← Back
The Comprehensive Aramaic Lexicon
← Return to the Text Browser
click on the file description for more information
60422: Balai 1 :On the rededication of the renewal of the church at Qenneshrin

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

0 ܥܠ ܚܘܕܬܐ ܕܥܕܬܐ ܕܐܬܼܒܢܝܬ ܚܕܬܝܬ ܒܩܢܫܪܝܢ ܡܕܝܢܬܐܿ
. 1
1 ܐܝܢܐ ܕܠܐܝ ܒܒܝܬܟ ܢܚܕܐ܃
2 ܕܐܬܩܢ ܥܘܡܪܐ ܠܡܪܗ ܕܒܪܝܗܝ܂
3 ܘܢܬܠ ܛܘܒܐ ܠܢܦܫܗ܂܂
4 ܐܝܢܐ ܕܒܥܒܕ ܐܝ̈ܕܘܗܝ ܢܚܼܬܿ ܪܘܚܐ
. 2
1 ܕܡܟܝܠ ܕܒܝܬܐ ܗܘ ܕܐܠܗܘܬܐ܃
2 ܟܠ ܥܘܕܪ̈ܢܝܢ ܒܗ ܡܫܬܟܚܝܢ܂
3 ܥܘܡܪܐ ܗܘ ܒܐܪܥܐ܃
4 ܕܒܗ ܡܬܠܒܟܐ ܗܿܝ ܛܝܒܘܬܐ ܠܡܐܫܕ ܪ̈ܚܡܼܐ
. 3
1 ܒܒܝܬܗ ܝܬܿܒ ܘܡܣܟܐ ܠܢ܂
2 ܕܢܥܘܠ ܢܒܥܐ ܡܢܗ ܚܢܼܢܐ܂
3 ܠܐ ܟܠܐ ܠܢ ܕܠܐ ܡܫܿܢܝܢ ܚܢܢ
4 ܡܢ ܓܘ ܥܘܡܪܗܼ ܕܚܐܢ ܗܘ ܠܢ
. 4
1 ܠܘ ܓܝܪ ܥܘܡܪܐ ܫܚܝܡܐ ܐܝܬܘܗܝܼ܂
2 ܫܡܝܐ ܗܘ ܒܐܪܥܐܿ ܕܡܪܗܼ ܒܓܘܗ܂
3 ܘܚܠܦ ܥܝܪ̈ܐܼ ܟܗ̈ܢܐ ܕܟ̈ܝܐ
4 ܕܡܫܡܫܝܢ ܒܗ ܠܐܠܗܘܬܐ
. 5
1 ܥܘܡܪܐ ܒܪܘܡܐ ܒܝܬܐ ܒܥܘܡܩܐܼ܂
2 ܘܠܐ ܡܬܿܦܠܓܼ ܘܠܟܠ ܣܿܦܩ܂
3 ܐܢ ܕܝܢ ܬܒܼܨܝܘܗܝ ܟܠܗܼ ܒܪܘܡܐ ܗܘ܂
4 ܘܐܢ ܗܼܘ ܕܬܒܥܝܘܗܝܿ ܟܠܗܼ ܒܥܘܡܩܐ ܗܘ
. 6
1 ܐܢ ܗܼܘ ܕܬܡܪܚܼ ܪܡ ܗܘ ܡܢܟ܂
2 ܘܐܢܗܘܼ ܕܬܪܚܡܼ ܩܪܝܒ ܗܘ ܠܟ܂
3 ܐܢ ܕܬܥܿܩܒܼ ܗܐ ܒܫܡܝܐ ܗܘ܂
4 ܘܐܢ ܕܬܗܝܡܼܢ ܗܐ ܒܝܬ ܩܘܕܫܐ ܗܘ
. 7
1 ܐܢ ܗܼܘ ܕܬܒܥܐ ܐܝܟ ܕܠܡܨܒܐܼ܂
2 ܒܪܘܡܗ ܡܿܡܕ ܡܢ ܨܢܥ̈ܬܟ܂
3 ܘܐܢ ܬܬܝܐܒ ܐܝܟ ܕܠܡܚܙܐܼ܂
4 ܒܚܘܒܗ ܩܪܝܒ ܠܦܫܝܛܘܬܟ
. 8
1 ܡܚܼܝܠ ܗܘ ܚܝܠܟ ܡܢ ܡܠܐܟ̈ܐܼ܂
2 ܘܦܿܚܡ ܕܪܓܟ ܠܕܪ̈ܘܚܢܐ܂
3 ܠܗܘܢ ܬܫܡܫܬܐ ܟܕ ܕܚܝܠܝܼܢ܂
4 ܘܠܢ ܡܟܘܠܬܐ ܕܦܫܝܩܐ ܠܢ
. 9
1 ܕܢܗܘܐ ܫܟܝܚ ܠܢ ܒܝܬ ܐܪ̈ܥܢܐܼ܂
2 ܒܢܼܐ ܠܗ ܒܝܬܐ ܒܝܬ ܦܓܪ̈ܢܐ܂
3 ܐܬܩܢ ܡ̈ܕܒܚܐ ܐܘܪ̈ܘܬܐܼ܂
4 ܕܒܗܘܢ ܬܐܟܘܠ ܥܕܬܐ ܚ̈ܝܐ
. 10
1 ܠܐ ܐܢܫ ܢܦܗܐ ܗܪܟܐ ܗܘ ܡܿܠܟܐܼ܂
2 ܒܓܘ ܒܝܬ ܩܘܕܫܐܼ ܢܥܘܠ ܢܚܙܝܘܗܝ܂
3 ܐܝܟܐ ܕܦܫܝܩ ܠܟܪܝܗܘܬܐܿ܂
4 ܩܐܡ ܐܣܝܐ ܘܡܣܟܐ ܠܗܿ
. 11
1 ܟܣܝܐ ܢܘܪܐ ܘܓܠܼܐ ܦܓܪܐܼ܂
2 ܕܠܐ ܬܓܥܨ ܠܗܿ ܐܝܕܐ ܕܐܢܫܐ܂
3 ܕܚܝܼܠ ܒܫܡܝܐ ܘܒܣܝܡ ܒܐܪܥܐܼ܂
4 ܕܐܝܢܐ ܕܩܿܪܒܼ ܠܐ ܢܬܩܢܛ
. 12
1 ܗܘ̈ܝ ܫܬܐܣ̈ܐ ܩܕܝܫ̈ܬܐܼ܂
2 ܘܒܫܡܟ ܚܝܐ ܣܡܘ ܟܐܦ̈ܝܗܝܢ܂
3 ܐܥܠ ܬܪ̈ܥܐ ܙܕܝܩܘܬܐܼ܂
4 ܕܥܠܘ̈ܠܝܗܘܢ ܟܢܝܫܝܢ ܒܫܡܟ
. 13
1 ܕܪ̈ܐ ܡ̈ܠܝܢ ܩܠ ܐܘܫ̈ܥܢܐܼ܂
2 ܘܥܘܡܪܐ ܪܥܿܡ ܩܠ ܗܘ̈ܠܠܐ܂
3 ܘܡܢ ܒܿܪ̈ܝܐ ܘܡܢ ܓܘ̈ܝܐܼ܂
4 ܕܠܩܿ ܫܘܒܚܐܼ ܐܝܟ ܠܡ̈ܦܝܕܐ
. 14
1 ܐܬܪܐ ܡܨܒܼܬ ܒܫܘܒܚܐ ܡܟܠܠܼܿ
2 ܕܝܘܡܐ ܕܥܐܕܐ ܗܘܼ ܘܕܡܫܬܘܬܐ܂
3 ܓܢܘܢܐ ܚܼܕܬܐ ܡܫܝܚܐ ܚܬܢܐܼܿ
4 ܥܝܪ̈ܐ ܚܿܕܝܢ ܐܢܫܐܼ ܡܘܕܝܢ
. 15
1 ܡܕܒܚܐ ܡܬܼܩܢ ܩܘܫܬܐ ܠܒܝܫܼ܂
2 ܟܗܢܐ ܩܐܡܼ ܢܘܪܐ ܚܫܿܠ܂
3 ܠܚܡܐ ܫܩܿܠ ܦܓܪܐ ܝܗܒܿ܃
4 ܚܡܪܐ ܡܩܿܒܠܼ ܘܕܡܐ ܡܿܦܠܓ
. 16
1 ܡܕܒܚܐ ܕܟܐܦ̈ܐ ܘܛܥܝܢ ܣܒܪܐܼ܂
2 ܘܟܗܢܐ ܕܟܝܐ ܠܪܘܚܐ ܩܿܪܐ܂
3 ܥܡܐ ܕܟܢܝܫ ܩܕܝܫ ܩܿܥܐܼ܂
4 ܡܿܠܟܐ ܕܫܡܿܥܼ ܪ̈ܚܡܼܐ ܡܫܦܥ
. 17
1 ܩܪܢܐ ܕܚܘܒܐ ܒܐܪܥܐ ܬܩܪܐܼ܂
2 ܟܢܘܫܘ ܓܘ̈ܕܝܟܘܢ ܠܐܝܩܪ ܒܝܬܐ
3 ܐܓܪܐ ܝܗܿܒ ܗܿܘ ܕܩܪܟܘܢܼ܂
4 ܒܒܝܬܐ ܚܼܕܬܐܼ ܚ̈ܝܐ ܚ̈ܕܬܐ
. 18
1 ܐܝܢܐ ܕܠܐܝ ܢܝܚܐ ܫܩܿܠܼ܂
2 ܘܐܝܢܐ ܕܥܡܿܠ ܚ̈ܝܐ ܡܫܟܚ܂
3 ܐܝܢܐ ܕܢܿܕܪ ܢܟ̈ܣܘܗܝ ܣܿܓܝܼܢ܂
4 ܘܐܝܢܐ ܕܫܿܠܡܼ ܫܚܪ̈ܘܗܝ ܡܦܪܝܢ
. 19
1 ܕܠܐܝ ܒܚܝܠܗ ܓܘܫܡܗ ܫܐܪ܃
2 ܕܩܪܒܼ ܒܐܝܕܗ ܓܙܗ ܣܿܓܐܿ܂
3 ܕܐܝܬܝ ܢܕܪܐ ܣܒܪܐ ܡܫܟܚܼ܂
4 ܘܥܡܐ ܕܟܢܼܫ ܥܡܗܘܢ ܦܠܓ܂
. 20
1 ܕܗܠܝܢ ܕܥܡܼܠܘ ܡܛܠ ܕܐܬܿܝܼܢ܂
2 ܘܗܠܝܢ ܕܐܬܿܝܢ ܡܛܠ ܕܒܢܘ܂
3 ܗܠܝܢ ܕܐܬܘ ܘܗܠܝܢ ܕܥܼܡܠܘܼ܂
4 ܒܚܕ ܦܘܪܥܢܐ ܫܘܬܦ ܡܪܢ
. 21
1 ܬܠܬܐ ܒܫܡܟ ܥܕܬܐ ܐܢܘܢܼ܂
2 ܐܠܦ̈ܐ ܒܒܝܬܟ ܢܿܛܪ ܐܢܘܢ܂
3 ܕܥܕܬܐ ܕܠܒܐ ܥܼܡܠܘ ܘܐܝܬܝܘ ܠܗܼ܂
4 ܠܗܝܟܠ ܩܘܕܫܐ ܕܒܿܢܼܐ ܒܫܡܟ
. 22
1 ܬܗܘܐ ܦܐܝܐ ܥܕܬܐ ܕܠܓܘܼ܂
2 ܐܝܟ ܕܗܕܝܪܐ ܥܕܬܐ ܕܠܒܪ܂
3 ܬܫܪܐ ܒܕܠܓܘ ܘܬܛܪ ܕܠܒܪ܃
4 ܕܚܬܝܡ ܒܫܡܟ ܠܒܐܼ ܘܒܝܬܐ
. 23
1 ܟܗ̈ܢܐ ܕܗܘܼܘ ܗܝܟܠ ܪܘܚܟܼ܂
2 ܐܬܟܫܪܘ ܒܗ ܒܒܢܝܢ ܒܝܬܟ܂
3 ܒܪܟ ܐܢܘܢ ܕܠܒܐ ܘܒܝܬܐܼ܂
4 ܒܥܼܡܠܐܼ ܘܚܘܒܐ ܨܒܬܘ ܠܫܡܟ
. 24
1 ܟܗܢܐ ܕܒܢܼܐ ܩܘܡܗ ܢܓܪ ܫ̈ܢܝܐ
2 ܢܟܗܢ ܒܥܘܡܪܐ ܕܨܒܿܬ܂
3 ܘܬܥܠܘܒ ܢܦܫܗ ܒܫܘܦܪܐ ܟܣܝܐܼ܂
4 ܠܨܒܬܐ ܓܠܝܐ ܕܛܥܢ ܒܝܬܐ
. 25
1 ܕܛܥܢ ܠܒܗ ܗܝܟܠ ܡܪܗܼ܂
2 ܢܥܘܠ ܕܟܝܐ ܠܒܝܬ ܩܕܝܫ̈ܐ܂
3 ܘܟܕ ܡܬܬܢܝܚ ܐܢܬ ܥܠ ܬܪܥܝܬܐܼ܂
4 ܬܬܠ ܐܓܪܐ ܕܒܢܝܢ ܐܣ̈ܐ
. 26
1 ܗܢܐ ܒܝܬܐ ܓܠܝܐ ܡܟܪܙ܂
2 ܥܠ ܪܥܝܢܗ ܕܐܝܢܐ ܕܒܢܝܗܝ܂
3 ܕܢܗܝܪ ܘܦܐܐ ܠܒܐ ܕܠܓܘܼܿ
4 ܗܘܼܐ ܦܪܝܫ ܚܘܒܗ ܒܗܢܐ ܓܠܝܐ
. 27
1 ܠܟܗܢܐ ܬܫܡܥ ܪܘܚܐ ܕܩܘܕܫܐܼ܂
2 ܕܠܐܒܐ ܘܠܒܪܐ ܐܬܩܢ ܥܘܡܪܐ܂
3 ܬܩܿܒܠ ܢܕܪ̈ܐ ܥܡ ܩܘܪܒܢܐܼ܂
4 ܕܒܝܬܐ ܘܢܕܪ̈ܐܼ ܡܛܠܬܟ
. 28
1 ܟܠܼܐ ܗܘܐ ܠܕܘܝܕ ܡܢ ܒܢܝܢܐܼ܂
2 ܠܟܘܢ ܕܝܢ ܚܿܦܛܼ ܘܐܬܟܫܪܬܘܢ܂
3 ܕܘܝܕ ܓܒܼܝܐ ܦܫ ܡܢ ܒܝܬܐܼ܂
4 ܚܕܘ ܕܒܢܝܬܘܢܼ ܘܕܫܟܠܠܬܘܢ
. 29
1 ܫܠܝܡܘܢ ܕܫܿܘܼܐ ܕܢܒܢܐ ܒܝܬܐܼ܂
2 ܚܣܟܗ ܡܪܗ ܡܢ ܬܟܬܘܫܐ܂
3 ܟܗ̈ܢܐ ܕܒܢܘ ܒܝܬܐ ܠܝܫܘܥܼ܂
4 ܢܿܛܼܪ ܐܢܘܢ ܡܢ ܕܘܘܕܐ
. 30
1 ܠܟܘܠܗܿ ܐܪܥܐ ܐܢܝܚ ܡܪܢ܂
2 ܒܝܘܡ̈ܝ ܫܠܝܡܘܢ ܡܢ ܬܟܬܘܫܐ܂
3 ܐܦ ܒܝܘܡ̈ܬܟܘܢ ܢܚܣܘܟ ܡܪܢܼ܂
4 ܠܥܕܬܐ ܟܠܗܿ ܡܢ ܚܪ̈ܝܢܐ
. 31
1 ܡܨܐ ܗܘܐ ܚܝܠܗ ܒܿܢܐ ܒܝܬܐܿ܂
2 ܐܝܟ ܒܪ̈ܝܬܐ ܕܒܢܼܐ ܪܡܙܗ܂
3 ܒܢܼܐ ܗܘܐ ܠܐܢܫܐ ܘܐܢܫܐ ܒܢܘ ܠܗܼ܂
4 ܫܘܒܚܐ ܠܪ̈ܚܼܡܐ ܕܟܡܐ ܪܚܡܘܢܝ
. 32
1 ܗܼܘ ܕܠܐ ܣܟܐ ܘܐܢܚܢܢ ܣܟܐܼ܂
2 ܒܢܼܐ ܠܢ ܥܠܡܐܼ ܘܐܢܚܢܢ ܒܝܬܐ܂
3 ܪܒܐ ܕܐܢܫܐ ܕܒܢܘ ܒܝܬܐܿ܂
4 ܠܚܝܠܐ ܡܬܝܚܐ ܕܠܟܠ ܥܒܿܪ
. 33
1 ܫܿܪܐ ܕܝܢ ܥܡܢ ܐܝܟ ܒܣܝܡܐܼ܂
2 ܘܐܝܟ ܚܒܝܒܐ ܢܓܼܕܢ ܨܕܘܗܝ܂
3 ܥܡܿܪ ܥܡܢ ܘܡܓܪܓ ܠܼܢ܂
4 ܕܢܣܩ ܟܠܢ ܢܥܡܪ ܥܡܗ
. 34
1 ܙܚ ܡܢ ܐܬܪܗ ܓܒܼܐ ܠܗ
2 ܥܕܬܐܼܼ ܕܢܪܦܐ ܐܬܪܢܼ ܘܢܓܒܐ ܠܥܕܢܿ
3 ܗܘܼܐ ܐܠܗܐ ܒܝܢܬ ܐܢܫܐܼ܂
4 ܕܢܗܘܘܢ ܐܢܫܐ ܥܡ ܐܠܗܐ
. 35
1 ܡܕܒܚܗ ܡܬܼܩܢ ܘܣܡܝܟ ܥܡܼܢ܂
2 ܫܘܒܚܗ ܡܫܿܘܝܼ ܘܓܢܝܢ ܐܢܫܐ܂
3 ܐܟܠܢܢ ܥܡܗ ܥܠ ܦܬܘܪܢܼ܂
4 ܐܿܟܠ ܥܡܢ ܥܠ ܦܬܘܪܗ
. 36
1 ܣܓܝܕ ܠܐܝܩܪܗ ܘܠܪܒܘܬܗܼ
2 ܕܗܪܟܐ ܦܓܪܗܼ ܘܠܗܠ ܐܓܪܗ܂
3 ܡܕܒܚܐ ܒܐܪܥܐ ܡܠܼܐ ܡܢ ܦܓܪܗܼ܂
4 ܘܚ̈ܝܐܼ ܘܫܘܒܚܐ ܒܝܬ ܡܠܟܘܬܐ
. 37
1 ܫܩܠܘ ܬܠܡ̈ܝܕܐ ܠܚܡܐ ܕܒܪܟܼ܂
2 ܘܩܪܝܗܝ ܦܓܪܐܼ ܘܠܕܡܗ ܚܡܪܐ܂
3 ܐܿܟܠܬ ܥܡܟܘܢ ܪܙܐ ܒܥܕܬܐܼ܂
4 ܬܘܒ ܬܐܟܠܘܢ ܥܡܝ ܒܝܬ ܡܠܟܘܬܐ
. 38
1 ܕܝܠܟ ܡܪܢ ܡܟܝܟܘܬܐܼ܂
2 ܟܪܣܐ ܘܐܘܪܝܐ ܨܠܝܒܐܼ ܘܫܝܘܠ܂
3 ܕܐܢܫܐ ܒܚܘܒܟ ܥܬܝܪ̈ܬܐܼ܂
4 ܪܘܡܐ ܘܫܘܒܚܐܿ ܟܠܝܠܐܼ ܘܥܕܢ
. 39
1 ܟܝܢܢ ܕܐܪܥܐ ܩܪܝܬܝܗܝ ܠܥܕܢܼ܂
2 ܒܪܘܡܐ ܚܝܠܟܼ ܘܒܐܪܥܐ ‍{‍ܐ‍}‍‍<‍ܥ‍>‍ܘܡܪܟ܂
3 ܥܿܠܝܼܬ ܓܢܣܢ ܕܢܿܣܒܼ ܫܘܒܚܟ܂
4 ܬܚܿܬܼܝܬ ܫܘܒܚܟܼ ܕܢܪܝܡ ܨܥܪܢܿ
. 40
1 ܠܟ ܡܠܟܘܬܐ ܘܠܢ ܡܪܝ ܒܝܬܐܼ܂
2 ܕܒܢܘ ܒܝܬܐܼ ܫܩܠܘ ܡܠܟܘܬܐ܂
3 ܠܚܡܐ ܡܩܿܪܒ ܟܗܢܐ ܒܫܡܟܼ܂
4 ܘܡܢܗ ܦܓܪܐܼ ܠܥܢܟ ܫܿܕܝܼܬ
. 41
1 ܐܝܟܐ ܐܢܬ ܡܪܢ ܗܐ ܒܫܡܝܐܼ܂
2 ܘܐܝܟܐ ܢܒܥܝܟܼ ܗܐ ܒܝܬ ܩܘܕܫܐ܂
3 ܕܪܡ ܠܢ ܪܘܡܐ ܘܠܐ ܡܿܛܝܢ ܚܢܼܢܿ
4 ܒܥܕܬܟ ܢܚܙܝܟܼ ܕܦܫܝܩܐ ܠܢ
. 42
1 ܟܘܪܣܝܟ ܕܠܥܠ ܒܢܘܪܐ ܡܬܼܩܼܢ܂
2 ܘܡܢܼܘ ܡܡܪܚ ܢܩܪܘܒ ܨܐܕܘܗܝ܂
3 ܚܝܠܟ ܚܝܐ ܒܠܚܡܐ ܥܡܿܪ܃
4 ܘܕܪܚܿܡ ܠܗܼ ܩܪܒܿ ܛܿܥܡ
. 43
1 ܡܗ̈ܝܡܢܐ ܒܐܘܪܝܟ ܚܿܙܝܢ ܝܬܒܟܼ܂
2 ܘܫܘܒܚܟ ܕܙܩܝܪ ܥܠ ܥܙܪ̈ܘܪܐ܂
3 ܕܚ̈ܠܢ ܥܝ̈ܢܐ ܡܢ ܙܠܝܩ̈ܝܟܼ܂
4 ܘܦܫܝܩ ܠܐܝܕܐ ܠܡܛܥܢ ܦܓܪܟ
. 44
1 ܐܘ ܡܐ ܥܙܝܙ ܘܟܡܐ ܒܣܝܡܼ܂
2 ܐܘ ܡܐ ܬܩܝܦܼ ܘܟܡܐ ܡܟܝܟ܂
3 ܐܘ ܡܐ ܕܠܩܿ ܘܟܡܐ ܢܿܛܪ܃
4 ܐܘ ܟܡܐ ܫܡܿܥܼ ܘܟܡܐ ܛܿܥܢ
. 45
1 ܚܠܝܛ ܕܝܢ ܥܡܢ ܐܝܟ ܡܟܝܟܐܼ܂
2 ܘܝܗܿܒ ܦܓܪܗܼ ܐܝܟ ܒܣܝܡܐ܂
3 ܘܗܿܦܟ ܝܬܒܿ ܐܝܟ ܕܝܿܢܐܼ܂
4 ܘܠܘܩܒܠ ܥܼܡ̈ܠܐ ܓܙܪ ܕܝܢܼܐ
. 46
1 ܒܪܘܡܐ ܥܙܝܙ ܒܐܪܥܐ ܡܟܝܟܼ܂
2 ܫܿܪܐ ܒܪܩܝܥܐܼ ܓܿܢܼܐ ܒܡܥܪܬܐ܂
3 ܢܘܪܐ ܡܟܣܝ ܢܚ̈ܬܘܗܝ ܢܿܛܪ܃ ܪܛܢܐ܃
4 ܪܛܢܐ ܫܡܿܥܼ ܚܘܒܗ ܡܣܝܒܪ
. 47
1 ܪܩܝܥܐ ܕܠܥܠ ܠܐ ܐܚܿܕ ܠܗܼܿ
2 ܘܫܼܪܐ ܒܒܝܬܐܼ ܘܡܣܝܒܪ ܠܗ܂
3 ܚܝܪܗ ܡܪܗܒ ܠܒܝܬ ܓܒܪܝܐܝܠܼ܂
4 ܘܡܪܡ ܛܥܢܬܗܼ ܘܒܗܝܠܐ ܗܘܬ
. 48
1 ܣܡ ܪܒܘܬܗ ܒܟܪܣܐ ܕܐܡܗܼ܂
2 ܠܥܘܒܗܿ ܚܝܿܠܼ ܠܡܛܥܢ ܝܘܩܪܐ܂
3 ܘܫܠܗܒܝܬܐ ܣܼܥܪ ܥܙܪ̈ܘܪܐܼ܂
4 ܘܢܿܛܪ ܐܢܘܢ ܡܢ ܝܩܕܢܐ
. 49
1 ܪܒܼܥ ܗܘܐ ܒܐܘܪܝܐ ܐܝܟ ܡܟܝܟܐܼ܂
2 ܫܓܼܫܗܿ ܠܒܒܠ ܐܝܟ ܥܙܝܙܐ܂
3 ܪ̈ܥܘܬܐ ܚܙܘ ܝܠܘܕܐܼ܂
4 ܡܓܘ̈ܫܐ ܒܿܕܩܘܼ ܕܡܠܟ ܡ̈ܠܟܐ ܗܘ
. 50
1 ܐܦ ܠܗܿ ܠܡܪܝܡ ܬܗܪܐ ܢܐܚܘܕ܃
2 ܕܟܠ ܚ̈ܕܬܬܐ ܢܒ̈ܥܝ ܘܐܬܟܪܟܗܿ܂
3 ܕܠܐ ܫܘܬܦܐ ܝܠܕܐ ܗܼܘܐ ܠܗܿ܃
4 ܐܝܟ ܕܠܡܿܠܟܐ ܨܒܘ ܩܘܪ̈ܒܢܘܗܝ
. 51
1 ܡܥܪܬܐ ܫܠܝܐ ܘܐܘܪܝܐ ܡܠܝܐܼ܂
2 ܨܗܝܘܢ ܕܡܟܐ ܘܒܒܠܼ ܥܝܪܐ܂
3 ܗܿܝ ܕܣܢܬܗ ܒܢܘܗܪܗ ܚܼܫܟܬܼ܂
4 ܥܕܬܐ ܪܚܡܬܗܼ ܒܝܠܕܗ ܢܗܼܪܬ
. 52
1 ܗܘܼܐ ܠܗܿ ܝܠܕܐ ܠܒܪܬ ܠܘ̈ܝܐܼ܂
2 ܒ̈ܢܬܗ ܕܝܬܪܘܢ ܫܩܠܝܗܝ ܡܢܗܿ܂
3 ܫܟܪܬܗ ܓܝܪ ܗܿܝ ܕܝܠܕܬܗܼ܂
4 ܘܐܫܬܘܕܥܬܗ ܗܿܝ ܕܫܩܠܬܗ
. 53
1 ܣܢܗܿ ܗܘܐ ܠܐܡܗ ܥܠ ܕܣܢܬܗܼ܂
2 ܕܟܕ ܝܠܕܬܗܼ ܠܐ ܐܚܒܬܗ܂
3 ܪܚܡܗܿ ܠܥܕܬܐ ܕܟܕ ܐܩܒܠܬܗܼ܂
4 ܒܟܢܦܗܿ ܛܥܼܢܬ ܐܦ ܚܒܒܬܗ
. 54
1 ܒܒܠ ܫܠܼܚܬ ܛܘܒܐ ܠܝܗܘܕ܃
2 ܫܡܼܥܬ ܨܗܝܘܢܼ ܠܩܛܠܐ ܩܡܼܬ܂
3 ܒܝܕ ܩܘܪ̈ܒܢܐ ܕܫܼܕܪܬ ܒܒܠ܂
4 ܕܪܫܼ ܗܘܐ ܚܣܡܐ ܫܒܝܠܐ ܒܨܗܝܘܢ
. 55
1 ܥܒܪܝܢ ܒܐܘܪܚܐ ܘܣܛܘ ܥܠܘ ܠܗܿ܃
2 ܒܫ̈ܘܐܠܝܗܘܢ ܬܒܪܘܗܝ ܠܒܗܿ܂
3 ܘܦܼܬܚܬ ܣܼܦܪ̈ܐ ܘܠܒܟܗܿ ܙܘܥܐܼ܂
4 ܟ̈ܬܒܐ ܟܬܒܘܗܿ ܒܣܚ̈ܝܦܬܐ
. 56
1 ܣܿܦܪ̈ܐ ܕܩܪܘ ܝܗܒܘ ܦܘܫܩܐܼ܂
2 ܕܒܒܝܬ ܠܚܡܼ ܡܫܝܚܐ ܕܢܿܚ܂
3 ܘܥܼܬܕܬܿ ܢܦܫܗܿ ܕܩܼܪܬ ܐܢܘܢܼ܂
4 ܕܡܕܡ ܕܣܼܢܬ ܦܫܩܘ ܠܗܿ
. 57
1 ܟܘܟܒܐ ܐܝܬܝ ܠܡܓܘܫ̈ܝܐܼ܂
2 ܕܢܐܠܦܘܢ ܪܙܗ ܡܢ ܥܒܪ̈ܝܐ܂
3 ܟܬܒܐ ܕܦܬܼܚܬ ܠܒܪܐ ܕܝܠܼܕܬ܃
4 ܫܪܪܐ ܐܠܦ ܠܡܓܘܫ̈ܝܐ
. 58
1 ܒܝܗܘܕ ܝܠܦܘ ܡܢ ܕܡܛܐܘܗܿ܃
2 ܕܥܼܡܠܐ ܕܐܘܪܚܐܼ ܠܘ ܒܛܝܼܠܐ ܗܘ܂
3 ܕܡܕܡ ܕܫܚܩܘ ܪ̈ܥܝܢܝܗܘܢܼ܂
4 ܫܡܥܘ ܦܘܫܩܗܼ ܘܐܫܬܪܪܘ ܒܗ
. 59
1 ܟܘܟܒܐ ܡܢ ܠܥܠ ܛܿܫܝ ܢܦܫܗܼ܂
2 ܕܢܚܼܘ ܩܪ̈ܝܢܐܼ ܘܡܠܠܘ ܚܘܠܦܘܗܝ܂
3 ܫܬܼܩ ܒܫܡܝܐ ܕܚܼܙܐ ܠܣܿܦܪ̈ܐܼ܂
4 ܕܐܪ̈ܙܘܗܝ ܓܠܿܝܢ ܠܒ̈ܢܝ ܒܒܠ
. 60
1 ܦܬܚܘ ܣܼܦܪ̈ܝܗܘܢ ܘܐܓܢܝ ܢܘܗܪܗܼ܂
2 ܢܚܼܬ ܗܘܐܼ ܘܨܡܼܚ ܒܟ̈ܬܒܝܗܘܢ܂
3 ܛܦܘ ܣܿܦܪ̈ܝܗܘܢ ܘܚܘܝ ܨܡ̈ܚܘܗܝܼ܂
4 ܠܡܓܘܫ̈ܝܐ ܕܝܠܦܘܗܝ ܡܢܼܘ
. 61
1 ܪܕܝܿܢ ܒܐܘܪܚܐ ܘܗܼܘ ܒܫܡܝܐܼ܂
2 ܒܣܿܦܪ̈ܐ ܩܿܪܝܼܢ ܘܗܼܘ ܒܟܬܒ̈ܐ܂
3 ܡܛܘ ܒܝܬ ܠܚܡ ܘܗܼܘ ܒܡܥܪܬܐܼ܂
4 ܘܣܡܟܘ ܠܐܘܪܝܐܼ ܘܗܼܘ ܒܥܙܪ̈ܘܪܐ
. 62
1 ܟܘܟܒܗ ܨܐܪ ܠܐܠܗܘܬܗܼ܂
2 ܘܕܐܝܬܘܗܝ ܟܣܝܐ ܘܓܠܝܐ ܡܘܕܥ܂
3 ܡܚܘܐ ܐܘܪܚܐ ܐܝܟ ܐܠܗܐܼ܂
4 ܘܡܓܣ ܒܐܘܪܝܐ ܐܝܟ ܒܪ ܐܢܫܐ
. 63
1 ܛܥܢܬܗ ܫܡܝܐ ܥܕܡܐ ܠܨܗܝܘܢܼ܂
2 ܕܢܚܼ ܠܗ ܒܣܼܦܪ̈ܐ ܒܟܪܟܐ ܕܝܗܘܕ܂
3 ܗܼܘ ܒܟܬܒ̈ܐ ܘܗܼܘ ܒܫܡܝܐܼ܂
4 ܕܠܥܠ ܘܠܬܚܬܼ ܗܘܝܘ ܡܪܐ
. 64
1 ܡܓܘܫ̈ܐ ܐܠܨܘܗܿ ܕܬܩܿܘܡ ܬܐܠܦܼ܂
2 ܡܢ ܓܘ ܣܼܦܪ̈ܝܗܿ ܡܕܡ ܕܛܥܼܬ܂
3 ܘܕܐܝܟܐ ܕܢܚܿ ܡܝܟܐ ܓܠܼܐ ܠܗܿ܃
4 ܡܓܘܫ̈ܐܼ ܠܬܡܢ ܬܪܨܘܗܿ ܠܐܘܪܚܐ
. 65
1 ܐܘܪܚܐ ܕܐܬܘ ܡܛܠܬܗܿ܃
2 ܟܕ ܡܬܩܪܝܐ ܡܓܘܫ̈ܐ ܝܠܦܘܗܿ܂
3 ܐܙܠܘ ܡܟܝܠ ܒܬܟܝܠܘܬܐܼ܂
4 ܕܐܕܪܟܘ ܩܘܫܬܐ ܡܢ ܣܼܦܪ̈ܝܗܘܢ
. 66
1 ܕܬܟܦܘܪ ܡܟܝܠ ܠܐ ܡܨܝܐ ܗܘܬܼ܂
2 ܣܼܦܪ̈ܐ ܕܝܠܗܼܿ ܪܙܐ ܓܠܘ ܠܗܿ܂
3 ܗܘܼܐ ܩܪܝܢܗܿ ܣܗܕܐ ܘܐܟܣܼ܂
4 ܠܦܠܝܓܘܬܐ ܕܒܪܥܝܢܗܿ
. 67
1 ܒܟܠ ܕܟ̈ܬܝܒܢ ܠܫܡܟ ܫܘܒܚܐܼ܂
2 ܡܫܝܚܐ ܕܓܠܼܐ ܪ̈ܙܐ ܠܥܕܬܗ܂
3 ܕܐܢ ܗܼܘ ܕܬܛܥܐ ܩܼܪܬ ܒܢ̈ܒܝܐܼ܂
4 ܦܢܼܬ ܥܠ ܐܘܪܚܐ ܕܗܝܡܢܘܬܐ
. 68
1 ܐܦ ܥܠ ܒܝܬܟ ܢܒ̈ܝܐ ܡܠܠܘܼ܂
2 ܕܢܗܘܐ ܡܬܼܩܢ ܥܠ ܪܝܫ ܛܘܪܐ܂
3 ܘܐܝܟ ܕܝܠܦܢܢ ܡܛܠܬܗ܃
4 ܗܐ ܨܒܬܢ ܚܢܢ ܐܣ̈ܝ ܫܘܒܚܟ