The Comprehensive Aramaic Lexicon

03:01 [ai]	ܐܝܠ ܓܢܒܪܐ ܚܙܝ ܫܘܥܒܕܝ܂ ܒܫܒܛܐ ܕܪܘܓܙܗ܀
03:02 [ai]	ܠܝ ܕܒܪ܂ ܘܗܠܟܢܝ ܒܚܫܘܟܐ ܘܠܐ ܒܢܗܝܪܐ܀
03:03 [ai]	ܒܪܡ ܒܝ ܢܬܘܒ ܘܢܗܦܟ ܐܝܕܗ ܟܠܗ ܝܘܡܐ܀
03:04 [ai]	ܒܠܝ ܡܫܟܝ ܘܒܣܪܝ ܘܬܒܪ ܓܪ̈ܡܝ܀
03:05 [ai]	ܒܢܐ ܥܠܝ ܘܐܟܪܟܢܝ ܡܪܪܐ ܘܚܘܪܒܐ܀
03:06 [ai]	ܒܚܫܘܟܐ ܐܘܬܒܢܝ܂ ܐܝܟ ܡܝܬܐ ܠܥܠܡ܀
03:07 [ai]	ܣܓ ܒܐܦ̈ܝ ܕܠܐ ܐܦܘܩ܂ ܘܐܥܫܢ ܐܣܘܪ̈ܝ܀
03:08 [ai]	ܐܦܢ ܐܒܥܐ ܘܐܨܠܐ ܠܐ ܫܡܥ ܨܠܘܬܝ܀
03:09 [ai]	ܣܓ ܐܘܪ̈ܚܬܝ ܒܟܘ̈ܒܐ ܘܫܒ̈ܝܠܝ ܥܩܡ܀
03:10 [ai]	ܕܐܒܐ ܟܡܢܐ ܗܘܐ ܠܝ܂ ܘܐܪܝܐ ܒܛܘܫܝܐ܀
03:11 [ai]	ܐܘܪ̈ܚܬܝ ܥܩܡ܂ ܦܫܚܢܝ ܘܣܡܢܝ ܠܚܒܠܐ܀
03:12 [ai]	ܡܠܐ ܩܫܬܗ ܘܐܩܝܡܢܝ ܐܝܟ ܢܝܫܐ ܠܓܐܪ̈ܐ܀
03:13 [ai]	ܗܐ ܐܥܠ ܒܟܘ̈ܠܝܬܝ ܓܐܪ̈ܘܗܝ܀
03:14 [ai]	ܗܘܝܬ ܓܘܚܟܐ ܒܟܠܗܘܢ ܥܡ̈ܡܐ܂ ܘܙܡܝܪܬܗܘܢ ܟܠܗ ܝܘܡܐ܀
03:15 [ai]	ܐܣܒܥܢܝ ܡܪܪ̈ܐ ܘܐܪܘܝܢܝ ܓܕ̈ܕܐ܀
03:16 [ai]	ܘܬܒܪ ܒܟܐܦܐ ܫܢ̈ܝ ܘܦܠܢܝ ܒܩܛܡܐ܀
03:17 [ai]	ܘܐܬܛܥܝܬ ܡܢ ܫܠܡܐ ܢܦܫܝ ܘܛܥܝܬ ܛܒܬܐ܀
03:18 [ai]	ܘܐܡܪܬ ܕܐܒܕܘ ܢܨ̈ܚܢܝ ܘܣܒܪܝ ܡܢ ܡܪܝܐ܀
03:19 [ai]	ܐܬܕܟܪ ܫܘܥܒܕܝ ܘܡܪܕܘܬܝ ܕܡܪܪ̈ܐ ܘܕܓܕ̈ܕܐ܀
03:20 [ai]	ܐܬܕܟܪ ܘܐܦܢܐ ܢܦܫܝ ܥܠܝ܀
03:21 [ai]	ܗܕܐ ܐܬܝܒ ܥܠ ܠܒܝ܂ ܡܛܠ ܗܢܐ ܐܣܟܐ ܠܗ܀
03:22 [ai]	ܚܣܕ̈ܘܗܝ ܕܡܪܝܐ ܕܠܐ ܛܠܩܝܢ ܘܠܐ ܓܡܪܝܢ ܪ̈ܚܡܘܗܝ܀
03:23 [ai]	ܒܚܘܕܬܐ ܕܨܦܪܐ ܣܓܝܐܐ ܗܝܡܢܘܬܟ ܡܪܝܐ܀
03:24 [ai]	ܐܡܪܬ ܢܦܫܝ ܡܢܬܝ ܗܘ܂ ܡܛܠ ܗܢܐ ܐܣܟܐ ܠܗ܀
03:25 [ai]	ܛܒ ܡܪܝܐ ܠܡܢ ܕܡܣܟܐ ܠܗ ܘܠܢܦܫܐ ܕܒܥܝܐ ܠܗ܀
03:26 [ai]	ܛܒ ܠܡܢ ܕܡܣܟܪ ܒܩܘܫܬܐ ܠܦܘܪܩܢܗ ܕܡܪܝܐ܀
03:27 [ai]	ܛܒ ܠܓܒܪܐ ܟܕ ܢܫܩܘܠ ܢܝܪܟ ܒܛܠܝܘܬܗ܀
03:28 [ai]	ܢܬܒ ܒܠܚܘܕܘܗܝ ܘܢܫܬܘܩ܂ ܡܛܠ ܕܩܒܠ ܥܠܘܗܝ ܢܝܪܟ܀
03:29 [ai]	ܢܬܠ ܒܥܦܪܐ ܦܘܡܗ ܡܛܠ ܕܐܝܬ ܣܒܪܐ܀
03:30 [ai]	ܢܬܠ ܦܟܗ ܠܡܢ ܕܡܚܐ ܠܗ ܘܢܣܒܥ ܚܣܕܐ܀
03:31 [ai]	ܡܛܠ ܕܠܐ ܛܥܐ ܡܪܝܐ ܠܥܠܡ܀
03:32 [ai]	ܐܠܐ ܡܡܟܟ ܘܡܪܚܡ ܐܝܟ ܣܘܓܐܬ ܪ̈ܚܡܘܗܝ܀
03:33 [ai]	ܡܛܠ ܕܠܐ ܥܢܐ ܡܢ ܠܒܗ ܘܡܡܟܟ ܒܢ̈ܝ ܓܢܒܪ̈ܐ܀
03:34 [ai]	ܠܡܟܒܫܘ ܬܚܝܬ ܪ̈ܓܠܘܗܝ܂ ܟܠܗܘܢ ܐܣܝܪ̈ܐ ܕܐܪܥܐ܀
03:35 [ai]	ܠܡܨܠܐ ܕܝܢܐ ܕܓܒܪܐ ܠܘܩܒܠ ܐܦ̈ܝ ܥܠܝܐ܀
03:36 [ai]	ܠܡܚܝܒܘ ܒܪܢܫܐ ܒܕܝܢܗ܃ ܡܪܝܐ ܠܐ ܚܙܐ܀
03:37 [ai]	ܡܢܘ ܗܢܐ ܕܐܡܪ ܘܗܘܐ܂ ܕܡܪܝܐ ܠܐ ܦܩܕ܀
03:38 [ai]	ܡܢ ܦܘܡܗ ܕܥܠܝܐ ܠܐ ܢܦ̈ܩܢ ܒܝܫ̈ܬܐ ܘܛܒ̈ܬܐ܀
03:39 [ai]	ܡܢܐ ܡܬܚܫܒ܂ ܒܪܢܫܐ ܕܚܝ܃ ܘܓܒܪܐ ܥܠ ܚ̈ܛܗܘܗܝ܀
03:40 [ai]	ܢܒܨܐ ܐܘܪ̈ܚܬܢ ܘܢܒܕܘܩ ܘܢܬܦܢܐ ܠܘܬ ܡܪܝܐ܀
03:41 [ai]	ܢܫܩܘܠ ܠܒܝ̈ܢ ܥܠ ܐܝܕ̈ܝܢ ܠܘܬ ܐܠܗܐ ܠܫܡܝܐ܀
03:42 [ai]	ܚܢܢ ܐܥܠܝܢ ܘܡܪܡܪܢܟ܃ ܘܐܢܬ ܠܐ ܫܒܩܬ܀
03:43 [ai]	ܛܠܠܬ ܒܪܘܓܙܟ ܘܪܕܦܬܢ܂ ܘܩܛܠܬ ܘܠܐ ܚܣܬ܀
03:44 [ai]	ܛܠܠܬ ܒܥܢܢܟ ܘܐܥܒܪܬ ܨܠܘܬܢ܀
03:45 [ai]	ܥܩܝܪ̈ܐ ܘܡܣ̈ܠܝܐ ܥܒܕܬܢ ܒܝܬ ܥܡ̈ܡܐ܀
03:46 [ai]	ܥܝܢܝ ܕܡܥܐ ܘܠܐ ܫܠܝܐ ܡܢ ܕܠܝܬ ܦܘܝܓܐ܀
03:47 [ai]	ܥܕܡܐ ܕܢܕܝܩ ܘܢܚܙܐ ܡܪܝܐ ܡܢ ܫܡܝܐ܀
03:48 [ai]	ܥܝܢܝ ܐܬܛܪܦܬ ܥܠ ܢܦܫܝ ܡܢ ܟܠܗܝܢ ܒܢ̈ܬ ܩܘܪ̈ܝܐ ܕܝܠܝ܀
03:49 [ai]	ܦܬܚܘ ܥܠܝ ܦܘܡܗܘܢ ܟܠܗܘܢ ܒܥܠܕ̈ܒܒܝ܀
03:50 [ai]	ܕܚܠܬܐ ܘܙܘܥܬܐ ܗܘܬ ܠܢ܂ ܓܘܡܨܐ ܘܬܒܪܐ܀
03:51 [ai]	ܬܦ̈ܐ ܕܡ̈ܝܐ ܐܪ̈ܕܝ ܥܝܢ̈ܝ ܥܠ ܬܒܪܗܿ ܕܒܪܬ ܥܡܝ܀
03:52 [ai]	ܡܨܕ ܨܕܘܢܝ ܐܝܟ ܨܦܪܐ ܒܥܠܕ̈ܒܒܝ ܡܓܢ܀
03:53 [ai]	ܫܬܩܘ ܒܓܘܒܐ ܚ̈ܝܝ ܫܕܘ ܒܝ ܟܐܦ̈ܐ܀
03:54 [ai]	ܛܦܘ ܡ̈ܝܐ ܠܥܠܡܢ ܪܝܫܝ܂ ܐܡܪܬ ܐܬܪܚܩܬ܀
03:55 [ai]	ܩܪܝܬ ܫܡܟ ܡܪܝܐ܂ ܡܢ ܓܘܒܐ ܬܚܬܝܐ܀
03:56 [ai]	ܩܠܝ ܫܡܥܬ ܠܐ ܬܪܟܢ ܐܕܢܟ܂ ܐܠܐ ܐܪܘܚ ܠܝ ܘܦܪܘܩܝܢܝ܀
03:57 [ai]	ܩܪܒܬ ܒܝܘܡܐ ܕܩܪܝܬܟ܃ ܘܐܡܪܬ ܠܝ ܠܐ ܬܕܚܠ܀
03:58 [ai]	ܕܢܬ ܡܪܝܐ ܕܝܢܐ ܕܢܦܫܝ ܘܦܪܩܬ ܚ̈ܝܝ܀
03:59 [ai]	ܚܙܝܬ ܡܪܝܐ ܡܘܟܟܝ܂ ܕܢܬ ܕܝܢܝ܀
03:60 [ai]	ܚܙܝܬ ܟܠܗܿ ܢܩܡܬܗܘܢ ܘܟܠ ܕܐܬܚܫܒܘ ܥܠܝ܀
03:61 [ai]	ܫܡܥܬ ܚܣܕܗܘܢ ܡܪܝܐ ܘܟܠ ܕܐܬܚܫܒܘ ܥܠܝ܀
03:62 [ai]	ܣܦ̈ܘܬܐ ܕܩܝ̈ܡܢ ܘܪ̈ܢܝܢ ܥܠܝ ܟܠܗ ܝܘܡܐ܀
03:63 [ai]	ܡܘܬܒܗܘܢ ܘܡܩܡܗܘܢ ܐܣܬܟܠܬ ܐܢܐ ܡܢ ܪܢܝܗܘܢ܀
03:64 [ai]	ܬܗܦܟ ܠܗܘܢ ܦܘܪܥܢܗܘܢ ܡܪܝܐ ܐܝܟ ܡܥܒܕ ܐܝ̈ܕܝܗܘܢ܀
03:65 [ai]	ܬܬܠ ܠܗܘܢ ܟܪܝܘܬܐ ܕܠܒܐ ܘܡܚܘܬܟ ܠܗܘܢ܀
03:66 [ai]	ܬܪܕܘܦ ܘܒܪܘܓܙܟ ܬܘܒܕ ܐܢܘܢ ܡܢ ܬܚܝܬ ܫܡ̈ܝܟ ܡܪܝܐ܀

next chapter