← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


23:01 [ai]ܐܿܘ ܪ̈̈ܥܘܬܐ ܕܡܿܘܒܕܝܢ ܘܡܒܿܕܪܝܢ ܥܢܐ ܕܡܪܥܝܬܝ ܐܡܿܪ ܡܪܝܐ܀
23:02 [ai]ܡܛܠ ܗܢܐܼ ܗܟܢܐ ܐܡܿܪ ܡܪܝܐ ܐܠܗܐ ܕܐܝܣܪܝܠ܃ ܥܠ ܪ̈ܥܘܬܐ ܕܪܥܿܝܢ ܠܥܡܝ܂ ܐܢܬܘܢ ܒܿܕܪܬܘܢ ܠܥܢܝ܂ ܘܐܛܥܝܬܘܢ ܐ̈ܢܝܼܢ ܘܠܐ ܦܩܼܕܬܘܢ ܐ̈ܢܝܢ܂ ܗܐ ܦܩܿܕ ܐܢܐ ܥܠܝܟܘܢܼ ܐܝܟ ܒܝܫܘܬ ܥܿܒ̈ܕܝܟܘܢ ܐܡܿܪ ܡܪܝܐ܂
23:03 [ai]ܘܐܢܐ ܐܟܢܫ ܫܪܟܐ ܕܥܢܝ ܡܢ ܟܠܗܘܢ ܐܬܪ̈ܘܬܐ ܕܒܿܕܪܬ ܐܢܘܢ ܠܬܡܿܢ܃ ܘܐܗܦܟ ܐܢܘܢ ܠܕܝܪܗܘܢ܂ ܘܢܟܼܒܪܘܢܼ ܘܢܼܣܓܘܢ܂
23:04 [ai]ܘܐܼܩܝܡ ܥܠܝܗܘܢ ܪ̈ܥܘܬܐ܃ ܘܢܪܥܼܘܢ ܐܢܘܢ܂ ܘܠܐ ܢܕܚܼܠܘܢ ܬܘܒܼ ܘܠܐ ܢܬܒܿܕܪܘܢ܂ ܘܠܐ ܢܛܥܼܘܢ ܐܡܿܪ ܡܪܝܐ܀܂
23:05 [ai]ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܃ ܘܐܩܝܡ ܠܕܘܝܕ ܨܡܼܚܐ ܕܙܕܝܩܘܬܐ܂ ܘܢܡܠܟ ܒܡܠܟܘܬܐܼ ܘܢܣܬܿܟܠ܂ ܘܢܥܒܕ ܕܝܢܼܐ ܘܙܕܝܩܘܬܐ ܒܐܪܥܐ܂
23:06 [ai]ܒܝ̈ܘܡܘܗܝܿ ܢܬܦܼܪܩ ܝܗܘܕܐ܂ ܘܐܝܣܪܝܠܼ ܢܫܪܐ ܒܫܠܝܐ܂ ܘܗܢܘ ܫܡܗ ܕܢܩܪܘܢܗܼ ܡܪܝܐܿ ܙܕܩܼܢ܀
23:07 [ai]ܡܛܠ ܗܢܐ ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܃ ܘܠܐ ܢܬܐܡܪ ܬܘܒ ܚܝ ܗܘ ܡܪܝܐ ܕܐܣܩ ܠܕܒܝܬ ܐܝܣܪܝܠ ܡܢ ܐܪܥܐ ܕܡܨܪܝܢ܂
23:08 [ai]ܐܠܐ ܚܝ ܗܘܼ ܡܪܝܐ܃ ܕܢܿܣܩܼ ܘܢܿܝܬܐ ܠܕܒܝܬ ܐܝܣܪܝܠ ܡܢ ܐܪܥܐ ܕܓܪܒܝܐ܃ ܘܡܢ ܟܠܗܘܢ ܐܬܪ̈ܘܬܐ ܕܐܬܒܿܕܪܘ ܒܗܘܢ܂ ܘܢܬܒܘܢ ܒܐܪܥܗܘܢ܀܂
23:09 [ai]ܥܠ ܢܒ̈ܝܐ ܐܬܬܼܒܪ ܠܒܝ ܒܓܘܝ܂ ܘܙܥܘܼ ܟܠܗܘܢ ܓܪ̈ܡܝ܂ ܗܿܘܝܬܼ ܐܝܟ ܓܒܪܐ ܪܘܝܼܐ܂ ܘܐܝܟ ܓܒܪܐ ܕܥܒܪܗ ܚܡܪܗ܂ ܡܢ ܩܕܡ ܡܪ̈ܝܐ ܘܡܢ ܩܕܡ ܦܬ̈ܓܡܝ ܩܘܕܫܗ܂
23:10 [ai]ܡܛܠ ܕܓܝܪ̈ܐܼ ܘܚ̈ܛܘܦܐܿ ܐܬܡܠܼܝܬܿ ܐܪܥܐ܂ ܡܛܠ ܗܠܝܢ ܐܬܐܼܒܠܬܿ ܐܪܥܐ܂ ܘܝܒܫ ܕܝܪ̈ܐ ܕܡܕܒܪܐ܂ ܘܗܘܼܐ ܪܗܛܢܼܗܘܢܼ ܒܝܼܫ ܘܒܓܢܒܪܘܬܗܘܢܼ ܠܐ ܐܟܫܪܘ܂
23:11 [ai]ܡܛܠ ܕܐܦ ܢܒ̈ܝܐ ܐܦ ܟܗ̈ܢܐܼ ܐܬܚܿܢܦܘ܂ ܐܦ ܒܒܝܬܝ ܐܫܿܟܚܬ ܒܝܫܘܬܗܘܢ ܐܡܿܪ ܡܪܝܐ܂
23:12 [ai]ܡܛܠܿ ܗܢܐ ܢܗ̈ܘܝܢ ܠܗܘܢ ܐܘܪ̈ܚܬܗܘܢܼ ܡܫܪ̈ܘܥܝܬܐ܂ ܘܠܚܫܘܟܐ ܢܬܕܚܘܢܼ ܘܢܼܦܠܘܢ ܒܗܝܢ܂ ܡܛܠ ܕܡܿܝܬܐ ܐܢܐ ܥܠܝܗܘܢ ܒܝܫܬܐ܃ ܫܢܬܐ ܕܦܘܩܕܢܗܘܢ ܐܡܿܪ ܡܪܝܐ܀܂
23:13 [ai]ܘܒܢ̈ܒܝܝ ܫܡܪܝܼܢ ܚܿܙܝܬ ܕܓܠܘܬܐ܂ ܐܬܢܿܒܝܘ ܒܒܥܠܐܼ ܘܐܛܥܝܿܘ ܠܥܡܝ ܐܝܣܪܝܠ܂
23:14 [ai]ܘܒܢ̈ܒܝܝ ܐܘܪܫܠܡܼ ܚܿܙܝܬ ܫܛܝܘܬܐ܂ ܓܝܼܪܝܢ ܘܡܗܠܟܝܢ ܒܫܘܩܪܐ܂ ܘܡܚܡܣܢܝܢ ܐ̈ܝܕܝܗܘܢ ܡܢ ܪ̈ܚܡܿܝܗܘܢ܃ ܕܠܐ ܢܗܼܦܟܘܢ ܓܒܪ ܡܢ ܐܘܪܚܗ ܒܝܫܬܐ܃ ܘܗܘܼܘ ܠܝ ܟܠܗܘܢܼ ܐܝܟ ܣܕܘܡ ܘܝܬܒ̈ܝܗܿ ܐܝܟ ܥܡܘܪܐ܂
23:15 [ai]ܡܛܠ ܗܢܐܼ ܗܟܢܐ ܐܡܿܪ ܡܪܝܐ ܨܒܐܘܬ ܥܠ ܢܒ̈ܝܐ܂ ܗܐ ܡܘܟܠ ܐܢܐ ܠܗܘܢܼ ܡܪ̈ܪܐ܂ ܘܐܿܫܩܐ ܐܢܘܢܼ ܡ̈ܝܐ ܡܪ̈ܝܪܐ܂ ܡܛܠ ܕܡܢ ܠܘܬ ܢܒ̈ܝܐ ܕܐܘܪܫܠܡ܂ ܢܦܩܬܿ ܚܢܦܘܬܐܼ ܒܟܠܗܿ ܐܪܥܐ܂
23:16 [ai]ܗܟܢܐ ܐܡܿܪ ܡܪܝܐ ܨܒܐܘܬ܂ ܠܐ ܬܫܡܼܥܘܢ ܠܦܬ̈ܓܡܐ ܕܢܒ̈ܝܐ ܕܓ̈ܠܐ܃ ܕܡܬܢܿܒܝܢ ܠܟܘܢ ܘܡܿܛܥܝܢ ܠܟܘܢ܂ ܚܙܘܐ ܗܘ ܕܠܒܗܘܢ ܡܡܿܠܠܝܢ܂ ܘܠܐܿ ܗܘܐ ܡܢ ܦܘܡ ܡܪܝܐ܂
23:17 [ai]ܘܐܡܿܪܝܢ ܠܐܝܠܝܢ ܕܡܿܪܓܙܝܢ܃ ܒܦܬܓܡܗ ܕܡܪܝܐܼ ܫܠܡܐ ܢܗܘܐ ܠܟܘܢ܂ ܘܟܠ ܕܡܗܠܟ ܒܨܒܝܢܐ ܕܠܒܗ ܐܡܿܪܝܢ ܠܗ܃ ܠܐ ܬܐܬܐ ܥܠܝܟܘܢ ܒܝܫܬܐ܂
23:18 [ai]ܡܢܼܘ ܓܝܪ ܩܡ ܒܐܪܙܗ ܕܡܪܝܐ܃ ܘܚܙܝܗܝ ܘܫܡܼܥ ܦܬܓܡܗ܂ ܐܿܘ ܡܢܼܘ ܨܬ ܦܬܓܡܗ ܘܫܡܥܗ܀܀
23:19 [ai]ܗܐ ܣܘܥܪܢܗ ܕܡܪܝܐܼ ܒܪܘܓܙܐ ܢܦܩ܃ ܘܣܘܥܪܢܐܼ ܡܬܓܘܿܙܠ܂ ܥܠ ܪܝܫܐ ܕܪ̈ܫܝܥܐ ܢܬܬܢܝܚ܂
23:20 [ai]ܠܐ ܬܗܦܼܘܟ ܚܡܬܐ ܕܪܘܓܙܗ ܥܕܡܐ ܕܢܿܥܒܕ܃ ܘܥܕܡܐ ܕܢܩܼܝܡ ܬܪܥܝܬܐ ܕܠܒܗ܂ ܒܐܚܪܝܬ ܝܘܡ̈ܬܐ ܬܬܒܿܝܢܘܢ ܒܗ܂
23:21 [ai]ܠܐ ܫܿܕܪܬ ܠܢܒ̈ܝܐܿ ܘܗܼܢܘܢܼ ܐܙܠܼܘ܂ ܘܠܐ ܐܡܿܪܬ ܠܗܘܢܿ ܘܗܼܢܘܢܼ ܐܬܢܿܒܝܘ܂
23:22 [ai]ܘܠܐ ܩܡܘ ܒܐܪܙܝ ܘܐܫܿܡܥܘ ܦܬ̈ܓܡܝ ܠܥܡܝ܃ ܘܐܬܝܒܘ ܐܢܘܢ ܡܢ ܐܘܪ̈ܚܬܗܘܢ ܒܝܫ̈ܬܐ ܘܡܢ ܒܝܫܘܬ ܥܿܒ̈ܕܝܗܘܢ܀
23:23 [ai]ܐܠܗܐ ܐܢܐ ܕܡܢ ܩܘܪܒܐ ܐܡܿܪ ܡܪܝܐ܂ ܘܠܐ ܗܿܘܝܬ ܐܠܗܐ ܕܡܢ ܪܘܚܩܐ܂
23:24 [ai]ܐܢ ܢܛܫܐ ܓܒܪܐ ܒܛܘܫܝܝ܃ ܐܢܐ ܠܐ ܚܿܙܐ ܐܢܐ ܠܗ ܐܡܿܪ ܡܪܝܐ܃ ܗܐ ܫܡܝܐ ܘܐܪܥܐܼ ܡܢܝ ܡܠܼܝܢ ܐܡܿܪ ܡܪܝܐ ܚܝܠܬܢܐ܀
23:25 [ai]ܫܿܡܥܬ ܡܕܡ ܕܐܡܼܪܘ ܢܒ̈ܝܐ ܕܡܬܢܿܒܝܢ ܒܫܡܝ ܒܕܓܠܘܬܐ܂ ܘܐܡܿܪܝܢ ܚܠܡܐ ܚܿܠܡܬ܂
23:26 [ai]ܥܕܡܐܿ ܠܐܡܬܝ ܐܢܬ ܒܦܘܡܗܘܢ ܕܢܒ̈ܝܐ ܕܓ̈ܠܐ ܢܒܝ̈ܘܬܐ ܕܓܠܬ̈ܐ܃ ܢܒܝ̈ܘܬܐ ܕܢܟܠܐ ܕܠܒܗܘܢ܂
23:27 [ai]ܕܡܬܚܿܫܒܝܢ ܠܡܿܛܥܝܘ ܒܫܡܝ ܠܥܡܝ܃ ܒܚܼ̈ܠܡܝܗܘܢ ܕܡܫܿܬܥܝܢ ܓܒܪ ܠܚܒܪܗ܂ ܐܝܟ ܕܛܥܼܘ ܐ̈ܒܗܝܗܘܢ ܫܡܝ ܘܦܠܚܘ ܠܒܥܠܐ܂
23:28 [ai]ܢܒܝܐ ܕܚܿܙܐ ܚܠܡܐ ܢܫܿܬܥܐܼ ܚܠܡܐ܂ ܘܕܦܬ̈ܓܡܝ ܥܡܗ܂ ܢܡܿܠܠ ܦܬ̈ܓܡܝ ܒܩܘܫܬܐ܀ ܠܡܢܐ ܚܿܠܛܝܢ ܐܢܬܘܢ ܬܒܢܐ ܒܥܒܘܪܐ ܐܡܿܪ ܡܪܝܐ܂
23:29 [ai]ܗܐ ܦܬ̈ܓܡܝ ܐܝܟ ܢܘܪܐ ܢܦܩܿܝܢ ܐܡܿܪ ܡܪܝܐ܂ ܘܐܝܟ ܦܪܙܠܐ ܕܓܙܪ ܟܐܦܐ܂
23:30 [ai]ܡܛܠ ܗܢܐܼ ܗܐ ܐܢܐ ܥܠ ܢܒ̈ܝܐ ܐܡܿܪ ܡܪܝܐ܃ ܕܡܿܓܢܒܝܢ ܦܬ̈ܓܡܝ ܐܢܫ ܡܢ ܚܒܪܗ܂
23:31 [ai]ܗܐ ܐܢܐ ܥܠ ܢܒ̈ܝܐ ܐܡܿܪ ܡܪܝܐ܃ ܕܡܗܿܦܟܝܢ ܠܫ̈ܢܝܗܘܢ ܘܐܡܿܪ̈ܝܢ ܡܪܝܐ ܐܡܼܪ ܗܟܢܐ܂
23:32 [ai]ܗܐ ܐܢܐ ܥܠ ܢܒ̈ܝܐ ܕܚܿܙܝܢ ܚ̈ܠܡܐ ܕܓ̈ܠܐ ܐܡܿܪ ܡܪܝܐ ܘܡܫܿܬܥܝܢ ܠܗܘܢ܃ ܘܡܿܛܥܝܢ ܠܥܡܝ ܒܕܓܠܘܬܗܘܢ ܘܒܦܚܙܘܬܗܘܢ܂ ܘܐܢܐ ܠܐ ܫܿܕܪܬ ܐܢܘܢ ܘܠܐ ܦܩܿܕܬ ܐܢܘܢ܂ ܘܡܕܡ ܠܐ ܡܘܬܪܝܢ ܠܥܡܐ ܗܢܐ܀
23:33 [ai]ܘܟܕ ܢܫܿܐܠܟ ܥܡܐ ܗܢܐ ܐܘ ܢܒܝܐ ܐܘ ܟܗܢܐ܃ ܘܢܐܡܼܪ ܠܟ ܡܿܢܘ ܦܬܓܡܗ ܕܡܪܝܐ܃ ܐܡܼܪ ܠܗܘܢ ܐܢܬ܃ ܗܢܐ ܗܘ ܦܬܓܡܗ ܕܡܪܝܐ܃ ܕܐܥܩܘܪܟܘܢ ܐܡܿܪ ܡܪܝܐ܂
23:34 [ai]ܘܢܒܝܐ ܐܘ ܟܗܢܐ ܐܘ ܥܡܐ ܕܢܐܡܪ ܦܬܓܡܗ ܕܡܪܝܐ܃ ܐܦܩܘܕ ܥܠ ܓܒܪܐ ܗܿܘ ܘܥܠ ܒܝܬܗ܂
23:35 [ai]ܗܟܢܐ ܬܐܡܪܘܢ ܓܒܪ ܠܚܒܪܗ ܘܓܒܪ ܠܐܚܘܗܝ܂ ܡܢܐ ܥܢܼܐ ܡܪܝܐܿ ܘܡܢܼܐ ܡܠܠ ܡܪܝܐ܂
23:36 [ai]ܘܦܬܓܡܗ ܕܡܪܝܐ ܠܐ ܬܬܕܟܪܘܢ ܬܘܒ܂ ܡܛܠ ܕܦܬܓܡܐ ܢܗܘܐ ܠܓܒܪܐ ܢܒܝܘܬܗ܃ ܘܗܦܿܟܝܢ ܐܢܬܘܢ ܦܬ̈ܓܡܘܗܝ ܕܐܠܗܐ ܚܝܐ܃ ܡܪܝܐ ܚܝܠܬܢܐ ܐܠܗܢ܂
23:37 [ai]ܗܟܢܐ ܬܐܡܪܘܢ ܠܓܒܪܐ܂ ܡܢܐ ܥܢܟ ܡܪܝܐܿ ܘܡܢܐ ܡܠܠ ܡܪܝܐ܂
23:38 [ai]ܘܐܢ ܦܬܓܡܗ ܕܡܪܝܐ ܬܐܡܪܘܢ܂ ܗܟܢܐ ܐܡܿܪ ܡܪܝܐ܂ ܥܠ ܕܐܡܪܬܘܢ ܦܬܓܡܐ ܗܢܐ܃ ܘܫܿܠܚܬ ܠܟܘܢ ܕܠܐ ܬܐܡܪܘܢ܃
23:39 [ai]ܡܛܠ ܗܢܐܿ ܐܫܩܘܠܟܘܢ ܡܫܩܠܼ ܘܐܫܕܝܟܘܢ܂ ܘܠܩܪܝܬܐ ܕܝܿܗܒܬ ܠܟܘܢ ܘܠܐ̈ܒܗܝܟܘܢ ܡܢ ܩܕܡ ܐ̈ܦܝ܂
23:40 [ai]ܘܐܬܠ ܥܠܝܟܘܢ ܚܣܕܐ ܕܥܠܡ܂ ܘܒܗܬܬܐ ܕܠܥܠܡܼ ܕܠܐ ܡܬܛܥܝܐ܀

next chapter