← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


34:01 [ai]ܦܬܓܡܐ ܕܗܘܼܐ ܥܠ ܐܪܡܝܐ ܡܢ ܩܕܡ ܡܪܝܐ܂ ܘܢܒܘܟܕܢܨܪ ܡܿܠܟܐ ܕܒܒܠ ܘܟܠܗ ܚܝܠܗ܃ ܘܟܘܠܗܝܢ ܡ̈ܠܟܘܬܐ ܕܐܪܥ ܫܘܠܛܢ ܐܝܼܕܗܼ܂ ܘܟܠܗܘܢ ܥܡ̈ܡܐ ܡܬܟܿܬܫܝܢ ܥܠ ܐܘܪܫܠܡܼ ܘܥܠ ܟܠܗܝܢ ܩܘܪ̈ܝܗ܂
34:02 [ai]ܗܟܢܐ ܐܡܿܪ ܡܪܝܐ ܐܠܗܐ ܕܐܝܣܪܝܠ܂ ܙܠ ܘܐܡܼܪ ܠܨܕܩܝܐ ܡܿܠܟܐ ܕܝܗܘܕܐ܃ ܗܟܢܐ ܐܡܿܪ ܡܪܝܐ܂ ܗܐ ܡܫܠܡ ܐܢܐ ܠܗܿ ܠܩܪܝܬܐ ܗܕܐ܃ ܒܐܝܕܗ ܕܡܿܠܟܐ ܕܒܒܠܼ ܘܢܘܩܕܝܗܿ ܒܢܘܪܐ܂
34:03 [ai]ܘܐܢܬܼ ܠܐ ܬܬܿܦܠܛ ܡܢ ܐ̈ܝܕܘܗܝ܂ ܐܠܐ ܡܬܬܚܕܘ ܬܬܚܕ܂ ܘܒܐ̈ܝܕܘܗܝ ܬܫܼܬܠܡ܂ ܘܥܝܢ̈ܝܟ ܠܥܝܢ̈ܘܗܝ ܕܡܿܠܟܐ ܕܒܒܠ ܢܚ̈ܙܝܢ܂ ܘܦܘܡܟ ܥܡ ܦܘܡܗ ܢܡܠܠ܂ ܘܠܒܒܠ ܬܐܙܠ܂
34:04 [ai]ܒܪܡ ܫܡܼܥ ܦܬܓܡܗ ܕܡܪܝܐܿ ܨܕܩܝܐ ܡܿܠܟܐ ܕܝܗܘܕܐ܂ ܗܟܢܐ ܐܡܿܪ ܡܪܝܐ ܥܠܝܟ܂ ܠܐܿ ܬܡܘܬ ܒܚܪܒܐ܂
34:05 [ai]ܐܠܐܼ ܒܫܠܡܐ ܬܡܘܬ܂ ܘܐܝܟ ܕܐܪܩܕܘ ܥܠ ܐ̈ܒܗܝܟ ܡ̈ܠܟܐ ܩܕ̈ܡܝܐ ܕܗܘܼܘ ܩܕܡܝܟ܃ ܗܟܢܐ ܢܪܩܕܘܢ ܥܠܝܟ܂ ܘܝ ܡܪܐ ܢܪܩܕܘܢ ܥܠܝܟ܂ ܡܛܠ ܕܦܬܓܡܐ ܗܢܐ ܡܿܠܠܬ ܐܡܿܪ ܡܪܝܐ܀
34:06 [ai]ܘܐܡܼܪ ܐܪܡܝܐ ܢܒܝܐ ܠܨܕܩܝܐ ܡܿܠܟܐ ܕܝܗܘܕܐ܃ ܟܠܗܘܢ ܦܬܓܡ̈ܐ ܗܠܝܢ ܒܐܘܪܫܠܡ܂
34:07 [ai]ܘܚܝ̈ܠܐ ܕܡܿܠܟܐ ܕܒܒܠ ܡܬܟܬܿܫܝܢ ܥܠ ܐܘܪܫܠܡ܂ ܘܥܠ ܟܘܠܗܝܢ ܩܘܪ̈ܝܐ ܕܝܗܘܕܐ ܕܐܫܬܚܪ܂ ܥܠ ܠܟܝܫ ܘܥܠ ܥܙܩܿܐ܂ܡܛܠ ܕܗܼܢܝܢ ܐܫܬܼܚܪ ܒܩܘܪ̈ܝܐ ܕܝܗܘܕܐ ܩܘܪ̈ܝܐ ܥܫܝܢ̈ܬܐ܀
34:08 [ai]ܦܬܓܡܐ ܕܗܘܼܐ ܥܠ ܐܪܡܝܐ ܡܢ ܩܕܡ ܡܪܝܐ ܠܡܐܡܪ܃ ܡܢ ܒܬܪ ܕܐܩܝܡ ܡܿܠܟܐ ܨܕܩܝܐ ܩܝܡܐ ܥܡ ܟܠܗ ܥܡܐ ܕܒܐܘܪܫܠܡ܃ ܕܢܬܩܪܘܢ ܡܚܪ̈ܪܐ܂
34:09 [ai]ܕܢܫܒܘܩ ܓܒܪ ܥܒܼܕܗ ܘܓܒܪ ܐܡܬܗ ܥܒܪܝܐ ܘܥܒܪܝܬܐ ܒܢ̈ܝ ܚܐܪ̈ܐ ܕܠܐ ܢܫܥܒܕܘܢ ܓܒܪ ܠܐܚܘܗܝ ܝܗܘܕܝܐ܂
34:10 [ai]ܘܫܡܥܼܘ ܟܘܠܗܘܢ ܪ̈ܘܪܒܢܐ ܘܟܠܗ ܥܡܐ܃ ܘܩܒܿܠܘ ܥܠܝܗܘܢ ܕܢܫܒܘܩ ܓܒܪ ܥܒܼܕܗ ܘܓܒܪ ܐܡܬܗ ܒܢ̈ܝ ܚܐܪ̈ܐ܃ ܕܠܐ ܢܦܠܚܘܢ ܐܢܘܢ ܬܘܒ܂ ܘܚܪܪܘܿ ܐܢܘܢ܂
34:11 [ai]ܘܿܗܦܟܼܘ ܡܢ ܒܬܪܟܢ܃ ܘܫܥܒܕܘ ܐܢܘܢ ܠܡܚܪ̈ܪܐܼ ܘܥܒܼܕܘ ܐܢܘܢ ܥܒܼ̈ܕܐ܀
34:12 [ai]ܘܗܘܼܐ ܦܬܓܡܗ ܕܡܪܝܐ ܥܠ ܐܪܡܝܐ ܠܡܐܡܪ܂
34:13 [ai]ܗܟܢܐ ܐܡܿܪ ܡܪܝܐ ܐܠܗܐ ܕܐܝܣܪܝܠ܂ ܐܢܐ ܐܩܿܝܡܬ ܩܝܡܐ ܥܡ ܐ̈ܒܗܝܟܘܢ܃ ܒܝܘܡܐ ܕܐܿܦܩܬ ܐܢܘܢ ܡܢ ܐܪܥܐ ܕܡܨܪܝܢ܂ ܡܢ ܒܝܬ ܥܒܼܕܘܬܐ ܠܡܐܡܪ
34:14 [ai]ܡܢ ܒܬܪ ܫܒܥ ܫ̈ܢܝܢ܂ ܬܫܒܼܩܘܢ ܓܒܪ ܠܐܚܘܗܝ ܥܒܪܝܐ ܕܢܙܿܕܒܢ ܠܟ܂ ܘܿܢܦܠܚܟܼ ܫܬ ܫ̈ܢܝܢ܂ ܘܬܫܒܩܝܘܗܝ ܒܪ ܚܐܪ̈ܐ ܡܢ ܠܘܬܟ܂ ܘܠܐ ܫܡܥܘܢܝ ܐ̈ܒܗܝܟܘܢܼ ܘܠܐ ܨܠܼܘ ܐܕܢܗܘܢ ܠܘܬܝ܂
34:15 [ai]ܘܗܦܼܟܬܘܢ ܐܢܬܘܢ ܝܘܡܢܐ܃ ܘܥܒܕܬܘܢ ܡܕܡ ܕܫܦܝܪ ܒܥܝܢ̈ܝ܂ ܠܡܩܪܐ ܚܐܪܘܬܐ ܓܒܪ ܠܚܒܪܗ܂ ܘܐܩܝܡܬܘܢ ܩܝܡܐ ܩܕܡܝ ܒܒܝܬܐ ܕܐܬܩܪܝ ‍{‍‍{‍ܫܡܝ‍}‍‍}‍ ܫܡܝ ܥܠܘܗܝ܂
34:16 [ai]ܘܗܦܼܟܬܘܢܼ ܘܛܘܿܫܬܘܢ ܫܡܝ܂ ܘܐܗܦܼܟܬܘܢ ܓܒܪ ܥܒܼܕܗ ܘܓܒܪ ܐܡܬܗ ܕܫܒܩܬܘܢ ܒܢ̈ܝ ܚܐܪ̈ܐ ܠܢܦܫܗܘܢ܃ ܘܟܒܿܫܬܘܢ ܐܢܘܢ ܕܢܗܘܘܢ ܠܟܘܢ ܥܒ̈ܕܐܿ ܘܐܡܗ̈ܬܐ܀
34:17 [ai]ܡܛܘܠ ܗܢܐܼ ܗܟܢܐ ܐܡܿܪ ܡܪܝܐ ܐܠܗܐ ܕܐܝܣܪܝܠ܂ ܐܢܬܘܢ ܠܐ ܫܡܥܬܘܢܢܝ ܠܡܩܪܐ ܚܐܪܘܬܐ ܓܒܪ ܠܚܒܪܗ܂ ܗܐ ܩܿܪܐ ܐܢܐ ܠܟܘܢ ܚܐܪܘܬܐ܃ ܠܚܪܒܐܿ ܘܠܟܦܢܐܼ ܘܠܡܘܬܢܐܿ ܐܡܿܪ ܡܪܝܐ܂ ܘܐܬܠܟܘܢ ܠܙܘܥܬܐܼ ܠܟܠܗܝܢ ܡ̈ܠܟܘܬܐ ܕܐܪܥܐ܀܂
34:18 [ai]ܘܐܬܠ ܠܓܒܪ̈ܐ ܕܥܒܪܘ ܥܠ ܩܝܡܝ܃ ܕܠܐ ܐܫܪܘ ܦܬ̈ܓܡܝ ܩܝܡܐ ܕܐܩܝܡܘ ܩܕܡܝ܂ ܥܓܠܼܐ ܕܦܣܼܩܘ ܠܬܪ̈ܝܢ ܘܥܒܪܘ ܒܝܬ ܦ̈ܠܓܼܘܗܝܿ܂
34:19 [ai]ܪ̈ܘܪܒܢܐ ܕܝܗܘܕܐ ܘܕܐܘܪܫܠܡ܂ ܘܡܗܝ̈ܡܢܐܿ ܘܟܗ̈ܢܐ܂ ܘܟܠܗ ܥܡܐ ܕܐܪܥܐ ܕܥܒܪܘ ܒܝܬ ܦܠܓܼܘ̈ܗܝ ܕܥܓܠܼܐ܂
34:20 [ai]ܘܐܫܠܡ ܐܢܘܢ ܒܐܝܼܕܐ ܕܒ̈ܥܠܕܒܒܝܗܘܢ܃ ܘܒܐܝܼܕܐ ܕܐܝܠܝܢ ܕܒܥܿܝܢ ܢܦܫܗܘܢ܂ ܘܢܗ̈ܘܝܢ ܫ̈ܠܕܝܗܘܢ ܡܐܟܘܠܬܐ ܠܦܪܚܬܐ ܕܫܡܝܐܼ ܘܠܚܝܘܬܐ ܕܐܪܥܐ܂
34:21 [ai]ܘܠܨܕܩܝܐ ܡܿܠܟܐ ܕܝܗܘܕܐ ܘܠܪ̈ܘܪܒܢܘܗܝ܃ ܐܫܠܡ ܒܐܝܼܕܐ ܕܒ̈ܥܠܕܒܒܝܗܘܢܼ ܘܒܐܝܼܕܐ ܕܐܝܠܝܢ ܕܒܥܿܝܢ ܢܦܫܗܘܢ܂ ܘܒܝܕ ܚܝܠܗ ܕܡܿܠܟܐ ܕܒܒܠ ܕܣܠܿܩܝܢ ܥܠܝܗܘܢ܂
34:22 [ai]ܗܐ ܐܢܐ ܦܩܿܕ ܐܢܐ ܐܡܿܪ ܡܪܝܐ܃ ܘܐܗܦܼܟ ܐܢܘܢ ܠܩܪܝܬܐ ܗܕܐ܃ ܘܢܬܟܬܿܫܘܢ ܥܠܝܗܿ܂ ܘܢܟܒܫܘܢܗܿ܂ ܘܢܘܩܕܘܢܗܿ ܒܢܘܪܐ܂ ܘܠܩܘܪ̈ܝܐ ܕܝܗܘܕܐܼ ܐܬܠ ܠܚܘܪܒܐ ܡܢ ܒܠܝ ܕܝܬܿܒ܀

next chapter