The Comprehensive Aramaic Lexicon

35:01 [ai]	ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ܂
35:02 [ai]	ܒܪܢܫܐ܂ ܣܝܡ ܐ̈ܦܝܟ ܠܛܘܪܐ ܕܣܥܝܪ܂ ܘܐܬܢܒܐ ܥܠܘܗܝ܂
35:03 [ai]	ܘܐܡܪ ܠܗ܂ ܗܟܢܐ ܐܡܿܪ ܡܪܐ ܡܪ̈ܘܬܐ܂ ܗܐ ܐܢܐ ܥܠܝܟ ܛܘܪܐ ܕܣܥܝܪ܂ ܘܐܪܝܡ ܐܝܕܝ ܥܠܝܟ܂ ܘܐܥܒܕܟ ܠܚܒܠܐ ܘܠܬܡܗܐ܂
35:04 [ai]	ܘܡܕܝ̈ܢܬܟ ܐܥܒܕ ܠܚܘܪܒܐ܂ ܘܐܢܬ ܬܗܘܐ ܠܚܒܠܐ܂ ܘܬܕܥ ܕܐܢܐ ܐܢܐ ܡܪܝܐ܂
35:05 [ai]	ܥܠ ܕܗܘܬ ܠܟ ܒܥܠܕܒܒܘܬܐ ܠܥܠܡ܂ ܘܐܫܠܡܬ ܠܒܢ̈ܝ ܐܝܣܪܝܠ ܠܐܝܕܐ ܕܣܝܦܐ ܒܙܒܢܐ ܕܥܩܬܗܘܢ܂ ܘܒܙܒܢܐ ܕܥܘܼܠܐ ܕܩܨܗܘܢ܂
35:06 [ai]	ܡܛܠ ܗܢܐ ܚܝ ܐܢܐ ܐܡܿܪ ܡܪܐ ܡܪ̈ܘܬܐ܂ ܕܠܕܡܐ ܐܥܒܕܟ ܘܕܡܐ ܢܪܕܦܟ܂ ܕܡܐ ܕܣܢܝܬ ܗܘ ܕܡܐ ܢܪܕܦܟ܂
35:07 [ai]	ܘܐܥܒܕܝܘܗܝ ܠܛܘܪܐ ܕܣܥܝܪ ܠܚܒܠܐ ܘܠܬܡܗܐ܂ ܘܐܘܒܕ ܡܢܗ ܕܥܒܿܪ ܘܕܬܐܿܒ܂
35:08 [ai]	ܘܐܡܠܐ ܛܘܪ̈ܘܗܝ ܡܢ ܚܪ̈ܝܒܘܗܝ܂ ܫܩ̈ܝܦܝܟ ܘܪ̈ܡܬܟ ܘܢܚ̈ܠܝܟ܂ ܚܪ̈ܝܒܐ ܕܣܝܦܐ ܢܦܠܘܢ ܒܗܘܢ܂
35:09 [ai]	ܘܐܥܒܕܟ ܚܘܪܒܐ/ܚܪܒܐ#3#/ ܠܥܠܡ܂ ܘܡܕܝ̈ܢܬܟ ܠܐ ܢܬܝ̈ܬܒܢ܂ ܘܬܕܥ܂ ܕܐܢܐ ܐܢܐ ܡܪܝܐ܂
35:10 [ai]	ܥܠ ܕܐܡܪܬ ܕܬܪ̈ܝܢ ܥܡ̈ܡܝܢ/ܡ̈ܠܟܝܢ#3#/ ܘܬܪ̈ܬܝܢ ܡ̈ܠܟܘܢ ܕܝܠܝ ܐ̈ܢܝܢ ܘܐܢܐ ܐܪܬ ܐ̈ܢܝܢ܂ ܘܡܪܝܐ ܬܡܢ ܗܘܐ܂
35:11 [ai]	ܡܛܠ ܗܢܐ ܚܝ ܐܢܐ ܐܡܿܪ ܡܪܐ ܡܪ̈ܘܬܐ܂ ܕܐܥܒܕ ܠܟ ܐܝܟ ܪܘܓܙܟ܂ ܘܐܝܟ ܒܥܠܕܒܒܘܬܟ ܕܥܒܕܬ ܘܣܢܝܬ ܐܢܘܢ܂ ܘܐܬܓܠܐ ܒܗܘܢ ܡܐ ܕܕܐܿܢ ܐܢܐ ܠܟ܂
35:12 [ai]	ܘܬܕܥ܂ ܕܐܢܐ ܐܢܐ ܡܪܝܐ܂ ܫܿܡܥܬ ܟܘܠܗ ܓܘܕܦܟ܂ ܕܐܡܪܬ ܥܠ ܛܘܪ̈ܐ ܕܐܝܣܪܝܠ܂ ܕܚܪܒܝܢ ܐܢܘܢ܂ ܘܡܐܟܘܠܬܐ ܐܢܘܢ ܕܝܠܢ܂
35:13 [ai]	ܘܐܘܪܟܬܘܢ ܥܠܝ ܦܘܡܟܘܢ܂ ܘܐܣܓܝܬܘܢ ܥܠܝ ܡ̈ܠܝܟܘܢ ܘܐܢܐ ܫܡܥܿܬ܂
35:14 [ai]	ܗܟܢܐ ܐܡܿܪ ܡܪܐ ܡܪ̈ܘܬܐ܂ ܠܛܘܪܐ ܕܣܥܝܪ ܕܫܪܐ ܒܚܕܘܬܐ ܕܟܠܗܿ ܐܪܥܐ܂ ܠܚܒܠܐ ܐܥܒܕܟ܂
35:15 [ai]	ܥܠ ܕܚܕܝܬ ܠܝܪܬܘܬܐ ܕܒܝܬ ܐܝܣܪܝܠ ܕܚܪܒܬ܂ ܗܟܢܐ ܐܥܒܕ ܠܟ܂ ܠܚܒܠܐ ܬܗܘܐ ܛܘܪܐ ܕܣܥܝܪ ܘܐܕܘܡ ܟܠܗܿ܂ ܘܢܕܥܘܢ܂ ܕܐܢܐ ܐܢܐ ܡܪܝܐ܂

next chapter