← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


39:01 [ai]ܒܫܢܬܐ ܕܬܫܥ ܕܨܕܩܝܐ ܡܿܠܟܐ ܕܝܗܘܕܐ܃ ܒܝܪܚܐ ܕܥܣܪܐ܃ ܐܬܼܐ ܢܒܘܟܕܢܨܪ ܡܿܠܟܐ ܕܒܒܠ ܗܼܘ ܘܟܠܗ ܚܝܠܗ ܠܐܘܪܫܠܡ ܘܫܪܘ ܥܠܝܗܿ܂
39:02 [ai]ܘܒܫܢܬ ܚܕܥܣܪܐ ܕܡܿܠܟܐ ܨܕܩܝܐ܃ ܒܝܪܚܐ ܚܡܝܫܝܐ ܒܬܫܥܬܐ ܒܗ ܒܝܪܚܐ܃ ܐܬܬܪܥܬܿ ܩܪܝܬܐ܂
39:03 [ai]ܘܐܬܘ ܟܠܗܘܢ ܪ̈ܘܪܒܢܐ ܕܡܿܠܟܐ ܕܒܒܠ܃ ܘܝܬܼܒܘ ܒܬܪܥܐ ܡܨܥܝܐ܂ ܢܪܓܠ ܫܿܪܐܨܪ ܘܣܡܓܕܢܒܘ܂ ܘܣܪܣܟܝܡ ܪܒ ܡܗܝ̈ܡܢܐ܂ ܘܢܪܓܠ ܫܪܐܨܪ ܪܒܡܓ܂ ܘܟܠܗܘܢ ܪ̈ܘܪܒܢܐ ܕܡܿܠܟܐ ܕܒܒܠ܂
39:04 [ai]ܘܟܕ ܚܼܙܐ ܐܢܘܢ ܨܕܩܝܐ ܡܿܠܟܐ ܕܝܗܘܕܐ܃ ܘܟܠܗܘܢ ܓܒܪ̈ܐ ܩܪ̈ܒܬܢܐ܃ ܥܪܩܘܼ ܘܢܦܩܼܘ ܡܢ ܩܪܝܬܐ ܒܠܠܝܐ܃ ܒܐܘܪܚܐ ܕܓܢܬܐ ܕܡܿܠܟܐ ܒܬܪܥܐ ܕܒܝܬ ܫܘܪ̈ܐ܂ ܘܢܦܩܘܼ ܒܐܘܪܚܐ ܕܦܩܥܬܐ܂
39:05 [ai]ܘܪܕܦܘ ܚܝܠܐ ܕܟ̈ܠܕܝܐ ܒܬܪܗܘܢ܂ ܘܐܕܪܟܘܗܝ ܠܨܕܩܝܐܼ ܒܦܩܥܬܐ ܕܐܝܪܝܚܘ܂ ܘܟܘܠܗ ܚܝܠܗܼ ܐܬܒܿܕܪ ܡܢܗ܂ ܘܕܒܼܪܘܗܝܼ ܘܐܣܩܘܗܝ ܠܘܬ ܢܒܘܟܕܢܨܪ ܡܿܠܟܐ ܕܒܒܠ ܠܕܒܠܬ ܒܐܪܥܐ ܕܚܡܬ܂ ܘܡܠܠ ܥܡܗ ܕܝܢܼܐ܂
39:06 [ai]ܘܢܟܿܣ ܡܿܠܟܐ ܕܒܒܠ ܠܒ̈ܢܘܗܝ ܕܨܕܩܝܐ ܒܕܒܠܬ ܠܥܢ̈ܘܗܝ܂ ܘܠܟܠܗܘܢ ܚܐܪ̈ܐ ܕܝܗܘܕܐܼ ܢܟܿܣ ܡܿܠܟܐ ܕܒܒܠ܂
39:07 [ai]ܘܥܝܢ̈ܘܗܝ ܕܨܕܩܝܐ ܥܘܿܪ܂ ܘܐܣܪܗ ܒܫܫ̈ܠܬܐ ܠܡܘܒܿܠܘܬܗ ܠܒܒܠ܂
39:08 [ai]ܘܠܒܝܬ ܡܿܠܟܐ ܘܠܒ̈ܬܐ ܕܥܡܐ܃ ܐܘܩܕܘ ܟ̈ܠܕܝܐ ܒܢܘܪܐ܂ ܘܠܫܘܪܐ ܕܐܘܪܫܠܡ ܟܕ ܚܕܪܐܼ ‍{‍ܥܪܩܼܘ‍}‍‍<‍ܥܩܪܘ‍>‍܂
39:09 [ai]ܘܫܪܟܗ ܕܥܡܐ ܕܐܫܬܚܼܪܘ ܒܩܪܝܬܐ܃ ܘܐܢܫܐ ܕܥܪܩܼܘ ܠܘܬܗ܃ ܘܫܪܟܗ ܕܥܡܐ ܕܐܫܬܚܼܪܘ܂ ܫܒܼܐ ܢܒܘܙܪܕܢ ܪܒ ܕܚ̈ܫܼܐܼ ܘܐܘܒܠ ܐܢܘܢ ܠܒܒܠ܂
39:10 [ai]ܘܡܢ ܥܡܐ ܡܣ̈ܟܢܐ ܕܠܝܬ ܠܗܘܢ ܡܕܡ܃ ܫܒܼܩ ܢܒܘܙܪܕܢ ܪܒ ܕܚ̈ܫܼܐ ܒܐܪܥܐ ܕܝܗܘܕܐ܂ ܘܝܗܒ ܠܗܘܢ ܟܪ̈ܡܐܼ ܘܦܘܠܚܢܐ ܒܝܘܡܐ ܗܿܘ܀
39:11 [ai]ܘܦܩܿܕ ܢܒܘܟܕܢܨܪ ܡܿܠܟܐ ܕܒܒܠ ܥܠ ܐܪܡܝܐ܃ ܠܢܒܘܙܪܕܢ ܪܒ ܕܚܫ̈ܐܼ ܘܐܡܼܪ ܠܗ܂
39:12 [ai]ܕܒܪܝܗܝ ܠܐܪܡܝܐܼ ܘܥܝܢ̈ܝܟ ܢܗ̈ܘܝܿܢ ܥܠܘܗܝ܂ ܘܠܐ ܬܥܒܕ ܠܗ ܡܕܡ ܕܒܝܫ܂ ܘܟܘܠ ܡܕܡ ܕܐܡܿܪ ܠܟܼ ܥܒܿܕ ܠܗ܂
39:13 [ai]ܘܫܕܪ ܢܒܘܙܪܕܢ ܪܒ ܕܚܫ̈ܐ܃ ܘܢܒܘܫܙܒܢ ܪܒ ܡܗ̈ܝܡܢܐ܃ ܘܢܪܓܠ ܫܪܐܨܪ ܪܒܡܓ܂ ܘܟܠܗܘܢ ܪ̈ܘܪܒܢܐ ܕܡܿܠܟܐ ܕܒܒܠ܂
39:14 [ai]ܫܕܪܘ ܕܒܼܪܘܗܝ ܠܐܪܡܝܐ ܡܢ ܕܪܬܐ ܕܒܝܬ ܐܣܝܪ̈ܐ܃ ܘܐܫܠܡܘܗܝ ܠܓܕܠܝܐ ܒܪ ܐܚܝܩܡ ܒܪ ܫܿܦܢ ܠܡܦܩܿܘܬܗ ܠܒܝܬܗ܂ ܘܝܬܼܒܼ ܒܓܘ ܥܡܐ܀
39:15 [ai]ܘܥܠ ܐܪܡܝܐܼ ܗܘܼܐ ܦܬܓܡܗ ܕܡܪܝܐ܃ ܟܕ ܟܠܼܐ ܗܘܼܐ ܒܕܪܬ ܡܛܪܬܐ܂
39:16 [ai]ܙܠ ܘܐܡܼܪ ܠܥܒܕܡܼܠܼܟ ܟܘܫܝܐ܃ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܗܐ ܡܝܿܬܐ ܐܢܐ ܦܬ̈ܓܡܐ ܥܠ ܩܪܝܬܐ ܗܕܐ܃ ܠܒܝܫܬܐ ܘܠܐ ܠܛܒܬܐ܂ ܘܢܗܘܘܢܼ ܩܕܡܝܟ ܒܝܘܡܐ ܗܿܘ܂
39:17 [ai]ܘܐܿܦܨܝܟܿ ܒܝܘܡܐ ܗܿܘ ܐܡܿܪ ܡܪܝܐ܂ ܘܠܐ ܬܫܬܼܠܡ ܒܐܝܼܕܐ ܕܓܒܪ̈ܐ ܕܕܚܿܠ ܐܢܬ ܡܢܗܘܢ܂
39:18 [ai]ܘܐܿܦܨܝܟܿ ܘܒܚܪܒܐܼ ܠܐ ܬܦܠ܂ ܘܬܫܘܙܒ ܢܦܫܟ܂ ܥܠ ܕܐܬܬܼܟܠܬ ܥܠܝ ܐܡܿܪ ܡܪܝܐ܀

next chapter