The Comprehensive Aramaic Lexicon

092:01	ܠܝܥܩܘܒ ܪܚܡ ܗܘܼܐ ܐܠܐ ܠܢܦܫܗܼ܂ ܐܡܼܪ܂ ܢܣܝܬ ܘܒܪܟܢܝ
092:02	ܡܪܝܐ ܡܛܠܬܟ܂ ܐܠܐ ܦܪܘܫ ܐܓܪܟ ܥܠܝ ܘܐܬܠ܂ ܐܬܛܦܝܣ
092:03	ܕܝܢ ܝܥܩܘܒ ܡܛܠ ܕܥܕܟܝܠ ܠܐ ܐܬܦܣܣ ܗܘܐ ܠܗ ܡܢ ܐܠܗܐ
092:04	ܕܢܐܙܠ܀ ܐܠܗܐ ܕܚܼܙܐ ܠܠܒܢ ܕܛܠܡܗ ܐܓܪܐ ܠܗܿܘ ܕܐܩܝܡ
092:05	ܠܗ ܕܐܢܐ ܐܚܘܬ ܥܡܟ ܘܐܢܐ ܐܣܩܟ ܡܼܢ ܬܡܢ܂ ܘܡܢܗܿ
092:06	ܘܒܗܿ ܕܥܢܗ ܕܠܒܢ ܐܥܬܪܗ ܠܝܥܩܘܒ ܟܕ ܠܗ ܠܠܒܢ ܡܕܡ ܠܐ
092:07	ܣܓܦ ܗܘܐ܀
092:08	ܠܢܣܝܢܗ ܗܼܘ ܓܝܪ ܕܠܒܢ ܣܓܝܢ ܗܘܘ ܒܥܢܗ ܩܪ̈ܚܐ
092:09	ܘܦܝ̈ܣܟܝܐ܂ ܕܢܕܥ ܕܐܠܗܐ ܐܝܬ ܗܘܐ ܥܡ ܝܥܩܘܒ܂ ܘܢܫܠܐ
092:10	ܡܼܢ ܕܠܡܒܐܫܘ ܠܗ܂ ܟܕ ܕܝܢ ܛܠܡܘܗܝ ܠܝܥܩܘܒ ܘܐܦ ܒܢ̈ܝ
092:11	ܠܒܢ ܐܝܟ ܠܒܢ܂ ܘܐܡܪܘ ܥܠ ܡܿܢ ܕܐܥܬܪ ܐܢܘܢ ܕܡܼܢ ܕܐܒܘܢ
092:12	ܥܬܪ܂ ܘܗܿܘ ܕܐܡܼܪ ܕܢܣܝܬ ܘܒܪܟܢܝ ܡܪܝܐ ܒܪܓܠܟ܂ ܕܐܫܬܚܠܦ
092:13	ܒܠܒܐ ܘܒܦܪܨܘܦܐ ܠܘܬܗ܂ ܐܬܓܠܝ ܐܠܗܐ ܥܠ ܝܥܩܘܒܼ܂
092:14	ܘܐܡܼܪ ܠܗ ܕܢܗܦܘܟ ܠܒܝܬ ܐܒܘܗܝ܀ ܘܩܼܪܐ ܠܪܚܝܠ ܘܠܠܝܐ
092:15	ܘܐܡܼܪ ܠܗܝܢ܂ ܕܐܒܘܟܝܢ ܕܦܠܚܬܗ ܡܼܢ ܟܠܗ ܚܝܠܝ܂ ܘܚܠܦ
092:16	ܐܓܪܝ ܥܣܪ ܙܒ̈ܢܝܢ܂ ܘܠܐ ܫܒܩܗ ܐܠܗܐ ܕܢܒܐܫ ܠܝ܂ ܒܝܕ
092:17	ܕܟܠ ܨܢܥ̈ܬܗ ܥܠܘܗܝ ܡܬܗܦܟܢ ܗܘܝ܀
092:18	ܐܢ ܓܝܪ ܢܩܘܨ ܗܘܐ ܠܝ ܩܪ̈ܚܐ܂ ܥܠ ܕܣܒܪ ܕܠܐ ܝܠܕܐ
092:19	ܥܢܐ ܩܪ̈ܚܐܼ܂ ܣܘܓܐܐ ܕܐܡܪ̈ܐ ܩܪ̈ܚܐ ܗܿܘܝܢ ܗܘܘ܂ ܘܐܢ
092:20	ܬܘܒ ܢܩܘܨ ܗܘܐ ܠܝ ܦܝ̈ܣܟܝܐ܂ ܒܝܕ ܕܪܢܐ ܕܕ̈ܠܝܠܐ ܗܼܘ
092:21	ܦܝ̈ܣܟܝܐ ܡܬܝܠܕܝܢ ܠܗܼ܂ ܝܠܕܐ ܠܗܿ ܟܠܗܿ ܥܢܐ ܦܝ̈ܣܟܝܐ܀
092:22	ܘܐܡܪܬ ܠܗ ܪܚܝܠ ܘܠܝܐ܂ ܠܝܬ ܠܢ ܡܢܬܐ ܒܝܬ ܐܒܘܢ܂
092:23	ܕܠܒܢ̈ܘܗܝ ܗܼܘ ܝܗܿܒ ܟܠ ܕܐܝܬ ܠܗ܂ ܕܙܒܿܢܢ ܕܝܢ ܘܐܟܼܠ ܟܣܦܼܢ܂
092:24	ܠܦܘܬ ܕܐܟܠܗ ܠܚܝܠܟ ܒܐܪ̈ܒܥܣܪܐ ܫܢ̈ܝܢ ܕܦܠܚܬܝܗܝ ܡܛܠܬܢ܂
092:25	ܒܪܡ ܡܕܡ ܕܐܡܼܪ ܠܟ ܡܪܝܐ ܥܒܼܕ܂ ܥܬܝܕܝܢ ܚܢܢ ܗܼܘ ܓܝܪ
092:26	ܕܢܐܙܠ ܥܡܟ ܒܝܘܡܐ ܕܡܫܕܪ ܠܟ܂
092:27	ܘܓܢܼܒ ܝܥܩܘܒ ܠܒܗ ܕܠܒܢ ܘܪܚܝܠ ܠܐܠܗ̈ܘܗܝܼ܂ ܘܐܬܘ
092:28	ܠܛܘܪܐ ܕܓܠܥܕ܂ ܪܕܦ ܕܝܢ ܠܒܢ ܘܐܕܪܟܗ܀ ܘܐܬܓܠܝ ܡܪܝܐ
092:29	ܥܠ ܠܒܢ ܒܚܠܡܐ ܘܐܡܼܪ ܠܗ܂ ܐܙܕܗܪ ܕܠܡܐ ܬܡܠܠ
092:30	ܥܡ ܝܥܩܘܒ ܡܼܢ ܪܒܬܐ ܘܥܕܡܐ ܠܙܥܘܪܬܐ܀ ܠܐ ܕܝܢ
092:31	ܐܫܟܚ ܠܒܢ ܠܡܛܫܝܘ ܩܫܝܘܬܗ܂ ܘܐܡܼܪ ܕܡܿܛܐ