← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


05:01 [ai]ܐܬܟܼܪܟܘ ܒܫ̈ܘܩܝܗܿ ܕܐܘܪܫܠܡ ܘܚܙܘܼ ܘܕܥܘܼ܂ ܘܒܥܼܘ ܒ̈ܦܠܛܘܬܗܿ܂ ܐܢ ܬܫܟܚܘܢ ܓܒܪܐ܂ ܐܢ ܐܝܬ ܕܥܿܒܕ ܕܝܼܢܐ ܘܒܥܿܐ ܗܝܡܢܘܬܐ ܐܫܒܘܩ ܠܗܿ܂
05:02 [ai]ܘܐܢ ܚܝ ܡܪܝܐ ܢܐܡܪܘܢ܂ ܫܪܝܪܐܝܬ ܒܕܓܠܘܬܐ ܝܡܿܝܢ܂
05:03 [ai]ܡܪܝܐ ܥܝܢ̈ܝܟ ܥܠ ܗܝܡܢܘܬܐ܂ ܡܚܝܬ ܐܢܘܢ ܘܠܐ ܐܬܟܼܪܗܘ܂ ܓܡܿܪܬ ܐܢܘܢ ܘܠܐ ܨܒܘ ܠܡܩܿܒܠܘ ܡܪܕܘܬܐ܂ ܩܫܿܝܘ ܐ̈ܦܝܗܘܢ ܡܢ ܟܐܦܐ ܘܠܐ ܨܒܼܘ ܠܡܬܒ܂
05:04 [ai]ܘܐܢܐ ܐܿܡܪܬ܂ ܡܛܠ ܕܡܣ̈ܟܝܢܝܢ ܐܢܘܢ ܣܼܛܘ܂ ܡܛܠ ܕܠܐ ܝܕܥܼܘ ܐܘܪܚܗ ܕܡܪܝܐ܂ ܘܕܝܢܐ ܕܐܠܗܗܘܢ܂
05:05 [ai]ܐܿܙܠ ܠܝ ܠܘܬ ܪ̈ܘܪܒܢܐ ܘܐܿܡܠܠ ܥܡܗܘܢ܂ ܡܛܠ ܕܗܼܢܘܢ ܝܕܥܼܘ ܐܘܪܚܗ ܕܡܪܝܐ ܘܕܝܢܐ ܕܐܠܗܗܘܢ܂ ܫܪܝܪܐܝܬ ܟܠܗܘܢ ܐܝܟ ܚܕܐ܂ ܬܒܪܘ ܢܝܪܐ ܘܦܣܿܩܘ ܚ̈ܢܩܐ܂
05:06 [ai]ܡܛܠ ܗܢܐ ܢܬܒܪ ܐܢܘܢ ܐܪܝܐ ܡܢ ܥܒܐ܂ ܘܕܐ̈ܒܝ ܪܡܫܐ ܢܒܿܙܥܘܢ ܐܢܘܢ܀ ܢܡܪܐ ܢܟܡܼܢ ܥܠ ܩܘܪ̈ܝܗܘܢ ܟܠ ܕܢܦܘܩ ܡܢܗܘܢ ܢܬܬܼܒܪ܂ ܡܛܠ ܕܣܓܝܘ ܚ̈ܘܒܝܗܘܢ ܘܥܫܼܢܘ ܕܠܐ ܢܬܘܒܘܢ܂
05:07 [ai]ܥܠ ܐܝܿܕܐ ܐܫܒܘܩ ܠܟܝ܂ ܒܢܝܟܝ ܫܒܩܘܟܝ ܘܐܝܡܼܘ ܒܐܝܠܝܢ ܕܠܐ ܗܘܼܘ ܐ̈ܠܗܐ܂ ܘܣܿܒܥܬ ܐܢܘܢ ܘܓܪܘ܂ ܘܒܝܬ ܙܢܝ̈ܬܐ ܐܬܟܬܿܫܘ܂
05:08 [ai]ܐܝܟ ܪ̈ܟܫܐ ܐܘܫ̈ܢܐ ܥܗܪ̈ܐ ܗܘܼܘ܂ ܓܒܪ ܥܠ ܐܢܬܬ ܚܒܪܗ ܨܗܠܝܢ ܗܘܘ܂
05:09 [ai]ܥܠ ܗܠܝܢ ܠܐ ܐܦܩܘܕ ܐܡܿܪ ܡܪܝܐ܃ ܘܒܥܡܐ ܕܗܟܢܐ ܠܐ ܬܬܿܢܩܡ ܢܦܫܝ܀܂
05:10 [ai]ܣܩܘ ܒܫܘܪ̈ܝܗܿ ܘܥܩܘܪܘ܂ ܘܓܡܘܪܝܐ ܠܐ ܬܥܒܼܕܘܢ܂ ܫܒܘܩܘ ܫܬܐ̈ܣܝܗܿ ܡܛܠ ܕܕܡܪܝܐ ܐܢܝ̈ܢ܂
05:11 [ai]ܡܛܠ ܕܡܿܕܓܠܘ ܕܿܓܠܘ ܒܝ ܒܢ̈ܝ ܐܝܣܪܝܠ ܘܒ̈ܢܝ ܝܗܘܕܐ ܐܡܿܪ ܡܪܝܐ܂
05:12 [ai]ܕܓܠܘ ܒܡܪܝܐ ܘܐܡܿܪܝܢ ܠܐ ܗܘܼܐ ܗܘܼ܂ ܠܐ ܬܐܬܐ ܥܠܝܢ ܒܝܫܬܐ܂ ܘܚܪܒܐ ܘܟܦܢܐ ܠܐ ܢܚܙܐ܂
05:13 [ai]ܘܢܒ̈ܝܐ ܢܗܘܘܢ ܠܥܠܥܠܐ܂ ܘܐܝܠܝܢ ܕܡܠܬܐ ܠܝܬ ܠܗܘܢ܂ ܗܟܢܐ ܢܬܥܒܕ ܠܗܘܢ܂
05:14 [ai]ܡܛܠ ܗܢܐ ܗܟܢܐ ܐܡܿܪ ܡܪܝܐ ܐܠܗܐ ܚܝܠܬܢܐ܂ ܚܠܦ ܕܡܠܠܬܘܢ ܡܠܬܐ ܗܕܐ܂ ܗܐ ܝܗܿܒ ܐܢܐ ܦܬ̈ܓܡܝ ܒܦܘܡܟ ܢܘܪܐ܂ ܘܥܡܐ ܗܢܐ ܩܝ̈ܣܐ ܘܬܐܟܘܠ ܐܢܘܢ܂
05:15 [ai]ܗܐ ܡܿܝܬܐ ܐܢܐ ܥܠܝܟܘܢ ܒܝܬ ܐܝܣܪܝܠ܂ ܥܡܐ ܡܢ ܪܘܚܩܐ ܐܡܿܪ ܡܪܝܐ܂ ܥܡܐ ܗܘ ܥܫܝܢܐ܂ ܥܡܐ ܗܘ ܕܡܢ ܥܠܡܐ܂ ܥܡܐ ܕܠܐ ܬܕܥܝ ܠܫܢܗ܂ ܘܠܐ ܬܫܼܡܥ ܡܕܡ ܕܡܡܿܠܠ܂
05:16 [ai]ܓܓܪ̈ܬܗ ܐܝܟ ܩܒܪ̈ܐ ܦܬܝܚ̈ܢ܂ ܘܟܠܗܘܢ ܓܢܒܪ̈ܝܢ܂
05:17 [ai]ܢܐܟܘܠ ܚܨܕܟ ܘܠܚܡܟ܂ ܘܢܐܟܘܠ ܒ̈ܢܝܟ ܘܒܢ̈ܬܟ܂ ܢܐܟܘܠ ܥܢܟ ܘܬܘܪ̈ܝܟ ܢܐܟܘܠ ܓܘܦܢ̈ܝܟ ܘܬܐ̈ܢܝܟ܂ ܢܡܿܣܟܢ ܩܘܪ̈ܝܐ ܕܬܘܩܦܟ ܕܐܢܬ ܬܟܝܠ ܥܠܝܗܝܢ ܒܚܪܒܐ܂
05:18 [ai]ܘܐܦ ܒܝ̈ܘܡܬܐ ܗܿܢܘܢ ܐܡܿܪ ܡܪܝܐ ܠܐ ܐܣܿܝܦܟܘܢ܂
05:19 [ai]ܘܢܿܗܘܐ ܟܕ ܬܐܡܼܪܘܢ ܡܛܠ ܡܢܐ ܥܒܼܕ ܠܢ ܡܪܝܐ ܐܠܗܢ ܗܠܝܢ ܟܠܗܝܢ ܬܐܡܪ ܠܗܘܢ܂ ܗܟܢܐ ܐܡܿܪ ܡܪܝܐ܂ ܥܠ ܕܫܒܩܬܘܢܢܝ ܘܦܠܚܬܘܢ ܠܐ̈ܠܗܐ ܢܘܟܪ̈ܝܐ ܒܐܪܥܟܘܢ܂ ܗܟܢܐ ܬܦܠܚܘܢ ܠܢܘܟܪ̈ܝܐ ܒܐܪܥܐ ܕܠܐ ܕܝܠܟܘܢ܀
05:20 [ai]ܚܘܘܿ ܗܕܐ ܒܒܝܬ ܝܥܩܘܒ܂ ܘܐܫܡܥܘܗܿ ܒܝܗܘܕܐ ܘܐܡܼܪܘ܂
05:21 [ai]ܫܡܥܼܘ ܗܕܐ ܥܡܐ ܣܟܠܐ ܕܠܝܬ ܒܗ ܠܒܐ܂ ܕܥܝ̈ܢܐ ܐܝܬ ܠܗܘܢ ܘܠܐ ܚܿܙܝܢ܂ ܘܐ̈ܕܢܐ ܐܝܬ ܠܗܘܢ ܘܠܐ ܫܡܿܥܝܢ܂
05:22 [ai]ܡܢܝ ܠܐ ܬܕܚܼܠܘܢ ܐܡܿܪ ܡܪܝܐ܂ ܘܡܢ ܩܕܡܝ ܠܐ ܬܙܘܼܥܘܢ܂ ܕܣܿܡܬ ܚܠܐ ܬܚܘܡܐ ܠܝܡܐ܂ ܢܡܘܣܐ ܠܥܠܡ ܘܠܐ ܥܒܿܪ ܠܗ܂ ܘܡܬܿܟܬܫ ܘܠܐ ܡܿܫܟܚ܂ ܘܡܬܬܼܪ̈ܝܡܝܢ ܓܠܠܘ̈ܗܝ ܘܠܐ ܥܒܿܪܝܢ ܠܗ܂
05:23 [ai]ܘܠܥܡܐ ܗܢܐ ܗܘܼܐ ܠܒܐ ܡܪܘܕܐ ܘܡܡܪܡܪܢܐ܂ ܣܛܘܼ ܘܐܙܼܠܘ܂
05:24 [ai]ܘܠܐ ܐܡܼܪܘ ܒܠܒܗܘܢ ܕܢܕܚܠ ܠܡܪܝܐ ܐܠܗܢ܂ ܕܝܗܿܒ ܡܛܪܐ ܒܟܝܪܝܐ ܘܠܩܝܫܝܐ ܒܙܒܢܗ܂ ܘܥ̈ܠܠܬܐ ܕܩܝܛܐ ܠܣܬܘܐ ܢܿܛܪ ܠܢ܂
05:25 [ai]ܚ̈ܘܒܝܟܘܢ ܨܠܼܘ ܥܠܝܟܘܢ ܗܠܝܢ ܘܚ̈ܛܗܝܟܘܢ ܟܠܘ ܛܒ̈ܬܐ ܡܢܟܘܢ܂
05:26 [ai]ܡܛܠ ܕܐܫܬܟܚܘ ܒܥܡܝ ܚ̈ܛܝܐ܂ ܘܐܩܝܡܘ ܦܚ̈ܐ ܐܝܟ ܣܝܓ̈ܐ ܕܢܬܬܚܕܘܢ ܒܗܘܢ ܒܢ̈ܝ ܐܢܫܐ܂
05:27 [ai]ܘܐܝܟ ܐܩܠܘܒܝܐ ܕܡܠܼܐ ܦܪܚܬܐ܂ ܗܟܢܐ ܒܬ̈ܝܗܘܢ ܡܠܼܝܢ ܢܟܠܐ܂ ܡܛܠ ܗܢܐ ܝܪܒܼܘܼ ܘܥܬܪܘ܂
05:28 [ai]ܘܥܒܼܪܘ ܥܠ ܕܝܢܼܐ܂ ܕܝܢܼܐ ܠܐ ܕܢܿܘ܂ ܘܕܝܢܼܐ ܕܝܬܡ̈ܐ ܠܐ ܬܪܼܨܘ܂ ܘܕܝܢܼܐ ܕܒܝܫ̈ܐ ܠܐ ܕܢܿܘ܂
05:29 [ai]ܥܠ ܗܠܝܢ ܠܐ ܐܦܩܘܕ ܐܡܿܪ ܡܪܝܐ܃ ܘܒܥܡܐ ܕܗܟܢܐ ܠܐ ܬܬܢܩܡ ܢܦܫܝ܂
05:30 [ai]ܬܡܗܐ ܘܫܛܝܿܘܬܐ ܗܘܐ ܒܐܪܥܐ܂
05:31 [ai]ܢܒ̈ܝܐ ܐܬܿܢܒܝܘ ܫܘܩܪܐ܂ ܘܟܗ̈ܢܐ ܐܚܕܘ ܐ̈ܝܕܝܗܘܢ܂ ܘܥܡܝ ܪܚܼܡ ܗܟܢܐ܂ ܘܡܢܐ ܬܥܼܒܕܘܢ ܠܚܪܬܐ܂

next chapter