← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


13:01 [ai]ܗܟܢܐ ܐܡܼܪ ܠܝ ܡܪܝܐ܂ ܙܠ ܙܒܼܢ ܠܟ ܣܘܕܪܐ ܕܟܬܢܐ ܘܐܣܘܪܝܗܝ ܒܚ̈ܨܝܟ܂ ܘܒܡ̈ܝܐ ܠܐ ܬܨܒܥܝܘܗܝ܂
13:02 [ai]ܘܙܿܒܢܬ ܣܘܕܪܐ ܐܝܟ ܦܬܓܡܗ ܕܡܪܝܐܼ ܘܐܿܣܪܬ ܒܚ̈ܨܝ܂܀
13:03 [ai]ܘܗܘܼܐ ܥܠܝ ܦܬܓܡܗ ܕܡܪܝܐ ܕܬܪ̈ܬܝܢ ܙܒ̈ܢܝܼܢ ܘܐܡܼܪ܂
13:04 [ai]ܣܒ ܣܘܕܪܐ ܕܙܒܢܼܬ ܕܒܚ̈ܨܝܟ܃ ܘܩܘܡ ܙܠ ܠܦܪܬ܂ ܘܛܡܘܪܝܗܝ ܬܡܿܢ ܒܨܪܝܐ ܕܟܐܦܐ܂
13:05 [ai]ܘܐܿܙܠܬ ܘܛܡܪܬܗ ܒܦܪܬ܃ ܐܝܟ ܕܦܩܿܕܢܝ ܡܪܝܐ܂
13:06 [ai]ܘܡܢ ܒܬܪ ܝܘܡ̈ܬܐ ܣ̈ܓܝܐܐܼ ܐܡܼܪ ܠܝ ܡܪܝܐ܂ ܩܘܡ ܙܠ ܠܦܪܬ܃ ܘܣܒ ܡܢ ܬܡܿܢ ܣܘܕܪܐ ܕܦܩܕܬܟ ܕܬܛܡܪܝܘܗܝ ܬܡܿܢ܂
13:07 [ai]ܘܐܿܙܠܬ ܠܦܪܬ܂ ܘܚܿܦܪܬܼ ܘܢܣܒܬܗ ܠܣܘܕܪܐ ܡܢ ܟܪ ܕܛܡܪܬܗ܂ ܘܗܐ ܐܬܚܿܒܠ ܣܘܕܪܐܿ ܘܠܡܕܡ ܠܐ ܟܫܿܪ܀
13:08 [ai]ܘܗܘܼܐ ܦܬܓܡܗ ܕܡܪܝܐ ܥܠܝ ܘܐܡܼܪ܂
13:09 [ai]ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܗܟܢܐ ܐܚܿܒܠ ܠܓܐ̈ܝܐ ܕܝܗܘܕܐ ܘܠܓܐ̈ܝܐ ܕܐܘܪܫܠܡ ܣܓ̈ܝܐܐ܃
13:10 [ai]ܥܡܐ ܗܢܐ ܒܝܫܼܐ ܕܠܐ ܨܒܼܘ ܠܡܫܡܥ ܦܬ̈ܓܡܝܿ܂ ܕܡܗܠܟܝܢ ܒܨܒܝܢܐ ܕܠܒܗܘܢ܂ ܘܐܙܠܘ ܒܬܪ ܐ̈ܠܗܐ ܐܚܪ̈ܢܐ܃ ܠܡܦܼܠܚ ܐܢܘܢ ܘܠܡܼܣܓܕ ܠܗܘܢ܂ ܢܗܘܼܘܢܼ ܐܝܟ ܣܘܕܪܐ ܗܢܐ ܕܠܡܕܡ ܠܐ ܟܫܿܪ܂
13:11 [ai]ܡܛܠ ܕܐܝܟܢܐ ܕܢܩܿܦ ܣܘܕܪܐ ܠܚ̈ܨܘܗܝ ܕܓܒܪܐ܃ ܗܟܢܐ ܐܩܿܦܬ ܠܝ ܠܟܠܗ ܒܝܬ ܐܝܣܪܝܠ ܘܠܟܠܗ ܒܝܬ ܝܗܘܕܐ ܐܡܿܪ ܡܪܝܐ܃ ܕܢܗܘܘܢ ܠܝ ܠܥܡܐ ܘܠܫܡܐ ܘܠܐܝܩܪܐ ܘܠܬܫܒܘܚܬܐ܂ ܘܠܐ ܫܡܥܼܘ܂
13:12 [ai]ܘܐܡܼܪ ܠܗܘܢ ܦܬܓܡܐ ܗܢܐ܂ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܟܠ ܓܪܒܼ ܢܬܡܠܐ ܚܡܪܐ܂ ܗܐܼ ܐܡܿܪܝܢ ܠܟ܂ ܡܕܥ ܓܝܪ ܠܐ ܝܕܥܿܝܢ ܚܢܢ ܕܟܠܗܘܢ ܓܪ̈ܒܐ ܡܬܼܡܠܝܢ ܚܡܪܐ܃
13:13 [ai]ܐܡܼܪ ܠܗܘܢ܃ ܗܟܢܐ ܐܡܿܪ ܡܪܝܐ܂ ܗܐ ܡܿܠܐ ܐܢܐ ܠܟܠܗܘܢ ܥܡܘܪ̈ܝܗܿ ܕܐܪܥܐ ܗܕܐ܃ ܘܠܡ̈ܠܟܐ ܕܝܬܿܒܝܢ ܥܠ ܟܘܪܣܝܗ ܕܕܘܝܕ܂ ܘܠܟܗ̈ܢܐ ܘܠܢܒ̈ܝܐ܃ ܘܠܟܠܗܘܢ ܥܡܘܪ̈ܝܗܿ ܕܐܘܪܫܠܡ ܪܘܝܼܘܬܐ܂
13:14 [ai]ܘܐܒܿܕܪ ܐܢܘܢ ܓܒܪ ܡܢ ܠܘܬ ܐܚܘܗܝ܂ ܘܐ̈ܒܗܐ ܘܒ̈ܢܝܐܼ ܐܟܚܕܐ ܐܡܿܪ ܡܪܝܐ܂ ܠܐܿ ܐܪܚܡ ܘܠܐ ܐܪܚܦ܂ ܘܠܐ ܐܚܘܣ ܠܡܚܿܒܠܘ ܐܢܘܢ܀
13:15 [ai]ܫܡܥܘܿ ܘܨܘܬܘܼ ܘܠܐ ܬܬܪܝܡܘܢ܂ ܡܛܠ ܕܡܪܝܐ ܡܠܠ܂
13:16 [ai]ܗܒܘ ܠܡܪܝܐ ܐܠܗܟܘܢ ܐܝܩܪܐ ܥܕ ܠܐ ܢܚܼܫܟ܂ ܘܥܕܠܐ ܢܬܬܒܪ̈ܢ ܪ̈ܓܠܝܟܘܢ ܥܠ ܛܘܪ̈ܐ ܒܚܫܘܟܐ܃ ܘܬܣܟܘܢ ܠܢܘܗܪܐ ܘܢܥܒܕܝܘܗܝ ܚܫܘܟܐ ܘܛ̈ܠܠܝ ܡܘܬܐ܂
13:17 [ai]ܘܐܢ ܠܐ ܬܫܡܥܘܢܗ܃ ܡܛܫܝܼܐܝܬ ܬܒܟܼܐ ܢܦܫܝ ܡܢ ܩܕܡ ܥܩܬܐ܂ ܘܡܕܡܿܥܘ ܐܕܡܿܥ܂ ܘܢܫܚ̈ܠܢ ܥܝܢ̈ܝ ܕܡ̈ܥܐ܃ ܥܠ ܕܐܫܬܒܼܝ ܓܙܪܗ ܕܡܪܝܐ܂
13:18 [ai]ܐܡܼܪܘ ܠܡ̈ܠܟܐ ܘܠܪ̈ܘܪܒܢܐ܃ ܐܬܡܿܟܟܘܼ ܘܬܘܒܘ܂ ܡܛܠ ܕܢܦܼܠ ܡܢ ܪܝܫܟܘܢ ܟܠܝܠܐ ܕܬܫܒܘܚܬܟܘܢ܂
13:19 [ai]ܩܘܪ̈ܝܐ ܕܬܝܡܢܐܿ ܐܬܬܚܼܕ ܘܠܝܬ ܕܦܬܿܚ܂ ܐܫܬܒܝܬܿ ܝܗܘܕܐ ܟܠܗܿ ܫܒܝܬܐ ܫܠܡܬܐ܂
13:20 [ai]ܐܪܝܡܘ ܥܝܢ̈ܝܟܘܢܼ ܘܚܼܙܘ ܠܕܐܿܬܝܢ ܡܢ ܓܪܒܝܐ܂ ܐܝܿܢܐ ܗܘ ܓܙܪܐ ܕܐܬܝܗܒ ܠܟܝ ܥܢܐ ܕܬܫܒܘܚܬܟܝ܂
13:21 [ai]ܡܢܐ ܬܐܡܪܝܢ ܟܕ ܢܦܩܘܕ ܥܠܝܟܝ܂ ܘܐܢܬܝ ܐܠܦܬܝ ܐܢܘܢ ܝܘܠܦܢܐܼ ܕܢܗܘܼܘܢ ܠܕܝܫܐ܂ ܗܐ ܚܒ̈ܠܼܐ ܢܐܚܕܘܢܟܝ܃ ܐܝܟ ܐܢܬܬܐ ܕܡܚܿܒܠܐ ܠܡܐܼܠܕ܂
13:22 [ai]ܘܐܢ ܬܐܼܡܪܝܢ ܒܠܒܟܝ ܕܥܠ ܡܢܐ ܓܕܼܫ ܠܝ ܗܠܝܢ܃ ܒܣܘܓܐܬ ܚܘܒ̈ܝܟܝ ܐܬܓܿܠܓܠܘ ܫ̈ܦܘܠܝܟܝ ܘܐܬܓܠܼܝ ܥܩ̈ܒܝܟܝ܂
13:23 [ai]ܘܐܝܟ ܕܠܐ ܡܫܿܟܚ ܗܢܕܘܝܐ ܕܢܫܿܚܠܦ ܡܫܿܟܗ ܘܢܡܪܐ ܟܟ̈ܠܬܗ܃ ܐܦ ܐܢܬܘܢ ܠܐ ܡܫܟܿܚܝܢ ܐܢܬܘܢ ܠܡܛܐܒܘ܃ ܡܛܠ ܕܐܝܠܦܬܘܢ ܒܝܫܼܬܐ܂
13:24 [ai]ܘܐܒܿܕܪ ܐܢܘܢܼ ܐܝܟ ܓܼܠܐ ܕܥܒܿܪ ܩܕܡ ܪܘܚܐ ܒܡܕܒܪܐ܂
13:25 [ai]ܗܕܐ ܗܝ ܦܨܬܟܝ ܘܡܢܬܐ ܕܝܪܬܘܬܟܝ ܡܢ ܩܕܡܝ ܐܡܿܪ ܡܪܝܐ܂ ܥܠ ܕܛܥܝܬܝܢܝ ܘܐܬܬܟܠܬܝ ܥܠ ܫܘܩܪܐ܃
13:26 [ai]ܘܐܦ ܐܢܐ ܐܿܓܠܓ ܫ̈ܦܘܠܝܟܝܼ ܘܐܪܡܐ ܥܠ ܐ̈ܦܝܟܝ܂ ܘܢܬܚܙܐ ܨܥܪܟܝܿ
13:27 [ai]ܘܓܘܪܟܝܼ ܘܨܗܼܠܟܝ܂ ܘܙܢܝܘܬܗܿ ܕܙܢܝܘܬܟܝ܂ ܥܠ ܪ̈ܡܬܐܿ ܒܡܕܒܪܐ ܚܿܙܝܬ ܛܢܦܘܬܟܝ܂ ܘܿܝ ܠܟܝ ܐܘܪܫܠܡ ܕܠܐ ܬܬܕܟܝܢ܂ ܥܕܡܐ ܠܐܡܬܝܿ ܬܘܒܝ܀

next chapter