← Back
The Comprehensive Aramaic Lexicon
← Return to the Text Browser
click on the file description for more information
62013: P Je

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


48:01 [ai]ܥܠ ܡܘܐܒ܂܂ ܗܟܢܐ ܐܡܿܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ܂ ܘܿܝ ܠܢܿܒܘܼ ܕܐܬܒܼܙܙܬ܂ ܒܗܬܼܬܼ ܘܐܚܦܪܬܿ ܩܘܪܝܬܝܡ܂ ܒܗܼܬܿ ܥܘܫܢܗܿ ܘܐܬܒܿܕܪ܂
48:02 [ai]ܘܠܝܬ ܬܘܒ ܬܫܒܘܚܬܐ ܠܡܘܐܒ܂ ܒܚܫܒܘܢܼ ܐܬܚܿܫܒܘ ‍{‍ܥܠܝ‍}‍‍<‍ܥܠܝܗܿ‍>‍ ܒܝܫܬܐ܂ ܘܐܡܼܪܘܼ ܬܘ ܢܘܒܕܝܗܿ ܡܢ ܥܡܐ܂ ܐܦܢ ܡܫܼܬܩ ܐܢ ܬܫܬܩܝܢ܂ ܒܬܪܟܝ ܬܐܙܠ ܚܪܒܐ܂
48:03 [ai]ܩܠ ܐܝܠܠܬܐܿ ܡܢ ܚܘܪܢܝܡ܂ ܒܙܬܐ ܘܬܒܪܐ ܪܒܐ
48:04 [ai]ܐܬܬܒܼܪܬܿ ܡܘܐܒ܂ ܐܫܿܡܥܘ ܐܝܠܠܬܐ ܡܣ̈ܟܢܝܗܿ܂
48:05 [ai]ܒܡܣܩܢܐ ܕܠܘܿܚܝܬܼ ܟܕ ܒܿܟܝܢ ܢܣܩܘܢ܂ ܘܒܡܚܬܬܐ ܕܚܘܪܢܝܡܿ ܐܘܠܨܢܐܼ ܘܓܥܬܐ ܕܬܒܪܐ ܢܥܒܕܘܢ܂ ܫܡܼܥܘܿ
48:06 [ai]ܘܥܪܘܩܘܼ ܘܦܨܿܘ ܢܦܫܟܘܢ܂ ܘܗܘܼܘܼ ܐܝܟ ܥܩܪܐ ܒܡܕܒܪܐ܂
48:07 [ai]ܥܠ ܕܐܬܬܼܟܠܬܝ ܥܠ ܚ̈ܣܢܝܟܝ ܘܥܠ ܓܙܝ̈ܟܝ܃ ܐܦ ܐܢܬܝܼ ܬܬܚܕܝܢ܂ ܘܢܦܼܘܩ ܟܡܘܫ ܒܫܒܝܬܐ܃ ܘܟܘܡܪ̈ܘܗܝܿ ܘܪ̈ܘܪܒܢܘܗܝܼ ܐܟܚܕܐ܂
48:08 [ai]ܘܢܐܬܐ ܒܙܘܙܐܼ ܥܠ ܟܠܗܝܢ ܩܘܪ̈ܝܝܟܝܼ ܘܠܐ ܢܬ̈ܦܨܝܢ܂ ܘܢܐܒܕ ܥܘܡܩܐܿ ܘܬܚܪܒܼ ܦܩܥܬܐ܃ ܐܝܟܢܐܼ ܕܐܡܼܪ ܡܪܝܐ܂
48:09 [ai]ܗܒܘ ܟܠܝܠܐ ܠܡܘܐܒܼ ܡܛܘܠ ܕܡܚܪܒ ܚܪܒܐ܂ ܘܟܠܗܝܢ ܩܘܪ̈ܝܗܿ ܢܗ̈ܘܝܼܢ ܠܚܘܪܒܐ ܡܢ ܒܠܝ ܕܝܬܿܒ܂
48:10 [ai]ܠܝܛ ܗܘ ܡܿܢ ܕܢܥܒܕ ܥܿܒܕܗ ܕܡܪܝܐ ܒܢܟܠܐ܂ ܘܠܝܛ ܗܿܘ ܡܿܢ ܕܢܟܠܐ ܚܪܒܗ ܡܢ ܕܡܐ܂
48:11 [ai]ܫܠܼܝܢ ܡܘܐ̈ܒܝܐ ܡܢ ܛܠܝܘܬܗܘܢ܂ ܘܫܟܘܬܝܢ ܥܠ ܬܛܪ̈ܝܗܘܢ܂ ܘܠܐ ܣܿܪܩܘ ܡܢ ܡܐܢܐ ܠܡܐܢܐ ܘܒܫܒܝܬܐܼ ܠܐ ܐܙܠܘ܂ ܡܛܠ ܗܢܐ ܩܝܡ ܛܥܡܗܘܢ ܒܗܘܢ܃ ܘܪܝܚܗܘܢܼ ܠܐ ܦܓ܂
48:12 [ai]ܡܛܠ ܗܢܐ ܗܐ ܝܘܡ̈ܬܐ ܐܬܿܝܢ ܐܡܿܪ ܡܪܝܐ܃ ܘܐܫܿܕܪ ܥܠܝܗܘܢ ܒܙܘ̈ܙܐ ܘܢܼܒܙܘܢ ܐܢܘܢ܂ ܘܡܐ̈ܢܝܗܘܢܼ ܢܣܿܪܩܘܢܿ ܘܓܪ̈ܒܝܗܘܢܼ ܢܿܫܚܩܘܢ܂
48:13 [ai]ܘܢܒܗܬ ܡܘܐܒ ܡܢ ܟܡܘܫ܃ ܐܝܟ ܕܒܗܬܘ ܕܒܝܬ ܐܝܣܪܝܠ ܡܢ ܒܝܬ ܐܝܠ ܬܘܟܠܢܗܘܢ܀܂
48:14 [ai]ܐܿܝܟܢܐ ܐܡܿܪ̈ܝܢ ܐܢܬܘܢ ܕܓܢܒܪܐ ܚܢܢ܃ ܘܓܒܪ̈ܐ ܚܝ̈ܠܬܢܐ ܠܩܪܒܐ܂
48:15 [ai]ܐܬܒܼܙܙ ܡܘܐܒܿ ܘܩܘܪ̈ܝܗܿ ܣܠܼܩ܂ ܘܓܒ̈ܝܐ ܕܓܢܒܪ̈ܘܗܝܼ ܐܫܬܠܼܡܘ ܠܩܛܠܐ܃ ܐܡܪ ܡܿܠܟܐ ܡܪܝܐ ܐܠܗܐ ܚܝܠܬܢܐ ܫܡܗ܂
48:16 [ai]ܩܪܝܒ ܗܘ ܬܒܪܗ ܕܡܘܐܒ ܠܡܐܬܐ܂ ܘܒܝܫܬܗ ܡܣܪܗܒܐܼ ܛܒ܂
48:17 [ai]ܐܬܕܠܚܿܘܼ ܘܙܥܼܘ ܟܘܠ ܕܚܕܪ̈ܘܗܝ ܘܟܠ ܕܝܕܥܿܝܢ ܫܡܗ ܐܡܼܪܘ܂ ܐܝܟܢܐܼ ܐܬܬܒܪ ܚܘܛܪܐ ܥܫܝܢܐ ܘܓܘܙܥܐ ܕܬܫܒܘܚܬܐ܂
48:18 [ai]ܚܘܬܝ ܡܢ ܐܝܩܪܐ ܘܬܒܝ ܒܨܥܪܐ ܥܡܘܪ̈ܬܐ ܕܒܪܬ ܪܝܒܘܢ܂ ܡܛܠ ܕܒܙܘܙܐ ܕܡܘܐܒ ܣܠܼܩ ܥܠܝܟܝܼ ܘܚܼܪܒ ܟܪ̈ܟܝܟܝ܂
48:19 [ai]ܥܠ ܐܘܪ̈ܚܬܐ ܩܘܡܝ ܘܚܘܪܝܿ ܥܡܘܪܬܐ ܕܥܕܘܥܝܪ܂ ܫܐܿܠ ܠܕܥܿܪܩ܂ ܘܠܕܡܬܿܦܠܛ ܐܡܼܪܼ ܡܢܐ ܗܘܼܐ܂
48:20 [ai]ܒܗܼܬ ܡܘܐܒܼ ܡܛܠ ܕܐܬܬܼܒܪ܂ ܐܝܠܠܘܿ ܘܐܙܥܩܘ ܒܐܪܢܘܢ܂ ܡܛܘܠ ܕܐܬܬܒܪ ܡܘܐܒ܂
48:21 [ai]ܘܕܝܢܼܐ ܐܬܐ ܥܠ ܐܪܥܐ ܕܡܫܿܘܪ܂ ܘܥܠ ܚܿܠܘܿܢ ܘܥܠ ܝܗܨܼ ܘܥܠ ܡܦܝܼܥܬ܂
48:22 [ai]ܘܥܠ ܪܝܒܘܢ ܘܥܠ ܢܒܿܘ܂ ܘܥܠ ܒܝܬ ܕܒܠܬܿܝܡ܃
48:23 [ai]ܘܥܠ ܩܘܪܝܬܝܡ܂ ܘܥܠ ܒܝܬ ܓܡܿܘܠ܂ ܘܥܠ ܒܝܬ ܡܼܥܘܢ܂
48:24 [ai]ܘܥܠ ܩܪܝܘܬ܂ ܘܥܠ ܒܘܨܪ܂ ܘܥܠ ܟܠܗܝܢ ܩܘܪ̈ܝܐ ܕܐܪܥܐ ܕܡܘܐܒ ܕܪ̈ܚܝܩܢ ܘܕܩܪ̈ܝܒܢ܂
48:25 [ai]ܐܬܓܕܡܬܿ ܩܪܢܗ ܕܡܘܐܒ܂ ܘܕܪܥܗܼ ܐܬܬܒܪ ܐܡܿܪ ܡܪܝܐ܂
48:26 [ai]ܕܘܐܿܘܗܿܝ ܡܛܠܼ ܕܥܠ ܡܪܝܐ ܐܬܬܪܝܡ܂ ܘܢܬܛܿܪܦ ܡܘܐܒ ܒܬܝܒܬܗ܂ ܘܢܗܘܐ ܠܓܘܚܟܐܼ ܐܦ ܗܼܘ܂
48:27 [ai]ܘܐܠܐ ܗܘܐ ܠܓܘܚܟܐ ܗܘܼܐ ܠܟ ܐܝܣܪܝܠ܂ ܘܒܓܢܒ̈ܐ ܐܫܬܟܚ܃ ܟܕ ܥܒܿܕ ܗܘܝܬ ܥܡܗ ܩܪܒܐ܂
48:28 [ai]ܫܒܘܩܘ ܩܘܪ̈ܝܐܼ ܘܫܼܪܘ ܒܫܩܝ̈ܦܐܿ ܝܬ̈ܒܝ ܡܘܐܒ܂܂ ܘܗܘܼܘܼ ܐܝܟ ܝܘܢܐ ܕܡܩܢܐ ܒܓܕܢܦܐ܂
48:29 [ai]ܫܡܥܢ ܪ̈ܘܪܒܢܐ ܕܡܘܐܒ܂܂ ܕܡܬܿܓܐܝܼܢ ܛܒ܂ ܓܐܝܘܬܗܘܿܢ ܘܪܡܘܬܗܘܢ ܘܪܡܘܬ ܠܒܗܘܢ܃
48:30 [ai]ܐܢܐ ܝܕܥܿ ܐܢܐ ܐܡܿܪ ܡܪܝܐ܂ ܥܿܒ̈ܕܝܗܘܢ ܕܠܐ ܗܘܼܘ ܟܐܢܝܢ܂ ܘܩܨ̈ܘܡܘܗܼܝ ܠܐ ܗܘܐ ܗܟܢܐ ܒܿܕܩܘ ܥܠܘܗܝ܂
48:31 [ai]ܡܛܠ ܗܢܐ ܥܠ ܡܘܐܒܼ ܐܝܠܠܘ܂ ܘܥܠ ܡܘܐܒ ܟܠܗܼ ܡܢ ܟܘܠ ܐܬܪ ܩܥܘ܂ ܘܥܠ ܐܢܫܐ ܕܥܡܿܪܝܢ ܒܒܝܬܗ܃ ܒܝܫܬܐ ܢܗܘܘܢ ܪܢܝܿܢ܂
48:32 [ai]ܡܢ ܒܟܬܐ ܕܝܥܙܝܪ ܐܿܒܟܝܟܝܿ ܓܦܬܐ ܕܣܒܡܐ܂ ܫ̈ܒܘܩܝܟܝܼ ܥܒܼܪܘ ܝܡܐ܂ ܘܥܕܡܐܿ ܠܝܡܐ ܕܝܥܙܝܪ ܡܛܘ܂ ܡܛܠ ܕܥܠ ܚܿܨܕܟܝ ܘܥܠ ܩܛܦܟܝܼ ܒܙܘܙܐ ܢܦܼܠ܂
48:33 [ai]ܘܬܥܒܪ ܚܕܘܬܐ ܘܕܝܨܐ ܡܢ ܐܪܥܐ ܕܟܪܡܠܐ܃ ܘܡܢ ܐܪܥܐ ܕܡܘܐܒ܂ ܘܚܡܪܐ ܡܢ ܡܥܨܪܬܐܼ ܢܼܒܛܠ܂ ܠܐܿ ܢܥܨܪܘܢ ܥܨܘܪ̈ܐ܂ ܘܠܐ ܢܥܢܘܢܼ ܘܠܐ ܢܐܡܪܘܢ ܝܗܝ ܝܗܝ܂
48:34 [ai]ܡܢ ܐܝܠܠܬܐ ܕܚܫܒܘܢܼ ܥܕܡܐ ܠܐܠܥܠܐ܂ ܘܥܕܡܐ ܠܝܗܼܨ ܐܪܝܡܘ ܩܠܗܘܢ܂ ܡܢ ܨܥܼܪ ܘܥܕܡܐ ܠܚܘܪܢܝܡ܂ ܘܥܕܡܐ ܠܟܪܟܐ ܕܐܠܣ ܥܓܠܬܐ ܬܘܠܬܐ܂ ܡܛܠ ܕܡ̈ܝܐ ܕܢܡܿܪܝܡܼ ܢܓܘܙܘܢ܂
48:35 [ai]ܘܐܿܒܛܠ ܡܢ ܡܘܐܒ ܐܡܿܪ ܡܪܝܐ܃ ܕܡܿܣܩ ܥܿܠܬܐ ܘܣܐܿܡ ܒܣ̈ܡܐ ܠܐܠܗܗ܂
48:36 [ai]ܡܛܠ ܗܢܐ ܠܒܝ ܥܠ ܡܘܐܒܼ ܐܝܟ ܟܢܪܐ ܢܡܠܠ܂ ܡܛܠ ܕܒܝܫܬܐ ܥܒܼܕܘ ܘܐܒܼܕܘ܂
48:37 [ai]ܪ̈ܫܝܗܘܢ ܓܝܼܪܼ ܡܣܦܪ̈ܝܢ܂ ܘܕܩܢܝ̈ܗܘܢܼ ܓܪ̈ܝܥܝܢ܂ ܘܥܠ ܟܠܗܝܢ ܐ̈ܝܕܝܗܘܢܼ ܡܪ̈ܩܕܬܐ܂ ܘܥܠ ܚܨ̈ܐܼ ܣܩ̈ܐ܂
48:38 [ai]ܘܥܠ ܟܘܠ ܐܓܪ̈ܐ ܕܡܘܐܒ ܘܒܫ̈ܘܩܐ ܟܠܗܘܢܼ ܡܪ̈ܩܕܬܐ܂ ܡܛܘܠ ܕܬܒܪܬ ܠܡܘܐܒ܃ ܐܝܟ ܡܐܢܐ ܕܠܝܬ ܒܗ ܚܫܚܘ ܐܡܿܪ ܡܪܝܐ܂
48:39 [ai]ܐܝܟܢܐ ܐܬܬܼܒܪܘ ܘܐܝܠܠܘ܂ ܘܐܼܝܟܢܐ ܐܦܢܝ ܩܕܠܗ ܡܘܐܒ ܘܒܗܼܬ܂ ܘܢܗܘܐ ܡܘܐܒ ܠܓܘܚܟܐ܂ ܘܠܬܒܪܐܼ ܠܟܠܗܘܢ ܥܡ̈ܡܐ܀
48:40 [ai]ܗܟܢܐ ܐܡܿܪ ܡܪܝܐ܂ ܗܐ ܐܝܟ ܢܫܪܐ ܢܣܼܩ ܘܢܛܘܣ܂ ܘܢܦܪܘܣ ܓܦܘ̈ܗܝ ܥܠ ܡܘܐܒ܂
48:41 [ai]ܐܬܬܼܚܕܬܿ ܩܪܝܘܬܿ ܘܡܨܪܘܬܼ ܐܬܟܒܼܫܬ܃ ܘܢܗܘܐ ܠܒܗܘܢ ܕܓܢܒܪ̈ܝ ܡܘܐܒ ܒܝܘܡܐ ܗܿܘ܃ ܐܝܟ ܠܒܐ ܕܐܢܬܬܐ ܕܡܚܿܒܠܐ ܠܡܐܠܕ܂
48:42 [ai]ܘܢܐܒܕ ܡܘܐܒ ܡܢ ܥܡܐ܂ ܡܛܠ ܕܥܠ ܡܪܝܐܿ ܐܬܬܪܝܡ܂
48:43 [ai]ܕܚܠܬܐ ܘܓܘܡܨܐ ܘܦܚܐܼ ܥܠܝܟܿ ܥܡܘܪ̈ܐ ܕܡܘܐܒ܂ ܐܡܿܪ ܡܪܝܐ܂
48:44 [ai]ܘܡܿܢ ܕܢܥܪܘܩ ܡܢ ܩܠܐ ܕܕܚܠܬܐܼ ܢܿܦܠ ܒܓܘܡܨܐ܂ ܘܡܿܢ ܕܢܣܼܩ ܡܢ ܓܘ ܓܘܡܨܐܼ ܢܬܿܬܚܕ ܒܦܚܐ܂ ܡܛܠ ܕܡܝܿܬܐ ܐܢܐ ܗܠܝܢ ܥܠ ܡܘܐܒ܂ ܫܢܬܐ ܕܦܘܩܕܢܗܘܢ ܐܡܿܪ ܡܪܝܐ܂
48:45 [ai]ܡܛܠ ܕܢܘܪܐ ܢܦܩܼܬܿ ܡܢ ܚܫܒܘܢ܃ ܘܫܠܗܒܝܬܐ ܡܢ ܟܪܟܐ ܕܣܝܚܘܢ܂ ܘܬܐܟܘܠ ܦܐܬܗ ܕܡܘܐܒ܃ ܘܪ̈ܫܢܐ ܕܒܢ̈ܝ ܫܐܘܢ܂
48:46 [ai]ܘܝ ܠܟ ܡܘܐܒ̈ ܐܒܼܕܬ ܥܡܐ̈ ܕܟܡܘܫ܂ ܕܐܬܒܿܕܪܘ ܒܢܝܟܼ ܘܒܢ̈ܬܟ ܒܫܒܝܐ܂
48:47 [ai]ܘܐܗܦܟ ܫܒܝܬܗ ܕܡܘܐܒܼ ܒܐܚܪܝܬ ܝܘܡ̈ܬܐ ܐܡܿܪ ܡܪܝܐ܂ ܥܕܡܐ ܠܗܪܟܐ ܕܝܢܼܗ ܕܡܘܐܒ܂

next chapter