← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


44:01 [ai]ܦܬܓܡܐ ܕܗܘܼܐ ܥܠ ܐܪܡܝܐ ܡܢ ܩܕܡ ܡܪܝܐ܃ ܕܢܬܢܒܐ ܥܠ ܟܠܗܘܢ ܝܗ̈ܘܕܝܐ ܕܝܬܒܿܝܢ ܒܐܪܥܐ ܕܡܨܪܝܢ܃ ܘܕܝܬܒܿܝܢ ܒܡܓܕܘܠ ܘܒܬܿܚܦܝܣ܃ ܘܒܡܦܣ ܘܒܐܪܥܐ ܕܦܬܪܘܣ܂
44:02 [ai]ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܐܢܬܘܢ ܚܙܝܬܘܢ ܟܠܗܿ ܒܝܫܬܐ ܕܐܝܬܝܬ ܥܠ ܐܘܪܫܠܡ܃ ܘܥܠ ܟܘܠܗܝܢ ܩܘܪ̈ܝܐ ܕܝܗܘܕܐ܂ ܘܗܢܝܢ ܚܼܪ̈ܒܢ ܝܘܡܢܐ܃ ܘܠܝܬ ܒܗܝܢ ܐܢܫ ܕܝܬܿܒ܂
44:03 [ai]ܡܛܠ ܟܠܗܿ ܒܝܫܼܬܐ ܕܥܒܼܕܘ ܘܐܪܓܙܘܢܝ܃ ܘܐܙܠܘ ܘܣܡܘ ܒܣ̈ܡܐ ܠܐ̈ܠܗܐ ܐܚܪ̈ܢܐ܃ ܐܝܠܝܢ ܕܠܐ ܝܕܥܼܘ ܐܢܘܢ ܗܼܢܘܢ ܘܐ̈ܒܗܝܗܘܢ܂
44:04 [ai]ܘܫܿܕܪܬ ܠܘܬܗܘܢܼ ܠܟܠܗܘܢ ܥܒܼ̈ܕܝ ܢܒ̈ܝܐ܂ ܩܿܕܡܬܿ ܘܫܿܕܪܬܼ ܘܐܿܡܪܬ܂ ܠܐ ܬܥܒܼܕܘܢ ܛܢܦܘܬܐ ܗܕܐ ܕܣܿܢܝܬ܂
44:05 [ai]ܘܠܐ ܫܡܼܥܘ ܘܠܐ ܨܠܘ ܐܕܢܗܘܢ ܕܢܗܼܦܟܘܢ ܡܢ ܒܝܫ̈ܬܗܘܢ܃ ܕܠܐ ܢܣܝܼܡܘܢ ܒܣ̈ܡܐ ܠܐ̈ܠܗܐ ܐܚܪ̈ܢܐ܂
44:06 [ai]ܘܐܬܬܢܝܚ ܪܘܓܙܝܼ ܘܚܡܬܝ܂ ܘܐܚܼܕܬ ܢܘܪܐܿ ܒܩܘܪ̈ܝܐ ܕܝܗܘܕܐܼ ܘܒܫ̈ܘܩܝܗܿ ܕܐܘܪܫܠܡ܂ ܘܗ̈ܘܝ ܠܚܘܪܒܐ ܘܠܬܡܗܐܼ ܐܝܟ ܕܝܘܡܢܐ܂
44:07 [ai]ܘܗܫܐܼ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܠܡܢܐ ܥܒܕܝܢ ܐܢܬܘܢ ܒܝܫܬܐ ܪܒܬܐ ܥܠ ܢܦܫ̈ܬܟܘܢ܂ ܕܬܘܒܕܘܢ ܡܢܟܘܢ ܓܒܪ̈ܐ ܘܢܫ̈ܐ܃ ܘܥ̈ܠܝܡܐ ܘܝ̈ܠܘܕܐ ܡܢ ܓܘ ܝܗܘܕܐ܃ ܕܠܐ ܬܫܒܩܘܢ ܠܟܘܢ ܚܪܬܐ܂
44:08 [ai]ܡܛܠ ܕܐܪܓܙܬܘܢܢܝ ܒܥܿܒܕ ܐ̈ܝܕܝܟܘܢ܃ ܘܣܡܼܬܘܢ ܒܣ̈ܡܐ ܠܐ̈ܠܗܐ ܐܚܪ̈ܢܐ܃ ܒܐܪܥܐ ܕܡܨܪܝܢ ܕܥܠܼܬܘܢ ܠܡܥܡܪ ܬܡܿܢ܂ ܕܐܘܒܕܟܘܢ ܘܬܗܼܘܘܢ ܠܠܘܛܬܐ ܘܠܚܣܕܐܼ ܒܟܠܗܘܢ ܥܡ̈ܡܐ ܕܐܪܥܐ܂
44:09 [ai]ܠܡܐ ܛܥܝܼܬܘܢ ܒܝܫܼܬܐ ܕܐ̈ܒܗܝܟܘܢ܃ ܘܒܝܫܬܐ ܕܡ̈ܠܟܐ ܕܝܗܘܕܐܿ ܘܒܝܫܼܬܐ ܕܢܫ̈ܝܗܘܢ܃ ܕܥܒܕܘ ܒܐܪܥܐ ܕܝܗܘܕܐ ܘܒܫ̈ܘܩܝܗ ܕܐܘܪܫܠܡ܃
44:10 [ai]ܘܠܐ ܐܬܕܟܝܘ ܥܕܡܐ ܠܝܘܡܢܐ܂ ܘܠܐ ܕܚܠܘܼ ܘܠܐ ܦܠܚܘܢܝ܂ ܘܠܐ ܗܠܟܘ ܒܢܡܘܣܝ ܘܒܩܝܡܝ ܕܝܿܗܒܬ ܠܗܘܢ ܘܠܐ̈ܒܗܝܗܘܢ܂
44:11 [ai]ܡܛܘܠ ܗܢܐܼ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܗܐ ܣܐܿܡ ܐܢܐ ܐ̈ܦܝ ܒܟܘܢܼ ܠܒܝܫܬܐ܂ ܘܠܡܘܒܕܘܼ ܠܟܠܗܘܢ ܕܒܝܬ ܝܗܘܕܐ܂
44:12 [ai]ܘܐܬܼܒܪ ܫܪܟܐ ܕܝܗܘܕܐ܃ ܕܣܡܼܘ ܐ̈ܦܝܗܘܢ ܠܡܥܠ ܠܡܨܪܝܢ ܠܡܥܡܼܪ ܬܡܿܢ܂ ܢܣܘܦܘܢ ܟܠܗܘܢܼ ܒܐܪܥܐ ܕܡܨܪܝܢ܂ ܘܢܡܘܬܘܢ ܒܚܪܒܐܿ ܘܒܟܦܢܐܼ ܘܒܡܘܬܢܐ܂ ܘܢܗܘܘܢ ܠܡ̈ܘܡܬܐܿ ܘܠܬܡܗܐܿ ܘܠܠܘܛܬܐܼ ܘܠܚܣܕܐ܂
44:13 [ai]ܘܐܦܩܘܕ ܥܠ ܕܝܬܒܿܝܢ ܒܐܪܥܐ ܕܡܨܪܝܢ܃ ܐܝܟ ܕܦܩܿܕܬ ܥܠ ܐܘܪܫܠܡ܃ ܒܚܪܒܐ ܘܒܟܦܢܐ ܘܒܡܘܬܢܐ܂
44:14 [ai]ܘܠܐ ܢܗܘܐ ܠܗܘܢ ܦܠܝܿܛܐ ܘܣܪܝܕܐ܃ ܠܫܪܟܐ ܕܝܗܘܕܐ ܕܥܐܿܠܝܢ ܠܡܥܡܪ ܬܡܿܢ ܒܐܪܥܐ ܕܡܨܪܝܢ܂ ܘܠܡܗܼܦܟ ܠܐܪܥܐ ܕܝܗܘܕܐ ܕܗܼܢܘܢ ܣܒܿܪܝܢ ܒܢܦܫܗܘܢ ܠܡܗܼܦܟ ܠܬܡܿܢ܃ ܠܐܿ ܢܗܿܦܟܘܿܢ ܐܠܐܼ ܐܢ ܙܥܘܪ̈ܐ܀܂
44:15 [ai]ܘܥܢܘܼ ܘܐܡܼܪܘ ܠܐܪܡܝܐ܃ ܟܠ ܓܒܪ̈ܐ ܕܝܕܥܿܝܢ ܗܘܘ ܕܣ̈ܝܡܢ ܗ̈ܘܝ ܢܫ̈ܝܗܘܢ ܒܣ̈ܡܐ ܠܐ̈ܠܗܐ ܐܚܪ̈ܢܐ܃ ܘܟܠܗܝܢ ܢܫ̈ܐ ܕܩܝ̈ܡܢ ܟܢܫܐ ܪܒܐ܃ ܘܟܠܗ ܥܡܐ ܕܝܬܒܿܝܢ ܒܐܪܥܐ ܕܡܨܪܝܢ ܘܒܦܬܪܘܣ ܘܐܡܼܪܘ ܠܗ܂
44:16 [ai]ܦܬܓܡܐ ܕܐܡܼܪܬ ܠܢ ܒܫܡ ܡܪܝܐܼ ܠܐ ܫܡܿܥܝܢ ܚܢܢ ܠܟ܂
44:17 [ai]ܐܠܐ ܥܒܿܕܝܢܼܢ ܟܘܠ ܦܬܓܡܐ ܕܢܦܼܩ ܡܢ ܦܘܡܢ܂ ܠܡܣܡ ܒܣ̈ܡܐ ܠܦܘܠܚܢ ܫܡܝܐ܃ ܘܠܡܢܿܩܝܘ ܠܗܿ ܢܘܩ̈ܝܐ܂ ܐܝܟ ܕܥܒܕܢ ܚܢܢ ܘܐ̈ܒܗܝܢ܂ ܘܡ̈ܠܟܝܢ ܘܪ̈ܘܪܒܢܝܢ܃ ܒܩܘܪ̈ܝܐ ܕܝܗܘܕܐ ܘܒܫ̈ܘܩܝܗܿ ܕܐܘܪܫܠܡ܂ ܘܣܒܥܝܢ ܗ̈ܘܝܢ ܠܚܡܐܼ ܘܛܒ ܗܘܐ ܠܢ܂ ܘܒܝܫܬܐܼ ܠܐ ܚܼܙܝܢ܂
44:18 [ai]ܘܗܐ ܡܢ ܕܦܫܢ ܡܢ ܕܠܡܣܡ ܒܣ̈ܡܐ ܠܦܘܠܚܢ ܫܡܝܐ܃ ܘܠܡܢܿܩܝܘ ܠܗܿ ܢܘܩ̈ܝܐ܃ ܚܣܼܪ ܠܢ ܟܠ ܡܕܡ܂ ܘܒܚܪܒܐܼ ܘܒܟܦܢܐ ܣܦܼܢ܂ ܘܥܢ̈ܝ ܟܠܗܝܢ ܢܫ̈ܐܼ ܘܐܡܪ̈ܢ܂
44:19 [ai]ܟܕ ܚܢܢ ܣܝ̈ܡܢ ܗ̈ܘܝܢ ܒܣ̈ܡܐ ܠܡܠܟܬ ܫܡܝܐ܃ ܘܡܢ̈ܩܝܢ ܗ̈ܘܝܢ ܠܗܿ ܢܘܩ̈ܝܐ܃ ܠܐ ܗܘܐ ܒܠܥܕ ܡܢ ܓܒܪ̈ܝܢ ܥܒܕܢ ܠܗܿ ܙܘܬܪ̈ܐ ܘܢܩܝܢ ܠܗܿ ܢܘܩ̈ܝܐ܀܂
44:20 [ai]ܘܐܡܼܪ ܐܪܡܝܐ ܠܟܠܗ ܥܡܐ ܠܓܒܪ̈ܐ ܘܠܢܫ̈ܐ܃ ܘܠܟܠܗ ܥܡܐ ܕܐܡܼܪܘ ܠܗ ܡ̈ܠܐ ܗܠܝܢ܂
44:21 [ai]ܗܿܘ ܥܛܪܐ ܕܒܣ̈ܡܐ ܕܣܡܬܘܢ ܒܩܘܪ̈ܝܐ ܕܝܗܘܕܐ ܘܒ̈ܫܘܩܝܗܿ ܕܐܘܪܫܠܡ܂܃ ܐܢܬܘܢ ܘܐ̈ܒܗܝܟܘܢ ܘܡ̈ܠܟܝܟܘܢ ܘܪ̈ܘܪܒܢܝܟܘܢ ܘܥܡܐ ܕܐܪܥܐ܃ ܠܗ ܗܘ ܐܬܕܟܪ ܡܪܝܐ ܘܣܠܼܩ ܥܠ ܠܒܗ܂
44:22 [ai]ܘܠܐ ܡܫܿܟܚ ܬܘܒ ܡܪܝܐ ܠܡܫܼܒܩ ܠܟܘܢ܃ ܡܛܠ ܒܝܫܘܬܐ ܕܥܿܒ̈ܕܝܟܘܢ܂ ܘܡܛܠ ܛܢܦܘܬܐ ܕܥܒܕܬܘܢ܂ ܘܗܘܼܬ ܐܪܥܟܘܿܢ ܠܬܡܗܐܿ ܘܠܠܘܛܬܐܼ ܘܠܚܘܪܒܐ܂ ܡܢ ܒܠܝ ܕܝܬܿܒܼ ܐܝܟ ܕܝܘܡܢܐ܂
44:23 [ai]ܥܠ ܕܣܡܬܘܢ ܒܣ̈ܡܐ ܘܚܼܛܝܬܘܢ ܠܡܪܝܐ܃ ܘܠܐ ܫܡܥܼܬܘܢ ܒܩܠܗ ܕܡܪܝܐ܃ ܘܒܢܡܘܣܗ ܘܒܩܝܡܗ ܘܒܣ̈ܗܕܘܬܗܼ ܠܐ ܗܠܟܬܘܢ܂ ܡܛܠ ܗܢܐ ܐܕܪܟܬܟܘܢ ܒܝܼܫܬܐ ܗܕܐ ܐܝܟ ܕܝܘܡܢܐ܀
44:24 [ai]ܘܐܡܼܪ ܐܪܡܝܐ ܠܟܠܗ ܥܡܐܿ ܠܓܒܪ̈ܐܼ ܘܠܢܫ̈ܐ܂ ܫܡܼܥܘ ܦܬܓܡܗ ܕܡܪܝܐ ܟܠܗ ܝܗܘܕܐ ܕܒܐܪܥܐ ܕܡܨܪܝܢ܂
44:25 [ai]ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܐܝܠ܂ ܐܢܬܘܢ ܘܢܫ̈ܝܟܘܢ ܐܡܪܬܘܢ ܒܦܘܡܟܘܿܢ ܘܒܐ̈ܝܕܝܟܘܢܼ ܫܠܡܝܢ ܐܢܬܘܢ܂ ܘܐܡܪܬܘܢ܃ ܢܫ̈ܪ ܢܕܪ̈ܝܢ ܕܢܕܪܢ܃ ܠܡܣܿܡ ܒܣ̈ܡܐ ܠܦܘܠܚܢ ܫܡܝܐ܃ ܘܠܡܢܿܩܝܘ ܠܗܿ ܢܘܩ̈ܝܐ܂ ܐܫܪܬܘܢ ܡܘܡ̈ܬܟܘܢܼ ܘܥܒܕܬܘܢ ܢܕܪ̈ܝܟܘܢ܂
44:26 [ai]ܡܛܠ ܗܢܐܼ ܫܡܼܥܘ ܦܬܓܡܗ ܕܡܪܝܐܿ ܟܠܗ ܝܗܘܕܐ ܕܝܬܒܿܝܢ ܒܐܪܥܐ ܕܡܨܪܝܢ܂ ܗܐ ܐܢܐ ܝܿܡܝܬ ܒܫܡܝ ܪܒܐ ܐܡܿܪ ܡܪܝܐ܃ ܕܠܐ ܢܗܘܐ ܬܘܒ ܫܡܝ ܒܦܘܡܗܘܢ ܕܒܝܬ ܝܗܘܕܐ ܕܒܟܠܗܿ ܐܪܥܐ ܕܡܨܪܝܢ܂ ܘܠܐ ܢܐܡܪܘܢ ܚܝ ܗܼܘ ܡܪܝܐ ܐܠܗܐ܂
44:27 [ai]ܐܢܐ ܓܝܪ ܡܣܿܪܗܒ ܐܢܐ ܥܠܝܗܘܢ ܒܝܫܬܐ ܐܡܿܪ ܡܪܝܐ܂ ܘܢܣܘܦܘܢ ܟܠܗܘܢ ܓܒܪ̈ܐ ܕܝܗܘܕܐ ܕܒܐܪܥܐ ܕܡܨܪܝܢ܃ ܒܚܪܒܐܿ ܘܒܟܦܢܐܿ ܘܒܡܘܬܢܐܼ ܥܕܡܐ ܕܐܓܡܿܪ ܐܢܘܢ܂
44:28 [ai]ܘܦ̈ܠܝܛܝ ܚܪܒܐ ܢܗܦܟܘܢ ܡܢ ܐܪܥܐ ܕܡܨܪܝܢ܃ ܠܐܪܥܐ ܕܝܗܘܕܐ ܩܠܝܠ ܒܡܢܝܢܐ܂ ܘܢܕܥܘܢ ܟܠܗ ܫܪܟܐ ܕܝܗܘܕܐ ܕܐܙܠܘ ܠܡܥܡܪ ܒܐܪܥܐ ܕܡܨܪܝܢ܃ ܦܬܓܡܐܼ ܕܡܿܢ ܢܫܼܪ ܕܝܠܝܼ ܐܘ ܕܝܠܗܘܢ܂
44:29 [ai]ܘܗܕܐ ܐܬܐ ܠܟܘܢ ܐܡܿܪ ܡܪܝܐ܃ ܕܦܩܿܕ ܐܢܐ ܥܠܝܟܘܢ ܒܐܬܪܐ ܗܢܐ܂ ܕܬܕܥܘܢܼ ܕܫܪ̈ܢ ܡ̈ܠܝ ܥܠܝܟܘܢ ܠܒܝܫܬܐ܂
44:30 [ai]ܗܟܢܐ ܐܡܿܪ ܡܪܝܐ܂ ܗܐ ܡܫܼܠܡ ܐܢܐ ܠܗ ܠܦܪܥܘܢ ܚܓܝܪܐ ܡܿܠܟܐ ܕܡܨܪܝܢ܃ ܒܐܝܼܕܐ ܕܒ̈ܥܠܕܒܒܘܗܝ܃ ܘܒܐܝܼܕܐ ܕܐܝܠܝܢ ܕܒܥܝܢ ܢܦܫܗ܂ ܐܝܟ ܕܐܫܿܠܡܬ ܠܨܕܩܝܐ ܡܿܠܟܐ ܕܝܗܘܕܐ܃ ܒܐܝܼܕܐ ܕܢܒܘܟܕܢܨܪ ܡܿܠܟܐ ܕܒܒܠ ܒܥܠܕܒܒܗ ܘܒܿܥܐ ܢܦܫܗ܀܀܂

next chapter