࡌࡀࡋࡊࡀ ࡖࡕࡀࡂࡀ ࡅࡕࡀࡐࡓࡉࡔࡉࡍࡀࡍ ࡋࡄࡀࡋࡉࡍ ࡖࡀࡁࡀࡄࡀࡕࡀ ࡖࡌࡀࡎࡉࡒࡕࡀ ࡅࡋࡃࡅࡊࡓࡀࡍࡉࡀ ࡊࡅࡋࡄࡅࡍ ࡏࡅ ࡀࡌࡓࡉࡕ ࡋࡃࡉࡋࡀࡍ ࡀࡍࡉࡍ ࡀࡓࡀࡁࡉࡂࡀࡓ ࡃࡉࡋࡀࡊ ࡀࡍࡏࡍ
028 ࡅࡄࡀࡉࡆࡀࡊ ࡌࡉࡄࡃࡀࡓ ࡅࡄࡀࡆࡉࡀ ࡋࡏࡉࡉࡋ ࡅࡄࡀࡆࡉࡀ ࡅࡍࡀࡆࡉࡀ ࡋࡕࡉࡕ ࡅࡀࡌࡀࡓ ࡄࡀࡆࡉࡍ ࡓࡀࡆࡀ ࡋࡀࡄࡆࡉࡋࡇ ࡅࡄࡉࡍࡉࡋࡀ ࡍࡀࡈࡀࡓ ࡀࡋࡌࡉࡀ ࡅࡎࡉࡐࡓࡉࡀ ࡖ ࡍࡀࡑࡉࡓࡅࡕࡀ ࡎࡀࡉࡀࡓࡍࡀ
029 ࡅࡄࡀࡉࡆࡀࡊ ࡒࡀࡌ ࡅࡀࡎࡂࡉࡀ ࡋࡄࡉࡋࡁࡅࡍࡀ ࡂࡀࡅࡀࡉࡀ ࡖࡎࡀࡁࡀࡓ ࡁࡂࡀࡅࡇ ࡍࡈࡉࡓࡉࡀ ࡅࡀࡓࡁࡉࡍ ࡅࡔࡅࡁࡀ {{ࡎࡀ}} ࡑࡀࡐࡈࡉࡀ ࡐࡕࡀ ࡅࡄࡀࡆࡉࡁࡅࡍ ࡅࡎࡉࡐࡓࡉࡀ ࡄࡀࡃࡕࡉࡀ
030 ࡅࡌࡉࡍࡃࡀࡌ ࡖࡏࡅࡕࡓࡉࡀ ࡔࡀࡉࡉࡋ ࡏࡋࡇ ࡐࡔࡀࡈ ࡈࡅࡐࡎࡉࡀ ࡄࡀࡃࡕࡉࡀ ࡅࡄࡀࡕࡉࡒࡉࡀ ࡅࡓࡀࡆࡀ ࡄࡀࡍࡀࡕࡇ ࡋࡀࡄࡆࡀ ࡅࡄࡀࡉࡆࡀࡊ ࡒࡀࡌ ࡅࡀࡕࡀ ࡋࡅࡀࡕࡀࡉࡅࡍ ࡖࡕࡓࡉࡍ
031 ࡏࡅࡕࡓࡉࡀ ࡅࡀࡌࡀࡓࡋࡅࡍ ࡉࡀ ࡁࡍࡀࡉ ࡅࡔࡉࡕࡋࡀࡉ ࡓࡁࡅࡕࡀ ࡁࡃࡀࡓࡉࡀ ࡋࡀࡕࡉࡍࡉࡎࡁࡅࡍ ࡏࡅࡌࡒࡉࡀ ࡖࡍࡀࡑࡉࡓࡅࡕࡀ ࡍࡀࡐࡔࡀ ࡅࡎࡀࡊࡀ ࡋࡉࡕࡋࡅࡍ ࡊࡅࡋࡌࡀࡍ ࡖࡓࡁࡅࡕࡀ
032 ࡁࡍࡀࡑࡉࡓࡅࡕࡀ ࡍࡀࡎࡉࡁ ࡌࡍࡀࡕࡀ ࡋࡍࡄࡅࡓࡀ ࡁࡂࡀࡅࡇ ࡋࡉࡕࡋࡇ ࡅࡄࡀࡉࡆࡀࡊ ࡀࡎࡂࡉࡀ ࡉࡀࡅࡀࡓ {{ࡆࡅࡈࡀ}} ࡆࡉࡅࡀ ࡅࡋࡂࡀࡈ ࡁࡏࡅࡑࡈࡋࡉࡀ ࡖࡉࡀࡅࡀࡓ ࡓࡁࡀ ࡅࡄࡉࡁࡉࡋ ࡆࡉࡅࡀ
033 ࡔࡀࡉࡉࡋ ࡏࡋࡇ ࡅࡀࡌࡀࡓࡋࡇ ࡄࡀࡐࡀࡎ ࡌࡀࡄࡅ ࡍࡉࡁࡀࡃ ࡏࡅࡕࡓࡉࡀ ࡖࡀࡋࡌࡉࡀ ࡋࡀࡌࡀࡄࡐࡉࡀ ࡏࡋࡀࡍ ࡉࡀࡃࡉࡀ ࡖࡀࡕࡀࡉࡍࡉࡀ ࡋࡅࡀࡕࡀࡉࡊࡅࡍ ࡅࡔࡀࡉࡀࡋࡉࡀ ࡔࡀࡋࡍࡉࡍ ࡀࡉࡀࡊ
034 ࡓࡁࡀ ࡅࡀࡔࡅࡀࡋࡀࡍࡉࡀ ࡌࡀࡄࡅ ࡐࡀࡓࡔࡉࡂࡍࡀ ࡍࡉࡄࡅࡉࡀ ࡋࡅࡀࡕࡀࡉࡊࡅࡍ {{ࡖࡀࡉࡍ}} ࡖࡀࡉࡍࡀࡍ ࡌࡍ ࡏࡅࡕࡓࡉࡀ ࡋࡀࡎࡀࡉࡐࡉࡍ ࡔࡂࡀࡍࡃࡉࡀ ࡀࡍࡉࡍ ࡌࡀࡎࡂࡅࡉࡉࡀ ࡁࡀࡉࡉࡍࡉࡍ ࡏࡅࡄࡓࡀࡍ
035 ࡂࡋࡉࡋࡀࡊ ࡌࡀࡄࡅ ࡃࡀࡌࡉࡀ ࡅࡄࡀࡉࡆࡀࡊ ࡌࡀࡋࡉࡋ ࡅࡀࡌࡀࡓࡋࡅࡍ ࡋࡏࡅࡕࡓࡉࡀ ࡖࡀࡍࡀ ࡏࡉࡀࡐࡓࡉࡔࡉࡍࡊࡅࡍ ࡏࡅ ࡀࡍࡉࡍ ࡓࡀࡆࡀ ࡍࡉࡕࡉࡋࡊࡅࡍ ࡏࡆࡉࡋ ࡋࡅࡀࡕ ࡔࡀࡄࡓࡀࡕ
036 ࡀࡍࡀࡍࡀ ࡏࡌࡇ ࡖࡍࡄࡅࡓࡀ ࡒࡀࡃࡌࡀࡉࡕࡀ ࡖࡄࡏ ࡆࡀࡅࡀ ࡖࡌࡀࡓࡀ ࡖࡓࡀࡁࡅࡕࡀ ࡌࡉࡕࡒࡉࡓࡉࡀ ࡏࡆࡉࡋ ࡋࡅࡀࡕࡀ ࡁࡎࡉࡂࡅࡃࡕࡀ ࡅࡃࡍࡅࡕࡀ ࡄࡀࡆࡉࡍ ࡓࡀࡆࡀ ࡊࡀࡎࡉࡀ
037 ࡀࡌࡀࡓࡅࡋࡇ ࡖࡌࡍ ࡋࡅࡀࡕ ࡀࡃࡉࡍࡒࡉࡀ [] ࡅࡂࡀࡅࡀࡉࡀ ࡋࡌࡉࡄࡃࡉࡓࡉࡕࡅࡍ ࡅࡄࡀࡆࡀࡊ ࡍࡐࡀࡒ ࡏࡅࡕࡓࡉࡀ ࡌࡍ ࡒࡅࡃࡀࡌࡇ ࡖࡌࡀࡋࡊࡀ ࡗ ࡀࡁࡃࡀ ࡅࡌࡀࡓࡇ
038 ࡒࡅࡓࡒࡋࡇ ࡃࡀࡌࡉࡍ ࡋࡂࡀࡁࡓࡀ ࡒࡓࡉࡁࡀࡉࡀ ࡖࡏࡕࡁࡇ ࡖࡌࡍ ࡀࡕࡅࡕࡉࡀ ࡄࡀࡁࡓࡇ ࡅࡆࡀࡉࡍࡇ ࡌࡉࡍࡇ ࡔࡉࡒࡋࡇ ࡅࡀࡕࡅࡍ ࡅࡌࡈࡅࡍ ࡀࡋࡌࡀ ࡖࡔࡀࡄࡓࡀࡕ ࡀࡍࡀࡍࡀ
039 ࡍࡀࡈࡓࡉࡀ ࡅࡔࡋࡉࡄࡉࡀ ࡀࡋࡀࡍࡐࡀࡉࡄࡅࡍ ࡍࡐࡀࡒ ࡅࡋࡂࡀࡈࡅࡍࡅࡍ ࡁࡉࡀࡌࡉࡍࡅࡍ ࡅࡆࡉࡅࡉࡀ ࡅࡍࡄࡅࡓࡇ ࡋࡕࡓࡉࡍ ࡃࡓࡀࡉࡉࡀ ࡃ{ࡒ}<ࡓ>ࡅࡍ ࡅࡄࡀࡉࡆࡀࡊ ࡀࡉࡋࡉࡍࡅࡍ ࡋࡒࡅࡃࡀࡌࡇ ࡖࡄࡀࡍࡀࡕࡇ
040 ࡀࡍࡀࡍࡀ ࡗ ࡄࡆࡅࡍ ࡄࡀࡍࡀࡕࡇ ࡆࡉࡅࡀ ࡋࡀࡔࡀࡓ ࡋࡉࡂࡓࡀࡉࡄࡅࡍ ࡋࡌࡉࡒࡀࡌ ࡎࡕࡅࡀࡓࡅࡍ ࡍࡀࡒࡔࡉࡀ ࡋࡄࡀࡍࡃࡀࡌࡅࡍ ࡅࡋࡀࡊࡀࡉࡍࡉࡀ ࡍࡐࡀࡋ ࡏࡅࡕࡓࡉࡀ ࡏࡋ ࡀࡍࡐࡀࡉࡄࡅࡍ
041 ࡅࡄࡀࡉࡆࡀࡊ ࡀࡌࡓࡀࡁࡅࡍ ࡅࡀࡌࡓࡉࡀ ࡈࡀࡁࡉࡀ ࡅࡏࡃࡀ ࡀࡎࡉࡌࡀࡕ ࡏࡋࡀࡅࡀࡉࡄࡅࡍ ࡅࡓࡕࡉࡕࡉࡀ ࡅࡍࡒࡉࡔࡉࡀ ࡌࡉࡍࡀࡉࡄࡅࡍ ࡆࡄࡅࡍ ࡅࡒࡀࡌ ࡋࡋࡉࡂࡓࡀࡉࡄࡅࡍ ࡅࡎࡀࡂࡃࡉࡀ
042 ࡅࡌࡉࡔࡕࡀࡈࡉࡀ ࡗ ࡀࡁࡃࡀ ࡋࡌࡀࡓࡇ ࡅࡗ ࡔࡅࡀࡋࡉࡀ ࡈࡀࡁࡀ ࡋࡓࡁࡇ ࡅࡀࡌࡀࡓࡋࡅࡍ ࡋࡀࡅ ࡁࡍࡉࡀ ࡁࡍࡀࡉࡀࡍ ࡊࡀࡔ{ࡅ}<ࡉ>ࡓࡉࡀ ࡁࡍࡀࡕࡀ ࡖࡍࡉࡈࡅࡐࡕࡀ ࡖࡀࡍࡀࡍࡉࡀ ࡄࡆࡉࡅࡉࡀ
043 ࡁࡀࡋࡌࡉࡀ ࡄࡀࡍࡉࡊ ࡖࡐࡀࡋࡅࡂࡍࡉࡍ ࡅࡄࡀࡉࡆࡀࡊ ࡌࡀࡋࡉࡋ ࡄࡉࡁࡉࡋ ࡆࡉࡅࡀ ࡅࡀࡌࡀࡓࡋࡇ ࡏࡉࡍ ࡀࡍࡉࡍ ࡖࡄࡀࡋࡉࡍ ࡖࡀࡍࡀࡕ ࡔࡅࡌࡀࡉࡉࡍ ࡃࡊࡀࡓࡕ ࡅࡀࡌࡀࡓࡋࡅࡍ ࡋࡌࡀࡄࡅ
044 ࡃࡀࡌࡉࡀ ࡌࡀࡍࡃࡀ ࡖࡄࡉࡉࡀ ࡅࡄࡀࡉࡆࡀࡊ ࡋࡆࡉࡅࡀ ࡖࡏࡋࡇ ࡔࡓࡉࡀ ࡄࡀࡆࡉࡍ ࡂࡀࡁࡓࡀ ࡖࡔࡅࡌࡇ ࡋࡅࡀࡕࡀࡍ ࡕࡓࡉࡑ ࡅࡄࡀࡍࡀࡕࡇ ࡀࡍࡀࡍࡉࡀ ࡃࡀࡌࡉࡀࡍ ࡖࡉࡅࡔࡀࡌࡉࡍ
045 ࡔࡀࡓࡉࡀ ࡄࡀࡆࡉࡍ ࡃࡀࡌࡉࡀࡍ ࡍࡁࡀࡈ ࡆࡉࡅࡀ ࡏࡋࡀࡉ ࡄࡅ ࡖࡄࡀࡅࡉࡀ ࡃࡀࡅࡓࡀࡉࡀࡍ ࡅࡄࡀࡉࡆࡀࡊ ࡌࡀࡋࡉࡋ ࡉࡀࡅࡀࡓ ࡆࡉࡅࡀ ࡅࡍࡁࡀࡈ ࡆࡉࡅࡀ ࡂࡀࡁࡓࡀ ࡖࡔࡀࡉࡉࡋ ࡄࡀࡆࡉࡍ
046 {{ࡔࡅࡉࡀࡋࡀ}} ࡏࡅࡕࡓࡀ ࡖࡋࡉࡀࡌࡉࡍࡀࡉ ࡔࡉࡕࡋࡇ ࡖࡌࡀࡍࡃࡀ ࡖࡄࡉࡉࡀ ࡄࡅ ࡀࡍࡀ ࡄࡅ ^ࡖ^ ࡉࡀࡅࡀࡓ ࡅࡄࡀࡉࡆࡀࡊ ࡁࡓࡇ ࡖࡌࡀࡍࡃࡀ ࡖࡄࡉࡉࡀ ࡄࡅ ࡄࡉࡁࡉࡋ ࡆࡉࡅࡀ ࡍࡁࡀࡈ ࡆࡉࡅࡀ
047 ࡔࡅࡌࡇ ࡅࡄࡀࡉࡆࡀࡊ ࡒࡀࡌࡀࡕ ࡋࡋࡉࡂࡓࡀ ࡅࡄࡁࡀࡒࡕࡉࡍࡅࡍ ࡁࡄࡁࡀࡒࡀ ࡋࡏࡅࡕࡓࡉࡀ ࡅࡀࡍࡄࡉࡕࡉࡍࡅࡍ ࡁࡊࡀࡍࡐࡀ ࡅࡌࡍࡀࡔࡒࡀࡋࡅࡍ ࡅࡃࡉࡌࡀ ࡁࡏࡅࡌࡁࡀ {{ࡍࡀࡕࡓࡀࡍ}} ࡀࡔࡃࡀࡍ
048 ࡅࡀࡌࡓࡀࡋࡅࡍ ࡀࡍࡀࡕࡅࡍ ࡔࡉࡕࡋࡀࡉ ࡅࡁࡍࡀࡉ ࡁࡅࡊࡓࡀࡉ ࡃࡉࡋࡉࡀ ࡖࡔࡅࡌࡀࡉࡊࡅࡍ ࡁࡊࡅࡋࡄࡅࡍ ࡀࡋࡌࡉࡀ ࡆࡓࡉࡀ ࡊࡅࡋࡌࡀࡍ ࡖࡌࡍ ࡔࡅࡌࡀࡉࡊࡅࡍ ࡋࡀࡃࡀࡊࡀࡓ ࡁࡅࡕࡇ ࡅࡕࡅࡔࡁࡉࡄࡕࡇ
049 ࡋࡀࡕࡉࡕࡒࡀࡁࡀࡋ ࡅࡄࡀࡉࡆࡀࡊ {{ࡒࡀࡌ}} ࡀࡕࡅࡍ ࡐࡀࡕࡅࡓࡀ ࡅࡋࡀࡄࡅࡀ ࡑࡀࡉࡈࡀ ࡅࡀࡊࡀࡋ ࡌࡍ ࡁࡉࡓࡊࡕࡀ ࡖࡉࡀࡓࡃࡍࡀ ࡄࡉࡍࡅࡍ ࡅࡔࡕࡅࡍ ࡄࡀࡌࡓࡀ ࡈࡀࡁࡀ ࡖࡋࡀࡄࡅࡀ
050 ࡌࡍ ࡓࡉࡅࡕࡀ ࡏࡕࡉࡒࡓࡉࡀ ࡖࡄࡏ ࡓࡅࡄࡀ ࡁࡉࡔࡕࡀ ࡁࡂࡀࡅࡇ ࡏࡕࡊࡀࡁࡔࡀࡕ ࡋࡕࡋࡀࡕࡀ ࡌࡀࡋࡉࡋ ࡏࡅࡕࡓࡉࡀ ࡅࡀࡌࡓࡉࡋࡇ ࡁࡀࡉࡉࡍࡉࡍ ࡋࡌࡉࡆࡀࡋ ࡋࡀࡋࡌࡀࡍ
051 ࡄࡉࡍࡉࡋࡀ ࡔࡅࡋࡕࡀ ࡌࡉࡍࡉࡊ ࡍࡉࡔࡀࡉࡉࡋ ࡁࡀࡉࡉࡍࡉࡍ ࡓࡀࡆࡀ ࡖࡈࡀࡁࡀࡄࡀࡕࡀ ࡅࡃࡅࡊࡓࡀࡍࡉࡀ ࡖࡄࡉࡉࡀ ࡔࡀࡅࡅࡍ ࡅࡆࡅࡄࡀࡓࡉࡀ ࡔࡀࡅࡅࡍ ࡌࡀࡎࡒࡀࡕࡀ ࡅࡃࡅࡊࡓࡀࡍࡉࡀ
052 ࡄࡀࡋࡉࡍ ࡔࡅࡁࡀ ࡒࡉࡍࡉࡀ ࡖࡓࡀࡁࡀࡕࡀ ࡗ ࡊࡋࡉࡋࡀ ࡋࡌࡀࡎࡉࡒࡕࡀ ࡕࡀࡓࡑࡉࡕ ࡁࡀࡉࡉࡍࡉࡍ ࡖࡍࡉࡁࡀࡔࡒࡀࡓ ࡄࡀࡆࡉࡍ ࡓࡀࡆࡀ ࡅࡀࡍࡀࡕ ࡌࡉࡍࡇ ࡋࡀࡕࡀࡂࡆࡀࡓ ࡏࡋࡀࡍ
053 ⊚ ࡅࡄࡀࡉࡆࡀࡊ ࡌࡀࡋࡀࡋࡀࡕ ࡔࡀࡄࡓࡀࡕ ࡀࡍࡀࡍࡀ ࡋࡏࡅࡕࡓࡉࡀ ࡖࡕࡉࡌࡀࡓࡋࡅࡍ ࡁࡄࡀࡉࡀࡉࡊࡅࡍ ࡌࡀࡋࡊࡉࡀ ࡖࡀࡋࡌࡉࡀ ࡈࡀࡁࡉࡀ ࡖࡄࡀࡆࡉࡍ ࡓࡀࡆࡀ ࡖࡔࡀࡉࡉࡋࡕࡅࡍ ࡏࡋࡇ ࡀࡍࡀ
054 ࡋࡀࡉࡀࡃࡀࡍࡀ ࡄࡉࡍࡉࡋࡀ {{ࡁࡏࡅࡑࡓࡀࡉ}} ࡍࡐࡉࡋࡉࡀ ࡁࡏࡅࡑࡓࡀࡉ ࡖࡍࡉࡔࡀࡉࡋࡇ ࡋࡏࡌࡀࡉࡀࡍ ࡊࡀࡍࡀࡕ ࡓࡀࡁࡕࡉࡀ ࡖࡊࡅࡋࡄࡅࡍ ࡁࡆࡉࡅࡀ ࡖࡋࡁࡅࡔࡀ ࡋࡀࡌࡀࡔࡓࡉࡀ ࡄࡀࡔࡕࡀ ࡖࡀࡍࡀࡕࡅࡍ
055 ࡁࡉࡕࡅࡋࡇ ࡋࡄࡀࡆࡉࡍ ࡔࡅࡋࡕࡀ ࡏࡆࡉࡋ ࡋࡅࡀࡕࡀ ࡖࡃࡌࡅࡕࡀ ࡆࡂࡉࡂࡕࡀ ࡖࡊࡅࡋ ࡌࡀࡄࡅ ࡖࡔࡀࡉࡋࡉࡕࡅࡍ ࡌࡉࡍࡇ ࡋࡀࡌࡀࡂࡆࡓࡇ ࡏࡋࡀࡅࡀࡉࡊࡅࡍ ࡅࡋࡉࡁࡀࡉࡊࡅࡍ ࡄࡀࡃࡉࡋࡊࡅࡍ
056 ࡁࡂࡉࡅࡀࡕ ࡀࡌࡉࡍࡈࡅࡋ ࡖࡁࡏࡅࡌࡒࡀ ࡖࡍࡀࡑࡉࡓࡅࡕࡀ ࡊࡅࡋࡇ ࡀࡕࡅࡕࡉࡀ ࡄࡉࡑࡓࡀ ࡖࡉࡀࡌࡉࡍࡇ ࡍࡈࡉࡓ ࡅࡄࡀࡉࡆࡀࡊ ࡒࡀࡌ ࡏࡅࡕࡓࡉࡀ ࡅࡌࡀࡎࡂࡉࡍ ࡋࡅࡀࡕ ࡊࡀࡍࡀࡕ ࡓࡀࡁࡕࡉࡀ
057 ࡖࡊࡅࡋࡄࡅࡍ ࡀࡋࡌࡉࡀ ࡖࡍࡄࡅࡓࡀ ࡅࡄࡔࡅࡊࡀ ࡌࡉࡍࡇ ࡐࡓࡀࡔ ࡅࡀࡋ ࡅࡀࡆࡀࡋ ࡋࡅࡀࡕࡇ ࡊࡁࡀࡓ ࡆࡉࡅࡀ ࡖࡄࡀࡍࡀࡕࡀ ࡃࡌࡅࡕࡀ ࡏࡋࡀࡅࡀࡉࡄࡅࡍ ࡀࡋࡌࡀ ࡖࡋࡀࡍࡉࡃࡀ ࡖࡍࡉࡌࡀࡋࡀࡋࡅࡍ
058 ࡋࡅࡀࡕࡇ ࡅࡔࡋࡀࡌࡀ ࡅࡈࡀࡁࡅࡕࡀ ࡋࡀࡉࡀࡄࡁࡉࡀ ࡅࡍࡈࡀࡓ ࡅࡍࡐࡀࡋ ࡒࡅࡃࡀࡌࡇ ࡀࡋࡌࡀ ࡖࡌࡉࡀ ࡖࡉࡀࡓࡃࡍࡉࡀ ࡄࡉࡅࡀࡓࡉࡀ ࡓࡌࡅࡍ ࡏࡋࡀࡅࡀࡉࡄࡅࡍ ࡅࡀࡒࡌࡅࡍࡅࡍ ࡋࡋࡉࡂࡓࡀࡉࡄࡅࡍ
059 ࡅࡄࡀࡉࡆࡀࡊ ࡃࡌࡅࡍ ࡋࡒࡀࡉࡍࡀ ࡓࡎࡉࡎࡀ ࡀࡋࡌࡀ ࡋࡑࡈࡉࡐࡓࡀ ࡅࡄࡀࡉࡆࡀࡊ ࡀࡕࡅࡍ ࡋࡅࡀࡕࡇ ࡖࡃࡌࡅࡕࡀ ࡅࡉࡀࡄࡁࡅࡋࡇ ࡎࡉࡂࡅࡃࡕࡀ ࡅࡔࡀࡁࡀࡕࡀ ࡅࡀࡌࡓࡉࡋࡇ ࡀࡕࡉࡍࡉࡍ ࡖࡍࡉࡄࡅࡉࡇ
060 {{ࡀࡓࡒࡀ}} ^ࡓࡀ^ࡁࡉࡂࡀࡓ ࡖࡌࡀࡋࡊࡉࡀ ࡅࡀࡁࡅ ࡖࡀࡍࡀࡍࡉࡀ ࡅࡊࡅࡔࡈࡀ ࡀࡕࡉࡍ ࡋࡄࡀࡆࡉࡍ ࡃࡌࡅࡕࡀ ࡖࡌࡉࡔࡀࡋ ࡌࡉࡍࡀࡉࡊࡅࡍ ࡔࡅࡋࡕࡀ ࡋࡉࡊࡀ ࡖࡉࡀࡄࡁࡉࡋࡅࡍ ࡖࡋࡉࡁࡅࡍ ࡁࡈࡀࡐࡉࡀ ࡓࡌࡉࡀ
061 ࡖࡋࡀࡉࡀࡃࡉࡍࡉࡍ ࡏࡋࡉࡀ ࡀࡆࡋࡉࡍࡉࡍ ࡅࡏࡋࡉࡀ ࡄࡅ ࡄࡀࡅࡉࡀ ࡌࡉࡆࡋࡀࡍ ࡄࡉࡍࡉࡋࡀ ࡄࡅࡉࡍ ࡋࡅࡀࡕ ࡔࡀࡄࡓࡀࡕ ࡀࡍࡀࡍࡀ ࡅࡀࡍࡀࡕ ࡄࡏ ࡋࡅࡀࡕࡉࡊ ࡔࡀࡃࡉࡓࡕࡉࡍࡀࡍ ࡖࡍࡉࡕࡓࡀࡐࡓࡀࡔ ࡌࡍ
062 ࡋࡅࡀࡕࡉࡊ ࡅࡋࡉࡁࡀࡉࡀࡍ ࡍࡉࡕࡀࡁ ࡋࡎࡀࡌࡊࡉࡀ ࡌࡀࡄࡅ ࡐࡀࡓࡔࡉࡂࡍࡀ ࡉࡀࡄࡁࡀࡕࡋࡀࡍ ࡈࡅࡁࡇ ࡋࡌࡀࡍ ࡖࡋࡉࡁࡇ ࡂࡀࡋࡉࡋࡇ ࡖࡌࡀࡄࡅ ࡖࡌࡍ ࡑࡈࡉࡐࡓࡀ ࡑࡈࡀࡓࡀࡓ ࡅࡌࡀࡄࡅ
063 ࡖࡄࡉࡉࡀ ࡉࡀࡄࡁࡉࡋࡇ ࡅࡌࡀࡄࡅ ࡖࡋࡉࡁࡇ ࡎࡀࡌࡉࡊ ࡏࡋࡇ⊚ ࡗ ࡄࡀࡆࡀ ࡔࡉࡌࡀࡕ ࡏࡌࡀࡉࡄࡅࡍ ࡖࡏࡅࡕࡓࡉࡀ ࡏࡕࡁࡀࡎࡌࡀࡕ ࡅࡄࡃࡀࡕ ࡅࡏࡕࡂࡀࡉࡀࡕ ࡅࡀࡌࡓࡀ ࡋࡉࡊࡀ
064 ࡈࡅࡓࡀ ࡂࡆࡉࡓࡀ ࡅࡋࡉࡊࡀ ࡖࡌࡀࡓࡇ ࡀࡂࡆࡀࡓ ࡏࡋࡇ ࡅࡋࡉࡊࡀ ࡀࡁࡃࡀ ࡊࡔࡉࡓࡀ ࡖࡌࡀࡓࡇ ࡁࡆࡉࡃࡀ ࡓࡀࡂࡉࡆ ࡏࡋࡇ ࡅࡋࡉࡊࡀ ࡖࡁࡀࡉࡉࡀ ࡃࡀࡄࡁࡀ ࡅࡄࡀࡃࡀࡓ ࡅࡊࡀࡎࡐࡀ ࡌࡀࡔࡊࡀ
065 ࡉࡀ ࡁࡍࡀࡉ ࡋࡁࡅࡔࡀࡉࡊࡅࡍ ࡃࡓࡀ ࡈࡅࡍࡀ ࡖࡊࡀࡁࡉࡓ ࡄࡀࡔࡕࡀ ࡎࡅࡌࡊࡉࡀ ࡀࡍࡀࡕࡅࡍ ࡄࡀࡎࡋࡇ ࡖࡍࡉࡒࡅࡌ ࡁࡐࡋࡅࡂࡕࡀ ࡄࡀࡎࡋࡉࡍࡀࡍ ࡋࡃࡉࡋࡀࡍ ࡅࡋࡀࡕࡉࡄࡀࡎࡓࡉࡍࡀࡍ ࡔࡅࡋࡕࡀࡉࡊࡅࡍ
066 ࡄࡉࡍࡉࡋࡀ ࡊࡅࡋࡌࡀࡄࡅ ࡖࡁࡀࡉࡉࡕࡅࡍ ࡋࡅࡀࡕࡀࡍ ࡕࡓࡉࡑ ࡅࡒࡀࡉࡉࡌ ࡅࡍࡀࡈࡀࡓࡋࡊࡅࡍ ࡌࡍ ࡒࡅࡃࡀࡌ ࡖࡀࡁࡀࡄࡀࡕࡊࡅࡍ ࡍࡉࡄࡅࡉࡋࡊࡅࡍ ࡅࡄࡀࡉࡆࡀࡊ ࡒࡀࡓࡉࡀࡋࡇ ࡋࡔࡀࡄࡀࡓࡉࡀࡋࡀ ࡆࡅࡈࡀ
067 ࡖࡒࡀࡉࡉࡌ ࡋࡒࡅࡃࡀࡌࡇ ࡖࡉࡅࡎࡌࡉࡓ ࡏࡅࡕࡓࡀ ࡅࡋࡔࡉࡋࡌࡀࡉ ࡈࡀࡁࡀ ࡅࡋࡁࡄࡀࡒ ࡅࡄࡀࡍࡀࡉࡉࡋ ࡅࡎࡀࡌࡀࡍࡃࡀࡓࡏࡉࡋ ࡎࡃࡉࡓࡀ ࡅࡓࡁࡇ ࡔࡉࡍࡂࡋࡀࡍ ࡏࡅࡕࡓࡀ ࡀࡄࡅࡉࡀ ࡖ
068 ࡔࡉࡍࡂࡋࡀࡍ ࡅࡋࡄࡀࡉࡀࡔࡅࡌ ࡒࡀࡔࡉࡔࡀ ࡅࡋࡆࡉࡄࡓࡅࡍ ࡂࡉࡍࡆࡀࡉࡀ ࡅࡋࡂࡅࡄࡓࡀࡍ ࡌࡀࡃࡓࡀࡍࡀ ࡅࡀࡌࡓࡀࡋࡅࡍ ࡍࡎࡉࡁࡅࡍࡅࡍ ࡋࡄࡀࡋࡉࡍ ࡏࡅࡕࡓࡉࡀ ࡁࡍࡉࡄࡅࡕࡀ ࡅࡁࡏࡒࡀࡓࡀ ࡅࡀࡒࡌࡅࡍࡅࡍ
069 ࡒࡅࡃࡀࡌ ࡀࡁࡀࡄࡀࡕࡀࡍ ࡅࡌࡀࡋࡊࡀࡉࡀࡍ ࡅࡌࡀࡓࡀࡍ ࡅࡌࡒࡀࡁࡋࡀࡍࡀ ࡖࡁࡅࡕࡀࡍ ࡅࡕࡅࡔࡁࡉࡄࡕࡀࡍ ࡖࡊࡅࡋࡉࡅࡌ ࡀࡍࡉࡍ ࡌࡉࡃࡍࡉࡍࡀࡋࡇ ࡖࡄࡅ ࡌࡀࡓࡀ ࡖࡓࡀࡁࡅࡕࡀ ࡔࡅࡌࡇ ࡖࡆࡉࡅࡇ
070 ࡃࡉࡋࡇ ࡌࡓࡀࡁࡉࡋࡀࡍ ࡀࡉࡀࡊ ࡐࡉࡓࡀ ࡖࡁࡔࡀࡌࡔࡀ ࡖࡔࡅࡋࡕࡀ ࡋࡄࡀࡋࡉࡍ ࡏࡅࡕࡓࡉࡀ ࡍࡉࡕࡉࡋࡅࡍ ࡖࡋࡉࡁࡀࡉࡅࡍ ࡋࡏࡕࡉࡁ ࡅࡋࡀࡄࡀࡃࡀࡓ ࡀࡌࡉࡍࡈࡅࡋ ࡖࡁࡍࡀࡉࡀࡍ ࡉࡀࡒࡉࡓࡉࡀ
071 ࡄࡉࡍࡅࡍ ⊚ ࡅࡄࡀࡉࡆࡀࡊ ࡍࡎࡀࡁࡅࡍࡅࡍ ࡅࡀࡆࡀࡋ ࡋࡒࡅࡃࡀࡌࡇ ࡖࡌࡀࡋࡊࡀ ࡓࡀࡌࡀ ࡖࡍࡄࡅࡓࡀ ࡁࡊࡅࡋࡄࡉࡍ ࡁࡀࡓ^ࡀ^ࡊࡀࡕࡀ ࡖࡍࡀࡐࡔࡀ ࡅࡎࡀࡊࡀ ࡋࡉࡕࡋࡀࡉࡉࡍ ⊚ ࡅࡊࡅࡋࡄࡅࡍ ࡍࡀࡈࡓࡉࡀ ࡏࡅࡕࡓࡉࡀ
072 ࡎࡂࡉࡃ ࡅࡔࡀࡁࡀ ࡅࡏࡔࡕࡀࡈࡉࡀ ࡋࡌࡀࡓࡀࡉࡄࡅࡍ ࡅࡗ ࡎࡀ^ࡉࡉ^ࡊࡉࡅࡍ ࡓࡀࡄࡌࡀࡉࡅࡍ ࡌࡀࡋࡉࡋ ࡌࡀࡋࡊࡀ ࡖࡍࡄࡅࡓࡀ ࡖࡍࡉࡌࡀࡓࡋࡅࡍ ࡋࡕࡓࡉࡍ ࡏࡅࡕࡓࡉࡀ ࡀࡍࡀࡕ ࡄࡅ ࡄࡉࡁࡉࡋ ࡆࡉࡅࡀ
073 ࡌࡎࡀࡃࡓࡀࡍࡀ ࡁࡓࡇ ࡖࡌࡀࡍࡃࡀ ࡖࡄࡉࡉࡀ ࡅࡄࡀࡉࡆࡀࡊ ࡄࡅ ࡉࡀࡅࡀࡓ ࡆࡉࡅࡀ ࡁࡓ ࡍࡁࡀࡈ ࡆࡉࡅࡀ ࡂࡀࡁࡓࡀ ࡖࡑࡀࡅࡕࡇ ࡔࡓࡏࡉࡀ ࡏࡋࡀࡍ ࡀࡍࡀࡕࡅࡍ ࡕࡓࡉࡍ ࡌࡎࡀࡃࡓࡀࡍࡉࡀ
074 ⊚ ࡁࡀࡉࡉࡕࡅࡍ ࡖࡕࡉࡎࡀࡃࡓࡅࡍ ࡊࡅࡋࡄࡅࡍ ࡀࡋࡌࡉࡀ ࡖࡄࡔࡅࡊࡀ ࡅࡍࡄࡅࡓࡀ ࡋࡏࡃࡀࡉࡊࡅࡍ ࡃࡉࡋࡊࡅࡍ ࡍࡉࡎࡕࡀࡃࡀࡓ ࡄࡀࡆࡉࡍ ࡔࡅࡋࡕࡀ ࡖࡁࡀࡉࡉࡕࡅࡍ ࡌࡉࡍࡀࡉࡀࡍ ࡉࡀࡌࡉࡕࡅࡍ ࡖࡊࡀࡎࡉࡕࡅࡍ ࡓࡀࡆࡀࡉࡀࡍ
075 ࡋࡀࡉࡀࡄࡁࡉࡕࡅࡍ ࡋࡏࡅࡕࡓࡉࡀ ࡁࡋࡉࡋࡉࡀ ࡖࡓࡁࡅࡕࡀ ࡎࡓࡉࡒࡕࡀ ࡍࡀࡎࡁࡉࡍ ࡅࡌࡀࡐࡓࡉࡔࡍࡀࡋࡊࡅࡍ ࡖࡄࡀࡅࡉࡀ ࡏࡅࡑࡓࡀࡉࡊࡅࡍ ࡖࡋࡄࡀࡃ ࡌࡍ ࡀࡋࡐࡀ ࡉࡀࡄࡁࡉࡕࡅࡋࡇ ࡅࡄࡀࡉࡆࡀࡊ ࡉࡀࡌࡅࡍ ࡏࡅࡕࡓࡉࡀ
076 ࡌࡅࡌࡀࡕࡀ ࡖࡊࡀࡄࡅࡀ ࡅࡊࡀࡃࡓࡀ ࡅࡏࡒࡀࡓࡀ ࡋࡀࡌࡂࡀࡋࡀࡋࡉࡍࡉࡍ ࡏࡋࡇ ࡋࡄࡀࡃ ࡌࡍ ࡀࡋࡐࡀ ࡉࡀࡄࡁࡉࡍࡀࡋࡇ ࡅࡋࡕࡓࡉࡍ ࡌࡍ ࡓࡅࡁࡀࡍ ࡂࡅࡁࡓࡉࡀ ࡊࡔࡉࡈࡉࡀ ࡅࡌࡄࡀࡉࡌࡍࡉࡀ ࡖࡎࡉࡍࡀ ࡒࡉࡍࡀ
077 ࡅࡐࡋࡅࡂࡉࡀ ࡁࡉࡍࡀࡕࡀࡉࡄࡅࡍ ࡋࡀࡄࡀࡅࡉࡀ⊚ ࡅࡄࡀࡉࡆࡀࡊ ࡌࡀࡋࡉࡋ ࡌࡀࡓࡀ ࡖࡓࡀࡁࡅࡕࡀ ࡋࡏࡅࡕࡓࡉࡀ ࡍࡉࡄࡉࡀ ࡖࡍࡉࡌࡀࡓࡋࡅࡍ ࡁࡀࡉࡉࡕࡅࡍ ࡖࡕࡉࡃࡅࡍ ࡄࡀࡆࡉࡍ ࡓࡀࡆࡀ ࡋࡏࡅࡕࡓࡉࡀ ࡖࡓࡉࡔࡀ
078 ࡌࡀࡋࡀࡋࡀ ࡁࡀࡓࡀࡉࡉࡀ ࡂࡀࡋࡉࡋ ࡋࡎࡓࡉࡍ ࡅࡀࡓࡁࡀ ࡉࡀࡄࡓࡉࡀ ࡀࡓࡄࡅࡍࡅࡍ ࡅࡀࡒࡌࡅࡍࡅࡍ ࡌࡍ ࡋࡉࡁࡀࡉࡊࡅࡍ ࡋࡓࡀࡆࡀ ࡃࡉࡋࡊࡅࡍ ࡊࡀࡎࡉࡀ ࡅࡈࡀࡁࡅࡕࡀ ࡃࡉࡋࡊࡅࡍ ࡌࡒࡀࡁࡋࡉࡍ ࡅࡌࡉࡍࡉࡋࡊࡅࡍ ࡗ
079 ࡀࡁࡃࡀ ࡋࡌࡀࡓࡇ ࡅࡗ ࡓࡀࡁࡉࡂࡀࡓ ࡍࡉࡄࡀ ࡋࡌࡀࡓࡕࡇ ࡍࡀࡕࡍࡅࡍ ࡖࡓࡀࡆࡀࡉࡊࡅࡍ ࡁࡋࡉࡁࡀࡉࡊࡅࡍ ࡀࡌࡉࡍࡈࡅࡋ ࡖࡋࡁࡅࡔࡀࡉࡊࡅࡍ ࡀࡉࡀࡊ ࡌࡉࡀ ࡁࡄࡀࡌࡓࡀ ࡏࡕࡀࡓࡀࡁ ࡏࡅ ࡓࡀࡆࡀࡉࡊࡅࡍ
080 ࡁࡀࡓࡀࡉࡉࡀ ࡋࡀࡊࡀࡎࡉࡍ ࡂࡀࡅࡀࡉࡉࡀ ࡃࡉࡋࡊࡅࡍ ࡋࡂࡅࡈ ࡋࡀࡕࡀࡕࡍࡅࡍ ࡏࡃࡅࡋࡅࡍ ࡀࡌࡉࡍࡈࡅࡋ ࡖࡓࡀࡁࡅࡕࡀ ࡍࡀࡎࡉࡁ ࡁࡀࡉࡉࡍ ࡖ^ࡋࡀ^ࡏࡃࡉࡍࡅࡍ ࡋࡏࡅࡕࡓࡉࡀ ࡖࡂࡉࡍࡆࡀࡉࡀ ࡖࡌࡀࡋࡊࡀ ࡀࡍࡉࡍ ࡔࡅࡄࡁࡀ
081 ࡀࡁࡃࡉࡀ ࡏࡋ ࡀࡍࡐࡀࡉࡄࡅࡍ ࡋࡄࡀࡍࡀࡕࡅࡍ ࡋࡍࡄࡅࡓࡀ ࡋࡀࡎࡀࡋࡒࡉࡀ ⊚ ࡅࡄࡀࡉࡌࡀࡍ ࡏࡅࡕࡓࡉࡀ ࡌࡉࡌࡓࡇ ࡖࡌࡀࡋࡊࡀ ࡁࡊࡅࡋ ࡌࡉࡍࡃࡀࡌ ࡖࡔࡌࡉࡍࡅࡍ ࡄࡆࡅࡍ ࡗ ࡄࡀࡉࡆࡉࡍ ࡄࡅࡀ ࡌࡀࡋࡉࡋ
082 ࡌࡀࡓࡀ ࡖࡓࡀࡁࡅࡕࡀ ࡖࡍࡉࡌࡀࡓࡋࡅࡍ ࡅࡏࡍࡉࡀࡍࡀ ࡓࡌࡀࡋࡅࡍ ࡅࡀࡌࡀࡓࡋࡅࡍ ⊚ ࡊࡌࡀ ࡔࡀࡍࡀࡉ ࡆࡉࡅࡀࡉࡊࡅࡍ ࡌࡀࡋࡊࡉࡀ ࡅࡊࡌࡀ ࡃࡌࡅࡕࡀࡉࡊࡅࡍ ࡕࡀࡒࡍࡀ ࡀࡉࡍࡉࡀ ࡖࡏࡅࡕࡓࡉࡀ ࡐࡀࡄࡕࡉࡕࡅࡍ
083 ࡅࡌࡃࡀࡁࡓࡀࡍࡀ ࡖࡌࡀࡋࡊࡉࡀ ࡊࡅࡋࡄࡅࡍ ࡒࡋࡉࡃࡉࡀ ࡖࡆࡉࡅࡀ ࡁࡏࡃࡀࡉࡊࡅࡍ ࡅࡋࡑࡀࡐࡈࡉࡀ ࡖࡆࡉࡅࡀ ࡂࡀࡌࡓࡉࡕࡅࡍ ࡏࡎࡉࡒࡕࡀࡍ ࡅࡓࡅࡔࡅࡌࡀࡍ ࡅࡊࡅࡔࡈࡀࡍ ࡁࡋࡉࡁࡀࡉࡊࡅࡍ ࡃࡉࡋࡊࡅࡍ ࡍࡉࡕࡍࡀࡈࡀࡓ
084 ࡕࡀࡍࡀ ࡖࡉࡀࡒࡉࡃ ࡁࡆࡉࡅࡀ ࡅࡐࡀࡎࡉࡌࡊࡀ ࡖࡁࡇ ࡐࡉࡄࡕࡀ ࡍࡈࡉࡓ ࡃࡌࡅࡕࡀࡉࡊࡅࡍ ࡅࡊࡅࡋࡄࡅࡍ ࡀࡋࡌࡉࡀ ࡅࡌࡀࡋࡊࡉࡀ ࡅࡍࡉࡈࡅࡐࡉࡀࡕࡀ ࡋࡌࡉࡌࡓࡀ ࡃࡉࡋࡊࡅࡍ ࡍࡀࡔࡓࡅࡍ ࡌࡍ ࡓࡉࡔ ࡁࡓࡉࡔ⊚ ࡅࡄࡀࡉࡆࡀࡊ
085 ࡐࡀࡔࡉࡒࡕࡇ ࡊࡀࡍࡀࡕ ࡓࡀࡁࡕࡉࡀ ࡋࡄࡀࡆࡉࡍ ࡏࡍࡉࡀࡍࡀ ࡉࡀࡒࡉࡓࡀ ࡖࡓࡌࡀࡋࡅࡍ ࡌࡀࡓࡀ ࡖࡓࡀࡁࡅࡕࡀ ࡋࡏࡅࡕࡓࡉࡀ ࡅࡀࡌࡀࡓ ⊚ ࡄࡀࡆࡉࡍ ࡖࡀࡌࡀࡓ ࡌࡀࡋࡊࡀࡉࡀࡍ ࡊࡌࡀ ࡔࡀࡉࡍࡀࡉ
086 ࡆࡉࡅࡀࡉࡊࡅࡍ ࡌࡀࡋࡊࡉࡀ ࡊࡌࡀ ࡃࡌࡀ ࡄࡅ ࡔࡀࡍࡀࡉ ࡌࡉࡓࡕࡀ ࡄࡏ ࡆࡉࡅࡀࡉࡊࡅࡍ ࡁࡀࡋࡂࡀࡌ ࡄࡅ ࡌࡀࡋࡊࡉࡀ ࡆࡉࡅࡀ ࡄࡅ ⊚ ࡊࡌࡀ ࡃࡌࡅࡕࡀࡉࡊࡅࡍ ࡕࡀࡒࡍࡀ ࡓࡅࡄࡀ ࡅࡍࡉࡔࡉࡌࡕࡀ ࡅࡐࡀࡂࡓࡀ
087 ࡄࡉࡍࡅࡍ ⊚ ࡀࡉࡍࡉࡀ ࡖࡏࡅࡕࡓࡉࡀ ࡐࡀࡄࡕࡉࡕࡅࡍ ࡌࡀࡑࡁࡅࡕࡀ ࡄࡏ ࡅࡌࡀࡌࡋࡀ ࡖࡍࡈࡀࡓ ࡁࡋࡉࡔࡀࡍࡀ ࡄࡅ ࡖࡋࡀࡐࡀࡄࡕࡀࡍ ࡀࡉࡍࡉࡀ ࡖࡓࡀࡆࡉࡀ ࡏࡋࡇ ࡁࡌࡀࡌࡋࡀ ࡄࡅ ࡌࡀࡑࡁࡅࡕࡀ ࡔࡅࡌࡇ
088 ࡅࡌࡃࡀࡁࡓࡀ<<ࡍࡀ>> ࡖࡋࡊࡅࡋࡄࡅࡍ ࡌࡀࡋࡊࡉࡀ ࡄࡅ ࡖࡋࡏࡑࡈࡅࡍࡀ ࡊࡅࡋࡇ ࡌࡃࡀࡁࡀࡓࡋࡇ ࡄࡅ ࡕࡓࡉࡍ ࡓࡀࡆࡉࡀ ࡖࡌࡉࡍࡇ ࡉࡀࡒࡉࡓࡉࡀ ࡖࡄࡅ ࡆࡌࡀ ࡖࡕࡀࡓࡕࡉࡍ ࡀࡉࡍࡉࡀ ࡔࡅࡌࡇ ࡀࡒࡋࡉࡃࡉࡀ
089 ࡖࡆࡉࡅࡀ ࡁࡏࡃࡀࡉࡊࡅࡍ ࡕࡋࡀࡕࡀ ࡓࡅࡔࡅࡌࡉࡀ ࡄࡉࡍࡅࡍ ࡎࡀࡐࡈࡉࡀ ࡂࡉࡍࡆࡉࡀ ࡂࡀࡌࡓࡉࡕࡅࡍ ࡃࡉࡋࡊࡅࡍ ࡏࡅࡑࡓࡀ ࡅࡕࡉࡓࡀࡕࡀ ࡅࡀࡍࡃࡀࡔࡀࡕࡀ ࡄࡉࡍࡅࡍ ࡏࡎࡉࡒࡕࡀ ࡅࡓࡅࡔࡅࡌࡀ ࡅࡊࡅࡔࡈࡀ
090 ࡓࡉࡔࡀ ࡅࡄࡀࡋࡑࡀ ࡖࡏࡅࡑࡈࡅࡍࡀ ࡄࡉࡍࡅࡍ ࡖࡋࡏࡃࡀࡉࡊࡅࡍ ࡃࡉࡋࡊࡅࡍ ࡍࡉࡕࡍࡀࡈࡓࡅࡍ ࡅࡓࡅࡔࡅࡌࡀ ࡖࡔࡅࡁࡀ ࡓࡅࡔࡅࡌࡉࡀ ࡖࡉࡀࡄࡈࡀࡈࡀ ࡅࡓࡅࡔࡅࡌࡀ ࡖࡏࡋࡀࡉࡀ ࡖࡓࡉࡔࡀ ࡖࡄࡉࡍࡅࡍ
091 ࡕࡋࡀࡕࡀ ࡂࡀࡅࡍࡉࡀ ࡌࡉࡕࡓࡉࡔࡌࡉࡀ ࡁࡉࡎࡉࡒࡕࡀ ࡄࡀࡃ ࡁࡐࡀࡓࡆࡋࡀ ࡁࡌࡉࡔࡀ ࡕࡀࡍࡀ ࡖࡉࡀࡒࡉࡃ ࡁࡆࡉࡅࡀ ࡁࡀࡋࡂࡌࡀ ࡖࡁࡆࡌࡀ ࡓࡌࡉࡀ ⊚ ࡐࡀࡎࡉࡌࡊࡀ ࡖࡁࡐࡉࡄࡕࡀ
092 ࡍࡈࡉࡓ ࡀࡉࡍࡉࡀ ࡖࡁࡓࡉࡔࡀ ࡉࡀࡒࡃࡀ ࡍࡉࡍࡉࡈࡓࡅࡍ ࡃࡌࡀࡅࡀࡕࡊࡅࡍ ࡉࡀࡌࡉࡍࡀ ࡅࡎࡌࡀࡋࡀ ࡄࡉࡍࡅࡍ ࡀࡋࡌࡉࡀ ࡅࡌࡀࡋࡊࡉࡀ ࡅࡍࡉࡈࡅࡐࡉࡀࡕࡀ ࡊࡀࡁࡃࡀ ࡅࡄࡀࡔࡀࡔࡀ ࡅࡊࡅࡋࡉࡀࡕࡀ ࡄࡉࡍࡅࡍ
093 ࡖࡄࡉࡍࡅࡍ ࡌࡀࡋࡊࡉࡀ ࡖࡁࡉࡍࡉࡀࡍࡉࡀ ࡊࡅࡋࡄࡅࡍ ࡋࡌࡉࡌࡓࡀ ࡃࡉࡋࡊࡅࡍ ࡍࡀࡔࡓࡅࡍ ࡍࡉࡔࡉࡌࡕࡀ ࡅࡂࡉࡓࡌࡉࡀ ࡄࡉࡍࡅࡍ ⊚ ࡌࡍ ࡓࡉࡔ ࡁࡓࡉࡔ ࡖࡌࡍ ࡓࡉࡔࡀ ࡅࡋࡉࡂࡓࡇ ࡄࡅ⊚ ࡗ ࡓࡌࡀࡋࡅࡍ
094 ࡄࡀࡆࡉࡍ ࡏࡍࡉࡀࡍࡀ ࡋࡏࡅࡕࡓࡉࡀ ࡋࡀࡄࡅࡀࡋࡅࡍ ࡐࡀࡎࡅࡊ ࡖࡍࡀࡕࡅࡍࡅࡍ ࡋࡁࡓ ࡌࡍ ࡌࡀࡄࡅ ࡒࡀࡌ ࡄࡉࡁࡉࡋࡆࡉࡅࡀ ࡅࡋࡂࡀࡈ ࡋࡉࡂࡓࡇ ࡖࡉࡀࡌࡉࡍࡇ ࡖࡌࡀࡓࡀ ࡖࡓࡀࡁࡅࡕࡀ ࡅࡌࡍࡀࡔࡉࡒࡋࡇ
095 ࡅࡌࡁࡀࡓࡀࡊࡋࡇ ࡅࡄࡅ ࡉࡀࡅࡀࡓ ࡆࡉࡅࡀ ࡋࡀࡈࡌࡇ ࡖࡌࡀࡓࡀ ࡖࡓࡀࡁࡅࡕࡀ ࡅࡋࡉࡂࡈࡇ ࡁࡏࡃࡇ ࡅࡌࡍࡀࡔࡉࡒࡋࡇ ࡅࡀࡉࡍࡇ ࡁࡃࡉࡌࡉࡄࡕࡀ ࡏࡑࡈࡀࡓࡀࡓࡀࡕ ࡅࡌࡁࡀࡓࡊࡉࡋࡇ
096 ࡅࡌࡓࡀࡅࡓࡁࡉࡋࡇ ࡅࡌࡒࡀࡉࡌࡉࡋࡇ ࡋࡌࡀࡓࡀ ࡖࡓࡀࡁࡅࡕࡀ ࡅࡀࡌࡀࡓࡋࡇ ࡁࡌࡀࡈࡅࡕ ࡕࡉࡄࡅࡉࡀ ࡏࡋࡀࡅࡀࡉࡀࡍ ࡅࡄࡀࡉࡆࡀࡊ ࡀࡈࡐࡉࡋࡅࡍ ࡆࡉࡅࡀ ࡋࡏࡅࡕࡓࡉࡀ ࡅࡍࡄࡅࡓࡀ ࡓࡀࡌࡀ ࡏࡋࡀࡅࡀࡉࡄࡅࡍ
097 ࡐࡓࡀࡎ⊚ ࡅࡄࡀࡉࡆࡀࡊ ࡌࡀࡋࡉࡋ ࡌࡀࡓࡀ ࡖࡓࡀࡁࡅࡕࡀ ࡋࡏࡅࡕࡓࡉࡀ ࡌࡎࡀࡃࡓࡀࡍࡉࡀ ࡖࡍࡉࡌࡀࡓࡋࡅࡍ ࡉࡀ ࡁࡍࡀࡉ ࡅࡔࡉࡕࡋࡀࡉ ࡄࡆࡅࡍ ࡅࡁࡀࡔࡒࡀࡓ ࡍࡀࡐࡔࡀࡉࡊࡅࡍ
098 ࡅࡕࡉࡃࡅࡍ ࡖࡄࡔࡅࡊࡀ ࡏࡕࡁࡇ ࡄࡀࡉࡋࡀ ࡁࡏࡍࡐࡉࡔ ࡅࡍࡄࡅࡓࡀ ࡏࡌࡓࡀ ࡅࡔࡉࡌࡀ ࡁࡂࡀࡅࡀ ࡍࡈࡉࡓ ࡅࡗ ࡍࡄࡅࡓࡀ ࡓࡀࡌࡉࡍ ࡁࡄࡔࡅࡊࡀ ࡅࡄࡔࡅࡊࡀ
099 ࡁࡀࡍࡄࡅࡓࡀ ࡏࡕࡉࡌࡋࡉࡀ ࡄࡀࡆࡉࡍ ࡏࡅࡑࡈࡅࡍࡀ ࡊࡅࡋࡇ ࡅࡄࡔࡅࡊࡀ ࡄࡀࡔࡊࡀ ࡄࡅ ࡓࡅࡄࡀ ࡒࡀࡓࡉࡋࡇ ࡀࡋࡌࡉࡀ ࡅࡃࡀࡓࡉࡀ ࡄࡀࡆࡉࡍ ࡍࡄࡅࡓࡀ ࡍࡉࡔࡉࡌࡕࡀ
100 ࡄࡅ ࡅࡗ ࡏࡑࡈࡀࡓࡀࡓ ࡀࡋࡌࡉࡀ ࡖࡄࡔࡅࡊࡀ ࡍࡄࡅࡓࡀ ࡁࡂࡀࡅࡀࡉࡄࡅࡍ ࡋࡀࡄࡅࡀ ࡋࡁࡓ ࡌࡍ ࡓࡐࡉࡋࡉࡀ ࡖࡄࡏ ࡕࡀࡂࡀ ࡖࡍࡀࡐࡉࡒ ࡌࡍ ࡄࡀࡅࡌࡀ
101 ࡅࡉࡀࡒࡃࡀࡍࡀ ࡏࡅ ࡍࡀࡐࡉࡒ ࡌࡍ ࡏࡅࡑࡈࡅࡍࡀ ࡖࡄࡀࡅࡌࡀ ࡉࡀࡕࡁࡀ ࡗ ࡄࡀࡋࡀ ࡄࡔࡅࡊࡀ ࡐࡓࡀࡔࡁࡇ ࡌࡀࡋࡊࡀ ࡅࡀࡓࡒࡀࡄࡀࡕࡅࡍ ࡄࡅࡀࡕ ࡄࡐࡀࡓࡉࡅࡍ
102 ࡀࡓࡒࡀ ࡖࡌࡍ ࡏࡋࡀࡅࡀࡉࡅࡍ ࡅࡃࡀࡋࡅࡍࡅࡍ ࡋࡄࡉࡋࡁࡅࡍࡅࡍ ࡖࡋࡀࡍࡉࡈࡁࡅࡍ ࡗ ࡄࡀࡆࡉࡍ ࡀࡁࡀࡃࡉࡅࡍ ࡄࡀࡍࡀࡕࡅࡍ ࡃࡅࡊࡕࡀ ࡄࡅࡀ ࡁࡉࡓࡀ ࡅࡏࡕࡍࡉࡒࡁࡀࡕ ࡅࡀࡆࡋࡀࡕ
103 ࡅࡍࡉࡐࡋࡀࡕ ࡁࡑࡉࡄࡉࡅࡍ ࡐࡀࡒࡀࡕࡀ ࡅࡍࡉࡄࡕࡀࡕ ࡋࡕࡉࡕ ࡔࡀࡁࡉࡌࡀ ࡅࡀࡓࡁࡉࡍ ࡐࡀࡓࡎࡉࡀ ࡄࡀࡆࡉࡍ ࡀࡓࡒࡀ ࡖࡕࡉࡁࡉࡋ ࡁࡉࡓࡀ ࡖࡌࡉࡀ ࡎࡀࡓࡉࡉࡀ
104 ࡄࡅࡀࡕ ࡅࡀࡍࡀ ࡅࡊࡀࡍࡀࡕ ࡏࡌࡀࡉࡊࡅࡍ ࡄࡀࡕࡀࡌ ࡋࡅࡀࡕࡀࡉࡅࡍ ࡄࡅࡀࡉࡍࡉࡍ ࡗ ࡐࡀࡓࡉࡔࡍࡉࡍ ࡋࡏࡁࡉࡃࡀࡕࡅࡍ ࡁࡓࡀࡆࡀ ࡖࡍࡉࡔࡉࡌࡕࡀ ࡋࡂࡀࡈࡍࡉࡍ ࡀࡓࡀࡒࡍࡉࡍ
105 ࡌࡍ ࡄࡀࡊ ࡃࡅࡊࡕࡀ ࡖࡀࡍࡉࡍ ࡗ ࡃࡉࡋࡅࡍ ࡋࡀࡍࡉࡄࡅࡉࡀ ࡎࡋࡉࡒࡍࡉࡍ ࡌࡍ ࡄࡀࡊ ࡁࡉࡓࡀ ࡅࡀࡕࡉࡍࡉࡍ ࡋࡄࡀࡆࡉࡍ ࡃࡅࡊࡕࡀ ࡀࡌࡉࡍࡈࡅࡋ ࡖࡁࡕࡉࡁࡉࡋ ࡉࡀࡓࡒࡉࡀ
106 ࡃࡅࡊࡕࡀࡉ ࡖࡋࡉࡂࡓࡀࡉ ࡋࡏࡔࡊࡀ ࡗ ࡋࡄࡀࡊࡀ ࡀࡕࡉࡍࡉࡍ ࡄࡀࡔࡉࡁࡉࡅࡍ ࡄࡔࡅࡊࡀࡉࡉࡀ ࡖࡌࡀࡋࡊࡅࡕࡀ ࡃࡉࡋࡅࡍ ࡕࡉࡄࡅࡉࡀ ࡀࡍࡉࡍ ࡉࡀࡃࡉࡍࡉࡍ ࡖࡌࡀࡄࡅ ࡖࡄࡀࡅࡉࡀ
107 ࡌࡉࡍࡀࡉࡅࡍ ࡉࡀࡃࡉࡍࡉࡍ ࡗ ࡌࡉࡀ ࡃࡉࡋࡀࡍ ࡀࡆࡋࡉࡀ ࡋࡅࡀࡕࡅࡍ ࡓࡉࡄࡀࡉࡅࡍ ࡆࡀࡐࡓࡀ ࡁࡀࡎࡅࡌ ࡄࡉࡍࡉࡋࡀ ࡔࡅࡓࡁࡀࡕࡀ ࡃࡉࡋࡀࡍ ࡋࡀࡍࡀࡐࡔࡀ ࡀࡌࡉࡍࡈࡅࡋ ࡖࡊࡅࡋࡌࡀࡍ ࡖ
108 ࡏࡏࡑࡈࡀࡓࡀࡓ ࡁࡄࡀࡍࡉࡊ ࡀࡋࡌࡉࡀ ࡌࡍ ࡀࡕࡅࡕࡉࡀ ࡀࡓࡒࡀ ࡖࡕࡉࡁࡉࡋ ࡋࡁࡉࡕ ࡄࡉࡉࡀ ࡋࡀࡎࡀࡋࡉࡒ ࡒࡀࡌࡍࡉࡍ ࡅࡊࡃࡀࡁࡍࡉࡍ ࡐࡓࡅࡃࡒࡀ ࡅࡐࡉࡋࡈࡀࡕ ࡖࡍࡉࡄࡅࡉࡀ
109 ࡉࡅࡌࡀ ࡖࡏࡋ ࡏࡃࡇ ࡖࡄࡉࡁࡉࡋ ࡆࡉࡅࡀ ࡀࡍࡀࡕ ࡕࡉࡎࡕࡀ^ࡃࡀ^ࡓࡁࡅࡍ ࡄࡀࡔࡕࡀ ࡌࡀࡈࡉࡀ ࡆࡉࡁࡍࡀ ࡅࡏࡃࡀࡍࡀ ࡖࡀࡍࡀࡕ ࡋࡄࡀࡊ ࡃࡅࡊࡕࡀ ࡕࡉࡀࡎࡂࡉࡀ ࡅࡕࡉࡎࡀࡃࡀࡓ
110 ࡖࡀࡍࡉࡍ ࡌࡐࡀࡓࡒࡉࡍࡀࡋࡀࡊ ࡅࡀࡍࡀࡕ ࡁࡆࡀࡓࡀࡆࡕࡀࡊ ࡌࡀࡄࡅ ࡖࡌࡐࡀࡒࡃࡉࡕ ࡏࡁࡉࡃ ࡅࡎࡀࡃࡀࡓ ࡖࡀࡍࡉࡍ ࡍࡉࡄࡅࡉࡋࡀࡊ ࡀࡃࡉࡀࡅࡓࡀ ࡄࡉࡍࡉࡋࡀ ࡏࡊࡀ ࡄࡀࡅࡉࡋࡀࡊ
111 ࡀࡋࡌࡀ ࡖࡌࡀࡎࡉࡒࡕࡀࡊ ࡒࡀࡓࡉࡍࡀࡋࡀࡊ ࡅࡋࡅࡀࡕࡀࡍ ࡎࡀࡋࡒࡉࡕ ࡅࡌࡉࡕࡒࡀࡉࡌࡉࡕ⊚ ࡅࡄࡀࡉࡆࡀࡊ ࡀࡌࡀࡓࡋࡇ ࡄࡀࡋࡉࡍ ࡌࡀࡎࡒࡀࡕࡀ ࡊࡅࡋࡄࡉࡍ ࡖࡌࡉࡕࡒࡉࡓࡉࡉࡀ
112 ࡖࡄࡏ ࡈࡀࡁࡀࡄࡀࡕࡀ ࡄࡏ ࡀࡌࡉࡍࡈࡅࡋ ࡖࡌࡀࡎࡉࡒࡕࡀ ࡃࡉࡋࡀࡊ ࡄࡉࡁࡉࡋࡆࡉࡅࡀ ࡖࡓࡀࡁࡀࡕࡀ ࡃࡉࡋࡇ ࡔࡀࡁࡀ ࡒࡉࡍࡉ{{ࡍࡉ}}ࡀ ࡄࡅࡀ ࡊࡅࡋ ࡒࡉࡍࡀ ࡐࡀࡈࡉࡓࡉࡀ ࡕࡋࡀࡕࡀ ࡄࡉࡍࡅࡍ
113 {{ࡊࡅࡋ}} ࡌࡀࡎࡉࡒࡕࡀ ࡖࡌࡉࡕࡒࡉࡓࡉࡀ ࡔࡀࡁࡀ ࡒࡉࡍࡉࡍࡉࡀ ࡄࡉࡍࡅࡍ ⊚ ࡕࡅࡌ ࡃࡅࡊࡓࡀࡍࡉࡀ ࡖࡀࡍࡀࡕ ࡔࡀࡉࡉࡋࡕ ࡏࡋࡀࡅࡀࡉࡄࡅࡍ ࡄࡃࡀ ࡒࡉࡍࡀ ࡄࡉࡍࡅࡍ ࡄࡉࡍࡉࡋࡀ ࡓࡉࡄࡁࡀࡕࡀ
114 ࡃࡉࡋࡅࡍ ࡗ ࡈࡀࡁࡀࡄࡀࡕࡀ ࡄࡉࡍࡅࡍ⊚ ࡉࡀ ࡔࡉࡕࡋࡀࡉ ࡄࡀࡋࡉࡍ ࡖ^ࡓࡀࡄ^ࡀࡁࡀࡄࡀࡕࡀ ࡓࡀࡆࡀ ࡕࡀࡒࡍࡀ ࡄࡉࡍࡅࡍ ࡖࡋࡌࡀࡎࡒࡀࡕࡀ ࡌࡕࡀࡓࡑࡉࡋࡇ ࡄࡆࡅࡍ ࡅࡁࡀࡔࡒࡀࡓ ࡖࡏࡋ
115 ࡐࡀࡈࡉࡓࡀ ࡏࡕࡔࡀࡉࡀ ࡉࡀࡕࡁࡀ ࡄࡉࡍ ࡄࡉࡍࡅࡍ ࡀࡎࡓࡉࡀ ࡅࡄࡀࡕࡌࡉࡀ ࡊࡅࡋ ࡓࡀࡆࡀ ࡄࡆࡅࡍ ࡏࡕࡔࡀ ࡉࡀࡄࡓࡉࡀ ࡔࡀࡊࡅࡁ ࡉࡀࡍࡒࡀ ࡅࡁࡉࡀࡄࡓࡀ ࡀࡎࡓࡉࡀࡉࡀ ࡋࡀࡌࡉ
116 ࡕࡒࡀࡉࡀࡌ ࡄࡀࡕࡀࡌ ࡄࡀࡅࡉࡋࡇ ࡓࡉࡄࡁࡀࡕࡀ ࡖࡍࡉࡐࡀࡓࡒࡅࡉࡀ ࡌࡍ ࡊࡅࡋ ࡃࡌࡅ ࡖࡏࡕࡋࡇ ࡌࡉࡔࡀ ࡅࡀࡎࡀ ࡅࡀࡌࡅࡆࡀ ࡅࡓࡉࡄࡀ ࡅࡃࡅࡐࡔࡀ ࡖࡄࡅ ࡁࡀࡃࡌࡅ
117 ࡄࡀࡌࡓࡀ ࡄࡅ ࡏࡕࡋࡇ ࡑࡀࡕࡓࡀ ࡅࡑࡉࡕࡀ ࡅࡊࡅࡋࡇ ࡖࡔࡀࡄࡁࡀ ࡁࡀࡉࡍࡉࡀ ࡖࡏࡕࡋࡇ ࡕࡀࡓࡕࡉࡍ ࡀࡉࡍࡉࡀ ࡖࡄࡀࡋࡁࡀ ࡏࡕࡋࡇ ࡄࡀࡃ ࡌࡉࡀ ࡅࡄࡀࡃ ࡄࡀࡋࡀࡋࡕࡀ
118 ࡄࡉࡍࡅࡍ ࡏࡕࡋࡇ ࡈࡍࡀࡆࡀ ࡋࡄࡀࡋࡑࡇ ࡁࡀࡃࡌࡅ ࡄࡉࡌࡉࡀࡍࡀ ࡄࡅ ࡏࡕࡋࡇ ࡔࡀࡐࡉࡍࡆࡀ ࡋࡄࡅࡃࡇ ࡖࡄࡅ ࡁࡀࡃࡌࡅ ࡖࡌࡀࡍࡃࡀ ࡄࡅ ࡖࡏࡍࡉࡔ ࡋࡀࡉࡉࡕ ࡏࡋࡇ ࡏࡕࡋࡇ
119 ࡋࡁࡓ ࡌࡍ ࡏࡌࡇ ࡏࡕࡋࡇ ࡐࡀࡎࡉࡌࡊࡀ ࡖࡋࡀࡃࡀࡉࡉࡊ ࡏࡕࡋࡇ ࡑࡅࡓࡕࡀ ࡖࡍࡀࡉࡋࡉࡀ ࡋࡀࡍࡉࡋࡅࡍ ࡏࡋࡇ ࡅࡋࡀࡍࡉࡔࡕࡀࡋࡈࡅࡍ ࡏࡕࡋࡇ ࡆࡀࡍࡂࡀ ࡌࡒࡀࡓࡒࡔࡀ{{ࡀ}} ࡖࡍࡉࡔࡉࡌࡕࡀ
120 ࡁࡐࡀࡂࡓࡀ ࡋࡀࡔࡀࡄࡓࡀ ࡅࡋࡀࡃࡀࡅࡉࡀ⊚ ࡉࡀ ࡔࡉࡕࡋࡀࡉ ࡌࡀࡎࡒࡀࡕࡀ ࡖ^ࡀ^ࡓࡀࡁࡀࡕࡀ ࡖࡀࡁࡀࡄࡀࡕࡀ ࡃࡉࡋࡀࡍ ࡅࡌࡀࡑࡁࡅࡕࡀ ࡁࡅࡊࡀࡓࡕࡀ ࡃࡀࡌࡉࡀ ࡖࡀࡁࡀࡄࡀࡕࡀ
121 ࡖࡌࡉࡕࡒࡉࡓࡉࡀࡍ ࡋࡄࡅࡃࡀࡉࡉࡍ ࡌࡀࡑࡁࡅࡕࡀࡕࡀ ࡄࡅࡓࡉࡍࡉࡀࡕࡀ ࡃࡀࡌࡉࡀࡍ ࡀࡌࡉࡍࡈࡅࡋ ࡖࡄࡀࡋࡉࡍ ࡀࡁࡀࡄࡀࡕࡀ ࡓࡅࡄࡀ ࡅࡍࡉࡔࡉࡌࡕࡀ ࡅࡐࡀࡂࡓࡀ ࡄࡉࡍࡉࡍ ࡄࡆࡅࡍ ࡖࡄࡉࡍࡅࡍ
122 ࡕࡋࡀࡕࡀ ࡄࡉࡍࡅࡍ ࡄࡃࡀ ࡌࡉࡍࡀࡉࡅࡍ ࡄࡀࡍࡀࡕࡇ ࡕࡉࡕࡀࡉ ࡐࡀࡂࡓࡀ ࡄࡅ ࡅࡕࡉࡍࡉࡀࡍࡀ ࡓࡅࡄࡀ ࡄࡅ ࡅࡕࡋࡉࡕࡀࡉࡀ ࡍࡉࡔࡉࡌࡕࡀ ࡄࡅ ࡏࡅ ࡐࡀࡈࡉࡓࡀ ࡄࡀࡅࡉࡀ ࡋࡄࡅࡃࡇ ࡄࡀࡆࡉࡍ
123 ࡔࡅࡌࡀ ࡋࡀࡏࡕࡀࡎࡀࡒࡋࡅࡍ ࡄࡉࡍࡅࡍ ࡄࡉࡍࡅࡍ ࡕࡋࡀࡕࡀ ࡐࡀࡈࡉࡓࡉࡀ ࡅࡔࡀࡁࡀ ࡒࡉࡍࡉࡀ ࡄࡉࡍࡅࡍ ࡒࡉࡍࡀ ࡒࡀࡃࡌࡀࡉࡕࡀ ࡒࡅࡓࡒࡁࡀࡍࡀ ࡄࡅ ࡖࡍࡀࡎࡉࡁ ࡏࡊࡉࡋࡕࡀ ࡌࡍ ࡒࡅࡃࡀࡌ
124 ࡏࡅࡑࡈࡅࡍࡀ ࡀࡊࡉࡋ ⊚ ࡒࡉࡍࡀ ࡕࡉࡍࡉࡀࡍࡕࡉࡀ ࡊࡀࡁࡃࡀ ࡄࡅ ࡖࡍࡀࡎࡉࡁ ࡅࡌࡐࡀࡋࡂࡋࡀ ࡋࡏࡊࡉࡋࡕࡇ ࡁࡊࡅࡋࡇ ࡐࡀࡂࡓࡀ ⊚ ࡒࡉࡍࡀ ࡕࡋࡉࡕࡀࡉࡕࡀ ࡈࡀࡄࡀࡋࡀ ࡄࡅ ⊚ ࡒࡉࡍࡀ ࡀࡓࡁࡉࡀࡉࡕࡀ
125 ࡊࡀࡁࡀࡃࡉࡀ ࡄࡉࡍࡅࡍ ⊚ ࡒࡉࡍࡀ ࡄࡀࡌࡔࡀࡉࡀࡉࡕࡀ ࡊࡅࡋࡉࡀࡕࡀ ࡄࡉࡍࡅࡍ ⊚ ࡒࡉࡍࡀ ࡔࡉࡕࡀࡉࡕࡀ ࡋࡉࡁࡀ ࡄࡅ ⊚ ࡒࡉࡍࡀ ࡔࡅࡁࡀࡉࡕࡀ ࡖࡓࡅࡔࡅࡌࡉࡀ ࡕࡓࡉࡑࡉࡀ ࡁࡂࡀࡅࡀ
126 ࡅࡎࡀࡃࡀࡓࡀࡕࡀ ࡅࡐࡅࡌࡀ ࡅࡐࡓࡀࡕࡀ ࡁࡂࡀࡅࡀ ࡄࡅ ࡕࡓࡉࡑ ࡓࡉࡔࡀ ࡄࡏ ࡀࡌࡉࡍࡈࡅࡋ ࡖࡏࡊࡉࡋࡕࡀ ࡅࡌࡀࡔࡒࡉࡕࡀ ࡅࡐࡉࡄࡕࡀ ࡅࡐࡓࡀࡕࡀ ࡅࡐࡀࡋࡂࡀ ࡖࡁࡉࡎࡓࡀ
127 ࡌࡉࡕࡉࡍࡎࡉࡁ ࡁࡄࡀࡍࡀࡕࡇ ࡐࡀࡂࡓࡀ ࡁࡋࡀࡉࡕࡀ⊚ ࡉࡀ ࡁࡍࡀࡉ ࡁࡉࡎࡓࡀ ࡊࡅࡋࡇ ࡋࡀࡌࡉࡕࡊࡉࡋ ࡁࡄࡀࡍࡀࡕࡇ ࡐࡉࡄࡕࡀ ࡀࡌࡉࡍࡈࡅࡋ ࡖࡀࡁࡀࡄࡀࡕࡀ ࡀࡍࡉࡍ ࡄࡉࡍࡅࡍ ࡐࡀࡋࡂࡀ
128 ࡖࡁࡉࡎࡓࡀ ࡋࡀࡁࡀ ࡅࡐࡀࡋࡂࡀ ࡄࡅࡓࡉࡍࡀ ࡍࡀࡈࡀࡓ ࡁࡃࡅࡊࡕࡇ ࡋࡏࡌࡇ ࡄࡅ ࡄࡆࡅࡍ ࡖࡁࡉࡎࡓࡀ ࡄࡀࡊ ࡖࡉࡀࡅࡍࡀ ࡕࡀࡓࡕࡉࡍ ࡊࡉࡍࡉࡀࡍࡇ ࡄࡅ ࡀࡋࡌࡀ ࡖࡌࡍ ࡊࡅࡋࡄࡅࡍ
129 ࡑࡉࡐࡓࡉࡀ ࡕࡀࡓࡕࡉࡍ ࡉࡀࡅࡍࡉࡀ ࡅࡕࡀࡓࡕࡉࡍ ࡁࡏࡉࡉࡀ ࡓࡀࡌࡉࡀ ࡋࡀࡂࡈࡀ ࡅࡆࡓࡀࡆࡉࡀ ࡁࡉࡅࡌ ࡁࡉࡅࡌ ࡁࡌࡀࡍࡉࡀࡍ ࡑࡉࡐࡓࡉࡀ ࡋࡀࡄࡀࡅࡉࡀ ࡄࡆࡅࡍ ࡖࡏࡌࡁࡓࡀ ࡁࡓ
130 ࡕࡀࡕࡀ ࡖࡕࡓࡉࡍ ࡓࡉࡔࡉࡀ ࡏࡕࡋࡇ ࡖࡋࡀࡃࡀࡌࡉࡀ ࡃࡉࡁࡓࡇ ࡋࡒࡉࡓࡉࡀࡕࡀ ࡄࡅࡓࡉࡍࡉࡀࡕࡀ ࡖࡌࡉࡍࡃࡀ ࡌࡍ ࡁࡉࡎࡓࡀࡉࡅࡍ ࡋࡀࡌࡉࡕࡊࡉࡋ ࡄࡆࡅࡍ ࡖࡓࡉࡔࡀ ࡖࡕࡀࡕࡀ
131 ࡖࡀࡁࡀ ࡄࡅ ࡅࡀࡋࡉࡕࡇ ࡖࡏࡌࡀ ࡄࡏ ࡐࡓࡅࡔ ࡀࡋࡌࡀ ࡎࡒࡉࡋࡀ ࡏࡋࡉࡕࡀ ࡀࡌࡉࡍࡈࡅࡋ ࡖࡀࡌࡀࡓࡍࡉࡍ ࡖࡓࡅࡔࡅࡌࡀ ࡋࡃࡉࡋࡉࡀ ࡅࡄࡀࡊ ࡋࡏࡍࡕࡀ ࡅࡄࡀࡉࡆࡀࡊ ࡏࡕࡀࡎࡀࡒࡋࡉࡀ
132 ࡏࡋࡉࡕࡀ ࡖࡀࡌࡀࡌࡉࡀ ࡅࡕࡀࡅࡌࡉࡀ ࡊࡅࡋࡄࡅࡍ ࡋࡀࡃࡀࡌࡉࡀ ࡅࡋࡀࡉࡀࡃࡉࡀ ࡌࡀࡄࡅ ࡖࡀࡌࡓࡉࡀ⊚ ࡉࡀ ࡔࡉࡕࡋࡀࡉ ࡈࡀࡁࡉࡀ ࡗ ࡒࡀࡓࡉࡕࡅࡍ ࡖࡀࡁࡀࡄࡀࡕࡀ ࡕࡉࡃࡅࡍ ࡖࡈࡀࡁࡀࡄࡀࡕࡀ
133 ࡀࡍࡉࡍ ࡄࡅ ࡄࡆࡅࡍ ࡖࡗ ࡑࡀࡁࡉࡕࡅࡍ ࡌࡀࡑࡁࡅࡕࡀ ࡅࡀࡌࡓࡉࡕࡅࡍ ࡕࡓࡉࡍ ࡀࡂࡉࡀ ࡖࡀࡎࡀ ࡖࡄࡉࡍࡅࡍ ࡊࡋࡉࡋࡉࡀ ࡖࡉࡀࡓࡃࡍࡀ ࡅࡓࡀࡆࡉࡀ ࡊࡅࡋࡄࡅࡍ ࡌࡋࡀࡁࡔࡉࡁࡅࡍ ࡀࡍࡉࡍ ࡄࡉࡍࡅࡍ
134 ࡄࡆࡅࡍ ࡖࡄࡉࡌࡉࡀࡍࡊࡅࡍ ࡄࡋࡉࡋ ࡕࡓࡉࡍ ࡀࡈࡉࡓࡐࡉࡀ ࡄࡅ ࡄࡀࡃ ࡋࡃࡉࡋࡉࡀ ࡅࡄࡀࡃ ࡋࡏࡌࡀࡉࡊࡅࡍ ࡄࡀࡆࡉࡍ ࡏࡌࡀࡉࡊࡅࡍ ࡖࡊࡅࡋࡄࡅࡍ ࡄࡀࡆࡉࡍ ࡕࡀࡂࡀࡉࡊࡅࡍ ࡕࡓࡉࡍ ࡏࡐࡉࡀ
135 ࡄࡀࡃ ࡋࡃࡉࡋࡉࡀ ࡅࡄࡀࡃ ࡋࡏࡌࡀ ࡓࡀࡁࡕࡉࡀ ࡅࡄࡅ ࡄࡆࡅࡍ ࡖࡊࡅࡋࡌࡉࡍࡃࡀࡌ ࡖࡍࡀࡐࡉࡒ ࡌࡍ ࡈࡀࡁࡀࡄࡀࡕࡀ ࡋࡀࡌࡉࡕࡒࡀࡉࡀࡌ ࡄࡆࡅࡍ ࡖࡕࡓࡉࡍ ࡕࡓࡉࡍ ࡊࡅࡋࡌࡉࡍࡃࡀࡌ
136 ࡅࡋࡀࡁࡀࡈࡉࡋ ⊚ ࡔࡅࡌࡇ ࡀࡍࡀ ࡄࡅ ࡅࡀࡓࡒࡀ ࡏࡌࡇ ࡄࡏ ⊚ ࡏࡅࡌࡀࡌࡀ ࡀࡍࡀ ࡄࡅ ࡅࡋࡉࡋࡉࡀ ࡏࡌࡀ ࡄࡏ ⊚ ࡅࡊࡅࡋ ࡌࡀࡄࡅ ࡖࡁࡀࡓࡒࡀ ࡒࡀࡄࡃࡀ ࡕࡓࡉࡍ ࡂࡀࡅࡍࡉࡀ
137 ࡄࡀࡅࡉࡀ ࡁࡌࡀࡋࡀࡋࡊࡅࡍ⊚ ࡅࡗ ࡒࡀࡓࡉࡕࡅࡍ ࡈࡀࡁࡀࡄࡀࡕࡀ ࡖࡄࡉࡍࡅࡍ ࡏࡅ ࡌࡀࡎࡉࡒࡕࡀ ࡒࡀࡓࡉࡕࡅࡍ ࡋࡀࡕࡉࡌࡓࡅࡍ ࡖࡒࡓࡀࡉࡍࡉࡀ ࡄࡃࡀ ࡀࡌࡉࡍࡈࡅࡋ ࡖࡔࡉࡕࡉࡍ
138 ࡄࡃࡀ ࡕࡓࡀࡑࡀ ࡋࡄࡅࡃࡇ ࡅࡔࡀࡁࡀ ࡄࡃࡀ ࡕࡓࡀࡑࡀ ࡋࡄࡅࡃࡇ ࡄࡅ ࡔࡉࡕࡉࡍ ࡄࡅ ࡋࡏࡌࡇ ࡅࡔࡀࡁࡀ ࡋࡃࡉࡋࡉࡀ ࡄࡉࡍࡅࡍ ࡀࡌࡉࡍࡈࡅࡋ ࡖࡔࡉࡕࡉࡍ ࡀࡓࡒࡀ ࡅࡔࡀࡁࡀ ࡏ
139 ࡀࡓࡀࡁࡀࡕࡀ ࡔࡅࡌࡀ ࡕࡅࡌ ࡗ ࡒࡀࡓࡉࡕࡅࡍ ࡈࡀࡁࡀࡄࡀࡕࡀ ࡋࡄࡅࡃࡇ ࡋࡀࡕࡉࡒࡓࡅࡍ ࡋࡉࡄࡃࡀࡉࡕࡀ ࡅࡓࡀࡄࡌࡇ ࡏࡋࡇ ࡕࡉࡁࡅࡍ ࡋࡉࡄࡃࡀࡉࡕࡀ ࡐࡀࡎࡒࡉࡕࡅࡍ ࡓࡅࡄࡀ
140 ࡌࡍ ࡍࡉࡔࡉࡌࡕࡀ ࡖࡋࡀ^ࡋࡀ^ࡅࡉࡀࡍ ࡌࡍ ࡄࡃࡀࡃࡉࡀ ࡅࡓࡅࡄࡀ ࡋࡌࡅࡆࡀࡍࡉࡀ ࡋࡀࡒࡀࡓࡁࡀ ࡊࡅࡋࡌࡀࡍ ࡖࡈࡀࡁࡀࡄࡀࡕࡀ ࡍࡉࡒࡓࡉࡀ ࡋࡄࡅࡃࡇ ࡅࡌࡉࡀ ࡅࡄࡀࡌࡓࡀ ࡐࡀࡎࡉࡒ
141 ࡌࡍ ࡄࡃࡀࡃࡉࡀ ࡋࡉࡌࡀࡋࡉࡀ ࡖࡍࡉࡃࡓࡀ ࡐࡀࡋࡂࡉ^ࡀ^ ࡖࡁࡉࡎࡓࡀ ࡗ ࡖࡄࡅ ࡄࡀࡃ ࡓࡀࡆࡀ ࡎࡀࡃࡀࡓ ࡋࡉࡌࡀࡋࡉࡀ ࡋࡌࡉࡀ ࡖࡍࡉࡄࡀࡋࡉࡋ ࡗ ࡋࡉࡁࡇ ࡌࡍࡀࡕࡀ ࡋࡀࡄࡀࡁ
142 ࡅࡋࡉࡌࡀࡋࡉࡀ ࡖࡌࡉࡌࡀࡓ ࡁࡆࡅࡄࡀࡓࡉࡀ ࡖࡈࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡗ ࡋࡄࡅࡃࡇ ࡀࡁࡀ ࡔࡅࡌࡀ ࡃࡊࡀࡓ ⊚ ࡗ ࡄࡀࡉࡆࡉࡍ ࡓࡀࡆࡀ ࡄࡀࡆࡉࡕࡅࡍ ࡁࡀࡉࡍࡀࡉࡊࡅࡍ
143 ࡅࡔࡀࡌࡉࡕࡅࡍ ࡁࡏࡅࡃࡍࡀࡉࡊࡅࡍ ࡀࡍࡀࡕࡅࡍ ࡖࡎࡀࡋࡒࡉࡕࡅࡍ ࡅࡌࡀࡎࡒࡉࡕࡅࡍ ࡍࡉࡔࡌࡀࡕࡊࡅࡍ ࡏࡅ ࡐࡀࡎࡅࡄࡉࡀࡕࡊࡅࡍ ࡅࡋࡀࡅ ࡌࡉࡃࡓࡉࡕࡅࡍ ࡅࡀࡉࡋࡉࡍࡉࡍ ࡋࡍࡉࡔࡌࡀࡕࡀ ࡖ
144 ࡏࡁࡄࡉࡉࡀ ࡋࡀࡎࡀࡄࡃࡉࡍ ࡄࡀࡃ ࡌࡉࡍࡀࡉࡄࡅࡍ ࡋࡍࡄࡅࡓࡀ ࡋࡀࡎࡀࡋࡉࡒ ⊚ࡅࡄࡀࡉࡆࡀࡊ ࡌࡀࡋࡉࡋ ࡄࡉࡁࡉࡋࡆࡉࡅࡀ ࡋࡌࡀࡓࡀ ࡖࡓࡀࡁࡅࡕࡀ ࡖࡍࡉࡌࡀࡓࡋࡇ ࡉࡀ ࡌࡀࡓࡀࡍ ࡃࡉࡋࡀࡍ
145 ࡅࡌࡀࡓࡀࡉࡄࡅࡍ ࡖࡌࡀࡋࡊࡉࡀ ࡊࡅࡋࡄࡅࡍ ࡀࡄࡁࡀࡋࡀࡍ ࡐࡅࡔࡒࡀ ࡖࡒࡀࡓࡉࡍࡉࡍ ࡅࡄࡀࡃ ࡄࡀࡃ ࡓࡀࡆࡀ ࡅࡌࡉࡍࡉࡋࡉࡀ ࡋࡕࡓࡉࡍ ࡁࡀࡉࡉࡍ ࡋࡓࡀࡆࡀ ࡅࡏࡋ ࡖࡗ ࡄࡀࡆࡉࡋࡇ ࡕࡀࡓࡌࡉࡃࡉࡀ
146 ࡅࡌࡉࡎࡕࡌࡉࡊ ࡋࡉࡁࡀࡉࡅࡍ ࡋࡎࡀࡌࡊࡉࡀ ࡀࡌࡉࡍࡈࡅࡋ ࡖࡀࡍࡀࡕ ࡉࡀࡃࡉࡕ ࡖࡃࡉࡍࡁࡀ ࡖࡃࡀࡓࡀ ࡁࡀࡕࡓࡀࡉࡀ ࡌࡀࡄࡅ ࡌࡉࡍࡀࡉࡅࡍ ࡖࡕࡀࡓࡌࡉࡃࡉࡀ ࡌࡀࡓࡂࡍࡀࡉࡅࡍ ࡀࡁࡉࡃ
147 ࡅࡌࡉࡍࡀࡉࡅࡍ ࡖࡕࡀࡂࡀࡉࡅࡍ ࡀࡊࡅࡌ ࡏࡋ ࡕࡀࡋࡉࡀ ࡅࡂࡉࡍࡆࡀࡉࡊࡅࡍ ࡄࡀࡔࡅࡊ ࡁࡋࡉࡁࡀࡉࡅࡍ ࡅࡗ {{ࡌࡀࡎࡂࡉࡀ}} ࡌࡀࡎࡒࡉࡀ ࡂࡉࡍࡆࡀ ࡅࡕࡀࡒࡅࡍ ࡖࡍࡉࡎࡀࡒ ࡋࡓࡉࡔ ࡅࡌࡆࡀࡄࡓࡉࡀ
148 ࡅࡄࡃࡀࡃࡉࡀ ࡅࡄࡃࡀࡃࡉࡀ ࡁࡊࡅࡔࡈࡀ ࡋࡀࡓࡀࡄࡌࡉࡀ ࡅࡌࡀࡋࡐࡉࡀ ࡄࡃࡀࡃࡉࡀ ࡂࡉࡍࡆࡀ ࡅࡋࡀࡄࡀࡆࡉࡍ ࡄࡃࡀࡃࡉࡀ ࡅࡁࡀࡓࡊࡉࡀ ࡅࡌࡉࡃࡀࡌࡉࡍ ࡁࡃࡅࡌࡀࡉࡉࡀ ࡖࡀࡅࡌࡀࡉࡉࡀ ࡖࡄࡉࡍࡅࡍ
149 ࡄࡃࡀࡃࡉࡀ ࡂࡀࡈࡋࡉࡀ ࡖࡍࡀࡎࡁࡉࡍ ࡓࡁࡅࡕࡀ ࡓࡉࡒࡀࡍࡕࡉࡀ ࡋࡄࡃࡀࡃࡉࡀ ࡅࡄࡀࡃ ࡋࡄࡅࡃࡇ ࡋࡄࡅࡓࡉࡍࡀ ࡌࡂࡀࡍࡉࡋࡇ ࡅࡋࡉࡕࡁࡀࡉࡅࡍ ࡏࡍࡉࡔ ࡖࡌࡔࡀࡋࡀࡌ ࡄࡀࡃࡓࡉࡍ
150 ࡅࡄࡀࡅࡉࡋࡇ ࡓࡉࡃࡐࡀ ࡀࡌࡓࡉࡋࡇ ࡒࡅࡌ ࡐࡅࡒ {{ࡓࡉࡃࡐࡀ}} ࡌࡍ ࡁࡉࡍࡀࡕࡀࡉࡅࡍ ࡖࡌࡀࡋࡀࡋࡀࡊ ࡌࡊࡀࡃࡁࡉࡀ ࡅࡌࡔࡀࡒࡓࡉࡀ ࡗ ࡄࡀࡉࡆࡉࡍ ࡄࡉࡍ ࡋࡃࡀࡅࡓࡀ ࡈࡀࡁࡀ
151 ࡋࡀࡍࡉࡄࡆࡅࡍࡀ ࡀࡍࡀࡕ ࡀࡄࡁࡀࡋࡉࡀ ࡊࡅࡋࡌࡉࡍࡃࡀࡌ ࡖࡁࡀࡉࡉࡍࡀ ࡖࡏࡄࡁࡉࡋࡅࡍ ࡏࡃࡉࡋࡌࡀ ࡌࡉࡍࡀࡉࡄࡅࡍ ࡎࡀࡋࡒࡉࡀ ࡋࡄࡀࡊࡀ ࡅࡄࡀࡉࡌࡀࡍࡅࡕࡀ ࡁࡄࡀࡆࡉࡍ ࡌࡉࡑࡓࡀ ࡄࡀࡅࡉࡋࡅࡍ
152 ࡅࡋࡀࡌࡀࡎࡂࡉࡍ ࡏࡁࡉࡃࡀࡕࡅࡍ ࡁࡄࡀࡌࡁࡀࡋࡕࡀ ࡌࡍࡀࡕࡀ ࡖࡍࡀࡑࡉࡓࡅࡕࡀ ࡋࡀࡏࡕࡒࡉࡓࡉࡀࡕ ࡀࡁࡉࡃࡋࡇ ࡔࡀࡉࡀ ࡅࡏࡒࡀࡓࡀ ࡗ ࡄࡀࡃ ࡌࡍ ࡄࡀࡁࡓࡇ ࡏࡉࡀࡎࡂࡉࡀ
153 ࡀࡔࡅࡀࡋࡉࡀ ࡑࡀࡋࡉࡀ ࡌࡍ ࡓࡁࡇ ࡀࡌࡀࡓࡋࡇ ࡖࡅࡀࡉࡋࡀࡍ ࡖࡀࡍࡀࡕ ࡄࡀࡅࡉࡕ⊚ ࡅࡄࡀࡉࡆࡀࡊ ࡌࡀࡋࡉࡋ ࡌࡀࡓࡀ ࡖࡓࡀࡁࡅࡕࡀ ࡋࡄࡉࡁࡉࡋࡆࡉࡅࡀ ࡖࡍࡉࡌࡀࡓࡋࡇ ࡉࡀ ࡌࡀࡋࡊࡀ
154 ࡖࡀࡋࡌࡉࡀ ࡖࡍࡄࡅࡓࡀ ࡅࡗ ࡒࡀࡓࡉࡕࡅࡍ ࡌࡀࡎࡒࡀࡕࡀ ࡅࡌࡀࡈࡉࡕࡅࡍ ࡐࡀࡈࡉࡓࡀ ࡕࡌࡀࡍࡀࡉࡀ ࡓࡀࡆࡉࡀ ࡊࡅࡋࡄࡅࡍ ࡐࡉࡓࡉࡀ ࡋࡄࡃࡀࡃࡉࡀ ࡔࡀࡊࡁࡉࡀ ࡀࡋࡌࡀ ࡖࡌࡀࡈࡉࡕࡅࡍ
155 ࡐࡀࡈࡉࡓࡀ ࡕࡔࡀࡉࡀࡉࡀ ࡅࡀࡌࡓࡉࡕࡅࡍ ࡏࡍࡉࡀࡍࡀ ࡏࡋࡇ ࡅࡌࡎࡀࡊࡉࡕࡅࡋࡇ ࡊࡅࡋࡄࡅࡍ ࡓࡀࡆࡉࡀ ࡏࡕࡀࡓ ࡌࡍ ࡌࡅࡕࡀ ࡔࡉࡍࡕࡀ ࡖࡊࡉࡃࡓࡀࡕ ࡏࡋࡀࡅࡀࡉࡅࡍ ࡅࡗ ࡏࡍࡉࡀࡍࡀ
156 ࡀࡌࡓࡉࡕࡅࡍ ࡏࡓࡅࡕࡀࡉ ࡅࡕࡅࡔࡁࡉࡄࡕࡀࡉ ࡌࡀࡁࡓࡀࡉࡀࡉ ࡌࡀࡁࡀࡓ ࡄࡉࡋࡐࡀ ࡋࡀࡐࡕࡅࡍ ࡓࡅࡄࡀ {{ࡌࡍ}} ࡅࡍࡉࡔࡉࡌࡕࡀ ࡁࡉࡄࡃࡀࡃࡉࡀ ࡅࡀࡁࡀࡓࡕࡅࡍࡉࡍ ࡌࡍ ࡐࡋࡅࡂࡕࡀ
157 ࡋࡄࡀࡉࡌࡀࡍࡅࡕࡀ ࡀࡌࡉࡍࡈࡅࡋ ࡖࡏࡓࡅࡕࡀࡉ ࡓࡅࡄࡀ ࡅࡕࡅࡔࡁࡉࡄࡕࡀࡉ ࡍࡉࡔࡉࡌࡕࡀ ࡄࡉࡍࡅࡍ ࡎࡀ ࡎࡀ
158 ࡅࡄࡀࡉࡆࡀࡊ ࡗ ࡒࡀࡉࡌࡉࡕࡅࡍ ࡋࡋࡉࡂࡓࡀࡉࡊࡅࡍ ࡅࡀࡌࡓࡉࡕࡅࡍ ࡋࡀࡅࡐࡀ ࡅࡓࡅࡀࡄࡀ ࡖࡄࡉࡉࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡇ ࡋࡄࡀࡆࡀ ࡍࡉࡔࡉࡌࡕࡇ ࡖࡐࡋࡀࡍ
159 ࡁࡓ ࡐࡋࡀࡍࡉࡕࡀ ࡖࡄࡀࡆࡀ ࡌࡀࡎࡉࡒࡕࡀ ࡅࡃࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡃࡀࡄࡀࡍ ࡅࡃࡀࡄࡅࡀࡕࡀࡍ ࡖࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀ
160 ࡏࡉࡄࡅࡍ ࡕࡉࡃࡅࡍ ࡖࡐࡀࡈࡉࡓࡀ ࡅࡃࡀࡁࡀࡄࡀࡕࡀࡍ ࡊࡅࡋࡇ ࡄࡉࡍࡅࡍ ࡀࡌࡉࡍࡈࡅࡋ ࡖࡎࡓࡉࡍ ࡅࡄࡃࡀ ࡐࡀࡈࡉࡓࡀ ⊚ ࡅࡗ ࡀࡌࡓࡉࡕࡅࡍ ࡋࡀࡅࡐࡀ ࡐࡀࡈࡉࡓࡀ ࡒࡀࡃࡌࡀࡉࡀ
161 ࡄࡅ ⊚ ࡅࡓࡅࡀࡄࡀ ࡐࡀࡈࡉࡓࡀ ࡕࡉࡍࡉࡀࡍࡀ ࡄࡅ ⊚ ࡖࡄࡉࡉࡀ ࡐࡀࡈࡉࡓࡀ ࡕࡋࡉࡕࡀࡉࡀ ࡄࡅ ⊚ ࡔࡀࡁࡉࡒ ࡐࡀࡈࡉࡓࡀ ࡀࡓࡁࡀࡉࡀࡉࡀ ࡄࡅ ⊚ ࡄࡀࡈࡀࡉࡉࡀ ࡐࡀࡈࡉࡓࡀ
162 ࡄࡀࡌࡔࡉࡀࡉࡀ ࡄࡅ ⊚ ࡍࡉࡄࡅࡉࡋࡇ ࡐࡀࡈࡉࡓࡀ ࡔࡉࡕࡀࡉࡀ ࡄࡅ ⊚ ࡋࡍࡉࡔࡉࡌࡕࡀ ࡐࡀࡈࡉࡓࡀ ࡔࡅࡁࡀࡉࡀ ࡄࡅ ⊚ ࡖࡐࡋࡀࡍ ࡐࡀࡈࡉࡓࡀ ࡕࡌࡀࡍࡀࡉࡀ ࡄࡅ ⊚ ࡁࡓ
163 ࡐࡀࡈࡉࡓࡀ ࡖࡕࡔࡀࡉࡀࡉࡀ ࡄࡅ ⊚ ࡐࡋࡀࡍࡉࡕࡀ ࡐࡀࡈࡉࡓࡀ ࡀࡎࡓࡉࡀࡉࡀ ࡄࡅ ⊚ ࡖࡄࡀࡆࡀ ࡐࡀࡈࡉࡓࡀ ࡄࡃࡉࡎࡀࡓࡀࡉࡀ ࡄࡅ ⊚ ࡌࡀࡎࡉࡒࡕࡀ ࡐࡀࡈࡉࡓࡀ ࡕࡓࡉࡎࡀࡓࡀࡉࡀ
164 ࡄࡅ ⊚ ࡅࡈࡀࡁࡀࡄࡀࡕࡀࡍ ࡐࡀࡈࡉࡓࡀ ࡖࡕࡋࡀࡎࡀࡓࡀࡉࡀ ࡄࡅ ⊚ ࡅࡓࡅࡁࡀࡍࡀࡍ ࡐࡀࡈࡉࡓࡀ ࡀࡓࡁࡀࡎࡀࡓࡀࡉࡀ ࡄࡅ ⊚ ࡅࡃࡀࡄࡀࡍ ࡐࡀࡈࡉࡓࡀ ࡄࡀࡌࡉࡎࡀࡓ
165 ࡄࡅ ⊚ ࡅࡃࡀࡄࡅࡀࡕࡀࡍ ࡐࡀࡈࡉࡓࡀ ࡖࡔࡉࡕࡀࡎࡀࡓ ࡄࡅ ⊚ ࡖࡍࡐࡀࡒ ࡐࡀࡈࡉࡓࡀ ࡖࡔࡅࡁࡀࡎࡀࡓ ࡄࡅ ⊚ ࡌࡍ ࡐࡀࡈࡉࡓࡀ ࡖࡕࡌࡉࡍࡀࡎࡀࡓ
166 ࡄࡅ ⊚ ࡐࡀࡂࡓࡀࡉࡄࡅࡍ ࡐࡀࡈࡉࡓࡀ ࡖࡕࡔࡀࡎࡀࡓ ࡄࡅ ⊚ ࡅࡋࡃࡒࡀࡉࡌࡉࡀ ࡐࡀࡈࡉࡓࡀ ࡖࡎࡓࡉࡍ ࡄࡅ ⊚ ࡁࡐࡀࡂࡓࡀࡉࡄࡅࡍ ࡐࡀࡈࡉࡓࡀ ࡖࡎࡓࡉࡍ ࡅࡄࡃࡀ ࡄࡅ ⊚
167 ࡅࡗ ࡀࡌࡓࡉࡕࡅࡍ ࡁࡔࡅࡌࡀࡉࡄࡅࡍ ࡖࡄࡉࡉࡀ ࡓࡁࡉࡀ ࡄࡀࡉࡀࡋ ࡊࡁࡀࡓ ࡓࡀࡆࡀ ࡓࡁࡀ ࡖࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡖࡔࡓࡉࡀ ࡋࡐࡅࡌࡀࡉࡄࡅࡍ ࡖࡄࡉࡉࡀ ࡒࡀࡃࡌࡀࡉࡉࡀ
168 ࡏࡕࡀࡕࡍࡀ ࡄࡀࡕࡌࡀ ࡓࡁࡀ ࡋࡊࡅࡋࡄࡅࡍ ࡓࡀࡆࡉࡀ ࡖࡄࡀࡃ ࡌࡍ ࡄࡅࡓࡉࡍࡀ ࡋࡀࡍࡉࡕࡐࡀࡒࡀࡃ ࡀࡌࡉࡍࡈࡅࡋ ࡖࡄࡀࡉࡀࡋ ࡊࡁࡀࡓ ࡓࡁࡀ ࡖࡂࡀࡁࡀࡓࡅࡕࡀ ࡓࡉࡔࡀࡉࡄࡅࡍ ࡖ
169 ࡏࡂࡉࡀࡃࡉࡀ ࡋࡔࡉࡓࡉࡀࡍࡉࡀ ࡅࡂࡀࡈࡉࡍࡀࡕࡀ ࡅࡊࡅࡋࡄࡅࡍ ࡄࡀࡍࡃࡀࡌࡇ ࡁࡂࡀࡅࡇ ࡋࡂࡉࡈࡉࡀ ࡗ ࡌࡉࡀ ࡖࡁࡅࡕࡀ ࡒࡀࡓࡉࡕࡅࡍ ࡓࡀࡆࡀ ࡖࡌࡀࡆࡀࡓࡅࡕࡀ ࡖࡍࡀࡐࡋࡀ ࡁࡌࡀࡓࡁࡀ
170 ࡄࡏ⊚ ࡗ ࡀࡌࡓࡉࡕࡅࡍ ࡋࡀࡁࡀࡄࡀࡕࡀࡍ ࡅࡓࡅࡁࡀࡍࡀࡍ ࡅࡋࡀࡄࡀࡍ ࡅࡋࡀࡄࡅࡀࡕࡀࡍ ࡖࡍࡐࡀࡒ ࡌࡍ ࡐࡀࡂࡓࡀࡉࡄࡅࡍ ࡅࡋࡃࡒࡀࡉࡌࡉࡀ ࡁࡐࡀࡂࡓࡀࡉࡄࡅࡍ ࡄࡀࡋࡉࡍ ࡏࡕࡔࡀ ࡐࡅࡂࡃࡀࡌࡉࡀ
171 ࡏࡕࡔࡀ ࡉࡀࡄࡓࡉࡀ ࡖࡌࡓࡀࡁࡉࡋࡇ ࡋࡍࡉࡈࡅࡐࡕࡀ ࡖࡌࡀࡆࡀࡓࡅࡕࡀ ࡄࡉࡍࡅࡍ ࡁࡀࡃࡌࡅ ࡄࡀࡍࡀࡕࡇ ࡏࡕࡔࡀ ࡉࡀࡄࡓࡉࡀ ࡖࡉࡀࡍࡒࡀ ࡁࡂࡀࡅ^ࡀࡉ^ࡄࡅࡍ ࡓࡀࡁࡉࡀ ࡄࡉࡍࡅࡍ ࡗ
172 ࡀࡌࡓࡉࡕࡅࡍ ࡄࡀࡋ ^ࡅࡄࡉࡉࡀ^ ࡒࡀࡃࡌࡀࡉࡉࡀ ࡀࡌࡓࡉࡕࡅࡍ ^ࡅࡓࡉࡄࡀ^ ࡅࡀࡌࡓࡉࡕࡅࡍ ࡋࡁࡓ ࡌࡍ ࡓࡉࡄࡀ ࡖࡌࡀࡍࡃࡀ ࡖࡄࡉࡉࡀ ࡖࡋࡀࡎࡀࡉࡉࡐ ࡅࡋࡀࡁࡀࡈࡉࡋ {{ࡏࡅࡃࡍࡉࡀ ࡄࡉࡍࡅࡍ ࡃࡊࡀࡃࡁࡀ
173 ࡋࡀࡉࡉࡕ ࡁࡌࡀࡌࡋࡀࡋࡉࡀ}} ࡓࡉࡄࡀ ࡖࡌࡀࡍࡃࡀ ࡖࡄࡉࡉࡀ ࡓࡅࡔࡅࡌࡀ ࡄࡅ ࡖࡍࡄࡅࡓࡀ ࡍࡀࡎࡉࡁ ࡅࡌࡀࡁࡈࡉࡋࡅࡍ ࡋࡓࡀࡆࡉࡀ ࡊࡅࡋࡄࡅࡍ ࡖࡋࡀࡎࡀࡉ^ࡉ^ࡐ ࡅࡋࡀࡁࡀࡈࡉࡋ ࡏࡅࡃࡍࡉࡀ
174 ࡄࡉࡍࡅࡍ ࡖࡊࡀࡃࡁࡀ ࡋࡀࡉࡉࡕ ࡁࡌࡀࡌࡋࡀࡋࡉࡀ ⊚ ࡅࡗ ࡀࡅࡃࡉࡍ ࡅࡕࡅࡔࡁࡉࡄࡀࡍ ࡒࡀࡓࡉࡕࡅࡍ ࡅࡀࡌࡓࡉࡕࡅࡍ ࡊࡓࡅࡊ ࡅࡃࡄࡉࡀ ࡅࡓࡀࡄࡉࡒ ࡅࡁࡀࡈࡉࡋ ࡆࡌࡀ ࡅࡌࡉࡓࡕࡀ
175 ࡅࡆࡉࡒࡀ ࡅࡁࡀࡋࡂࡀࡌ ࡖࡄࡉࡍࡅࡍ ࡀࡓࡁࡀ ࡓࡀࡆࡉࡀ ࡖࡄࡉࡍࡅࡍ ࡁࡉࡍࡉࡀࡍࡀ ࡁࡃࡉࡋࡅࡍ ࡅࡄࡀࡌࡁࡀࡋࡕࡀ ࡁࡏࡃࡀࡉࡅࡍ ࡍࡈࡉࡓ ࡅࡌࡀࡋࡀࡊࡉࡀ ࡖࡓࡅࡂࡆࡀ ࡅࡁࡀࡓࡃࡀ ࡅࡂࡋࡀࡋࡀ ࡊࡅࡐࡍࡀ
176 ࡅࡑࡉࡄࡉࡀ ࡅࡃࡀࡄࡀࡋࡕࡀ ࡅࡈࡍࡅࡐࡉࡀ ࡄࡉࡍࡅࡍ ⊚ ࡅࡗ ࡕࡅࡔࡁࡉࡄࡀࡍ ࡋࡄࡉࡉࡀ ࡁࡀࡓࡀࡉࡉࡀ ࡀࡓࡒࡀ ࡅࡔࡅࡌࡉࡀ ࡅࡀࡉࡀࡓ ࡄࡉࡍࡅࡍ ࡕࡅࡔࡁࡉࡄࡀࡍ ࡀࡓࡒࡀ ࡋࡄࡉࡉࡀ ࡔࡅࡌࡉࡀ
177 ࡁࡀࡓࡀࡉࡉࡀ ࡀࡉࡀࡓ ࡃࡀࡊࡉࡀ ࡄࡅ ࡄࡉࡍࡅࡍ ࡐࡀࡂࡓࡀ ࡅࡓࡅࡄࡀ ࡅࡍࡉࡔࡉࡌࡕࡀ ࡌࡉࡕࡒࡉࡓࡉࡀ ⊚ ࡅࡗ ࡀࡌࡓࡉࡕࡅࡍ ࡁࡉࡀࡃ ࡌࡀࡄࡉࡒࡀࡍࡉࡀ ࡊࡀࡃࡀࡁࡉࡀ ࡄࡅࡍࡐࡀࡍࡉࡀ ࡏ
178 ࡅࡌࡀࡂࡆࡉࡓࡀࡍࡉࡀ ࡋࡀࡕࡉࡔࡃࡉࡍࡀࡍ ࡌࡍ ࡀࡓࡉࡀ ࡅࡄࡉࡅࡉࡀ ࡅࡍࡅࡓࡀ ࡅࡀࡓࡒࡁࡀ ࡐࡀࡓࡉࡒࡕࡅࡍࡀ ࡋࡄࡀࡍࡀࡕࡇ ࡍࡉࡔࡉࡌࡕࡀ ࡀࡌࡉࡍࡈࡅࡋ ࡖࡄࡀࡅࡌࡀ ࡖࡄࡀࡉࡉࡌ
179 ࡅࡀࡊࡉࡋࡀ ࡋࡏࡅࡑࡈࡅࡍࡀ ࡀࡓࡉࡀ ࡔࡅࡌࡇ ࡅࡁࡀࡓࡃࡀ ࡕࡀࡒࡉࡐࡀ ࡌࡊࡀࡓࡊࡉࡎࡋࡇ ࡋࡏࡅࡑࡈࡅࡍࡀ ࡄࡉࡅࡉࡀ ࡔࡅࡌࡇ ࡅࡄࡅࡍࡐࡀࡍࡉࡀ ࡄࡅࡐࡍࡉࡀ ࡀࡍࡃࡀࡔࡀࡕࡀ ࡅࡐࡋࡅࡂࡉࡀ ࡅࡄࡅࡔࡁࡉࡀ
180 ࡁࡉࡔࡉࡀ ࡄࡉࡍࡅࡍ ࡅࡌࡀࡂࡆࡉࡓࡀࡍࡉࡀ ࡓࡀࡆࡀ ࡖࡐࡀࡓࡆࡋࡀ ࡄࡅ ࡅࡊࡀࡃࡀࡁࡀ ࡄࡅ ࡊࡅࡋࡌࡀࡍ ࡖࡍࡀࡐࡉࡋ ࡏࡋࡇ ࡋࡁࡉࡕ ࡄࡉࡉࡀ ࡋࡀࡌࡉࡕࡀࡊࡔࡀࡓ ࡖࡄࡅ ࡈࡍࡅࡐࡉࡀ ࡓࡁࡀ
181 ࡒࡀࡃࡉࡔࡀ ࡖࡉࡀࡒࡉࡃ ࡁࡋࡉࡋࡁࡉࡀ ࡖࡁࡍࡉࡀ ࡀࡍࡀࡔࡉࡀ ࡖࡄࡅ ࡓࡀࡆࡀ ࡓࡀࡕࡀ ࡔࡅࡌࡇ ࡅࡓࡀࡆࡀ ࡖࡌࡀࡓࡁࡀ ࡌࡉࡕࡉࡒࡓࡉࡀ ࡊࡅࡋࡌࡀࡍ ࡖࡈࡀࡓࡉࡁ ࡌࡉࡍࡇ
182 ࡌࡉࡕࡀࡂࡆࡀࡓ ࡅࡏࡕࡀࡂࡆࡀࡓ ࡀࡌࡉࡍࡈࡅࡋ ࡖࡀࡂࡆࡀࡓࡕࡀ ࡂࡆࡅࡓࡕࡀ ࡄࡏ ࡊࡅࡋࡌࡀࡍ ࡖࡀࡃࡉࡍࡒࡉࡀ ࡖࡍࡉࡒࡓࡉࡀ ࡀࡂࡆࡀࡓࡕࡀ ࡁࡄࡀࡁࡀࡓࡀ ࡌࡍ ࡍࡄࡅࡓࡀ ࡔࡀࡍࡉࡀ
183 ࡍࡉࡕࡀࡂࡆࡀࡓ ࡀࡌࡉࡍࡈࡅࡋ ࡖࡀࡂࡆࡀࡓࡕࡀ ࡂࡆࡅࡓࡕࡀ ࡄࡏ ⊚ ࡕࡅࡌ ࡀࡌࡓࡉࡕࡅࡍ ࡏࡋࡊࡅࡍ ࡅࡃࡉࡋࡊࡅࡍ ࡄࡉࡉࡀ ࡁࡉࡌࡀࡍࡃࡀ ࡅࡈࡀࡓࡉࡀࡍࡀ ࡅࡐࡀࡎࡉࡌࡊࡀ ࡀࡌࡓࡉࡕࡅࡍ
184 ࡄࡉࡍࡅࡍ ࡏࡅࡑࡈࡅࡍࡀ ࡄࡉࡍࡅࡍ ࡅࡋࡉࡂࡓࡉࡀ ࡅࡏࡃࡉࡀ ࡅࡋࡉࡔࡀࡍࡀ ࡏࡋࡊࡅࡍ ࡋࡉࡂࡓࡉࡀ ࡄࡉࡍࡅࡍ ࡅࡃࡉࡋࡊࡅࡍ ࡏࡃࡉࡀ ࡅࡄࡉࡉࡀ ࡋࡉࡔࡀࡍࡀ ࡄࡅ ࡀࡌࡉࡍࡈࡅࡋ ࡖࡖࡊࡅࡋࡌࡀࡍ ࡖࡌࡀࡌࡋࡀࡋࡀ
185 ࡋࡉࡕࡋࡇ ࡋࡀࡅ ࡌࡍ ࡄࡉࡉࡀ ࡌࡉࡕࡋࡉࡐ ࡖࡋࡔࡀࡁࡅࡄࡉࡀ ࡋࡉࡀࡒࡅࡓࡉࡀ ࡋࡓࡀࡓࡅࡁࡉࡀ ࡋࡁࡀࡓࡅࡊࡉࡀ ࡀࡓࡁࡉࡀ ࡆࡀࡅࡉࡀࡕࡀ ࡄࡉࡍࡅࡍ ࡏࡅࡃࡍࡉࡀ ࡖࡊࡀࡁࡃࡀ ࡖࡄࡀࡃ
186 ࡌࡀࡔࡒࡉࡋࡇ ࡆࡌࡀ ࡋࡉࡀࡌࡉࡍࡇ ࡅࡄࡀࡃ ࡌࡀࡔࡒࡉࡋࡇ ࡌࡉࡓࡕࡀ ࡋࡎࡌࡀࡋࡇ ࡅࡄࡀࡃ ࡌࡀࡔࡒࡉࡋࡇ ࡌࡉࡀ ࡋࡊࡅࡋࡉࡀࡕࡀ ࡅࡄࡀࡃ ࡌࡀࡔࡒࡉࡋࡇ ࡌࡉࡀ
187 ࡈࡀࡁࡀ ࡋࡌࡅࡒࡓࡀ ࡅࡗ ࡒࡀࡓࡉࡕࡅࡍ ࡅࡌࡀࡈࡉࡕࡅࡍ ࡅࡀࡌࡓࡉࡕࡅࡍ ࡋࡕࡀࡅࡓࡏࡉࡋ ࡏࡅࡕࡓࡀ ࡖࡔࡓࡉࡀ ࡋࡊࡉࡎࡉࡀ ࡖࡌࡉࡀ ࡖࡌࡍ ࡄࡉࡑࡓࡀ ࡖࡉࡀࡌࡉࡍࡇ
188 ࡂࡈࡀ ࡅࡍࡐࡀࡋ ࡖࡄࡅࡀ ࡁࡕࡉࡁࡉࡋ ࡄࡅࡀ ࡀࡊࡋࡀ ࡁࡀࡋࡌࡉࡀ ࡖࡔࡉࡒࡓࡀ ࡕࡀࡅࡓࡏࡉࡋ ࡄࡀࡍࡀࡕࡇ ࡍࡀࡅࡓࡀ ࡖࡀࡕࡅࡕࡉࡀ ࡉࡀࡓࡃࡍࡀ ࡌࡉࡕࡀࡄࡅࡉࡀ ࡖࡄࡅ ࡉࡀࡓࡃࡍࡀ
189 ࡂࡀࡅࡀࡉࡀ ࡄࡅ ࡅࡗ ࡌࡀࡃࡉࡒ ࡏࡍࡉࡔ ࡁࡉࡀࡓࡃࡍࡀ ࡋࡊࡅࡋ ࡌࡉࡍࡃࡀࡌ ࡄࡀࡆࡉࡋࡇ ࡖࡔࡓࡉࡀ ࡋࡊࡉࡎࡉࡀ ࡖࡌࡉࡀ ࡓࡅࡔࡅࡌࡀ ࡖࡔࡊࡉࡁ ࡁࡉࡀࡓࡃࡍࡀ ࡄࡅ
190 ࡁࡏࡅࡑࡈࡅࡍࡀ ࡅࡄࡀࡉࡌࡀࡍࡅࡕࡀ ࡄࡅ ࡌࡍ ࡄࡉࡑࡓࡀ ࡖࡉࡀࡌࡉࡍࡇ ࡖࡌࡍ ࡏࡎࡉࡒࡕࡀ ࡖࡔࡅࡌ ࡉࡀࡅࡀࡓ ࡄࡏ ࡁࡏࡅࡑࡈࡅࡍࡀ ࡕࡋࡀࡕ ࡈࡅࡐࡓࡉࡀ ࡖࡏࡋࡉࡀࡍࡀ
191 ࡏࡎࡉࡒࡕࡀ ࡓࡉࡔࡀࡉࡕࡀ ࡄࡉࡑࡓࡀ ࡄࡉࡍࡅࡍ ࡂࡈࡀ ࡍࡐࡀࡋ ࡄࡅࡀ ࡁࡕࡉࡁࡉࡋ ࡂࡈࡀ ࡏࡔ ࡄࡅ ࡍࡐࡀࡋ ࡌࡉࡓࡕࡀ ࡄࡏ ࡕࡉࡄࡅࡀ ࡀࡈࡀࡐࡀ ࡖࡀࡈࡉࡐ ࡏࡅࡑࡈࡅࡍࡀ
192 ࡓࡀࡆࡀ ࡖࡌࡉࡍࡇ ࡔࡀࡂࡉࡀ ࡄࡅ ࡁࡕࡉࡁࡉࡋ ࡏࡅࡑࡈࡅࡍࡀ ࡄࡅ ࡅࡄࡅࡀ ࡀࡊࡋࡀ ࡄࡅࡀ ࡒࡍࡀࡎࡀ ࡄࡅ ࡄࡅ ࡌࡅࡕࡀ ⊚ ࡁࡀࡋࡌࡀ ࡖࡔࡉࡒࡓࡀ ࡃࡀࡅࡓࡀ ࡖࡔࡉࡁࡉࡀࡄࡉࡀ
193 ࡖࡋࡀࡍࡉࡔࡋࡅࡍ ࡍࡉࡔࡌࡀࡕࡀ ࡖࡎࡉࡐࡀ ࡅࡌࡅࡕࡀ ࡍࡉࡕࡉࡒࡓࡉࡀ ࡅࡍࡉࡔࡕࡀࡋࡀࡌ ⊚ ࡅࡗ ࡑࡉࡄࡉࡅࡍ ࡅࡐࡀࡓࡃࡅࡍ ࡅࡊࡀࡍࡐࡅࡍ ࡀࡌࡓࡉࡕࡅࡍ ࡋࡕࡋࡀࡕࡀ ࡀࡋࡌࡉࡀ ࡖࡄࡀࡁࡀࡓࡀ
194 ࡋࡀࡍࡉࡎࡉࡁࡋࡅࡍ ࡏࡃࡊࡀࡓࡕࡅࡍ ࡖࡄࡉࡍࡅࡍ ࡓࡅࡔࡅࡌࡀ ࡖࡀࡕࡅࡕࡉࡀ ࡌࡀࡓࡂࡍࡀ ࡄࡉࡍࡅࡍ ࡔࡅࡓࡀ ࡅࡄࡀࡃࡉࡀ ࡖࡉࡀࡌࡉࡍࡀ ࡅࡄࡀࡃࡉࡀ ࡖࡎࡌࡀࡋࡀ ࡄࡉࡍࡅࡍ ࡀࡌࡉࡍࡈࡅࡋ ࡖ
195 ࡑࡉࡄࡉࡅࡍ ࡔࡅࡓࡀ ࡄࡅ ࡅࡌࡉࡍࡃࡀࡌ ࡁࡂࡀࡅࡀ ࡋࡀࡌࡀࡔࡊࡉࡕ ࡋࡏࡊࡉࡋࡕࡀ ࡅࡌࡀࡔࡒࡉࡕࡀ ࡅࡐࡀࡓࡃࡅࡍ ࡄࡀࡃࡉࡀ ࡖࡉࡀࡌࡉࡍࡀ ࡄࡅ ࡖࡉࡀࡍࡒࡀ ࡏࡊࡉࡋࡕࡀ ࡌࡉࡍࡇ ࡀࡊࡉࡋ
196 ࡅࡊࡀࡍࡐࡅࡍ ࡄࡀࡃࡉࡀ ࡖࡎࡌࡀࡋࡀ ࡖࡌࡉࡀ ࡌࡀࡔࡒࡉࡋࡅࡍ ࡅࡌࡉࡍࡇ ࡋࡀࡍࡀࡄࡉࡕ ࡋࡎࡌࡀࡋࡀ ࡋࡀࡌࡀࡓࡁࡉࡊ ࡀࡋࡌࡀ⊚ ࡅࡗ ࡁࡋࡉࡂࡓࡉࡀ ࡅࡆࡀࡊࡉࡀ ࡅࡒࡀࡉࡌࡀ ࡀࡌࡓࡉࡕࡅࡍ
197 ࡋࡄࡀࡌࡀ ࡅࡌࡉࡀ ࡋࡓࡅࡄࡀ ࡅࡍࡉࡔࡉࡌࡕࡀ ࡉࡀࡄࡀࡁࡕࡅࡍ ࡀࡎࡉࡀ ⊚ ࡅࡗ ࡋࡀࡅࡐࡀ ࡖࡄࡉࡉࡀ ࡀࡌࡓࡉࡕࡅࡍ ࡖࡌࡉࡔࡒࡀࡋ ࡀࡉࡍࡉࡀ ࡅࡃࡄࡀ ࡍࡎࡀࡁࡕࡅࡍࡇ ࡅࡌࡉࡍࡇ ࡖࡍࡉࡔࡉࡌࡕࡀ
198 ࡀࡎࡀࡓࡕࡅࡍࡀ ⊚ ࡅࡗ ࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡊࡀࡃࡐࡉࡀ ࡅࡃࡓࡀࡉࡉࡀ ࡀࡌࡓࡉࡕࡅࡍ ࡋࡄࡀࡌࡔࡀ ࡂ{{ࡅࡀ}}ࡀࡃࡉࡀ ࡖࡁࡍࡉࡔࡉࡌࡕࡀ ࡕࡓࡀࡑࡕࡅࡍࡅࡍ ࡖࡄࡉࡍࡅࡍ ࡀࡓࡒࡀ
199 ࡅࡏࡔࡅࡌࡉࡀ ࡅࡆࡉࡒࡀ ࡅࡍࡅࡓࡀ ࡅࡌࡉࡀ ࡅࡏࡅࡑࡈࡅࡍࡀ ࡅࡊࡀࡓࡎࡀ ࡅࡂࡀࡍࡁࡀ ࡅࡂࡅࡀࡓࡀ ࡅࡓࡉࡔࡉࡇ ࡅࡃࡉࡍࡁࡇ ࡄࡉࡍࡅࡍ ࡂࡀࡍࡁࡀ ࡀࡓࡒࡀ ࡄࡏ ࡅࡓࡒࡉࡄࡀ ࡊࡀࡓࡎࡀ ࡄࡏ
200 ࡁࡂࡅࡀࡓࡀ ࡆࡉࡒࡀ ࡄࡅ ࡓࡉࡔࡀ ࡌࡉࡀ ࡅࡌࡉࡀ ࡄࡉࡍࡅࡍ ࡃࡉࡍࡁࡀ ࡍࡅࡓࡀ ࡄࡏ ࡁࡓࡀࡆࡀ ࡁࡂࡅࡍࡂࡉࡀ ࡔࡊࡉࡍࡀ ࡖࡌࡀࡕࡓࡀࡋࡅࡍ ࡋࡓࡀࡆࡉࡀ ࡖࡂࡀࡁࡀࡓࡅࡕࡀ ࡌࡀࡄࡌࡀࡋࡅࡍ
201 ⊚ ࡅࡗ ࡕࡉࡊࡐࡀࡓ ࡅࡕࡉࡔࡒࡀࡋ ࡀࡌࡓࡉࡕࡅࡍ ࡅࡀࡌࡓࡉࡕࡅࡍ ࡌࡀࡑࡁࡅࡕࡀ ࡅࡌࡀࡎࡉࡒࡕࡀ ࡁࡓࡅࡄࡀ ࡅࡍࡉࡔࡉࡌࡕࡀ ࡅࡔࡀࡋࡉࡌࡕࡅࡍ ⊚ ࡅࡗ ࡕࡉࡄࡅࡉࡋࡅࡍ ࡀࡎࡅࡕࡀ ࡖࡄࡉࡉࡀ
202 ࡊࡋࡉࡋࡀ ࡓࡀࡅࡆࡀ ࡋࡍࡉࡔࡉࡌࡕࡀ ࡕࡓࡀࡑࡋࡇ ࡏࡕࡀࡎࡉࡀࡕ ࡌࡍ ࡌࡉࡄࡉࡀࡕࡀ ࡖࡔࡅࡁࡀ ࡌࡉࡄࡉࡅ ⊚ ࡅࡗ ࡍࡀࡎࡁࡉࡕ ࡅࡀࡌࡓࡉࡕ ࡎࡀࡂࡉࡃࡍࡀ ࡅࡔࡀࡄࡀࡁࡀࡍࡀ
203 ࡅࡌࡔࡀࡁࡀࡍࡀ ࡋࡄࡀࡊ ࡌࡀࡍࡀ ࡓࡁࡀ ࡊࡀࡎࡉࡀ ࡒࡀࡃࡌࡀࡉࡀ ࡃࡍࡅࡕࡀ ࡋࡃࡉࡋࡉࡀ ࡌࡀࡓࡀ ࡖࡓࡀࡁࡅࡕࡀ ࡉࡀࡄࡀࡁࡕࡅࡍ ࡅࡐࡉࡄࡕࡀ ࡖࡋࡉࡀࡌࡉࡍࡀࡊ ࡊࡅࡋࡄࡅࡍ ࡓࡀࡆࡉࡀ ࡅࡌࡀࡋࡊࡉࡀ
204 ࡁࡂࡀࡅࡇ ࡅࡔࡀࡁࡀࡕࡇ ࡋࡉࡀࡅࡀࡓ ࡆࡉࡅࡀ ࡉࡅࡊࡀࡁࡀࡓ ࡄࡅ ⊚ ࡎࡀࡂࡉࡃࡍࡀ ࡔࡀࡄࡀࡁࡀࡍࡀ ࡋࡄࡀࡊ ࡔࡅࡕࡀ ࡊࡀࡎࡉࡕࡀ ࡔࡀࡓࡀࡕ ࡀࡍࡀࡍࡀ ࡄࡏ ⊚ ࡎࡉࡂࡃࡉࡕ
205 ࡅࡔࡀࡁࡀࡕࡇ ࡋࡏࡅࡑࡀࡓ ࡖࡐࡕࡀ ࡐࡉࡄࡕࡀ ࡁࡊࡉࡎࡉࡀ ࡌࡀࡍࡃࡀ ࡖࡄࡉࡉࡀ ࡄࡅ ⊚ [
206 ࡎࡉࡂࡃࡉࡕ ࡅࡔࡀࡁࡀࡕࡇ ࡋࡏࡅࡑࡀࡓ ࡍࡄࡅࡓ ࡉࡀࡅࡀࡓ ࡓࡁࡀ ࡖࡄࡉࡉࡀ ࡄࡅ ࡉࡅࡔࡀࡌࡉࡍ ࡃࡀࡊࡉࡀ ࡅࡎࡀࡌ ࡎࡌࡉࡓ ࡄࡅ ⊚ ࡎࡀࡂࡉࡃࡍࡀ ࡅࡔࡀࡄࡀࡁࡀࡍࡀ ࡅࡌࡔࡀࡁࡀࡍࡀ
207 ࡋࡄࡀࡊ ࡔࡅࡕࡀ ࡊࡀࡎࡉࡕࡀ ࡒࡀࡃࡌࡀࡉࡕࡀ ࡀࡉࡍࡀ ࡓࡀࡁࡕࡉࡀ ࡒࡀࡃࡌࡀࡉࡕࡀ ࡀࡋࡌࡉࡀ ࡌࡉࡍࡇ ࡏࡑࡈࡀࡓࡀࡓ ࡄࡏ ⊚ ࡌࡒࡀࡉࡌࡉࡕࡅࡍ ࡄࡉࡉࡀ ࡒࡀࡃࡌࡀࡉࡉࡀ
208 ࡖࡏࡍࡉࡔ ࡒࡅࡃࡀࡌࡀࡉࡊࡅࡍ ࡋࡀࡄࡅࡀ ࡆࡉࡅࡀ ࡅࡍࡄࡅࡓࡀ ࡄࡉࡍࡅࡍ ࡅࡕࡀࡓࡕࡉࡍ ࡀࡉࡍࡉࡀ ࡖࡌࡀࡆࡓࡅࡕࡀ ࡄࡉࡍࡅࡍ ⊚ ࡄࡀࡋࡉࡍ ࡕࡌࡀࡍࡉࡀ ࡁࡀࡅࡀࡕࡀ ࡕࡌࡀࡍࡉࡀ ࡕࡀࡓࡌࡉࡃࡉࡀ
209 ࡄࡉࡍࡅࡍ ⊚ ࡕࡌࡀࡍࡉࡀ ࡁࡀࡁࡉࡀ ࡖࡌࡀࡃࡍࡉࡀ ࡄࡉࡍࡅࡍ ࡖࡄࡉࡍࡉࡍ ࡕࡀࡁࡓࡉࡀ ࡕࡌࡀࡍࡉࡀ ࡌࡁࡀࡊࡋࡀࡅࡀࡕࡀ ࡖࡄࡔࡅࡊࡀ ࡄࡉࡍࡅࡍ ⊚ ࡗ ࡀࡌࡓࡉࡕࡅࡍ ࡁࡉࡓࡉࡀࡅࡉࡔ ࡊࡀࡍࡀ
210 ࡖࡌࡉࡀ ࡄࡉࡉࡀ ࡍࡁࡀࡈ ࡍࡉࡁࡈࡀ ࡒࡀࡃࡌࡀࡉࡀ ࡄࡉࡌࡕࡀ ࡖࡔࡓࡅࡍ ࡓࡀࡆࡀ ࡖࡋࡄࡃࡀࡃࡉࡀ ࡋࡄࡅࡓࡉࡍࡀ ࡏࡎࡕࡀࡓࡉࡊࡁࡇ ࡅࡁࡀࡔࡒࡓࡇ {{⊚}} ࡋࡔࡅࡌࡇ ࡅࡋࡍࡀࡐࡔࡉࡇ
211 ࡀࡎࡉࡒ ࡀࡌࡉࡍࡈࡅࡋ ࡖࡆࡄࡀࡓࡀ ࡖࡁࡉࡓࡉࡀࡅࡉࡔ ࡊࡀࡍࡀ ࡖࡌࡉࡀ ࡄࡉࡉࡀ ࡔࡅࡌࡇ ࡄࡅ ⊚ ࡅࡗ ࡀࡌࡓࡉࡕࡅࡍ ࡔࡅࡌࡀࡊ ࡉࡀࡕࡉࡓ ࡄࡉࡉࡀ ࡍࡉࡔࡉࡌࡕࡀ ࡕࡋࡀࡕࡀ
212 ࡓࡅࡔࡅࡌࡉࡀ ࡏࡕࡓࡉࡔࡌࡀࡕ ࡀࡌࡉࡍࡈࡅࡋ ࡖࡍࡉࡐࡒࡀࡕ ࡌࡍ ࡄࡔࡅࡊࡀ ࡋࡍࡄࡅࡓࡀ ࡅࡌࡍ ࡁࡉࡔࡀ ࡋࡈࡀࡁࡀ ࡅࡌࡍ ࡌࡅࡕࡀ ࡋࡄࡉࡉࡀ ࡄࡉࡍࡅࡍ ࡅࡄࡉࡍࡅࡍ ࡖࡌ^ࡉࡕ^ࡓࡉࡔࡌࡉࡀ
213 ࡀࡁࡀࡕࡀࡓ ࡔࡅࡌࡀ ࡀࡌࡉࡍࡈࡅࡋ ࡖࡏࡕࡀࡓࡀࡁ ࡌࡉࡀ ࡁࡄࡀࡌࡓࡀ ࡌࡀࡆࡀࡓࡅࡕࡀ ࡅࡆࡌࡀ ࡖࡄࡃࡀࡃࡉࡀ ࡕࡓࡉࡁ ࡄࡉࡍࡅࡍ ⊚ ࡅࡗ ࡌࡀࡕࡍࡉࡕࡅࡋࡇ ࡋࡄࡀࡋࡉࡍ ࡓࡀࡆࡉࡀ
214 ࡅࡊࡋࡉࡋࡀ ࡍࡀࡎࡁࡉࡕࡅࡍ ࡅࡀࡌࡓࡉࡕࡅࡍ ࡁࡔࡅࡌࡀ ࡖࡄࡉࡉࡀ ࡍࡄࡀࡓ ࡍࡄࡅࡓࡀ ࡍࡄࡀࡓ ࡍࡄࡅࡓࡀ ࡍࡄࡀࡓ ࡍࡄࡅࡓࡀ ࡄࡀࡋࡉࡍ ࡕࡌࡀࡍࡉࡀ ࡐࡅࡂࡃࡀࡌࡉࡀ ࡍࡀࡈࡓࡉࡀ ࡖࡄࡀࡋࡉࡍ
215 ࡕࡌࡀࡍࡉࡀ ࡍࡉࡁࡆࡉࡀ ࡄࡉࡍࡅࡍ ⊚ ࡅࡗ ࡆࡄࡉࡓࡀ ࡅࡌࡆࡀࡄࡓࡀ ࡄࡀࡕࡀࡌ ࡀࡌࡓࡉࡕࡅࡍ ࡅࡍࡀࡈࡓࡉࡀ ࡕࡓࡉࡍ ࡖࡌࡍ ࡁࡉࡓࡉࡀࡅࡉࡔ ࡅࡔࡅࡌࡀࡊ ࡉࡀࡕࡉࡓ ࡄࡉࡉࡀ ࡋࡅࡀࡕࡅࡍ
216 ࡖࡄࡉࡍࡅࡍ ࡅࡗ ࡊࡋࡉࡋࡀ ࡁࡓࡀࡆࡉࡀ ࡄࡉࡍࡅࡍ ࡓࡅࡄࡀ ࡅࡍࡉࡔࡉࡌࡕࡀ ࡋࡅࡀࡕࡅࡍ ࡋࡔࡊࡉࡍࡀࡕࡀ ࡖࡀࡁࡀࡕࡅࡓ ࡐࡀࡂࡓࡀ ࡄࡉࡍࡅࡍ ࡅࡏࡅࡑࡈࡅࡍࡀ ࡄࡀࡊࡀ ࡁࡂࡀࡅࡇ ࡀࡉࡋࡇ
217 ࡀࡁࡀࡕࡀࡓ ࡖࡌࡍ ࡄࡀࡊࡀ ࡍࡀࡐࡒࡀ ⊚ ࡅࡗ ࡌࡉࡔࡀ ࡍࡀࡎࡁࡉࡕࡅࡍ ࡅࡀࡎࡂࡉࡀ ࡌࡀࡍࡃࡀ ࡖࡄࡉࡉࡀ ࡋࡊࡅࡊࡁࡉࡀ ࡅࡄࡉࡆࡅࡇ ࡀࡉࡍࡉࡀ ࡅࡌࡀࡄࡆࡉࡕࡀ ࡏࡅࡊࡌࡀ ࡅࡆࡀࡐࡉࡀ [
218 ࡅࡕࡉࡌࡓࡉࡀ ࡅࡄࡉࡅࡓࡀ ࡄࡉࡍࡅࡍ ࡌࡀࡍࡃࡀ ࡖࡄࡉࡉࡀ ࡄࡀࡍࡀࡕࡇ ࡔࡅࡔࡌࡀ ࡄࡉࡅࡀࡓࡀ ࡖࡁࡂࡀࡅࡀࡉࡅࡍ ࡉࡀࡒࡉࡃ⊚ ࡅࡗ ࡉࡀࡕࡁࡉࡕࡅࡍ ࡅࡀࡌࡓࡉࡕࡅࡍ ࡋࡀࡅࡐࡀ
219 ࡅࡓࡅࡀࡄࡀ ࡖࡄࡉࡉࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡄࡀࡆࡀ ࡍࡉࡔࡉࡌࡕࡀ ࡖࡐࡋࡀࡍ ࡁࡓ ࡐࡋࡀࡍࡉࡕࡀ ࡖࡄࡀࡆࡀ ࡌࡀࡎࡉࡒࡕࡀ ࡁࡔࡅࡌࡀ ࡖࡄࡉࡉࡀ
220 ࡍࡅࡊࡓࡀࡉࡉࡀ ࡄࡀࡆࡉࡍ ࡆࡉࡅࡀ ࡅࡍࡄࡅࡓ ࡄࡉࡉࡀ ࡌࡉࡐࡀࡒ ࡓࡅࡄࡀ ࡅࡍࡉࡔࡉࡌࡕࡀ ࡌࡍ ࡐࡀࡂࡓࡀ ࡎࡓࡉࡍ ࡅࡀࡓࡁࡀ ࡓࡀࡆࡉࡀ ࡖࡐࡀࡂࡓࡀ ࡀࡉࡕࡉࡍࡅࡍ ࡃࡊࡀࡓࡕࡉࡍࡅࡍ
221 ࡖࡄࡉࡍࡅࡍ ࡕࡓࡉࡎࡀࡓ ࡂࡉࡈࡓࡉࡀ ࡅࡔࡅࡁࡀ ࡁࡀࡁࡉࡀ ࡅࡄࡀࡌࡔࡀ ࡄࡀࡕࡌࡉࡀ ࡄࡉࡍࡅࡍ ࡆࡅࡓࡐࡉࡍࡉࡀ ࡖࡐࡒࡅࡕࡀ ࡋࡀࡅࡐࡀ ࡖࡋࡒࡉࡍࡀ ࡒࡀࡃࡌࡀࡉࡕࡀ [
222 ࡌࡀࡃࡊࡀࡓ ࡔࡅࡌࡀ ࡄࡅ ⊚ ࡅࡓࡅࡀࡄࡀ ࡆࡅࡓࡐࡉࡍࡉࡀ ࡖࡂࡁࡇ ࡖࡌࡀࡎࡀ ࡅࡕࡋࡉࡕࡀࡉࡀ ࡉࡀࡑࡉࡋࡀ ࡅࡀࡓࡁࡉࡀࡉࡀ ࡅࡐࡀࡎࡀࡍࡉࡀࡕࡀ ࡖࡏࡃࡉࡀ ࡄࡅ ࡅࡄࡀࡌࡔࡉࡀࡉࡀ
223 ࡏࡂࡁࡀ ࡖࡑࡁࡀࡕࡀ ࡅࡔࡉࡕࡀࡉࡀ ࡂࡉࡈࡓࡉࡀ ࡖࡐࡀࡋࡂࡀ ࡖࡑࡁࡀࡕࡀ ࡄࡅ ࡅࡔࡅࡁࡀࡉࡀ ࡂࡉࡈࡓࡉࡀ ࡖࡓࡉࡔࡀ ࡖࡑࡁࡀࡕࡀ ࡄࡉࡍࡅࡍ ⊚ ࡅࡕࡌࡀࡍࡀࡉࡀ ࡂࡉࡈࡓࡉࡀ
224 ࡅࡊࡀࡅࡐࡀ ࡖࡐࡒࡅࡕࡀ ࡄࡅ ⊚ ࡕࡔࡀࡉࡀࡉࡀ ࡊࡀࡅࡐࡉࡀ ࡖࡁࡅࡓࡊࡉࡀ ࡄࡅ ⊚ ࡅࡀࡎࡓࡉࡀࡉࡀ ࡂࡉࡈࡓࡉࡀ ࡖࡌࡅࡆࡀ ࡖࡋࡉࡂࡓࡉࡀ ࡄࡅ ࡖࡊࡀࡉࡉࡐ ࡋࡉࡂࡓࡉࡀ ࡅࡐࡀࡔࡉࡈ ⊚
225 ࡅࡄࡃࡉࡎࡀࡓࡀࡉࡀ ࡂࡉࡈࡓࡉࡀ ࡖࡂࡁࡇ ࡖࡑࡁࡀࡕࡀ ࡖࡋࡉࡂࡓࡉࡀ ⊚ ࡅࡕࡓࡉࡎࡀࡓࡀࡉࡀ ࡂࡉࡈࡓࡉࡀ ࡓࡉࡔࡀࡉࡉࡀ ࡖࡋࡉࡂࡓࡉࡀ ࡄࡉࡍࡅࡍ⊚ ࡄࡀࡋࡉࡍ ࡔࡅࡁࡀ ࡄࡅࡓࡉࡍࡉࡀ
226 ࡔࡅࡁࡀ ࡁࡀࡁࡉࡀ ࡖࡁࡓࡉࡔࡀ ࡔࡓࡉࡍ ࡖࡄࡉࡍࡅࡍ ࡁࡌࡀ ࡓࡁࡀ ࡄࡏ ࡅࡁࡀࡉࡍࡀ ࡖࡉࡀࡌࡉࡍࡀ ࡅࡁࡉࡀ ࡓࡁࡀ ࡀࡉࡍࡀ ࡖࡎࡌࡀࡋࡀ ࡄࡅ ⊚ ࡅࡁࡀࡆ ࡓࡁࡀ ࡏࡅࡃࡍࡀ ࡖ
227 ࡉࡀࡌࡉࡍࡀ ࡄࡏ ࡅࡁࡀࡆࡉࡆ ࡓࡁࡀ ࡏࡅࡃࡍࡀ ࡖࡎࡌࡀࡋࡀ ࡅࡁࡀࡎ ࡓࡁࡀ ࡁࡀࡁࡀ ࡖࡍࡄࡉࡓࡀ ࡖࡉࡀࡌࡉࡍࡀ ࡄࡏ ࡅࡁࡀࡎࡉࡍ ࡓࡁࡀ ࡁࡀࡁࡀ ࡖࡍࡄࡉࡓࡀ ࡖ
228 ࡎࡌࡀࡋࡀ ࡄࡏ ࡅࡁࡀࡎ ࡉࡀࡌࡀ ࡐࡅࡌࡀ ࡄࡅ ࡅࡄࡅ ࡉࡀࡌࡀ ࡖࡊࡔࡀࡔࡀ ࡅࡌࡔࡀࡔࡀ ࡋࡉࡕࡁࡇ ࡄࡅ ⊚ ࡅࡄࡀࡋࡉࡍ ࡄࡀࡌࡔࡀ ࡄࡅࡓࡉࡍࡉࡀ ࡄࡀࡍࡀࡕࡇ ࡔࡅࡌࡀࡉࡉࡍ
229 ࡃࡊࡀࡓࡍࡉࡍ ࡄࡉࡍࡅࡍ ⊚ ࡅࡗ ࡕࡋࡀࡕ ࡀࡃࡉࡀࡕࡀ ࡌࡀࡃࡉࡕ ࡅࡀࡌࡓࡉࡕ ࡋࡄࡀࡋࡉࡍ ࡕࡋࡀࡕࡀ ࡐࡀࡈࡉࡓࡉࡀ ࡔࡀࡅࡉࡕࡉࡍࡅࡍ ࡗ ࡏࡑࡈࡁࡅࡍ ࡗ ࡁࡌࡀ ࡖࡁࡇ
230 ࡓࡔࡀࡌࡕࡅࡍ ࡋࡐࡌࡇ ࡒࡀࡃࡌࡀࡉࡀ ࡄࡕࡀࡌࡕࡅࡍ ࡅࡓࡀࡁࡀࡉࡕࡀ ࡋࡊࡅࡋࡄࡅࡍ ࡔࡀࡅࡉࡕࡅࡍ ࡅࡗ ࡋࡁࡉࡕ ࡀࡁࡀࡕࡅࡓ ࡓࡀࡔࡌࡉࡕࡅࡍ ࡋࡔࡀࡁࡉࡌࡀ ࡅࡎࡓࡉࡍ ࡓࡀࡆࡉࡀ
231 ࡖࡏࡅࡑࡈࡅࡍࡀ ࡊࡅࡋࡄࡅࡍ ࡓࡔࡀࡌࡕࡉࡍࡅࡍ ࡕࡋࡀࡕࡌࡀ ࡅࡔࡉࡕࡉࡍ ࡖࡍࡄࡅࡓࡀ ࡅࡕࡋࡀࡕࡌࡀ ࡅࡔࡉࡕࡉࡍ ࡖࡄࡔࡅࡊࡀ ࡅࡋࡁࡅࡔࡀ ࡖࡆࡉࡅࡀ ࡀࡋࡁࡉࡔࡕࡅ ࡋࡍࡉࡔࡉࡌࡕࡀ {{ࡅࡍࡄࡅࡓࡀ}}
232 ࡅࡍࡄࡅࡓࡀ ࡉࡀࡒࡓࡀ ࡋࡓࡅࡄࡀ ࡐࡓࡀࡎࡕࡅ ࡅࡗ ࡀࡌࡓࡉࡕࡅࡍ ࡀࡆࡋࡀࡕ {{ࡓࡅࡄࡀ}} ࡅࡌࡀࡈࡀࡕ ࡌࡀࡈࡀࡓࡕࡀ ࡖࡀࡓࡁࡀ ࡂࡅࡁࡓࡉࡀ ࡁࡍࡉࡀ ࡔࡋࡀࡌࡀ ࡀࡓࡁࡀ ࡊࡅࡔࡈࡉࡀ
233 ࡖࡏࡔࡕࡀࡋࡀࡌࡁࡇ ࡋࡓࡅࡄࡀ ࡅࡍࡉࡔࡉࡌࡕࡀ ࡊࡅࡔࡈࡀ ࡖࡉࡀࡓࡃࡍࡀ ࡅࡊࡅࡔࡈࡀ ࡖࡌࡉࡔࡀ ࡅࡊࡅࡔࡈࡀ ࡖࡐࡉࡄࡕࡀ ࡅࡊࡅࡔࡈࡀ ࡖࡎࡀࡉࡀࡊࡕࡀ ࡖࡋࡀࡉࡉࡕ ࡋࡁࡓ
234 ࡌࡉࡍࡀࡉࡄࡅࡍ ⊚ ࡅࡗ ࡀࡌࡓࡉࡕ ࡀࡆࡋࡀࡕ ࡓࡅࡄࡀ ࡖࡐࡋࡀࡍ ࡅࡄࡅࡀࡕ ࡗ ࡆࡀࡍ ࡍࡉࡔࡉࡌࡕࡀ ࡌࡉࡀ ࡅࡄࡀࡌࡓࡀ ࡋࡅࡀࡕ ࡄࡃࡀࡃࡉࡀ ࡀࡓࡉࡁࡕ ࡄࡀࡍࡀࡕࡇ
235 ࡈࡀࡁࡀࡄࡀࡕࡀ ࡖࡌࡍ ࡌࡀࡎࡉࡒࡕࡀ ࡏࡔࡕࡀࡋࡌࡀࡕ ⊚ ࡗ ࡌࡀࡃࡉࡕ ࡕࡋࡀࡕ ࡀࡃࡉࡀࡕࡀ ࡋࡐࡀࡈࡉࡓࡀ ࡅࡋࡄࡀࡍࡀࡕࡅࡍ ࡕࡋࡀࡕࡀ ࡐࡀࡈࡉࡓࡉࡀ ࡑࡁࡉࡕࡉࡍࡅࡍ ࡅࡃࡀࡊࡉࡕࡉࡍࡅࡍ
236 ⊚ ࡅࡗ ࡀࡔࡀࡓ ࡑࡁࡀࡍ ࡑࡀࡁࡅࡄࡀ ࡀࡌࡓࡉࡕ ࡒࡀࡉࡉࡌࡕࡉࡍࡅࡍ ࡅࡒࡀࡉࡀࡌࡕࡀ ࡋࡌࡀࡑࡁࡅࡕࡀࡉࡄࡅࡍ ⊚ {{ࡅࡗ ࡑࡁࡉࡍࡀ ࡁࡔࡅࡌࡀ ࡖࡄࡉࡉࡀ ࡀࡌࡓࡉࡕࡅࡍ ࡓࡅࡔࡅࡌࡀ}}
237 ^ࡅࡗ ࡀࡌࡓࡉࡕ ࡄࡅ ࡔࡅࡌ ࡅࡓࡔࡅࡌ ࡍࡉࡎࡁࡉࡕ ࡌࡍ ࡂࡉࡋࡉࡀ ࡌࡉࡀ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡉࡀࡌࡉࡍࡅࡍ ࡌࡉࡎࡀ ࡌࡉࡀ ࡋࡄࡀࡍࡀࡕࡇ ࡍࡉࡔࡉࡌࡕࡀ ⊚ ࡗ ࡑࡁࡉࡍࡀ ࡁࡔࡅࡌࡀ ࡖࡄࡉࡉࡀ ࡀࡌࡓࡉࡕࡅࡍ ࡓࡅࡔࡅࡌࡀ^
238 ࡖࡂࡉࡃࡀ ࡖࡉࡀࡓࡃࡍࡀ ࡀࡕࡉࡓࡕࡅࡍ ࡅࡁࡓࡅࡄࡀ ࡅࡍࡉࡔࡉࡌࡕࡀ ࡆࡉࡅࡀ ࡅࡍࡄࡅࡓࡀ ࡅࡏࡒࡀࡓࡀ ࡀࡋࡁࡉࡔࡕࡅࡍࡀ ࡋࡍࡉࡔࡉࡌࡕࡀ ⊚ ࡅࡗ ࡁࡓࡇ ࡀࡍࡀ ࡖࡌࡀࡍ ࡌࡀࡍࡀ
239 ࡅࡎࡌࡉࡓࡀ ࡀࡌࡓࡉࡕࡅࡍ ࡋࡄࡀࡍࡀࡕࡇ ࡆࡉࡅࡀ ࡖࡉࡀࡒࡉࡃ ࡁࡂࡅ ࡌࡀࡍࡀ ࡖࡄࡅ ࡋࡉࡁࡀ ࡅࡄࡅ ࡉࡅࡎࡌࡉࡓ ࡆࡉࡅࡀ ࡒࡀࡃࡌࡀࡉࡀ ࡔࡅࡌࡇ ࡖࡀࡍࡄࡀࡓࡕࡇ ࡋࡊࡅࡋࡄࡅࡍ
240 ࡓࡀࡆࡉࡀ ࡖࡏࡅࡑࡈࡅࡍࡀ ࡁࡅࡍࡀ ࡅࡔࡉࡕࡋࡇ ࡔࡀࡐࡉࡕࡉࡍࡅࡍ ࡅࡀࡍࡄࡀࡓࡕࡉࡍࡅࡍ ࡎࡀ
241 ࡄࡀࡆࡉࡍ ࡄࡏ ࡒࡉࡍࡀ ࡒࡀࡃࡌࡀࡉࡕࡀ ࡖࡏࡎࡕࡀࡃࡓࡀࡕ ࡀࡋࡌࡀ ࡋࡁࡓࡇ ࡀࡍࡀ ࡖࡌࡀࡍ ࡌࡀࡍࡀ ࡎࡌࡉࡓࡀ ࡄࡏ ࡖࡒࡉࡍࡀ ࡔࡅࡌࡇ ࡅࡌࡀࡄࡕࡀ ࡎࡀࡃࡀࡍࡀ
242 ࡏࡋࡇ ࡎࡌࡉࡊ ࡊࡅࡋࡇ ࡂࡉࡍࡆࡀ ࡏࡋࡀࡉࡀ ࡅࡕࡉࡕࡀࡉࡀ ࡄࡏ ࡄࡀࡃࡉࡀ ࡏࡅࡑࡈࡅࡍࡀ ࡄࡏ ࡅࡊࡅࡋࡄࡅࡍ ࡓࡀࡆࡉࡀ ࡌࡀࡋࡂࡉࡈࡉࡁࡇ ⊚ ࡕࡅࡌ ࡒࡉࡍࡀ ࡕࡉࡍࡉࡀࡍࡕࡉࡀ ࡌࡔࡀࡓࡉࡕࡅࡍ
243 ࡅࡀࡌࡓࡉࡕࡅࡍ ࡋࡀࡅࡐࡀ ࡅࡓࡅࡀࡄࡀ ࡖࡄࡉࡉࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡉࡀ ࡋࡄࡀࡆࡀ ࡍࡉࡔࡉࡌࡕࡀ ࡖࡐࡋࡀࡍ ࡁࡓ ࡐࡋࡀࡍࡉࡕࡀ ࡖࡄࡀࡆࡀ ࡌࡀࡎࡉࡒࡕࡀ
244 ࡋࡓࡀࡆࡉࡀ ࡊࡀࡃࡉࡓࡉࡀ ࡀࡔࡊࡉࡁࡕࡉࡍࡅࡍ ࡌࡍ ࡀࡒࡀ ࡋࡓࡅࡀࡄࡀ ࡀࡌࡉࡍࡈࡅࡋ ࡖࡄࡀࡋࡉࡍ ࡔࡀࡁࡀ ࡒࡉࡍࡉࡀ ࡔࡅࡁࡀ ࡂࡀࡓࡂࡋࡉࡀ ࡖࡌࡍ ࡏࡋࡀࡅࡉࡀ ࡁࡉࡍࡉࡀࡍࡀ
245 ࡊࡅࡋࡇ ࡄࡉࡍࡅࡍ ࡁࡉࡑࡈࡅࡍࡀ ࡔࡀࡁࡀ ࡊࡀࡁࡀࡃࡉࡀ ࡖࡏࡊࡉࡋࡕࡀ ࡅࡌࡀࡔࡒࡉࡕࡀ ࡓࡅࡄࡀ ࡅࡍࡉࡔࡉࡌࡕࡀ ࡅࡓࡀࡆࡉࡀ ࡊࡅࡋࡄࡅࡍ ࡁࡂࡀࡅࡀࡉࡄࡅࡍ ࡋࡂࡉࡈࡉࡀ ࡅࡄࡀࡉࡆࡀࡊ
246 ࡍࡉࡄࡅࡉࡀ ࡁࡀࡃࡌࡅ ࡊࡀࡁࡀࡃࡉࡀ ࡅࡋࡀࡂࡈࡀ ࡁࡉࡍࡉࡀࡍࡀ ࡁࡀࡓࡅ ࡖࡀࡁࡀࡄࡀࡕࡀ ࡅࡀࡃࡉࡀࡅࡓࡀ ࡖࡌࡉࡔࡀ ࡅࡗ ࡈࡀࡁࡀࡄࡀࡕࡀ ࡖࡌࡀࡎࡉࡒࡕࡀ ࡖࡀࡃࡀࡌ
247 ࡒࡀࡓࡉࡕࡅࡍ ࡔࡀࡁࡀ ࡁࡀࡁࡉࡀ ࡖࡁࡓࡉࡔࡀ ࡔࡀࡓࡉࡍ ࡄࡏ ࡗ ࡈࡀࡁࡀࡄࡀࡕࡀ ࡖࡃࡅࡊࡓࡀࡍࡉࡀ ࡒࡀࡓࡉࡕࡅࡍ ࡓࡅࡄࡀ ࡅࡍࡉࡔࡉࡌࡕࡀ ࡄࡉࡍࡅࡍ ࡀࡌࡉࡍࡈࡅࡋ
248 ࡖࡁࡊࡅࡋ ࡄࡀࡃ ࡌࡀࡎࡉࡒࡕࡀ ࡄࡀࡃ ࡄࡀࡃ ࡁࡉࡍࡉࡀࡍࡀ ࡄࡉࡍࡅࡍ ࡗ ࡆࡉࡅࡀ ࡖࡔࡀࡌࡉࡔ ࡅࡎࡉࡓࡀ ࡖࡁࡓࡒࡉࡄࡀ ࡖࡊࡅࡋ ࡄࡀࡃ ࡉࡅࡌࡀ ࡁࡄࡀࡃ ࡊࡉࡍࡕࡀ ࡅࡗ
249 ࡀࡉࡀࡓ ࡖࡍࡀࡔࡉࡌ ࡁࡕࡉࡁࡉࡋ ࡖࡊࡅࡋ ࡄࡀࡃ ࡉࡀࡄࡓࡀ ࡄࡀࡃ ࡓࡉࡄࡀ ࡄࡀࡅࡉࡋࡇ ࡅࡗ ࡈࡀࡁࡀࡄࡀࡕࡀ ࡖࡌࡀࡎࡉࡒࡕࡀ ࡁࡄࡉࡓࡉࡀ ࡆࡉࡃࡒࡀ ࡒࡀࡓࡉࡕࡅࡍ
250 ࡊࡅࡋ ࡄࡀࡃ ࡌࡉࡍࡀࡉࡊࡅࡍ ࡋࡒࡉࡍࡀ ࡎࡀࡃࡀࡓࡋࡇ ࡁࡀࡓࡀࡅࡀࡕࡀ ࡕࡉࡃࡅࡍ ࡖࡒࡉࡍࡀ ࡒࡀࡃࡌࡀࡉࡕࡀ ࡖࡄࡀࡍࡀࡕࡇ ࡕࡀࡓࡌࡉࡃࡀ ࡖࡀࡓࡀࡅࡀࡕࡀ ࡖࡌࡉࡀ ࡖࡁࡅࡕࡀ
251 ࡋࡏࡃࡀ ࡌࡉࡕࡀࡓࡁࡉࡀ ࡅࡕࡉࡍࡉࡀࡍࡀ ࡋࡉࡀࡌࡉࡍࡀ ࡄࡅ ⊚ ࡅࡕࡋࡉࡕࡀࡉࡀ ࡄࡏ ࡀࡋࡌࡀ ࡖࡄࡀࡃࡓࡀ ࡅࡀࡕࡉࡀ ࡋࡅࡀࡕࡇ⊚ ࡉࡀ ࡔࡉࡕࡋࡀࡉ ࡈࡀࡁࡀ ࡕࡉࡃࡅࡍ ࡖࡈࡀࡁࡀࡄࡀࡕࡀ
252 ࡀࡓࡁࡉࡍ ࡅࡕࡓࡉࡍ ࡓࡅࡔࡅࡌࡉࡀ ࡌࡉࡕࡓࡉࡔࡌࡀ ࡅࡕࡌࡀࡍࡉࡀ ࡅࡕࡌࡀࡍࡀࡍ ࡅࡀࡓࡁࡉࡀ ࡀࡃࡉࡀࡕࡀ ࡌࡉࡕࡒࡀࡉࡌࡀ ࡋࡁࡓ ࡌࡍ ࡍࡉࡔࡉࡌࡕࡀ ࡁࡒࡉࡍࡀ ࡁࡀࡕࡓࡀࡉࡕࡀ
253 ࡖࡁࡂࡀࡅࡀ ࡀࡌࡓࡉࡕ ࡋࡀࡅࡐࡀ ࡅࡓࡅࡀࡄࡀ ࡖࡄࡉࡉࡀ ࡅࡔࡀࡁࡉࡒ ࡄࡀࡈࡀࡉࡉࡀ ࡍࡉࡄࡅࡉࡋࡇ ࡋࡄࡀࡆࡀ ࡍࡉࡔࡉࡌࡕࡀ ࡖࡐࡋࡀࡍ ࡁࡓ ࡐࡋࡀࡍࡉࡕࡀ ࡖࡄࡀࡆࡀ ࡌࡀࡎࡉࡒࡕࡀ ࡅࡗ
254 ࡀࡌࡓࡉࡕ ࡄࡀࡊ ࡍࡉࡔࡉࡌࡕࡀ ࡅࡋࡍࡉࡔࡌࡀࡕࡀ ࡁࡊࡅࡋࡄࡅࡍ ࡓࡀࡆࡉࡀ ࡀࡋࡁࡉࡔࡕࡇ ࡅࡗ ࡁࡌࡀࡃࡁࡇ ࡏࡃࡀࡊ ࡍࡀࡈࡓࡉࡕ ࡅࡋࡀࡓࡀࡔࡌࡉࡕ ࡋࡐࡅࡌࡀ ࡒࡀࡃࡌࡀࡉࡀ ࡄࡕࡀࡌࡕࡇ
255 ࡅࡋࡁࡉࡍࡉࡀࡍࡀ ࡊࡅࡋࡇ ࡆࡀࡓࡀࡆࡕࡇ ࡅࡗ ࡁࡉࡕ ࡀࡁࡀࡕࡅࡓ ࡀࡌࡓࡉࡕ ࡀࡋࡀࡕ ࡍࡉࡔࡉࡌࡕࡀ ࡖࡐࡋࡀࡍ ࡁࡓ ࡐࡋࡀࡍࡉࡕࡀ ࡖࡄࡀࡆࡀ ࡌࡀࡎࡉࡒࡕࡀ ࡋࡁࡉࡕ ࡀࡁࡀࡕࡅࡓ ࡅࡉࡀࡄࡁࡀࡕ
256 ࡔࡅࡌࡇ ࡅࡓࡅࡔࡅࡌࡇ ࡅࡁࡉࡓࡉࡊࡕࡇ ࡅࡌࡀࡑࡁࡅࡕࡇ ࡅࡌࡉࡍࡃࡀࡌ ࡖࡁࡇ ࡍࡉࡔࡌࡀࡕࡀ ࡖࡀࡁࡀࡄࡀࡕࡀࡍ ࡓࡔࡉࡌࡀ ࡁࡓࡅࡔࡅࡌࡀ ࡖࡄࡉࡉࡀ ࡀࡁࡀࡄࡀࡕࡀࡍ ࡗ
257 ࡀࡍࡀࡕࡅࡍ ࡄࡀࡕࡀࡌ ࡀࡌࡓࡉࡕࡅࡍ ࡀࡍࡉࡍ ࡄࡉࡍࡅࡍ ࡖࡀࡉࡍࡀࡍ ࡏࡋࡀࡅࡀࡉࡊࡅࡍ ࡕࡓࡉࡑࡀ ࡁࡊࡅࡋࡌࡉࡍࡃࡀࡌ ⊚ ࡄࡀࡋࡉࡍ ࡌࡀ ࡅࡎࡓࡉࡍ ࡅࡔࡉࡕࡀ ࡓࡅࡔࡅࡌࡉࡀ ࡅࡀࡃࡀࡉࡀࡕࡀ
258 ࡖࡏࡊࡀ ࡁࡈࡀࡁࡀࡄࡀࡕࡀ ࡕࡉࡃࡅࡍ ࡖࡊࡅࡋ ࡄࡀࡃ ࡌࡉࡍࡀࡉࡄࡅࡍ ࡄࡃࡀ ࡌࡀࡋࡊࡀ ࡄࡅ ⊚ ࡀࡌࡉࡍࡈࡅࡋ ࡖࡄࡀࡌࡔࡀ ࡉࡅࡌࡉࡀ ࡖࡃࡅࡊࡓࡀࡍࡉࡀ ࡅࡄࡀࡌࡔࡀ ࡋࡉࡋࡉࡀࡅࡕࡅࡍ
259 ࡄࡃࡀ ࡉࡅࡌࡀ ࡄࡉࡍࡅࡍ ࡅࡁࡄࡃࡀ ࡁࡉࡍࡉࡀࡍࡀ ࡋࡂࡉࡈࡉࡀ ࡌࡀ ࡅࡎࡓࡉࡍ ࡔࡀࡉࡉࡀ ࡄࡉࡍࡅࡍ ⊚ ࡔࡉࡕࡀ ࡄࡅࡓࡉࡍࡉࡀ ࡀࡓࡒࡀ ࡖࡁࡉࡌࡀࡍࡃࡀ ࡄࡏ ࡕࡉࡍࡉࡀࡍࡀ ࡈࡋࡀࡋࡀ
260 ࡅࡕࡋࡉࡕࡀࡉࡀ ࡀࡔࡉࡕࡀ ࡅࡀࡓࡁࡉࡀࡉࡀ ࡊࡅࡑࡓࡀ ࡅࡄࡀࡌࡔࡀࡉࡀࡉࡀ ࡀࡔࡉࡕࡀ ࡅࡔࡉࡕࡀࡉࡀ ࡊࡅࡑࡓࡀ ࡖࡌࡀࡓࡁࡀ ࡀࡌࡉࡍࡈࡅࡋ ࡊࡅࡋࡌࡉࡍࡃࡀࡌ ࡔࡉࡕࡀ ࡓࡀࡆࡉࡀ ࡒࡀࡌࡋࡇ
261 ࡅࡄࡀࡉࡆࡀࡊ ࡔࡅࡁࡀ ࡀࡕࡉࡍ ࡅࡕࡌࡀࡍࡉࡀ ࡁࡉࡍࡉࡀࡍࡀ ࡂࡉࡍࡆࡀ ࡀࡌࡉࡍࡈࡅࡋ ࡖࡌࡀࡎࡉࡒࡕࡀ ࡁࡔࡉࡕࡀ ࡕࡀࡓࡌࡉࡃࡉࡀ ࡌࡉࡕࡒࡉࡓࡉࡀ ࡀࡋࡌࡀ ࡋࡕࡋࡉࡕࡀࡉࡀ ࡐࡀࡈࡉࡓࡉࡀ ࡅࡄࡀࡉࡆࡀࡊ
262 ࡔࡅࡁࡀ ࡀࡕࡉࡀ ࡋࡅࡀࡕࡀࡉࡄࡅࡍ ࡅࡕࡅࡌ ࡕࡌࡀࡍࡉࡀ ࡋࡌࡀࡎࡉࡒࡕࡀ ࡄࡅࡓࡉࡍࡕࡉࡀ ࡄࡅ ࡀࡃࡉࡀࡅࡓࡀ ࡌࡉࡕࡉࡒࡓࡉࡀ ࡅࡀࡕࡉࡀ ⊚ ࡕࡅࡌ ࡄࡀࡋࡉࡍ ࡌࡀ ࡅࡎࡓࡉࡍ ࡅࡔࡉࡕࡀ
263 ࡓࡅࡔࡅࡌࡉࡀ ࡅࡀࡃࡉࡀࡕࡀ ࡌࡀ ࡅࡎࡓࡉࡍ ^ࡅࡔࡉࡕࡀ^ ࡂࡉࡓࡌࡉࡀ ࡅࡆࡅࡓࡐࡉࡍࡉࡀ ࡅࡋࡅࡐࡀࡕࡀ ࡖࡁࡂࡀࡅࡀࡉࡄࡅࡍ ࡋࡂࡉࡈࡀ ࡅࡔࡉࡕࡉࡍ ࡅࡕࡋࡀࡕࡀ ࡌࡉࡍࡀࡉࡄࡅࡍ ࡁࡉࡀࡌࡉࡍࡀ ࡅࡔࡉࡕࡉࡍ ࡅࡕࡋࡀࡕࡀ
264 ࡌࡉࡍࡀࡉࡄࡅࡍ ࡁࡎࡌࡀࡋࡀ ࡖࡄࡉࡍࡅࡍ ࡌࡀ ࡅࡎࡓࡉࡍ ࡅࡔࡉࡕࡀ ࡉࡅࡌࡉࡀ ࡅࡋࡉࡋࡀࡅࡀࡕࡀ ࡌࡍ ࡌࡀࡑࡁࡅࡕࡀ ࡖࡉࡅࡌࡀ ࡖࡃࡀࡉࡌࡀ ࡅࡀࡋࡌࡀ ࡋࡉࡅࡌࡀ ࡖࡍࡅࡓࡅࡆ ࡆࡅࡈࡀ ࡄࡉࡍࡅࡍ
265 ࡊࡅࡋࡌࡀࡍ ࡖࡍࡉࡂࡀࡋࡉࡋ ࡄࡀࡋࡉࡍ ࡓࡀࡆࡉࡀ ࡋࡀࡍࡀࡔࡉࡀ ࡖࡋࡀࡔࡉࡄࡉࡀ ࡌࡍ ࡍࡄࡅࡓࡀ ࡉࡀࡒࡓࡀ {{ࡍࡉ}}>>^ࡌࡉ^<<ࡕࡀࡂࡆࡀࡓ ⊚ ࡕࡅࡌ ࡌࡀࡐࡓࡉࡔࡍࡀࡋࡊࡅࡍ ࡋࡄࡀࡋࡉࡍ ࡓࡉࡄࡁࡀࡕࡀ
266 ࡖࡌࡉࡕࡀࡕࡍࡀࡍ ࡋࡌࡀࡎࡉࡒࡕࡀ ࡌࡀࡄࡅ ࡄࡉࡍࡅࡍ ࡖࡏࡅࡑࡓࡀࡉࡊࡅࡍ ࡌࡉࡎࡕࡌࡉࡊ ࡅࡋࡉࡁࡀࡉࡊࡅࡍ ࡍࡉࡄࡅࡉࡀ ࡋࡎࡀࡌࡊࡉࡀ ⊚ ࡗ ࡄࡀࡉࡆࡉࡍ ࡀࡌࡀࡓ ࡌࡀࡓࡀ ࡖࡓࡀࡁࡅࡕࡀ
267 ࡌࡀࡋࡉࡋ ࡉࡀࡅࡀࡓ ࡆࡉࡅࡀ ࡖࡍࡉࡌࡀࡓࡋࡇ ࡁࡀࡉࡉࡍ ࡖࡕࡀࡐࡓࡉࡔࡉࡍࡀࡍ ࡋࡊࡅࡋ ࡌࡉࡍࡃࡀࡌ ࡖࡕࡀࡓࡌࡉࡃࡉࡀ ࡒࡀࡓࡉࡋࡇ ࡅࡔࡅࡌࡀ ࡏࡕࡋࡇ ࡁࡂࡀࡅࡇ ࡌࡉࡎࡕࡀࡃࡓࡀࡍ
268 ࡌࡀࡎࡒࡀࡕࡀ ࡅࡏࡍࡂࡉࡓࡉࡀࡕࡀ ࡅࡄࡀࡉࡆࡀࡊ ࡓࡉࡄࡁࡀࡕࡀ ࡀࡐࡓࡉࡔࡉࡍࡀࡍ ⊚ ࡗ ࡄࡀࡉࡆࡉࡍ ࡀࡌࡀࡓ ࡉࡀࡅࡀࡓ ࡆࡉࡅࡀ ࡄࡅ ࡌࡀࡓࡀ ࡖࡓࡀࡁࡅࡕࡀ ࡄࡍࡀࡕࡀࡋࡇ
269 ࡌࡀࡋࡉࡋ ࡋࡉࡀࡅࡀࡓ ࡆࡉࡅࡀ ࡖࡍࡉࡌࡀࡓࡋࡇ ࡉࡀ ࡁࡓ ࡌࡀࡋࡊࡉࡀ ࡊࡅࡋ ࡄࡀࡃ ࡌࡉࡍࡃࡀࡌ ࡖࡀࡉࡉࡋ ࡋࡁࡉࡌࡀࡍࡃࡀ ࡁࡂࡀࡅࡇ ࡎࡉࡃࡓࡀ ࡄࡃࡀ ࡌࡀࡋࡊࡀ ࡄࡅ
270 ⊚ ࡉࡀ ࡁࡓ ࡉࡀࡓࡃࡍࡀ ࡖࡀࡌࡔࡉࡕࡅࡍ ࡁࡂࡀࡅࡇ ࡄࡅ ࡓࡀࡄࡀࡈࡀ ࡉࡀࡒࡓࡀ ࡔࡅࡌࡇ ࡏࡅࡕࡓࡀ ࡔࡅࡌࡇ ࡄࡅ ࡕࡀࡓࡁࡀࡑࡀ ࡖࡁࡉࡌࡀࡍࡃࡀ ࡉࡅࡔࡀࡌࡉࡍ ࡆࡅࡈࡀ
271 ࡄࡅ ࡐࡀࡕࡅࡓࡀ ࡖࡁࡉࡌࡀࡍࡃࡀ ࡎࡀࡌࡀࡍࡃࡀࡓࡏࡉࡋ ࡏࡅࡕࡓࡀ ࡄࡅ ࡎࡒࡅࡐࡕࡀ ࡖࡁࡉࡌࡀࡍࡃࡀ ࡔࡉࡍࡂࡋࡀࡍ ࡏࡅࡕࡓࡀ ࡄࡅ ࡀࡔࡉࡕࡀ ࡒࡀࡃࡌࡀࡉࡕࡀ ࡖࡁࡉࡌࡀࡍࡃࡀ
272 ࡔࡉࡋࡌࡀࡉ ࡆࡅࡈࡀ ࡄࡅ ࡀࡔࡉࡕࡀ ࡄࡅࡓࡉࡍࡕࡉࡀ ࡀࡄࡀࡕࡀ ࡍࡉࡃࡁࡀࡉ ࡆࡅࡈࡀ ࡄࡅ ࡊࡅࡑࡓࡀ ࡒࡀࡃࡌࡀࡉࡀ ࡎࡀࡓ ࡓࡁࡀ ࡄࡅ ࡊࡅࡑࡓࡀ ࡖࡀࡋࡉࡄࡃࡇ ࡎࡀࡓࡅࡀࡍ ࡓࡁࡀ ࡄࡅ
273 ⊚ ࡕࡀࡐࡀࡋࡀ ࡖࡁࡉࡌࡀࡍࡃࡀ ࡁࡍࡉࡀ ࡖࡉࡅࡔࡀࡌࡉࡍ ࡄࡉࡍࡅࡍ ࡏࡅ ࡄࡀࡓࡀ ࡍࡀࡐࡉࡋ ࡁࡉࡈࡋࡀࡋࡀ ࡎࡀࡃࡀࡓ ࡃࡌࡅ ࡔࡉࡕࡉࡍ ࡊࡅࡋࡄࡅࡍ ࡍࡀࡐࡋࡉࡁࡇ ࡌࡉࡎࡕࡀࡃࡀࡓ
274 ࡅࡌࡉࡕࡒࡀࡉࡀࡌ ࡁࡂࡀࡅࡇ ࡖࡁࡉࡌࡀࡍࡃࡀ ࡔࡀࡌࡀࡔࡉࡏࡉࡋ ࡏࡅࡕࡓࡀ ࡄࡅ ࡕࡀࡓࡕࡉࡍ ࡊࡀࡅࡉࡀ ࡁࡎࡀࡓ ࡊࡅࡑࡓࡀ ࡕࡀࡓࡕࡉࡍ ࡀࡉࡍࡉࡀ ࡖࡀࡍࡀࡍࡀ ࡀࡍࡀࡕ ࡄࡏ ࡏࡋࡀࡅࡀࡉࡄࡅࡍ
275 ࡖࡍࡉࡄࡀ ࡕࡀࡓࡕࡉࡍ ࡊࡀࡅࡉࡀ ࡖࡎࡀࡓࡅࡀࡍ ࡊࡅࡑࡓࡀ ࡀࡉࡍࡉࡀ ࡖࡃࡌࡅࡕ ࡄࡉࡉࡀ ࡀࡍࡀࡍࡀ ࡖࡏࡋࡀࡅࡀࡉࡊࡅࡍ ࡖࡍࡉࡄࡉࡀ ࡎࡉࡐࡀ ࡖࡁࡉࡌࡀࡍࡃࡀ ࡖࡁࡉࡀࡌࡉࡍࡀࡊ ࡗ ࡀࡉࡋࡉࡕ
276 ࡋࡁࡉࡌࡀࡍࡃࡀ ࡀࡃࡀࡕࡀࡍ ࡆࡅࡈࡀ ࡄࡅ ࡎࡉࡐࡀ ࡄࡅࡓࡉࡍࡀ ࡉࡀࡃࡀࡕࡀࡍ ࡌࡉࡀࡍࡒࡀ ࡄࡅ ࡊࡀࡋࡀࡋࡕࡀ ࡖࡁࡉࡌࡀࡍࡃࡀ ࡁࡉࡄࡓࡀࡌ ࡏࡅࡕࡓࡀ ࡊࡅࡁࡀࡑࡕࡀࡍࡉࡀ ࡄࡅ ࡁࡀࡁࡀ ࡖ
277 ࡁࡉࡌࡀࡍࡃࡀ ࡆࡀࡓࡆࡉࡏࡉࡋ ࡃࡀࡓࡁࡀࡕࡀ ࡓࡁࡇ ࡖࡉࡅࡔࡀࡌࡉࡍ ࡄࡅ ⊚ ࡕࡅࡌ ࡂࡉࡔࡀࡓ ࡖࡂࡋࡀࡋࡀ ࡄࡉࡌࡅࡍ ࡏࡅࡕࡓࡀ ࡄࡏ ࡌࡅࡄࡅࡋࡕࡀ ࡖࡍࡀࡄࡋࡀࡋࡇ ࡋࡂࡓࡀࡌࡊࡉࡀ
278 ࡂࡅࡄࡀࡓ ࡀࡍࡀࡍࡀ ࡖࡌࡉࡈࡓࡀ ࡄࡏ ࡕࡀࡊࡅࡍࡀ ࡖࡒࡀࡐࡉࡀ ࡂࡀࡓࡌࡀࡍࡊࡀ ࡀࡓࡒࡀ ࡖࡁࡉࡕ ࡕࡀࡓࡅࡀࡍ ࡄࡏ ࡈࡀࡐࡒࡀ ࡖࡋࡄࡀࡌࡀࡉࡊࡅࡍ ࡀࡐࡉࡀ ࡑࡀࡓࡐࡏࡉࡋ
279 ࡏࡅࡕࡓࡀ ࡄࡅ ࡕࡋࡀࡕ ࡁࡉࡕࡐࡉࡀ ࡖࡋࡂࡉࡈࡉࡋࡇ ࡏࡎࡕࡅࡀࡓࡉࡃ ࡔࡅࡌࡀࡉࡄࡅࡍ ࡖࡄࡉࡍࡅࡍ ࡀࡔࡂࡀࡍࡃࡉࡀ ࡖࡔࡀࡄࡓࡀࡕ ࡀࡍࡀࡍࡀ ࡄࡉࡍࡅࡍ ࡎࡀ
280 ࡓࡀࡆࡀ ࡖࡌࡀࡐࡉࡒ ࡌࡉࡔࡀ ࡂࡀࡋࡉࡋࡉࡀࡉࡉࡋ ࡏࡅࡕࡓࡀ ࡄࡅ ࡑࡉࡁࡉࡀ ࡖࡎࡀࡃࡓࡉࡀ ࡏࡁࡉࡃࡀࡕࡊࡅࡍ ࡆࡄࡉࡋࡉࡀࡉࡉࡋ ࡄࡉࡍࡅࡍ ࡖࡉࡀࡒࡃࡀࡍ ࡏࡅࡕࡓࡀ ࡖࡌࡉࡀࡁࡉࡔࡋࡅࡍ
281 ࡅࡓࡀࡌࡉࡋࡅࡍ ࡁࡕࡉࡁࡉࡋ ࡎࡉࡌࡀࡊࡀ ࡋࡍࡉࡔࡌࡀࡕࡀ ࡍࡉࡄࡅࡍ ࡕࡅࡊࡀࡍࡀ ࡖࡋࡄࡀࡌࡀࡉࡊࡅࡍ ࡀࡐࡒࡀࡍࡃࡏࡉࡋ ࡏࡅࡕࡓࡀ ࡄࡅ ࡂࡅࡐࡕࡀ ࡖࡋࡄࡀࡌࡀ ࡀࡐࡉࡀ ࡒࡀࡋࡀࡉ ࡀࡍࡀࡍࡀ
282 ࡒࡀࡋࡉࡋࡕࡀ ࡄࡏ ⊚ ࡉࡀ ࡔࡉࡕࡋࡀࡉ ࡍࡉࡄ<ࡉ>ࡀ ࡗ ࡀࡐࡉࡕࡅࡍ ࡋࡄࡀࡌࡀ ࡋࡁࡅࡔ ࡅࡏࡕࡊࡀࡎࡅࡍ ࡅࡓࡅࡐ ࡋࡄࡉࡌࡉࡀࡍࡀࡉࡊࡅࡍ ࡅࡄࡀࡉࡆࡀࡊ ࡀࡁࡉࡀ ࡏࡋࡇ ࡎࡊࡅࡋࡕࡀࡉࡊࡅࡍ ࡍࡀࡐࡔࡀ
283 ࡄࡀࡅࡉࡀ ࡄࡀࡍࡀࡕࡇ ࡌࡉࡔࡀ ࡖࡌࡉࡍࡇ ࡀࡐࡉࡕࡅࡍ ࡋࡀࡕࡉࡒࡓࡅࡍࡀ ࡁࡌࡀࡎࡉࡒࡕࡀࡉࡊࡅࡍ ࡅࡄࡀࡍࡀࡕࡇ ࡖࡐࡀࡉࡉࡔ ࡌࡍ ࡋࡄࡀࡌࡀ ࡁࡂࡀࡅࡇ ࡋࡀࡕࡉࡐࡅࡍ ࡅࡏࡋࡇ ࡖࡄࡀࡅࡉࡀ
284 ࡍࡉࡔࡉࡌࡕࡀ ࡄࡃࡀ ࡄࡏ ࡖࡌࡉࡕࡉࡒࡓࡉࡋࡇ ࡌࡀࡎࡉࡒࡕࡀ ࡅࡗ ࡍࡀࡐࡔࡀ ࡍࡉࡔ^ࡉ^ࡌࡕࡀ ࡄࡀࡅࡉࡀ ࡋࡕࡋࡀࡕࡉࡍ ࡏࡋࡇ ࡄࡃࡀ ࡅࡋࡄࡃࡀ ࡈࡀࡓࡉࡀࡍࡀ ࡁࡁࡉࡌࡀࡍࡃࡀ
285 ࡅࡊࡍࡅࡐࡉࡅࡍ ࡏࡅࡕࡓࡀ ࡖࡄࡅ ࡒࡀࡍࡉࡍࡀ ࡖࡁࡉࡌࡀࡍࡃࡀ ࡖࡌࡉࡀ ࡖࡁࡅࡕࡀ ࡍࡀࡈࡓࡀ ࡌࡀࡄࡆࡉࡀࡍ ࡏࡅࡕࡓࡀ ࡄࡅ ࡍࡉࡀࡓࡀ ࡖࡄࡀࡌࡓࡀ ࡔࡀࡃࡊࡏࡉࡋ ࡏࡅࡕࡓࡀ
286 ࡄࡅ ࡍࡉࡀࡓࡀ ࡖࡌࡉࡔࡀ ࡄࡅࡆࡏࡉࡋ ࡏࡅࡕࡓࡀ ࡄࡅ ⊚ ࡀࡎࡀ ࡖࡁࡉࡌࡀࡍࡃࡀ ࡎࡉࡌࡀࡕ ࡄࡉࡉࡀ ࡄࡅ ⊚ ࡁࡉࡎࡓࡀ ࡖࡁࡉࡌࡀࡍࡃࡀ ࡀࡉࡀࡓ ࡂࡅࡐࡍࡀ ࡃࡀࡊࡉࡀ ࡄࡅ ⊚
287 ࡀࡌࡅࡆࡀ ࡖࡋࡈࡀࡁࡀࡄࡀࡕࡀ ࡉࡀࡕࡉࡁ ࡌࡅࡒࡓࡀ ࡖࡀࡓࡁࡅࡕࡀ ࡏࡅࡕࡓࡀ ࡌࡅࡒࡓࡀ ࡄࡅ ࡀࡌࡅࡆࡀ ࡖࡋࡃࡅࡊࡓࡀࡍࡉࡀ ࡉࡀࡕࡉࡁ ࡄࡀࡌࡅࡋࡀࡉ ࡅࡄࡀࡌࡀࡌࡅࡋࡀࡉ ࡏࡅࡕࡓࡀ ࡄࡅ
288 ⊚ ࡄࡅࡋࡀࡋࡉࡕࡀ ࡖࡓࡀࡆࡉࡀ ࡋࡂࡉࡈࡀࡁࡇ ࡏࡍࡁࡉࡀ ࡉࡅࡔࡀࡌࡉࡍ ࡁࡓ ࡉࡅࡔࡀࡌࡉࡍ ࡄࡅ ࡖࡄࡅ ࡎࡉࡍࡃࡉࡓࡊࡀ ࡓࡁࡀ ࡒࡀࡃࡌࡀࡉࡀ ࡔࡅࡌࡇ ࡄࡅ ࡏࡅࡊࡌࡀ ࡖࡀࡉࡍࡉࡀ
289 ࡓࡅࡌࡀࡍࡀ ࡖࡎࡉࡒࡕࡀ ࡖࡏࡕࡋࡇ ࡀࡁࡀࡕࡀࡓ ࡓࡉࡔࡀ ࡗ ࡋࡀࡐࡕࡉࡀ ࡁࡀࡃࡌࡅ ࡓࡉࡔࡀ ࡄࡅ ࡅࡊࡅࡋࡄࡅࡍ ࡂࡉࡎࡀࡍࡉࡀ ࡅࡀࡈࡅࡐࡉࡀ ࡏࡕࡁࡇ ࡅࡐࡅࡌࡇ ࡀࡉࡀࡊ ࡓࡉࡔࡀ ࡄࡅ
290 ࡅࡄࡅ ࡊࡀࡍࡐࡏࡉࡋ ࡏࡅࡕࡓࡀ ࡄࡅ ࡅࡗ ࡌࡉࡐࡕࡀ ࡑࡉࡍࡃࡉࡀ ࡅࡉࡀࡕࡁࡇ ࡋࡌࡀࡎࡉࡒࡕࡀ ࡋࡕࡋࡀࡕࡉࡍ ࡅࡕࡀࡓࡕࡉࡍ ࡔࡉࡍࡉࡀ ࡅࡍࡏࡁࡉࡀ ࡅࡊࡀࡊࡀࡍࡉࡀ ࡄࡉࡍࡅࡍ ࡄࡅ ࡀࡉࡋࡇ ࡓࡀࡌࡀ
291 ࡋࡏࡅࡑࡈࡅࡍࡀ ࡌࡔࡀࡃࡓࡉࡋࡇ ࡖࡄࡉࡍࡅࡍ ࡆࡀࡓࡆࡏࡉࡋ ࡏࡅࡕࡓࡀ ࡅࡄࡉࡍࡅࡍ ࡎࡀࡃࡀࡍࡉࡀ ࡖࡌࡉࡀ ࡌࡀࡎࡂࡉࡀ ࡏࡅࡑࡈࡅࡍࡀ ࡋࡀࡍࡀࡄࡅࡀࡋࡉࡀ ࡅࡌࡀࡌࡋࡀࡍ ࡍࡉࡕࡒࡀࡍ ࡅࡌࡅࡒࡓࡀ ࡍࡀࡔࡀࡓ
292 ࡅࡌࡀࡍࡆࡉࡀ ࡅࡆࡉࡒࡍࡀ ࡍࡉࡋࡂࡀࡈ ࡅࡄࡀࡉࡆࡀࡊ ࡁࡊࡅࡋࡄࡉࡍ ࡒࡉࡓࡉࡀࡕࡀ ࡆࡀࡓࡉࡆࡕࡉࡍࡅࡍ ࡖࡏࡊࡉࡋࡕࡀ ࡁࡂࡀ^ࡅࡀ^ࡉࡄࡅࡍ ࡍࡉࡊࡋࡅࡍ ࡀࡌࡉࡍࡈࡅࡋ ࡖࡓࡀࡆࡉࡀ ࡖࡏࡑࡈࡅࡍࡀ ࡁࡂࡀࡅࡀࡉࡄࡅࡍ ࡕࡀࡒࡍࡉࡀ
293 ࡏࡎࡐࡀࡓࡂࡋࡀ ࡉࡅࡎࡌࡉࡓ ࡏࡅࡕࡓࡀ ࡄࡅ ࡅࡌࡍ ࡈࡀࡌࡀ ࡖࡍࡉࡔࡉࡌࡕࡀ ࡓࡀࡆࡀ ࡏࡕࡉࡂࡋࡉࡀ ࡌࡍ ࡋࡉࡁࡀ ࡄࡅ ࡏࡑࡈࡀࡓࡀࡓ ⊚ ࡐࡉࡄࡕࡀ ࡖࡁࡊࡋࡉࡋࡀ ࡀࡉࡕࡇ ࡋࡉࡁࡀ ࡄࡏ ࡖ
294 ࡊࡅࡋࡄࡅࡍ ࡓࡀࡆࡉࡀ ࡌࡋࡀࡂࡈࡉࡁࡇ ⊚ ࡌࡉࡔࡀ ࡖࡓࡅࡔࡅࡌࡉࡀ ࡎࡉࡍࡃࡉࡓࡉࡀࡅࡉࡎ ࡉࡀࡓࡃࡍࡀ ࡂࡀࡅࡀࡉࡀ ࡄࡅ ࡅࡄࡅ ࡌࡉࡔࡀ ࡖࡂࡉࡓࡌࡉࡀ ࡖࡌࡅࡒࡓࡀ ࡔࡊࡀࡍ ࡐࡓࡀࡕࡀ ࡖࡐࡀࡈࡉࡓࡀ
295 ࡏࡋࡀࡉࡀ ࡐࡕࡀࡄࡀ ࡖࡐࡅࡌࡀ ࡖࡍࡉࡔࡉࡌࡕࡀ ࡄࡅ ࡐࡀࡋࡂࡀ ࡖࡁࡉࡎࡓࡀ ࡖࡃࡀࡓࡉࡕ ࡀࡍࡀࡕ ࡃࡀࡓࡉࡕ ࡌࡍࡀࡕࡀࡊ ࡋࡄࡀࡍࡉࡊ ࡓࡀࡆࡉࡀ ࡌࡍࡀࡕࡀ ࡉࡀࡄࡁࡀࡕࡋࡅࡍ ࡀࡌࡉࡍࡈࡅࡋ ࡖࡐࡀࡋࡂࡉࡀ
296 ࡖࡂࡉࡍࡆࡀ ࡁࡃࡉࡋࡀࡊ ࡏࡕࡉࡊࡎࡉࡀ ࡀࡍࡀࡕ ࡅࡄࡀࡊ ࡍࡉࡔࡉࡌࡕࡀ ࡁࡉࡄࡃࡀࡃࡉࡀ ࡏࡕࡉࡓࡉࡁࡕࡅࡍ ࡅࡗ ࡀࡍࡀࡕ ࡁࡐࡅࡌࡀࡊ ࡄࡀࡍࡀࡕࡄ ࡋࡃࡉࡀ ࡀࡓࡉࡁ ࡌࡉࡀ ࡁࡄࡀࡌࡓࡀ ࡓࡀࡆࡉࡀ ࡊࡅࡋࡄࡅࡍ
297 ࡖࡐࡀࡂࡓࡀ ࡐࡀࡓࡅࡀࡍࡒࡀ ࡏࡔࡕࡀࡃࡀࡓࡋࡉࡍ ࡅࡍࡉࡔࡉࡌࡕࡀ ࡒࡅࡃࡀࡌ ࡀࡁࡀࡕࡅࡓ ࡒࡀࡉࡌࡀ ࡅࡓࡀࡄࡕࡀ ࡅࡍࡀࡒࡔࡀ⊚ ࡅࡗ ࡀࡌࡓࡉࡕ ࡁࡉࡄࡓࡇ ࡉࡅࡊࡀࡔࡀࡓ
298 ࡋࡉࡁࡓࡀࡉࡀ ࡉࡅࡊࡀࡔࡀࡓ ࡀࡁࡀࡕࡅࡓ ࡄࡅ ࡖࡋࡍࡉࡔࡉࡌࡕࡀ ࡁࡀࡄࡀࡓࡋࡇ ࡗ ࡑࡉࡓࡀࡐࡀࡉࡉࡀ ࡖࡆࡀࡄࡁࡀ ࡁࡀࡄࡀࡓ ⊚ ࡅࡗ ࡀࡌࡓࡉࡕ ࡌࡀࡋࡉࡋ ࡅࡐࡕࡀ ࡄࡉࡉࡀ
299 ࡓࡁࡉࡀ ࡁࡐࡅࡌࡀࡉࡄࡅࡍ ࡅࡌࡐࡀࡋࡈࡉࡕ ࡐࡀࡍࡃࡀࡌࡀࡊ ࡅࡀࡊࡋࡉࡕ ࡐࡉࡄࡕࡀࡊ ࡅࡔࡀࡕࡉࡕ ࡌࡀࡌࡁࡅࡄࡀࡊ ࡅࡌࡄࡀࡋࡀࡋࡉࡕ ࡅࡃࡀࡓࡉࡕ ࡓࡉࡄࡀ ࡅࡓࡀࡌࡉࡕ ࡋࡍࡅࡓࡀ ࡄࡅ
300 ࡐࡀࡄࡓࡏࡉࡋ ࡏࡅࡕࡓࡀ ࡐࡀࡓࡅࡀࡍࡒࡀ ࡒࡀࡋࡉࡋࡀ ࡌࡉࡕࡉࡒࡓࡉࡀ ࡖࡊࡅࡋࡄࡅࡍ ࡂࡉࡍࡆࡉࡇ ࡁࡂࡀࡅࡇ ࡎࡀࡋࡒࡉࡀ ࡋࡀࡕࡀࡓ ࡍࡄࡅࡓ ࡄࡉࡁࡉࡋ ࡅࡔࡉࡕࡉࡋ ࡅࡀࡍࡅࡔ ࡖࡄࡉࡍࡅࡍ
301 ࡆࡉࡒࡀ ࡅࡍࡅࡓࡀ ࡅࡌࡉࡀ ࡖࡋࡅࡀࡕࡀࡊ ࡏࡕࡉࡁࡉࡅࡍ ࡁࡀࡃࡉࡀࡅࡓࡉࡀ⊚ ࡅࡗ ࡒࡀࡓࡉࡕ ࡅࡀࡌࡓࡉࡕ ࡏࡕࡉࡀࡓ ࡌࡉࡀ ࡄࡉࡉࡀ ࡋࡔࡊࡉࡍࡀࡕࡅࡍ ࡏࡕࡉࡀࡉࡓࡀࡕ ࡄࡀࡊࡀ ࡍࡉࡔࡉࡌࡕࡀ
302 ࡀࡌࡉࡍࡈࡅࡋ ࡖࡓࡀࡁࡉࡀ ࡁࡏࡊࡉࡋࡕࡀ ࡅࡌࡀࡔࡒࡉࡕࡀ ࡅࡓࡀࡅࡆࡀ ⊚ ࡅࡗ ࡓࡉࡄࡀ ࡁࡀࡎࡉࡌࡀ ࡀࡌࡓࡉࡕ ࡔࡀࡃࡀࡓࡕࡀ ࡖࡐࡀࡓࡅࡀࡍࡒࡀ ࡖࡔࡊࡉࡍࡕࡀ ࡍࡉࡔࡊࡅࡍࡋࡉࡀ ࡁࡀࡓࡒࡀ
303 ࡃࡀࡊࡉࡕࡀ ࡖࡁࡉࡕ ࡕࡀࡓࡅࡀࡍ ࡓࡁࡀ ⊚ ࡅࡗ ࡌࡔࡀࡁࡉࡍ ࡄࡉࡉࡀ ࡒࡀࡃࡌࡀࡉࡉࡀ ࡒࡀࡓࡉࡕ ࡒࡀࡉࡉࡌࡕࡉࡍࡅࡍ ࡋࡓࡀࡆࡉࡀ ࡖࡓࡅࡄࡀ ࡅࡍࡉࡔࡉࡌࡕࡀ ࡁࡄࡀࡉࡀࡋ ࡍࡀࡑࡉࡓࡅࡕࡀ
304 ࡀࡓࡉࡁࡕࡉࡍࡅࡍ ࡀࡌࡉࡍࡈࡅࡋ ࡖࡌࡔࡀࡁࡉࡍ ࡄࡉࡉࡀ ࡒࡀࡃࡌࡀࡉࡉࡀ ࡖࡍࡀࡑࡉࡓࡅࡕࡀ ࡊࡅࡋࡇ ࡁࡂࡀࡅࡇ ࡋࡂࡉࡈࡀ ࡅࡓࡀࡆࡉࡀ ࡁࡀࡓࡀࡉࡉࡀ ࡅࡂࡀࡅࡀࡉࡉࡀ ࡁࡂࡀࡅࡇ ࡐࡓࡀࡔ ⊚ ࡅࡗ
305 ࡏࡕࡉࡌࡋࡅࡍ ࡄࡉࡉࡀ ࡀࡌࡓࡉࡕ ࡋࡔࡉࡕࡉࡍ ࡄࡅࡂࡉࡀࡍࡉࡀ ࡃࡀࡊࡓࡉࡕ ࡔࡉࡕࡉࡍ ࡐࡀࡈࡉࡓࡉࡀ ࡖࡌࡀࡎࡉࡒࡕࡀ ࡄࡀࡕࡌࡀ ࡏࡕࡉࡌࡋࡅࡍ ࡄࡉࡉࡀ ࡁࡆࡉࡅࡀ ࡖࡓࡁࡉࡀ ࡍࡉࡄࡉࡅࡍ ࡀࡌࡉࡍࡈࡅࡋ
306 ࡖࡄࡀࡆࡉࡍ ࡏࡕࡉࡌࡋࡅࡍ ࡄࡉࡉࡀ ࡀࡌࡉࡍࡈࡅࡋ ࡃࡊࡅࡋ ࡌࡉࡍࡃࡀࡌ ࡖࡄࡀࡆࡉࡍ ࡏࡕࡉࡌࡋࡅࡍ ࡄࡉࡉࡀ ࡔࡉࡕࡉࡍ ࡉࡅࡌࡉࡀ ࡌࡍ ࡉࡅࡌࡀ ࡖࡌࡀࡑࡁࡅࡕࡀ ࡖࡃࡀࡉࡌࡀ ࡅࡀࡋࡌࡀ ࡋࡉࡅࡌࡀ ࡖࡍࡅࡓࡅࡆ
307 ࡓࡁࡀ ࡄࡅ ⊚ ࡀࡌࡉࡍࡈࡅࡋ ࡖࡌࡀࡋࡉࡀ ࡔࡉࡕࡉࡍ ࡄࡉࡍࡅࡍ ࡌࡉࡍࡃࡀࡌ ࡌࡉࡀ ࡄࡃࡉࡓࡉࡁࡇ ࡒࡀࡄࡃࡀ ࡅࡁࡅࡈࡍࡀ ࡅࡁࡀࡆࡉࡓࡀ ࡍࡀࡎࡉࡁ ࡅࡗ ࡄࡀࡆࡉࡍ ࡄࡅࡀ ࡅࡄࡀࡉࡆࡀࡊ ࡏࡕࡀࡎࡀࡒࡋࡇ
308 ࡏࡕࡉࡌࡋࡅࡍ ࡄࡉࡉࡀ ࡀࡌࡉࡍࡈࡅࡋ ࡖࡄࡀࡆࡉࡍ ࡏࡕࡉࡌࡋࡅࡍ ࡄࡉࡉࡀ ࡀࡌࡉࡍࡈࡅࡋ ࡖࡊࡅࡋ ࡌࡉࡍࡃࡀࡌ ࡁࡄࡀࡍࡀࡕࡅࡍ ࡁࡀࡆࡓࡀ ࡍࡀࡎࡁࡉࡀ ࡅࡌࡀࡋࡉࡀ ࡅࡍࡀࡐࡑࡉࡀ ࡅࡍࡅࡍࡉࡀ ࡃࡀࡉࡋࡉࡀ ࡅࡄࡉࡅࡀࡍࡉࡀࡕࡀ
309 ࡄࡀࡋࡁࡀ ࡉࡀࡄࡁࡀࡍ ࡅࡌࡉࡀ ࡈࡀࡐࡉࡍ ࡅࡀࡕࡉࡍ ࡅࡁࡉࡓࡒࡉࡀ ࡅࡆࡉࡒࡉࡀ ࡅࡀࡍࡀࡍࡉࡀ ࡋࡄࡀࡃ ࡔࡉࡕࡉࡍ ࡈࡀࡐࡉࡍ⊚ ࡅࡗ ࡔࡊࡉࡍࡉࡀ ࡄࡉࡉࡀ ࡁࡆࡉࡅࡀࡉࡄࡅࡍ ࡀࡌࡓࡉࡕ ࡊࡅࡋࡌࡉࡍࡃࡀࡌ
310 ࡋࡃࡅࡊࡕࡇ ࡍࡈࡉࡓ ࡊࡉࡍ ࡅࡏࡕࡊࡀࡍࡀࡍ ࡅࡏࡔࡕࡀࡃࡀࡓ ࡌࡍ ࡓࡉࡔ ࡁࡓࡉࡔ ⊚ ࡅࡗ ࡊࡋࡉࡋ ࡀࡋࡌࡉࡀ ࡔࡀࡄࡉࡀ ࡀࡌࡓࡉࡕ ࡊࡅࡋࡄࡅࡍ ࡓࡀࡆࡉࡀ ࡖࡏࡅࡑࡈࡅࡍࡀ ࡕࡀࡁࡓࡉࡍ
311 ࡍࡀࡐࡔࡀࡉࡄࡅࡍ ࡅࡌࡔࡀࡄࡉࡍ ࡒࡅࡃࡀࡌࡇ ࡖࡍࡉࡔࡉࡌࡕࡀ ࡅࡉࡀࡄࡁࡉࡋࡇ ࡎࡉࡂࡅࡃࡕࡀ ࡅࡃࡍࡅࡕࡀ ࡅࡄࡏ ࡍࡉࡔࡉࡌࡕࡀ ࡌࡉࡕࡄࡀࡉࡋࡀ ࡋࡄࡀࡃ ࡀࡓࡁࡉࡌࡀ ࡀࡋࡐࡉࡀ ࡓࡅࡁࡀࡍ
312 ࡅࡀࡌࡅࡆࡀ ࡓࡅࡄࡀ ࡁࡉࡄࡃࡀ {{ࡅࡓࡀ}} ࡅࡌࡓࡀࡅࡆࡀࡋࡇ ⊚ ࡅࡗ ࡀࡋࡌࡉࡀ ࡁࡌࡉࡔࡀ ࡔࡉࡄࡉࡀ ࡀࡌࡓࡉࡕ ࡓࡀࡆࡀ ࡖࡏࡍࡂࡉࡓࡕࡀ ࡁࡊࡅࡋࡄࡅࡍ ࡓࡀࡆࡉࡀ ࡌࡉࡕࡋࡀࡁࡀࡔ ࡅࡕࡋࡀࡕࡀ
313 ࡄࡀࡕࡌࡉࡀ ࡋࡓࡉࡔࡀ ࡁࡌࡉࡔࡀ ࡌࡉࡕࡄࡉࡕࡌࡇ ࡖࡄࡉࡍࡅࡍ ࡌࡀࡑࡁࡅࡕࡀ ࡅࡌࡀࡎࡉࡒࡕࡀ ࡅࡏࡍࡂࡉࡓࡕࡀ ࡀࡉࡀࡊ ࡍࡀࡅࡓࡀ ࡎࡒࡉࡋࡀ ࡖࡋࡓࡉࡔࡀ ࡖࡄࡀࡍࡀࡕࡇ
314 ࡔࡉࡔࡀ ࡃࡀࡄࡍࡉࡀ ⊚ ࡀࡌࡉࡍࡈࡅࡋ ࡖࡏࡅࡑࡈࡅࡍࡀ ࡒࡀࡃࡌࡀࡉࡀ ࡄࡅ ⊚ ࡅࡗ ࡁ{{ࡉ}}<<ࡆ>>ࡉࡅ ࡖࡍࡐࡉࡔ {{ࡀࡌࡓࡉࡕ}} ࡑࡁࡉࡍࡀ ࡀࡌࡓࡉࡕ ࡄࡀࡍࡀࡕࡇ ࡏࡃࡀࡍࡀ
315 ࡍࡉࡔࡉࡌࡕࡀ ࡐࡀࡓࡎࡀ ࡃࡓࡀࡉࡉࡀ ࡅࡋࡓࡅࡄࡀ ࡑࡀࡁࡀࡋࡇ ࡅࡐࡀࡄࡕࡀ ࡀࡉࡍࡀ ࡋࡊࡉࡌࡑࡉࡀ ࡊࡅࡋࡄࡅࡍ ࡅࡌࡀࡎࡉࡀࡋࡅࡍ ࡌࡍ ࡊࡅࡋࡄࡅࡍ ࡊࡉࡁࡉࡀ ࡅࡍࡈࡉࡈࡉࡀ ࡖࡏࡕࡁࡅࡍ
316 ⊚ ࡗ ࡔࡊࡉࡍࡉࡀ ࡄࡉࡉࡀ ࡁࡆࡉࡅࡀࡉࡄࡅࡍ ࡅࡍࡄࡅࡓࡀ^ࡉ^ࡄࡅࡍ ࡀࡌࡓࡉࡕ ࡓࡀࡆࡀ ࡖࡌࡀࡆࡓࡅࡕࡀ ࡃࡅࡊࡕࡇ ࡌࡉࡕࡍࡀࡈࡀࡓ ࡅࡓࡀࡅࡆ ࡅࡌࡉࡕࡒࡀࡉࡀࡌ
317 ⊚ ࡗ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡀࡌࡓࡉࡕ ࡔࡅࡁࡀ ࡓࡀࡆࡉࡀ ࡊࡀࡎࡉࡉࡀ ࡅࡍࡈࡉࡓࡉࡀ ࡖࡔࡓࡉࡉࡍ ࡁࡌࡅࡒࡓࡀ ࡌࡀࡌࡋࡉࡋࡉࡀ ࡅࡌࡉࡔࡕࡀࡉࡉࡍ ࡌࡍ
318 ࡋࡉࡔࡀࡍࡀ ࡅࡄࡀࡉࡋࡀ ࡉࡀࡄࡁࡉࡋࡇ ࡅࡌࡈࡀࡌࡀ ࡌࡍ ࡊࡅࡋࡄࡅࡍ ࡌࡀࡄࡅࡍࡉࡀ ࡌࡍ ࡒࡅࡃࡀࡌࡀ ࡀࡋࡌࡀ ࡋࡎࡀࡉࡀࡊࡕࡀ ࡖࡊࡅࡋࡇ ࡂࡉࡍࡆࡀ⊚ ࡅࡗ ࡌࡊࡀࡋࡀࡋࡍࡀ ࡅࡔࡀࡊࡀࡁࡍࡀ
319 ࡀࡌࡓࡉࡕ ࡔࡀࡊࡁࡉࡀ ࡕࡌࡉࡌࡉࡀ ࡅࡏࡕࡉࡓࡀࡍ ࡓࡀࡆࡉࡀ ࡕࡀࡒࡍࡉࡀ ࡗ ࡒࡀࡓࡁࡀࡍ ࡋࡅࡀࡕ ࡄࡃࡀࡃࡉࡀ ࡋࡍࡄࡅࡓࡀ ࡅࡋࡄࡔࡅࡊࡀ ࡅࡌࡀࡋࡀࡋࡇ ࡋࡁࡅࡑࡓࡀࡍࡀ ࡅࡃࡀࡁࡓࡉࡋࡇ
320 ࡌࡉࡍࡇ ࡋࡀࡕࡀࡓ ࡍࡄࡅࡓ⊚ ࡅࡗ ࡌࡉࡍࡇ ࡅࡌࡍ ࡔࡀࡓࡅࡉࡀ ࡀࡌࡓࡉࡕ ࡌࡉࡍࡃࡀࡌ ࡁࡏࡅࡄࡓࡀ ࡋࡓࡅࡄࡀ ࡅࡍࡉࡔࡉࡌࡕࡀ ࡋࡀࡍࡉࡕࡊࡀࡕࡓࡅࡍࡉࡍ ࡅࡌࡍ ࡄࡀࡅࡒࡀ ࡅࡆࡉࡅࡉࡄࡕࡀ
321 ࡖࡓࡀࡆࡉࡀ ࡁࡉࡔࡉࡀ ࡏࡋࡀࡅࡀࡉࡅࡍ ࡋࡀࡍࡀࡃࡉࡀ⊚ ࡅࡗ ࡁࡉࡍࡉࡀ ࡊࡉࡎࡉࡀ ࡋࡆࡉࡅࡀ ࡀࡌࡓࡉࡕ ࡀࡁࡀࡕࡅࡓ ࡓࡅࡔࡅࡌࡀ ࡌࡀࡕࡍࡀ ࡋࡓࡅࡄࡀ ࡅࡍࡉࡔࡉࡌࡕࡀ ࡅࡌࡍࡀࡕࡀ ࡖࡍࡄࡅࡓࡀ
322 ࡑࡀࡉࡀࡓ ࡏࡋࡀࡅࡀࡉࡅࡍ ࡊࡅࡋ ࡄࡀࡃ ࡀࡌࡉࡍࡈࡅࡋ ࡖࡄࡀࡃ ࡌࡍ ࡁࡍࡉࡀ ࡔࡋࡀࡌࡀ ࡖࡌࡍࡀࡕࡀ ࡁࡈࡀࡁࡅࡕࡀ ࡋࡂࡀࡈ ࡀࡁࡀࡕࡅࡓ ࡄࡅ ࡅࡄࡅ ࡓࡅࡔࡅࡌࡀ ࡖࡕࡓࡉࡍ ࡌࡀࡋࡊࡉࡀ
323 ࡌࡀࡕࡍࡀ ࡏࡋࡇ ࡀࡌࡉࡍࡈࡅࡋ ࡖࡐࡓࡅࡃࡒࡀ ࡖࡍࡄࡅࡓࡀ ࡅࡄࡔࡅࡊࡀ ࡋࡅࡀࡕࡇ ࡍࡈࡉࡓ ⊚ ࡅࡗ ࡍࡉࡀࡄࡀ ࡅࡔࡀࡋࡌࡀ ࡍࡉࡄࡅࡉࡀ ࡀࡌࡓࡉࡕ ࡊࡅࡋࡌࡉࡍࡃࡀࡌ ࡌࡍ ࡓࡀࡆࡉࡀ ࡋࡃࡅࡊࡕࡇ
324 ࡍࡄࡀ ࡅࡏࡊࡀࡉࡀࡍ ࡅࡌࡀࡎࡂࡉࡀ ࡅࡄࡀࡂࡉࡀ ࡅࡈࡀࡁࡉࡀ ࡌࡍ ࡔࡊࡉࡍࡕࡀ ࡋࡔࡊࡉࡍࡕࡀ ࡅࡌࡍ ࡌࡉࡑࡓࡀ ࡋࡌࡉࡑࡓࡀ ࡅࡌࡍ ࡊࡅࡃࡊࡀ ࡋࡊࡅࡃࡊࡀ ࡀࡋࡌࡀ ࡖࡌࡍ ࡄࡉࡉࡀ ࡌࡉࡕࡋࡉࡐ
325 ࡅࡌࡉࡔࡕࡊࡉࡍ ⊚ ࡅࡗ ࡏࡓࡅࡕࡀࡉ ࡅࡕࡅࡔࡁࡉࡄࡕࡀࡉ ࡀࡌࡓࡉࡕ ࡋࡓࡅࡄࡀ ࡅࡍࡉࡔࡉࡌࡕࡀ ࡌࡍ ࡄࡀࡃ ࡂࡈࡀࡓࡕࡉࡍࡅࡍ ࡖࡄࡅ ࡓࡀࡆࡀ ࡖࡄࡉࡋࡀࡐࡀ ࡔࡅࡌࡇ ࡅࡏࡍࡂࡀࡓ ࡊࡅࡔࡈࡀ
326 ࡄࡅ ⊚ ࡖࡌࡀࡄࡋࡉࡐ ࡄࡉࡋࡐࡉࡀ ࡊࡅࡋࡄࡅࡍ ࡌࡀࡈࡀࡓࡀࡕࡀ ࡕࡉࡂࡓࡀ ࡓࡀࡌࡉࡋࡇ ࡊࡅࡋ ࡆࡉࡁࡍࡀ ⊚ ࡅࡗ ࡏࡆࡉࡋ ࡁࡔࡋࡀࡌ ࡁࡄࡉࡓࡀ ࡃࡀࡊࡉࡀ ࡀࡌࡓࡉࡕ ࡌࡍ ࡄࡀࡊ ࡂࡉࡎࡀ
327 ࡖࡄࡀࡐࡉࡒࡉࡀ ࡌࡉࡀ ࡍࡉࡔࡉࡌࡕࡀ ࡄࡉࡋࡐࡀࡕ ࡅࡌࡉࡕࡀࡄࡆࡉࡀ ࡆࡉࡅࡀࡉࡊࡅࡍ ࡍࡀࡅࡓࡉࡀ ࡁࡌࡀࡍࡉࡀ ࡖࡀࡎࡂࡀࡅࡉࡕࡀ ࡁࡀࡉࡍࡀࡉࡄࡅࡍ ࡖࡔࡉࡁࡉࡀࡄࡉࡀ ࡀࡌࡉࡍࡈࡅࡋ {{ࡖ}} ࡖࡏࡋࡃࡇ
328 ࡖࡏࡅࡑࡈࡅࡍࡀ ࡄࡅ ࡍࡀࡄࡓࡀ ࡅࡌࡀࡍࡄࡉࡓࡀ ࡊࡅࡋࡄࡅࡍ ࡓࡀࡆࡉࡀ ࡖࡌࡉࡍࡇ ࡔࡊࡉࡍࡉࡀ⊚ ࡅࡗ ࡌࡀࡍࡀ ࡁࡂࡉࡍࡆࡉࡀ ࡄࡀࡃࡉࡀ ࡀࡌࡓࡉࡕ ࡄࡏ ࡍࡉࡔࡉࡌࡕࡀ ࡄࡀࡃࡉࡀ ࡌࡍ ࡊࡉࡕࡅࡍ
329 ࡁࡉࡎࡓࡀ ࡍࡉࡐࡒࡀࡕ ⊚ ࡅࡗ ࡈࡅࡁࡀࡊ ࡈࡅࡁࡀࡊ ࡍࡉࡔࡌࡀ ࡀࡌࡓࡉࡕ ࡔࡅࡁࡀ ࡂࡀࡓࡂࡋࡉࡀ ࡖࡔࡓࡉࡍ ࡁࡏࡅࡑࡈࡅࡍࡀ ࡈࡅࡁࡇ ࡖࡍࡉࡔࡉࡌࡕࡀ ࡔࡀࡉࡋࡉࡀ ࡀࡌࡉࡍࡈࡅࡋ ࡖ
330 ࡄࡀࡍࡀࡕࡇ ࡃࡅࡊࡕࡀ ࡖࡀࡆࡋࡀࡋࡇ ࡍࡉࡔࡉࡌࡕࡀ ࡅࡌࡀࡍࡄࡉࡓࡀࡋࡇ ࡌࡍ ࡊࡅࡋࡄࡅࡍ ࡀࡋࡌࡉࡀ ࡅࡏࡅࡑࡈࡅࡍࡀ ࡖࡍࡀࡐࡒࡀ ࡌࡉࡍࡇ ࡄࡀࡔࡅࡊ ࡅࡄࡀࡅࡉࡀ ࡗ ࡖࡋࡀࡄࡅࡀ ⊚ ࡅࡗ ࡄࡀࡁࡔࡀࡁࡀ
331 ࡅࡊࡅࡔࡈࡀ ࡅࡆࡉࡃࡒࡀ ࡋࡍࡉࡔࡉࡌࡀ ࡄࡅࡋࡇ ࡎࡀࡄࡃࡀ ࡒࡀࡓࡉࡕ ࡉࡀࡓࡃࡍࡀ ࡅࡀࡉࡀࡓ ࡅࡐࡀࡎࡉࡌࡊࡀ ࡀࡌࡓࡉࡕ ࡖࡄࡉࡍࡅࡍ ࡕࡋࡀࡕࡀ ࡓࡅࡔࡅࡌࡉࡀ ࡖࡌࡉࡍࡇ ࡍࡀࡐࡒࡉࡀ ࡅࡌࡀࡎࡂࡉࡍ
332 ࡅࡌࡀࡄࡋࡉࡐࡉࡋࡇ ࡌࡍ ࡁࡉࡕ ࡌࡀࡊࡎࡉࡀ ࡖࡄࡉࡍࡅࡍ ࡕࡋࡀࡕࡀ ࡓࡅࡔࡅࡌࡉࡀ ࡖࡏࡍࡂࡉࡓࡕࡀ ࡅࡌࡀࡎࡉࡒࡕࡀ ࡅࡊࡅࡔࡈࡀ ࡄࡅ⊚ ࡅࡗ ࡆࡉࡃࡀࡍࡀ ࡅࡌࡆࡀࡅࡃࡀࡍࡀ ࡀࡌࡓࡉࡕ ࡊࡅࡋࡄࡅࡍ
333 ࡈࡀࡁࡀࡅࡀࡕࡀ ࡅࡓࡉࡄࡁࡀࡕࡀ ࡖࡀࡋࡌࡉࡀ ࡖࡍࡄࡅࡓࡀ ࡒࡅࡃࡀࡌࡇ ࡏࡕࡀࡕࡍࡀ⊚ ࡅࡗ ࡎࡋࡉࡒ ࡅࡀࡎࡒࡀࡍ ࡌࡉࡍࡇ ࡀࡌࡓࡉࡕ ࡏࡕࡐࡀࡓࡒࡀࡕ ࡌࡍ ࡓࡀࡆࡉࡀ ࡊࡀࡃࡓࡉࡀ ࡅࡁࡓࡀࡆࡉࡀ
334 ࡒࡀ ࡒࡀࡋࡉࡋࡉࡀ ࡋࡉࡂࡈࡀࡕ ࡅࡁࡃࡓࡀࡁࡔࡉࡀ ࡄࡉࡅࡀࡓࡉࡀ ࡌࡍࡀࡕࡀ ࡐࡉࡋࡂࡀࡕ⊚ ࡅࡗ ࡉࡅࡌࡀ ࡖࡍࡀࡐࡉࡒ ࡍࡉࡔࡌࡀ ࡀࡌࡓࡉࡕ ࡊࡋࡉࡋࡀ ࡓࡀࡅࡆࡀ ࡁࡓࡉࡔࡀ ࡕࡓࡉࡑࡋࡇ ࡅࡊࡅࡋ
335 ࡖࡁࡀࡕ ࡄࡀࡍࡀࡕࡇ ࡍࡉࡔࡉࡌࡕࡀ ࡀࡔࡊࡀࡕ ⊚ ࡅࡗ ࡏࡕࡓࡉࡑࡕࡅࡍ ࡅࡏࡕࡒࡀࡉࡀࡌࡕࡅࡍ ࡁࡄࡉࡓࡀࡉ ࡀࡌࡓࡉࡕ ࡌࡀࡌࡋࡀ ࡍࡉࡔࡉࡌࡕࡀ ࡎࡀࡄࡒࡀ ࡅࡂࡀࡉࡀ ࡅࡌࡉࡕࡐࡀࡓࡐࡀ
336 ࡁࡊࡅࡋࡄࡅࡍ ࡏࡅࡁࡀࡃࡉࡀ⊚ ࡅࡗ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡖࡍࡉࡔࡌࡀࡕࡀ ࡀࡌࡓࡉࡕ ࡋࡄࡀࡌࡀ ࡅࡌࡉࡀ ࡅࡔࡐࡉࡍࡆࡀ ࡀࡋࡁࡅࡔࡀ ࡋࡍࡉࡔࡉࡌࡕࡀ ࡅࡋࡓࡅࡄࡀ
337 ࡌࡉࡕࡄࡉࡁࡋࡉࡍ ࡅࡁࡃࡓࡀࡁࡔࡉࡀ ࡌࡉࡍࡂࡉࡃࡋࡉࡍ ࡖࡆࡉࡅࡀࡉࡄࡅࡍ ࡋࡀࡄࡀࡔࡅࡊ ࡀࡌࡉࡍࡈࡅࡋ ࡖࡋࡄࡀࡌࡀ ࡅࡌࡉࡀ ࡅࡔࡐࡉࡍࡆࡀ ࡋࡁࡅࡔࡀ ࡅࡆࡌࡀ ࡅࡌࡉࡓࡕࡀ
338 ࡅࡁࡀࡋࡂࡀࡌ ࡅࡁࡉࡎࡓࡀ ࡅࡂࡉࡓࡌࡉࡀ ࡄࡉࡍࡅࡍ ࡖࡄࡉࡍࡅࡍ ࡋࡂࡀࡈࡀ ࡖࡊࡅࡋࡇ ࡄࡉࡊࡋࡀ ⊚ ࡅࡗ ࡁࡉࡍࡕࡀ ࡖࡁࡀࡉࡍࡉࡀ ࡄࡉࡉࡀ ࡏࡋࡀࡍࡉࡀ ࡈࡀࡁࡉࡀ ࡁࡂࡀࡅࡇ
339 ࡓࡀࡅࡆࡉࡀ ࡀࡌࡓࡉࡕ ࡐࡅࡌࡇ ࡐࡉࡄࡕࡀ ࡅࡋࡉࡔࡀࡍࡀ ࡅࡊࡀࡊࡉࡀ ࡅࡔࡉࡍࡉࡀ ࡅࡁࡀࡁࡉࡀ ࡅࡋࡉࡋࡉࡕࡀ ࡄࡉࡍࡅࡍ ⊚ ࡅࡗ ࡄࡀࡊࡀ ࡌࡀࡈࡉࡕ ࡄࡀࡆࡉࡍ ࡏࡍࡉࡀࡍࡀ
340 ࡀࡌࡓࡉࡕ {{ࡀࡉࡍࡀࡊ}} ࡌࡋࡉࡀ ࡀࡉࡍࡀࡊ ࡄࡅࡆࡉࡉࡀ ࡋࡐࡓࡀࡕ ࡖࡄࡀࡆࡀ ࡌࡀࡎࡉࡒࡕࡀ ࡖࡄࡅ ࡐࡅࡌࡀ ࡖࡍࡉࡔࡉࡌࡕࡀ ࡄࡅ ⊚ ࡕࡅࡌ ࡄࡉࡍࡅࡍ ࡓࡀࡄࡁࡀࡕࡀ
341 ࡄࡀࡆࡉࡍ ࡀࡌࡉࡍࡈࡅࡋ ࡖࡏࡋࡀࡍࡉࡀ ࡈࡀࡁࡉࡀ ࡖࡓࡀࡅࡆࡉࡇ ࡁࡁࡉࡍࡕࡀ ࡖࡄࡉࡉࡀ ࡄࡀࡍࡀࡕࡇ ࡄࡆࡉࡕࡀ ࡖࡄࡆࡉࡕࡋࡅࡍ ࡖࡄࡉࡍࡅࡍ ࡀࡌࡉࡍࡈࡅࡋ ࡖࡏࡋࡀࡍࡉࡀ ࡈࡀࡁࡉࡀ
342 ࡁࡉࡍࡕࡀ ࡖࡓࡀࡄࡁࡀࡕࡀ ࡖࡋࡈࡀࡁࡀࡄࡀࡕࡀ ࡌࡀࡕࡍࡀࡍ ࡄࡉࡍࡅࡍ⊚ ࡅࡗ ࡁࡓࡉࡊࡉࡀ ࡅࡌࡔࡀࡁࡉࡀ ࡄࡉࡉࡀ ࡓࡀࡁࡕࡉࡀ ࡀࡌࡓࡉࡕ ࡄࡀࡍࡀࡕࡇ ࡔࡅࡌࡀ
343 ࡅࡓࡉࡔࡀ ࡅࡋࡉࡔࡀࡍࡀ ࡖࡉࡀࡌࡉࡍࡀ ࡅࡎࡌࡀࡋࡀ ࡅࡁࡓࡀ ࡖࡉࡀࡌࡉࡍࡀ ࡅࡎࡌࡀࡋࡀ ࡅࡂࡀࡁࡀࡓࡅࡕࡀ ࡁࡔࡅࡁࡀ ࡌࡀࡋࡊࡉࡀ ࡏࡕࡋࡀࡁࡀࡔ ࡖࡄࡉࡍࡅࡍ ࡀࡁࡀ
344 ࡓࡁࡀ ࡖࡏࡒࡀࡓࡀ ࡅࡀࡁࡀࡕࡅࡓ ࡓࡀࡌࡀ ࡅࡔࡉࡋࡌࡀࡉ ࡓࡁࡀ ࡅࡍࡉࡃࡁࡀࡉ ࡈࡀࡁࡀ ࡅࡉࡅࡔࡀࡌࡉࡍ ࡓࡁࡀ ࡅࡎࡀࡓࡅࡀࡍ ࡍࡀࡈࡓࡀ ࡅࡀࡁࡀࡕࡅࡓ ࡖࡌࡅࡆࡀࡍࡉࡀ
345 ࡄࡉࡍࡅࡍ ࡄࡀࡋࡉࡍ ࡔࡅࡁࡀ ࡓࡀࡆࡉࡀ ࡁࡔࡅࡁࡀ ࡌࡀࡋࡊࡉࡀ ࡏࡕࡋࡀࡁࡀࡔ ࡅࡏࡎࡕࡀࡃࡓࡀࡕ ࡓࡅࡄࡀ ࡁࡍࡉࡔࡉࡌࡕࡀ ࡅࡍࡉࡔࡉࡌࡕࡀ ࡁࡀࡉࡀࡓ ࡏࡕࡋࡀࡁ^ࡀ^ࡔࡀࡕ
346 ࡅࡏࡕࡉࡒࡍࡀࡕ⊚ ࡅࡗ ࡌࡀࡓࡁࡉࡊࡉࡕ ࡅࡀࡌࡓࡉࡕ ࡈࡀࡁ ࡈࡀࡁࡀ ࡋࡈࡀࡁࡉࡀ ࡌࡆࡉ{ࡈ}<ࡂ>ࡉࡅࡍ ࡊࡅࡋࡄࡅࡍ ࡓࡀࡆࡉࡀ ࡖࡏࡅࡑࡈࡅࡍࡀ ࡁࡊࡅࡋࡄࡅࡍ ࡌࡀࡋࡊࡉࡀ ࡖࡀࡋࡌࡉࡀ
347 ࡖࡍࡄࡅࡓࡀ ࡅࡏࡕࡉࡀࡓࡀࡁ ࡎࡌࡀࡋࡀ ࡌࡍ ࡉࡀࡌࡉࡍࡀ ࡅࡃࡅࡓࡃࡉࡀ ࡕࡒࡅࡍ ࡁࡃࡅࡊࡕࡇ ࡍࡈࡉࡓ ࡅࡐࡓࡀࡔ ࡅࡉࡀࡎࡁࡀࡓ ࡎࡉࡁࡓࡀࡉࡅࡍ ࡅࡏࡕࡉࡁࡄࡀࡓࡉࡅࡍ
348 ࡁࡊࡅࡋ ࡂࡉࡍࡆࡀ⊚ ࡅࡗ ࡌࡒࡀࡉࡌࡉࡕ ࡅࡔࡀࡉࡋࡉࡕ ࡔࡅࡋࡕࡀ ࡉࡀࡄࡁࡀࡕࡋࡇ ࡈࡀࡁࡀࡅࡀࡕࡀ ࡅࡌࡄࡀࡃࡉࡀࡕࡋࡇ ࡄࡏ ࡁࡍࡀࡐࡔࡀ ࡄࡀࡃࡉࡀ ࡅࡊࡅࡋࡄࡅࡍ {{ࡎࡉࡃࡓࡉࡀ}}
349 ࡎࡉࡃࡓࡉࡀ ࡃࡀࡓࡉࡀ ࡅࡆࡉࡅࡀ ࡅࡍࡄࡅࡓࡀ ࡌࡀࡅࡆࡉࡐࡉࡀ ࡏࡋࡇ⊚ ࡅࡗ ࡔࡊࡀࡍ ࡄࡉࡉࡀ ࡔࡊࡉࡍࡕࡀ ࡀࡌࡓࡉࡕ ࡓࡀࡆࡀ ࡓࡀࡆࡀ ࡔࡊࡉࡍࡕࡇ ࡋࡂࡀࡈ ࡅࡏࡕࡀࡐࡓࡀࡔ
350 ࡓࡀࡆࡉࡀ ࡆࡉࡊࡓࡉࡀ ࡌࡍ ࡓࡀࡆࡉࡀ ࡍࡉࡒࡅࡁࡕࡀ ࡅࡁࡊࡅࡋ ࡄࡀࡃ ࡔࡊࡉࡍࡕࡀ ࡄࡀࡃ ࡃࡓࡀࡁࡔࡀ ࡏࡕࡉࡍࡂࡉࡃࡋࡇ ࡅࡁࡊࡅࡋ ࡓࡀࡆࡉࡀ ࡌࡍ ࡏࡅࡑࡈࡅࡍࡀ ࡄࡃࡀ ࡓࡅࡔࡅࡌࡀ
351 ࡏࡕࡀࡕࡍࡀ ࡏࡋࡇ⊚ ࡅࡗ ࡊࡁࡉࡔ ࡄࡔࡅࡊࡀ ࡁࡏࡅࡌࡇ ࡀࡌࡓࡉࡕ ࡔࡃࡅࡌ ࡅࡊࡓࡅࡍ ࡅࡂࡉࡅ ࡅࡂࡀࡐ ࡖࡄࡉࡍࡅࡍ ࡊࡀࡓࡎࡀ ࡕࡉࡕࡀࡉࡕࡀ ࡅࡁࡉࡍࡉࡀࡍࡀ ࡕࡉࡕࡀࡉࡀ
352 ࡅࡄࡅࡌࡀࡓࡕࡀ ࡖࡔࡅࡓࡀ ࡅࡈࡀࡄࡀࡋࡀ ࡄࡉࡍࡅࡍ ࡁࡀࡃࡌࡅ ࡀࡓࡁࡀ ࡓࡀࡆࡉࡀ ࡌࡀࡋࡊࡉࡀ ࡄࡉࡍࡅࡍ ࡖࡍࡄࡅࡓࡀ ࡁࡍࡉࡀ ࡔࡋࡀࡌࡀ ࡌࡉࡕࡉࡒࡓࡉࡍ ࡀࡋࡌࡉࡀ ࡖࡍࡄࡅࡓࡀ
353 ࡎࡀࡌࡊࡉࡀ ࡏࡋࡀࡅࡀࡉࡄࡅࡍ ࡄࡉࡍࡅࡍ⊚ ࡅࡗ ࡋࡓࡉࡄࡁࡀࡕࡀ ࡌࡀࡔࡊࡀࡕࡋࡇ ࡅࡁࡀࡉࡉࡕ ࡖࡓࡀࡄࡌࡉࡀ ࡕࡉࡁࡉࡀ ࡏࡋࡀࡅࡀࡉࡀࡍ ࡌࡍ ࡈࡀࡁࡀࡅࡀࡕࡅࡍ ࡄࡅࡓࡉࡍࡉࡀࡕࡀ ࡋࡀࡕࡉࡒࡓࡉࡀ
354 ࡅࡀࡍࡀࡕ ࡍࡀࡐࡔࡀࡊ ࡌࡍ ࡈࡀࡁࡀࡄࡀࡕࡀ ࡍࡎࡀࡁࡕ ࡏࡅ ࡔࡀࡋࡉࡌࡉࡀࡍ ࡍࡉࡔࡌࡀࡕࡀ ࡏࡅ ࡐࡎࡉࡒࡉࡀࡍ ࡌࡍ ࡒࡅࡃࡀࡌࡀࡊ ࡋࡄࡀࡌࡀ ࡏࡅ ࡌࡉࡍࡃࡀࡌ ࡌࡍ ࡓࡀࡄࡁࡀࡕࡀ
355 ࡀࡍࡀࡕ ࡓࡀࡄࡌࡇ ࡖࡊࡅࡋࡄࡅࡍ ࡀࡁࡀࡄࡀࡕࡀ ࡁࡏ {{ࡅࡎࡀ}} ࡅࡎࡀࡉࡉࡊ ࡗ ࡄࡀࡃ ࡂࡉࡍࡆࡀࡊ ࡊࡅࡋࡇ ࡒࡅࡃࡀࡌࡀࡊ ࡍࡉࡄࡅࡉࡀ ࡌࡂࡀࡋࡀࡉ ࡅࡋࡀࡌࡊࡀࡎࡀࡉ ࡅࡀࡕࡍࡀ ࡏࡃࡀࡊ ࡏࡋ
356 ࡓࡉࡔࡀࡊ ࡅࡀࡌࡅࡓ ࡁࡔࡅࡌࡀ ࡖࡄࡉࡉࡀ ࡄࡉࡉࡀ ࡒࡉࡓࡉࡅࡉࡀ ࡋࡉࡀࡅࡀࡓ ࡆࡉࡅࡀ ࡋࡕࡀࡂࡀࡊ ࡅࡄࡀࡉࡆࡀࡊ ࡓࡀࡄࡌࡉࡀ ࡁࡏ ࡋࡍࡀࡐࡔࡀࡊ ࡅࡋࡔࡅࡌࡀࡊ ࡅࡁࡏࡑࡓࡀࡊ ࡅࡀࡌࡅࡓ
357 ࡄࡀࡋࡉࡍ ࡓࡀࡄࡌࡉࡀ ࡅࡎࡀࡃࡀࡓࡀࡕࡀ ࡖࡀࡁࡀࡄࡀࡕࡀ ࡄࡉࡍࡅࡍ ⊚ ࡅࡀࡌࡅࡓ ࡋࡄࡉࡉࡀ ࡒࡀࡃࡌࡀࡉࡉࡀ ࡎࡀࡂࡉࡃࡍࡀ ࡅࡋࡌࡀࡓࡀࡉ ࡌࡀࡋࡊࡀ ࡓࡀࡌࡀ ࡓࡁࡀ ࡖࡍࡄࡅࡓࡀ ࡌࡔࡀࡁࡀࡍࡀ
358 ࡅࡋࡄࡀࡊ ࡐࡀࡓࡑࡅࡐࡀ ࡓࡁࡀ ࡖࡏࡒࡀࡓࡀ ࡖࡌࡍ ࡍࡀࡐࡔࡉࡇ ࡐࡓࡀࡔ ⊚ ࡀࡌࡉࡍࡈࡅࡋ ࡖࡓࡀࡄࡌࡉࡀ ࡖࡈࡀࡁࡀࡄࡀࡕࡀ ࡄࡀࡋࡉࡍ ࡃࡀࡌࡉࡍ ࡋࡐࡀࡕࡀࡊࡀࡕࡀ ࡖࡋࡓࡀࡆࡉࡀ ࡉࡀࡕࡉࡁ
359 ࡅࡍࡀࡈࡀࡓ ࡀࡌࡉࡍࡈࡅࡋ ࡖࡓࡀࡆࡀࡊ ࡁࡓࡀࡆࡀ ࡖࡍࡉࡔࡉࡌࡕࡀ ࡌࡉࡕࡍࡀࡈࡀࡓ ࡅࡉࡀࡕࡉࡁ ⊚ ࡉࡀ ࡔࡉࡕࡋࡀࡉ ࡁࡉࡕ ࡌࡉࡔࡒࡀࡋ ࡀࡉࡍࡉࡀ ࡁࡓࡀࡄࡌࡉࡀ ࡖࡈࡀࡁࡀࡄࡀࡕࡀ
360 ࡖࡒࡀࡓࡉࡕ ࡓࡅࡄࡀࡊ ࡅࡍࡉࡔࡉࡌࡕࡀ ࡅࡌࡀࡓࡉࡀ ࡖࡈࡀࡁࡀࡅࡀࡕࡀ ࡀࡋࡁࡉࡔࡕࡉࡍࡅࡍ ࡌࡍ ࡄࡃࡀࡃࡉࡀ ࡅࡁࡑࡀࡅࡕࡀ ࡏࡕࡉࡁࡉࡅࡍ ࡁࡀࡋࡌࡉࡀ ࡗ ࡒࡀࡓࡉࡕ ࡅࡀࡌࡓࡉࡕ
361 ࡕࡓࡅࡑ ࡀࡉࡍࡀࡉࡊࡅࡍ ࡋࡄࡀࡆࡀ ࡍࡉࡔࡉࡌࡕࡀ ࡃࡉࡋࡉࡀ ࡐࡋࡀࡍ ࡀࡋࡌࡉࡀ ࡖࡄࡂࡀࡂࡀ ࡅࡀࡋࡌࡉࡀ ࡖࡁࡉࡕ ࡕࡀࡓࡅࡀࡍ ࡊࡅࡋࡄࡅࡍ ࡁࡆࡉࡅࡀࡉࡄࡅࡍ ࡃࡀࡄࡍࡉࡀ ⊚ ࡕࡉࡃࡅࡍ ࡉࡀ ࡀࡄࡀࡍ ࡖࡏࡄࡀࡆࡉࡍ
362 ࡃࡉࡅࡀࡍ ࡋࡀࡄࡅࡀࡋࡇ ࡓࡉࡔࡀ ࡅࡃࡉࡍࡁࡀ ࡅࡋࡀࡄࡅࡀ ࡋࡁࡓ ࡌࡍ ࡄࡀࡆࡉࡍ ࡃࡉࡅࡀࡍ ࡄࡉࡉࡀ ࡄࡉࡍࡅࡍ ࡄࡀࡉࡀࡎࡀ ࡖࡌࡋࡉࡀ ࡓࡀࡄࡌࡉࡀ ࡅࡄࡉࡉࡀ ࡆࡀࡊࡏࡉࡍ ࡎࡀ
363 ࡄࡀࡆࡉࡍ ࡃࡉࡅࡀࡍ ࡅࡕࡀࡐࡎࡉࡓ ࡖࡓࡀࡆࡉࡀ ࡖࡀࡁࡀࡄࡀࡕࡀ ࡖࡀࡍࡎࡉࡕ ࡀࡍࡀ ࡀࡍࡉࡀ ࡅࡃࡀࡍࡉࡀ ࡅࡆࡅࡈࡀ ࡖࡀࡄࡀࡉ ࡕࡀ{{ࡓ}}ࡓࡌࡉࡃࡉࡀ ࡅࡀࡒࡀࡐࡓࡀ ࡖࡀࡕࡅࡕࡉࡀ ࡋࡉࡂࡓࡀࡉࡄࡅࡍ ࡖࡍࡀࡎࡀࡊࡉࡀ ࡀࡍࡀ ࡓࡁࡀࡉ ࡉࡉࡄࡉࡀ
364 ࡓࡀࡌ ࡆࡉࡄࡓࡅࡍ ࡁࡓ ࡌࡄࡀࡕࡀࡌ ࡁࡓ ࡌࡄࡀࡕࡀࡌࡉࡅࡄࡀࡍࡀ ࡁࡓ ࡁࡉࡄࡓࡀࡌ ࡁࡓ ࡌࡀࡔࡀࡃ ࡁࡓ ࡍࡀ}ࡔ̤ࡌࡉࡀ ࡁࡓ ࡊࡀࡓࡀࡌ ࡁࡓ ࡊࡀࡉࡓࡉࡀ ࡁࡓ ࡄ̤ࡀࡉࡀࡕ ࡊࡉࡍࡉࡀࡍࡇ ࡎࡀࡁࡅࡓ ࡖ
365 ࡀࡍࡎࡉࡕ ࡌࡍ ࡃࡉࡅࡀࡍ ࡖࡀࡍࡎࡉࡕ ࡋࡍࡀࡐࡔࡀࡉ ࡋࡄࡀࡃ ࡔࡀࡋࡌࡀࡍࡀ ࡅࡌࡄࡀࡉࡌࡍࡀ ࡖࡎࡄࡉࡃ ࡋࡉࡁࡇ ࡁࡄࡉࡉࡀ ࡒࡀࡃࡌࡀࡉࡉࡀ ࡅࡏࡕࡊࡀࡃࡀࡔ ࡋࡓࡀࡄࡌࡅࡕ ࡌࡀࡍࡃࡀ ࡖࡄࡉࡉࡀ ࡅࡀࡄࡀࡁ ࡆࡉࡃࡒࡀ ࡅࡈࡀࡁࡅࡕࡀ
366 ࡅࡀࡍࡎࡀࡋࡇ ࡃࡉࡅࡀࡍࡀࡍ ࡅࡎࡉࡃࡓࡀࡓࡉࡀ ࡅࡋࡄࡀࡆࡉࡍ ࡃࡉࡅࡀࡍ ࡖࡄࡀࡅࡉࡋࡇ ࡃࡅࡊࡓࡀࡍࡀ ࡁࡕࡉࡁࡉࡋ ࡅࡄࡀࡕࡀࡌ ࡁࡀࡋࡌࡉࡀ ࡓࡅࡓࡁࡉࡀ ࡏࡋࡀࡉࡉࡀ ࡖࡍࡄࡅࡓࡀ ࡖࡄࡅ ࡉࡀࡋࡅࡐࡀ ࡅࡒࡀࡓࡅࡉࡀ ࡅࡉࡀࡃࡅࡉࡀ ࡁࡄࡀࡆࡉࡍ
367 ࡔࡀࡓࡔࡀ ࡕࡀࡒࡍࡀ ࡅࡄࡉࡆࡉࡉࡇ ࡋࡆࡉࡅࡀ ࡅࡁࡀࡔࡒࡓࡉࡀ ࡖࡄࡅ ࡁࡀࡉࡀࡍ ࡁࡓࡄࡀࡅࡀ ࡔࡀࡁࡉࡒࡋࡇ ࡌࡀࡍࡃࡀ ࡖࡄࡉࡉࡀ ࡄࡀࡈࡀࡉࡉࡀ ࡅࡔࡅࡌࡀ ࡖࡌࡒࡀࡓࡉࡋࡇ عࡀࡆࡉࡆ ࡁࡓ ࡏࡅࡑࡈࡀࡃࡃࡉࡆࡐࡅࡋࡉࡀ ࡁࡓ ࡐࡀࡉࡆࡉࡀ
368 ࡁࡓ ࡒࡀࡎࡅࡌ ࡊࡉࡍࡉࡀࡍࡇ ࡎࡀࡁࡅࡓ ࡖࡀࡍࡎࡀࡉࡕࡋࡇ ࡌࡍ ࡃࡉࡅࡀࡍ ࡖࡀࡍࡎࡉࡕ ࡋࡍࡀࡐࡔࡀࡉ ࡌࡍ ࡃࡉࡅࡀࡍ ࡖࡓࡁࡀ [] ࡖࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡁࡓࡀࡁ ࡅࡓࡁࡇ ࡓࡁࡀࡉ ࡓࡀࡌ ࡁࡓ ࡉࡀࡄࡉࡀ
369 ࡁࡀࡊࡕࡉࡀࡓ ࡁࡓ ࡓࡁࡀࡉ ࡀࡃࡀࡌ ࡌࡄࡀࡕࡀࡌ ࡁࡓ ࡓࡁࡀࡉ ࡁࡉࡄࡓࡀࡌ ࡁࡓ ࡄࡉࡉࡀ ࡁࡓ ࡀࡃࡀࡌ ࡆࡀࡊࡉࡀ ࡊࡉࡍࡉࡀࡍࡇ ࡊࡅࡄ̤ࡀࡉࡋࡉࡀ ࡖࡀࡍࡎࡀ ࡋࡍࡀࡐࡔࡉࡀ ࡌࡍ ࡃࡉࡅࡀࡍ ࡖࡓࡁࡀ ࡅࡓࡀࡌࡀ ࡅࡉࡀࡒࡉࡓࡀ
370 ࡕࡀࡓࡌࡉࡃࡀ ࡕࡀࡒࡍࡀ ࡓࡁࡀࡉ ࡌࡄࡀࡕࡀࡌ ࡁࡓ ࡉࡀࡄࡉࡀ ࡁࡀࡉࡀࡍ ࡁࡓ ࡉࡅࡄࡀࡍࡀ ࡔࡀࡃࡀࡍ ࡁࡓ ࡆࡀࡊࡓࡉࡀ ࡁࡓ ࡄࡉࡁࡉࡋ ࡊࡉࡍࡉࡀࡍࡇ ࡎࡀࡁࡅࡓ ࡖࡀࡍࡎࡀ ࡋࡍࡀࡐࡔࡉࡇ ࡌࡍ ࡄࡀࡃ ࡃࡉࡅࡀࡍ ࡄࡀࡕࡉࡒࡀ ࡖࡓࡉࡔࡀ
371 ࡅࡃࡉࡍࡁࡀ ࡋࡀࡄࡅࡀࡋࡇ ࡅࡄࡅࡀ ࡌࡐࡀࡎࡀࡒ ࡅࡊࡕࡀࡁ ࡀࡌࡅࡃ ࡄࡆࡀࡕ ࡀࡉࡍࡉࡀ ࡅࡋࡀࡄࡅࡀ ࡃࡉࡍࡁࡀ ࡖࡀࡍࡀࡎࡀࡕࡀ ࡖࡉࡀࡃࡀ ࡋࡌࡀࡍ ࡄࡅ ࡅࡀࡌࡀࡓ ࡖࡋࡀࡄࡆࡉࡕ ࡋࡁࡓ ࡌࡉࡍࡇ ࡅࡄࡉࡉࡀ ࡆࡀࡊࡏࡉࡍ ࡎࡀ
372 ࡕࡅࡌ ࡏࡎࡕࡀࡃࡀࡓ ࡅࡎࡋࡉࡒ ࡋࡓࡉࡔ ࡄࡀࡆࡉࡍ ࡃࡉࡅࡀࡍ ࡉࡀࡒࡉࡓࡀ ࡉࡅࡌࡀ ࡖࡄࡀࡌࡔࡀ ࡄࡀࡁࡔࡀࡁࡀ ࡅࡕࡓࡉࡍ ࡁࡉࡀࡄࡓࡀ ࡖࡌࡉࡑࡀࡉ ࡂࡀࡉࡈࡀ ࡖࡄࡅ {{ࡔ}} ࡏࡋࡅࡋ ࡔࡅࡌࡁࡅࡋࡕࡀ ࡁࡔࡉ>>ࡍ<<{{ࡕࡀ}}^ࡃࡕࡀ^ ࡖࡍࡅࡍࡀ ࡁࡔࡉࡃࡕࡀ ࡖ
373 ࡀࡓࡁࡀ ࡄࡀࡁࡔࡀࡁࡀ ࡋࡔࡍࡀࡕ ࡀࡋࡐࡀ ࡅࡏࡌࡀࡕࡉࡍ ࡅࡕࡌࡀࡍࡉࡀ ࡅࡕࡋࡀࡕࡉࡍ ࡔࡍࡉࡀ ࡖࡒࡀࡁࡉࡋࡉࡅࡍ ࡀࡓࡁࡀࡉࡉࡀ ࡀࡓࡀࡁ ࡀࡋࡌࡀ ࡏࡋࡀࡅࡀࡉࡄࡅࡍ ࡅࡁࡀࡈࡋࡉࡀ ࡌࡀࡍࡃࡀ ࡖࡄࡉࡉࡀ ࡋࡓࡅࡂࡆࡀࡉࡄࡅࡍ ࡌࡍ ࡊࡀࡍࡀ ࡓࡁࡀ ࡖࡍࡉࡔࡌࡀࡕࡀ
374 ࡁࡌࡀࡕࡀ ࡖࡌࡅࡔ̤ࡀࡓࡀ ࡁ̊̊ࡅࡌ̊ࡀ ࡖࡔࡀࡌࡔࡇ ࡌࡉࡒࡃࡀࡌ ࡔࡉࡕࡉࡍ ࡁࡀࡉࡕࡇ ࡊࡅࡋࡇ ࡄࡅࡀࡕ ࡌࡀࡍࡃࡀࡉࡉࡀ ࡁࡄ̤ࡅࡊࡅࡌ ࡔࡀࡉࡊ ࡋࡌࡅࡍࡕࡐࡉࡔ̤ ࡄ̤ࡅࡌࡅࡃ ࡄࡅࡀ ࡏࡅࡉࡓࡀ ࡅࡔࡉࡄࡉࡀࡍࡀ ࡖࡁࡀࡂࡃࡀࡃ
375 ࡃࡀࡅࡅࡃ ࡁࡀࡔࡀ ࡅࡄ̤ࡉࡊࡉࡌ ࡁࡀࡑࡓࡀ ࡊࡀ ࡈࡅࡌ ࡀࡂࡀ ࡁࡌࡀࡉࡀ ࡖࡐࡀࡓࡀࡄ ࡁࡁࡀࡉࡕࡀ ࡖࡀࡁࡀ ࡖࡆࡀࡅࡀࡉ ࡎࡀࡋࡅࡌ ࡁࡓ ࡌࡅࡎعࡉࡃ ࡊࡉࡍࡉࡀࡍࡇ ࡃࡅࡓࡀࡊࡉࡀ ࡁࡄࡀࡊ ࡏࡃࡀࡍࡀ ࡄࡅࡀࡕ ࡁࡔࡅࡔࡕࡀࡓ
376 ࡅࡄࡅࡀ ࡊࡀࡋࡅࡉࡉࡀ ࡋࡄࡅࡃࡇ ࡂࡀࡍࡆࡉࡁࡓࡀ ࡓࡁࡀࡉ ࡁࡉࡄࡓࡀࡌ ࡎࡀࡌ ࡁࡓ ࡂࡀࡍࡆࡉࡁࡓࡀ ࡕࡀࡒࡍࡀ ࡓࡁࡀࡉ ࡉࡀࡄࡉࡀ ࡉࡅࡄࡀࡍࡀ ࡁࡓ ࡓࡁࡀࡉ ࡆࡉࡄࡓࡅࡍ ࡀࡃࡀࡌ ࡊࡉࡍࡉࡀࡍࡇ ࡎࡀࡁࡅࡓ ࡒࡅࡃࡀࡌ ࡃࡉࡄࡅࡀ ࡓࡁࡀ
377 ࡁࡀࡎࡓࡀ ࡉࡅࡌࡉࡀ ࡆࡂࡀ ࡁࡓࡅࡀࡄࡀ ࡖࡄࡉࡉࡀ ࡅࡊࡀࡍࡀ ࡖࡍࡉࡔࡌࡀࡕࡀ ࡕࡀࡌࡅࡍ ࡁࡋࡀ ࡂࡀࡍࡆࡉࡁࡓࡀ ࡅࡕࡀࡓࡌࡉࡃࡉࡀ ࡏࡊࡀ ࡕࡌࡀࡍࡉࡀ ࡊࡅࡋࡄࡀࡃ ࡌࡉࡍࡅ ࡁࡄࡀࡃ ࡔࡀࡓࡀ ࡌࡀࡓࡀࡉ ࡌࡀࡌࡈࡉࡋࡅ ࡒࡀࡓ
378 ࡄࡃࡀࡃࡉࡀ ࡋࡕࡀ ࡔࡀࡓࡔࡀ ࡌࡄࡀࡉࡉࡋࡀ ࡅࡌࡀࡓࡀࡉ ࡄࡀࡉࡀࡎࡀ ࡖࡄࡀࡉࡉࡎ ࡋࡍࡉࡔࡌࡀࡕࡀ ࡅࡋࡉࡁࡀࡉ ࡌࡀࡓࡉࡓࡀ ࡌࡍ ࡏࡁࡉࡃࡀࡕࡀ ࡖࡕࡀࡓࡌࡉࡃࡉࡀ ࡕࡀࡌࡅࡍ ࡁࡋࡀ ࡈࡀࡌࡀ ࡅࡋࡀࡉࡀࡃࡉࡍ ࡕࡓࡀࡑࡀ ࡖࡌࡀࡌࡋࡀ
A01 ࡎࡀࡁࡀࡓࡌࡏࡉࡋ ࡃࡓࡀࡁࡔࡀ ࡄࡅ
A02 ࡁࡉࡄࡃࡀࡃ ࡃࡓࡀࡁࡔࡀ ࡄࡅ
A03 ࡁࡀࡓࡌࡏࡉࡋ ࡃࡓࡀࡁࡔࡀ ࡄࡅ
A04 ࡁࡉࡄࡓࡀࡌ ࡃࡓࡀࡁࡔࡀ ࡄࡅ
A05 ࡔࡉࡔࡋࡀࡌ ࡃࡓࡀࡁࡔࡀ ࡄࡅ
A06 ࡔࡉࡔࡋࡀࡌࡏࡉࡋ ࡃࡓࡀࡁࡔࡀ ࡄࡅ
A07 ࡔࡉࡔࡋࡀࡌࡏࡉࡋ ࡃࡓࡀࡁࡔࡀ ࡄࡅ
A08 ࡌࡀࡍࡄࡀࡓࡏࡉࡋ ࡃࡓࡀࡁࡔࡀ ࡄࡅ
A09 ࡍࡅࡓࡏࡉࡋ ࡃࡓࡀࡁࡔࡀ ࡄࡅ
A10 ࡌࡀࡍࡄࡀࡓࡏࡉࡋ ࡃࡓࡀࡁࡔࡀ ࡄࡅ
A11 ࡆࡉࡄࡓࡅࡍ ࡃࡓࡀࡁࡔࡀ ࡄࡅ
A12 ࡎࡀࡄࡒࡏࡉࡋ ࡃࡓࡀࡁࡔࡀ ࡄࡅ
A13 ࡄࡀࡉࡉࡋ ࡃࡓࡀࡁࡔࡀ ࡄࡅ
A14 ࡓࡏࡉࡋ ࡃࡓࡀࡁࡔࡀ ࡄࡅ
A15 ࡌࡀࡍࡄࡀࡓࡏࡉࡋ ࡃࡓࡀࡁࡔࡀ ࡄࡀࡋࡉࡍ ࡏࡅࡕࡓࡉࡀ ࡍࡀࡄࡓࡉࡁࡇ
A16
A17 ࡁࡉࡄࡓࡀࡌ ࡍࡁࡀࡈ ࡄࡅ
A18 ࡔࡉࡋࡌࡀࡉ ࡁࡓ ࡎࡄࡀࡒ ࡓࡁࡀ ࡄࡅ
A19 ࡄࡉࡁࡉࡋ ࡓࡁࡀ ࡄࡅ
A20 ࡔࡉࡕࡉࡋ ࡓࡁࡀ ࡄࡅ
A21 ࡉࡅࡐࡉࡍ ࡓࡁࡀ ࡄࡅ
A22 ࡉࡅࡔࡀࡌࡉࡍ ࡓࡁࡀ ࡄࡅ
A23 ࡍࡀࡈࡓࡏࡉࡋ ࡏࡅࡕࡓࡀ ࡄࡅ
A24
A25 ࡁࡉࡄࡓࡀࡌ ࡁࡓ ࡍࡁࡀࡈ ࡓࡁࡀ ࡄࡅ
A26 ࡔࡉࡋࡌࡀࡉ ࡁࡓ ࡎࡄࡀࡒ ࡓࡁࡀ ࡄࡅ
A27 ࡄࡉࡁࡉࡋ ࡉࡀࡅࡀࡓ ࡄࡅ
A28 ࡁࡉࡄࡓࡅࡍ ࡉࡅࡎࡌࡉࡓ ࡓࡁࡀ ࡄࡅ
A29 ࡎࡀࡌ ࡓࡁࡀ ࡄࡅ
A30 ࡍࡉࡃࡁࡀࡉ ࡓࡁࡀ ࡄࡅ
A31 ࡆࡉࡄࡓࡅࡍ ࡉࡀࡅࡀࡓ ࡄࡅ
A32 ࡌࡀࡍࡄࡀࡓࡏࡉࡋ ࡃࡓࡀࡁࡔࡀ ࡄࡀࡋࡉࡍ ࡏࡅࡕࡓࡉࡀ ࡍࡀࡄࡓࡉࡁࡇ