← Back
The Comprehensive Aramaic Lexicon
← Return to the Text Browser
click on the file description for more information
62014: P Ez

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


17:01 [ai]ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ܂
17:02 [ai]ܒܪܢܫܐ܂ ܐܚܘܕ ܐܘܚܕܬܐ ܘܐܡܬܠ ܡܬܠܐ ܥܠ ܕܒܝܬ ܐܝܣܪܝܠ܂
17:03 [ai]ܘܐܡܪ܂ ܗܟܢܐ ܐܡܿܪ ܡܪܐ ܡܪ̈ܘܬܐ܂ ܢܫܪܐ ܪܒܐ ܕܪ̈ܘܪܒܝܢ ܓܦܘ̈ܗܝ ܘܐܪ̈ܝܟܝܢ ܓܠܦܢ̈ܘܗܝ܂ ܘܡ̈ܠܝܢ ܛܦܪ̈ܘܗܝ ܘܥܒܝܛ ܡܠܓܗ܂ ܐܬܐ ܠܠܒܢܢ ܘܢܣܒ ܓܒܝܐ ܕܥܪ̈ܩܐ܂
17:04 [ai]ܘܩܛܡ ܪܝܫ ܡܪܒܝܬܗ܂ ܘܐܝܬܝܗ ܠܐܪܥܐ ܕܟܢܥܢ܂ ܘܣܡܗ ܒܡܕܝܢܬܐ ܕܬܓܪ̈ܐ܂
17:05 [ai]ܘܢܣܒ ܡܢ ܙܪܥܐ ܕܐܪܥܐ ܘܐܪܡܝ ܒܡܕܒܪܐ܂ ܢܨܒܬܐ ܥܠ ܡ̈ܝܐ ܣ̈ܓܝܐܐ܂ ܘܣܡܗ ܠܕܘܩܐ܂
17:06 [ai]ܘܝܥܬ ܘܗܘܬ ܓܦܬܐ ܡܪܥܬܐ ܡܟܝܟܬ ܩܘܡܬܐ܂ ܕܢܬܚܙܘܢ ܫܒܘ̈ܩܝܗܿ ܥܠܘܗܝ܂ ܘܥܩܪ̈ܝܗܿ ܢܗܘܘܢ ܬܚܘܬܘܗܝ܂ ܘܗܘܬ ܓܦܬܐ ܘܥܒܕܬ ܫܒ̈ܘܩܐ܂ ܘܦܫܛܬ ܥܢ̈ܩܝܗܿ܂
17:07 [ai]ܘܗܐ ܢܫܪܐ ܐܚܪܢܐ ܪܒܐ ܕܪ̈ܘܪܒܝܢ ܓܦܘ̈ܗܝ ܘܣ̈ܓܝܐܢ ܛܦܪ̈ܘܗܝ܂ ܘܓܦܬܐ ܗܕܐ ܐܟܪܟܬ ܥܩܪ̈ܝܗܿ ܥܠܘܗܝ܂ ܘܕܠܝ̈ܬܗܿ ܐܪܡܝܬ ܥܠܘܗܝ܂ ܕܢܫܩܝܗܿ ܡܢ ܡܕܪܐ ܕܢܨܒܬܗ܂
17:08 [ai]ܒܚܩܠܐ ܫܦܝܪܬܐ܂ ܘܒ̈ܡܝܐ ܣ̈ܓܝܐܐ ܢܨܝܒܐ܂ ܕܬܥܒܕ ܛܪ̈ܦܐ ܘܬܛܥܢ ܦܐܪ̈ܐ܂ ܘܬܗܘܐ ܓܦܬܐ ܫܒܝܚܬܐ܂
17:09 [ai]ܐܡܪ ܗܟܢܐ ܐܡܿܪ ܡܪܐ ܡܪ̈ܘܬܐ܂ ܠܐ ܬܟܫܪ܂ ܐܠܐ ܥܩܪ̈ܝܗܿ ܢܬܦܣܩܘܢ܂ ܘܦܐܪ̈ܝܗܿ ܢܬܡܣܘܢ ܘܢܐܒܫܘܢ܂ ܘܟܠܗܘܢ ܛܪ̈ܦܐ ܕܡܘܥܝܬܗܿ ܢܐܒܫܘܢ܂ ܘܠܐ ܒܕܪܥܐ ܪܡܐ ܘܠܐ ܒܥܡ̈ܡܐ ܣ̈ܓܝܐܐ ܢܥܩܪܝܗܿ ܡܢ ܥܩܪܗܿ܂
17:10 [ai]ܗܐ ܢܨܝܒܐ ܐܠܐ ܠܐ ܬܟܫܪ܂ ܘܡܐ ܕܢܫܒܬ ܒܗܿ ܪܘܚܐ ܕܫܘܒܐ܂ ܝܿܒܫܐ ܒܡܕܪܐ ܕܡܘܥܝܬܗܿ܂
17:11 [ai]ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ܂
17:12 [ai]‍<‍ܒܪܢܫܐ#3#‍>‍ ܐܡܪ ܠܒܝܬܐ ܡܡܪܡܪܢܐ܂ ܠܐ ܝܕܥܿܝܢ ܐܢܬܘܢ ܡܢܐ ܐ̈ܢܝܢ ܗܠܝܢ܂ ܐܡܪ ܠܗܘܢ܂ ܗܐ ܐܬܐ ܡܠܟܐ ܕܒܒܠ ܠܐܘܪܫܠܡ܂ ܘܕܒܪ ܠܡܠܟܗܿ ܘܠܪ̈ܘܪܒܢܝܗܿ܂ ܘܡܘܒܠ ܠܗܘܢ ܠܒܒܠ܂
17:13 [ai]ܘܢܣܿܒ ܡܢ ܙܪܥܐ ܕܡܠܟܘܬܐ܂ ܘܡܩܝܡ ܥܡܗ ܩܝܡܐ܂ ܘܥܐܿܠ ܥܡܗ ܒܡܘܡ̈ܬܐ܂ ܘܕܒܪ ܠܫ̈ܠܝܛܐ/ܠܫ̈ܠܝܛܢܐ#3#/ ܕܐܪܥܐ ܕܠܐ ܢܬܬܪܝܡܘܢ܂
17:14 [ai]ܐܠܐ ܬܗܘܐ ܡܠܟܘܬܗܘܢ ܡܟܝܟܐ܂ ܘܢܛܪܘܢ ܩܝܡܗ ܘܢܩܝܡܘܢ ܥܡܗ܂
17:15 [ai]ܘܢܡܪܕ ܥܠܘܗܝ܂ ܘܢܫܕܪ ܐܝ̈ܙܓܕܘܗܝ ܠܡܨܪܝܢ܂ ܕܢܬܠܘܢ ܠܗ ܪ̈ܟܫܐ ܘܥܡܐ ܣܓܝܐܐ܂ ܠܐ ܢܟܫܪ ܘܠܐ ܢܬܦܨܐ ܡܿܢ ܕܗܟܢܐ ܥܒܕ܂
17:16 [ai]ܚܝ ܐܢܐ ܐܡܿܪ ܡܪܐ ܡܪ̈ܘܬܐ܂ ܕܒܐܬܪܐ/ܒܐܬܪܐ#3#/ ܕܐܩܝܡܝܘܗܝ ܡܠܟܐ܂ ܘܫܛ ܡܘ̈ܡܬܝ ܘܒܛܠ ܩܝܡܝ܂ ܒܓܘ ܒܒܠ ܢܡܘܬ܂
17:17 [ai]ܘܠܐ ܒܚܝܠܐ ܪܒܐ܂ ܐܦܠܐ ܒܪ̈ܟܫܐ ܣ̈ܓܝܐܐ ܢܥܒܕ ܥܡܗ ܦܪܥܘܢ ܩܪܒܐ܂ ܐܠܐ ܒܟܡ̈ܐܢܐ ܘܒܕܘ̈ܩܐ ܢܘܒܕ ܢܦܫ̈ܬܐ ܣܓܝܐ̈ܬܐ܂
17:18 [ai]ܥܠ ܕܫܛ ܡܘ̈ܡܬܐ ܘܒܛܠ ܩܝܡܐ܂ ܢܫܠܡ ܐܝܕܗ ܘܠܐ ܢܬܦܨܐ܂ ܥܠ ܕܥܒܕ ܗܠܝܢ ܟܠܗܝܢ܂
17:19 [ai]ܡܛܠ ܗܠܝܢ ܗܟܢܐ ܐܡܿܪ ܡܪܐ ܡܪ̈ܘܬܐ܂ ܚܝ ܐܢܐ܂ ܥܠ ܕܫܛ ܡܘ̈ܡܬܝ ܘܒܛܠ ܩܝܡܝ܂ ܐܣܩܝܗܿ ܒܪܝܫܗ܂
17:20 [ai]ܘܐܦܪܘܣ ܡܨܝܕܬܝ ܥܠܘܗܝ ܘܢܬܬܚܕ ܒܗܿ܂ ܘܐܘܒܠܝܘܗܝ ܠܒܒܠ ܠܐܪܥܐ ܕܟ̈ܠܕܝܐ ܘܐܕܘܢܝܘܗܝ ܬܡܢ ܥܠ ܥܘܼܠܐ ܕܐܥܠܝ ܒܝ܂
17:21 [ai]ܘܟܠܗܘܢ ܚܐܪ̈ܘܗܝ ܘܟܠܗܘܢ ܩܪ̈ܝܒܘܗܝ ܢܦܠܘܢ ܒܚܪܒܐ܂ ܘܐܝܠܝܢ ܕܡܫܬܚܪܝܢ ܢܬܕܪܘܢ ܠܟܠ ܪܘܚ܂ ܘܬܕܥܘܢ ܕܐܢܐ ܐܢܐ ܡܪܝܐ ܡܠܠܿܬ ܀܂
17:22 [ai]ܗܟܢܐ ܐܡܿܪ ܡܪܐ ܡܪ̈ܘܬܐ܂ ܐܣܒ ܡܢ ܓܒ̈ܝܐ ܕܥܪ̈ܩܐ ܪܡܐ܂ ܘܡܢ ܪܝܫܗ ܐܩܛܘܡ ܠܒܗ܂ ܘܐܨܘܒ ܥܠ ܛܘܪ̈ܐ ܪ̈ܡܐ ܘܡܥ̈ܠܝܐ܂
17:23 [ai]ܒܛܘܪ̈ܐ ܕܐܝܣܪܝܠ ܐܨܒܝܘܗܝ܂ ܘܢܛܥܢ ܛܪ̈ܦܐ ܘܢܥܒܕ ܦܐܪ̈ܐ܂ ܘܢܗܘܐ ܐܪܙܐ ܫܒܝܚܐ܂ ܘܬܫܟܢ ܒܗ ܟܠܗܿ ܦܪܚܬܐ ܕܓܦܐ܂ ܘܒܛܠܠܐ ܕܣܘ̈ܟܘܗܝ ܢܫܟܢܘܢ܂
17:24 [ai]ܘܢܕܥܘܢ ܟܠܗܘܢ ܐ̈ܝܠܢܐ ܕܕܒܪܐ܂ ܕܐܢܐ ܡܪܝܐ ܐܡܿܟܬ ܩܝܣܐ ܪܡܐ܂ ܘܐܪܝܡܿܬ ܩܝܣܐ ܡܟܝܟܐ܂ ܘܐܿܘܒܫܬ ܩܝܣܐ ܪܛܝܒܐ܂ ܘܐܘܥܿܝܬ ܩܝܣܐ ܝܒܝܫܐ܂ ܐܢܐ ܡܪܝܐ ܡܠܠܿܬ ܘܥܒܿܕܬ ܀ ܀܂

next chapter