← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


16:01 [ai]ܘܗܘܼܐ ܥܠܝ ܦܬܓܡܗ ܕܡܪܝܐ ܠܡܐܡܪ܂
16:02 [ai]ܠܐܿ ܬܣܒ ܠܟ ܐܢܬܬܐ܃ ܘܠܐܿ ܢܗܘܼܘܢ ܠܟ ܒ̈ܢܝܐ ܘܒܢ̈ܬܐ ܒܐܬܪܐ ܗܢܐ܂
16:03 [ai]ܡܛܠ ܕܗܟܢܐ ܐܡܿܪ ܡܪܝܐ܃ ܥܠ ܒ̈ܢܝܐ ܘܥܠ ܒܢ̈ܬܐ ܕܡܬܿܝܠܕܝܢ ܒܐܬܪܐ ܗܢܐ܃ ܘܥܠ ܐܡܗ̈ܬܗܘܢ ܕܝ̈ܠܕܢ ܠܗܘܢ܃ ܘܥܠ ܐ̈ܒܗܝܗܘܢ ܕܡܘܿܠܕܝܢ ܠܗܘܢ ܒܐܬܪܐ ܗܢܐ܂
16:04 [ai]ܡܘܬܐܿ ܕܡܛܪ̈ܦܝ ܟܦܢܐ ܢܡܘܬܘܢ܂ ܠܐ ܢܪܩܕܘܢ ܥܠܝܗܘܢ ܘܠܐ ܢܬܩܒܪܘܢ܂ ܐܠܐ ܐܝܟ ܙܒܠܐ ܥܠ ܐ̈ܦܝ ܐܪܥܐ ܢܗܘܘܢ܂ ܘܒܚܪܒܐ ܘܒܟܦܢܐ ܢܣܘܼܦܘܢ܂ ܘܢܗ̈ܘܝܢ ܫ̈ܠܕܝܗܘܢ ܡܐܟܘܠܬܐ ܠܦܪܚܬܐ ܕܫܡܝܐ ܘܠܚܝܘܬܐ ܕܐܪܥܐ܂
16:05 [ai]ܡܛܠ ܕܗܟܢܐ ܐܡܿܪ ܡܪܝܐ܂ ܠܐܿ ܬܐܙܠ ܠܒܝܬ ܡܪܩܘܕܬܐ܂ ܘܠܐܿ ܬܐܙܠ ܠܡܪܩܕܘ܂ ܘܠܐܿ ܬܢܘܕ ܥܠܝܗܘܢ܂ ܡܛܠ ܕܐܥܒܪܬ ܫܠܡܝ ܡܢ ܥܡܐ ܗܢܐ ܐܡܿܪ ܡܪܝܐ܂ ܘܛܝܒܘܬܐܼ ܘܪ̈ܚܡܐ܃
16:06 [ai]ܘܢܡܘܼܬܘܢ ܪ̈ܘܪܒܐܼ ܘܕܩ̈ܕܩܐ ܒܐܪܥܐ ܗܕܐ܂ ܠܐ ܢܬܩܒܪܘܢܼ ܘܠܐ ܢܪܩܕܘܢ ܥܠܝܗܘܢ܂ ܘܠܐ ܢܝܠܠܘܢܼ ܘܠܐ ܢܩܿܕܚܘܢ ܥܠܝܗܘܢ܂
16:07 [ai]ܘܠܐ ܢܩܨܘܢ ܥܠܝܗܘܢ ܒܐܒܠܐ ܕܢܬܒܿܝܐܘܢ ܥܠ ܡܝܬܐ܂ ܘܠܐ ܢܫܩܘܢ ܐܢܘܢ ܟܣܐ ܕܒܘܝܐܐ܃ ܥܠ ܐ̈ܒܗܝܗܘܢ ܘܥܠ ܐܡ̈ܗܬܗܘܢ܂
16:08 [ai]ܘܠܒܝܬ ܡܫܬܝܐܼ ܠܐ ܬܥܘܠ ܠܡܬܒ ܥܡܗܘܢ ܠܡܠܥܼܣ ܘܠܡܫܬܐ܂
16:09 [ai]ܡܛܠ ܕܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܗܐ ܡܒܿܛܠ ܐܢܐ ܡܢ ܐܬܪܐ ܗܢܐ ܠܥ̈ܢܝܟܘܢ ܘܒܝ̈ܘܡܬܟܘܢ܃ ܩܠܐ ܕܕܝܨܐ ܘܩܠܐ ܕܚܕܘܬܐ܂ ܩܠܐ ܕܚܬܢܐܼ ܘܩܠܐ ܕܟܠܬܐ܂
16:10 [ai]ܘܐܢ ܬܚܘܐ ܠܥܡܐ ܗܢܐ ܗܠܝܢ ܟܠܗܘܢ ܦܬܓ̈ܡܐܼ ܢܐܼܡܪܘܢ ܠܟ܂ ܡܛܠ ܡܢܐ ܐܡܼܪ ܡܪܝܐ ܥܠܝܢ ܟܠܗܿ ܗܕܐ ܒܝܫܬܐ ܪܒܬܐ܂ ܡܢܐܿ ܚܒܢ܂ ܘܡܢܐܿ ܗܝ ܚܛܝܬܢ ܕܚܼܛܝܢ ܠܡܪܝܐ ܐܠܗܢ܂
16:11 [ai]ܐܡܼܪ ܠܗܘܢ܃ ܥܠ ܕܫܒܩܘܢܝ ܐ̈ܒܗܝܟܘܢ ܐܡܿܪ ܡܪܝܐ܃ ܘܐܙܼܠܘ ܒܬܪ ܐ̈ܠܗܐ ܐܚܪ̈ܢܐ܃ ܘܦܠܚܼܘ ܐܢܘܢ ܘܣܓܕܘ ܠܗܘܢ܃ ܘܠܝ ܫܒܼܩܘ ܘܢܡܘܣܝ ܠܐ ܢܛܪܼܘ܀
16:12 [ai]ܘܐܢܬܘܢ ܐܒܐܼܫܬܘܢ ܠܡܥܒܼܕ ܝܬܝܪ ܡܢ ܐ̈ܒܗܝܟܘܢ܂ ܘܗܐ ܐܙܿܠܝܢ ܐܢܬܘܢ ܓܒܪ ܒܬܪ ܨܒܝܢ̈ܝ ܠܒܟܘܢ ܒܝܼܫܐܼ ܕܠܐ ܬܫܡܥܘܢܢܝ܂
16:13 [ai]ܘܐܫܕܝܟܘܢ ܡܢ ܐܪܥܐ ܗܕܐ܃ ܠܐܪܥܐ ܕܠܐ ܝܕܥܬܘܢ ܐܢܬܘܢ ܘܐ̈ܒܗܝܟܘܢ܂ ܘܬܦܼܠܚܘܢ ܬܡܿܢ ܠܐ̈ܠܗܐ ܐܚܪ̈ܢܐ ܒܐܝܡܡܐ ܘܒܠܠܝܐ܂ ܘܠܐ ܐܬܠܟܘܢ ܠܪ̈ܚܡܼܐ܀
16:14 [ai]ܡܛܠ ܗܢܐ ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܃ ܘܠܐ ܢܬܐܡܪ ܬܘܒ ܚܝ ܗܘ ܡܪܝܐ ܕܐܣܩ ܠܕܒܝܬ ܐܝܣܪܝܠ ܡܢ ܐܪܥܐ ܕܡܨܪܝܢ܂
16:15 [ai]ܐܠܐ ܚܝ ܗܘܼ ܡܪܝܐ܃ ܕܢܿܣܩ ܘܢܝܿܬܐ ܠܕܒܝܬ ܐܝܣܪܝܠ ܡܢ ܐܪܥܐ ܕܓܪܒܝܐ܃ ܘܡܢ ܟܠ ܐܬܪ̈ܘܬܐ ܕܕܚܿܩܬ ܐܢܘܢ ܠܬܡܿܢ܂ ܘܐܗܿܦܟ ܐܢܘܢ ܠܐܪܥܗܘܢ ܕܝܗܒܬ ܠܐ̈ܒܗܝܗܘܢ܀
16:16 [ai]ܗܐ ܡܫܿܕܪ ܐܢܐ ܠܨ̈ܝܕܐ ܣܓ̈ܝܐܐ ܐܡܿܪ ܡܪܝܐܼ ܘܢܨܘܕܘܢ ܐܢܘܢ܂ ܘܒܬܪܟܢ ܐܫܿܕܪ ܠܨ̈ܝܕܐ ܣ̈ܓܝܐܐ ܘܢܨܘܕܘܢ ܐܢܘܢ܂ ܡܢ ܟܠ ܛܘܪ ܘܡܢ ܟܠ ܪܡܐ܂ ܘܡܢ ܢܩ̈ܥܐ ܕܫܩ̈ܝܦܐ܂
16:17 [ai]ܡܛܠ ܕܥܝܢ̈ܝܼ ܥܠ ܟܘܠܗܝܢ ܐܘܪ̈ܚܬܗܘܢ܂ ܘܠܐ ܛܫܿܝܢ ܡܢ ܩܕܡܝ܂ ܘܠܐ ܡܬܛܫܿܐ ܥܘܼܠܗܘܢ ܡܢ ܩܕܡ ܥܝܢ̈ܝ܂
16:18 [ai]ܘܐܦܪܘܥ ܐܢܘܢ ܩܕܡܝܬ ܚܕ ܬܪ̈ܝܢ ܚ̈ܘܒܝܗܘܢ ܘܚ̈ܛܗܝܗܘܢ܂ ܥܠ ܕܛܘܿܫܘ ܐܪܥܝ ܒܕܒܚ̈ܐ ܕܦܬܟܪ̈ܝܗܘܢ܂ ܘܒܛܢ̈ܦܘܬܗܘܢ ܡܠܼܘ ܝܪܬܘܬܝ܀
16:19 [ai]ܡܪܝܐ ܚܝܠܝ ܘܡܥܕܪܢܝ܂ ܘܒܝܬ ܓܘܣܝ ܒܝܘܡܐ ܕܐܘܠܨܢܐ܃ ܠܘܬܟ ܥܡ̈ܡܐ ܢܐܬܘܢ ܡܢ ܣ̈ܘܦܝܗܿ ܕܐܪܥܐ ܘܢܐܡܪܘܢ܂ ܫܪܝܪܐܝܬ ܦܬܟܪ̈ܐ ܕܕܓܠܘܬܐ ܕܐܘܪܬܘܢ ܐ̈ܒܗܝܼܢ ܠܐܿ ܡܕܡ ܐܢܘܢ܂ ܘܠܝܬ ܒܗܘܢ ܝܘܬܪܢ܂
16:20 [ai]ܗܐ ܒܢ̈ܝ ܐܢܫܐ ܥܒܿܕܝܢ ܠܗܘܢ ܐ̈ܠܗܐ܂ ܘܗܼܢܘܢ ܠܐ ܗܘܼܘ ܐ̈ܠܗܐ܂
16:21 [ai]ܡܛܠ ܗܢܐ ܗܐ ܡܚܿܘܐ ܐܢܐ ܠܗܘܢ܂ ܘܒܙܒܢܐ ܗܢܐ ܐܘܕܥ ܐܢܘܢ ܐܝܼܕܝܼ ܘܓܢܒܪܘܬܝ܂ ܘܢܕܥܘܢ ܕܡܪܝܐ ܫܡܥܝ܀

next chapter