← Back
The Comprehensive Aramaic Lexicon
← Return to the Text Browser
click on the file description for more information
62014: P Ez

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


11:01 [ai]ܘܫܩܠܬܢܝ ܪܘܚܐ܂ ܘܐܝܬܝܬܢܝ ܠܬܪܥܐ ܡܕܢܚܝܐ ܕܒܝܬܗ ܕܡܪܝܐ ܕܚܐܪ ܠܡܕܢܚܐ܂ ܘܚܙܿܝܬ ܒܡܥܠܢܐ ܕܬܪܥܐ܂ ܥܣܪ̈ܝܢ ܘܚܡܫܐ ܓܒܪ̈ܝܢ ‍<‍ܩܝܡܝܢ#3#‍>‍܂ ܘܚܙܿܝܬ ܒܝܢܬܗܘܢ ܠܝܥܙܢܝܐ ܒܪ ܥܙܘܪ܂ ܘܠܦܠܛܝܐ ܒܪ ܒܢܝܐ ܪ̈ܘܪܒܢܐ ܕܥܡܐ܂
11:02 [ai]ܘܐܡܪ ܠܝ ܡܪܝܐ܂ ܒܪܢܫܐ܂ ܗܠܝܢ ܐܢܘܢ ܓܒܪ̈ܐ ܕܡܬܚܫܒܝܢ ܥܬܐ܂ ܘܡܠܿܟܝܢ ܡ̈ܠܼܟܐ ܒܝܫ̈ܐ ܒܡܕܝܢܬܐ ܗܕܐ܂
11:03 [ai]ܘܐܡܿܪܝܢ܂ ܠܐ ܗܘܐ ܒܓܘܗܿ ܒܢܼܝܢ ܒܬ̈ܐ܂ ܗܝ ܩܕܣܐ ܘܚܢܢ ܒܣܪܐ܂
11:04 [ai]ܡܟܝܠ ܐܬܢܒܐ ܥܠܝܗܘܢ܂ ܐܬܢܒܐ ܒܪ ܐܢܫܐ܂
11:05 [ai]ܘܢܦܠܬ ܥܠܝ ܪܘܚܗ ܕܡܪܝܐ ܘܐܡܪ ܠܝ܂ ܐܡܪ ܗܟܢܐ ܐܡܿܪ ܡܪܝܐ/ܡܪܐ ܡܪ̈ܘܬܐ#3#/܂ ܗܟܢܐ ܪܚܡܬܘܢ ܒܢ̈ܝ ܐܝܣܪܝܠ܂ ܘܬܪ̈ܥܝܬܐ ܕܪܘܚܟܘܢ ܐܢܐ ܝܕܥܿ ܐܢܐ ܠܗܝܢ܂
11:06 [ai]ܐܣܓܝܬܘܢ ܩ̈ܛܝܠܝܟܘܢ ܒܡܕܝܢܬܐ ܗܕܐ܂ ܘܡܠܝܬܘܢ ܫܘ̈ܩܝܗܿ ܚܪ̈ܝܒܐ܂
11:07 [ai]ܡܛܠ ܗܢܐ ܗܟܢܐ ܐܡܿܪ ܡܪܐ ܡܪ̈ܘܬܐ܂ ܚܪ̈ܝܒܝܟܘܢ ܕܐܪܡܝܬܘܢ ܒܓܘܗܿ ܗܢܘܢ ܐܢܘܢ ܒܣܪܐ ܘܗܝ ܩܕܣܐ܂ ܘܠܟܘܢ ܡܦܩ ܐܢܐ ܡܢ ܓܘܗܿ܂
11:08 [ai]ܡܢ ܚܪܒܐ ܕܚܠܬܘܢ܂ ܘܚܪܒܐ ܐܝܬܐ ܥܠܝܟܘܢ ܐܡܿܪ ܡܪܐ ܡܪ̈ܘܬܐ܂
11:09 [ai]ܘܐܦܩܟܘܢ ܡܢ ܓܘܗܿ܂ ܘܐܫܠܡܟܘܢ ܒܐܝܕܐ ܕܢܘܟܪ̈ܝܐ܂ ܘܐܥܒܕ ܡܢܟܘܢ ܕܝ̈ܢܐ܂
11:10 [ai]ܒܚܪܒܐ ܬܦܠܘܢ ܘܥܠ ܬܚܘܡܐ ܕܐܝܣܪܝܠ ܐܕܘܢܟܘܢ܂ ܘܬܕܥܘܢ ܕܐܢܐ ܐܢܐ ܡܪܝܐ܂
11:11 [ai]ܘܗܝ ܠܐ ܬܗܘܐ ܠܟܘܢ ܩܕܣܐ܂ ܘܐܢܬܘܢ ܠܐ ܬܗܘܘܢ ܒܗܿ ܒܣܪܐ܂ ܘܥܠ ܬܚܘܡܐ ܕܐܝܣܪܝܠ ܐܕܘܢܟܘܢ܂
11:12 [ai]ܘܬܕܥܘܢ ܕܐܢܐ ܐܢܐ ܡܪܝܐ܂ ܕܒܦܘܩ̈ܕܢܝ ܠܐ ܗܠܟܬܘܢ ܘܕܝܢ̈ܝ ܠܐ ܥܒܕܬܘܢ܂ ܘܐܝܟ ܕܝܢ̈ܐ ܕܥܡ̈ܡܐ ܕܚܕܪ̈ܝܟܘܢ ܥܒܕܬܘܢ܂
11:13 [ai]ܘܟܕ ܐܬܢܒܝܿܬ܂ ܡܝܬ ܦܠܛܝܐ ܒܪ ܒܢܝܐ܂ ܘܢܦܠܿܬ ܥܠ ܐ̈ܦܝ܂ ܘܐܝܠܠܿܬ ܒܩܠܐ ܪܡܐ ܘܐܡܪܿܬ܂ ܐܘܗܿ ܡܪܐ ܡܪ̈ܘܬܐ܂ ܣܘܦܢܐ ܥܒܿܕ ܐܢܬ ܠܫܪܟܗ ܕܐܝܣܪܐܝܠ܂
11:14 [ai]ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ܂
11:15 [ai]ܒܪܢܫܐ܂ ܐܚ̈ܝܟ ܐܚ̈ܝܟ ܐܢܫܐ ܕܫܒܝܬܟ܂ ܘܟܠܗܘܢ ܕܒܝܬ ܐܝܣܪܝܠ ܢܣܘܦܘܢ܂ ܕܐܡܪܘ ܠܗܘܢ ܥܡܘܪ̈ܝܗܿ ܕܐܘܪܫܠܡ܂ ܐܬܪܚܩܘ ܡܢ ܡܪܝܐ܂ ܠܢ ܗܘ ܓܝܪ ܐܬܝܗܒܬ ܐܪܥܐ ܠܝܪܬܘܬܐ܂
11:16 [ai]ܡܛܠ ܗܢܐ ܗܟܢܐ ܐܡܿܪ ܡܪܐ ܡܪ̈ܘܬܐ܂ ܐܕܚܘܩ ܐܢܘܢ ܒܥܡ̈ܡܐ܂ ܘܐܒܕܪ ܐܢܘܢ ܒܐܪ̈ܥܬܐ܂ ܘܐܗܘܐ ܠܗܘܢ ܠܡܩܕܫܐ ܙܥܘܪܐ ܒܐܪ̈ܥܬܐ ܕܐܙܠܘ ܠܗܝܢ܂
11:17 [ai]ܡܛܠ ܗܢܐ ܗܟܢܐ ܐܡܿܪ ܡܪܐ ܡܪ̈ܘܬܐ܂ ܐܟܢܫܟܘܢ ܡܢ ܥܡ̈ܡܐ܂ ܘܐܩܪܒܟܘܢ ܡܢ ܐܪ̈ܥܬܐ ܕܐܬܒܕܪܬܘܢ ܒܗܝܢ܂ ܘܐܬܠ ܠܟܘܢ ܐܪܥܐ ܕܐܝܣܪܝܠ܂
11:18 [ai]ܘܢܥܠܘܢ ܠܗܿ܂ ܘܢܥܒܪܘܢ ܟܠܗܝܢ ܕܚ̈ܠܬܗܿ ܘܟܠܗܝܢ ܛܢ̈ܦܘܬܗܿ ܡܢܗܿ܂
11:19 [ai]ܘܐܬܠ ܠܗܘܢ ܠܒܐ ܚܕܬܐ܂ ܘܪܘܚܐ ܚܕܬܐ ܐܬܠ ܒܗܘܢ/ܠܗܘܢ#3#/܂ ܘܐܥܒܪ ܠܒܐ ܕܟܐܦܐ ܡܢ ܒܣܪܗܘܢ܂ ܘܐܬܠ ܠܗܘܢ ܠܒܐ ܕܒܣܪܐ܂
11:20 [ai]ܘܢܗܠܟܘܢ ܒ̈ܦܘܩܕܢܝ ܘܢܛܪܘܢ ܕܝܢ̈ܝ ܘܢܥܒܕܘܢ ܐܢܘܢ܂ ܘܢܗܘܘܢ ܠܝ ܥܡܐ܂ ܘܐܢܐ ܐܗܘܐ ܠܗܘܢ ܐܠܗܐ܂
11:21 [ai]ܒܪܥܝܢܐ ܓܝܪ ܕܦܬܟܪ̈ܝܗܘܢ ܘܕܛܢ̈ܦܘܬܗܘܢ ܐܿܙܠ ܗܘܐ ܠܒܗܘܢ܂ ܐܘܪ̈ܚܬܗܘܢ ܒܪܝܫܗܘܢ ܐܦܪܘܥ ܐܡܿܪ ܡܪܐ ܡܪ̈ܘܬܐ ܀ ܀܂
11:22 [ai]ܘܐܪܝܡܘ ܟܪ̈ܘܒܐ ܓܦܝ̈ܗܘܢ ܘܓܝ̈ܓܠܐ ܥܡܗܘܢ܂ ܘܫܘܒܚܗ ܕܐܠܗܐ ܕܐܝܣܪܝܠ ܠܥܠ ܡܢܗܘܢ܂
11:23 [ai]ܘܐܬܬܪܝܡ ܫܘܒܚܗ ܕܡܪܝܐ ܡܢ ܓܘ ܡܕܝܢܬܐ܂ ܘܩܡ ܥܠ ܛܘܪܐ ܕܒܡܕܢܚܝܗܿ ܕܡܕܝܢܬܐ܂
11:24 [ai]ܘܪܘܚܐ ܫܩܠܬܢܝ܂ ܘܐܝܬܝܬܢܝ ܠܐܪܥܐ ܕܟ̈ܠܕܝܐ ܠܫܒܝܬܐ܂ ܒܚܙܘܐ ܘܒܪܘܚܐ ܕܐܠܗܐ܂ ܘܦܪܩ ܠܗ ܡܢܝ ܚܙܘܐ ܕܚܙܿܝܬ܂
11:25 [ai]ܘܡܠܠܬ ܥܡ ܫܒܝܬܐ܂ ܟܘܠܗܘܢ ܦܬܓܡ̈ܘܗܝ ܕܡܪܝܐ ܕܚܘܝܢܝ ܀܂

next chapter