← Back
The Comprehensive Aramaic Lexicon
← Return to the Text Browser
click on the file description for more information
60402: SugMgab 1 Cain/Abel

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:00 ܣܘܓܝܬܐ ܕܥܠ ܗܒܝܠ ܘܩܐܝܢ
01:01 ܫܪܒܗ ܕܗܒܝܠ ܬܗܪܐ ܡܠܢܝ̱ ܘܠܕܘܡܪܐ ܪܥܝܢܝ̱ ܫܪܟ܂| ܘܐܬܬܙܝܥ ܠܫܢܝ ܕܢܡܠܠܝܘܗܝ ܠܗܿܘ ܬܟܬܘܫܐ ܕܐܚ̈ܐ ܣܥܪܘ܀
01:02 ܕܡܗ ܕܥܠܝܒܐ ܒܫܠܝܐ ܩܪܢܝ̱ ܕܐܡܪ ܫܪܒܗ ܕܟܡܐ ܚܢܝܓ܂| ܕܐܦ ܗܝܼ ܐܪܥܐ ܒܕܡܗ ܓܥܬ ܕܗܼܘ ܗܘܼܐ ܒܘܟܪܐ ܕܗܝܿ ܠܘܛܬܐ܀
01:03 ܗܝܿ ܕܝܢ ܥܠܼܬܐ ܕܐܝܿܟܢ ܗܘܼܬ ܙܕܩ ܕܢܬܢܐ ܠܕܫܿܡܥܝܢ܂| ܘܥܠ ܡܘܿܢ ܘܐܝܿܟܢ ܐܚ̈ܐ ܢܨܘ ܘܡܢ ܫܘܪܝܐ ܩܼܛܠܐ ܥܒܕܘ܀
01:04 ܒܬܪ ܕܢܦܼܩ ܡܢ ܓܢܬܐ ܐܒܘܿܢ ܐܕܡ ܟܕ ܐܬܥܒܪ܂| ܗܘܼܘ ܠܗ ܒܢܝ̈ܐ ܐܝܟ ܡܠܬܗ ܕܗܘܿ ܥܒܿܘܕܐ ܕܗܟܢ ܨܒܐ܀
01:05 ܠܒܼܟܘ ܗܘܘ ܥܡܠܐ ܕܒܗ ܢܦܠܚܘܢ ܕܢܫܠܡ ܕܝܢܐ ܕܟܐܢܐ ܓܼܙܪ܂| ܗܿܘ ܕܒܥܡܠܐ ܘܒܠܐܘܬܐ ܬܐܟܘܠ ܠܚܡܐ ܒܓܘ ܥܠܡܐ܀
01:06 ܩܐܝܢ ܥܡܠܐ ܕܚܩܠܐ ܠܒܼܟ ܘܗܒܝܠ ܟܐܢܐ ܥ̈ܢܐ ܪܥܐ܂| ܘܚܼܙܐ ܐܕܡ ܘܐܬܬܢܝܼܚ ܒܗܘܢ ܘܐܬܒܝܐ ܗ̄ܘܐ ܡܼܢ ܥܩܬܗ܀
01:07 ܝܬܒ ܐܕܡ ܘܩܪܐ ܒܢܘ̈ܗܝ ܘܥܠܘ ܩܡܘ ܩܘܕܡܘ܊ ܘܐܡܪ ܠܗܘܢ܂| ܕܡܢ ܥܠ̈ܠܬܐ ܕܦܘܠܚܢܟܘܢ ܩܪܒܘ ܪܝܫܝܬܐ ܠܡܪܝܐ܀
01:08 ܘܕܚܛܝܬ ܐܢܐ ܘܪܓܙ ܥܠܝ ܘܡܢ ܦܪܕܝܣܐ ܛܪܕ ܐܦܩܢܝ̱܂| ܟܒܪ ܡܬܪܥܐ ܒܩܘܪܒܢܟܘܢ ܘܒܕܒܚ̈ܝܟܘܢ ܥܠܝ ܡܬܦܢܐ܀
01:09 ܫܩܠܘ ܩܘܪ̈ܒܢܐ ܐܝܟ ܕܐܬܼܦܩܕܘ ܟܠ ܚܕ ܡܢܗܘܢ ܡܼܢ ܠܐܘܬܗ܂| ܘܠܘܬ ܡܪܝܐ ܫܩܠܘ ܢܘܒܠܘܢ ܕܢܪܥܘܢܝܗܝ ܟܕ ܠܐ ܪܓܝܙ܀
01:10 ܐܒܘܢ ܐܕܡ ܦܪܫ ܡܢܗܘܢ ܕܢܚܙܐ ܡܿܢܐ ܗܿܘܐ ܠܗܘܢ܂| ܘܒܝܫܐ ܨܢܝܥܐ ܠܩܐܝܢ ܕܒܩ ܘܡܠܝܗܝ ܪܘܓܙܐ ܐܦ ܚܼܡܬܐ܀
01:11 ܡܛܘ ܨܝܕ ܪܘܡܐ ܠܘܬ ܡܪܝܐ ܘܦܫܼܛܘ ܩܪܒܘ ܩܘܪܒܢܗܘܿܢ܂| ܘܒܩܘܪܒܢܗ ܕܗܒܝܠ ܨܒܼܐ ܘܕܒܚܗ ܕܩܐܝܢ ܠܐ ܪܥܝܗ܀
01:12 ܚܣܡܐ ܚܙܐ ܘܪܘܓܙܐ ܠܒܼܫ ܘܠܘܬ ܥܘܼܡܩܐ ܠܐܚܘܗܝ ܢܓܕ܂| ܘܒܝܫܐ ܨܢܝܥܐ ܗܼܘ ܫܓܫܗ ܘܗܼܘ ܚܘܝ ܠܗ ܕܢܐܫܘܕ ܕܡܐ܀
01:13 ܐܡܪ ܩܐܝܢ ܥܠ ܕܐܨܛܒܝ ܡܪܝܐ ܒܕܒܚܟ ܘܐܣܠܝ ܠܕܝܠܝ̱܂| ܩܿܛܠ ܐ̱ܢܐ ܠܟ ܥܠ ܕܐܚܒܟ ܘܡܬܢܩܡ ܐ̱ܢܐ ܡܼܢ ܪܚܡܟ܀
01:14 ܐܡܪ ܗܿܒܝܠ ܡܘܢ ܐܣܟܠܬ ܐܢܗܼܘ ܕܡܪܝܐ ܒܝ ܐܨܛܒܝ܂| ܒܚܪ ܠܒܐ ܘܫܠܝܼܛ ܠܗ ܕܢܓܒܐ ܘܢܣܠܐ ܐܝܟ ܪܓܬܗ܀
01:15 ܒܘܟܪܐ ܐܢܐ ܘܠܝ ܙܕܩܐ ܕܢܩܒܠ ܗܘܐ ܛܒ ܡܼܢ ܕܠܟ܂| ܕܐܚܒ ܠܕܝܠܟ ܘܠܕܝܠܝ̱ ܣܢܼܐ ܘܐܣܠܝ ܩܘܪܒܢܝ̱ ܘܕܝܠܟ ܓܒܼܐ܀
01:16 ܒܓܘ ܩܘܪ̈ܒܢܐ ܡܐ ܕܣܿܠܩܝܢ ܚܘܒܐ ܒܿܥܐ ܕܢܚܙܐ ܒܗܘܢ܂| ܘܐܢ ܨܒܝܿܢܐ ܠܐ ܚܠܝܛ ܒܗ ܒܕܒܚܐ ܣܢܝܐ ܐܦ ܡܣܠܝܐ܀
01:17 ܓܠܙ ܐ̱ܢܐ ܠܟ ܡܢ ܪܚܡܟ ܕܠܝ ܘܠܟ ܐܪܥܐ ܠܐ ܥܪܝܐ܂| ܕܢܗܘܐ ܢܿܣܒ ܡܢܝ̱ ܕܒܚܬܐ ܡܐ ܕܐ̱ܚܪܢܐ ܠܐ ܐܝܬ ܠܘܬܝ̱܀
01:18 ܓܘܢܝܐ ܙܥܘܪܐ ܒܓܘ ܥܿܠܡܐ ܗܒ ܠܝ ܒܛܝܒܘ ܘܠܐ ܬܩܛܠܢܝ̱܂| ܘܟܠܗܿ ܐܪܥܐ ܕܝܠܟ ܬܗܐ ܘܩܪܒ ܕܒܚܐ ܐܝܟ ܪܓܬܟ܀
01:19 ܕܡ̈ܥܐ ܘܒܟܝܐ ܠܐ ܡܦܝܣ ܠܝ ܘܠܐ ܚܢܓ̈ܬܟ ܟܕ ܢܣܓ̈ܝܢ܂| ܕܡܢ ܥܕܢܐ ܕܕܒܚܟ ܫܩܼܠ ܡܝܬܐ ܛܡܝܪܐ ܚܫܝܒ ܐܢܬ ܠܝ܀
01:20 ܕܝܠܟ ܢܗܘܐ ܗܢ ܥܿܠܡܐ ܘܒܛܝܒܘܬܐ ܒܗ ܐܫܬܒܩ܂| ܢܝܪ ܫܘܠܛܢܟ ܣܝܡ ܥܠ ܩܕܠܝ̱ ܘܐܣܒܥ ܚܝ̈ܐ ܕܐܬܝܬ ܠܗܘܢ܀
01:21 ܗܐ ܡܼܢ ܗܿܫܐ ܚܘܐ ܐܡܟ ܡܢܗܿ ܕܩܘܡܬܟ ܡܬܓܙܝܐ܂| ܘܐܕܡ ܢܒܥܝܟ ܘܠܐ ܢܫܟܚܟ ܘܬܗܘܐ ܚܫܝܒ ܠܗܘܢ ܐܝܟ ܠܐ ܗܘܝܬ܀
01:22 ܗܐ ܡܫܐܠ ܐܕܡ ܥܠܝ ܡܿܢ ܦܬܓܡܐ ܡܦܢܝܬ ܠܗ܂| ܕܟܐܒܗ ܩܕܡܐ ܠܐ ܐܬܚܠܡ ܘܟܘܒܐ ܒܫܘܚܢܐ ܡܿܚܝܬ ܠܗ܀
01:23 ܘܐܢ ܩܘܪܒܢܟ ܫܕܪ ܫܩܼܠ ܘܒܓܘܙܠܬܐ ܛܒ ܝܩܪܟ܂| ܩܿܛܠ ܐܢܐ ܠܟ ܥܠ ܕܐܚܒܟ ܘܩܒܠ ܕܒܚܟ ܘܐܣܠܝ ܠܕܝܠܝ̱܀
01:24 ܘܝܿ ܠܥܠܝܡܘܬܝ̱ ܡܢܐ ܗܘܗܿ ܕܗܐ ܡܿܐܬ ܐ̱ܢܐ ܟܕ ܠܐ ܚܛܝܬ܂| ܐܚܝ̱ ܬܟܪܐ ܠܟ ܘܪܚܡ ܥܠܝ ܘܠܐ ܬܐܫܘܕ ܕܡܝ̱ ܐܝܟ ܣܢܐܐ܀
01:25 ܙܟܬܢܝ̱ ܚܡܬܐ ܘܪܘܓܙܐ ܡܠܝܬ ܟܕ ܢܿܚܬ ܐܢܐ ܘܩܘܪܒܢܝ̱ ܥܠܝ܂| ܠܡܘܢ ܠܐ ܫܩܠܗ ܐܢ ܝܕܥܬ ܓܠܝ ܠܝ ܐ̱ܪܙܐ ܘܠܐ ܡܿܝܬܬ܀
01:26 ܙܥܘܪ ܗ̱ܘ ܦܘܡܐ ܕܢܡܠܠܝܘܗܝ ܠܚܙܘܐ ܪܒܐ ܕܬܡܢ ܚܙܝܬ܂| ܟܕ ܩܡ ܩܘܫܬܐ ܘܕܒܚܐ ܓܒܼܐ ܘܐܣܠܝ ܘܓܒܼܐ ܐܝܟ ܕܨܒܼܐ܀
01:27 ܚܙܘܐ ܕܚܙܝܬ ܡܘܢ ܐܘܬܪܟ ܕܩܛܠܐ ܘܡܘܬܐ ܥܬܕ ܥܠܝܟ܂| ܟܘܬܝܢ ܚܫܐ ܙܩܪ ܐܠܒܫܟ ܘܢܚܬܐ ܕܕܡܐ ܦܪܣ ܟܣܝܟ܀
01:28 ܚܙܘܐ ܕܚܙܝܿܬ ܗܼܘ ܢܦܪܩܢܝ̱ ܡܢ ܣܛܢܐ ܕܥܘܡܪܗ ܗܘܼܝܬ܂| ܘܐܢ ܡܿܐܬ ܐ̱ܢܐ ܗܐ ܣܿܗܕܝܢ ܫܡܝܐ ܘܐܪܥܐ ܕܠܐ ܐܣܟܠܬ܀
01:29 ܛܪܩ ܦܪܫܝܢ ܠܗ ܘܝܩܕܟ ܫܩܠ ܘܐܣܠܝ ܣܓܕܬܝ̱ ܘܩܘܪܒܢܝ̱ ܣܢܐ܂| ܘܡܛܠ ܗܢܐ ܥܠ ܕܐܚܒܟ ܚܿܠܛ ܐܢܐ ܕܡܟ ܥܡ ܕܒܚܬܟ܀
01:30 ܛܪܩ ܦܪܫܢܝ̱ ܠܗ ܐܝܟ ܕܐܡܪܬ ܘܩܒܠ ܩܘܪܒܢܝ̱ ܐܦ ܐܚܒܢܝ̱܂| ܚܙܝ ܠܐ ܬܨܒܘܥ ܐܝܕܟ ܒܕܡܝܼ ܕܕܠܡܐ ܢܓܙܘܪ ܕܝܢܐ ܥܠܝܟ܀
01:31 ܝܓܪܐ ܕܟܐܦ̈ܐ ܐܟܫܐ ܥܠܝܟ ܘܡܢܘ ܢܬܒܥ ܒܐܝ̈ܕܝ ܕܡܟ܂| ܡܪܝܐ ܒܛܘܪܐ ܫܒܩܢܝܗܝ ܠܥܠ ܘܡܿܢ ܦܪܩ ܠܟ ܐܢ ܐܿܩܛܠܟ܀
01:32 ܝܓܪܐ ܕܟܐܦ̈ܐ ܕܟܿܫܝܬ ܥܠܝ ܢܩܥܐ ܚܠܦܝ ܘܢܩܛܪܓܟ܂| ܘܢܫܡܥ ܟܐܢܐ ܒܓܥܬܗܝܢ ܘܢܕܘܢ ܥܘܠܒܢܝ̱ ܐܝܟ ܚܟܡܬܗ܀
01:33 ܟܡܐ ܐܢ ܬܣܓܐ ܘܬܫܓܫܢܝ̱ ܢܟܠܗ ܕܪܥܝܢܝ̱ ܠܐ ܡܬܬܫܝܓ܂| ܘܐܠܐ ܛܥܡܬ ܐܝܕܝ̱ ܡܢ ܕܡܟ ܠܐ ܫܿܠܐ ܐܢܐ ܘܡܬܬܢܝܚ ܐ̱ܢܐ܀
01:34 ܟܡܐ ܟܝ ܝܩܪܘ ܚܝ̈ܝ ܥܠܝܟ ܕܠܝ ܘܠܟ ܐܪܥܐ ܠܐ ܥܪܝܐ܂| ܕܝܠܟ ܢܗܼܘܐ ܩܘܪܒܢܝ̱ ܫܠܝ ܘܢܘܚ ܡܢ ܚܡܬܐ ܘܠܐ ܬܩܛܠܢܝ̱܀
01:35 ܠܝ ܡܩܒܠ ܗܘܐ ܛܒ ܡܢ ܕܠܟ ܐܠܘ ܥܘܠܐ ܠܐ ܥܒܕܬ ܥܠܝ܂| ܛܠܝܬ ܒܡܫܘܚܬܐ ܐܦ ܒܡܕܥܐ ܘܒܪܝܫܝܬܐ ܩܕܡܝ ܗܘܼܝܬ܀
01:36 ܠܟ ܓܒܐ ܗ̄ܘܐ ܐܠܘ ܫܦܪܬ ܘܒܩܘܪܒܢܟ ܡܬܬܢܝܚ ܗ̄ܘܐ܂| ܡܬܩܒܠ ܗ̄ܘܝܬ ܐܠܘ ܚܠܼܛܬ ܚܘܒܐ ܫܦܝܐ ܥܡ ܕܒܚܬܟ܀
01:37 ܡܘܢ ܐܡܪ ܠܗ ܡܐ ܕܫܐܠܢܝ̱ ܐܕܡ ܕܥܠ ܡܘܢ ܠܐ ܩܒܠܟ܂| ܕܒܟ ܡܬܪܥܐ ܐܢ ܦܿܝܫܬ ܘܥܠܝ ܪ̈ܓܙ ܐܝܟ ܣܢܐܐ܀
01:38 ܡܘܬܐ ܒܝܫܐ ܡܝܬܐ ܥܠܝ ܘܐܕܡ ܪܿܓܙ ܐܢ ܬܩܛܠܢܝ̱܂| ܚܘܣ ܥܠ ܐܡܟ ܕܠܐ ܢܬܦܣܩ ܢܘܪܒܐ ܙܥܘܪܐ ܕܡܢܗܿ ܫܘܚ܀
01:39 ܢܘܪܒܐ ܕܫܒܩܢܝ̱ ܘܥܒܪ ܠܥܠ ܥܿܩܪ ܐܢܐ ܠܗ ܕܠܐ ܢܩܦܚܢܝ̱܂| ܒܓܠܝܕܝ ܐܿܟܝܘܗܝ ܥܕ ܗ̄ܘ ܛܠܐ ܕܠܐ ܢܥܫܢ ܠܗ ܘܠܝ ܢܡܪܕܢܝ̱܀
01:40 ܢܬܬܢܝܚ ܠܒܟ ܡܢ ܚܡܼܬܐ ܘܚܣܘܟ ܢܦܫܟ ܡܢ ܠܘܛܬܐ܂| ܗܐ ܥܠ ܬܪܥܐ ܚܛܗܐ ܪܒܝܥ ܠܐ ܬܩܪܘܒ ܠܗ ܕܠܐ ܢܒܣܒܣܟ܀
01:41 ܣܚܦܢܝ̱ ܘܫܕܢܝ̱ ܘܪܓܙ ܥܠܝ ܘܐܣܠܝ ܩܘܪܒܢܝ̱ ܘܣܓܕܬܝ̱ ܣܢܐ܂| ܡܘܢ ܬܘܒ ܐܝܬ ܠܗ ܕܢܝܬܐ ܥܠܝ ܝܬܝܪ ܡܢ ܗܕ ܐܢ ܐܩܛܠܟ܀
01:42 ܣܓܝ ܩܫܝܐ ܕܬܐܫܘܕ ܕܡܝ̱ ܘܬܣܪܘܚ ܨܠܡܐ ܕܐܝ̈ܕܘܗܝ ܓܒܠܝ܂| ܫܒܘܩܝܗܿ ܠܐܪܥܐ ܡܫܬܝܢܐ ܘܒܥܝ ܪ̈ܚܡܐ ܘܗܐ ܐܬܬܢܝܚܬ܀
01:43 ܥܛܠܐ ܗܿܝ ܗܕܐ ܕܡܡܠܠܬ ܘܩܫܝܐ ܗܿܝ ܡܠܬܟ ܡܢ ܢܝܙܟܐ܂| ܕܒܬܪ ܕܣܢܢܝ̱ ܐܦ ܟܐܪܢܝ̱ ܐܬܐ ܠܐܦ̈ܘܗܝ ܒܥܝܬ ܠܝ܀
01:44 ܥܒܕܐ ܓܒܝܠܐ ܠܐ ܬܬܚܪܐ ܠܘܩܒܠ ܛܿܒܐ ܕܨܪ ܨܒܬܟ܂| ܥܗܕܝܗܝ ܠܥܦܪܐ ܕܡܢܗ ܗܘܿܝܬ ܘܠܕܚܝܚܐ ܕܠܗ ܗܿܦܟܬ܀
01:45 ܦܘܫ ܡܢ ܗܿܠܝܢ ܕܡܡܠܠܬ ܠܘ ܒܣܘܕܐ ܡܬܦܠܛܬ܂| ܡܛܐ ܠܗ ܙܒܢܟ ܐܘ ܕܘܝܐ ܘܡܢ ܝܬܝܪܘ ܬܢܢ ܩܿܝܡܬ܀
01:46 ܦܟܗ ܠܗ ܠܒܟ ܡܢ ܚܡܼܬܐ ܘܡܘܢ ܐܡܪ ܠܟ ܠܐ ܡܦܣ ܐ̱ܢܐ܂| ܡܟܝܠ ܢܒܟܘܢ ܛܘܪ̈ܐ ܥܠܝ ܕܗܐ ܡܿܐܬ ܐܢܐ ܒܝܢܬܗܘܢ܀
01:47 ܨܝܕ ܒܪ ܐܡܗ ܩܪܒ ܘܐܒܪܟܗ ܒܕܡܘܬ ܐܡܪܐ ܬܚܝܬ ܢܟܣܬܐ܂| ܘܐܝܠܠ ܪܘܡܐ ܘܥܘܡܩܐ ܒܟܐ ܥܠ ܬܡܝܡܐ ܟܕ ܐܬܢܟܣ܀
01:48 ܨܠ̈ܝ ܪ̈ܡܬܐ ܕܢܒ̈ܟܝܢ ܠܡܝܬܐ ܚܕܬܐ ܕܗܘܐ ܒܗܝܢ܂| ܘܛܟ̈ܣܝ ܪܘܡܐ ܠܬܡܼܗܐ ܫܪܟܘ ܥܠ ܡܪܚܐ ܕܡܢܐ ܣܥܪ܀
01:49 ܩܥܐ ܒܚܢܓܬܐ ܟܕ ܐܬܦܟܪ ܘܐܝܠܠܘ ܛܘܪ̈ܐ ܒܩܠ ܢܗܡܬܗ܂| ܘܫܘܥ̈ܐ ܚܪ̈ܫܐ ܒܟܝܗ ܫܡܥܘ ܘܝܗܒܘ ܗ̄ܘܘ ܩܿܠܐ ܡܢ ܚܫܐ܀
01:50 ܩܥܬ ܗܘܬ ܐܪܥܐ ܟܕ ܩܒܠܬ ܕܡܐ ܫܪܘܝܐ ܕܢܚܬ ܥܠܝܗܿ܂| ܘܥܠ ܩܿܛܘܠܐ ܐܬܪܥܡܬ ܟܕ ܠܝܛܐ ܠܗ ܕܡܢܐ ܥܒܼܕܬ܀
01:51 ܪܥܠܘ ܐܣܛܘܟܣ̈ܐ ܡܼܢ ܙܘܥܬܐ ܕܚܙܘ ܫܠܕܐ ܫܪܘܝܬܐ܂| ܘܪܬܬ ܐܪܥܐ ܟܕ ܩܒܠܬ ܕܡܐ ܫܪܘܝܐ ܕܢܚܬ ܥܠܝܗܿ܀
01:52 ܪܥܡ ܒܫܡܝܐ ܡܪܐ ܕܟܠ ܕܕܡܗ ܕܗܒܝܠ ܩܕܡܘܗܝ ܓܥܐ܂| ܘܐܝܟ ܕܝܿܢܐ ܠܕܝܢܐ ܬܩܢ ܘܩܪܐ ܠܩܐܝܢ ܕܢܫܐܠܝܘܗܝ܀
01:53 ܫܪܝ ܟܐܢܐ ܕܢܫܐܠܝܘܗܝ ܠܗܿܘ ܩܿܛܘܠܐ ܡܢܐ ܣܥܪ܂| ܕܐܝܟܘ ܐܚܘܟ ܕܠܗ ܚܿܝܪܝܢ ܚܘܐ ܘܐܕܡ ܕܢܩܒܠܘܢ܀
01:54 ܫܪܝ ܩܿܐܝܢ ܕܢܐܡܪ ܠܗ ܒܣܪܘܒܘܬܐ ܕܠܐ ܪܓܝܫ ܐ̱ܢܐ܂| ܕܠܝ ܠܐ ܐܫܠܼܡܬ ܕܐܛܪܝܘܗܝ ܠܟ ܘܥܠ ܡܘܢ ܒܐܝ̈ܕܝ ܒܥܝܬ ܠܗ܀
01:55 ܬܘܗܬܐ ܕܩܛܠܗ ܕܐܚܘܟ ܚܙܝܬ ܟܕ ܒܿܟܐ ܗ̄ܘܐ ܘܡܦܝܣ ܠܟ܂| ܘܕܠܐ ܥܢܝܬܝܗܝ ܘܪܚܡܬ ܥܠܘ̄ ܡܢ ܟܐܢܘܬܐ ܡܫܬܢܩܬ܀
01:56 ܬܘܕܝܬܐ ܠܟ ܡܪܐ ܕܟܠ ܕܒܟܐܢܘܬܟ ܕܝܢܐ ܢܛܝܪ܂| ܘܒܛܝܒܘܬܟ ܪ̈ܚܡܐ ܥܒܼܕܬ ܥܠ ܚܛܝ̈ܐ ܕܩܥܝܢ ܠܟ܀

next