The Comprehensive Aramaic Lexicon

021:01	ܨܦܪܐ ܗܘܼܐ܂ ܡܛܠ ܓܝܪ ܕܐܫܬܠܡ ܝܘܡܐ ܬܠܝܬܝܐ܂ ܒܗܿܝ
021:02	ܕܐܡܼܪ ܕܗܘܐ ܪܡܫܐ ܘܗܘܐ ܨܦܪܐ ܝܘܡܐ ܕܬܠܬܐ܂
021:03	ܠܐ ܒܪܐ ܗܘܐ ܬܪ̈ܝܗܘܢ ܢܗܝܪ̈ܐ ܒܥܕܢܐ ܕܪܡܫܐ ܕܕܠܡܐ
021:04	ܠܠܝܐ ܠܐܝܡܡܐ ܢܫܬܚܠܦ ܗܘܼܐ܂ ܘܨܦܪܐ ܡܼܢ ܪܡܫܐ
021:05	ܢܬܩܫܫ ܗܘܐ܀
021:06	ܡܛܠ ܟܝܬ ܕܝܘ̈ܡܬܐ ܒܛܟܣܐ ܕܐܬܒܪܝ ܝܘܡܐ
021:07	ܩܕܡܝܐ ܗܘܝܢ ܗܘܘ܂ ܘܐܦ ܝܘܡܐ ܐܪܒܝܥܝܐ ܠܠܝܗ ܗܼܘ
021:08	ܐܝܟ ܕܚܒܪ̈ܘܗܝ ܩܕܝܡ ܗܘܐ ܠܐܝܡܡܗ܂ ܘܐܢ ܪܡܫܗ ܡܼܢ
021:09	ܨܦܪܗ ܩܫܝܫ ܗܘܼܐ܂ ܠܐ ܡܕܝܢ ܐܬܒܪܝܘ ܢܗܝܪ̈ܐ ܒܪܡܫܐܼ܂
021:10	ܐܠܐ ܒܥܕܢܐ ܕܨܦܪܐ܂ ܕܢܐܡܪ ܓܝܪ ܕܚܕ ܡܢܗܘܢ ܐܬܒܪܝ
021:11	ܒܪܡܫܐ ܘܐܚܪܝܢ ܒܨܦܪܐܼ܂ ܠܐ ܡܪܦܝܐ ܗܿܝ ܕܐܡܼܪ ܕܢܗܘܘܢ
021:12	ܢܗܝܪ̈ܐ܂ ܘܕܥܒܕ ܐܠܗܐ ܬܪ̈ܝܢ ܢܗܝܪ̈ܝܢ ܪ̈ܘܪܒܐ܂ ܐܢ ܟܝܬ
021:13	ܪ̈ܘܪܒܐ ܗܘܘ ܟܕ ܐܬܒܪܝܘ܂ ܘܒܨܦܪܐ ܐܬܒܪܝܘ܂ ܡܕܝܢ ܫܡܫܐ
021:14	ܒܡܕܢܚܐ ܩܐܡ ܗܘܐ܂ ܘܣܗܪܐ ܠܩܘܒܠܗ ܒܡܥܪܒܐ܂
021:15	ܡܥܡܩ ܗܘܐ ܕܝܢ ܘܡܬܚܬܝ ܫܡܫܐ܂ ܡܛܠ ܕܒܕܘܟܬ ܡܦܩܗ
021:16	ܕܥܠ ܐܪܥܐ ܐܬܒܪܝ ܗܘܐܼ܂ ܡܥܠܝ ܗܘܐ ܕܝܢ ܣܗܪܐ܂ ܡܛܠ
021:17	ܕܒܕܘܟܬܐ ܕܩܐܡ ܒܝܘܡ ܚܡܫܥܣܪܐ ܐܬܒܪܝ ܗܘܐ܂
021:18	ܒܥܕܢܐ ܟܝܬ ܕܐܬܚܙܝ ܫܡܫܐ ܠܐܪܥܐܼ܂ ܚܙܘ ܢܗܝܪ̈ܐ ܚܕܕܐ
021:19	ܘܟܢ ܥܡܼܕ ܗܘܐ ܣܗܪܐ܂ ܡܢ ܕܘܟܬ ܣܗܪܐ ܟܝܬ ܘܡܼܢ
021:20	ܪܒܘܬܗ ܘܡܢܗܪܢܘܬܗ ܐܝܕܝܥ ܕܒܪ ܚܡܫܬܥܣܪ ܗܘܐ
021:21	ܝܘ̈ܡܝܢ ܟܕ ܐܬܒܪܝ ܗܘܐ܀
021:22	ܐܝܟ ܕܩܫܝܫܝܢ ܗܘܘ ܓܝܪ ܐܝ̈ܠܢܐ ܘܡܘ̈ܥܝܬܐ ܘܚܝܘ̈ܬܐ
021:23	ܘܦܪܚܬܐ ܐܦ ܒܪܢܫܐ ܘܛܠܝܢ ܗܘܘ܂ ܩܫ̈ܝܫܝܢ ܗܘܘ ܓܝܪ ܐܝܟ
021:24	ܕܡܼܢ ܚܙܬܐ ܕܗܕ̈ܡܝܗܘܢ ܘܕܩܢܘܡ̈ܝܗܘܢ܂ ܛܠܝܢ ܗܘܘ ܕܝܢ
021:25	ܡܛܠ ܫܥܬܐ ܘܥܕܢܐ ܕܒܪܝܬܗܘܢ܂ ܗܟܢܐ ܐܦ ܣܗܪܐ
021:26	ܩܫܝܫ ܗܘܐ ܘܛܠܐ ܗܘܐ܂ ܛܠܐ ܗܘܐ ܕܒܪ ܫܥܐ ܗܘܐ܂
021:27	ܩܫܝܫ ܗܘܐ ܕܝܢ ܕܐܝܟ ܕܒܝܘܡ ܚܡܫܥܣܪܐ ܡܫܡܠܝ ܗܘܐ܀
021:28	ܐܠܘ ܓܝܪ ܒܪ ܝܘܡܐ ܐܘ ܒܪ ܬܪ̈ܝܢ ܐܬܒܪܝ ܗܘܼܐ܂ ܠܐ
021:29	ܡܢܗܪ ܗܘܼܐ܂ ܡܛܘܠ ܩܪܝܒܘܬܗ ܕܠܫܡܫܐܼ܂ ܐܦ ܠܐ
021:30	ܡܬܚܙܝܘ ܡܬܚܙܐ ܗܘܐ܂ ܘܕܢܬܒܪܐ ܗܘܐ ܐܝܟ ܒܪ ܐܪܒܥܐ
021:31	ܝܘ̈ܡܝܢ ܐܦܢ ܡܬܚܙܐ ܗܘܼܐ܂ ܐܠܐ ܠܐ ܡܢܗܪ ܗܘܐ܂