← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62033: P Lam

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܐܝܟܢܐ ܐܥܝܒ ܡܪܝܐ ܒܪܘܓܙܗ ܠܒܪܬ ܨܗܝܘܢ܂ ܐܪܡܝ ܡܢ ܫܡܝܐ ܠܐܪܥܐ ܬܫܒܘܚܬܗ ܕܐܝܣܪܝܠ܂ ܘܠܐ ܐܬܕܟܪ ܟܘܒܫܐ ܕܪ̈ܓܠܘܗܝ ܒܝܘܡܐ ܕܚܡܬܐ ܕܪܘܓܙܗ܀
02:02 [ai]ܛܒܥ ܡܪܝܐ ܘܠܐ ܚܣ ܠܟܠܗܿ ܕܝܪܗ ܕܝܥܩܘܒ܂ ܣܚܦ ܒܚܡܬܗ ܠܟܪܟܐ ܕܒܪܬ ܝܗܘܕܐ܂ ܐܪܡܝ ܥܠ ܐܪܥܐ ܩܛܝ̈ܠܝܗܿ ܡ̈ܠܟܝܗܿ ܘܪܘܪ̈ܒܢܝܗܿ܀
02:03 [ai]ܓܪܡ ܒܚܡܬܐ ܕܪܘܓܙܗ ܟܠܗܿ ܩܪܢܗ ܕܐܝܣܪܝܠ܂ ܐܗܦܟ ܝܡܝܢܗ ܠܒܣܬܪܗ ܡܢ ܩܕܡ ܒܥܠܕܒܒܐ܂ ܘܫܒܩ ܢܘܪܐ ܒܝܥܩܘܒ ܘܫܠܗܒܝܬܐ ܐܟܠܬ ܐܝ̈ܕܘܗܝ܀
02:04 [ai]ܡܠܐ ܩܫܬܗ ܐܝܟ ܐܠܘܨܐ܂ ܐܩܝܡ ܝܡܝܢܗ ܐܝܟ ܒܥܠܕܒܒܐ܂ ܘܩܛܠ ܟܠ ܪܓܬ ܥܝܢ̈ܐ ܒܡܿܫܟܢܐ ܕܒܪܬ ܨܗܝܘܢ܂ ܘܐܫܕ ܐܝܟ ܢܘܪܐ ܪܘܓܙܗ܀
02:05 [ai]ܗܘܐ ܡܪܝܐ ܐܝܟ ܒܥܠܕܒܒܐ ܘܛܒܥܗ ܠܐܝܣܪܐܝܠ܂ ܘܛܿܒܥ ܟܠܗܝܢ ܣܚܪ̈ܬܗ܂ ܘܚܿܒܠ ܟܪ̈ܟܘܗܝ܂ ܘܐܣܓܝ ܒܒܪܬ ܝܗܘܕܐ ܬܘܢܝܐ ܘܐܘ̈ܠܝܬܐ܀
02:06 [ai]ܘܥܩܪ ܐܝܟ ܓܢܬܐ ܡܛܠܬܗܿ܂ ܘܚܿܒܠ ܥܕ̈ܥܐܕܝܗܿ܂ ܐܛܥܝ ܡܪܝܐ ܡܢ ܨܗܝܘܢ ܥܕܥܕܐ܂ ܘܫܒܬܐ܂ ܘܐܣܠܝ ܒܚܡܬܐ ܕܪܘܓܙܗ ܡ̈ܠܟܐ ܘܟܗ̈ܢܐ܀
02:07 [ai]ܛܥܐ ܡܪܝܐ ܡܕܒܚܗ܂ ܐܣܠܝܐ ܡܿܩܕܫܗ܂ ܐܫܠܡ ܒܐܝܕܐ ܕܒܥܠܕܒܒܐ ܫܘܪ̈ܐ ܕܣܚܪ̈ܬܗܿ ܩܠܐ ܝܗܒܘ ܒܒܝܬܗ ܕܡܪܝܐ ܐܝܟ ܕܒܝܘܡܐ ܕܥܕܥܕܐ܀
02:08 [ai]ܐܬܚܫܒ ܡܪܝܐ ܠܡܚܒܠܘ ܫܘܪ̈ܝܗܿ ܕܒܪܬ ܨܗܝܘܢ܂ ܐܪܡܝ ܚܘܛܐ ܘܠܐ ܐܗܦܟ ܐܝܕܗ ܡܢ ܛܘܒܥܗܿ܂ ܘܐܘܬܒ ܒܐܒܠܐ ܚܝ̈ܠܗܿ ܘܫܘܪ̈ܝܗܿ ܐܟܚܕܐ ܨܕܘ܀
02:09 [ai]ܛܒܥܘ ܒܐܪܥܐ ܬܪ̈ܥܝܗܿ ܘܐܘܒܕܘ ܘܬܒܪܘ ܣܘܟܪ̈ܝܗܿ܂ ܡ̈ܠܟܝܗܿ ܘܪܘܪ̈ܒܢܝܗܿ ܒܥܡ̈ܡܐ܂ ܠܝܬ ܢܡܘܣܐ܂ ܐܦ ܢܒ̈ܝܝܗܿ ܠܐ ܐܫܟܚܘ ܚܙܘܐ ܡܢ ܡܪܝܐ܀
02:10 [ai]ܝܬܒܘ ܒܐܪܥܐ ܘܫܬܩܘ ܩܫܝܫ̈ܐ ܕܒܪܬ ܨܗܝܘܢ܂ ܐܪܡܝܘ ܥܦܪܐ ܒܪ̈ܝܫܝܗܘܢ܂ ܘܐܬܟܒܢܘ ܣܩ̈ܐ ܣܡܟ ܠܐܪܥܐ ܪ̈ܝܫܝܗܝܢ ܒܬܘܠ̈ܬܐ ܕܐܘܪܫܠܡ܀
02:11 [ai]ܚܫܟ ܒܕܡ̈ܥܐ ܥܝܢ̈ܝ ܘܐܬܕܠܚܘ ܡ̈ܥܝ܂ ܐܬܗܦܟ ܠܐܪܥܐ ܐܝܩܪܝ܂ ܥܠ ܬܒܪܗܿ ܕܒܪܬ ܥܡܝ܂ ܟܕ ܐܬܛܪܦܘ ܛܠ̈ܝܐ ܘܝܠܘܕ̈ܐ ܒܫܘܩ̈ܝܗܿ ܕܩܪܝܬܐ܀
02:12 [ai]ܠܐܡ̈ܗܬܗܘܢ ܐܿܡܪܝܢ܂ ܐܝܟܘ ܥܒܘܪܐ ܘܚܡܪܐ ܘܡܫܚܐ ܟܕ ܐܬܛܪܦܘ ܐܝܟ ܩ̈ܛܝܠܐ ܒܫܘܩ̈ܝܗܿ ܕܩܪܝܬܐ܂ ܟܕ ܐܬܐܫܕ ܢܦܫ̈ܬܗܘܢ ܒܥܘܒܐ ܕܐܡ̈ܗܬܗܘܢ܀
02:13 [ai]ܡܢܐ ܐܣܗܕܟܝ ܘܡܢ ܐܕܡܐ ܠܟܝ ܒܪܬ ܐܘܪܫܠܡ܂ ܡܢ ܐܦܚܡ ܠܟܝ ܘܐܒܝܐܟܝ܂ ܒܬܘܠܬܐ ܒܪܬ ܨܗܝܘܢ܂ ܕܣܓܝ ܐܝܟ ܝܡܐ ܬܒܪܟܝ ܡܢܘ ܢܣܟܘܪ܀
02:14 [ai]ܢܒ̈ܝܝܟܝ ܚܙܘ ܠܟܝ ܕܓܠܘܬܐ ܘܡܛܥܝܢܘܬܐ܂ ܘܠܐ ܓܠܘ ܠܟܝ ܥܠ ܚܛܗ̈ܝܟܝ ܕܬܬܘܒܝܢ ܘܐܗܦܟ ܫܒܝܬܟܝ܂ ܘܚܙܘ ܠܟܝ ܢܒ̈ܝܘܬܐ ܕܓ̈ܠܬܐ ܘܡܿܛܥ̈ܝܢܝܬܐ܀
02:15 [ai]ܛܪܦܘ ܥܠܝܟܝ ܐܝܕ̈ܝܗܘܢ܂ ܟܠ ܥܒܪ̈ܝ ܐܘܪܚܐ܂ ܐܫܪܩܘ ܘܐܢܝܪܘ ܪ̈ܝܫܝܗܗܘܢ ܥܠ ܒܪܬ ܐܘܪܫܠܡ܂ ܘܐܡܪܘ܂ ܗܕܐܗܝ ܩܪܝܬܐ ܕܐܡܪܝܢ ܗܘܘ ܓܡܝܪܬ ܫܘܦܪܐ ܘܚܕܘܬܐ ܕܟܠܗܿ ܐܪܥܐ܀
02:16 [ai]ܥܒܕ ܡܪܝܐ ܡܕܡ ܕܐܬܚܫܒ܂ ܘܫܡܠܝ ܡܠܬܗ ܐܝܟ ܕܦܩܕ ܡܢ ܝܘܡ̈ܬܐ ܩܕ̈ܡܝܐ܂ ܣܚܦܗܿ ܘܠܐ ܚܣ܂ ܘܐܚܕܝ ܥܠܝܟܝ ܒܥܠܕ̈ܒܒܐ ܘܐܪܝܡ ܩܪܢܐ ܕܐܠܘܨܝ̈ܟܝ܀
02:17 [ai]ܦܬܚܘ ܥܠܝܟܝ ܦܘܡܗܘܢ ܟܠܗܘܢ ܒܥܠܕ̈ܒܒܝܟܝ܂ ܐܫܪܩܘ ܘܚܪܩܘ ܫܢ̈ܝܗܘܢ܂ ܘܐܡܪܝܢ ܒܠܥܢܗܿ܂ ܒܪܡ ܗܢܘ ܝܘܡܐ ܕܣܟܝܢ ܐܫܟܚܢ ܘܚܙܝܢ܀
02:18 [ai]ܓܥܐ ܠܒܗܘܢ ܠܘܬ ܡܪܝܐ ܕܫܘܪ̈ܐ ܕܒܪܬ ܨܗܝܘܢ܂ ܐܪܕܝ ܐܝܟ ܢܚܠܐ ܕܡܥܬܐ ܒܐܝܡܡܐ ܘܒܠܠܝܐ܂ ܠܐ ܬܬܠܝܢ ܠܟܝ ܦܘܝܓܐ ܘܠܐ ܬܫܠܐ ܒܒܬ ܥܝܢܟܝ܀
02:19 [ai]ܩܘܡܝ ܫܒܚܝ ܒܠܠܝܐ ܒܪܝܫ ܡܛܪܬܐ܂ ܘܐܫܘܕܝ ܐܝܟ ܡ̈ܝܐ ܠܒܟܝ ܠܘܩܒܠ ܐܦ̈ܝ ܡܪܝܐ܂ ܐܪܝܡܝ ܠܘܬܗ ܐܝܕ̈ܝܟܝ ܥܠ ܢܦܫܐ ܕܝܠܘܕ̈ܝܟܝ܂ ܕܡܬܛܪܦܝܢ ܠܟܦܢܐ ܒܪܝܫ ܟܠܗܘܢ ܫܘܩ̈ܐ܀
02:20 [ai]ܚܙܝ ܡܪܝܐ ܘܚܘܪ ܠܡܢ ܥܒܕܬ ܗܟܢܐ܂ ܐܝܟ ܢܐܟ̈ܠܢ ܢܫ̈ܐ ܦܐܪ̈ܝܗܝܢ܂ ܝܠܘܕ̈ܐ ܕܡܫܬܩܦܝܢ܂ ܐܝܢ ܢܬܩܛܠ ܒܡܩܕܫܗ ܕܡܪܝܐ ܟܗܢܐ ܘܢܒܝܐ܀
02:21 [ai]ܫܟܒܘ ܥܠ ܐܪܥܐ ܒܫܘܩ̈ܐ ܛܠ̈ܝܐ ܘܣܒ̈ܐ܂ ܒܬܘ̈ܠܬܝ ܘܓܕ̈ܘܕܝ ܢܦܠܘ ܒܚܪܒܐ܂ ܩܛܠܬ ܒܝܘܡܐ ܕܪܘܓܙܟ܂ ܛܒܚܬ ܘܠܐ ܚܣܬ܀
02:22 [ai]ܩܪܝܬ ܐܝܟ ܝܘܡܐ ܕܥܕܥܕܐ ܒܥܠܕ̈ܒܒܝ܂ ܡܢ ܚܕܪ̈ܝ܂ ܘܠܐ ܗܘܐ ܒܝܘܡܐ ܕܪܘܓܙܗ ܕܡܪܝܐ ܦܠܝܛܐ ܘܣܪܝܕܐ܂ ܕܫܩܠܬ ܘܪܒܝܬ ܒܥܠܕ̈ܒܒܝ ܓܡܪܘ ܐܢܘܢ܀

next chapter