← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


35:01 [ai]ܦܬܓܡܐ ܕܗܘܼܐ ܥܠ ܐܪܡܝܐ ܡܢ ܩܕܡ ܡܪܝܐ܃ ܒܝ̈ܘܡܘܗܝ ܕܝܘܝܩܝܡ ܒܪ ܝܘܫܝܐ ܡܿܠܟܐ ܕܝܗܘܕܐ ܠܡܐܡܪ܂
35:02 [ai]ܙܠ ܠܒܝܬ ܒܢ̈ܝ ܪܟܒܿܝܡܼ ܘܡܠܠ ܥܡܗܘܢ܂ ܘܐܿܥܠ ܐܢܘܢ ܠܒܝܬܗ ܕܡܪܝܐ ܠܚܕܐ ܡܢ ܚ̈ܢܘܬܐ܃ ܘܐܫܩܐ ܐܢܘܢ ܚܡܪܐ܂
35:03 [ai]ܘܿܕܒܪܬ ܠܝܙܢܝܐ ܒܪ ܐܡܪܝܐ ܒܪ ܚܒܼܨܢܝܐ܃ ܘܠܐ̈ܚܘܗܝܼ ܘܠܟܠܗܘܢ ܒܢ̈ܘܗܝ܂ ܘܠܟܠܗ ܒܝܬ ܪܟܒܿܝܡ܂
35:04 [ai]ܘܐܿܥܠܬ ܐܢܘܢ ܠܒܝܬܗ ܕܡܪܝܐ܃ ܘܠܒܝܬܐ ܕܒܢ̈ܝ ܚܿܢܢ ܒܪ ܓܕܠܝܐ ܢܒܝܗ ܕܐܠܗܐ܃ ܕܩܪܝܒ ܒܝܬܗ ܠܪ̈ܘܪܒܢܐ܃ ܕܝܬܒܿܝܢ ܠܥܠ ܡܢ ܒܝܬܗ ܕܡܥܣܝܐ ܒܪ ܫܠܘܡ ܢܿܛܪ ܬܪܥܐ܂
35:05 [ai]ܘܣܿܡܬ ܩܕܡ ܒ̈ܢܝ ܒܝܬ ܪܟܒܿܝܡ܃ ܐ̈ܓܢܐ ܕܡ̈ܠܼܝܢ ܚܡܪܐܼ ܘܟܣ̈ܐ܂ ܘܐܿܡܪܬ ܠܗܘܢܼ ܐܫܼܬܘ ܚܡܪܐ܂
35:06 [ai]ܘܐܡܪܘܼ ܠܐ ܫܬܿܝܢܢ ܚܡܪܐ܂ ܡܛܠ ܕܝܘܢܕܒ ܒܪ ܪܟܒ ܐܒܘܢ ܦܩܿܕܢ ܘܐܡܼܪ ܠܢ܃ ܠܐ ܬܫܬܘܢ ܚܡܪܐ ܐܢܬܘܢ ܘܒܢܝܟܘܢ ܥܕܡܐ ܠܥܠܡ܂
35:07 [ai]ܘܒ̈ܬܐܼ ܠܐ ܬܒܢܼܘܢ ܠܟܘܢ܂ ܘܙܪܥܐܼ ܠܐ ܬܙܪܥܼܘܢ܂ ܘܟܪ̈ܡܐ ܠܐ ܬܨܼܒܘܢܼ ܘܠܐ ܢܗܘܐ ܠܟܘܢ܂ ܐܠܐ ܒܡܫ̈ܟܢܐ ܬܬܒܘܢܼ ܟܠܗܘܢ ܝܘܡ̈ܬܐ܂ ܡܛܠ ܕܬܚܘܢ ܝܘܡ̈ܬܐ ܣܓ̈ܝܐܐ܃ ܥܠ ܐ̈ܦܝ ܐܪܥܐ ܕܥܡܿܪܝܢ ܐܢܬܘܢ ܒܗܿ܂
35:08 [ai]ܘܫܡܼܥܢ ܦܘܩܕܢܗ ܕܝܘܢܕܒ ܒܪ ܪܟܿܒ ܐܒܘܢ ܟܠ ܕܦܩܿܕܢ܃ ܕܠܐ ܢܫܬܐ ܚܡܪܐ ܟܠܗܘܢ ܝܘܡ̈ܬܢ܂ ܠܐܿ ܚܢܼܢ ܘܠܐ ܢܫ̈ܝܢ܂ ܘܠܐ ܒ̈ܢܝܢܼ ܘܠܐ ܒܢ̈ܬܢ܂
35:09 [ai]ܘܠܐ ܢܒܢܼܐ ܒ̈ܬܐ ܠܡܘܬܒܢ܂ ܘܟܪ̈ܡܐ ܘܚ̈ܩܠܬܐ ܘܙܪܥܐ ܠܐ ܢܗܘܐ ܠܢ܂
35:10 [ai]ܘܝܬܒܢ ܒܡܫܼ̈ܟܢܐ ܘܫܡܼܥܼܢ ܘܥܒܕܢ ܟܠ ܕܦܩܿܕܢ ܝܘܢܕܒ ܒܪ ܪܟܿܒ ܐܒܘܢ܂
35:11 [ai]ܘܟܕ ܣܠܼܩ ܢܒܘܟܕܢܨܪ ܡܿܠܟܐ ܕܒܒܠ ܥܠ ܐܪܥܐ܃ ܐܡܪܢ ܕܢܥܘܠ ܠܐܘܪܫܠܡ܃ ܡܢ ܩܕܡ ܚܝܠܐ ܕܟ̈ܠܕܝܐ܂ ܘܡܢ ܩܕܡ ܚܝܠܐ ܕܐܕܘܡ܂ ܘܝܬܒܼܢ ܒܐܘܪܫܠܡ܂܀
35:12 [ai]ܘܗܘܼܐ ܦܬܓܡܗ ܕܡܪܝܐ ܥܠ ܐܪܡܝܐ ܠܡܐܡܪ܂
35:13 [ai]ܗܟܢܐ ܐܡܿܪ ܡܪܝܐ ܨܒܐܘܬ ܐܠܗܐ ܕܐܝܣܪܝܠ܂ ܙܠ ܐܡܼܪ ܠܓܒܪ̈ܐ ܕܝܗܘܕܐܼ ܘܠܥܡܘܪ̈ܝܗܿ ܕܐܘܪܫܠܡ܂ ܠܐ ܡܩܒܠܝܢ ܐܢܬܘܢ ܡܪܕܘܬܐ ܠܡܫܡܥ ܦܬܓܡ̈ܝ ܐܡܿܪ ܡܪܝܐ܃
35:14 [ai]ܫܼܪܘ ܦܬ̈ܓܡܘܗܝ ܕܝܘܢܕܒ ܒܪ ܪܟܒ܃ ܕܦܩܿܕ ܠܒܢ̈ܘܗܝ ܕܠܐ ܢܫܬܘܢ ܚܡܪܐ܂ ܘܠܐ ܐܫܬܝܘܼ ܥܕܡܐ ܠܝܘܡܢܐ܂ ܡܛܠ ܕܫܡܥܼܘ ܦܘܩܕܢܐ ܕܐܒܘܗܘܢ܂ ܘܐܢܐܼ ܐܿܡܪܬ ܠܟܘܢ܂ ܩܿܕܡܬ ܘܐܿܡܪܬ ܘܠܐ ܫܡܼܥܬܘܢ܂
35:15 [ai]ܘܫܿܕܪܬ ܠܘܬܟܘܢ ܠܟܠܗܘܢ ܥܒܼ̈ܕܝ ܢܒ̈ܝܐ܂ ܩܿܕܡܬܿ ܘܫܿܕܪܬܼ ܘܐܿܡܪܬ܂ ܬܘܒܘ ܓܒܪ ܡܢ ܐܘܪܚܗ ܒܝܫܬܐ ܘܐܛܐܒܘ ܥܿܒ̈ܕܝܟܘܢ܂ ܘܠܐ ܬܐܙܠܘܢ ܒܬܪ ܐ̈ܠܗܐ ܐܚܪ̈ܢܐ ܠܡܦܠܼܚ ܐܢܘܢ܂ ܘܬܒܘ ܒܐܪܥܐ ܕܝܿܗܒܬ ܠܟܘܢ ܘܠܐ̈ܒܗܝܟܘܢ܂ ܘܠܐ ܨܠܝܬܘܢ ܐܕܢܟܘܢ ܘܠܐ ܫܡܥܼܬܘܢܢܝ܂
35:16 [ai]ܗܐ ܐܫܪܘ ܒܢ̈ܘܗܝ ܕܝܘܢܕܒ ܒܪ ܪܟܒ܃ ܦܘܩܕܢܐ ܕܐܒܘܗܘܢ ܕܦܩܿܕ ܐܢܘܢ܂ ܘܥܡܐ ܗܢܐܼ ܠܐ ܫܡܥܘܢܝ܀
35:17 [ai]ܡܛܠ ܗܢܐܼ ܗܟܢܐ ܐܡܿܪ ܡܪܝܐ ܐܠܗܐ ܕܐܝܣܪܝܠ܂ ܗܐ ܡܝܿܬܐ ܐܢܐ ܥܠ ܝܗܘܕܐ ܘܥܠ ܟܠܗܘܢ ܥܡܘܪ̈ܝܗܿ ܕܐܘܪܫܠܡ܃ ܟܘܠܗܿ ܒܝܫܬܐ ܕܐܿܡܪܬ ܥܠܝܗܘܢ ܥܠ ܕܐܿܡܪܬ ܠܗܘܢ ܘܠܐ ܫܡܼܥܘ܃ ܘܩܿܪܝܬ ܠܗܘܢ ܘܠܐ ܥܢܐܘܢܝ܀
35:18 [ai]ܘܠܒܝܬ ܪܟܒܿܝܡܼ ܐܡܿܪ ܐܪܡܝܐ܂ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܚܠܦ ܕܫܡܼܥܬܘܢ ܦܘܩܕܢܐ ܕܝܘܢܕܒ ܐܒܘܟܘܢ܂ ܘܢܛܪܬܘܢ ܟܠܗܘܢ ܦܘܩ̈ܕܢܘܗܝ܃ ܘܥܒܕܬܘܢ ܟܠܡܕܡ ܕܦܩܿܕܟܘܢ܃
35:19 [ai]ܡܛܠ ܗܢܐܼ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܠܐ ܢܥܢܕ ܓܒܪܐ ܠܝܘܢܕܒ ܒܪ ܪܟܒ܃ ܕܩܐܿܡ ܩܕܡܝ ܟܠܗܘܢ ܝܘܡ̈ܬܐ܀

next chapter