← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


06:01 [ai]ܓܿܙܘ ܒܢ̈ܝ ܒܢܝܡܝܢ ܡܢ ܓܘ ܐܘܪܫܠܡ܂ ܘܒܩܠܐ ܩܪܝܘ ܫܝܦܘܪܐ܂ ܘܥܠ ܒܝܬ ܟܪܡ ܫܩܼܠܘ ܐܬܐ܂ ܡܛܠ ܕܒܝܫܬܐ ܡܝܿܬܐ ܐܢܐ ܡܢ ܓܪܒܝܐ ܘܬܒܪܐ ܪܒܐ܂
06:02 [ai]ܠܡܥܿܕܢܬܐ ܘܠܡܦܢܿܩܬܐ ܕܡܝܼܬܝ ܒܪܬ ܨܗܝܘܢ܂
06:03 [ai]ܥܠܝܗܿ ܢܐܬܘܢ ܪ̈ܥܘܬܐ ܘܓܙܪ̈ܝܗܘܢ ܐܝܟ ܚܕܐ܂ ܘܢܩܫܘܢ ܥܠܝܗܿ ܡܫ̈ܟܢܝܗܘܢ ܟܕ ܚܿܕܪܐ܂ ܘܢܪܥܘܢ ܓܒܪ ܠܓܒܗ܂
06:04 [ai]ܛܝܿܒܘ ܥܠܝܗܿ ܩܪܒܐ܂ ܘܢܐܡܼܪܘܢ ܩܘܡܘ ܢܣܩ ܒܛܗܪܐ܂ ܘܿܝ ܠܢ ܕܦܢܼܐ ܝܘܡܐ ܘܪܟܢܼܘ ܛ̈ܠܠܝ ܪܡܫܐ܂
06:05 [ai]ܩܘܡܘ ܢܣܩ ܥܠܝܗܿ ܒܠܠܝܐ ܘܢܚܿܒܠ ܣܚܪ̈ܬܗܿ܀
06:06 [ai]ܡܛܠ ܕܗܟܢܐ ܐܡܿܪ ܡܪܝܐ܂ ܦܣܘܩܘ ܩܝܣ̈ܝܗܿ܂ ܘܐܟܡܿܢܘ ܥܠ ܐܘܪܫܠܡ ܟܡܐ̈ܢܐ܂ ܗܿܝ ܩܪܝܼܬܐ ܕܐܬܦܩܕܬ܂ ܘܟܠܗ ܥܘܫܩܗܿ ܒܓܘܗܿ܂
06:07 [ai]ܐܝܟ ܕܟܢܫ ܓܘܒܐ ܡ̈ܘܗܝ܂ ܗܟܢܐ ܟܢܫܬܿ ܒܝܫܼܬܗܿ܂ ܚܛܘܦܝܐ ܘܒܙܬܐ ܡܫܼܬܡܥ ܒܗܿ ܩܕܡ ܐ̈ܦܝ ܐܡܝܢܐܝܬ܀
06:08 [ai]ܒܟܐ̈ܒܐ ܘܒܡܚ̈ܘܬܐ ܐܬܪܕܝ ܐܘܪܫܠܡ܂ ܕܠܡܐ ܬܢܼܕ ܢܦܫܝ ܡܢܟܝ܂ ܕܠܡܐ ܐܥܒܕܟܝ ܠܚܘܪܒܐ ܐܝܟ ܐܪܥܐ ܕܠܐ ܐܬܝܿܬܒܬܿ܂
06:09 [ai]ܗܟܢܐ ܐܡܿܪ ܡܪܝܐ ܚܝܠܬܢܐ܂ ܡܬܒܥܪܘܿ ܢܬܒܿܥܪܘܢ ܐܝܟ ܓܦܬܐ ܫܪܟܗ ܕܐܝܣܪܝܠ܂ ܐܗܿܦܟ ܐܝܕܟ ܐܝܟ ܩܛܘܦܐ ܥܠ ܒܘܥܿܪܐ܂
06:10 [ai]ܠܡܿܢ ܐܡܿܪ ܘܐܿܣܗܕ ܕܢܫܡܼܥܘܢ܂ ܗܐ ܐ̈ܕܢܝܗܘܢ ܥܘܪ̈ܠܢ ܘܠܐ ܡܫܿܟܚܝܢ ܠܡܨܼܬ܂ ܗܐ ܦܬܓܡܗ ܕܡܪܝܐ ܗܘܼܐ ܠܗܘܢ ܠܚܣܕܐ܂ ܘܠܐ ܨܒܿܝܢ ܒܗ܂
06:11 [ai]ܘܐܢܬܝ ܚܡܬܗ ܕܡܪܝܐ ܐܬܡܠܼܝܬܝ ܘܠܐܝܼܬܝ܂ ܐܟܝܼܠܝܼ ܘܐܫܘܕܝ ܥܠ ܛ̈ܠܝܐ ܒܫ̈ܘܩܐ܂ ܘܥܠ ܟܢ̈ܘܫܬܐ ܕܓܕܘ̈ܕܐ ܐܟܚܕܐ܂ ܡܛܠ ܕܐܦ ܓܒܪ̈ܐ ܥܡ ܢܫ̈ܐ ܢܬܬܚܕܘܢ܂ ܘܣܒܐ ܥܡ ܛܠܼܐ ܝܘܡ̈ܬܐ܂
06:12 [ai]ܢܬܝܗܒܘܢ ܒܬ̈ܝܗܘܢ ܠܐܚܪ̈ܢܐ܂ ܘܚ̈ܩܠܬܐ ܘܢܫ̈ܐ ܐܟܚܕܐ܂ ܡܛܠ ܕܡܪܝܼܡ ܐܢܐ ܐܝܼܕܝ ܥܠ ܥܡܘܪ̈ܝܗܿ ܕܐܪܥܐ ܐܿܡܪ ܡܪܝܐ܂
06:13 [ai]ܡܛܠ ܕܡܢ ܙܥܘܪܗܘܢ ܘܥܕܡܐ ܠܪܒܗܘܢ܂ ܟܠܗܘܢ ܢܟܠܝܢ ܢܟܠܐ܂ ܘܡܢ ܢ̈ܒܝܐ ܕ̈ܓܠܐ ܘܥܕܡܐ ܠܟܗ̈ܢܐ܂ ܟܠܗܘܢ ܥܒܿܕܝܢ ܫܘܩܪܐ܂
06:14 [ai]ܘܡܐܿܣܝܢ ܬܒܪܗܿ ܕܒܪܬ ܥܡܝ ܒܒܙܚܐ܂ ܘܐܡܿܪܝܢ ܫܠܡܐ ܫܠܡܐ ܘܠܝܬ ܫܠܡܐ܂
06:15 [ai]ܒܗܼܬܘ ܡܛܠ ܕܛܢܦܘܬܐ ܥܒܼܕܘ܂ ܘܒܗ̈ܝܬܐ ܠܐ ܒܗܿܬܝܢ܂ ܘܠܡܬܬܟܣܘܼ ܠܐ ܝܕܥܿܝܢ܂ ܡܛܠ ܗܢܐ ܢܦܠܼܘܢ ܥܡ ܢ̈ܦܠܐ܂ ܘܒܙܒܢܐ ܕܡܬܦܩܕܝܢ ܢܣܬܿܚܦܘܢ ܐܡܿܪ ܡܪܝܐ܀܂
06:16 [ai]ܗܟܢܐ ܐܡܿܪ ܡܪܝܐ܂ ܩܘܡܘ ܥܠ ܐܘܪ̈ܚܬܐ ܘܚܙܘ܂ ܘܫܐܿܠܘ ܥܠ ܫܒܝ̈ܠܝ ܥܠܡܐ܂ ܘܚܼܙܘ ܐܝܿܕܐ ܐܘܪܚܐ ܫܦܝܪܐ ܙܠܘ ܒܗܿ܂ ܘܐܫܟܼܚܘ ܢܝܚܐ ܠܢܦܫ̈ܬܟܘܢ܂ ܘܐܡܼܪܘ ܠܐ ܐܙܿܠܝܢ ܚܢܢ܂
06:17 [ai]ܘܐܿܩܝܡܬ ܥܠܝܟܘܢ ܕܘܩ̈ܐ ܕܬܫܡܼܥܘܢ ܠܩܠ ܫܝܦܘܪܐ܂ ܘܐܡܿܪܝܢ ܐܢܬܘܢ ܠܐ ܫܡܿܥܝܢ ܚܢܢ܂
06:18 [ai]ܡܛܠ ܗܢܐ ܫܡܥܼܘ ܥܡ̈ܡܐ܂܂ ܘܕܥܝ ܥܕܬܐ ܕܒܗܘܢ܂
06:19 [ai]ܫܡܥܝ ܐܪܥܐ܂܂ ܗܐ ܡܿܝܬܐ ܐܢܐ ܒܝܫܬܐ ܥܠ ܥܡܐ ܗܢܐ ܐܝܟ ܦܐܪ̈ܝ ܡܚܫ̈ܒܬܗܘܢ܂ ܕܠܦܬ̈ܓܡܝ ܠܐ ܫܡܥܼܘ܂ ܘܠܢܡܘܣܝ ܐܣܠܝܘ܀܂
06:20 [ai]ܠܡܢܐ ܗܿܘܝܐ ܠܝ ܠܒܘܢܬܐ ܕܡܝܿܬܝܢ ܐܢܬܘܢ ܡܢ ܫܒܐ܂ ܘܩܢܝܐ ܕܒܣܡܐ ܡܢ ܐܪܥܐ ܪܚܝܩܬܐ܂ ܒ̈ܥܠܘܬܟܘܢ ܠܐ ܨܿܒܝܬ܂ ܘܕܒܚܝ̈ܟܘܢ ܠܐ ܒܣܡܼܘ ܠܝ܂
06:21 [ai]ܡܛܠ ܗܢܐ ܗܟܢܐ ܐܡܿܪ ܡܪܝܐ܂ ܗܐ ܝܗܿܒ ܐܢܐ ܠܥܡܐ ܗܢܐ ܬܘ̈ܩܠܬܐ܂ ܘܢܬܬܿܩܠܘܢ ܒܗܝܢ ܐ̈ܒܗܐ ܘܒ̈ܢܝܐ ܐܟܚܕܐ܂ ܘܫܒܒܐ ܘܪܚܡܗ ܢܐܒܕܘܢ܀܀
06:22 [ai]ܗܟܢܐ ܐܡܿܪ ܡܪܝܐ ܗܐ ܥܡܐ ܐܬܐ ܡܢ ܐܪܥܐ ܕܓܪܒܝܐ ܘܥܡܐ ܪܒܐ ܢܕܘܠ ܡܢ ܣ̈ܘܦܝܗܿ ܕܐܪܥܐ܂
06:23 [ai]ܒܩܫ̈ܬܬܐ ܘܒ̈ܢܝܙܟܐ ܡܙܝܢ̈ܝܢ܂ ܒܝܫܼܝܢ ܐܢܘܢ ܘܠܐ ܡܪܚܡܢܝܢ܂ ܩܠܗܘܢ ܐܝܟ ܝܡܐ ܕܡܬܟܼܬܫ܂ ܘܥܠ ܪ̈ܟܫܐ ܪ̈ܟܝܒܝܢ ܘܡܛܝܒܝܢ ܐܝܟ ܓܢܒܪ̈ܐ ܠܩܪܒܐ܂ ܥܠܝܟܝ ܒܪܬ ܨܗܝܘܢ܂
06:24 [ai]ܫܡܥܢ ܫܡܥܗܘܢ ܘܐܬܪܦܝ ܐܝ̈ܕܝܢ܂ ܘܥܩܬܐ ܐܚܕܬܢ܂ ܘܚܒ̈ܠܐ ܐܝܟ ܕܝܠܕܬܐ܂
06:25 [ai]ܠܐ ܬܦܩܘܢ ܠܚܩܠܐ ܘܒܐܘܪܚܐ ܠܐ ܬܐܙܠܘܢ܂ ܡܛܠ ܚܪܒܐ ܕܒ̈ܥܠܕܒܒܐ ܕܟܪܝܟܐ ܡܢ ܚܕܪ̈ܝܟܝ܂
06:26 [ai]ܒܪܬ ܥܡܝ ܐܬܟܼܒܢܝ ܣܩ̈ܐ܂ ܘܐܬܦܠܦܠܝ ܒܩܛܡܐ܂ ܐܒܠܐ ܐܝܟ ܕܥܠ ܐܝܚܝܕܝܐ ܥܒܕܝ ܠܟܝ܂ ܘܡܪܩܘܕܬܐ ܡܪܝܪܬܐ܂ ܡܛܠ ܕܡܢ ܫܠܝܐ ܢܐܼܬܘܢ ܥܠܝܟܝ ܒܙܘ̈ܙܐ܂
06:27 [ai]ܒܚܿܘܪܐ ܝܗܒܬܟ ܒܥܡܝ ܥܫܝܢܐ܂ ܕܬܕܥ ܘܬܒܿܚܢ ܐܘܪ̈ܚܬܗܘܢ܂
06:28 [ai]ܟܠܗܘܢ ܫ̈ܠܝܛܢܝܗܘܢ ܡܪ̈ܘܕܝܢ ܘܡ̈ܗܠܟܝܢ ܒܢܟܠܐ܂ ܘܐܝܟ ܢܚܫܐ ܘܦܪܙܠܐ ܟܠܗܘܢ ܡܚܿܒܠܢܝܢ܂
06:29 [ai]ܓܪܕܝ ܡܦܘܚܐ ܡܢ ܢܘܪܗܘܢ ܘܐܒܪܐ܂ ܘܣܪܝܩܐܝܬ ܨܿܪܦ ܨܪܘܦܐ܂ ܘܒܝܫܼܬܗܘܢ ܠܐ ܓܡܪܐ܂
06:30 [ai]ܟܣܦܐ ܡܣܠܝܐ ܩܪܼܘ ܐܢܘܢ܂ ܡܛܠ ܕܐܣܠܝ ܐܢܘܢ ܡܪܝܐ܀܂

next chapter