← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


09:01 [ai]ܡܿܢ ܕܝܢ ܫܒܩܢܝ ܒܡܕܒܪܐܼ ܒܝܬ ܒܘܬܐ ܕܥܒܪ̈ܝ ܐܘܪܚܐ܂ ܘܫܿܒܩܬ ܠܥܡܝܼ ܘܐܿܙܠܬ ܠܝ ܡܢ ܠܘܬܗܘܢ܂ ܡܛܠ ܕܟܠܗܘܢ ܓܝܼܪܝܢ ܘܟܢܘܫܬܐ ܐܢܘܢ ܕܕ̈ܓܠܐ܂
09:02 [ai]ܘܫܼܕܘ ܠܫܢܗܘܢ ܐܝܟ ܕܒܩܫܬܗܘܢ܂ ܒܫܘܩܪܐܼ ܘܠܐ ܒܗܝܡܢܘܬܐ ܥܫܼܢܘ ܒܐܪܥܐ܂ ܡܛܠ ܕܡܢ ܒܝܫܼܬܐ ܠܒܝܫܼܬܐ ܢܦܩܼܘ܃ ܘܠܝܼ ܠܐ ܝܕܥܼܘ ܐܡܿܪ ܡܪܝܐ܀܀
09:03 [ai]ܓܒܪ ܡܢ ܚܒܪܗܼ ܐܙܕܗܼܪܘ܂ ܘܥܠ ܟܠ ܐܚܝܼ ܠܐ ܬܬܼܟܠܘܢ܂ ܡܛܠ ܕܟܠ ܐܚܝܼ ܡܢܼܟܠ ܢܿܟܠ܂ ܘܟܠ ܪܚܿܡܐܼ ܒܢܟܠܐ ܡܗܿܠܟ܂
09:04 [ai]ܘܓܒܪ ܒܚܒܪܗܼ ܡܿܕܓܠܝܢ܂ ܘܩܘܫܬܐܼ ܠܐ ܡܡܿܠܠܝܢ܂ ܐܠܦܘ ܠܫܢܗܘܢܼ ܠܡܡܿܠܠܘ ܫܘܩܪܐ ܘܐܬܼܛܪܦܘܼ ܘܠܐܼܝܘ܂
09:05 [ai]ܡܘܬܒܟ ܒܓܘ ܢܟܠܐ܂ ܒܢܟܠܗܘܢ ܠܐ ܨܒܼܘ ܠܡܕܥܼܢܝ ܐܡܿܪ ܡܪܝܐ܂
09:06 [ai]ܡܛܠ ܗܢܐ ܗܟܢܐ ܐܡܿܪ ܡܪܝܐ ܚܝܠܬܢܐ܂ ܗܐ ܨܿܪܦ ܐܢܐ ܠܗܘܢܼ ܘܒܚܿܪ ܐܢܐ ܠܗܘܢ܂ ܡܛܠ ܕܐܝܿܟܢܐ ܐܥܒܼܕ ܡܢ ܩܕܡ ܒܪܬ ܥܡܝ܂
09:07 [ai]ܐܝܟ ܓܐܪܐ ܫܢܝܢܐ ܠܫܢܗܘܢܼ ܘܢܟܠܐ ܡܡܿܠܠ܂ ܒܦܘܡܗ ܫܠܡܐ ܓܒܪ ܥܡ ܚܒܪܗ ܡܡܿܠܠ܂ ܘܒܓܘܗܼ ܟܡܼܝܢ ܟܡܐܢܐ܂
09:08 [ai]ܥܠ ܗܠܝܢ ܠܐ ܐܦܩܘܕ ܐܡܿܪ ܡܪܝܐ܃ ܘܒܥܡܐ ܕܗܟܢܐ܃ ܠܐ ܬܬܢܿܩܡ ܢܦܫܝܼ܀
09:09 [ai]ܥܠ ܛܘܪ̈ܐܼ ܫܩܘܠܘ ܒܟܬܐ ܘܐܘܠܝܬܐ܂ ܘܥܠ ܕܝܪ̈ܐ ܕܡܕܒܪܐܼ ܐܘܠܝܬܐ܂ ܕܨ̈ܕܝ ܡܢ ܒܠܝ ܐܢܫ ܕܥܒܿܪ܂ ܘܠܐܿ ܫܡܼܥ ܩܠܐ ܕܩܢܝܢܐ܂ ܡܢ ܦܪܚܬܐ ܕܫܡܝܐ ܘܥܕܡܐ ܠܒܥܝܪܐܿ ܐܬܒܿܕܪܘ ܘܐܙܠܼܘ܂
09:10 [ai]ܘܐܥܒܕܝܗܿ ܠܐܘܪܫܠܡ ܚܪܒܬܐܼ ܡܥܡܪܐ ܠܝܪ̈ܘܪܐ܂ ܘܩܘܪ̈ܝܐ ܕܝܗܘܕܐܼ ܐܬܠ ܠܚܘܪܒܐ ܡܢ ܒܠܝ ܕܝܬܒܿ܀܂
09:11 [ai]ܡܢܼܘ ܓܒܪܐ ܕܚܟܝܡܼ ܢܣܿܬܟܠ ܗܕܐ܂ ܘܕܡܠܬ ܦܘܡܗ ܕܡܪܝܐ ܥܠܘܗܝܼ ܢܚܿܘܝܗܿ܂ ܥܠ ܡܢܐ ܐܒܼܕܬܿ ܐܪܥܐ܃ ܘܨܼܕܬܿ ܐܝܟ ܡܕܒܪܐ ܡܢ ܒܠܝ ܕܥܒܿܪ܀
09:12 [ai]ܘܐܡܼܪ ܡܪܝܐ܂ ܥܠ ܕܫܒܼܩܘ ܢܡܘܣܝ ܕܝܿܗܒܬ ܠܗܘܢ ܘܠܐܒ̈ܗܝܗܘܢ܃ ܘܠܐ ܫܡܥܼܘ ܒܩܠܝ ܘܠܐ ܗܠܟܘ ܒܗ܃
09:13 [ai]ܘܐܙܠܼܘ ܒܬܪ ܨܒܝ̈ܢܝ ܠܒܗܘܢ ܒܝܫܼܐ܃ ܘܒܬܪ ܦܬܟܪ̈ܐ ܕܐܠܦܘ ܐܢܘܢ ܐ̈ܒܗܝܗܘܢ܂
09:14 [ai]ܡܛܠ ܗܢܐܼ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܗܐ ܡܘܿܟܠ ܐܢܐ ܠܗܘܢ ܠܥܡܐ ܗܢܐ ܡܪ̈ܪܐ܂ ܘܐܫܩܐ ܐܢܘܢ ܡ̈ܝܐ ܡܪ̈ܝܪܐ܂
09:15 [ai]ܘܐܒܕܪ ܐܢܘܢ ܒܥܡ̈ܡܐ ܕܠܐ ܝܕܥܼܘ ܐܢܘܢ ܗܼܢܘܢ ܘܐ̈ܒܗܝܗܘܢ܂ ܘܐܫܿܕܪ ܒܬܪܗܘܢ ܚܪܒܐܼ ܥܕܡܐ ܕܐܓܡܪ ܐܢܘܢ܀
09:16 [ai]ܗܟܢܐ ܐܡܿܪ ܡܪܝܐ ܚܝܠܬܢܐ܂ ܩܪܘܼ ܠܐ̈ܠܝܬܐܼ ܘܿܢܐܬܝܢ܂ ܘܥܠ ܚ̈ܟܝܡܬܐ ܫܕܪܘܼ ܘܿܢܐܬܝܢ܂
09:17 [ai]ܘܢܣܬܪ̈ܗܒܼܢ ܘܿܢܫ̈ܩܠܢ ܥܠܝܢ ܐ̈ܘܠܝܬܐ܂ ܘܢܚ̈ܬܢ ܥܝ̈ܢܝܢ ܕܡ̈ܥܐ܂ ܘܒܒ̈ܬܢ ܢܿܪܕܝܢ ܡ̈ܝܐ܂
09:18 [ai]ܡܛܠ ܕܩܠܐ ܕܐܘܠܝܬܐ ܐܫܬܼܡܥ ܡܢ ܨܗܝܘܢ ܕܐܡܿܪ܃ ܐܝܟܢܐ ܐܬܼܒܙܙܢ܂ ܒܗܬܢܼ ܛܒ ܛܒ܂ ܡܛܠ ܕܫܒܼܩܢ ܐܪܥܐ ܘܢܦܠܼܘ ܡܫ̈ܟܢܝܢ܀
09:19 [ai]ܡܛܠ ܗܢܐܼ ܫܡܥܝܢ ܢ̈ܫܐ̈ ܦܬܓܡܗ ܕܡܪܝܐ܂ ܘܢܿܩܒܠܢ ܐ̈ܕܢܝܟܝܢ ܡܠܬ ܦܘܡܗ܂ ܘܐܠܦܝܢ ܒܢ̈ܬܟܝܢ ܐ̈ܘܠܝܬܐ܃ ܘܐܢܬܬܐ ܠܚܒܪܬܗܿ ܩܝܢܬܐ܂
09:20 [ai]ܡܛܠ ܕܣܠܩ ܡܘܬܐ ܠܟܘ̈ܝܢ ܘܥܠ ܒܣܚܪ̈ܬܢ ܠܡܘܒܕܘ ܛ̈ܠܝܐ ܡܢ ܫܘ̈ܩܐ܃ ܘܥ̈ܠܝܡܐ ܡܢ ܦ̈ܠܛܘܬܐ܂
09:21 [ai]ܡܛܠ ܕܗܟܢܐ ܐܡܿܪ ܡܪܝܐ܂ ܢܦܠܢ ܫ̈ܠܕܝܗܘܢ ܕܒܢܝܢܫ̈ܐܼ ܐܝܟ ܙܒܠܐ ܥܠ ܐ̈ܦܝ ܚܩܠܐ܂ ܘܐܝܟ ܥܡܝܪܐ ܒܬܪ ܚܨܘܕܐ ܘܠܝܬ ܡܟܢܿܫܢܐ܀܂
09:22 [ai]ܗܟܢܐ ܐܡܿܪ ܡܪܝܐ܂ ܠܐܿ ܢܫܬܿܒܗܪ ܚܟܝܡܐ ܒܚܟܡܬܗ܂ ܘܠܐ ܢܫܬܒܗܪ ܓܢܒܪܐ ܒܓܢܒܪܘܬܗ܂ ܘܠܐ ܢܫܬܿܒܗܪ ܥܬܝܪܐ ܒܥܘܬܪܗ܂
09:23 [ai]ܐܠܐ ܒܗܕܐ ܢܫܬܿܒܗܪ ܡܿܢ ܕܡܫܬܿܒܗܪ܂ ܡܿܢ ܕܡܣܿܬܟܠ ܘܝܕܥܿ ܠܝ ܕܐܢܐ ܐܢܐ ܡܪܝܐ܃ ܥܒܿܕ ܛܝܒܘܬܐ ܘܕܝܢܼܐ ܘܙܕܝܩܘܬܐ ܒܐܪܥܐ܂ ܘܒܗܠܝܢ ܨܿܒܝܬ ܐܡܿܪ ܡܪܝܐ܂
09:24 [ai]ܗܐ ܝܘܡ̈ܬܐ ܐܬ̈ܝܢ ܐܡܿܪ ܡܪܝܐ܂ ܘܐܦܩܘܕ ܥܠ ܟܠ ܕܓܙܿܪ ܒܥܘܪܠܘܬܐ܂
09:25 [ai]ܥܠ ܡܨܪ̈ܝܐ ܘܥܠ ܝܗ̈ܘܕܝܐ܂ ܘܥܠ ܐܕܘܡܿ ܘܥܠ ܒܢ̈ܝ ܥܡܘܢ܂ ܘܥܠ ܡܘܐܒܿ ܘܥܠ ܟܠ ܩܨܝ̈ܨܝ ܦܐܬܐܿ ܕܝܬܒܿܝܢ ܒܡܕܒܪܐ܂ ܡܛܠ ܕܟܠܗܘܢ ܥܡ̈ܡܐ ܥܘܪ̈ܠܝܢ ܒܒܣܪܗܘܢ܃ ܘܟܠܗܘܢ ܕܒܝܬ ܐܝܣܪܝܠ ܥܘܪ̈ܠܝܢ ܒܠܒܗܘܢ܀

next chapter