← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܟܰܕܼ ܕܶܝܢ ܐܶܬܼܺܝܠܶܕܼ ܝܶܫܽܘܥ ܒܒܼܶܝܬܼ ܠܚܶܡ ܕܺܝܗܽܘܕܼܳܐ܃ ܒܝܰܘܡܰܝ̈ ܗܶܪܳܘܕܼܶܣ ܡܰܠܟܿܳܐ܃ ܐܶܬܼܰܘ ܡܓܼܽܘܫܶܐ̈ ܡܶܢ ܡܰܕܼܢܚܳܐ ܠܽܐܘܪܺܫܠܶܡ܂
02:02 [ai]ܘܳܐܡܪܺܝܢ܂ ܐܰܝܟܿܰܘ ܡܰܠܟܿܳܐ ܕܺܝܗܽܘܕܼܳܝܶܐ̈ ܕܶܐܬܼܺܝܠܶܕܼ܂ ܚܙܰܝܢ ܓܶܝܪ ܟܰܘܟܿܒܼܶܗ ܒܡܰܕܼܢܚܳܐ܃ ܘܶܐܬܼܰܝܢ ܠܡܶܣܓܿܰܕܼ ܠܶܗ܂
02:03 [ai]ܫܡܰܥ ܕܶܝܢ ܗܶܪܳܘܕܼܶܣ ܡܰܠܟܿܳܐ܂ ܘܶܐܬܿܬܿܙܺܝܥ܃ ܘܟܼܽܠܳܗ ܐܽܘܪܺܫܠܶܡ ܥܰܡܶܗ܂
02:04 [ai]ܘܟܼܰܢܶܫ ܟܽܠܗܽܘܢ ܪ̈ܰܒܰܝ ܟܳܗܢܶܐ̈ ܘܣܳܦܼܪ̈ܶܐ ܕܥܰܡܳܐ܃ ܘܰܡܫܰܐܶܠ ܗ̱ܘܳܐ ܠܗܽܘܢ܂ ܕܰܐܝܟܿܳܐ ܡܶܬܼܺܝܠܶܕܼ ܡܫܺܝܚܳܐ܀
02:05 [ai]ܗܶܢܽܘܢ ܕܶܝܢ ܐܶܡܰܪܘ܂ ܒܒܼܶܝܬܼ ܠܚܶܡ ܕܺܝܗܽܘܕܼܳܐ܂ ܗܳܟܼܰܢܳܐ ܓܶܝܪ ܟܬܼܺܝܒܼ ܒܰܢܒܼܺܝܳܐ܂
02:06 [ai]ܐܳܦܼ ܐܰܢ̱ܬܿܝ ܒܶܝܬܼ ܠܚܶܡ ܕܺܝܗܽܘܕܼܳܐ܃ ܠܳܐ ܗܘܰܝܬܿܝ ܒܨܺܝܪܳܐ ܒܡܰܠܟܿܶܐ̈ ܕܺܝܗܽܘܕܼܳܐ܂ ܡܶܢܶܟܼܝ ܓܶܝܪ ܢܶܦܽܘܩ ܡܰܠܟܿܳܐ܃ ܕܗܽܘ ܢܶܪܥܶܝܘܗ̱ܝ ܠܥܰܡܝ ܐܺܝܣܪܳܐܝܶܠ܀
02:07 [ai]ܗܳܝܕܶܝܢ ܗܶܪܳܘܕܼܶܣ ܡܰܛܫܝܳܐܺܝܬܼ ܩܪܳܐ ܠܰܡܓܼܽܘܫܶܐ̈܃ ܘܺܝܠܶܦܼ ܡܶܢܗܽܘܢ ܒܰܐܝܢܳܐ ܙܰܒܼܢܳܐ ܐܶܬܼܚܙܺܝ ܠܗܽܘܢ ܟܰܘܟܿܒܼܳܐ܂
02:08 [ai]ܘܫܰܕܿܰܪ ܐܶܢܽܘܢ ܠܒܼܶܝܬܼ ܠܚܶܡ܂ ܘܶܐܡܰܪ ܠܗܽܘܢ܂ ܙܶܠܘ ܥܰܩܶܒܼܘ܂ ܥܰܠ ܛܰܠܝܳܐ܂ ܚܦܼܺܝܛܳܐܺܝܬܼ܂ ܘܡܳܐ ܕܶܐܫܟܿܰܚܬܿܽܘܢܳܝܗ̱ܝ܂ ܬܰܘ ܚܰܘܰܐܘܽܢܝ܂ ܕܳܐܦܼ ܐܶܢܳܐ ܐܺܙܰܠ ܐܶܣܓܿܽܘܕܼ ܠܶܗ܂
02:09 [ai]ܗܶܢܽܘܢ ܕܶܝܢ ܟܰܕܼ ܫܡܰܥܘ ܡܶܢ ܡܰܠܟܿܳܐ ܐܶܙܰܠܘ܂ ܘܗܳܐ ܟܰܘܟܿܒܼܳܐ ܗܰܘ ܕܰܚܙܰܘ ܒܡܰܕܼܢܚܳܐ ܐܳܙܶܠ ܗ̱ܘܳܐ ܩܕܼܳܡܰܝܗܽܘܢ܃ ܥܕܼܰܡܳܐ ܕܶܐܬܼܳܐ ܩܳܡ ܠܥܶܠ ܡܶܢ ܐܰܝܟܿܳܐ ܕܺܐܝܬܼܰܘܗ̱ܝ ܛܰܠܝܳܐ܂
02:10 [ai]ܟܰܕܼ ܕܶܝܢ ܚܙܰܐܘܽܗ̱ܝ ܠܟܼܰܘܟܿܒܼܳܐ܂ ܚܕܼܺܝܘ ܚܰܕܼܽܘܬܼܳܐ ܪܰܒܿܬܼܳܐ ܕܛܳܒܼ܂
02:11 [ai]ܘܥܰܠܘ ܠܒܼܰܝܬܳܐ܃ ܘܰܚܙܰܐܘܽܗ̱ܝ ܠܛܰܠܝܳܐ ܥܰܡ ܡܰܪܝܰܡ ܐܶܡܶܗ܂ ܘܰܢܦܼܰܠܘ ܣܓܼܶܕܼܘ ܠܶܗ܂ ܘܰܦܼܬܼܰܚܘ ܣܺܝܡܳܬܼܗܽܘܢ̈܃ ܘܩܰܪܶܒܼܘ ܠܶܗ ܩܽܘܪ̈ܒܳܢܶܐ܂ ܕܰܗܒܼܳܐ܂ ܘܡܽܘܪܳܐ܂ ܘܰܠܒܼܽܘܢܬܳܐ܂
02:12 [ai]ܘܶܐܬܼܚܙܺܝ ܠܗܽܘܢ ܒܚܶܠܡܳܐ܃ ܕܠܳܐ ܢܶܗܦܿܟܼܽܘܢ ܠܘܳܬܼ ܗܶܪܳܘܕܼܶܣ܂ ܘܒܼܽܐܘܪܚܳܐ ܐ̱ܚܪܺܬܼܳܐ ܐܶܙܰܠܘ ܠܰܐܬܼܪܗܽܘܢ܀܀
02:13 [ai]ܟܰܕܼ ܕܶܝܢ ܐܶܙܰܠܘ܃ ܐܶܬܼܚܙܺܝ ܡܰܠܰܐܟܼܳܐ ܕܡܳܪܝܳܐ ܒܚܶܠܡܳܐ ܠܝܰܘܣܶܦܼ܂ ܘܶܐܡܰܪ ܠܶܗ܂ ܩܽܘܡ ܕܒܰܪ ܠܛܰܠܝܳܐ ܘܠܶܐܡܶܗ܂ ܘܰܥܪܽܘܩ ܠܡܶܨܪܶܝܢ܂ ܘܬܼܰܡܳܢ ܗܘܺܝ ܥܕܼܰܡܳܐ ܕܳܐܡܰܪ ܐ̱ܢܳܐ ܠܳܟܼ܂ ܥܬܼܺܝܕܼ ܗ̱ܽܘ ܓܶܝܪ ܗܶܪܳܘܕܼܶܣ ܠܡܶܒܼܥܝܶܗ ܠܛܰܠܝܳܐ܂ ܐܰܝܟܼ ܕܢܰܘܒܿܕܼܺܝܘܗ̱ܝ܂
02:14 [ai]ܝܰܘܣܶܦܼ ܕܶܝܢ܂ ܩܳܡ ܫܰܩܠܶܗ ܠܛܰܠܝܳܐ ܘܠܶܐܡܶܗ ܒܠܶܠܝܳܐ܂ ܘܰܥܪܰܩ ܠܡܶܨܪܶܝܢ܂
02:15 [ai]ܘܰܗܘܳܐ ܬܰܡܳܢ܂ ܥܕܼܰܡܳܐ ܠܡܰܘܬܿܶܗ ܕܗܶܪܳܘܕܼܶܣ܂ ܕܢܶܬܼܡܰܠܶܐ ܡܶܕܶܡ ܕܶܐܬܼܶܐܡܰܪ ܡܶܢ ܡܳܪܝܳܐ ܒܰܢܒܼܺܝܳܐ ܕܳܐܡܰܪ܃ ܕܡܶܢ ܡܶܨܪܶܝܢ ܩܪܺܝܬܼ ܠܒܼܶܪܝ܀܀
02:16 [ai]ܗܳܝܕܶܝܢ ܗܶܪܳܘܕܼܶܣ ܟܰܕܼ ܚܙܳܐ ܕܶܐܬܼܒܿܰܙܰܚ ܡܶܢ ܡܓܼܽܘܫܶܐ̈܃ ܐܶܬܼܚܰܡܰܬܼ ܛܳܒܼ܂ ܘܫܰܕܿܰܪ ܩܰܛܶܠ ܛܠܳܝܶܐ̈ ܟܽܠܗܽܘܢ ܕܒܼܶܝܬܼ ܠܚܶܡ܂ ܘܰܕܼܟܼܽܠܗܽܘܢ ܬܚܽܘܡ̈ܶܝܗ܂ ܡܶܢ ܒܰܪ ܬܿܰܪ̈ܬܿܶܝܢ ܫܢܺܝܢ̈ ܘܰܠܬܼܰܚܬܿ܂ ܐܰܝܟܼ ܙܰܒܼܢܳܐ ܕܥܰܩܶܒܼ ܡܶܢ ܡܓܼܽܘܫܶܐ̈܂
02:17 [ai]ܗܳܝܕܶܝܢ ܐܶܬܼܡܰܠܺܝ ܡܶܕܶܡ ܕܶܐܬܼܶܐܡܰܪ ܒܝܰܕܼ ܐܶܪܰܡܝܳܐ ܢܒܼܺܝܳܐ ܕܶܐܡܰܪ܃
02:18 [ai]ܩܳܠܳܐ ܐܶܫܬܿܡܰܥ ܒܪܳܡܬܼܳܐ܃ ܒܶܟܼܝܳܐ ܘܶܐܠܝܳܐ ܣܰܓܿܺܝܳܐܐ܂ ܪܳܚܶܝܠ ܒܳܟܼܝܳܐ ܥܰܠ ܒܢܶܝܗ܃ ܘܠܳܐ ܨܳܒܼܝܳܐ ܠܡܶܬܼܒܰܝܳܐܘܽ ܡܶܛܽܠ ܕܠܳܐ ܐܺܝܬܼܰܝܗܽܘܢ ܿ܀ܿ܀ܿ
02:19 [ai]ܟܰܕܼ ܡܺܝܬܼ ܕܶܝܢ ܗܶܪܳܘܕܼܶܣ ܡܰܠܟܿܳܐ܃ ܐܶܬܼܚܙܺܝ ܡܰܠܰܐܟܼܳܐ ܕܡܳܪܝܳܐ ܒܚܶܠܡܳܐ ܠܝܰܘܣܶܦܼ ܒܡܶܨܪܶܝܢ܂
02:20 [ai]ܘܶܐܡܰܪ ܠܶܗ܂ ܩܽܘܡ܂ ܕܒܰܪ ܠܛܰܠܝܳܐ ܘܠܶܐܡܶܗ܃ ܘܙܶܠ ܠܰܐܪܥܳܐ ܕܺܐܝܣܪܳܐܝܶܠ܂ ܡܺܝܬܼܘ ܠܗܽܘܢ ܓܶܝܪ ܗܳܢܽܘܢ ܕܒܳܥܶܝܢ ܗ̱ܘܰܘ ܢܰܦܼܫܶܗ ܕܛܰܠܝܳܐ܂
02:21 [ai]ܘܝܰܘܣܶܦܼ܂ ܩܳܡ ܕܒܰܪ ܠܛܰܠܝܳܐ ܘܠܶܐܡܶܗ܃ ܘܶܐܬܼܳܐ ܠܰܐܪܥܳܐ ܕܺܐܝܣܪܳܐܝܶܠ܂
02:22 [ai]ܟܰܕܼ ܕܶܝܢ ܫܡܰܥ ܕܰܐܪܟܼܶܠܰܐܳܘܣ ܗܘܳܐ ܡܰܠܟܿܳܐ ܒܺܝܗܽܘܕܼ܃ ܚܠܳܦܼ ܗܶܪܳܘܕܼܶܣ ܐܰܒܼܽܘܗ̱ܝ܃ ܕܚܶܠ ܕܢܺܐܙܰܠ ܠܬܼܰܡܳܢ܂ ܘܶܐܬܼܚܙܺܝ ܠܶܗ ܒܚܶܠܡܳܐ܂ ܕܢܺܐܙܰܠ ܠܰܐܬܼܪܳܐ ܕܰܓܼܠܺܝܠܳܐ܂
02:23 [ai]ܘܶܐܬܼܳܐ ܥܡܰܪ ܒܰܡܕܼܺܝܢ̱ܬܳܐ ܕܡܶܬܼܩܰܪܝܳܐ ܢܳܨܪܰܬܼ܂ ܐܰܝܟܼ ܕܢܶܬܼܡܰܠܶܐ ܡܶܕܶܡ ܕܶܐܬܼܶܐܡܰܪ ܒܰܢܒܼܺܝܳܐ܂ ܕܢܳܨܪܳܝܳܐ ܢܶܬܼܩܪܶܐ܀܀

next chapter