The Comprehensive Aramaic Lexicon

242:01	ܐܘ ܕܫܘܠܛܢܐ ܡܬܪܓܪܓ ܐܢܐ܂ ܦܝܠܣܘܦܐ ܐܝܬܝ܂ ܐܦܠܐ ܒܟܠܗܿ
242:02	ܡܕܝܢܬ ܡܠܟܘܬܐ ܡܿܩܘܐ ܐܢܐ܂ ܣܿܠܩ ܐܢܐ ܠܐܿܬܝܢܣ ܡܢ ܐܝܟܐ
242:03	ܕܢܚܿܬܬ܂ ܘܟܕ ܫܡܥ ܡܠܟܐ ܗܠܝܼܢ ܐܬܚܡܬ ܘܐܡܼܪ܂ ܕܟܠ ܐܝܢܐ
242:04	ܕܡܝܬܐ ܫܪܒܗܿ ܕܐܠܘܬܪܐܿ ܩܕܡܝܼ܂ ܗܢܐ ܒܥܠܕܒܒܐ ܕܡܠܟܘܬܐ
242:05	ܐܝܬܘܗܝ܂ ܘܬܘܒܼ ܠܐ ܐܢܫ ܐܡܪܚ ܕܢܝܬܐ ܫܪܒܐ ܗܢܐ܂ ܘܒܚܕ ܡܢ
242:06	ܝܘ̈ܡܝܢ ܒܨܠܘܬܐ ܕܪܡܫܐ ܡܢ ܥܩܬܗܿ ܕܟܪܝܘܬܗܿ܃ ܐܫܕܝܬ ܢܦܫܗܿ
242:07	ܐܠܘܬܪܐ ܬܚܝܬ ܚܕ ܡܢ ܟܘܒ̈ܫܐ ܕܐܣ̈ܛܘܢܐ ܕܥܕܬܐܼ ܘܕܡܟܬ܂ ܘܟܕ
243:01	ܫܠܡܼܬ ܬܫܡܫܬܐ ܘܢܦܼܩ ܟܠ ܐܢܫܼ܂ ܒܥܐܘܗܿ ܥ̈ܒܕܝܗܿ ܘܠܐ ܐܫܟܚܘܗܿ܂
243:02	ܘܒ̈ܬܠܬ ܫ̈ܥܝܢ ܒܠܠܝܐܼ ܐܬܬܥܝܪܬ ܡܢ ܫܢܬܗܿ܂ ܘܚܿܪܬ ܘܚܼܙܬ ܕܠܝܬ
243:03	ܐܢܫܼ܂ ܘܩܿܡܬ ܘܢܦܩܼܿܬ ܒܠܚܘܕܝܗܿ܂ ܘܟܕ ܡܿܒܟܝܐ ܠܢܦܫܗܿ ܘܣܠܩܐ
243:04	ܒܫܘܩܐ ܗܿܘ ܕܡܬܩܪܐ ܕܕܗܒܐܼ܂ ܡܿܠܠ ܥܡܗܿ ܕܝܘܐ ܚܕ ܘܐܡܪ ܠܗܿ܂
243:05	ܡܐ ܠܟܝ ܐܠܘܬܪܐ ܒܪܬܗ ܕܠܝܩܢܘܣ ܪܚܡܐ ܕܝܠܝ ܠܐ ܝܗܼܒ ܠܟܝ
243:06	ܝܘܠܝܢܘܣ ܡܕܡ ܕܫܼܩܠ ܡܢܟܝܼ܂ ܘܗܼܝ ܐܡܿܪܬ ܠܗ܂ ܠܐ ܡܪܝ܂ ܘܗܝܼ
243:07	ܣܿܒܪܬ ܠܗܿ܃ ܕܡܢ ܗܠܝܢ ܕܢܛܪܝܢ ܫܘܩܐ ܐܝܬܘܗܝ܂ ܘܩܪܗܿ ܘܩܪܒܬ ܟܕ
243:08	ܪܬܝܿܬܐ ܡܢ ܙܘܥܗܿ܂ ܘܐܡܼܪ ܠܗܿ܂ ܡܛܘܠ ܚܘܒܗ ܕܐܒܘܟ ܗܿܘ ܕܣܿܓܕ
243:09	ܗܘܐ ܠܝ܃ ܘܣܿܐܡ ܗܘܼܐ ܠܝ ܒܣ̈ܡܐ ܘܡܿܕܒܚ ܗܘܼܐ ܠܝܼ܂ ܐܢܐ ܡܿܦܢܐ
243:10	ܐܢܐ ܠܟܝ ܟܠ ܡܕܡ ܕܫܩܼܠ ܡܢܟܝ ܝܘܠܝܢܘܣ܂ ܐܠܐ ܙܠܝ ܨܝܕ ܡܿܠܟܐ
243:11	ܘܐܡܼܪ ܠܗ܂ ܕܢܐܬܐ ܝܘܠܝܢܘܣ ܘܢܐܡܐ ܠܝ ܒܗܿܘ ܨܠܡܐ ܕܢܛܪ
243:12	ܫ̈ܥܐ ܕܡܕܝܢܬܐ܂ ܘܐܢܐ ܠܒܟܿ ܐܢܐ ܠܗ܂ ܘܠܐ ܡܫܬܘܙܒ ܡܢ ܐܝ̈ܕܝܼ܂
243:13	ܥܕܡܐ ܕܡܿܦܢܐ ܠܟܝ ܟܘܠ ܡܕܡ ܕܢܣܼܒ ܡܢܟܝ܂ ܘܗܼܝ ܡܚܕܐ ܡܢ
243:14	ܨܦܪܐ ܥܿܠܬ ܨܝܕ ܡܠܟܬܐ ܘܐܡܪܬ ܠܗܿ܂ ܘܡܠܟܬܐ ܐܫܬܥܝܬ ܠܡܿܠܟܐ܂
243:15	ܘܟܕ ܫܡܼܥ ܡܿܠܟܐ ܐܡܪ ܠܗܿ܂ ܡܕܝܢ ܠܐ ܬܐܡܪܝܢ ܠܝ ܗܠܝܢ܂ ܐܠܐ
243:16	ܠܣܡܕܪܘܢ ܣܟܘܠܣܛܝܩܐ܂ ܘܬܡܼܗ ܡܿܠܟܐ ܘܐܬܕܡܪ ܒܫܪܒܐ ܗܢܐ
243:17	ܘܩܪܗܿ ܠܐܠܘܬܪܐܼ ܘܥܿܠܬ ܩܕܡܘܗܝ ܘܢܦܠܼܬ ܥܠ ܪ̈ܓܠܘܗܝ ܘܣܓܕܬ
243:18	ܠܗ܂ ܟܕ ܒܟܝܐ ܒܚܫܐ܂ ܘܡܬܟܫܦܐ ܗܘܬ ܠܗ ܟܕ ܐܡܿܪܐܼ ܐܬܪܚܡ
243:19	ܥܠܝ ܡܪܝ܂ ܠܘ ܢܘܟܪܝܬܐ ܐܝܬܝ ܠܟ܂ ܐܢܬ ܗܼܘ ܡܪܝ ܐܚܝ ܫܪܝܪܐ܂
243:20	ܘܠܟ ܐܓܥܠܘܢܝ ܐܒ̈ܗܝ܂ ܘܠܝܬ ܠܝ ܒܝܬ ܓܘܣܐ ܐܚܪܝܢܐ ܡܪܝ ܐܠܐ
243:21	ܪܒܘܬܟ ܚܬܟ ܐܢܐ ܡܪܝ ܒܚܘܒܼܐ܂ ܘܗܕܡܟ ܒܓܢܣܐ ܘܠܘ ܕܚܠܬ
243:22	ܐܠܗܐ ܐܝܬܝܗܿ ܗܕܐ܂ ܕܬܗܡܼܐ ܡܢ ܛܠܝܡܘܬܝ܂ ܝܪܘܬܐ ܐܚܪܢܐ ܠܝܬ
243:23	ܠܝ܂ ܘܠܐ ܓܢܣܐ ܐܦܠܐ ܛܘܗܡܐ ܩܪܝܿܒܐ܂ ܘܚܙܝ ܡܪܝ ܡܿܠܟܐ܂
243:24	ܕܐ̈ܒܗܝܼ ܡܠܟܘܬܐ ܡܿܕܒܪܝܢ ܗܘܘ܃ ܘܠܘ ܡܛܠ ܐܒܝ ܕܐܝܬܘܗܝ ܗܘܐ
243:25	ܛܪܘܢܐ ܬܗܼܦܟ ܐ̈ܦܝܟ ܡܢܝ܂ ܐܠܐ ܡܛܠ ܐܡܝ ܕܐܝܬܝܗܿ ܗܘܬ ܚܬܗ
243:26	ܕܐܒܘܟܼ܂ ܐܬܪܚܡ ܥܠܝ܂ ܠܘ ܓܝܪ ܥܘܬܪܐ ܕܚܕ ܡܢ ܪ̈ܘܪܒܢܐ ܫܩܼܠ
243:27	ܘܚܛܼܦ ܠܗ ܝܘܠܝܢܘܣ܂ ܐܠܐ ܟܘܪܣܝܐ ܘܬܓܐܼ ܘܟܠܝܠܐ܂ ܘܠܡܠܟܘܬܐ
243:28	ܣܝ̈ܡܢ ܐܦܘ̈ܗܝ܂ ܘܡܿܠܟܐ ܡܙܕܪܟܠ ܕܢܗܘܐ ܠܥܠ ܡܢܟ܂ ܘܟܕ ܫܡܼܥ
244:01	ܡܿܠܟܐ ܗܠܝܢ ܡܢ ܐܠܘܬܪܐܼ܂ ܗܝܕܝܢ ܐܬܡܪܡܪ ܒܢܦܫܗ ܘܐܡܪ ܠܗܿ܂
244:02	ܗܫܐ ܡܿܢ ܐܥܒܕ ܠܟܼܝ܂ ܘܗܼܝܼ ܐܡܿܪܬ ܠܗ܂ ܢܐܡܐ ܠܝ ܒܗܿܘ
244:03	ܨܠܡܐ ܕܢܿܛܪ ܫ̈ܥܐ ܕܡܕܝܢܬܐ܃ ܘܬܘܒ ܠܥܠܡ ܠܝܬ ܠܝ ܥܡܗ ܡܠܬܐ܂
244:04	ܘܟܕ ܐܡܼܪ ܡܿܠܟܐ ܠܣܘܢܩܠܛܘܣ ܡܕܡ ܕܐܡܼܪ ܗܿܘ ܕܝܘܐ ܠܐܠܘܬܪܐ܃
244:05	ܗܼܘܘ ܒܕܘܡܪܐ ܪܒܐ܂ ܘܟܕ ܫܼܡܥ ܝܘܠܝܢܘܣ ܗܠܝܢ܂ ܐܡܼܪ ܠܡܿܓܢܘܣ
244:06	ܚܿܪܫܐ ܪܚܡܗ܂ ܘܗܼܘ ܫܩܼܠܗ ܒܠܠܝܐ ܘܐܼܙܠ ܠܒܝܬ ܫ̈ܥܐ܂ ܘܟܕ ܥܐܠܝܢ
244:07	ܒܬܪܥܐܼ܂ ܫܿܪܝ ܗܿܘ ܕܝܘܐ ܡܝܼܠܠ ܟܕ ܐܡܿܪܼ܂ ܠܐܝܟܐ ܥܿܐܠ ܐܢܬ
244:08	ܝܘܠܝܢܘܣ ܓܢܿܒܐ ܘܚܿܛܘܦܐ ܘܕܓܠܐ܂ ܘܿܝ ܠܟ ܡܢ ܐܠܗܐ ܗܿܘ ܕܕܓܠܬ
244:09	ܒܗ܂ ܘܝܡܝܼܬ ܒܨܠܝܒܐ ܩܕܝܫܐ ܘܒܩܘܪܒܢܐ܂ ܒܗܠܝܢ ܕܓܿܠܬ ܘܠܐ
244:10	ܦܪܣܼܝܘ ܠܕܓܿܠܘܬܟ܂ ܐ‍<‍ܝ‍>‍ܢ ܫܡܗ ܪܒܐ ܕܐܠܗܐܼ܂ ܒܟܘܠܗܿ ܗܕܐ
244:11	ܡܕܝܢܬܐ ܡܟܪܙ ܐܢܐ ܠܗܿ ܠܕܓܠܘܬܟܿ܂ ܘܥܿܒܕ ܐܢܐ ܠܟ ܓܘܚܟܐ
244:12	ܒܟܠܗܿ ܐܪܥܐ܂ ܠܥܘܬܪܗ ܕܠܝܩܢܘܣ ܪܚܡܐ ܕܝܠܝ ܐܬܼܪܓܪܓܬ܂
244:13	ܘܒܥܘܬܪܐ ܗܿܘ ܕܡܢ‍<‍ܝ‍>‍ ܐܬܝܗܒ ܠܗ܂ ܒܿܥܐ ܐܢܬ ܕܬ‍<‍ܬ‍>‍ܪܘܪܒ ܘܿܝ ܠܟ
244:14	ܒܐ̈ܝܕܝ ܡܿܢ ܢܦܠܼܬ܂ ܠܐ ܗܿܘ ܙܝܘܐ ܪܒܐ ܕܐܠܗܐ܂ ܒܫܠܡܐ ܐܘ ܒܫܝܢܐܼ
244:15	ܡܢ ܠܐ ܡܫܬܘܙܒ ܐܢܬ܂ ܘܟܕ ܫܡܼܥ ܗܠܝܢ ܝܘܠܝܢܘܣܼ ܗܘܼܐ ܒܕܚܠܬܐ
244:16	ܪܒܬܐ ܘܫܝܼܢܗ ܠܕܝܘܐ ܗܿܘ ܡܿܓܢܘܣ ܚܿܪܫܐ ܘܐܼܡܪ ܠܗ܂ ܕܠܐ ܡܪܝ
244:17	ܬܫܬܚܩ ܥܠܘܗܝ ܪܒܘܬܟ܂ ܟܘܠ ܡܕܡ ܕܦܩܿܕ ܐܢܬ ܠܗ ܥܿܒܕ܂ ܐܠܐ
244:18	ܒܠܚܘܕ ܠܐ ܢܬܦܪܣܐ ܘܢܗܘܼܐ ܓܘܚܟܐ܂ ܡܛܠ ܕܠܘ ܓܒܪܐ ܫܚܝܡܐ
244:19	ܐܝܬܘܗܝ܂ ܘܐܼܡܪ ܠܗ ܕܝܘܐ ܗܘܿ ܠܡܓܢܘܣ ܚܿܪܫܐ܃ ܕܐܢܐ ܝܪܬܘܬܗ
244:20	ܕܠܝܩܢܘܣ ܗܿܘ ܕܡܕܒܿܚ ܗܼܘܐ ܠܝ܃ ܠܐܝܢܐ ܕܠܐ ܡܿܕܒܚ ܠܝ ܘܣܿܐܡ
244:21	ܠܝ ܒ̈ܣܡܐ܂ ܠܐ ܝܗܿܒ ܐܢܐ܂ ܘܐܢ ܫܡܿܥ ܠܝ ܝܘܠܝܢܘܣ ܘܥܿܒܼܕ ܡܕܡ
244:22	ܕܐܡܿܪ ܐܢܐ ܠܗܼ܂ ܐܥܒܕܝܘܗܝ ܡܪܐ ܥܠ ܟܘܠܗܿ ܐܪܥܐ܂ ܘܡܠܟܘܬܐ
244:23	ܕܟܠܗ ܐܘܚܕܢܐ ܕܒܝܬ ܪ̈ܗܘܡܝܐܼ ܬܬܝܿܗܒ ܠܗ܂ ܘܡܢ ܣܘ̈ܦܝܗܿ ܠܣܘ̈ܦܝܗܿ
244:24	ܕܐܪܥܐ ܢܬܼܟܪܙ ܫܡܗ܂ ܘܡ̈ܐܐ ܫ̈ܢܝܼܢ ܬܬܿܝܒܠ ܡܠܟܘܬܗ ܒܙܟܘܬܐ܂
244:25	ܟܕ ܐܚܿܝܕ ܡܕܒܪܢܘܬܐ ܥܠ ܟܠܗܝܢ ܡ̈ܠܟܘܬܐ܂ ܒܪܡ ܓܝܪ ܐܢ ܨܿܒܐ
244:26	ܕܠܐ ܢܬܦܪܣܐ ܘܢܬܼܓܠܐ ܡܕܡ ܕܥܒܼܕ܃ ܘܢܗܘܐ ܓܘܚܟܐ܃ ܘܢܘܩܕܘܢ
244:27	ܟܪ̈ܣܛܝܢܐ ܦܓܪܗ ܒܢܘܪܐ ܐܝܟ ܕܥܒܼܕܘ ܠܐܚܘܗܝܼ܂ ܡܚܕܐ ܢܪܡܼܐ
244:28	ܠܒܘܢܬܐ ܩܕܡܝܼ܂ ܘܐܡܼܪ ܠܗ ܡܓܢܘܣ ܚܪܫܐ ܠܠܘܠܝܢܘܣ ܚܙܝ ܐܚܝ
245:01	ܗܫܐܼ܂ ܐܝܕܐ ܡܢ ܗܠܝܢ ܬܪ̈ܬܝܢ ܡܿܛܝܒ ܐܢܬ ܕܬܥܒܕ܂ ܘܗܼܘ ܠܘܠܝܢܘܣ
245:02	ܐܡܼܪ܂ ܕܠܝ܃ ܬܪ̈ܝܢ ܓܘܢ̈ܚܐ ܪ̈‍<‍ܘܪ‍>‍̈ܒܐ ܓܕܫܘܢܝ܂ ܐܢ ܗܼܘ ܕܡܬܦܪܣܐ
245:03	ܐܢܐܼ܂ ܗܐ ܓܘܚܟܐ ܘܫܡܐ ܒܝܼܫܐ ܗܿܘܐ ܐܢܐ ܒܟܠܗܿ ܐܪܥܐ܂
245:04	ܘܓܒܪܐ ܕܐܬܪܕܝ ܒܚܟܡܬܐ ܘܐܫܬܡܗ ܦܝܠܣܘܦܐ܃ ܘܒܟܠܗܿ ܣܘܢܩܠܛܘܣ
245:05	ܐܝܟ ܕܙܕܩܿ ܠܦܝܠܣܘܦܐ܃ ܡܘܗ̈ܒܬܐ ܘܐܝܩܪ̈ܐܼ ܩܕܡܝ ܡܿܩܪܒܝܢ ܗܘܼܘ܂
245:06	ܘܗܢܼܘܢ ܘܒ̈ܢܝܗܘܢ ܘܢܫ̈ܝܗܘܢ܃ ܣܓܕܬܐ ܐܝܟ ܕܠܡܿܠܟܐܼ ܡܿܩܪܒܝܢ
245:07	ܗܘܼܘ ܠܝ܂ ܘܡܢ ܒܬܪ ܗܢܐ ܫܡܐ ܪܒܐ܃ ܬܬܼܟܪܙ ܗܕܐ ܒܡܕܝܢܬ
245:08	ܡܠܟܘܬܐ܃ ܕܐܝܬ ܒܗܿ ܒܢܝ̈ܢܫܐ ܡܢ ܟܠܗܿ ܐܪܥܐ܃ ܕܝܘܠܝܢܘܣ ܒܪܗ
245:09	ܕܐܣܩܠܦܝܣ ܗܿܘ ܕܦܝܠܣܘܦܐ ܡܫܿܬܡܗ ܗܼܘܐ܂ ܡܛܠ ܪܚܡܬ
245:10	ܕܗܒܐܼ܂ ܓܢ̈ܒܼܘܬܐ ܐܫܬܟܚܬ ܨܐܕܘܗܝ܂ ܘܐܡܪܚ ܘܕܿܓܠ ܒܡ̈ܘܡܿܬܗܼ
245:11	ܒܨܠܝܒܐ ܘܒܩܘܪܒܢܐ܂ ܘܟܦܼܪ ܒܐܠܗܐ ܕܥܼܒܕܗܼ܂ ܘܗܼܘܐ ܢܘܟܪܝܐ
245:12	ܠܪ̈ܐܙܐ ܕܟܪ̈ܣܛܝܢܐ܂ ܘܠܪܘܫܡܐ ܩܕܝܫܐ ܕܡܥܡܘܕܝܬܐ܂ ܘܿܝ ܠܗ
245:13	ܠܝܘܠܝܢܘܣ ܠܐܝܢܐ ܓܘܚܟܐ ܘܒܗܬܬܐܼ܂ ܘܬܒܼܪ ܠܒܐ ܘܡܿܘܝܩܐ ܐܝܬܝܬܗ
245:14	ܪܚܡܼܬ ܕܗܒܐ܂ ܡܟܝܠ ܛܒ ܠܝܼ ܕܐܪܡܿܐ ܠܒܘܢܬܐܼ܂ ܘܐܿܩܪܒ ܕܒܚܼܐ
245:15	ܘܠܐ ܐܗܘܐ ܓܘܚܟܐ ܘܫܡܐ ܒܝܼܫܐ܂ ܘܪܗܼܛ ܡܚܕܐ ܡܓܢܘܿܣ
245:16	ܚܪܫܿܐ ܘܐܝܼܬܝ ܠܒܘܢܬܐ܂ ܘܝܗܒܗܿ ܠܝܘܠܝܢܘܣܼ ܘܩܿܪܒ ܩܕܡ ܫ̈ܐܕܐ܂
245:17	ܘܐܪܟܢ ܪܝܫܗܼ ܘܣܼܓܕ ܠܗܘܢܿ ܘܐܼܡܪ ܠܗܘܢ ܕܝܘܐ ܗܿܘ ܕܙܠܘ ܒܫܠܡܐ܂
245:18	ܘܡܢ ܒܬܪ ܬ̈ܠܬܐ ܝܘ̈ܡܝܼܢ܂ ܬܘ ܨܐܕܝ܂ ܕܐܝܬ ܠܝ ܡܕܡ ܕܐܼܡܿܪ ܠܟܘܢ܂
245:19	ܘܡܢ ܒܬܪ ܬ̈ܠܬܐ ܝܘ̈ܡܝܼܢ܂ ܫܩܠܗ ܡܓܢܘܣ ܚܪܫܐ ܠܝܘܠܝܢܘܣܼ܂ ܘܢܚܼܬܗ
245:20	ܠܒܝܬ ܫ̈ܥܐ ܘܦܬܼܚ ܡܓܢܘܣ ܚܪܫܐܿ ܣܼܦܪ ܛܘ̈ܠܩܐ ܗܿܘ ܕܟܬܝܒܝܢ ܒܗ
245:21	ܫܡ̈ܗܝܗܘܢ ܕܟܠܗܘܢ ܫ̈ܐܕܐܼ܂ ܘܐܬܿܟܢܫܘ ܡܚܕܐ ܕܝ̈ܘܐ ܡܢ ܟܘܠ
245:22	ܦܢ̈ܝܢ ܘܐܬܘ܂ ܘܟܕ ܚܼܙܐ ܐܢܘܢ ܝܘܠܝܢܘܣ ܕܦܪܝܼܚܝܢ ܘܥܿܐܠܝܼܢ܂ ܐܬܬܼܙܝܥ
245:23	ܘܗܼܘܐ ܒܕܚܠܬܐ܂ ܘܐܣܬܪܗܒ ܘܥܼܒܕ ܨܠܝܒܐ ܥܠ ܒܝܬ ܥܝܢܘ̈ܗܝ܂
245:24	ܘܡܚܕܐܼ ܥܼܪܩܘ ܟܠܗܘܢ܂ ܐܡܿܪ ܠܗ ܡܓܢܘܣ܂ ܪܚܡܝ ܝܘܠܝܢܘܣܼ܂
245:25	ܠܡܢܐ ܥܼܒܕܬ ܠܟ ܨܠܝܒܬܐ܂ ܘܐܡܼܪ ܝܘܠܝܢܘܣ܂ ܠܐ ܝܕܥܿ ܗܘܝܬܸ ܕܥܪܩܼܝܢ
245:26	ܘܕܚܼܠܝܢ ܡܢ ܨܠܝܒܐ܂ ܘܐܠܐ ܠܐ ܥܼܿܒܕ ܗܘܝܬ܂ ܘܐܡܼܪ ܠܗ ܡܓܿܢܘܣ܂
245:27	ܐܢ ܨܿܒܐ ܐܢܬ ܕܬܚܙܐ ܐܢܘܢ ܘܢܗܘܘܢ ܡܿܬܟܢܫܝܢ ܨܐܕܝܟ܃
245:28	ܘܡܿܚܘܝܢ ܠܟ ܟܣܝ̈ܬܐ܃ ܘܡܠܦܝܢ ܠܟ ܣܬܝܪ̈ܬܐ܃ ܘܬܥܘܠ ܒܪ̈ܐܙܝܗܘܢ
246:01	ܘܬܬܼܓܡܪ ܒܚܙܬܗܘܢ܂ ܘܬܗܘܐ ܒܪ ܩܝܡܗܘܢ܃ ܘܢܚܘܿܘܢܟ ܗܠܝܢ
246:02	ܕܟ̈ܣܝܢ܃ ܘܢܠܦܘܢܟ ܗܠܝܢ ܕܓ̈ܢܝܙܢ܃ ܘܢܥܒܕܘܢܟ ܡܠܼܟ ܡ̈ܠܟܝܢ܃
246:03	ܘܢܫܿܥܒܕܘܢ ܠܟ ܥܡ̈ܡܐ ܘܟܠܗܝܢ ܡܠܟ̈ܘܬܐ܃ ܘܢܪܡܪܡܘܢܟ ܠܥܠ ܡܢ
246:04	ܟܠ܂ ܘܢܗܘܘܢ ܡܫܬܡܥܝܢ ܠܟ ܐܝܟ ܥܒܼ̈ܕܐ ܠܡܪ̈ܝܗܘܢ܂ ܗܢܐ ܢܝܫܐ
246:05	ܕܨܠܝܒܐܼ܂ ܠܐ ܬܥܒܕ ܬܘܒ ܠܥܠܡ܂ ܘܬܘܒܼ ܩܼܪܐ ܠܗܘܢ ܡܓܢܘܣ܃
246:06	ܘܐܬܼܘ ܥܡ ܪܒܗܘܢ ܣܛܢܐ܂ ܘܐܼܪܟܢ ܪܝܫܗ ܝܘܠܝܢܘܣܼ ܘܣܓܕ ܠܗܘܢܿ
246:07	ܘܣܼܠܩ ܐܪܟܘܢܛܐ ܕܫ̈ܐܕܐܼ܂ ܘܝܬܼܒ ܥܠ ܟܘܪܣܝܐ ܕܦܢܿܛܣܝܐ ܕܛܘܥܝܝ܂
246:08	ܟܘܪܣܝܐ ܠܡ ܕܢܘܪܐ ܘܚ̈ܝܠܘܬܐ ܠܡ ܕܫ̈ܐܕܐܿ܂ ܕܩܝܼܡܝܢ ܗܼܘܘ ܩܕܡܘܗܝ
246:09	ܒܕܚܠܬܐ܂ ܘܥܼܢܐ ܘܐܼܡܪ ܠܗܘܢܿ ܝܕܥܝܢ ܐܢܬܘܢ ܕܡܠܟܘܬܗ ܘܫܘܠܛܢܗ
246:10	ܕܥܠܡܐ ܗܢܐ ܟܠܗ܃ ܐܢܐ ܐܚܿܝܕ ܐܢܐ ܠܗܿ܂ ܘܡ̈ܠܟܐ ܕܟܘܠܗܿ
246:11	ܐܪܥܐ ܠܝ ܣܓܕܝܢ ܗܼܘܘܼ܂ ܘܩܕܡܝ ܡܕܒܚܿܝܢ ܗܘܼܘ܂ ܡܠܟܘܬܐ ܕܒ̈ܒܠܝܐ܂
246:12	ܘܕܦܿܪܣ܂ ܘܕܡܿܕܝ܂ ܘܕܫܒܼܐ܂ ܘܕܣܿܒܐ܂ ܘܕܗܢܕܘ܂ ܘܕܟܘܫ܂ ܘܕܡܨܪܝܢ܂
246:13	ܘܕܦܠܫܬܼ܂ ܘܕܟܘܠܗܘܢ ܥܡ̈ܡܐ ܒܪ̈ܒܪܝܐܿ܂ ܕܝܬܼܒܝܢ ܒܥܒܼܪ̈ܝܗܿ ܕܐܪܥܐܼ܂
246:14	ܕܝܠܢ ܐܢܘܢ ܘܠܢ ܣܓܕܝܢ܂ ܗܢܘܢ ܐܦ ܢܫܝ̈ܗܘܢ ܘܒܢܝ̈ܗܘܢܿ ܘܪܗܘܡܝ
246:15	ܪܒܬܐ܂ ܘܠܐ ܗܼܘܐ ܡܢ ܫܘܪܝܗ ܕܥܠܡܐ ܚܕ ܥܡܐ ܐܘ ܡܠܟܘܬܐܼ܂
246:16	ܕܠܐ ܠܝ ܣܓܕܝܢ ܗܘܘ܂ ܐܠܐ ܗܢܐ ܩܘܣܛܢܛܝܢܘܣܼ܂ ܕܒܓܠܝܙܘܬ
246:17	ܗܘܢܗ ܘܡܢ ܚܣܝܪܘܬ ܝܕܥܬܗ܂ ܘܡܛܘܠ ܕܗܘܬ ܠܝ ܒܛܝܠܘܬܐ ܘܢܦܩܬ
246:18	ܠܟܘܠܗܝܢ ܦܢܝ̈ܬܐ ܕܒܥܒܪ̈ܝܗܿ ܕܐܪܥܐ܃ ܘܐܬܟܪܟܬ ܒܟܠܗܝܢ ܡ̈ܠܟܘܬܐ
246:19	ܕܥ̈ܡܡܐ ܘܣܥܪܬ ܐ̈ܢܝܢ܃ ܘܥܒܕܬ ܫܠܡܐܼ ܒܟܘܠܗܘܢ ܐ̈ܘܚܕܢܝ܂
246:20	ܘܥܕ ܦܢܿܐ ܐܢܐ ܠܗܪܟܐܼ܂ ܟܦܼܪ ܗܢܐ ܩܘܣܛܢܛܝܢܘܣ ܒܕܚܠܬܐ
246:21	ܕܐܒܗ̈ܘܗܝܼ܂ ܘܐܬܼܪܡܝ ܠܛܥܝܘܬܗܘܢ ܕܓ̈ܠܝܠܝܐ܂ ܘܫܿܡܗ ܢܦܫܗ ܡܿܠܟܐܼ
246:22	ܗܼܘ ܘܒ̈ܢܘܗܝ ܒܠܚܘܕ܂ ܘܟܕ ܚܙܝܬ ܕܫܒܩܘܢܝ ܘܣܓܕܘ ܠܗܿܘ ‍{‍ܘ‍}‍‍<‍ܕ‍>‍ܙܩܼܦܘ
246:23	ܝܗ̈ܘܕܝܐ ܥܠ ܩܝܣܐ܂ ܘܡܛܘܠ ܚܘܒܐ ܕܐܒ̈ܗܘܗܝ ܥܒܕܬ
246:24	ܠܗ ܡܓܪܬ ܪܘܚܐܼ ܙܒܢܐ ܣܓܝܐܐ܂ ܘܟܕ ܚܙܝܬܗ ܕܠܐ ܡܬܦܢܐ ܡܢ
246:25	ܛܥܝܘܬܗ܃ ܓܠܙܬܗ ܡܢ ܚ̈ܝܐ ܐܦ ܠܬܪ̈ܝܗܘܢ ܒ̈ܢܘܗܝܿ܂ ܗܠܝܢ ܕܨܼܒܘ
246:26	ܕܢܐܚܕܘܢ ܡܠܟܘܬܐ ܒܬܪ ܐܒܘܗܘܢ܂ ܘܐܦ ܠܗܢܐ ܕܐܫܬܼܚܪ
246:27	ܡܢܗܘܢܿ ܒܗܠܝܢ ܝܘܡ̈ܬܐ ܓܠܙ ܐܢܐ ܠܗ ܡܢ ܚ̈ܝܐ ܘܕܠܐ ܝܪ̈ܬܐ
246:28	ܕܒ̈ܢܝܐ ܐܥܒܕܝܘܗܝ܂ ܘܗܐ ܡܩܝܡ ܐܢܐ ܒܡܿܠܟܘܬܐ ܠܝܘܠܝܢܘܣ܂
247:01	ܘܐܥܒܕܝܘܗܝ ܐܢܛܩܪܛܘܪ ܥܠ ܟܘܠܗܿ ܐܪܥܐ܂ ܘܢܗܘܐ ܗܼܘ ܒܠܚܘܕܘܗܝ
247:02	ܡܿܠܟܐ܂ ܡܢ ܡܕܢܚܐ ܥܕܡܐ ܠܡܥܪܒܐ܂ ܘܡ̈ܐܐ ܫ̈ܢܝܐ ܬܬܝܿܒܠ
247:03	ܡܠܟܘܬܗ܂ ܘܠܗ ܢܫܬ̈ܥܒܕܢ ܟܘܠܗܝܢ ܡ̈ܠܟܘܬܐ ܕܐܪܥܐ܂ ܘܡܕܡ
247:04	ܕܠܐ ܥܿܒܕܬ ܠܐܒ̈ܗܘܗܝܼ ܐܥܒܕ ܠܗ܂ ܘܐܝܟ ܕܒܥܪܣܐ ܕܢܝܿܚܐܼ
247:05	ܢܬܬܢܝܿܚܘܢ ܒܗ ܟܠܗܘܢ ܚ̈ܝܠܘܬܐ ܕܒ̈ܢܝ ܦܠܚܘܬܝ܂ ܘܗܼܘ ܢܗܘܐ ܠܝ
247:06	ܢܘܣܐܼ ܘܐܢܐ ܐܫܼܪܐ ܒܗ܂ ܘܠܥܠܡ ܡܢܗܼ ܠܐ ܐܦܘܩ܂ ܡܛܠ ܕܠܗ
247:07	ܒܠܚܘܕ ܐܫܟܚܬ ܣܪܝܕܐ ܒܟܘܠܗܿ ܡܠܟܘܬܐ ܕܫܘܠܛܢܝ܂ ܘܗܼܘ ܢܥܼܒܕ
247:08	ܟܠܗܘܢ ܨ̈ܒܝܢܝ܂ ܩܘܡ ܝܘܠܝܢܘܣ ܡܿܠܟܐ ܕܝܠܢ܂ ܐܬܿܟܫܪ ܘܐܨܠܚ܂ ܘܩܡ
247:09	ܡܚܕܐ ܘܕܒܿܚ܃ ܒܗ ܒܠܠܝܐ ܗܿܘ܂ ܘܐܬܘ ܟܼܠܗܘܢ ܕܝ̈ܘܐ ܘܣܼܓܕܘ ܠܗ܂
247:10	ܘܒܠܠܝܐ ܐܚܪܢܐ ܫܩܠܼܗ ܡܓܿܢܘܣ ܚܪܫܐ ܠܝܘܠܝܢܘܣ ܘܢܼܦܩ ܠܒܪ ܡܢ
247:11	ܫܘܪܐ ܗܿܘ ܕܬܪ̈ܝܢ܂ ܠܒܝܬ ܦܬܟܪ̈ܐ ܕܒܥܠܙܒܘܒܼ܂ ܘܢܣܼܒ ܥܡܗܘܢ
247:12	ܠܟܘܙܘ ܛܠܝܬܗ ܕܡܿܓܢܘܣ ܚܪܫܐ ܟܕ ܒܛܢܐܼ܂ ܘܐܫܠܚܘܗܿ ܢܚܼܬ̈ܝܗܿ
247:13	ܘܬܠܐܘܗܿ ܒܝܬ ܦܬܟܪ̈ܐ܂ ܘܡܢ ܪ̈ܚܡܝܗܿ ܥܕܡܐ ܠܫܪܐܗܼܿ܂ ܨܪܐܼܘܗܿ܂
247:14	ܘܐܿܦܼܩܘ ܡܢ ܟܪܣܗܿ ܟܕ ܚܿܝܐܼ܂ ܥܘܼܠܐ ܒܪ ܬܫ̈ܥܐ ܝܪ̈ܚܝܢ܂ ܘܢܿܚܫܘ
247:15	ܘܙܿܟܪܘ ܘܐܣܿܩܘ ܒܗ ܩܼܨ̈ܡܐܼ܂ ܘܣܠܼܩܘ ܙܟܘܪ̈ܐ ܡܢ ܓܘ ܐܪܥܐ܂ ܗܿܢܘ
247:16	ܕܝܼܢ ܫ̈ܐܕܐ ܬܚ̈ܬܝܐ܂ ܘܡܿܠܠ ܥܡܗܘܢ ܡܿܓܢܘܣ ܚܪܫܿܐ ܘܐܡܼܪ ܠܗܘܢܿ
247:17	ܐܪܟܘܢܛܗ ܕܥܠܡܐܼ ܗܼܘ ܘܟܠܗܘܢ ܚ̈ܝܠܘܬܐ ܫܦܼܪ ܠܗܘܢܼ ܘܝܼܗܒܘ
247:18	ܡܠܟܘܬܐ ܘܐܦ ܫܘܠܛܢܐ ܠܒܪ ܬܘܕܝܬܟܘܢ ܝܘܠܝܢܘܣ܂ ܫܠܡܼܝܢ ܐܢܬܘܢ
247:19	ܕܢܗܘܐ ܡܿܠܟܐ ܘܡܥܕܪܝܢ ܐܢܬܘܢ ܠܗ܂ ܡܛܠ ܕܐܢܬܘܢ ܐܚܿܝܕܝܢ
247:20	ܫܘܠܛܢܗ ܕܗܿܘ ܐܬܪܐ ܬܚܬܝܐ܂ ܘܥܼܢܘ ܟܘܠܗܘܢܼ ܘܐܼܡܪܘ܂ ܡܫܬܥܒܕܝܢܢ
247:21	ܠܗ܂ ܡܛܠ ܕܕܝܠܗ ܗܼܝ ܡܠܟܘܬܐ ܟܘܠܗܿ ܕܬܚܝܬ ܫܡܝܐ܂ ܘܫܘܠܛܢܗ
247:22	ܡܡܠܟ ܠܥܠ ܡܢ ܟܠܗܝܢ ܡ̈ܠܟܘܬܐ ܘܡ̈ܐܐ ܫ̈ܢܝܐ ܡܬܝܒܠܐ܂ ܡܠܟܘܬܗ
247:23	ܒܙܟܘܬܐ܂ ܘܟܕ ܢܿܚܫܘ ܘܩܿܨܡܘ ܒܫܒܪܐ ܗܿܘ܃ ܗܦܟܼܘ ܐܥܠܘܼܗܝ
247:24	ܠܟܪܣܐ ܕܐܡܗ܂ ܘܐܚܬܘܗܿ ܡܢ ܚܒܼܠܐ ܗܿܘ ܕܬܠܝܐ ܗܘܬ ܒܗܼ܂
247:25	ܘܣܡܘܗܿ ܥܠ ܥܿܠܬܼܐ ܘܣܼܡܘ ܥܠܝܗܿ ܠܒܘܢܬܐ܂ ܘܩܼܪܒ ܝܠܘܝܢܘܣܼ
247:26	ܘܐܘܚܕ ܢܘܪܐ ܒܩܝ̈ܣܐ ܕܕܦܢܝܕܝܢ܂ ܕܣܝܡܼܝܢ ܗܘܘ ܥܠ ܥܿܠܬܐ܂ ܘܥܼܢܐ
247:27	ܘܐܼܡܪ ܐܪܟܘܢܛܗ ܕܥܠܡܐ ܗܢܐܼ܂ ܘܐܦ ܚܝܠܐ ܚܣܝܢܐ ܕܐܪ̈ܟܣ
247:28	ܕܕܝ̈ܘܐ ܘܕܫ̈ܐܕܐ܂ ܗܠܝܢ ܕܠܥܠ ܡܢ ܐܿܪܥܐܼ܂ ܘܗܠܝܢ ܕܠܬܚܬ ܡܢ
248:01	ܐܪܥܐ܂ ܡܦܝܼܣ ܐܢܐ ܠܟܘܢ ܕܬܿܩܒܠܘܢ ܕܒܚܼܐ ܚܕܬܐ ܘܩܕܡܝܐ ܡܢ
248:02	ܝܘܠܝܢܘܣ ܡܿܠܟܐ ܚܕܬܐ ܕܝܠܟܘܢܿ ܠܫܝܢܗܿ ܕܡܠܟܘܬܐ ܘܠܫܠܡܐ ܕܐܘܚܕܢܗ
248:03	ܘܠܢܿܘܛܪܐ ܕܚ̈ܝܘܗܝ܂ ܡܢܼܝܢ ܡ̈ܐܐ ܫ̈ܢܐ܂ ܕܫܟܢܿܬܘܢ ܠܗ ܡܠܟܘܬܐ܂
248:04	ܘܡܚܕܐ ܐܬܥܿܠܠ ܒܗ ܣܛܢܐ܂ ܘܐܝܟ ܕܒܢܘܣܐ ܕܦܬܟܪ̈ܐܼ ܥܠ ܫܼܪܐ
248:05	ܘܥܡܼܪ ܒܓܘܗ܂ ܘܡܚܕܐܼ ܫܿܢܝܬ ܪܘܚܐ ܕܐܠܗܐ ܡܢܗ ܐܝܟ ܕܡܢ
248:06	ܫܐܘܠ܂ ܘܪܘܚܗ ܕܣܛܢܐ ܐܡܠܟܬ ܒܗܼ ܘܐܫܿܬܠܛܬ ܥܠܘܗܝ܂ ܘܡܢ
248:07	ܗܿܝ ܫܥܬܐ ܟܠ ܡܕܡ ܕܣܿܥܪ ܗܼܘܐܼ܂ ܐܝܟ ܡܥܒܕܢܘܬܐ ܕܫܐܕܐ
248:08	ܣܿܥܪ ܗܼܘܐ ܠܗ܂ ܘܒܗ ܒܗܿܘ ܠܠܝܐ ܕܕܒܿܚ ܝܘܠܝܢܘܣ ܠܫ̈ܐܕܐ܂ ܐܬܚܙܝ
248:09	ܗܢܐ ܚܙܘܐ ܠܚܕ ܡܢ ܩ̈ܕܝܫܐ܂ ܚܙܐ ܗܘܼܐ ܠܗ ܓܝܪ ܕܩܐܡ ܒܕܡܘܣܝܢ
248:10	ܕܐܬܝܢܘܣ ܠܝܘܠܝܢܘܣܼ܂ ܘܕܥܿܬ ܗܼܘܐ ܕܘܥܬܐ ܕܒܣܝܡ ܪܝܚܗܿ ܐܝܟ
248:11	ܗܪ̈ܘܡܐ܂ ܘܡܠܐܟܗ ܕܐܠܗܐ ܕܠܒܝܟ ܐܣܦܘܓܐ ܕܢܘܪܐ ܒܐܝܕܗܼ܂
248:12	ܘܡܿܟܦܪ ܠܗܿܝ ܕܘܥܬܐ ܡܢ ܟܠܗ ܦܓܪܗ܂ ܘܗܿܘ ܕܐܫܬܘܝ ܕܗܟܢܐ
248:13	ܢܚܙܝܘܗܝܼ܂ ܐܡܼܪ ܠܗ ܠܡܠܐܟܐ ܗܿܘܼ ܕܡܛܠ ܡܢܐ ܡܟܦܪ ܐܢܬ ܡܢܗ
248:14	ܠܗܢܐ ܪܝܚܐ ܒܣܝܡܐ܂ ܘܗܼܘ ܐܡܼܪ ܠܗ܂ ܕܡܟܦܪ ܐܢܐ ܡܢܗ܃
248:15	ܠܡܫܝܚܘܬܐ ܩܕܝܫܬܐ ܕܠܒܼܫ ܡܢ ܡܥܡܘܕܝܬܗ܂ ܘܗܼܘ ܩܕܝܫܐ ܐܡܼܪ
248:16	ܠܗ܂ ܡܛܠ ܐܝܕܐ ܥܠܼܬܐ ܡܪܝ܂ ܘܡܠܐܟܐ ܦܿܢܝ ܠܗ ܦܬܓܡܐ܂ ܡܛܠ
248:17	ܕܫܿܢܝܬ ܪܘܚܗ ܕܐܠܗܐ ܡܢܗ܂ ܘܗܿܘ ܕܗܼܘܐ ܚܿܙܝܐ ܕܗܕܐܼ܂ ܫܬܼܩ
248:18	ܘܠܐܢܫ ܡܕܡ ܠܐ ܐܡܪ܂ ܘܡܢ ܒܬܪ ܝܘܡ̈ܬܐ ܣܓ̈ܝܐܬܐܼ܂ ܐܠܼܨܗ ܗܘܼܐ
248:19	ܡܿܠܟܐ ܕܢܐܡܐ ܠܐܠܘܬܪܐ ܒܗܿܘ ܨܠܡܐ ܕܢܿܛܪ ܫ̈ܥܐ܂ ܘܗܼܘ ܐܡܼܪ
248:20	ܕܣܿܦܩ ܠܝܼ܂ ܕܬܪ̈ܬܝܢ ܙܒ̈ܢܝܢ ܝܡܝܬ ܒܩܘܪܒܢܐ ܕܟܪ̈ܣܛܝܢܐ ܘܒܨܠܝܒܐ
248:21	ܗܿܘ ܕܣܓܕܝܢ ܠܗ܂ ܘܐܢ ܨܒܝܐܼ܂ ܐܠܦ ܙܒ̈ܢܝܢ ܝܡܿܐ ܐܢܐ ܠܗܿ ܒܩܘܪܒܢܐ
248:22	ܕܫܩܼܠܝܢ ܟܪ̈ܣܛܝܢܐ ܘܒܨܠܝܒܐ ܕܣܓܕܝܢ ܠܗ܂ ܘܒܨܠܡܐ ܕܠܥܠ ܠܐ
248:23	ܝܡܐ ܐܢܐ ܠܗܿ܂ ܘܩܿܡܬ ܟܠܗܿ ܣܘܢܩܠܛܘܣ ܥܠ ܡܿܠܟܐܼ܂ ܘܐܡܿܪܬ ܠܗ܂
248:24	ܕܠܘ ܕܚܠܬ ܐܠܗܐ ܗܝܿ܂ ܕܢܫܒܘܩ ܓܒܪܐ ܟܪܣܛܝܢܐ ܠܐܠܗܐܼ ܘܢܬܝܗܒ
248:25	ܠܡ̈ܘܡܬܐ ܕܨܠܡܐ ܕܣܓܕܝܢ ܠܗ ܚ̈ܢܦܐ ܠܐ ܓܝܪ ܪܓܝܼܫܝܢ ܗܼܘܘ ܒ̈ܢܝ
248:26	ܦܠܛܝܢ ܕܡܿܠܟܐܼ܂ ܕܟܼܦܪ ܝܘܠܝܢܘܣ ܒܐܠܗܐܿ܂ ܘܕܒܚܼܐ ܠܫ̈ܐܕܐ ܩܪ̈ܒ܂
248:27	ܘܫܬܼܩ ܡܿܠܟܐܼ ܘܠܐ ܦܢܿܝ ܦܬܓܡܐ܂ ܘܬܘܒ ܩܪܒܿܬ ܐܠܘܬܪܐ
248:28	ܘܐܦܝܿܣܬܗ ܠܡܿܠܟܐܼ܂ ܘܐܬܬܼܦܝܪ ܒܗܿ܂ ܘܡܚܕܐ ܥܿܠܬ ܨܝܕ
249:01	ܡܿܠܟܬܐ ܘܟܠ ܝܘܡ ܡܦܝܣܐ ܗܘܬ ܠܗ ܡܛܠ ܡܕܡ ܕܫܩܠ ܡܢܗ
249:02	ܝܘܠܝܢܘܣ ܘܒܗ ܒܗܘ ܙܒܢܐ ܐܬܬܥܝܪ ܥܠ ܡܠܟܐ ܩܪܒܐ ܕܒܪ̈ܒܪܝܐ܂
249:03	ܘܡܛܘܠ ܕܠܝܬ ܗܼܘܐ ܠܗܘܢ ܠܪ̈ܗܘܡܝܐ ܪܒ ܚܝܠܐܼ܂ ܥܒܼܕܗ ܡܿܠܟܐ
249:04	ܪܒ ܚܝܠܐ ܠܝܘܠܝܢܘܣܼ ܥܠ ܟܘܠܗܘܢ ܚܝ̈ܠܘܬܐ ܕܪ̈ܗܘܡܝܐ ܠܩܪܒܐ܂
249:05	ܘܟܕ ܐܙܼܠ ܠܩܪܒܐ ܠܘܩܒܠ ܒܥܠܕܒ̈ܒܘܗܝ ܕܡܿܠܟܐܼ܂ ܩܼܪܐ ܠܡܓܢܘܣ
249:06	ܚܪܫܐ܂ ܘܿܙܟܪ ܘܢܚܿܫ ܠܗ ܐܢ ܙܿܟܐ ܐܘ ܠܐ܂ ܘܐܬܐܡܪ ܠܗ ܡܢ
249:07	ܫ̈ܐܕܐ ܕܢܥܒܕ ܥܐܕܐ܂ ܘܢܩܿܪܒ ܕܒܚܼܐ ܠܗܕܪܝܘܣ ܘܕܝܘܣ܂ ܘܗܪܡܝܣ
249:08	ܘܣܪܦܝܣ ܘܒܥܠܫܡܝܼܢ܂ ܘܗܢܘܢ ܠܡ ܡܩܼܪܒܝܢ ܚܠܦܝܟ܂ ܘܟܕ ܥܒܼܕ ܕܒܚܐ
249:09	ܟܣܝܐܝܬܼ ܚܙܼܩ ܠܩܪܒܐ܂ ܘܐܩܼܪܒ ܘܙܟܼܐ ܠܒܪ̈ܒܪܝܐ܂ ܘܡܚܕܐ ܐܬܬܪܝܡ
249:10	ܠܒܗ ܒܫܘܒܿܗܪܐܼ ܘܛܥܝܗ܂ ܠܐܠܗܐ ܕܥܼܒܕܗ܂ ܘܒܗܘܢ ܒܝܘܡ̈ܬܐ
249:11	ܗܿܢܘܢ ܟܕ ܐܝܬܘܗܝ ܝܘܠܝܢܘܣ ܒܐܬܪ̈ܘܬܐ ܥ̈ܠܝܐܼ܂ ܢܦܩܼ ܡܢ ܥܠܡܐ
249:12	ܗܢܐ ܒܪܗ ܕܩܘܣܛܢܛܝܢܘܣ ܡܿܠܟܐ ܙܟܿܝܐܼ܂ ܘܗܝܕܝܢ ܓܠܝܗܿ ܠܚܢܦܘܬܗ
249:13	ܝܘܠܝܢܘܣܼ܂ ܘܐܼܥܿܝܪ ܥܠܝܢ ܪܕܘܦܝܐ܂ ܡܩܿܕܡܝܢ ܗܘܘ ܓܝܪ ܘܚܿܙܝܢ ܒ̈ܥܝܢܐ
249:14	ܢܗܝܪܬܐ ܕܪܘܚܐ ܐ̈ܢܫܐ ܩܕܝܫܐ ܗܠܝܢ ܕܥܡܗܘܢ ܡܬܪܕܐ ܗܘܐ
249:15	ܒܚܟܡܬܐܿ܂ ܡܕܡ ܕܥܬܝܕ ܗܼܘܐ ܕܢܗܘܐ ܠܗ܂ ܘܚܕ ܡܢ ܩ̈ܕܝܫܐܼ ܚܙܝܼܗܝ
249:16	ܗܘܐ ܒܙܒܢ ܟܕ ܥܕܟܝܠ ܐܝܬܘܗܝ ܗܼܘܐ ܛܠܝܐ ܙܥܘܪܐܼ܂ ܕܕܡܿܝܟ ܥܠ
249:17	ܥܪܣܐܼ܂ ܘܚܘܝܐ ܚܪܡܢܐ ܗܿܘ ܕܡܬܼܩܪܐ ܐܣܦܝܣܼ܂ ܕܟܼܪܝܟ ܥܠ ܪܝܫܗ܂
249:18	ܐܝܟ ܟܠܝܠܐ܂ ܘܡܚܕܐ ܐܡܼܪ ܗܼܘ ܒܢܦܫܗܼ܂ ܕܒܪܢܫܐ ܠܝܛܐ ܗܿܘܐ
249:19	ܗܢܐ ܛܠܝܐ܂ ܘܬܘܒ ܟܕ ܩܿܪܐ ܒܫܠܝܚܐܼ܂ ܚܿܙܝܢ ܗܘܘ ܠܗ ܗܠܝܢ ܕܩܿܪܝܒܝܢ
249:20	ܗܼܘܘ ܨܐܝܕܘܗܝܼ܂ ܟܕ ܬܡܿܝܗ ܗܼܘܐ ܘܨܿܕܝܕ ܘܡܫܚܠܦ ܓܘܢܗ܂
249:21	####
249:22	ܘܡܗܿܦܟ ܓܝ̈ܓܠܐ ܟܘܠܗܘܢ ܝܘܡ̈ܬܐ ܕܚ̈ܝܝ܂ ܘܝܬܝܪ ܡܢ ܟܠܗܘܢ
249:23	ܕܗܘܘ ܩܕܡܝܼ܂ ܐܘܪܒ ܥ̈ܕܥܕܝܟܘܢܿ ܘܐܗܘܐ ܠܟܘܢ ܐܚܐ ܘܪܚܼܡܐ
249:24	ܘܚܒܝܒܐ܂ ܘܦܿܫܼܛ ܝܡܝܢܗ ܒܫܢܬܗܼ܂ ܘܝܗܒܗܿ ܠܣܛܢܐ ܘܐܡܼܪ ܠܗ܂
249:25	ܐܢܬ ܪܒܢ ܘܐܢܐ ܬܠܡܝܕܟܼ܂ ܘܐܢ ܐܟܦܘܪ ܒܟܼ ܢܟܦܘܪ ܒܝ ܐܠܗܐ܂
249:26	ܐܢܬܘܢ ܕܝܠܝܼ ܘܐܢܐ ܕܝܠܟܘܢ ܥܕܡܐ ܠܥܠܡ܂ ܘܡܚܕܐ ܢܫܩܗܿ
249:27	ܠܝܡܝܢܗ܂ ܟܕ ܕܝܢ ܐܥܝܪܗ ܒܣܝܠܝܘܣܼ ܐܡܼܪ ܠܗ܂ ܒܚ̈ܝܝܟܼ ܥܡ ܡܢܼܘ
249:28	ܡܡܿܠܠ ܗܘܝܬ ܒܫܢܬܟ ܘܠܡܢ ܝܗܼܒܬ ܝܡܝܢܟ܂ ܘܥܡ ܡܢܼܘ ܐܩܼܝܡܬ
250:01	ܩܝܡܐ܂ ܘܡܢܼܘ ܐܝܬܘܗܝ ܗܼܘܐ ܗܿܘ ܕܡܿܠܠ ܥܡܟ܂ ܘܒܬܪ ܥܕܢܐ ܪܒܐ܂
250:02	ܘܟܕ ܐܬܥܗܕ ܠܚܙܘܗܼ܂ ܐܡܼܪ ܠܗ ܠܒܣܠܝܘܣ ܒܕܓܠܘܬܐ ܟܕ ܓܚܿܟ܂
250:03	ܐܢܬ ܘܓܪܝܓܪܝܘܣܼ ܐܚ̈ܝ ܐܢܬܘܢ ܥܕܡܐ ܠܥܠܡ܂ ܠܟܘܢ ܝܗܿܒܬ
250:04	ܝܡܝܢܐܼ܂ ܘܥܡܟܘܢ ܡܡܿܠܠ ܗܘܝܬ܂ ܘܬܝܘܢ ܦܝܠܣܿܘܦܐ ܗܿܘ ܕܩܿܒܠܗ
250:05	ܠܝܘܠܝܢܘܣ ܡܢ ܡܥܡܘܕܝܬܐܼ܂ ܙܒ̈ܢܝܢ ܣܓܝ̈ܐܢ ܐܡܼܪ ܠܗ ܩܕܡ ܟܘܠܢ܂
250:06	ܕܐܢ ܚ̈ܠܡܝ ܠܐ ܡܕܓܠܝܢ ܒܝ܃ ܡܢ ܚ̈ܙܘܐ ܕܡܬܿܚܘܝܢ ܠܝ ܡܛܠܬܟܼ܂
250:07	ܡܘܬܐ ܒܝܼܫܐ ܡܿܐܬ ܐܢܬ܂ ܡܛܠ ܕܡܢ ܩܕܡ ܐܠܗܐܼ܂ ܓܙܼܪ ܕܝܼܢܐ
250:08	ܕܠܐ ܪ̈ܚܡܐ ܐܬܼܓܙܪ ܥܠܝܟ܂ ܐܠܐ ܚܼܙܝ ܢܦܫܟ܂ ܐܢܐ ܓܝܪ ܣܿܒܪ
250:09	ܐܢܐ ܒܢܦܫܝ܃ ܕܥܡ ܣܛܢܐ ܗܿܘܝܐ ܡܢܬܟ܂ ܘܒܚܕ ܡܢ ܝܘܡ̈ܝܢ ܟܕ
250:10	ܝܬܒܼܝܢ ܟܠܗܘܢ ܦܝܠܣ̈ܘܦܐ ܘܚܟܝ̈ܡܐ ܕܐܬܝܢܘܣ܃ ܘܝܘܠܝܢܘܣ ܘܟܠܗܘܢ
250:11	ܬܠܡ̈ܝܕܝܗܘܢ ܩܝܡܼܝܢ ܗܘܼܘ ܩܕܡܝܗܘܢܿ ܘܐܼܡܪ ܠܗ ܬܝܘܢ ܦܝܠܣܘܦܐ
250:12	ܠܝܘܠܝܢܘܣܼ܂ ܚܙܝܼ ܠܝܬ ܐܢܫ ܒܟܠܗ ܗܢܐ ܟܢܘܫܝܐܿ܂ ܒܪ ܓܢܣܐ
250:13	ܕܡܠܟܘܬܐ ܐܠܐ ܐܢܬ ܒܠܚܘܕ܂ ܚܙܝ ܐܢ ܩܪܝܐ ܥܠܼܬܐ ܘܗܿܘ‍<‍ܐ‍>‍ ܐܢܬ
250:14	ܡܿܠܟܐܼ܂ ܠܐ ܬܦܪܘܥ ܒܝܫܬܐ ܠܐܢܫ ܡܢ ܟܢܘܫܝܐ ܗܢܐ܂ ܘܢܗܘܝܢ
250:15	ܥ̈ܝܢܝܟ ܥܠܝܗܘܢ ܠܛܒܬܐ܂ ܐܡܪ ܠܝ ܓܝܪ ܐܢ ܩܿܪܝܐ ܥܠܬܐ ܘܗܿܘܐ
250:16	ܐܢܬ ܡܿܠܟܐ ܕܠܝ ܕܩܒܿܠܬܟ ܡܢ ܡ̈ܝܐ ܕܡܥܡܘܕܝܬܐ ܘܗܐ ܐܠܦܬܟ
250:17	ܚܟܡܬܐ܂ ܡܿܢܐ ܥܿܒܕ ܐܢܬ ܠܝ܂ ܘܗܼܘ ܝܘܠܝܢܘܣ ܟܕ ܓܚܿܟܼ ܐܡܼܪ܂ ܠܟܼ
250:18	ܙܩܿܦ ܗܘܝܬ ܠܟ܂ ܠܥܠ ܡܿܢ ܕܡܘܣܝܢ ܪܒܬܐ܂ ܘܠܦܓܪܟܼ ܡܘܩܕ ܗܘܝܬ
250:19	ܠܗ ܒܓܘܗܿ܂ ܘܠܣܘܣܦܛܪܘܣܼ ܢܫܿܛ ܗܘܝܬ ܓܠܕܗ ܟܕ ܚܝ܂ ܘܓܚܼܟܘ
250:20	ܟܠܗܘܢܿ ܘܬܝܿܘܢ ܪܒܗ ܐܡܼܪ ܠܗܘܢܿ ܠܐ ܬܓܚܟܘܢ ܐܚ̈ܝܼ܂ ܨܠܘ
250:21	ܕܠܐ ܚܕ ܡܢܟܘܢ ܢܡܼܛܐ ܠܫܢܬ ܐܪܒܥܣܪܐ ܕܡܢܝܢܐ ܐܬܿܢܝܐ܂ ܡܛܠ
250:22	ܕܒܗܕܐ ܫܢܬܐܼ ܪܕܘܦܝܐ ܪܒܐ ܗܿܘܐ܂ ܘܚܕ ܡܢ ܐܝܠܝܢ ܕܐܝܬ ܒܟܢܘܫܝܐ
250:23	ܗܢܐ܂ ܒܗܕܐ ܫܢܬܐ ܟܦܪ ܒܐܠܗܐܿ ܘܣܿܓܕ ܠܫܐ̈ܕܐ܂ ܘܗܝܕܝܢ ܥܿܒܕ
250:24	ܪܕܘܦܝܐ ܠܗܠܝܢ ܕܐܘܕܝܘ ܒܡܫܝܚܐ܂ ܘܡܛܠ ܕܠܘ ܟܠ ܐܢܫ ܝܕܥܿ
250:25	ܕܐܝܟܢܐ ܗܘܬ ܡܦܘܠܬܗ ܕܝܘܠܝܢܘܣܼ܂ ܗܘܬ ܠܝ ܒܛܝܠܘܬܐܿ ܕܐܟܬܘܒ
250:26	ܠܒ̈ܢܝ ܥܕܬܐ ܩܕܝܫܬܐܼ܂ ܟܘܠܗ ܝܘܒܿܠܐ ܛܡܿܐܐ ܕܚܢܦܘܬܗ ܕܝܘܠܝܢܘܣ
250:27	ܦܪܒܛܝܣ ܐܝܟ ܕܗܼܘܐ ܫܠܡܬ ܬܫܥܝܬܐ ܕܥܠ ܝܘܠܝܢܘܣ ܚܢܦܐ܂