← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


31:01 [ai]ܒܙܒܢܐ ܗܿܘ ܐܡܿܪ ܡܪܝܐ܂ ܐܿܗܘܐ ܐܠܗܐܼ ܠܟܠܗܝܢ ܫܪ̈ܒܬܐ ܕܐܝܣܪܝܠ܂ ܘܗܼܢܘܢܼ ܢܗܼܘܘܢ ܠܝ ܥܡܐ܀
31:02 [ai]ܗܟܢܐ ܐܡܿܪ ܡܪܝܐ܂ ܐܫܟܼܚ ܪ̈ܚܡܼܐ ܒܡܕܒܪܐ ܥܡܐ ܕܐܬܦܿܨܝ ܡܢ ܚܪܒܐ܂ ܐܙܼܠ ܒܫܒܝܐ ܐܝܣܪܝܠ܂
31:03 [ai]ܡܢ ܪܘܚܩܐܼ ܡܪܝܐ ܐܬܚܙܝ ܠܝ܂ ܘܐܡܼܪ ܠܝܼ܂ ܪܚܡܬܐ ܕܥܠܡܐ ܪܚܡܬܟܝ܂ ܡܛܠ ܗܢܐ ܢܓܕܬܟܝܼ ܠܛܝܒܘܬܼܐ܂
31:04 [ai]ܬܘܒ ܐܒܼܢܝܟܝ ܘܬܬܼܒܢܝܢ ܒܬܘܠܬܐ ܕܐܝܣܪܝܠ܂ ܬܘܒ ܬܨܛܒܬܝܢ ܒܬܨܒܝܬܐ܃ ܘܬܦܩܝܢ ܒܟܢܘܫܬܐ ܕܡܫ̈ܒܚܢܐ܂
31:05 [ai]ܬܘܒ ܬܨܒܝܢ ܟܪܡܐܼ ܒܛܘܪܐ ܕܫܡܪܝܢ܂ ܨܘܒܝ ܢܨܒܬܐܼ ܘܫܒܚܝ܂
31:06 [ai]ܡܛܠ ܕܥܬܝܕ ܗܘ ܝܘܡܐ ܕܢܩܪܘܢܼ ܢܛܘܪ̈ܐ ܒܛܘܪܐ ܕܐܦܪܝܡ ܘܢܐܼܡܪܘܢ܃ ܩܘܡܘ ܢܣܩ ܠܨܗܝܘܢ ܠܘܬ ܡܪܝܐ ܐܠܗܢ܂
31:07 [ai]ܡܛܠ ܕܗܟܢܐ ܐܡܿܪ ܡܪܝܐ܂ ܫܒܿܚܘ ܕܒܝܬ ܝܥܩܘܒ ܒܚܕܘܬܐ܂܂ ܘܕܘܨܘ ܒܪܝܫ ܥܡ̈ܡܐ܂ ܐܫܡܥܘ ܘܫܒܚܘ ܘܐܡܪܘ܂ ܦܪܘܩ ܡܪܝܐ ܠܥܡܟ ܠܫܪܟܗ ܕܐܝܣܪܝܠ܂
31:08 [ai]ܗܐ ܡܝܿܬܐ ܐܢܐ ܠܗܘܢ ܡܢ ܐܪܥܐ ܕܓܪܒܝܐ܃ ܘܐܿܟܢܫ ܐܢܘܢ ܡܢ ܣ̈ܘܦܝܗܿ ܕܐܪܥܐ܂ ܘܐܦ ܥܘܝܪ̈ܐ ܘܚܓܝܪ̈ܐ ܕܐܝܬ ܒܗܘܢ܂ ܘܕܒܼܛܢܐ ܘܕܝܿܠܕܐ ܐܝܟ ܚܕܐ܂ ܟܢܫܐ ܪܒܐܿ ܢܗܦܼܟܘܢ ܠܗܪܟܐ܂
31:09 [ai]ܒܒܟܬܐ ܢܐܙܠܘܢ܂ ܘܒܬܿܚܢܢܬܐ ܢܐܬܘܢ܂ ܐܕܒܿܪ ܐܢܘܢܼ ܥܠ ܫܒ̈ܝܠܐ ܕܡ̈ܝܐ ܒܐܘܪ̈ܚܬܐ ܬܪ̈ܝܨܬܐ ܕܠܐ ܢܬܬܩܠܘܢ ܒܗܝܢ܂ ܡܛܠ ܕܗܿܘܝܬ ܠܐܝܣܪܝܠ ܠܐܒܐ܃ ܘܐܦܪܝܡ ܗܘܼܐ ܒܘܟܪܝ܀܀܂
31:10 [ai]ܫܡܼܥܘ ܦܬܓܡܗ ܕܡܪܝܐ ܥܡܗ ܘܚܘܘ ܒܓܙܪ̈ܬܐ ܪ̈ܚܝܩܬܐܼ ܘܐܡܼܪܘ܂ ܡܿܢ ܕܒܿܕܪܗ ܠܐܝܣܪܝܠܼ ܢܟܢܿܫܝܘܗܝ܂ ܘܢܿܢܛܪܝܘܗܝܼ ܐܝܟ ܪܥܝܐ ܠܓܙܪܗ܂
31:11 [ai]ܡܛܠ ܕܦܼܪܩ ܡܪܝܐ ܠܝܥܩܘܒ ܥܒܼܕܗ܂ ܘܦܨܝܗ ܡܢ ܐ̈ܝܕܝ ܡܿܢ ܕܥܫܝܢ ܡܢܗ܂
31:12 [ai]ܘܢܐܼܬܘܢ ܘܢܫܒܿܚܘܢ ܒܪܘܡܗܿ ܕܨܗܝܘܢ܂ ܘܢܬܒܣܿܡܘܢ ܡܢ ܛܒ̈ܬܗ ܕܡܪܝܐ܂ ܡܢ ܥܒܘܪܐܿ ܘܡܢ ܚܡܪܐܼ ܘܡܢ ܡܫܚܐ܂ ܘܡܢ ܒܢ̈ܝ ܥܢܐ ܘܬܘܪ̈ܐ܂ ܘܬܗܘܐ ܢܦܫܗܘܢ ܐܝܟ ܓܢܬ ܫܩܝܐ܂ ܘܠܐ ܢܘܿܣܦܘܢ ܬܘܒܼ ܠܡܣܿܬܪܩܘ܂
31:13 [ai]ܗܿܝ ܕܝܢ ܬܚܕܐ ܒܬܘܠܬܐܼ ܒܚܕܘܬܐ܂ ܘܓܕܘ̈ܕܐ ܘܣܒ̈ܐܼ ܐܟܚܕܐ ܢܚܕܘܢ܂ ܘܐܗܦܟ ܐܒܠܗܘܢ ܠܚܕܘܬܐܼ ܘܐܒܿܝܐ ܐܢܘܢ ܘܐܚܿܕܐ ܐܢܘܢ ܡܢ ܕܐܘܢܗܘܢ܂
31:14 [ai]ܘܐܪܘܐ ܢܦܫܐ ܕܟܗ̈ܢܐ ܕܘܗܢܐ܂ ܘܥܡܝܼ ܡܢ ܛܘܒܝ ܢܣܒܼܥܘܢ ܐܡܿܪ ܡܪܝܐ܀
31:15 [ai]ܗܟܢܐ ܐܡܿܪ ܡܪܝܐ܂ ܩܠܐܿ ܒܪܡܬܐ ܐܫܬܼܡܥ܂ ܐܠܝܐܼ ܘܒܟܬܐ ܡܪܝܪܬܐ܂ ܪܚܝܠ ܒܟܝܐ ܥܠ ܒܢ̈ܝܗܿ܃ ܘܠܐ ܨܒܝܐ ܠܡܬܒܿܝܐܘܼ ܡܛܠ ܕܠܝܬ ܐܢܘܢ܂
31:16 [ai]ܗܟܢܐ ܐܡܿܪ ܡܪܝܐ܂ ܟܠܝ ܩܠܟܝ ܡܢ ܒܟܼܝܐܼ ܘܥܝܢ̈ܝܟܝ ܡܢ ܕܡܥܬܐ܂ ܡܛܠ ܕܐܝܬ ܐܓܪܐ ܠܕܡ̈ܥܝܟܝ ܐܡܿܪ ܡܪܝܐ܂ ܘܢܗܼܦܟܘܢ ܡܢ ܐܪܥܐ ܕܒ̈ܥܠܕܒܒܐ܂
31:17 [ai]ܘܐܝܬ ܣܒܪܐ ܠܚܪܬܟܝ ܐܡܿܪ ܡܪܝܐ܃ ܘܢܗܦܟܘܢ ܒ̈ܢܝܐ ܠܬܚܘܡܗܘܢ܂
31:18 [ai]ܡܫܼܡܥ ܫܿܡܥܬ ܠܐܦܪܝܡ ܕܐܿܠܐܼ ܘܐܡܿܪ܂ ܪܕܝܬܢܝ ܡܪܝܐ ܘܐܿܬܪܕܝܬ܂ ܐܝܟ ܥܓܠܐ ܗܿܘܝܬ ܕܠܐ ܡܿܟܒܼܫ܂ ܐܬܝܒܝܢܝ ܘܐܬܘܒ܂ ܡܛܘܠ ܕܐܢܬ ܗܘ ܡܪܝܐ ܐܠܗܝ܂
31:19 [ai]ܡܛܠ ܕܡܢ ܒܬܪ ܕܬܿܒܬܼ ܐܬܿܒܝܐܬ܂ ܘܡܢ ܒܬܪ ܕܝܿܕܥܼܬܼ ܐܬܬܢܚܬ܂ ܒܿܗܬܬ ܘܐܦ ܐܬܿܬܟܣܼܬ܂ ܕܩܿܒܠܬ ܚܣܕܐ ܕܛܠܝܘܬܝ܂
31:20 [ai]ܒܪܐ ܗܘ ܝܩܝܪܐ ܠܝ ܐܦܪܝܡ ܘܝܠܕܐ ܚܒܝܒܐ܂ ܡܛܠ ܕܒܙܒܢܐ ܕܡܡܿܠܠ ܐܢܐ ܒܗ ܡܬܕܟܪ ܐܢܐ ܠܗ܂ ܡܛܠ ܗܢܐ ܗܘܼܘ ܪ̈ܚܡܼܝ ܥܠܘܗܝ܂ ܘܐܪܚܡ ܥܠܘܗܝ ܐܡܿܪ ܡܪܝܐ܂
31:21 [ai]ܐܩܝܡ ܠܟܝ ܐܬܐ ܘܬܒܝ ܒܡܕܒܪܐ܂ ܗܒܝ ܠܒܟܝ ܠܐܘܪܚܐ ܬܪܝܨܬܐ܂ ܬܘܒܝ̈ ܒܬܘܠܬܐ ܕܐܝܣܪܝܠ ܐܡܿܪ ܡܪܝܐ܂ ܘܬܼܒܝ ܒܩܘܪ̈ܝܝܟܝ ܗܠܝܢ܂
31:22 [ai]ܥܕܡܐ ܠܐܡܬܝ ܡܬܦܠܓܬܝ ܒܪܬܐܿ ܬܝܒܬܐ܂ ܡܛܠ ܕܒܪܐ ܡܪܝܐ ܚܕܬܐ ܒܐܪܥܐ܂ ܢܩܒܬܐܼ ܬܚܿܒܒ ܓܒܪܐ܂
31:23 [ai]ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܡܟܝܠ ܢܐܡܪܘܢ ܦܬܓܡܐ ܗܢܐ ܒܐܪܥܐ ܕܝܗܘܕܐܼ ܘܒܩܘܪ̈ܝܗ܂ ܡܐ ܕܡܗܿܦܟ ܐܢܐ ܫܒܝܬܗܘܢ܂ ܢܒܪܟܟ ܡܪܝܐ܂ ܕܝܪܐ ܙܕܝܩܐ ܛܘܪܐ ܩܕܝܫܐ܂
31:24 [ai]ܘܢܼܬܒܘܢ ܒܗܿ ܝܗܘܕܐ ܘܟܠܗܝܢ ܩܘܪ̈ܝܗ ܐܟܚܕܐ܂ ܐܟܪ̈ܐ ܘܪ̈ܥܝܝ ܓܙܪ̈ܐ܂
31:25 [ai]ܡܛܠ ܕܐܿܪܘܝܬ ܢܦܫܐ ܕܨܗܝܐ܂ ܘܟܠ ܢܦܫܐ ܕܟܦܢܐܼ ܣܿܒܥܬ܂
31:26 [ai]ܡܛܠ ܗܢܐ ܐܬܿܬܥܝܪܬ ܘܚܿܙܝܬ܂ ܘܫܿܢܬܝ ܒܣܡܬܿ ܠܝ܀
31:27 [ai]ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܂ ܘܐܙܪܘܥ ܠܕܒܝܬ ܐܝܣܪܝܠܿ ܘܠܕܒܝܬ ܝܗܘܕܐܼ ܙܪܥܐ ܕܒܢ̈ܝ ܐܢܫܐ܂ ܘܙܪܥܐ ܕܒܥܝܪܐ܂
31:28 [ai]ܘܐܝܟ ܕܐܬܪܥܝܬ ܥܠܝܗܘܢ ܠܡܥܩܼܪ ܐܢܘܢ ܘܠܡܣܼܬܪ ܘܠܡܣܿܚܦܘ ܘܠܡܘܒܕܘ ܘܠܡܒܿܐܫܘ܃ ܗܟܢܐ ܐܥܗܕ ܥܠܝܗܘܢ ܠܡܒܼܢܐ ܘܠܡܨܒ ܐܡܿܪ ܡܪܝܐ܂
31:29 [ai]ܒܝ̈ܘܡܬܐ ܗܿܢܘܢ܃ ܠܐ ܢܐܡܪܘܢ ܬܘܒ ܐ̈ܒܗܐ ܐܟܠܘ ܒܣܪ̈ܐ܃ ܘܫ̈ܢܐ ܕܒ̈ܢܝܐ ܩܿܗܝܢ܂
31:30 [ai]ܐܠܐ ܐܢܫ ܒܚ̈ܛܗܘܗܝ ܢܡܘܬ܂ ܟܠ ܒܪܢܫܐ ܕܐܿܟܠ ܒܣܪܐ܂ ܫ̈ܢܘܗܝ ܕܝܠܗ ܢܩܗܼܝܢ܀܀
31:31 [ai]ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܃ ܘܐܩܝܡ ܠܕܒܝܬ ܐܝܣܪܐܝܠ ܘܠܕܒܝܬ ܝܗܘܕܐ܃ ܕܝܬܩܐ ܚܕܬܐ܂
31:32 [ai]ܠܐ ܐܝܟ ܗܿܝ ܕܝܬܩܐ ܕܐܿܩܝܡܬ ܠܐܒ̈ܗܝܗܘܢ܃ ܒܝܘܡܐ ܕܐܿܚܕܬ ܒܐܝܕܗܘܢ ܘܐܿܦܩܬ ܐܢܘܢ ܡܢ ܐܪܥܐ ܕܡܨܪܝܢ܂ ܡܛܠ ܕܗܢܼܘܢ ܒܿܛܠܘ ܕܝܬܩܐ ܕܝܠܝ܂ ܘܐܦ ܐܢܐܼ ܒܿܣܝܬ ܒܗܘܢ ܐܡܿܪ ܡܪܝܐ܂ ܐܠܐ ܗܕܐ ܕܝܬܩܐ
31:33 [ai]ܕܐܣܝܡ ܠܕܒܝܬ ܐܝܣܪܝܠ܂ ܒܬܪ ܝܘܡ̈ܬܐ ܗܿܢܘܢ܂ ܐܡܿܪ ܡܪܝܐ܃ ܐܬܠ ܢܡܘܣܝܼ ܒܓܘܗܘܢ܂ ܘܥܠ ܠܒ̈ܘܬܗܘܢ ܐܟܬܒܼܝܘܗܝ܂ ܘܐܿܗܘܐ ܠܗܘܢ ܐܠܗܐ܂ ܘܗܼܢܘܢ ܢܗܘܼܘܢ ܠܝ ܥܡܐ܂
31:34 [ai]ܘܠܐ ܢܿܠܦܘܢ ܬܘܒ ܓܒܪ ܠܐܚܘܗܝ ܘܓܒܪ ܠܚܒܪܗ ܘܢܐܡܪܘܢ ܕܕܥܘܼ ܠܡܪܝܐ܂ ܡܛܠ ܕܟܠܗܘܢ ܢܕܥܘܢܢܼܝ܂ ܡܢ ܙܥܘܪܗܘܢܼ ܘܥܕܡܐ ܠܩܫܝܫܗܘܢ ܐܡܿܪ ܡܪܝܐ܂ ܡܛܠ ܕܐܫܒܘܩ ܠܚ̈ܘܒܝܗܘܢ܂ ܘܚ̈ܛܗܝܗܘܢ ܬܘܒܼ ܠܐ ܐܬܕܟܪ܂
31:35 [ai]ܗܟܢܐ ܐܡܿܪ ܡܪܝܐ܃ ܕܝܗܒ ܫܡܫܐ ܠܢܘܗܪܐ ܕܐܝܡܡܐ܃ ܘܕܘܒܪ̈ܐ ܕܣܗܪܐ ܘܕܟܘ̈ܟܒܐܼ ܠܢܘܗܪܐ ܕܠܠܝܐ܂ ܕܟܐܐ ܒܝܡܐܼ ܘܫܿܠܝܢ ܓܠܠܘ̈ܗܝ܂ ܡܪܝܐܿ ܚܝܠܬܢܐ ܫܡܗ܂
31:36 [ai]ܐܢ ܢܥܒܪܘܢ ܕܘܒܪ̈ܐ ܗܠܝܢ ܡܢ ܩܕܡܝ ܐܡܿܪ ܡܪܝܐ܂ ܐܦ ܙܪܥܐ ܕܐܝܣܪܝܠ ܢܒܼܛܠܘܢ܃ ܕܠܐ ܢܗܘܘܢ ܥܡܐ ܩܕܡܝ ܟܠܗܘܢ ܝܘܡ̈ܬܐ܀
31:37 [ai]ܗܟܢܐ ܐܡܿܪ ܡܪܝܐ܂ ܐܢ ܢܬܡܿܫܚܘܢ ܫܡܝܐ ܡܢ ܠܥܠ܃ ܘܢܬܒܼ̈ܕܩܢ ܫܬ̈ܐܣܝܗܿ ܕܐܪܥܐ ܡܢ ܠܬܚܬ܃ ܐܦ ܐܢܐܼ ܐܣܿܠܐܼ ܠܟܠܗ ܙܪܥܗ ܕܐܝܣܪܝܠ܃ ܥܠ ܟܠ ܡܕܡ ܕܥܒܼܕܘ ܐܡܿܪ ܡܪܝܐ܀
31:38 [ai]ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܃ ܘܬܬܒܼܢܐ ܩܪܝܼܬܐ ܠܡܪܝܐ܃ ܡܢ ܡܓܕܠܐ ܕܚܢܢܐܝܠ ܥܕܡܐ ܠܬܪܥܐ ܕܙܘܝܬܐ܂
31:39 [ai]ܘܢܦܘܼܩ ܬܘܒ ܚܘܛܐ ܕܡܫܘܚܬܐ ܠܩܘܒܠܗ܂ ܥܠ ܪܡܬܐ ܕܓܪܒ܃ ܘܢܬܟܪܟ ܠܪܡܬܐ܂
31:40 [ai]ܘܟܘܠܗ ܥܘܡܩܐ ܕܫܿܕܝܢ ܒܗ ܦܪܼܬܐ ܘܩܛܡܐ܃ ܥܕܡܐ ܠܢܚܠܐ ܕܩܕܪܘܢ ܘܥܕܡܐ ܠܙܘܝܬܐ ܕܬܪܥܐ ܕܪ̈ܟܫܐ ܡܕܢܚܝܐ܃ ܩܘܕܫܐܿ ܠܡܪܝܐ܂ ܠܐ ܢܬܥܼܩܪ܂ ܘܠܐ ܢܣܼܬܚܦܿ ܬܘܒܼ ܠܥܠܡ܂܀

next chapter