← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


28:01 [ai]ܘܗܘܼܐ ܒܫܢܬܐ ܗܿܝ܃ ܒܪܝܫ ܡܠܟܘܬܗ ܕܨܕܩܝܐ ܡܿܠܟܐ ܕܝܗܘܕܐ܃ ܒܫܢܬܐ ܐܪܒܝܥܝܬܐ ܒܝܪܚܐ ܕܚܡܫܐ܃ ܐܡܼܪ ܠܝ ܚܢܢܝܐ ܒܪ ܥܙܘܪ ܢܒܝܐ ܕܓܠܐ ܕܡܢ ܓܒܥܘܢ ܒܒܝܬܗ ܕܡܪܝܐ܃ ܠܥܝܢ ܟܗ̈ܢܐ ܘܠܥܝܢ ܟܠܗ ܥܡܐ܂
28:02 [ai]ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܬܒܪܬ ܢܝܪܗ ܕܡܿܠܟܐ ܕܒܒܠ܂
28:03 [ai]ܡܟܐ ܠܬܪ̈ܬܝܢ ܫ̈ܢܝܢ ܡܗܦܼܟ ܐܢܐ ܠܐܬܪܐ ܗܢܐ܃ ܟܘܠܗܘܢ ܡܐ̈ܢܐ ܕܒܝܬܗ ܕܡܪܝܐ܃ ܕܢܣܼܒ ܢܒܘܟܕܢܨܪ ܡܿܠܟܐ ܕܒܒܠ ܡܢ ܐܬܪܐ ܗܢܐ܃ ܘܐܘܒܠ ܐܢܘܢ ܠܒܒܠ܃
28:04 [ai]ܥܡ ܝܘܟܢܝܐ ܒܪ ܝܘܝܩܝܡ ܡܿܠܟܐ ܕܝܗܘܕܐ܂ ܘܠܟܠܗܿ ܫܒܝܬܐ ܕܝܗܘܕܐ ܕܐܙܠܼܘ ܠܒܒܠ܃ ܡܗܼܦܟ ܐܢܐ ܠܐܬܪܐ ܗܢܐ ܐܡܿܪ ܡܪܝܐ܂ ܡܛܠ ܕܬܒܿܪ ܐܢܐ ܢܝܪܗ ܕܡܿܠܟܐ ܕܒܒܠ܂
28:05 [ai]ܘܐܡܼܪ ܐܪܡܝܐ ܢܒܝܐ ܠܚܢܢܝܐ ܢܒܝܐ ܕܓܠܐ܃ ܠܥܝܢ ܟܗ̈ܢܐ ܘܠܥܝܢ ܟܠܗ ܥܡܐ ܕܩܝܿܡܝܢ ܒܒܝܬܗ ܕܡܪܝܐ܂
28:06 [ai]ܘܐܡܼܪ ܐܪܡܝܐܿ ܐܡܝܢ܂܂ ܗܟܢܐ ܢܥܿܒܕ ܡܪܝܐ܂ ܢܩܼܝܡ ܡܪܝܐ ܦܬ̈ܓܡܐ ܕܐܬܢܒܼܝܬ܃ ܠܡܗܦܼܟܘ ܡܐ̈ܢܐ ܕܒܝܬܗ ܕܡܪܝܐ܃ ܘܟܠܗܿ ܫܒܝܼܬܐ ܡܢ ܒܒܠ ܠܐܬܪܐ ܗܢܐ܂
28:07 [ai]ܒܪܡܼ ܫܡܼܥ ܦܬܓܡܐ ܗܢܐ ܕܐܡܿܪ ܐܢܐ ܩܕܡܝܟ ܘܩܕܡ ܟܠܗ ܥܡܐ ܗܢܐ܂
28:08 [ai]ܢܒ̈ܝܐ ܕܗܘܼܘ ܩܕܡܝ ܘܩܕܡܝܟ ܡܢ ܥܠܡ܂܃ ܘܐܬܢܒܝܘ ܥܠ ܐܪ̈ܥܬܐ ܣܓܝܐ̈ܬܐ ܘܥܠ ܡ̈ܠܟܘܬܐ ܪ̈ܘܪܒܬܐ܃ ܠܩܪܒܐ ܘܠܒܝܫܬܐ ܘܠܡܘܬܢܐ܃
28:09 [ai]ܢܒܿܝܐ ܕܡܬܿܢܒܐ ܫܠܡܐ܃ ܡܐ ܕܗܘܼܐ ܦܬܓܡܗ ܕܢܒܝܐ܃ ܐܬܝܕܥ ܢܒܝܐ ܗܿܘ ܕܫܕܪܗ ܡܪܝܐ ܒܩܘܫܬܐ܂
28:10 [ai]ܘܢܣܼܒ ܚܢܢܝܐ ܢܒܝܐ ܕܓܠܐ ܚ̈ܢܩܐ ܡܢ ܨܘܪܗ ܕܐܪܡܝܐ ܢܒܝܐܼ ܘܬܒܿܪ ܐܢܘܢ܂
28:11 [ai]ܘܐܡܼܪ ܚܢܢܝܐ ܠܥܝܢ ܟܠܗ ܥܡܐ܂ ܗܟܢܐ ܐܡܿܪ ܡܪܝܐ܂ ܗܟܢܐ ܐܬܒܪܝܘܗܝ ܠܢܝܪܗ ܕܢܒܘܟܕܢܨܪ ܡܿܠܟܐ ܕܒܒܠ܃ ܡܟܐ ܠܬܪ̈ܬܝܢ ܫ̈ܢܝܢ ܡܢ ܨܘܪܐ ܕܟܠܗܘܢ ܥܡ̈ܡܐ܂ ܘܐܙܠ ܐܪܡܝܐ ܢܒܝܐ ܠܐܘܪܚܗ܀
28:12 [ai]ܘܗܘܼܐ ܦܬܓܡܗ ܕܡܪܝܐ ܥܠ ܐܪܡܝܐ ܢܒܝܐ܃ ܡܢ ܒܬܪ ܕܬܒܿܪ ܚܢܢܝܐ ܢܒܝܐ ܕܓܠܐ ܚܢ̈ܩܐ ܡܢ ܨܘܪܗ ܕܐܪܡܝܐ ܢܒܝܐ܂
28:13 [ai]ܙܠ ܘܐܡܼܪ ܠܚܢܢܝܐ ܢܒܝܐ ܕܓܠܐ܃ ܗܿܟܢܐ ܐܡܿܪ ܡܪܝܐ܂ ܚ̈ܢܩܐ ܕܩܝܣܐ ܕܬܒܼܪܬ܃ ܥܒܿܕ ܚܠܦܝܗܘܢܼ ܢܝܪܐ ܕܦܪܙܠܐ܂
28:14 [ai]ܡܛܘܠ ܕܗܟܢܐ ܐܡܿܪ ܡܪܝܐ ܨܒܐܘܬ ܐܠܗܐ ܕܐܝܣܪܝܠ܂ ܢܝܪܐ ܕܦܪܙܠܐ ܝܿܗܒܬ ܥܠ ܨܘܪܐ ܕܟܠܗܘܢ ܥܡ̈ܡܐ ܗܠܝܢ܃ ܠܡܦܠܚ ܠܢܒܘܟܕܢܨܪ ܡܿܠܟܐ ܕܒܒܠ ܘܢܦܠܚܘܢܗ܂ ܘܐܦ ܚܝܘܬܐ ܕܕܒܪܐܼ ܝܿܗܒܬ ܠܗ ܠܡܦܠܚܗ܂
28:15 [ai]ܘܐܡܼܪ ܐܪܡܝܐ ܢܒܝܐ ܠܚܢܢܝܐ ܢܒܝܐ ܕܓܠܐ܂ ܫܡܼܥ ܚܢܢܝܐ ܠܐܿ ܫܕܪܟ ܡܪܝܐ܂ ܘܐܢܬ ܐܬܟܠܬܝܗܝ ܠܥܡܐ ܗܢܐ ܥܠ ܫܘܩܪܐ܀
28:16 [ai]ܡܛܠ ܗܢܐܼ ܗܟܢܐ ܐܡܿܪ ܡܪܝܐ܂ ܗܐ ܫܿܕܐ ܐܢܐ ܠܟ ܡܢ ܐ̈ܦܝ ܐܪܥܐ܂ ܫܢܬܐܿ ܗܕܐ ܡܐܿܬ ܐܢܬ܂ ܡܛܠ ܕܥܘܼܠܐܿ ܡܠܠܼܬܿ ܩܕܡ ܡܪܝܐ܂
28:17 [ai]ܘܡܝܼܬ ܚܢܢܝܐ ܢܒܝܐ ܕܓܠܐ ܒܫܢܬܐ ܗܿܝ ܒܝܪܚܐ ܕܫܒܥܐ܀

next chapter