← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


03:01 [ai]ܐܢ ܢܫܼܒܘܩ ܓܒܪܐ ܐܢܬܬܗ ܘܬܐܙܠ ܡܢ ܠܘܬܗ ܘܬܗܘܐ ܠܓܒܪܐ ܐܚܪܢܐ܂ ܐܢ ܡܬܦܢܐ ܠܘܬܗܿ ܬܘܒ܂ ܗܐ ܡܬܿܛܢܦܘ ‍{‍ܬܬܿܛܢܦܘ‍}‍‍<‍ܬܬܿܛܢܦ‍>‍ ܐܪܥܐ ܗܿܝ܂ ܘܐܢܬܝ ܙܢܝܿܬܝ ܒܪ̈ܥܘܿܬܐ ܣ̈ܓܝܐܐ܂ ܬܘܒܝ ܠܘܬܝ ܐܡܿܪ ܡܪܝܐ܂
03:02 [ai]ܐܪܝܡܝ ܥܝܢ̈ܝܟܝ ܥܠ ܫ̈ܒܝܠܐ܂ ܘܚܿܙܝ ܐܝܿܟܐ ܠܐ ܐܬܛܢܿܦܬܝ܂ ܥܠ ܐܘܪ̈ܚܬܐ ܝܬܒܼܬܝ ܠܗܘܢ ܐܝܟ ܢܥܒܼܐ ܒܡܕܒܪܐ܂ ܘܛܢܿܦܬܝ ܐܪܥܐ ܒܙܢܝܼܘܬܟܝ܂ ܘܒܒܝܫܘܬܟܝ
03:03 [ai]ܐܬܟܠܼܝܘ ܐܪ̈ܣܝܣܐ ܘܐܪܒܝܥܐ ܠܐ ܗܘܼܐ܂ ܘܒܝܬ ܥܝ̈ܢܐ ܕܐܢܬܬܐ ܙܢܝܬܐ ܗܘܼܐ ܠܟܝ܂ ܘܠܐ ܨܒܝܼܬܝ ܠܡܼܬܬܼܟܣܘ܂
03:04 [ai]ܗܐ ܡܟܝܠ ܩܿܪܝܐ ܐܢܬܝ ܠܝܼ ܐܒܝܿ ܘܡܪܒܿܝܢܝ ܕܡܢ ܛܠܝܘܬܝ ܐܢܬ܃
03:05 [ai]ܕܠܡܐ ܢܬܢܛܪ ܠܥܠܡ܂ ܐܘ ܢܬܢܛܪ ܠܥܠܡܝܢ܂ ܗܐ ܡܠܠܬܝ ܘܥܒܼܕܬܝ ܒܝܫܼܬܐ ܘܐܬܚܝܠܬܝ܂
03:06 [ai]ܘܐܡܼܪ ܠܝ ܡܪܝܐ ܒܝ̈ܘܡܘܗܝ ܕܝܘܫܝܐ ܡܿܠܟܐ܂ ܚܙܼܝܬ ܡܕܡ ܕܥܒܕܬܿ ܥܡܘܪܬܐ ܕܐܝܣܪܝܠ܂ ܐܙܠܬܿ ܗܝܼ ܠܟܠ ܛܘܪ ܕܪܡ܂ ܘܬܚܝܬ ܟܠ ܐܝܠܢ ܕܥܒܿܝܛ܂ ܘܙܢܿܝܬ ܬܡܿܢ܂
03:07 [ai]ܘܐܡܪܬ ܡܢ ܒܬܪ ܕܥܒܕܬ ܗܠܝܢ ܟܘܠܗܝܢ ܕܬܬܘܒ ܠܘܬܝܼ ܘܠܐ ܬܒܼܬ܂ ܘܚܼܙܬ ܫܘܩܪܗ ܚܬܗ ܝܗܘܕܐ܂
03:08 [ai]ܘܚܙܬܿ ܟܠܗܝܢ ܨ̈ܒܘܬܗܿ܂ ܘܥܠ ܕܓܪܬܿ ܥܡܘܪܬܐ ܕܐܝܣܪܝܠ ܫܒܩܿܬܗ܂ ܘܝܿܗܒܬ ܠܗܿ ܟܬܒܐ ܕܫܘܒܩܢܐ܂ ܘܠܐ ܕܚܠܼܬ ܫܩܪܬܐ ܚܬܗܿ ܝܗܘܕܐ܂ ܘܐܙܠܬܿ ܘܙܢܝܼܬܿ ܐܦ ܗܝܼ܂
03:09 [ai]ܘܡܛܠ ܕܙܠܝܠܐ ܗܘܬ ܙܢܝܘܬܗܿ ܛܢܿܦܬܿ ܐܪܥܐ܂ ܘܓܪܬܿ ܒܟܐ̈ܦܐ ܘܒܩܝܣ̈ܐ܂
03:10 [ai]ܘܐܦ ܡܢ ܒܬܪ ܗܠܝܢ ܟܠܗܝܢ ܠܐ ܬܒܬܿ ܠܘܬܝ܂ ܫܩܪܬܐ ܚܬܗ ܝܗܘܕܐ ܡܢ ܟܠܗ ܠܒܗܿ܃ ܐܠܐ ܐܢ ܒܕܓܠܘܬܐ ܐܡܿܪ ܡܪܝܐ܀
03:11 [ai]ܘܐܡܼܪ ܠܝ ܡܪܝܐ܂ ܙܕܩܬ ܢܦܫܗܿ ܥܡܘܪܬܐ ܕܐܝܣܪܝܠ܃ ܡܢ ܫܩܿܪܬܐ ܚܬܗܿ ܝܗܘܕܐ܀܀
03:12 [ai]ܙܠ ܘܐܟܪܙ ܦܬ̈ܓܡܐ ܗܠܝܢ ܒܓܪܒܝܐ ܘܐܡܪ ܬܘܒܝ ܥܡܘܪܬܐ ܕܐܝܣܪܝܠ ܐܡܿܪ ܡܪܝܐ ܘܠܐ ܐܩܫܐ ܐ̈ܦܝ ܒܟܘܢ܂ ܡܛܠ ܕܛܒ ܐܢܐ ܐܡܿܪ ܡܪܝܐ܂ ܘܠܐ ܐܠܡ ܐܢܐ ܠܥܠܡ܂
03:13 [ai]ܒܪܡ ܕܥܼܝ ܚ̈ܛܗܝܟܝ܂ ܕܒܡܪܝܐ ܐܠܗܟܝ ܚܛܝܼܬܝ܂ ܘܒܿܕܪܬܝ ܐܘܪ̈ܚܬܟܝ ܠܢܘܟܪ̈ܝܐ ܬܚܝܬ ܟܠ ܐܝܠܢ ܕܥܒܿܝܛ܂ ܘܒܩܠܝܼ ܠܐ ܫܡܼܥܬܘܢ ܐܡܿܪ ܡܪܝܐ܂
03:14 [ai]ܬܘܒܘ ܒܢ̈ܝܐ ܬܝܒ̈ܐ ܐܡܿܪ ܡܪܝܐ܂ ܕܐܢܐ ܨܿܒܝܬ ܒܟܘܢ܂ ܘܕܒܪܬܟܘܢ ܚܕ ܡܢ ܩܪܝܬܐ ܘܬܪ̈ܝܢ ܡܢ ܫܪܒܬܐ܂ ܘܐܝܬܝܿܬܟܘܢ ܠܨܗܝܘܢ܂
03:15 [ai]ܘܐܬܠ ܠܟܘܢ ܪ̈ܥܘܬܐ ܐܝܟ ܠܒܝ܂ ܘܢܪܥܘܼܢܟܘܢ ܒܝܕܥܬܐ ܘܒܣܘܟܠܐ܂
03:16 [ai]ܘܢܗܘܐ ܟܕ ܬܿܦܪܘܢ ܘܬܣܼܓܘܢ ܒܐܪܥܐ܂ ܒܝ̈ܘܡܬܐ ܗܢܘܢ ܐܡܿܪ ܡܪܝܐ܂ ܠܐ ܢܐܡܪܘܢ ܬܘܒ ܩܒܘܬܐ ܕܕܝܬܩܐ ܕܡܪܝܐ܂ ܘܠܐ ܬܣܼܩ ܥܠ ܠܒܐ܂ ܘܠܐ ܢܬܕܟܪܘܢܗܿ܂ ܘܠܐ ܢܦܩܕܘܢܗܿ ܘܠܐ ܬܬܥܒܕ ܬܘܒ܂
03:17 [ai]ܒܗ ܒܙܒܢܐ ܗܿܘ܂ ܢܩܪܘܢܗܿ ܠܐܘܪܫܠܡ ܟܘܪܣܝܗ ܕܡܪܝܐ܂ ܘܢܣܿܟܘܢ ܟܠܗܘܢ ܥܡ̈ܡܐ ܠܫܡܗ ܕܡܪܝܐ܂ ܘܠܐ ܢܐܙܠܘܢ ܬܘܒ ܒܬܪ ܨܒܝܢ̈ܝ ܠܒܗܘܢ ܒܝܫܼܐ܂ ܒܝ̈ܘܡܬܐ ܗܿܢܘܢ܂
03:18 [ai]ܢܐܙܠܘܢ ܕܒܝܬ ܝܗܘܕܐ ܥܡ ܕܒܝܬ ܐܝܣܪܝܠ܂ ܘܢܐܬܘܢ ܐܟܚܕܐ ܡܢ ܐܪܥܐ ܕܓܪܒܝܐ܂ ܠܐܪܥܐ ܕܐܘܿܪܬܬ ܠܐ̈ܒܗܝܗܘܢ܂
03:19 [ai]ܘܐܢܐ ܐܿܡܪܬ ܕܐܚܫܒܟ ܒܒ̈ܢܝܐ܂ ܘܐܬܠ ܠܟ ܐܪܥܐ ܓܒܝܼܬܐ܂ ܘܝܪܬܘܬܐ ܕܚ̈ܝܠܐ ܕܚ̈ܝܠܘܬܐ ܕܥܡ̈ܡܐ܂ ܘܐܿܡܪܬ ܐܒܝ ܬܩܪܘܢܢܝ܂ ܘܡܢ ܒܬܪܝ ܠܐ ܬܗܦܼܟܘܢ܂
03:20 [ai]ܫܪܝܪܐܝܬ ܐܝܟ ܕܡܕܓܠܐ ܐܢܬܬܐ ܒܚܒܪܗܿ܂ ܗܟܢܐ ܕܓܠܘ ܒܝ ܒܢ̈ܝ ܐܝܣܪܝܠ ܐܡܿܪ ܡܪܝܐ܂
03:21 [ai]ܩܠܐ ܥܠ ܫܒ̈ܝܠܐ ܐܫܬܼܡܥ܂ ܒܟܬܐ ܘܒܥܘܬܐ ܕܒܝܬ ܐܝܣܪܝܠ܂ ܕܥܩܿܡܘ ܐܘܪ̈ܚܬܗܘܢ ܘܛܥܘ ܠܡܪܝܐ ܐܠܗܗܘܢ܂
03:22 [ai]ܬܘܒܘܿ ܒ̈ܢܝܐ ܬܝܒ̈ܐ ܘܐܣܐ ܬܝܒܼܘܬܟܘܢ܂ ܘܐܡܼܪܘ ܗܢܘܢ ܗܐ ܚܢܢ ܕܝܠܟ܂ ܡܛܠ ܕܐܢܬ ܗܘܼ ܡܪܝܐ ܐܠܗܢ܂
03:23 [ai]ܫܪܝܪܐܝܬ ܠܕܓܠܘܬܐ ܪܡܬܐ ܘܥܘܫܢܐ ܕܛܘܪ̈ܐ܂ ܫܪܝܪܐܝܬ ܒܡܪܝܐ ܐܠܗܢ ܦܘܪܩܢܗ ܕܐܝܣܪܝܠ܂
03:24 [ai]ܘܒܗܬܬܐ ܐܟܼܠܬܿ ܠܐܘܬ ܐ̈ܒܗܝܢ܂ ܡܢ ܛܠܝܘܬܗܘܢ܂ ܘܠܥܢܗܘܢ ܘܠܬܘܪ̈ܝܗܘܢ܂ ܘܠܒܢܝܗܘܢ ܘܠܒܢ̈ܬܗܘܢ܂
03:25 [ai]ܢܕܡܟ ܒܒܗܬܬܢ ܘܢܟܣܝܢ ܚܦܪܢ܂ ܡܛܠ ܕܠܡܪܝܐ ܐܠܗܢ ܚܛܝܢ܂ ܚܢܢ ܘܐ̈ܒܗܝܢ ܡܢ ܛܠܝܘܬܢ ܘܥܕܡܐ ܠܝܘܡܢܐ܂ ܘܠܐ ܫܡܥܢ ܒܩܠܗ ܕܡܪܝܐ ܐܠܗܢ܀

next chapter