← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62030: P Ruth

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܘܗܼܘܐ ܒܝܘ̈ܡܝ ܕܝܿܢ̈ܐ܀ ܗܼܘܐ ܟܦܢܐ ܒܐܪܥܐ܂ ܘܐܙܠ ܓܒܪܐ ܡܢ ܒܝܬ ܠܚܡ ܕܝܗܘܕܐ ܠܡܥܡܪ ܒܐܪܥܐ ܕܡܘܐܒ܃ ܗܼܘ ܘܐܢܬܬܼܗ ܘܒ̈ܢܘܗܝ ܡܛܠ ܕܥܼܫܢ ܟܦܢܐ ܒܐܪܥܐ܀
01:02 [ai]ܘܫܡܗ ܠܓܒܪܐ ܐܠܝܡܠܟ܃ ܘܫܡܗܿ ܕܐܢܬܬܗ ܢܥܡܝ܂ ܘܫܡܗ̈ܐ ܕܒܢܘ̈ܗܝ ܡܠܝܘܢ ܘܟܠܝܘܢ ܐܦܪ̈ܬܝܐ ܡܢ ܒܝܬ ܠܚܡ ܕܝܗܘܕܐ܂ ܘܐܬܘ ܠܐܪܥܐ ܕܡܘܐܒ ܠܡܥܡܪ ܬܡܢ܀
01:03 [ai]ܘܡܼܝܬ ܐܠܝܡܠܟ ܒܥܠܗܿ ܕܢܥܡܝ܃ ܘܐܫܬܚܪܬ ܗܼܝ ܘܬܪܝܢ ܒܢܝܗܿ܀
01:04 [ai]ܘܢܣܼܒܘ ܠܗܘܢ ܢܫ̈ܐ ܡܘܐܒܝܬܐ܃ ܫܡܗܿ ܕܚܕܐ ܥܪܦܐ܃ ܘܫܡܗܿ ܕܐܚܪܬܐ ܪܥܘܬ܂ ܘܥܼܡܪܘ ܬܡܢ ܐܝܟ ܫ̈ܢܝܐ ܥܣܪ܀
01:05 [ai]ܘܡܝܬܘ ܬܪ̈ܝܗܘܢ ܒܢܝܗܿ܃ ܡܠܝܘܢ ܘܟܠܝܘܢ܃ ܘܐܬܓܙܝܬ ܐܢܬܬܐ ܡܢ ܒܥܠܗܿ ܘܡܢ ܬܪ̈ܝܗܘܢ ܒܢܝܗܿ܀
01:06 [ai]ܘܗܦܟܬ ܗܝ ܘܬܪ̈ܬܝܢ ‍<‍ܟܠܠܬܗ ܥܡܗ‍>‍ ܡܢ ܐܪܥܐ ܕܡܘܐܒ܂ ܡܛܠ ܕܫܼܡܥܘ ܒܐܪܥܐ ܕܡܘܐܒ ܕܣܼܥܪ ܡܪܝܐ ܠܥܡܗ ܠܡܬܠ ܠܗܘܢ ܡܙܘܢܐ܀
01:07 [ai]ܘܢܼܦܩ ܡܢ ܐܪܥܐ ܕܡܥܡܪܗܼܝܢ܃ ܗܼܝ ܘܬܪ̈ܬܝܢ ܟ̈ܠܬܗܿ ܥܡܗܿ܃ ܠܡܗܦܟ ܘܠܡܐܙܠ ܠܐܪܥܐ ܕܝܗܘܕܐ܀
01:08 [ai]ܘܐܡܪܬ ܢܥܡܝ ܠܟ̈ܠܬܗܿ܃ ܗܦܘ̈ܟܝܢ ܙ̈ܠܝܢ ܠܐܬܪܟܼܝܢ ܘܠܒܝܬ ܐܢܫܝ̈ܟܝܢ܂ ܘܡܪܝܐ ܢܥܒܕ ܥܡܟܝܢ ܪ̈ܚܼܡܐ܀ ܐܝܟ ܕܥܒܕܬܝܢ ܥܡܝ܃ ܘܥܡ ܬܪ̈ܝܗܘܢ ܒ̈ܢܝ ܕܡܝܬܘ܀
01:09 [ai]ܘܢܬܠܟܝܢ ܡܪܝܐ ܠܪ̈ܚܼܡܐ܃ ܘܬܫܟܚܝܢ ܢܝܚܐ ܒܝܬ ܐܒܗܝ̈ܟܝܢ܂ ܘܢܼܫܩܬ ܐ̈ܢܝܢ܃ ܘܐܪܝܡ ܩܠܗܼܝܢ ܘܒ̈ܟܝܝ܀
01:10 [ai]ܘܐܡܪ̈ܢ ܠܗܿ ܠܐ܃ ܐܠܐ ܥܡܟܝ ܢܐܙܠ ܠܐܪܥܟܝ ܘܠܥܡܟܝ܀
01:11 [ai]ܘܐܡܪܬ ܠܗܝܢ ܢܥܡܝ܃ ܗܦܘ̈ܟܝܢ ܒ̈ܢܬܝ܃ ܡܢܐ ܐܙ̈ܠܢ ܐܢܬܝܢ ܥܡܝ܂ ܕܕܠܡܐ ܬܘܒ ܢܗܘܘܢ ܠܝ ܒܢܝܐ ܘܐܬܠܟܝܢ ܠܗܘܢ
01:12 [ai]ܗܦܘ̈ܟܝܢ ܒܢܬ̈ܝ܃ ܡܛܠ ܕܐܢܐ ܣܐܒܬ ܠܝ ܡܢ ܕܠܡܗܘܐ ܠܓܒܪܿܐ܃ ܕܐܡܪ ܕܬܘܒ ܢܗܘܐ ܠܝ ܣܒܪܿܐ܃ ܘܐܗܘܐ ܠܓܒܪܐ ܘܐܘܠܕ ܒ̈ܢܝܿܐ܀
01:13 [ai]ܘܐܢܬܝܢ ܬܣ̈ܟܝܢ ܠܗܘܢ ܥܕܡܐ ܕܢܐܪܒܘܢ܃ ܘܬܬܥܟܪ̈ܢ ܡܢ ܕܠܡܗܘܐ ܠܓܒܪ̈ܐ ܠܐܿ ܒܢ̈ܬܝ܃ ܡܛܠ ܕܡܿܪܬ ܠܝ ܛܒ ܥܠܝܟܝܢ܃ ܘܠܝ ܡܪܝܪܐ ܝܬܝܪ ܡܢܟܝܢ܃ ܡܛܠ ܕܐܝܼܕܗ ܕܡܪܝܐ ܢܦܼܩܬ ܒܬܪܝ܀
01:14 [ai]ܘܐܪܝܡ ܬܘܒ ܩܠܗܝܼܢ ܘܒ̈ܟܝ܂ ܘܢܫܩܬ ܥܪܦܐ ܠܚܡܬܗܿ ܘܗܦܟܬ ܘܐܼܙܠܬ܃ ܪܥܘܬ ܕܝܢ ܢܩܦܬܗܿ܀
01:15 [ai]ܘܐܡܪܬ ܠܗ ܚܡܬܗܿ܃ ܗܐ ܝܒܡܬܟܝ ܗܼܦܟܬ ܠܥܡܗܿ ܘܠܒܝܬ ܐܢܫ̈ܝܗܿ܃ ܗܦܘܟܝ ܐܦ ܐܢܬ ܒܬܪ ܝܒܡܬܟܝ܀
01:16 [ai]ܘܐܡܪܬ ܠܗܿ ܪܥܘܬ܃ ܚܣ ܠܝܼ ܕܐܗܦܘܟ ܡܢ ܠܘܬܟܝ ܘܐܫܒܩܟܝ܃ ܡܛܠ ܕܠܐܬܪ ܕܬܐܙܠܝܼܢ܀ ܐܿܙܠ܃ ܘܐܝܟܐ ܕܬܥܡܪܝܼܢ ܐܿܥܡܪ܂ ܥܡܟܝ ܥܡܝ܃ ܘܐܠܗܟܼܝ ܐܠܗܝ܀
01:17 [ai]ܘܐܬܪ ܕܬܡܘܬܝܢ܃ ܐܡܘܬ ܐܦ ܐܢܐ ܘܐܬܩܒܪ܂ ܗܟܢܐ ܢܥܒܕ ܠܝ ܐܠܗܐ ܘܗܟܢܐ ܢܘܣܦ ܠܼܝ܃ ܐܠܐ ܐܢ ܡܘܬܐ ܒܠܚܘܕ ܕܢܦܪܘܫ ܒܝܢܝ ܘܠܟܝ܀
01:18 [ai]ܟܕ ܚܙܬ ܕܝܢ ܢܥܡܝ ܕܫܪܝܪܐܝܬ ܐܨܛܒܝܼܬ ܠܡܐܙܠ ܥܡܗܿ܃ ܫܠܼܝܬ ܡܢ ܕܠܡܐܡܪ ܠܗܿ ܠܡܐܙܠ܀
01:19 [ai]ܘܐܬܝ ܐܟܚܕܐ ܥܕܡܐ ܠܒܝܬ ܠܚܡ ܕܝܗܘܕܐ܃ ܘܗܼܘܐ ܕܟܕ ܐ̈ܬܝ ܠܒܝܬ ܠܚܡ܃ ܚܕܝܬ ܒܗܝܼܢ ܟܘܠܗܿ ܡܕܝܢܬܐ܃ ܘܐܿܡܪܝܢ ܗܕܐ ܗܝ ܢܥܡܝ܀
01:20 [ai]ܘܐܡܪܬ ܠܗܝܼܢ ܠܐ ܬܩܪܝܢܢܝ ܢܥܡܝ ܐܠܐ ܩܪܝܢܢܝ ܡܪܝܪܬ ܢܦܫܐ܃ ܡܛܠ ܕܐܠܫܕܝ ܡܪܡܪܢܝ ܛܒܿ܀
01:21 [ai]ܡܠܝܐܝܬ ܓܝܪ ܐܙܠܬ ܡܟܐ܃ ܘܡܪܝܐ ܐܗܦܟܢܝ ܣܪܝܩܐܝܬ܂ ܘܠܡܢܐ ܡܟܝܠ ܩܿܪܝܢ ܐܢܬܘܢ ܠܝ ܢܥܡܝ ܕܡܪܝܐ ܡܟܟܢܝ܃ ܘܡܿܢ ܕܡܿܛܐ ܒܐܝܕ̈ܘܗܝ ܐܒܐܫ ܠܝ܀
01:22 [ai]ܘܗܿܦܟܬ ܢܥܡܝ ܘܪܥܘܬ ܡܘܐܒܝܬܐ ܟܠܬܗܿ ܥܡܗܿ܃ ܕܐܨܛܒܝܬ ܠܡܗܦܟ ܥܡܗܿ ܒܠܒܐ ܫܠܡܐ܂ ܘܐ̈ܬܝ ܡܢ ܐܪܥܐ ܕܡܘܐܒ ܒܪܝܫ ܚܣܕܐ ܕܣܥܪ̈ܐ܀

next chapter