← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62014: P Ez

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܘܗܘܐ ܒܫܢܬ ܬܠܬܝܢ ܒܚܡܫܬܐ ܒܝܪܚܐ ܪܒܝܥܝܐ܂ ܘܐܢܐ ܒܓܘ ܫܒܝܬܐ ܗܿܘܝܬ ܥܠ ܢܗܪ܆ܟܒܪ܂ ܘܐܬܦܬܚܘ ܫܡܝܐ܂ ܘܚܿܙܝܬ ܚܙܘܐ ܕܐܠܗܐ܂
01:02 [ai]ܒܚܡܫܬܐ ܒܝܪܚܐ܂ ܒܫܢܬ ܚܡܫ ܕܫܒܝܬܗ ܕܝܘܝܟܝܢ ܡܠܟܐ ܕܝܗܘܕܐ܂
01:03 [ai]ܗܘܐ ܦܬܓܡܗ ܕܡܪܝܐ ܥܠ ܚܙܩܝܐܝܠ ܒܪ ܒܘܙܝ ܟܗܢܐ܂ ܒܐܪܥܐ ܕܟ̈ܠܕܝܐ ܥܠ ܢܗܪ܆ܟܒܪ܂ ܘܗܘܬ ܥܠܝ ܬܡܢ ܐܝܕܗ ܕܡܪܝܐ܂
01:04 [ai]ܘܚܿܙܝܬ ܘܗܐ ܪܘܚܐ ܕܥܠܥܠܐ ܐܿܬܝܐ ܡܢ ܓܪܒܝܐ܂ ܥܢܢܐ ܪܒܬܐ܂ ܘܢܘܪܐ ܕܡܬܓܘܙܠܐ ܘܡܙܗܪܐ ܚܕܪܝܗܿ܂ ܘܡܢ ܓܘܗܿ ܐܝܟ ܚܙܘܐ ܡܢ ܓܘ ܢܘܪܐ܂
01:05 [ai]ܘܡܢ ܓܘܗܿ ܕܡܘܬܐ ܕܐܪ̈ܒܥ ܚܝ̈ܘܢ܂ ܘܗܢܘ ܚܙܘܗܝܢ܂ ܐܝܟ ܕܡܘܬܐ \ܕܒܢ̈ܝ ܐܢܫܐ /ܕܒܪܢܫܐ#3#/܂
01:06 [ai]ܘܐܪ̈ܒܥ ܐ̈ܦܝܢ ܠܚܕܐ ܘܐܪ̈ܒܥܐ ܓܦܝ̈ܢ܂
01:07 [ai]ܘܪ̈ܓܠܝܗܝܢ ܦܫ̈ܝܛܢ܂ ܘܦܪ̈ܣܬܐ ܕܪ̈ܓܠܝܗܝܢ ܐܝܟ ܦܪ̈ܣܬܐ ܕܥ̈ܓܠܐ܂ ܘܡܒܪ̈ܩܢ ܐܝܟ ܢܚܫܐ ܕܡܒܪܩ܂
01:08 [ai]ܘܐܝܕܐ ܕܒܪ ܐܢܫܐ ܬܚܝܬ ܓܦܝ̈ܗܝܢ ܡܢ ܐܪ̈ܒܥܐ ܓܒܝ̈ܗܝܢ܂ ܘܐ̈ܦܝܗܝܢ ܘܓܦܝ̈ܗܝܢ ܒܓܒܝ̈ܗܝܢ܂
01:09 [ai]ܘܓܦܝ̈ܗܝܢ ܢܩܝܦܝܢ ܗܘܘ ܚܕ ܠܚܕ܂ ܘܡܐ ܕܐ̈ܙܠܢ ܗܘ̈ܝ ܠܘܩܒܠܗܝܢ ܐ̈ܙܠܢ ܗܘ̈ܝ܂ ܘܠܐ ܡܬܗ̈ܦܟܢ ܗܘ̈ܝ܂
01:10 [ai]ܘܕܡܘܬܐ ܕܐ̈ܦܝܗܝܢ܂ ܐ̈ܦܐ ܕܒܪܢܫܐ ܘܐ̈ܦܐ ܕܐܪܝܐ ܒܓܒܝ̈ܗܝܢ ܕܝܡܝܢܐ܂ ܘܐ̈ܦܐ ܕܬܘܪܐ ܘܐ̈ܦܐ ܕܢܫܪܐ ܒܓܒܝ̈ܗܝܢ ܕܣܡܠܐ܂
01:11 [ai]ܘܐ̈ܦܝܗܝܢ ܘܓܦܝ̈ܗܝܢ ܦܪ̈ܝܣܝܢ ܗܘܘ ܡܢ ܠܥܠ܂ ܬܪ̈ܝܢ ܢܩܝܦܝܢ ܚܕ ܠܚܕ܂ ܘܬܪ̈ܝܢ ܡܟܣܝܢ ܓܘܫܡܗܝܢ܂
01:12 [ai]ܘܠܘܩܒܠܗܝܢ ܐ̈ܙܠܢ ܗܘ̈ܝ ܠܐܬܪܐ ܕܐܿܙܠܐ ܗܘܬ ܪܘܚܐ܂ ܘܠܐ ܡܬܗ̈ܦܟܢ ܗܘ̈ܝ܂
01:13 [ai]ܘܕܡܘܬܐ ܕܚܝ̈ܘܬܐ܂ ܐܝܟ ܚܙܘܐ ܕܓܘܡܪ̈ܐ ܕܢܘܪܐ ܕܝܩ̈ܕܢ܂ ܘܐܝܟ ܚܙܘܐ ܕܠܡܦܐܕܐ ܡܗܠܟܐ ܗܘܬ ܒܝܬ ܚܝ̈ܘܬܐ܂ ܘܡܙܗܪܐ ܗܘܬ ܢܘܪܐ܂ ܘܒܪܩܐ ܢܦܿܩ ܗܘܐ ܡܢܗܿ܂
01:14 [ai]ܘܚܝ̈ܘܬܐ ܪ̈ܗܛܢ ܗܘ̈ܝ ܘܠܐ ܡܬ̈ܦܢܝܢ ܗܘ̈ܝ܂ ܐܝܟ ܚܙܘܐ ܕܙܝܩܬܐ܂
01:15 [ai]ܘܚܿܙܝܬ ܚܝ̈ܘܬܐ܂ ܘܗܐ ܓܝ̈ܓܠܐ ܒܐܪܥܐ ܥܠ ܓܢܒ ܐܪ̈ܒܥܬܝܗܝܢ ܚܝ̈ܘܬܐ܂
01:16 [ai]ܘܚܙܘܐ ܕܓܝ̈ܓܠܐ ܘܥܒܿܕܗܝܢ܂ ܐܝܟ ܚܙܘܐ ܕܬܪܫܝܫ܂ ܘܕܡܘܬܐ ܚܕܐ ܠܐܪ̈ܒܥܬܝܗܝܢ܂ ܘܚܙܘܗܝܢ ܘܥܒܿܕܗܝܢ ܐܝܟ ܓܝܓܠܐ ܒܓܘ ܓܝܓܠܐ܂
01:17 [ai]ܥܠ ܐܪܒܥܐ ܓܒ̈ܝܗܝܢ ܐ̈ܙܠܢ ܗ̈ܘܝ ܘܠܐ ܡܬܗ̈ܦܟܢ ܗ̈ܘܝ܂ ܘܠܐܬܪܐ ܕܦܢܿܝܐ ܗܘܬ ܪܫܝܬܗܝܢ ܠܡܐܙܠ܂ ܒܬܪܗܿ ܐ̈ܙܠܢ ܗ̈ܘܝ ܘܠܐ ܡܬܗ̈ܦܟܢ ܗ̈ܘܝ܂
01:18 [ai]ܘܪܘܡܐ ܐܝܬ ܠܚ̈ܨܝܗܝܢ ܘܚ̈ܙܝܢ ܗ̈ܘܝ܂ ܘܚܨ̈ܝܗܝܢ ܡܿܠܐ ܥܝ̈ܢܐ ‍<‍ܗܘܐ#3#‍>‍ ܕܐܪ̈ܒܥܬܝܗܝܢ ܟܕ ܡܬܟܪ̈ܟܢ܂
01:19 [ai]ܘܟܕ ܐ̈ܙܠܢ ܗ̈ܘܝ ܚܝ̈ܘܬܐ ܐ̈ܙܠܢ ܗ̈ܘܝ ܓܝ̈ܓܠܐ ܥܡܗܝܢ܂ ܘܡܐ ܕܫ̈ܩܠܢ ܗ̈ܘܝ ܚܝ̈ܘܬܐ ܡܢ ܐܪܥܐ܂ ܫܩ̈ܠܢ ܗ̈ܘܝ ܓܝ̈ܓܠܐ ܥܡܗܝܢ܂
01:20 [ai]ܘܠܐܬܪ ܕܐܿܙܠܐ ܗܘܬ ܪܘܚܐ ܐ̈ܙܠܢ ܗ̈ܘܝ ܘܓܝ̈ܓܠܐ ܫܩ̈ܠܢ ܗ̈ܘܝ ܥܡܗܝܢ܂ ܡܛܠ ܕܪܘܚܐ ܚܝܬܐ ܐܝܬ ܗܘܬ ܒ̈ܓܝܓܠܐ܂
01:21 [ai]ܘܡܐ ܕܐ̈ܙܠܢ ܗ̈ܘܝ ܐ̈ܙܠܢ ܗ̈ܘܝ܂ ܘܡܐ ܕܩܝ̈ܡܢ ܗ̈ܘܝ ܩܝ̈ܡܢ ܗ̈ܘܝ܂ ܘܡܐ ܕܫ̈ܩܠܢ ܗ̈ܘܝ ܡܢ ܐܪܥܐ܂ ܫܩ̈ܠܢ ܗ̈ܘܝ ܓܝ̈ܓܠܐ ܥܡܗܝܢ܂ ܡܛܠ ܕܪܘܚܐ ܚܝܬܐ ܐܝܬ ܗܘܬ ܒ̈ܓܝܓܠܐ܂
01:22 [ai]ܘܡܬܝܚ ܠܥܠ ܡܢ ܪܝܫܐ ܕܚܝ̈ܘܬܐ܂ ܐܝܟ \ܕܡܘܬܐ ܕܚܙܘܐ /ܚܙܘܐ#3#/ ܕܩܪܘܣܛܠܘܣ ܕܚܝܠܐ܂
01:23 [ai]ܘܬܚܘܬܘܗܝ ܓܦ̈ܝܗܝܢ ܬܪ̈ܝܨܝܢ ܗܘܘ ܚܕ ܠܘܩܒܠ ܚܕ܂ ܡܢ ܠܥܠ ܘܡܢ ܠܬܚܬ܂ ܬܪ̈ܝܢ ܡܟܣܝܢ ܠܗܝܢ܂ ܘܬܪ̈ܝܢ ܡܟܣܝܢ ܓܘܫܡܗܝܢ܂
01:24 [ai]ܘܫܡܥܿܬ ܩܠܐ ܕܓܦܝ̈ܗܝܢ܂ ܐܝܟ ܩܠܐ ܕܡ̈ܝܐ ܣܓ̈ܝܐܐ܂ ܘܐܝܟ ܩܠܐ ܕܐܠܗܐ ܡܐ ܕܐ̈ܙܠܢ ܗ̈ܘܝ܂ ܘܐܝܟ ܩܠܐ ܕܡܡܠܠܐ ܒܓܘ ܡܫܪܝܬܐ܂ ܘܡܐ ܕܩܝ̈ܡܢ ܗ̈ܘܝ܂ ܡܫ̈ܠܝܢ ܗ̈ܘܝ ܓܦܝ̈ܗܝܢ܂
01:25 [ai]ܘܗܘܿܐ ܩܠܐ ܥܠ ܡܛܠܠܐ ܕܠܥܠ ܡܢ ܪ̈ܝܫܝܗܝܢ܂ ܘܡܐ ܕܩܝ̈ܡܢ ܗ̈ܘܝ ܡܫ̈ܠܝܢ ܗ̈ܘܝ ܓܦܝ̈ܗܝܢ܂
01:26 [ai]ܘܠܥܠ ܡܢ ܡܛܠܠܐ ܕܠܥܠ ܡܢ ܪ̈ܝܫܝܗܝܢ܂ ܐܝܟ ܚܙܘܐ ܕܟܐܦܐ ܕܣܦܝܠܐ܂ ܘܐܝܟ ܕܡܘܬܐ ܕܟܘܪܣܝܐ ܘܥܠ ܕܡܘܬܐ ܕܟܘܪܣܝܐ ܐܝܟ ܕܡܘܬܐ ܘܐܝܟ ܚܙܘܐ ܕܒܪ ܐܢܫܐ܂ ܐܝܬ ܥܠܘܗܝ ܡܢ ܠܥܠ܂
01:27 [ai]ܘܚܿܙܝܬ ܐܝܟ ܚܙܘܐ ܕܐܠܗܐ܂ ܘܐܝܟ ܚܙܘܐ ܕܢܘܪܐ ܡܢ ܠܓܘ ‍<‍ܟܕ#3#‍>‍ ܚܕܪ ܠܗ܂ ܡܢ ܚܙܘܐ ܕܚ̈ܨܘܗܝ ܘܠܥܠ܂ ܘܡܢ ܚ̈ܨܘܗܝ ܘܠܬܚܬ܂ ܚܿܙܝܬ ܐܝܟ ܚܙܘܐ ܕܢܘܪܐ܂ ܘܙܗܪܐ ܟܪܟ ܠܗ܂
01:28 [ai]ܐܝܟ ܚܙܘܐ ܕܩܫܬܐ ܕܗܿܘܝܐ ܒܥ̈ܢܢܐ ܒܝܘܡܐ ܕܡܛܪܐ܂ ܗܟܢܐ ܗܘܐ ܚܙܘܐ ܕܙܗܪܐ ܕܟܪܟ ܠܗ܂ ܘܗܟܢܐ ܗܘܐ ܚܙܘܐ ܕܕܡܘܬܐ ܕܐܝܩܪܗ ܕܡܪܝܐ ܘܚܙܝܬܗ ܘܢܦܿܠܬ ܥܠ ܐ̈ܦܝ܂ ܘܫܡܥܿܬ ܩܠܗ ܕܡܡܠܠ܂

next chapter