← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62033: P Lam

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

01:01 [ai]ܐܝܟܢܐ ܝܬܒܬ ܒܠܚܘܕܝܗܿ ܡܕܝܢܬܐ ܣܓܝܐܬ ܒܥܡܐ܂ ܗܘܬ ܐܝܟ ܐܪܡܠܬܐ ܣܓܝܐܬ ܒܥܡ̈ܡܐ܂ ܪܝܫܐ ܕܡܕܝ̈ܢܬܐ ܗܘܬ ܠܡܕܐܬܐ܀
01:02 [ai]ܒܟܬ ܒܠܠܝܐ ܘܕܡ̈ܥܝܗܿ ܫܚܠ ܥܠ ܦܟ̈ܝܗܿ܂ ܘܠܝܬ ܠܗܿ ܡܒܝܐܢܐ ܡܢ ܟܠܗܘܢ ܪ̈ܚܡܝܗܿ܂ ܟܠܗܘܢ ܪ̈ܚܡܝܗ ܕܓܠܘ ܒܗܿ ܘܗܘܘ ܠܗܿ ܒܥܠܕܒ̈ܒܐ܀
01:03 [ai]ܓܠܝܬ ܝܗܘܕܐ ܡܢ ܫܘܥܒܕܐ ܘܡܢ ܣܘܓܐܬ ܥܒܕܘܬܐ܂ ܗܝ ܝܬܒܬ ܒܝܬ ܥܡ̈ܡܐ ܘܠܐ ܐܫܟܚܬ ܠܗܿ ܢܝܚܐ܂ ܟܠܗܘܢ ܪ̈ܕܘܦܝܗܿ܂ ܐܕܪܟܘܗܿ ܒܝܬ ܐܘܠܨܢܐ܀
01:04 [ai]ܐܘܪ̈ܚܬܗܿ ܕܨܗܝܘܢ ܒܐܒܠܐ ܡܢ ܒܠܝ ܕܐܬܝܢ ܠܥܕܥܕܐ܂ ܟܠܗܘܢ ܬܪ̈ܥܝܗܿ ܨܕܝܢ ܘܟܗ̈ܢܝܗܿ܂ ܡܬܬܢܚܝܢ܂ ܘܒܬܘ̈ܠܬܗܿ ܡܡ̈ܟܟܢ ܘܗܝ ܡܪܝܪ ܠܗܿ܀
01:05 [ai]ܗܘܘ ܐܠܘ̈ܨܝܗܿ ܠܪܝܫ ܘܒܥܠܕܒ̈ܒܝܗܿ܂ ܫܠܝܘ܂ ܡܛܠ ܕܡܪܝܐ ܡܟܟܗܿ ܥܠ ܣܘܓܐܬ ܚ̈ܛܗܝܗܿ܂ ܘܝܠܘ̈ܕܝܗܿ܂ ܐܙܠܘ ܒܫܒܝܐ ܩܕܡ ܐܠܘܨܐ܀
01:06 [ai]ܘܢܦܩ ܡܢ ܒܪܬ ܨܗܝܘܢ ܟܠܗ ܗܕܪܗܿ܂ ܗܘܘ ܪܘܪ̈ܒܢܝܗܿ ܐܝܟ ܐ̈ܝܠܐ ܘܠܐ ܐܫܟܚܘ ܡܪܥܝܬܐ܂ ܘܐܙܠܘ ܕܠܐ ܚܝܠܐ ܩܕܡ ܪܕܘܦܐ܀
01:07 [ai]ܐܬܕܟܪܬ ܐܘܪܫܠܡ ܝܘ̈ܡܝ ܫܘܥܒܕܗܿ ܘܡܪܕܘܬܗܿ ܘܟܠܗܝܢ ܪ̈ܓܝܓܬܗܿ ܕܗ̈ܘܝ ܡܢ ܝܘܡ̈ܬܐ ܩܕܡ̈ܝܐ܂ ܟܕ ܢܦܠ ܥܡܗܿ ܒܝܕ ܐܠܘܨܐ ܘܠܝܬ ܠܗܿ ܡܥܕܪܢܐ܂ ܚܙܘܗܿ ܐܠܘ̈ܨܝܗܿ ܘܓܚܟܘ ܥܠ ܬܒܪܗܿ܀
01:08 [ai]ܚܛܗܐ ܚܛܬ ܐܘܪܫܠܡ ܡܛܠ ܗܢܐ ܗܘܬ ܢܕܬܐ܂ ܟܠܗܘܢ ܡܝܩܪ̈ܢܝܗܿ ܨܥܪܘܗܿ ܡܛܠ ܕܚܙܘ ܦܘܪܣܝܗܿ܂ ܐܦ ܗܝ ܐܬܬܢܚܬ ܘܗܦܟܬ ܠܒܣܬܪܗܿ܀
01:09 [ai]ܛܡܐܘܬܗܿ ܒܫ̈ܦܘܠܝܗܿ ܘܠܐ ܐܬܕܟܪܬ ܚܪܬܗܿ܂ ܘܢܚܬܬ ܬܫܒܘܚܬܗܿ ܘܠܝܬ ܠܗܿ ܡܒܝܐܢܐ܂ ܚܙܝ ܡܪܝܐ ܫܘܥܒܕܝ ܕܐܬܬܪܝܡ ܒܥܠܕܒܒܐ܀
01:10 [ai]ܐܝ̈ܕܘܗܝ ܦܪܣ ܐܠܘܨܐ ܥܠ ܟܠܗܝܢ ܪ̈ܓܝܓܬܗܿ܂ ܘܚܙܝܬ ܥܡ̈ܡܐ ܕܥܠܘ ܠܡܩܕܫܟ܃ ܕܦܩܕܬ ܕܠܐ ܢܥܠܘܢ ܒܟܢܘܫܬܟ܀
01:11 [ai]ܟܠܗ ܥܡܐ ܡܬܬܢܚܝܢ ܘܒܥܝܢ ܠܚܡܐ܂ ܝܗܒܘ ܪܓܬܗܘܢ ܒܡܐܟܘܠܬܐ ܠܡܦܢܝܘ ܢܦܫܐ܂ ܚܙܝ ܡܪܝܐ ܘܚܘܪ ܕܗܘܝܬ ܙܠܝܠܬܐ܀
01:12 [ai]ܠܐ ܠܟܘܢ ܟܠ ܥܒܪ̈ܝ ܐܘܪܚܐ ܐܣܬܟܠܘ ܘܚܙܘ܂ ܐܢ ܐܝܬ ܟܐܒܐ ܐܝܟ ܟܐܒܝ ܕܥܒܕ ܠܝ ܡܪܝܐ܂ ܘܡܟܟܢܝ ܡܪܝܐ ܒܝܘܡܐ ܕܚܡܬܐ ܕܪܘܓܙܗ܀
01:13 [ai]ܡܢ ܡܪܘܡܐ ܫܕܪ ܢܘܪܐ ܒܓܪ̈ܡܝ ܘܐܚܬܢܝ܂ ܦܪܣ ܡܨܝܕܬܐ ܠܪ̈ܓܠܝ ܘܐܗܦܟܢܝ ܠܒܣܬܪܝ ܘܝܗܒܢܝ ܠܚܪܒܐ ܘܟܠ ܝܘܡ ܕܘܝܐ ܐܢܐ܀
01:14 [ai]ܐܬܬܥܝܪܘ ܥܠܝ ܚ̈ܛܗܝ܂ ܘܒܐܝ̈ܕܘܗܝ܂ ܐܣܬܪܓܘ ܢܝܪ̈ܘܗܝ ܥܠ ܨܘܪܝ܂ ܘܐܬܟܪܗ ܚܝܠܝ܂ ܘܐܫܠܡܢܝ ܡܪܝܐ ܒܐܝܕܐ ܕܡܢ ܕܠܐ ܡܨܝܐ ܐܢܐ ܚܝܠܗ܀
01:15 [ai]ܟܒܫ ܟܠܗܘܢ ܥܫ̈ܝܢܝ ܡܪܝܐ ܒܓܘܝ܂ ܩܪܐ ܥܠܝ ܥܕܥܕܐ ܠܡܘܒܕܘ ܓܕܘ̈ܕܝ܂ ܡܥܨܪܬܐ ܕܫ ܡܪܝܐ ܠܒܬܘܠܬܐ ܒܪܬ ܝܗܘܕܐ܀
01:16 [ai]ܥܠ ܗܠܝܢ ܒܟܝܐ ܐܢܐ ܘܥܝ̈ܢܝ ܡܪ̈ܕܝܢ ܡ̈ܝܐ܃ ܕܐܪܚܩ ܡܢܝ ܡܒܝܐܢܐ ܡܦܢܐ ܢܦܫܝ܂ ܗܘܘ ܒ̈ܢܝ ܫܩܡܝܢ ܡܛܠ ܕܥܫܢ ܒܥܠܕܒܒܐ܀
01:17 [ai]ܦܪܣܬ ܨܗܝܘܢ ܐܝ̈ܕܝܗܿ܂ ܘܠܝܬ ܠܗܿ ܡܒܝܐܢܐ܂ ܦܩܕ ܡܪܝܐ ܥܠ ܝܥܩܘܒ ܘܚܕܪ̈ܘܗܝ ܐܠܘ̈ܨܘܗܝ܂ ܗܘܬ ܐܘܪܫܠܡ ܢܕܬܐ ܒܝܢܬܗܘܢ܀
01:18 [ai]ܙܕܝܩ ܗܘ ܡܪܝܐ ܕܠܗ ܡܪܡܪܬ܂ ܫܡܥܘ ܟܠܟܘܢ ܥܡ̈ܡܐ ܘܚܙܘ ܟܐܒܝ܂ ܒܬܘ̈ܠܬܝ ܘܓܕܘ̈ܕܝ ܐܙܠܘ ܒܫܒܝܐ܀
01:19 [ai]ܩܪܝܬ ܠܪ̈ܚܡܝ ܘܗܢܘܢ ܢܟܠܘܢܝ܂ ܟܗ̈ܢܝ ܘܩܫܝ̈ܫܝ ܒܓܘ ܣܦܘ ܕܒܥܘ ܠܗܘܢ ܡܐܟܘܠܬܐ ܕܢܦܢܘܢ ܢܦܫܗܘܢ ܘܠܐ ܐܫܟܚܘ܀
01:20 [ai]ܚܙܝ ܡܪܝܐ ܕܥܩܬ ܠܝ ܘܡ̈ܥܝ ܐܬܕܠܚܘ܂ ܐܬܗܦܟ ܠܒܝ ܒܓܘܝ ܡܛܠ ܕܡܡܪܡܪܘ ܡܪܡܪܬ ܡܢ ܠܒܪ ܐܘܒܕܬ ܚܪܒܐ ܘܕܒܒܝܬܐ ܡܘܬܐ܀
01:21 [ai]ܫܡܥ ܕܡܬܬܢܚܐ ܐܢܐ ܘܠܝܬ ܠܝ ܡܒܝܐܢܐ܂ ܟܠܗܘܢ ܒܥܠܕܒ̈ܒܝ ܫܡܥܘ ܒܒܝܫܬܝ܃ ܘܚܕܝܘ ܕܐܢܬ ܥܒܕܬ ܠܝ ܐܝܬܐ ܝܘܡܐ ܕܩܪܝܬ ܘܢܗܘܘܢ ܐܟܘܬܝ܀
01:22 [ai]ܬܥܘܠ ܟܠܗܿ ܒܝܫܘܬܗܘܢ ܩܕܡܝܟ܂ ܛܪܦ ܐܢܘܢ܂ ܐܝܟܢܐ ܕܛܪܦܬܢܝ ܥܠ ܟܠܗܘܢ ܚ̈ܛܗܝ ܡܛܠ ܕܣ̈ܓܝ ܬܢܚ̈ܬܝ ܘܠܒܝ ܕܘܿܐ܀

next chapter