← Back
The Comprehensive Aramaic Lexicon
← Return to the Text Browser
click on the file description for more information
60100: AGnEx (Aphrem on Genesis and Exodus)

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous page


035:01 ܒܪܐ ܟܝܬ ܐܠܗܐ ܐܝܠܢ ܚܝ̈ܐܼ܂ ܘܚܦܝܗ ܡܼܢ ܕܒܝܬ ܐܕܡ܂
035:02 ܚܕܐ ܕܠܐ ܢܩܪܒ ܥܡܗܘܢ ܒܫܘܦܪܗ ܘܢܥܦܗ ܠܐܝܓܘܢܗܘܢܼ܂
035:03 ܘܕܠܐ ܘܿܠܐ ܗܘܼܐ ܕܡܛܠ ܦܘܪܥܢܐ ܕܩܕܡ ܥܝܢܝ̈ܗܘܢ
035:04 ܢܙܕܗܪܘܢ ܗܘܘ ܒܦܘܩܕܢܗ ܕܗܿܘ ܕܠܐ ܡܬܚܙܐ܀ ܐܦܢ ܟܝܬ
035:05 ܟܘܠ ܡܕܡ ܒܛܝܒܘܬܐ ܝܗܒܼ ܠܗܘܢܼ܂ ܚܝ̈ܐ ܕܠܐ ܡܝܬܝܢ܃
035:06 ܕܡܬܝܗܒܝܢ ܒܡܟܘܠܬܗ ܕܐܝܠܢܐ ܕܚܝ̈ܐܼ܂ ܒܟܐܢܘܬܐ ܨܒܼܐ
035:07 ܕܢܬܠ ܠܗܘܢ܀ ܣܼܡ ܠܗܘܢ ܗܟܝܠ ܦܘܩܕܢܐ܂ ܠܐ ܗܘܼܐ ܕܝܢ
035:08 ܦܘܩܕܢܐ ܪܒܐ܃ ܕܫܿܘܐ ܠܦܘܪܥܢܐ ܡܝܬܪܐ ܕܡܛܝܒ ܗܘܐ
035:09 ܠܗܘܢ܂ ܐܠܐ ܟܠܼܐ ܡܢܗܘܢ ܚܕ ܐܝܠܢܐܼ܂ ܕܠܐ
035:10 ܬܚܝܬ ܦܘܩܕܢܐ܂ ܝܗܼܒ ܠܗܘܢ ܕܝܢ ܟܠܗ ܦܪܕܝܣܐܼ܂ ܕܠܐ
035:11 ܢܬܥܨܘܢ ܠܡܥܒܪܗ ܠܢܡܘܣܐ܀
035:12 ܡܛܠ ܟܝܬ ܕܡܢܣܝܢܐ ܐܝܟ ܕܐܡܪܬ ܡܬܒܥܐ ܗܘܼܐ܂
035:13 ܠܐ ܐܬܝܗܒܬ ܠܗ ܠܣܛܢܐ ܕܚܕ ܡܼܢ ܥܝܪ̈ܐ܂ ܐܘ ܚܕ ܡܼܢ
035:14 ܣܪ̈ܦܐ ܘܟܪ̈ܘܒܐ ܥܠ ܗܕܐ ܨܝܕ ܐܕܡ ܢܫܬܠܚ ܗܘܐ܂ ܘܠܐ
035:15 ܠܗ ܠܣܛܢܐ ܐܬܝܗܒܬ ܕܒܚܙܬܐ ܕܐܢܫܐ܂ ܐܘ ܕܒܚܙܬܐ
035:16 ܐܠܗܝܬܐ ܕܐܬܼܐ ܒܗܿ ܠܘܬ ܡܪܢ ܒܛܘܪܐ܂ ܕܢܐܬܐ ܗܘܼܐ
035:17 ܒܗܿ ܠܘܬ ܐܕܡ ܠܓܢܬܐ܂ ܠܐ ܐܬܝ ܚܝ̈ܘܬܐ ܪ̈ܘܪܒܬܐ
035:18 ܘܡܫܡ̈ܗܬܐ܂ ܗܢܘ ܕܝܢ ܒܗܡܘܬ ܐܘ ܠܘܝܬܢ܂ ܘܠܐ ܐܬܝ
035:19 ܡܼܢ ܚܝܘ̈ܬܐ ܐܚܪ̈ܢܝܬܐ܂ ܐܘ ܡܼܢ ܒܥܝܪܐ ܕܟܝܬܐ܂ ܕܕܠܡܐ
035:20 ܒܚܕܐ ܡܼܢ ܗܠܝܼܢ܂ ܥܠܬܐ ܠܥܒܪ̈ܝ ܦܘܩܕܢܐ ܬܫܬܟܚ ܗܘܬ܂
035:21 ܐܠܐ ܡܫܬܒܩ ܕܢܐܬܐ ܠܘܬܗܘܢ ܚܘܝܐ܂ ܗܢܐ ܕܐܦܢ ܥܪܝܡ
035:22 ܗܘܐ܂ ܐܠܐ ܕܠܐ ܣܟܐ ܒܣܐ ܘܡܫܟܪ ܗܘܐ܀
035:23 ܘܚܘܝܐ ܕܐܬܼܐ ܗܘܼܐ܂ ܠܐ ܟܕ ܥܒܿܕ ܐܬܘ̈ܬܐ ܫܪ̈ܝܪܬܐ܂
035:24 ܘܠܐ ܟܕ ܓܒܿܠ ܘܐܦܢ ܚܙܘܐ ܕܙܐܦܐ܂ ܐܠܐ ܐܬܼܐ ܒܠܚܘܕܘܗܝ
035:25 ܟܕ ܡܫܦܠ܂ ܟܕ ܡܪܟܢ ܥܝܢܘ̈ܗܝ ܕܠܐ ܡܫܟܚ ܠܡܚܪ ܒܙܝܘܗܿ
035:26 ܕܗܿܝ ܕܡܢܗ ܡܬܢܣܝܐ ܗܘܬ܂ ܘܠܐ ܐܬܼܐ ܡܛܠ ܩܢܛܗ ܨܝܕ
035:27 ܐܕܡ܂ ܐܠܐ ܐܬܼܐ ܨܝܕ ܚܘܐ܂ ܕܢܣܪܗܒ ܢܘܟܠܗܿ ܡܼܢ ܐܝܠܢܐ܂
035:28 ܕܐܬܦܩܕܬ ܕܠܐ ܬܐܟܘܠ ܡܢܗ܂ ܟܕ ܥܕܟܝܠ ܡܼܢ ܐܠ̈ܦܐ ܘܡܢ
035:29 ܪ̈ܒܘܬܐ ܕܐܬܝܗܒܘ ܠܗܿ ܠܐ ܛܥܡܬ܂ ܘܕܠܐ ܛܥܡܬܼ܂ ܠܐ
035:30 ܗܘܼܐ ܕܨܝܡܐ ܗܘܬ܂ ܟܦܢܐ ܗܘ ܥܕܟܝܠ ܠܐ ܫܠܼܛ ܗܘܐ ܒܗܿ܂
035:31 ܡܛܠ ܕܒܗ ܗܼܘ ܒܥܕܢܐ ܐܬܒܪܝܬ ܗܘܬ܀

next page