← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


37:01 [ai]ܘܐܡܼܠܟ ܨܕܩܝܐ ܡܿܠܟܐ ܒܪ ܝܘܫܝܐ܃ ܚܠܦ ܝܘܟܢܝܐ ܒܪ ܝܘܝܩܝܡ܃ ܕܐܡܼܠܟ ܢܒܘܟܕܢܨܪ ܡܿܠܟܐ ܕܒܒܠ ܒܐܪܥܐ ܕܝܗܘܕܐ܂
37:02 [ai]ܘܠܐ ܫܡܼܥ ܗܼܘ ܘܥܒܼ̈ܕܘܗܝ܂ ܘܥܡܐ ܕܐܪܥܐ܃ ܦܬ̈ܓܡܘܗܝ ܕܡܪܝܐ ܕܐܡܼܪ ܒܝܕ ܐܪܡܝܐ ܢܒܝܐ܂
37:03 [ai]ܘܫܕܪ ܡܿܠܟܐ ܨܕܩܝܐ ܠܝܘܼܟܠ ܒܪ ܫܠܡܝܐ܃ ܘܠܨܦܢܝܐ ܒܪ ܡܥܣܝܐ ܟܗ̈ܢܐ܃ ܠܘܬ ܐܪܡܝܐ ܢܒܝܐ ܠܡܐܡܪ܂ ܨܠܐܿ ܥܠܝܢ ܩܕܡ ܡܪܝܐ ܐܠܗܟ܂
37:04 [ai]ܘܐܪܡܝܐ ܥܐܿܠ ܗܘܼܐ ܘܢܦܿܩ ܒܓܘ ܥܡܐ܃ ܘܠܐ ܐܪܡܝܘܗܝ ܒܝܬ ܐܣܝܪ̈ܐ܂
37:05 [ai]ܘܚܝܠܗ ܕܦܪܥܘܢ ܢܦܼܩ ܡܢ ܡܨܪܝܢ܂ ܘܫܡܥܼܘ ܟܠܕ̈ܝܐ ܕܟܪ̈ܝܟܝܢ ܠܐܘܪܫܠܡ ܫܡܥܗܘܢ܃ ܘܫܿܢܝܘ ܠܗܘܢ ܡܢ ܐܘܪܫܠܡ܂܀
37:06 [ai]ܘܗܘܼܐ ܦܬܓܡܗ ܕܡܪܝܐܼ ܥܠ ܐܪܡܝܐ ܢܒܝܐ ܠܡܐܡܪ܂
37:07 [ai]ܗܟܢܐ ܐܡܿܪ ܡܪܝܐ ܐܠܗܐ ܕܐܝܣܪܝܠ܂ ܗܟܢܐ ܬܐܡܪܘܢ ܠܡܿܠܟܐ ܕܝܗܘܕܐ ܕܫܕܪܟܘܢ ܠܘܬܝ ܕܬܒܥܘܢ ܡܢܝ܂ ܗܐ ܚܝܠܗ ܕܦܪܥܘܢ ܕܢܦܼܩ ܠܡܥܕܪܘܬܟܘܢ܃ ܗܿܦܟ ܠܐܪܥܗܼ ܠܡܨܪܝܢ܂
37:08 [ai]ܘܢܗܦܟܘܢ ܟ̈ܠܕܝܐܼ ܘܢܬܟܿܬܫܘܢ ܥܡ ܩܪܝܬܐ ܗܕܐ܂ ܘܢܟܒܫܘܢܗܿ ܘܢܘܩܕܘܢܗܿ ܒܢܘܪܐ܂
37:09 [ai]ܗܟܢܐ ܐܡܿܪ ܡܪܝܐ܂ ܠܐ ܬܣܒܼܪܘܢ ܒܢܦܫܟܘܢ ܘܬܐܡܪܘܢ ܕܐܙܿܠܝܢ ܡܢܢ ܟ̈ܠܕܝܐ܂ ܡܛܠ ܕܠܐ ܐܙܿܠܝܢ܂
37:10 [ai]ܡܛܠ ܕܐܢ ܬܚܼܪܒܘܢ ܟܠܗ ܚܝܠܐ ܕ̈ܟܠܕܝܐ ܕܡܬܿܟܬܫܝܢ ܥܡܟܘܢ܃ ܘܢܫܬܼܚܪܘܢ ܒܗܘܢ ܐܢܫܐ ܕܡܡܿܚܝܢ܃ ܓܒܪ ܡܢ ܡܫܟܼܢܗ ܢܩܘܼܡܘܢ܃ ܘܢܘܩܕܘܢܗܿ ܠܩܪܝܬܐ ܗܕܐ ܒܢܘܪܐ܂
37:11 [ai]ܘܫܿܢܝ ܠܗ ܚܝܠܐ ܕܟ̈ܠܕܝܐ ܡܢ ܐܘܪܫܠܡ ܡܢ ܩܕܡ ܚܝܠܗ ܕܦܪܥܘܢ܀
37:12 [ai]ܘܢܦܩ ܐܪܡܝܐ ܡܢ ܐܘܪܫܠܡ ܠܡܐܙܠ ܠܐܪܥܐ ܕܒܢܝܡܝܢ܃ ܠܡܿܦܠܓܘ ܬܡܿܢ ܡܢܿܬܐ ܥܡ ܥܡܐ܂
37:13 [ai]ܘܟܕ ܩܐܿܡ ܗܘܐ ܒܬܪܥܐ ܕܒܢܝܡܝܢ܃ ܐܝܬ ܗܘܐ ܬܡܿܢ ܓܒܪܐ ܦܩܘܕܐ܃ ܘܫܡܗܼ ܢܪܝܐ ܒܪ ܫܠܡܝܐ ܒܪ ܚܢܢܝܐ܂ ܘܐܚܕܗ ܠܐܪܡܝܐ ܢܒܝܐܼ ܘܐܿܡܼܪ ܠܗ܂ ܠܘܬ ܟ̈ܠܕܝܐܿ ܥܿܪܩ ܐܢܬ܂
37:14 [ai]ܘܐܡܼܪ ܠܗ ܐܪܡܝܐܼ ܡܕܿܓܠ ܐܢܬ܂ ܠܐܿ ܥܪܩܿ ܐܢܐ ܠܘܬ ܟ̈ܠܕܝܐ܂ ܘܠܐ ܫܡܥܗ܂ ܘܐܚܕܗ ܢܪܝܐ ܠܐܪܡܝܐܼ ܘܐܝܬܝܗܿ ܠܘܬ ܪ̈ܘܪܒܢܐ܂
37:15 [ai]ܘܪܓܼܙܘ ܪ̈ܘܪܒܢܐ ܥܠ ܐܪܡܝܐܼ ܘܢܿܓܕܘܗܝ܂ ܘܐܪܡܝܘܗܝ ܒܝܬ ܐܣܝܪ̈ܐ ܒܝܬ ܝܘܢܬܢ ܣܿܦܪܐ܂ ܡܛܠܼ ܕܠܗ ܥܒܼܕܘ ܪܒ ܐܣܝܪ̈ܐ܂
37:16 [ai]ܘܐܪܡܝܘܗܝ ܠܐܪܡܝܐ ܡܢ ܟܘܬ ܓܘܒܐܼ ܠܓܘܒܐ܂ ܘܗܘܼܐ ܬܡܿܢ ܐܪܡܝܐ ܝܘܡ̈ܬܐ ܣ̈ܓܝܐܐ܂
37:17 [ai]ܘܫܕܪ ܡܿܠܟܐ ܨܕܩܝܐ ܘܐܣܩܗ܂ ܘܫܐܠܗ ܡܿܠܟܐ ܒܒܝܬܐ ܡܛܫܝܼܐܝܬܼ ܘܐܡܼܪ ܠܗ܂ ܢܦܼܩ ܦܬܓܡܐ ܡܢ ܩܕܡ ܡܪܝܐ܃ ܘܐܡܼܪ ܐܪܡܝܐ ܢܦܼܩ܂ ܘܐܡܼܪ ܡܿܠܟܐ܃ ܐܝܿܟܢܐ ܢܦܼܩ܂ ܘܐܡܼܪ ܕܒܐ̈ܝܕܘܗܝ ܕܡܿܠܟܐ ܕܒܒܠ ܬܫܬܼܠܡ܂
37:18 [ai]ܘܐܡܼܪ ܐܪܡܝܐ ܠܡܿܠܟܐ ܨܕܩܝܐ܂ ܡܢܐ ܚܿܛܝܬ ܠܟ ܘܠܥܒܼ̈ܕܝܟ ܘܠܥܡܐ ܗܢܐ܃ ܕܐܪܡܝܬܘܢܢܝ ܒܝܬ ܐܣܝܪ̈ܐ܂
37:19 [ai]ܘܐܝܿܟܐ ܐܢܘܢ ܢܒܝܝ̈ܟܘܢ ܕܡܬܢܿܒܝܢ ܗܘܘ ܠܟܘܢ ܘܐܡܿܪܝܢ܃ ܕܠܐ ܐܬܐ ܡܿܠܟܐ ܕܒܒܠ ܥܠܝܟܘܢ ܘܥܠ ܐܪܥܐ ܗܕܐ܃
37:20 [ai]ܗܫܐܼ ܫܡܥܝܢܝ ܡܪܝ ܡܿܠܟܐ܂ ܘܬܿܦܠ ܒܥܘܬܝ ܩܕܡܝܟ܂ ܘܠܐ ܬܗܼܦܟܢܝ ܠܒܝܬ ܝܘܢܬܢ ܣܿܦܪܐܼ ܕܠܐ ܐܡܘܬ ܬܡܿܢ܂
37:21 [ai]ܘܦܩܼܕ ܡܿܠܟܐ ܨܕܩܝܐ܃ ܘܫܒܩܘܗܝ ܠܐܪܡܝܐ ܢܒܝܐ ܒܕܪܬܐ ܕܒܝܬ ܐܣܝܪ̈ܐ܂ ܘܝܗܒܝܢ ܠܗ ܓܪܝܨܬܐ ܕܠܚܡܐ ܒܝܘܡܐ ܡܢ ܫܘܩܐ ܕܢܚܬܘܡܐ܃ ܥܕܡܐ ܕܓܡܼܪ ܟܠܗ ܠܚܡܐ ܡܢ ܩܪܝܬܐ܃ ܘܝܬܼܒ ܐܪܡܝܐܼ ܒܕܪܬܐ ܕܒܝܬ ܐܣܝܪ̈ܐ܀܂

next chapter