← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


40:01 [ai]ܦܬܓܡܐ ܕܗܘܼܐ ܥܠ ܐܪܡܝܐ ܡܢ ܩܕܡ ܡܪܝܐ܃ ܡܢ ܒܬܪ ܕܫܕܪܗ ܢܒܘܙܪܕܢ ܪܒ ܕܚܫܼ̈ܐ ܡܢ ܪܡܬܐ܂ ܟܕ ܕܒܼܪܗ ܟܕ ܐܣܝܪ ܒܫܫ̈ܠܬܐ܃ ܒܓܘ ܟܠܗܿ ܫܒܝܬܐ ܕܐܘܪܫܠܡ ܘܕܝܗܘܕܐ ܕܐܫܬܒܝܘ ܠܒܒܠ܂
40:02 [ai]ܘܕܒܼܪܗ ܪܒ ܕܚܫܼ̈ܐ ܠܐܪܡܝܐܼ ܘܐܡܼܪ ܠܗ܂ ܡܪܝܐ ܐܠܗܟ ܐܡܼܪ ܒܝܫܬܐ ܥܠ ܐܬܪܐ ܗܢܐܼ
40:03 [ai]ܘܐܝܿܬܝ܂܂ ܘܥܒܼܕ ܡܪܝܐܼ ܐܝܟ ܕܐܡܼܪ ܥܠ ܕܚܛܝܬܘܢ ܠܡܪܝܐ ܘܠܐ ܫܡܼܥܬܘܢ ܒܩܠܗ܃ ܗܘܼܐ ܠܟܘܢ ܦܬܓܡܐ ܗܢܐ܂
40:04 [ai]ܠܟܼ ܕܝܢ ܗܐ ܫܪܝܬܟ ܝܘܡܢܐ ܡܢ ܫܫ̈ܠܬܐ ܕܒܐ̈ܝܕܝܟ܂ ܐܢ ܨܒܿܐ ܐܢܬ ܠܡܐܬܐ ܥܡܝ ܠܒܒܠܼ ܬܐ܂ ܘܬܗܘܐ ܥܝܢܝ ܥܠܝܟ܂ ܘܐܠܐ ܨܒܝܬ ܠܡܐܬܐ ܥܡܝ ܠܒܒܠܼ ܦܘܫ܂ ܗܐ ܟܠܗܿ ܐܪܥܐܼ ܩܕܡܝܟ܂ ܟܪ ܕܛܒ ܘܟܪ ܕܫܦܝܪ ܒܥܝܢ̈ܝܟ ܠܡܐܙܠ ܠܬܡܿܢ ܙܠ܂
40:05 [ai]ܘܐܡܼܪ ܠܗ܂ ܐܢ ܦܐܿܫ ܐܢܬ܃ ܬܒܼ ܠܘܬ ܓܕܠܝܐ ܒܪ ܐܚܝܩܡ ܒܪ ܫܿܦܢ ܒܓܘ ܥܡܐ܃ ܗܿܘ ܕܐܫܠܛܗ ܡܿܠܟܐ ܕܒܒܠ ܒܩܘܪ̈ܝܐ ܕܝܗܘܕܐ܂ ܐܘ ܟܪ ܕܫܦܝܪ ܒܥܝܢ̈ܝܟܿ ܠܡܐܙܠܼ ܙܠ܂ ܘܝܗܼܒ ܠܗ ܢܒܘܙܪܕܢ ܪܒ ܕܚܫܼ̈ܐ ܡܘܗ̈ܒܬܐ ܒܐܘܪܚܐܼ ܘܫܪܝܗܝ܂
40:06 [ai]ܘܐܬܼܐ ܐܪܡܝܐ ܠܘܬ ܓܕܠܝܐ ܒܪ ܐܚܝܩܡ ܒܪ ܫܿܦܢ ܠܡܨܦܝܐ܂ ܘܝܬܼܒ ܠܘܬܗ ܒܓܘ ܥܡܐ ܕܐܫܬܚܪܘ ܒܐܪܥܐ܀܂
40:07 [ai]ܘܫܡܥܼܘ ܟܠ ܪ̈ܒܝ ܚ̈ܝܠܐ ܕܒܩܘܪ̈ܝܐ ܗܼܢܘܢ ܘܓܒܪ̈ܐ ܕܥܡܗܘܢ܃ ܕܐܫܠܛ ܡܿܠܟܐ ܕܒܒܠ ܠܓܕܠܝܐ ܒܪ ܐܚܝܩܡ ܒܐܪܥܐ܃ ܘܕܐܫܠܡ ܠܗ ܓܒܪ̈ܐ ܘܢܫ̈ܐ ܘ̈ܛܠܝܐ܃ ܘܡܢ ܡܣ̈ܟܢܐ ܕܐܪܥܐ ܐܝܠܝܢ ܕܠܐ ܐܫܬܼܒܝܘ ܠܒܒܠ܃
40:08 [ai]ܘܐܬܼܘ ܠܘܬ ܓܕܠܝܐ ܠܡܨܦܝܐ܂ ܐܝܫܡܥܐܝܠ ܒܪ ܢܬܢܝܐ܂ ܘܝܘܚܢܼܢ ܘܝܘܢܬܢ ܒܢ̈ܝ ܩܘܪܚ܂ ܘܫܼܪܝܐ ܒܪ ܬܢܚܿܡܬ ܘܒܢ̈ܝ ܥܝ̈ܦܝ ܕܡܢ ܢܛܘܦܬ܃ ܘܝܙܢܝܐ ܒܪ ܡܥܟܬ܂ ܗܼܢܘܢܼ ܘܓܒܪ̈ܝܗܘܢ܂
40:09 [ai]ܘܐܝܡܼܐ ܠܗܘܢ ܓܕܠܝܐ ܒܪ ܐܚܝܩܡ܂ ܒܪ ܫܿܦܢ ܘܠܓܒܪ̈ܐ ܕܥܡܗܘܢܼ ܘܐܡܼܪ ܠܐ ܬܕܚܼܠܘܢ ܠܡܦܼܠܚ ܠܟ̈ܠܕܝܐ ܬܒܘ ܒܐܪܥܐ܃ ܘܦܠܘܚܘ ܠܡܿܠܟܐ ܕܒܒܠ܃ ܘܢܛܐܼܒ ܠܟܘܢ܂
40:10 [ai]ܘܐܢܐܼ ܗܐ ܝܬܒܿ ܐܢܐ ܒܡܨܦܝܐ܃ ܠܡܩܡ ܩܕܡ ܟ̈ܠܕܝܐ ܕܐܬܿܝܢ ܥܠܝܢ܂ ܘܐܢܬܘܢ ܚܡܘܠܘ ܥܒܘܪܐ ܘܚܡܪܐ ܘܡܫܚܐ܃ ܘܐܒܐ ܕܩܝܛܐܼ ܘܐܪܡܘ ܒܡ̈ܐܢܝܟܘܢ܂ ܘܬܒܘ ܒܩܘܪ̈ܝܟܘܢ ܕܐܚܕܬܘܢ܂
40:11 [ai]ܐܦ ܟܠܗܘܢ ܝܗ̈ܘܕܝܐ ܕܐܝܬ ܒܐܕܘܡ ܘܒܡܘܐܒ܃ ܘܒܒ̈ܢܝ ܥܡܘܢ ܘܒܟܠܗܝܢ ܐܪ̈ܥܬܐ܃ ܫܡܥܘ ܕܫܒܼܩ ܡܿܠܟܐ ܕܒܒܠ ܫܪܟܢܐ ܠܝܗ̈ܘܕܝܐ܃ ܘܕܐܫܠܛ ܥܠܝܗܘܢ ܠܓܕܠܝܐ ܒܪ ܐܚܝܩܡ ܒܪ ܫܿܦܢ܃
40:12 [ai]ܘܗܦܼܟܘ ܟܠܗܘܢ ܝܗ̈ܘܕܝܐ ܡܢ ܟܠܗܘܢ ܐܬܪ̈ܘܬܐ ܕܐܬܿܒܕܪܘ ܠܬܡܿܢ܃ ܘܐܬܘ ܠܐܪܥܐ ܕܝܗܘܕܐ ܠܘܬ ܓܕܠܝܐ ܠܡܨܦܝܐ܂ ܘܚܡܠܘ ܚܡܪܐ ܘܥ̈ܠܠܬܐ ܕܩܝܛܐ ܣܘܓܐܐܼ ܕܛܒ܂
40:13 [ai]ܘܝܘܚܢܢ ܒܪ ܩܘܪܚ ܘܟܠܗܘܢ ܪ̈ܒܝ ܚܝ̈ܠܐ ܕܒܩܘܪ̈ܝܐ܃ ܐܬܼܘ ܠܘܬ ܓܕܠܝܐ ܠܡܨܦܼܝܐܼ
40:14 [ai]ܘܐܡܼܪܘ ܠܗ܂ ܠܐ ܝܕܥܿ ܐܢܬ ܕܒܠܥܝܣ ܡܿܠܟܐ ܕܒܢ̈ܝ ܥܡܘܢ܃ ܫܕܪ ܠܐܝܫܡܥܝܠ ܒܪ ܢܬܢܝܐ ܠܡܩܛܠܟ܃ ܘܠܐ ܗܝܡܢ ܐܢܘܢ ܓܕܠܝܐ ܒܪ ܐܚܝܩܡ܂
40:15 [ai]ܘܝܘܚܢܢ ܒܪ ܩܘܪܚ܃ ܐܡܼܪ ܠܓܕܠܝܐ ܡܛܫܼܝܐܝܬ ܒܡܨܦܝܐ܂ ܐܿܙܠ ܐܩܛܠܝܘܗܝ ܠܐܝܫܡܥܝܠ ܒܪ ܢܬܢܝܐܿ ܘܐܢܫܼ ܠܐ ܢܕܥ܂ ܕܠܡܐ ܢܩܛܠܟ܃ ܘܢܬܒܿܕܪܘܢ ܟܠܗܘܢ ܕܒܝܬ ܝܗܘܕܐ ܕܡܬܿܟܢܫܝܢ ܠܘܬܟ܃ ܘܢܐܒܕ ܫܪܟܢܐ ܕܝܗ̈ܘܕܝܐ܂
40:16 [ai]ܘܐܡܼܪ ܓܕܠܝܐ ܒܪ ܐܚܝܩܡ ܠܝܘܚܢܢ ܒܪ ܩܘܪܚ܂ ܠܐ ܬܥܒܕ ܦܬܓܡܐ ܗܢܐ܂ ܡܛܠ ܕܕܓܠܘܬܐ ܡܠܠܬ ܥܠ ܐܝܫܡܥܝܠ܀

next chapter