← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


07:01 [ai]ܦܬܓܡܐ ܕܗܘܼܐ ܥܠ ܐܪܡܝܐ ܡܢ ܩܕܡ ܡܪܝܐ ܠܡܐܡܪ܂
07:02 [ai]ܩܘܡ ܒܬܪܥ ܒܝܬܗ ܕܡܪܝܐ ܘܩܪܝ ܬܡܿܢ ܦܬܓܡܐ ܗܢܐ ܘܐܡܼܪ܂ ܫܡܥܼܘ ܦܬܓܡܗ ܕܡܪܝܐ ܟܠܗܘܢ ܕܒܝܬ ܝܗܘܕܐ܃ ܕܥܐܿܠܝܢ ܒܬܪ̈ܥܐ ܗܠܝܢ ܠܡܼܣܓܕ ܠܡܪܝܐ܂
07:03 [ai]ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܐܛܐܿܒܘ ܐܘܪ̈ܚܬܟܘܢ ܘܥܿܒ̈ܕܝܟܘܢ܂ ܘܐܿܫܪܝܟܘܢ ܒܐܬܪܐ ܗܢܐ܂
07:04 [ai]ܘܠܐ ܬܬܿܟܠܘܢ ܠܟܘܢ ܥܠ ܦܬ̈ܓܡܐ ܕܫܘܩܪܐ ܕܐܡܿܪܝܢ ܠܟܘܢ ܗܝܟܠܗ ܕܡܪܝܐ ܗܝܟܠܗ ܕܡܪܝܐ܂ ܗܝܟܠܗ ܐܢܬܘܢ ܕܡܪܝܐ
07:05 [ai]ܐܢ ܬܫܦܪܘܢ ܐܘܪ̈ܚܬܟܘܢ ܘܥܿܒ̈ܕܝܟܘܢ܂ ܘܐܢ ܬܥܼܒܕܘܢ ܕܝܢܼܐ ܒܝܬ ܓܒܪܐ ܠܚܒܪܗ܂
07:06 [ai]ܘܠܥܡܘܪ̈ܐ ܘܠܝ̈ܬܡܐ ܘܠܐܪ̈ܡܠܬܐ܃ ܠܐ ܬܥܠܒܘܢ ܘܠܐ ܬܛܠܡܘܢ܂ ܘܕܡܐ ܙܟܝܐ ܠܐ ܬܐܫܕܘܢ ܒܐܬܪܐ ܗܢܐ܂ ܘܒܬܪ ܐ̈ܠܗܐ ܐܚܪ̈ܢܐ ܠܐ ܬܐܙܠܘܢ ܕܢܒܿܐܫ ܠܟܘܢ܂
07:07 [ai]ܘܐܿܫܪܝܟܘܢ ܒܐܬܪܐ ܗܢܐ ܒܐܪܥܐ ܕܝܗܿܒܬ ܠܐ̈ܒܗܝܟܘܢ܂ ܡܢ ܥܠܡ ܘܥܕܡܐ ܠܥܠܡ܂
07:08 [ai]ܘܗܿܐ ܐܢܬܘܢ ܡܬܼܬܟܠܝܢ ܥܠ ܦܬ̈ܓܡܐ ܕܫܘܩܪܐ ܕܠܐ ܡܘܿܬܪܝܢ܂
07:09 [ai]ܓܢܒ̈ܝܢ ܐܢܬܘܿܢ ܘܩ̈ܛܘܿܠܝܢ ܐܢܬܘܢ ܘܓܝܪ̈ܝܢ ܐܢܬܘܢ܂ ܘܝܡܝܢ ܐܢܬܘܢ ܒܫܡܝ ܒܫܘܩܪܐ܂ ܘܣܝܿܡܝܢ ܐܢܬܘܢ ܒܣ̈ܡܐ ܠܒܥܠܐ܂ ܘܐܿܙܠܝܢ ܐܢܬܘܢ ܒܬܪ ܐ̈ܠܗܐ ܐܚܪ̈ܢܐ ܕܠܐ ܝܕܥܿܝܢ ܐܢܬܘܢ܂
07:10 [ai]ܘܐܬܿܝܢ ܐܢܬܘܢ ܘܩܝܿܡܝܢ ܐܢܬܘܢ ܩܕܡܝ ܒܒܝܬܐ ܗܢܐ ܕܐܬܩܪܝ ܫܡܝ ܥܠܘܗܝ܂ ܘܐܡܿܪܝܢ ܐܢܬܘܢ ܦܨܿܢ܂ ܘܥܒܿܕܝܢ ܐܢܬܘܢ ܗܠܝܢ ܟܠܗܝܢ ܒܝܫ̈ܬܐ܂
07:11 [ai]ܕܠܡܐ ܡܥܪܬܐ ܕܓܢܒ̈ܐ ܗܘܼܐ ܒܝܬܐ ܗܢܐ ܕܐܬܩܪܝ ܫܡܝ ܥܠܘܗܝ ܒܥܝܢ̈ܝܟܘܢ܂ ܘܐܦ ܐܢܐ ܗܐ ܚܿܙܝܬ ܐܡܿܪ ܡܪܝܐ܀
07:12 [ai]ܡܛܠ ܗܢܐ ܙܠܘ ܠܐܬܪܝ ܕܒܫܝܼܠܘ܂ ܕܐܫܿܪܝܬ ܫܡܝ ܬܡܿܢ ܒܩܕܡܝܬܐ ܘܚܼܙܘ ܡܕܡ ܕܥܿܒܕܬ ܠܗ܂ ܡܛܠ ܒܝܫܘܼܬܗ ܕܥܡܝ ܐܝܣܪܐܝܠ܂
07:13 [ai]ܘܗܫܐ ܚܠܦ ܕܥܒܕܬܘܢ ܥܿܒ̈ܕܐ ܗܠܝܢ ܟܠܗܘܢ ܐܡܿܪ ܡܪܝܐ܃ ܘܩܕܡܿܬ ܘܐܿܡܪܬ ܠܟܘܢ ܘܠܐ ܫܡܥܬܘܢ܃ ܘܩܪܝܬ ܠܟܘܢ ܘܠܐ ܥܢܝܬܘܢ܂
07:14 [ai]ܐܿܥܒܕܝܘܗܝ ܠܒܝܬܐ ܗܢܐ ܕܐܬܩܪܝ ܫܡܝ ܥܠܘܗܝ ܕܐܢܬܘܢ ܬܟܝܠܝܢ ܥܠܘܗܝ܂ ܘܠܩܪܝܬܐ ܕܝܗܿܒܬ ܠܟܘܢ ܘܠܐ̈ܒܗܝܟܘܢ ܐܝܟ ܕܥܒܿܕܬ ܠܫܝܠܘ܂
07:15 [ai]ܘܐܫܕܝܟܘܢ ܡܢ ܩܕܡ ܐ̈ܦܝ܂ ܐܝܟ ܕܫܿܕܝܬ ܠܟܠܗܘܢ ܐ̈ܚܝܟܘܢ܂ ܠܟܠܗ ܙܪܥܗ ܕܐܦܪܝܡ܂
07:16 [ai]ܘܐܢܬ ܠܐ ܬܨܿܠܐ ܥܠ ܥܡܐ ܗܢܐ ܘܠܐ ܬܒܼܥܐ ܥܠܝܗܘܢ܂ ܘܠܐ ܬܒܼܥܐ ܡܢܝܼ ܡܛܠ ܕܠܐ ܫܡܿܥ ܐܢܐ ܠܟ܂
07:17 [ai]ܠܐ ܚܙܐ ܐܢܬ܃ ܡܕܡ ܕܥܒܿܕܝܢ ܒܩܘܪ̈ܝܐ ܕܝܘܗܕܐ ܘܒܫ̈ܘܩܝܗܿ ܕܐܘܪܫܠܡ܂
07:18 [ai]ܒܢ̈ܝܐ ܡܠܩܿܛܝܢ ܩܝ̈ܣܐ܂ ܘܐܒܗ̈ܐ ܡܘܩܿܕܝܢ ܢܘܪܐ܂ ܘܢܫ̈ܐ ܠܝܫ̈ܢ ܠܝܫܐ܂ ܠܡܥܒܕ ܙܘܬܪ̈ܐ ܠܦܘܠܚܢ ܫܡܝܐ܂ ܘܠܡܢܿܩܝܘ ܢܘܩ̈ܝܐ ܠܐ̈ܠܗܐ ܐܚܪ̈ܢܐ ܕܢܪܓܙܘܢܢܝ܂
07:19 [ai]ܠܐܿ ܗܘܼܐ ܠܝ ܡܿܪܓܙܝܢ ܐܡܿܪ ܡܪܝܐ ܐܠܐ ܠܢܦܫܗܘܢ ܕܢܒܼܗܬܢ ܐ̈ܦܝܗܘܢ܂
07:20 [ai]ܡܛܠ ܗܢܐ ܗܟܢܐ ܐܡܿܪ ܡܪܝܐ ܐܠܗܐ܂ ܗܐ ܪܘܓܙܝ ܘܚܡܬܝ ܡܬܬܢܝܼܚܝܢ ܥܠ ܐܬܪܐ ܗܢܐ܂ ܥܠ ܒܢ̈ܝ ܐܢܫܐ ܘܥܠ ܒܥܝܪܐ܂ ܘܥܠ ܐ̈ܝܠܢܐ ܕܕܒܪܐ ܘܥܠ ܦܐܪ̈ܐ ܕܐܪܥܐ܂ ܘܬܘܩܕ ܘܠܐ ܬܕܥܟ܀
07:21 [ai]ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܥ̈ܠܘܬܗܘܢ ܐܘܣܦܘ ܥܠ ܕܒܚ̈ܝܗܘܢ܂ ܘܐܟܠܼܘ ܒܣܪܐ܂
07:22 [ai]ܕܠܐ ܐܿܡܪܬ ܠܐ̈ܒܗܝܗܘܢ ܘܠܐ ܦܩܿܕܬ ܐܢܘܢ܂ ܒܝܘܡܐ ܕܐܿܦܩܬ ܐܢܘܢ ܡܢ ܐܪܥܐ ܕܡܨܪܝܢ܂ ܠܐ ܥܠ ܥܿܠܬܐ ܘܠܐ ܥܠ ܕܒ̈ܚܐ܂
07:23 [ai]ܐܠܐ ܐܢܐܼ ܗܢܐ ܦܬܓܡܐ ܦܩܿܕܬ ܐܢܘܢ܂ ܘܐܡܿܪܬ ܫܡܥܼܘ ܒܩܠܝܼ ܘܐܗܘܐ ܠܟܘܢ ܐܠܗܐ܂ ܘܐܢܬܘܢ ܬܗܘܼܘܢ ܠܝ ܥܡܐ܂ ܘܗܠܟܘ ܒܟܠ ܐܘܪܚܐ ܕܡܦܩܿܕ ܐܢܐ ܠܟܘܢ܂ ܕܢܛܐܼܒ ܠܟܘܢ܂
07:24 [ai]ܘܠܐ ܫܡܥܼܘ ܘܠܐ ܐܪܟܢܘ ܐܕܢܗܘܢ ܠܡܫܡܥ܂ ܐܠܐ ܐܙܠܼܘ ܒܬܪ ܬܪ̈ܥܝܬܗܘܢ ܘܒܬܪ ܨܒܝ̈ܢܝ ܠܒܗܘܢ ܒܝܫܼܐ܂ ܘܗܦܟܼܘ ܠܒܣܬܪܗܘܢ ܘܠܐ ܠܩܕܡܝܗܘܢ
07:25 [ai]ܡܢ ܝܘܡܐ ܕܢܦܩܼܘ ܐ̈ܒܗܝܗܘܢ ܡܢ ܐܪܥܐ ܕܡܨܪܝܢ ܘܥܕܡܐ ܠܝܘܡܢܐ܀ ܘܫܿܕܪܬ ܠܘܬܗܘܢܼ ܟܠܗܘܢ ܥܒܼ̈ܕܝ ܢܒ̈ܝܐ܂ ܒܟܠܝܘܡ ܩܿܕܡܬ ܘܫܿܕܪܬ
07:26 [ai]ܘܠܐ ܫܡܥܘ܂ ܘܠܐ ܐܪܟܢܘ ܐܕܢܗܘܢ ܠܘܬܝ܂ ܘܩܫܿܝܘ ܩܕܠܗܘܢ ܛܒ ܡܢ ܐܒ̈ܗܝܗܘܢ܂
07:27 [ai]ܘܬܐܿܡܪ ܠܗܘܢ ܗܠܝܢ ܟܠܗܘܢ ܦܬ̈ܓܡܐ ܘܠܐ ܢܫܡܥܘܢܟ܂ ܘܩܿܪܐ ܐܢܬ ܠܗܘܢ ܘܠܐ ܥܢܿܝܢ ܠܟ܂
07:28 [ai]ܐܒܼܕܿܬ ܗܝܡܢܘܬܐܼ ܘܓܙܬܿ ܡܢ ܦܘܡܗܘܢ܀܀
07:29 [ai]ܓܘܙܝ ܣܥܪܟܼܝ ܘܫܕܝ܂ ܘܫܩܼܘܠ ܥܠ ܫܒܝ̈ܠܐ ܐܘܠܝܼܬܐ܂ ܕܪܓܼܙ ܡܪܝܐܼ ܘܫܒܩܗ ܠܕܪܐ ܥܒܘܿܪܐ܂
07:30 [ai]ܡܛܠ ܕܥܒܼܕܘ ܒܢ̈ܝ ܝܗܘܕܐ ܕܒܝܫ ܩܕܡܝ ܐܡܿܪ ܡܪܝܐ܂ ܣܡܼܘ ܛܢܦܘܬܗܘܢܼ ܒܒܝܬܐ ܕܐܬܩܪܝ ܫܡܝ ܥܠܘܗܝ ܘܛܢܦܘܗܝ܂
07:31 [ai]ܘܒܢܘ ܥ̈ܠܘܬܐ ܒܬܦܬ ܕܒܢܚܠܐ ܕܒܪܗܢܘܡ܂ ܠܡܘܩܕܘ ܒܢܝܗܘܢ ܘܒܢܬ̈ܗܘܢ ܒܢܘܪܐ܃ ܕܠܐ ܦܩܿܕܬ ܐܢܘܢ ܘܠܐ ܣܠܩܼܬܿ ܥܠ ܠܒܝ܀
07:32 [ai]ܡܛܠ ܗܢܐ ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܃ ܘܠܐ ܢܬܐܡܪ ܬܘܒ ܬܦܿܬ ܘܢܚܠܐ ܕܒܪܗܢܘܡ܂ ܐܠܐ ܐܢ ܢܚܠܐ ܕܩ̈ܛܝܠܐ܂ ܘܢܩܒܪܘܢ ܒܬܦܬ ܡܢ ܒܠܝ ܐܬܪܐ܂
07:33 [ai]ܘܢܗ̈ܘܝܢ ܫܠܕܝܗܘܢ ܕܥܡܐ ܗܢܐ ܡܐܟܘܠܬܐ ܠܦܪܚܬܐ ܕܫܡܝܐ܂ ܘܠܚܝܘܬܐ ܕܐܪܥܐܼ ܘܠܝܬ ܡܦܨܿܝܢܐ܂
07:34 [ai]ܘܐܒܿܛܠ ܡܢ ܩܘܪ̈ܝܐ ܕܝܗܘܕܐ ܘܡܢ ܫ̈ܘܩܝܗܿ ܕܐܘܪܫܠܡ܃ ܩܠܐ ܕܕܝܨܐܼ ܘܩܠܐ ܕܚܕܘܬܐ܂ ܩܠܐ ܕܚܬܢܐܼ ܘܩܠܐ ܕܟܠܬܐ܃ ܡܛܠ ܕܠܚܘܪܒܐ ܬܗܘܐ ܟܠܗܿ ܐܪܥܐ܀

next chapter