← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


17:01 [ai]ܚܛܝܼܬܗ ܕܝܗܘܕܐ ܟܬܝܒܐ ܒܩܢܝܐ ܕܦܪܙܠܐܼ ܘܒܛܦܪܐ ܕܫܡܝܪܐ܂ ܘܪܫܝܡܐ ܥܠ ܠܘܚ̈ܐ ܕܠܒܗܘܢܼ ܘܥܠ ܩܪ̈ܢܬܐ ܕܡܕܒܚ̈ܝܗܘܢ܂
17:02 [ai]ܡܐ ܕܡܬܕܟܪܝܢ ܒܠܒܗܘܢ ܡܕܒܚ̈ܝܗܘܢ ܘܕܚ̈ܠܬܗܘܢ܃ ܬܚܝܬ ܟܘܠ ܐܝܠܢ ܕܥܒܿܝܛ܃ ܘܥܠ ܟܠ ܪܡܬܐ ܕܪܡܐ܂
17:03 [ai]ܘܒܛܘܪ̈ܐܿ ܘܒܕܒܪܐ܂ ܢܟܣ̈ܝܟ ܘܟܠܗܘܢ ܓܙܝ̈ܟ ܘܬܚ̈ܘܡܝܟܼ ܠܒܙܬܐ ܐܬܠܼ ܡܛܠ ܚ̈ܛܗܝܟ܂
17:04 [ai]ܘܐܿܥܒܪܟ ܡܢ ܝܪܬܘܬܟ ܕܝܿܗܒܬ ܠܟ܂ ܘܐܫܿܥܒܕܟ ܠܒ̈ܥܠܕܒܒܝܟܿ ܒܐܪܥܐ ܕܠܐ ܝܕܥܿ ܐܢܬ܂ ܡܛܠ ܕܢܘܪܐ ܐܩܕܚܬܘܢ ܒܪܘܓܙܝ܃ ܥܕܡܐܿ ܠܥܠܡ ܬܐܩܕ܀
17:05 [ai]ܗܟܢܐ ܐܡܿܪ ܡܪܝܐ܂ ܠܝܛ ܗܼܘ ܓܒܪܐ ܕܢܬܬܟܠ ܥܠ ܒܪܢܫܐ܃ ܘܢܥܒܕ ܒܪ ܒܣܪܐ ܕܪܥܗ܃ ܘܡܢ ܡܪܝܐ ܢܣܼܛܐ ܠܒܗ܂
17:06 [ai]ܢܿܗܘܐܼ ܐܝܟ ܥܩܪܐ ܒܦܩܥܬܐ܂ ܘܠܐ ܢܚܙܐ ܟܕ ܬܐܬܐ ܛܒܬܐ܂ ܘܢܫܼܪܐ ܒܚ̈ܘܠܢܐܼ ܒܡܕܒܪܐ܂ ܒܐܪܥܐܿ ܡܠܚܿܬܐ ܕܠܐ ܐܬܝܬܼܒܬܿ܀܂
17:07 [ai]ܒܪܝܟ ܗܘܼ ܓܒܪܐ ܕܢܬܬܟܠ ܥܠ ܡܪܝܐ܃ ܘܢܿܗܘܐ ܡܪܝܐ ܬܘܟܠܢܗ܂
17:08 [ai]ܢܗܘܐܼ ܐܝܟ ܐܝܠܢܐ ܕܢܨܝܒ ܥܠ ܡ̈ܝܐ܃ ܘܥܠ ܝܒܠܐ ܡܫܪܪ ܥܩܪ̈ܘܗܝ܂ ܘܠܐ ܢܕܚܠ ܟܕ ܢܐܬܐ ܚܘܡܐ܂ ܘܢܗܘܘܢܼ ܛܪ̈ܦܘܗܝܼ ܪܘܙܿܝܢ܂ ܘܒܫܢܬܐ ܕܒܨܝܪ ܒܗܿ ܡܛܪܐܼ ܠܐ ܢܕܚܠ܂ ܘܠܐ ܢܬܒܿܨܪ ܡܢ ܕܠܡܥܒܕ ܦܐܪ̈ܐ܀܂
17:09 [ai]ܥܫܝܢ ܠܒܐܼ ܡܢ ܟܠ ܐܢܫܐ ܗܘ܂ ܡܢܼܘ ܝܕܥܿ ܠܗ܂
17:10 [ai]ܐܢܐ ܡܪܝܐ ܒܨܿܐ ܠܒܐ ܘܒܚܿܪ ܟܘ̈ܠܝܬܐ܃ ܘܝܗܿܒ ܠܓܒܪܐ ܐܝܟ ܐܘܪ̈ܚܬܗ ܘܐܝܟ ܦܐܪ̈ܝ ܥܒ̈ܕܘܗܝ܀܂
17:11 [ai]ܐܝܟ ܚܓܠܐ ܕܩܿܪܐ ܠܐܝܠܝܢ ܕܠܐ ܝܠܼܕ܂ ܗܟܢܐ ܡܿܢ ܕܩܿܢܐ ܥܘܬܪܐ ܕܠܐ ܒܕܝܢܼܐ܃ ܒܦܠܓܘܬ ܝܘܡ̈ܘܗܝ ܢܫܒܩܝܘܗܝ܂ ܘܚܪܬܗ ܬܗܘܐ ܡܨܥܪܐ܂
17:12 [ai]ܟܘܪܣܝܐ ܕܐܝܩܪܐ ܕܐܬܬܪܝܡ ܡܢ ܠܘܩܕܡ ܡܢ ܐܬܪܐ ܕܡܩܕܫܢ܂
17:13 [ai]ܣܒܪܗ ܕܐܝܣܪܝܠ ܡܪܝܐ ܗܘ܂ ܟܠ ܕܫܒܩܘܟ ܢܒܗܼܬܘܢ܂ ܘܡܪ̈ܘܕܐܼ ܒܐܪܥܐ ܢܬܟܬܒܘܢ܂ ܡܛܠ ܕܫܒܼܩܘ ܠܡܪܝܐ ܡܒܘܥܐ ܕܡ̈ܝܐ ܚ̈ܝܐ܀
17:14 [ai]ܐܣܢܝ ܡܪܝܐܼ ܘܐܬܐܣܐ܂ ܦܪܘܩܝܢܝ ܘܐܬܦܼܪܩ܂ ܡܛܠ ܕܬܫܒܘܚܬܝܼ ܐܢܬ ܗܘ܂
17:15 [ai]ܗܐ ܗܢܼܘܢ ܐܡܿܪܝܢ ܠܝ܃ ܐܝܿܟܐ ܗܘ ܦܬܓܡܗ ܕܡܪܝܐܿ ܢܿܐܬܐ ܗܫܐ܂
17:16 [ai]ܘܐܢܐ ܒܒܝܫܬܐܼ ܠܐ ܦܫܿܬ ܡܢܟ܂ ܐܢܬ ܝܕܥܿ ܐܢܬ ܕܝܘܡܗ ܕܒܪܢܫܐܼ ܠܐ ܪܓܿܬ܂ ܘܡܕܡ ܕܢܦܩܼ ܡܢ ܣ̈ܦܘܬܝܼ ܩܕܡ ܐ̈ܦܝܟ ܗܘܼܐ܂
17:17 [ai]ܠܐ ܬܗܘܐ ܠܝ ܠܬܒܪܐ܂ ܐܠܐܼ ܐܓܢ ܥܠܝ ܒܝܘܡܐ ܒܝܫܐ܂
17:18 [ai]ܢܒܗܼܬܘܢ ܪ̈ܕܘܦܝ ܘܠܐ ܐܒܗܼܬ ܐܢܐ܂ ܢܬܬܒܼܪܘܢ ܗܼܢܘܢܼ ܘܠܐ ܐܬܬܼܒܪ ܐܢܐ܂ ܐܝܬܐ ܥܠܝܗܘܢ ܝܘܡܐ ܕܒܝܫܬܐ܃ ܘܚܕ ܬܪ̈ܝܢܿ ܬܒܪܐ ܬܒܼܪ ܐܢܘܢ܀
17:19 [ai]ܗܟܢܐ ܐܡܼܪ ܠܝ ܡܪܝܐ܂ ܙܠ ܩܘܡ ܒܬܪܥܐ ܕܒܢ̈ܝ ܥܡܐ܃ ܕܥܐܿܠܝܢ ܒܗ ܡ̈ܠܟܐ ܕܝܗܘܕܐ ܘܕܢܦܩܝܢ ܒܗ ܘܒܟܠܗܘܢ ܬܪ̈ܥܝܗܿ ܕܐܘܪܫܠܡ܂
17:20 [ai]ܘܐܡܼܪ ܠܗܘܢ܂ ܫܡܥܼܘ ܦܬܓܡܗ ܕܡܪܝܐ ܡ̈ܠܟܐ ܕܝܗܘܕܐ ܘܟܠܗ ܒܝܬ ܝܗܘܕܐ܃ ܘܟܠܗܘܢ ܥܡܘܪ̈ܝܗܿ ܕܐܘܪܫܠܡ ܕܥܐܿܠܝܢ ܒܬܪ̈ܥܐ ܗܠܝܢ܂
17:21 [ai]ܗܟܢܐ ܐܡܿܪ ܡܪܝܐ܂ ܐܙܕܗܪܘܿ ܒܢܦܫܟܘܢ܂ ܘܠܐ ܬܫܩܠܘܢ ܫܩܘܼܠܬܐ ܒܝܘܡܐ ܕܫܒܬܐ ܘܬܥܼܠܘܢ ܒܬܪ̈ܥܝܗܿ ܕܐܘܪܫܠܡ܂
17:22 [ai]ܘܠܐ ܬܦܩܘܿܢ ܫܩܘܠܬܐ ܡܢ ܒܬ̈ܝܟܘܢ ܒܝܘܡܐ ܕܫܒܬܐ܂ ܘܟܠ ܥܒܼܕ ܠܐ ܬܥܒܕܘܢ܂ ܘܬܩܕܫܘܢ ܝܘܡܐ ܕܫܒܬܐܼ ܐܝܟ ܕܦܩܿܕܬ ܠܐ̈ܒܗܝܟܘܢ܂
17:23 [ai]ܘܠܐ ܫܡܼܥܘܼ ܘܠܐ ܐܪܟܢܘ ܐܕܢܗܘܢ ܠܡܫܼܡܥ܂ ܘܩܫܝܘ ܩܕܠܗܘܢ ܕܠܐ ܢܫܡܼܥܘܢܼ ܘܠܐ ܢܩܒܠܘܢ ܡܪܕܘܬܐ܂
17:24 [ai]ܘܐܢ ܡܫܡܥ ܬܫܡܥܘܢܢܝ ܐܡܿܪ ܡܪܝܐ܃ ܕܠܐ ܬܥܿܠܘܢ ܫܩܘܠܬܐ ܒܬܪ̈ܥܐ ܕܩܪܝܬܐ ܗܕܐ ܒܝܘܡܐ ܕܫܒܬܐ܃ ܘܬܩܿܕܫܘܢ ܝܘܡܐ ܕܫܒܬܐ܃ ܘܠܐ ܬܥܒܕܘܢ ܒܗ ܟܠ ܥܒܼܕ܂
17:25 [ai]ܢܥܠܼܘܢ ܒܬܪ̈ܥܝܗܿ ܕܩܪܝܬܐ ܗܕܐ܂ ܡ̈ܠܟܐܼ ܘܪ̈ܘܪܒܢܐ ܕܝܬܒܿܝܢ ܥܠ ܟܘܪܣܝܗ ܕܕܘܝܕ܂ ܟܕ ܪ̈ܟܝܒܼܝܢ ܒܡܪ̈ܟܒܬܐܼ ܘܒܪ̈ܟܫܐ܂ ܗܢܼܘܢ ܘܪ̈ܘܪܒܢܝܗܘܢ܂ ܘܓܒܪ̈ܐ ܕܝܗܘܕܐܼ ܘܥܡܘܪ̈ܝܗܿ ܕܐܘܪܫܠܡ܂ ܘܬܬܒ ܩܪܝܬܐ ܗܕܐ ܠܥܠܡ܂
17:26 [ai]ܘܢܐܼܬܘܢ ܡܢ ܩܘܪ̈ܝܐ ܕܝܗܘܕܐ ܘܡܢ ܚܕܪ̈ܝ ܐܘܪܫܠܡ܃ ܘܡܢ ܐܪܥܐ ܕܒܢܝܡܝܢ ܘܡܢ ܦܩܥܬܐ܃ ܘܡܢ ܛܘܪܐ ܘܡܢ ܬܝܡܢܐ܃ ܕܡܿܝܬܝܢ ܕܒܚ̈ܐ ܘܩܘܪ̈ܒܢܐ ܘܠܒܘܢܬܐ܃ ܘܡܿܝܬܝܢ ܬܘܕܝܬܐ ܠܒܝܬܗ ܕܡܪܝܐ܂
17:27 [ai]ܘܐܠܐ ܬܫܡܥܘܢܢܝ ܠܡܩܿܕܫܘ ܝܘܡܐ ܕܫܒܬܐ܃ ܕܠܐ ܬܫܩܠܘܢ ܫܩܘܼܠܬܐ ܘܬܥܼܠܘܢ ܒܬܪ̈ܥܝܗܿ ܕܐܘܪܫܠܡ ܒܝܘܡܐ ܕܫܒܬܐ܂ ܐܫܒܘܩ ܢܘܪܐ ܒܬܪ̈ܥܝܗܿ ܘܬܐܟܘܠ ܣܚܪ̈ܬܗܿ ܕܐܘܪܫܠܡ ܘܠܐ ܬܕܥܼܟ܀܀

next chapter