The Comprehensive Aramaic Lexicon

05:01 [ai]	ܟܰܕܼ ܚܙܳܐ ܕܶܝܢ ܝܶܫܽܘܥ ܠܟܼܶܢܫܶܐ̈܃ ܣܠܶܩ ܠܛܽܘܪܳܐ܂ ܘܟܼܰܕܼ ܺܝܬܼܶܒܼ܃ ܩܪܶܒܼܘ ܠܘܳܬܼܶܗ ܬܰܠܡܺܝܕܼܰܘܗ̱ܝ̈܂
05:02 [ai]	ܘܰܦܼܬܼܰܚ ܦܽܘܡܶܗ܂ ܘܡܰܠܶܦܼ ܗ̱ܘܳܐ ܠܗܽܘܢ ܘܳܐܡܰܪ܀
05:03 [ai]	ܛܽܘܒܼܰܝܗܽܘܢ ܠܡܶܣܟܿܺܢܶܐ̈ ܒܪܽܘܚ܃ ܕܕܼܺܝܠܗܽܘܢ ܗ̱ܺܝ ܡܰܠܟܿܽܘܬܼܳܐ ܕܰܫܡܰܝܳܐ܀
05:04 [ai]	ܛܽܘܒܼܰܝܗܽܘܢ ܠܰܐܒܼܺܝܠܶܐ̈܃ ܕܗܶܢܽܘܢ ܢܶܬܼܒܰܝܐܘܽܢ܀
05:05 [ai]	ܛܽܘܒܼܰܝܗܽܘܢ ܠܡܰܟܿܺܝܟܼܶܐ̈܃ ܕܗܶܢܽܘܢ ܢܺܐܪܬܼܽܘܢ ܠܰܐܪܥܳܐ܀
05:06 [ai]	ܛܽܘܒܼܰܝܗܽܘܢ ܠܰܐܝܠܶܝܢ ܕܟܰܦܼܢܺܝܢ ܘܰܨܗܶܝܢ ܠܟܼܺܐܢܽܘܬܼܳܐ܃ ܕܗܶܢܽܘܢ ܢܶܣܒܿܥܽܘܢ܀
05:07 [ai]	ܛܽܘܒܼܰܝܗܽܘܢ ܠܰܡܪ̈ܰܚܡܳܢܶܐ܂ ܕܰܥܠܰܝܗܽܘܢ ܢܶܗܘܽܘܢ ܪ̈ܰܚܡܶܐ܀
05:08 [ai]	ܛܽܘܒܼܰܝܗܽܘܢ ܠܰܐܝܠܶܝܢ ܕܰܕܼܟܼܶܝܢ ܒܿܠܶܒܗܽܘܢ܃ ܕܗܶܢܽܘܢ ܢܶܚܙܽܘܢ ܠܰܐܠܳܗܳܐ܀
05:09 [ai]	ܛܽܘܒܼܰܝܗܽܘܢ ܠܥܳܒܼܕܿܰܝ̈ ܫܠܳܡܳܐ܃ ܕܿܰܒܼܢܰܘܗ̱ܝ ܕܰܐܠܳܗܳܐ ܢܶܬܼܩܪܽܘܢ܀
05:10 [ai]	ܛܽܘܒܼܰܝܗܽܘܢ ܠܰܐܝܠܶܝܢ ܕܶܐܬܼܪܕܼܶܦܼܘ ܡܶܛܽܠ ܟܺܐܢܽܘܬܼܳܐ܃ ܕܕܼܺܝܠܗܽܘܢ ܗ̱ܺܝ ܡܰܠܟܿܽܘܬܼܳܐ ܕܰܫܡܰܝܳܐ܀
05:11 [ai]	ܛܽܘܒܼܰܝܟܿܽܘܢ ܐܶܡܰܬܼܝ ܕܰܡܚܰܣܕܺܝܢ ܠܟܼܽܘܢ܂ ܘܪܳܕܼܦܿܺܝܢ ܠܟܼܽܘܢ܂ ܘܳܐܡܪܺܝܢ ܥܠܰܝܟܿܽܘܢ ܟܽܠ ܡܶܠܳܐ ܒܺܝܫܳܐ ܡܶܛܽܠܳܬܼܝ ܒܕܰܓܳܠܽܘܬܼܳܐ܂
05:12 [ai]	ܗܳܝܕܶܝܢ ܚܕܼܰܘ ܘܰܪܘܰܙܘ܃ ܕܰܐܓܼܪܟܼܽܘܢ ܣܓܼܺܝ ܒܰܫܡܰܝܳܐ܂ ܗܳܟܼܰܢܳܐ ܓܶܝܪ ܪܕܼܰܦܼܘ ܠܰܢܒܼܺܝܶܐ̈ ܕܡܶܢ ܩܕܼܳܡܰܝܟܿܽܘܢ܀
05:13 [ai]	ܐܰܢ̱ܬܿܽܘܢ ܐܶܢܽܘܢ ܡܶܠܚܳܗ ܕܰܐܪܥܳܐ܂ ܐܶܢܗܽܘ ܕܶܝܢ ܕܡܶܠܚܳܐ ܬܶܦܼܟܿܰܗ܃ ܒܡܳܢܳܐ ܬܶܬܼܡܠܰܚ܂ ܠܡܶܕܶܡ ܠܳܐ ܐܳܙܳܠ̱ܐ܃ ܐܶܠܳܐ ܕܬܶܫܬܿܕܼܶܐ ܠܒܼܰܪ܂ ܘܬܼܶܬܿܕܼܺܝܫ ܡܶܢ ܐ̱ܢܳܫܳܐ܀
05:14 [ai]	ܐܰܢ̱ܬܿܽܘܢ ܐܶܢܽܘܢ ܢܽܘܗܪܶܗ ܕܥܳܠܡܳܐ܂ ܠܳܐ ܡܶܫܟܿܚܳܐ ܕܬܶܛܫܶܐ ܡܕܼܺܝܢ̱ܬܳܐ܂ ܕܥܰܠ ܛܽܘܪܳܐ ܒܰܢܝܳܐ܂
05:15 [ai]	ܘܠܳܐ ܡܰܢܗܪܺܝܢ ܫܪܳܓܼܳܐ܂ ܘܣܳܝܡܺܝܢ ܠܶܗ ܬܚܶܝܬܼ ܣܰܐܬܼܳܐ܃ ܐܶܠܳܐ ܥܰܠ ܡܢܳܪܬܳܐ܂ ܘܡܰܢܗܰܪ ܠܟܼܽܠ ܐܰܝܠܶܝܢ ܕܰܒܼܒܼܰܝܬܳܐ ܐܶܢܽܘܢ܂
05:16 [ai]	ܗܳܟܼܰܢܳܐ ܢܶܢܗܰܪ ܢܽܘܗܪܟܼܽܘܢ ܩܕܼܳܡ ܒܢܰܝܢܳܫܳܐ܂ ܕܢܶܚܙܽܘܢ ܥܒܼܳܕܼܰܝܟܿܽܘܢ̈ ܛܳܒܼܶܐ̈܂ ܘܰܢܫܰܒܿܚܽܘܢ ܠܰܐܒܼܽܘܟܼܽܘܢ ܕܒܰܫܡܰܝܳܐ܀
05:17 [ai]	ܠܳܐ ܬܰܣܒܿܪܽܘܢ ܕܶܐܬܼܺܝܬܼ ܕܶܐܫܪܶܐ ܢܳܡܽܘܣܳܐ ܐܰܘ ܢܒܼܺܝܶܐ̈܂ ܠܳܐ ܐܶܬܼܺܝܬܼ ܕܶܐܫܪܶܐ ܐܶܠܳܐ ܕܶܐܡܰܠܶܐ܂
05:18 [ai]	ܐܰܡܺܝܢ ܓܶܝܪ ܐܳܡܰܪ ܐ̱ܢܳܐ ܠܟܼܽܘܢ܃ ܕܰܥܕܼܰܡܳܐ ܕܢܶܥܒܿܪܽܘܢ ܫܡܰܝܳܐ ܘܰܐܪܥܳܐ܃ ܝܽܘܕܼ ܚܕܼܳܐ ܐܰܘ ܚܰܕܼ ܣܶܪܛܳܐ܃ ܠܳܐ ܢܶܥܒܰܪ ܡܶܢ ܢܳܡܽܘܣܳܐ܂ ܥܕܼܰܡܳܐ ܕܟܽܠ ܢܶܗܘܶܐ܀
05:19 [ai]	ܟܽܠ ܡܰܢ ܗܳܟܼܺܝܠ ܕܢܶܫܪܶܐ ܚܰܕܼ ܡܶܢ ܦܽܘܩܕܳܢܶܐ̈ ܗܳܠܶܝܢ ܙܥܽܘܪ̈ܶܐ܃ ܘܢܰܠܶܦܼ ܗܳܟܼܰܢܳܐ ܠܰܒܼܢܰܝܢܳܫܳܐ܃ ܒܨܺܝܪܳܐ ܢܶܬܼܩܪܶܐ ܒܡܰܠܟܿܽܘܬܼܳܐ ܕܰܫܡܰܝܳܐ܂ ܟܽܠ ܕܶܝܢ ܕܢܶܥܒܿܶܕܼ ܘܢܰܠܶܦܼ܃ ܗܳܢܳܐ ܪܰܒܿܳܐ ܢܶܬܼܩܪܶܐ ܒܡܰܠܟܿܽܘܬܼܳܐ ܕܰܫܡܰܝܳܐ܂
05:20 [ai]	ܐܳܡܰܪ ܐ̱ܢܳܐ ܠܟܼܽܘܢ ܓܶܝܪ܃ ܕܶܐܠܳܐ ܬܺܐܬܼܰܪ ܟܺܐܢܽܘܬܼܟܼܽܘܢ ܝܰܬܿܺܝܪ ܡܶܢ ܕܿܣܳܦܼܪ̈ܶܐ ܘܰܦܼܪ̈ܺܝܫܶܐ܃ ܠܳܐ ܬܶܥܠܽܘܢ ܠܡܰܠܟܿܽܘܬܼܳܐ ܕܰܫܡܰܝܳܐ܀
05:21 [ai]	ܫܡܰܥܬܿܽܘܢ ܕܶܐܬܼܶܐܡܰܪ ܠܩܰܕܼܡܳܝ̈ܶܐ܂ ܠܳܐ ܬܶܩܛܽܘܠ܂ ܘܟܼܽܠ ܕܢܶܩܛܽܘܠ܂ ܡܚܰܝܰܒܼ ܗ̱ܽܘ ܠܕܼܺܝܢܳܐ܂
05:22 [ai]	ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠ ܡܰܢ ܕܢܶܪܓܿܰܙ ܥܰܠ ܐܰܚܽܘܗ̱ܝ ܐܺܝܩܺܐ܃ ܡܚܰܝܰܒܼ ܗ̱ܽܘ ܠܕܼܺܝܢܳܐ܂ ܘܟܼܽܠ ܕܢܺܐܡܰܪ ܠܰܐܚܽܘܗ̱ܝ ܪܰܩܰܐ܃ ܡܚܰܝܰܒܼ ܗ̱ܽܘ ܠܰܟܼܢܽܘܫܬܳܐ܂ ܘܡܰܢ ܕܢܺܐܡܰܪ ܠܶܠܳܐ܃ ܡܚܰܝܰܒܼ ܗ̱ܽܘ ܠܓܼܺܗܰܢܳܐ ܕܢܽܘܪܳܐ܂
05:23 [ai]	ܐܶܢ ܗܽܘ ܗܳܟܼܺܝܠ ܕܰܡܩܰܪܶܒܼ ܐܰܢ̱ܬܿ ܩܽܘܪܒܿܳܢܳܟܼ ܥܰܠ ܡܰܕܼܒܿܚܳܐ܃ ܘܬܼܰܡܳܢ ܬܶܬܿܕܿܟܼܰܪ ܕܰܐܚܺܝܕܼ ܥܠܰܝܟܿ ܐܰܚܽܘܟܼ ܐܰܟܿܬܼܳܐ ܡܶܕܶܡ܃
05:24 [ai]	ܫܒܼܽܘܩ ܬܰܡܳܢ ܩܽܘܪܒܿܳܢܳܟܼ ܩܕܼܳܡ ܡܰܕܼܒܿܚܳܐ܂ ܘܙܶܠ ܠܽܘܩܕܼܰܡ ܐܶܬܼܪܰܥܳܐ ܥܰܡ ܐܰܚܽܘܟܼ܃ ܘܗܳܝܕܶܝܢ ܬܳܐ ܩܰܪܶܒܼ ܩܽܘܪܒܿܳܢܳܟܼ܀
05:25 [ai]	ܗܘܰܝܬܿ ܡܶܬܼܰܐܘܶܐ ܥܰܡ ܒܥܶܠ ܕܺܝܢܳܟܼ ܥܓܼܰܠ܃ ܥܰܕܼ ܥܰܡܶܗ ܐܰܢ̱ܬܿ ܒܽܐܘܪܚܳܐ܂ ܕܰܠܡܳܐ ܒܥܶܠܕܺܝܢܳܟܼ ܢܰܫܠܡܳܟܼ ܠܕܼܰܝܳܢܳܐ܂ ܘܕܼܰܝܳܢܳܐ ܢܰܫܠܡܳܟܼ ܠܓܼܰܒܿܳܝܳܐ܂ ܘܬܼܶܦܿܶܠ ܒܶܝܬܼ ܐܰܣܺܝܪ̈ܶܐ܂
05:26 [ai]	ܘܰܐܡܺܝܢ ܐܳܡܰܪ ܐ̱ܢܳܐ ܠܳܟܼ܃ ܕܠܳܐ ܬܿܶܦܽܘܩ ܡܶܢ ܬܰܡܳܢ܂ ܥܕܼܰܡܳܐ ܕܬܶܬܿܶܠ ܫܳܡܽܘܢܳܐ ܐ̱ܚܪܳܝܳܐ܀܀
05:27 [ai]	ܫܡܰܥܬܿܽܘܢ ܕܶܐܬܼܶܐܡܰܪ܂ ܕܠܳܐ ܬܓܼܽܘܪ܂
05:28 [ai]	ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܕܟܽܠ ܡܰܢ ܕܚܳܙܶܐ ܐܰܢ̱ܬܿܬܼܳܐ ܐܰܝܟܼ ܕܢܶܪܓܿܺܝܗ܃ ܡܶܚܕܼܳܐ ܓܳܪܳܗ ܒܿܠܶܒܶܗ܂
05:29 [ai]	ܐܶܢ ܕܶܝܢ ܥܰܝܢܳܟܼ ܕܝܰܡܺܝܢܳܐ ܡܰܟܼܫܠܳܐ ܠܳܟܼ܃ ܚܨܺܝܗ ܘܰܫܕܼܺܝܗ ܡܶܢܳܟܼ܂ ܦܰܩܳܚ ܠܳܟܼ ܓܶܝܪ ܕܢܺܐܒܼܰܕܼ ܚܰܕܼ ܗܰܕܿܳܡܳܟܼ܃ ܘܠܳܐ ܟܽܠܶܗ ܦܰܓܼܪܳܟܼ ܢܶܦܿܶܠ ܒܓܺܗܰܢܳܐ܂
05:30 [ai]	ܘܶܐܢ ܐܺܝܕܼܳܟܼ ܕܝܰܡܺܝܢܳܐ ܡܰܟܼܫܠܳܐ ܠܳܟܼ܃ ܦܣܽܘܩ ܫܕܼܺܝܗ ܡܶܢܳܟܼ܂ ܦܰܩܳܚ ܠܳܟܼ ܓܶܝܪ ܕܢܺܐܒܼܰܕܼ ܚܰܕܼ ܡܶܢ ܗܰܕܿܳܡܰܝܟܿ̈܃ ܘܠܳܐ ܟܽܠܶܗ ܦܰܓܼܪܳܟܼ ܢܶܦܿܶܠ ܒܓܺܗܰܢܳܐ܂
05:31 [ai]	ܐܶܬܼܶܐܡܰܪ܂ ܕܡܰܢ ܕܫܳܪܶܐ ܐܰܢ̱ܬܿܬܼܶܗ܃ ܢܶܬܿܶܠ ܠܳܗ ܟܬܼܳܒܼܳܐ ܕܕܼܽܘܠܳܠܳܐ܂
05:32 [ai]	ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܟܽܠ ܡܰܢ ܕܫܳܪܶܐ ܐܰܢ̱ܬܿܬܼܶܗ܂ ܠܒܼܰܪ ܡܶܢ ܡܶܠܬܼܳܐ ܕܙܳܢܝܽܘܬܼܳܐ܂ ܥܳܒܼܶܕܼ ܠܳܗ ܕܰܬܼܓܼܽܘܪ܂ ܘܡܰܢ ܕܫܳܩܶܠ ܫܒܼܺܝܩܬܳܐ܂ ܓܳܐܰܪ܀
05:33 [ai]	ܬܽܘܒܼ ܫܡܰܥܬܿܽܘܢ ܕܶܐܬܼܶܐܡܰܪ ܠܩܰܕܼܡܳܝ̈ܶܐ܃ ܕܠܳܐ ܬܕܼܰܓܿܶܠ ܒܡܰܘܡܳܬܼܳܟܼ̈܂ ܬܫܰܠܶܡ ܕܶܝܢ ܠܡܳܪܝܳܐ ܡܰܘܡܳܬܼܳܟܼ̈܂
05:34 [ai]	ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܠܳܐ ܬܺܐܡܽܘܢ ܣܳܟܼ܂ ܠܳܐ ܒܰܫܡܰܝܳܐ܂ ܕܟܽܘܪܣܝܳܐ ܗܽܘ ܕܰܐܠܳܗܳܐ܂
05:35 [ai]	ܘܠܳܐ ܒܰܐܪܥܳܐ܂ ܕܟܽܘܒܼܫܳܐ ܗ̱ܝ ܕܰܬܼܚܶܝܬܼ ܪ̈ܶܓܼܠܰܘܗ̱ܝ܃ ܐܳܦܼܠܳܐ ܒܽܐܘܪܺܝܫܠܶܡ܂ ܕܰܡܕܼܺܝܢ̱ܬܿܶܗ ܗ̱ܺܝ ܕܡܰܠܟܿܳܐ ܪܰܒܿܳܐ܂
05:36 [ai]	ܐܳܦܼܠܳܐ ܒܪܺܫܳܟܼ ܬܺܐܡܶܐ܃ ܕܠܳܐ ܡܶܫܟܿܰܚ ܐܰܢ̱ܬܿ ܠܡܶܥܒܿܰܕܼ ܒܶܗ ܡܶܢܬܼܳܐ ܚܕܼܳܐ ܕܣܰܥܪܳܐ ܐܽܘܟܿܳܡܬܳܐ܂ ܐܰܘ ܚܶܘܳܪܬܳܐ܂
05:37 [ai]	ܐܶܠܳܐ ܬܶܗܘܶܐ ܡܶܠܰܬܼܟܼܽܘܢ܃ ܐܺܝܢ܂ ܐܺܝܢ܂ ܘܠܳܐ܂ ܠܳܐ܂ ܡܶܕܶܡ ܕܡܶܢ ܗܳܠܶܝܢ ܝܰܬܿܺܝܪ܃ ܡܶܢ ܒܺܝܫܳܐ ܗܽܘ܀
05:38 [ai]	ܫܡܰܥܬܿܽܘܢ ܕܶܐܬܼܶܐܡܰܪ܃ ܕܥܰܝܢܳܐ ܚܠܳܦܼ ܥܰܝܢܳܐ܂ ܘܫܶܢܳܐ ܚܠܳܦܼ ܫܶܢܳܐ܂
05:39 [ai]	ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܳܐ ܬܩܽܘܡܽܘܢ ܠܽܘܩܒܼܰܠ ܒܺܝܫܳܐ܂ ܐܶܠܳܐ ܡܰܢ ܕܡܳܚܶܐ ܠܳܟܼ ܥܰܠ ܦܰܟܿܳܟܼ ܕܝܰܡܺܝܢܳܐ܃ ܐܰܦܼܢܳܐ ܠܶܗ ܐܳܦܼ ܐ̱ܚܪܺܢܳܐ܂
05:40 [ai]	ܘܡܰܢ ܕܨܳܒܼܶܐ ܕܰܢܕܼܽܘܢ ܥܰܡܳܟܼ܂ ܘܢܶܫܩܽܘܠ ܟܽܘܬܿܺܝܢܳܟܼ܃ ܫܒܼܽܘܩ ܠܶܗ ܐܳܦܼ ܡܰܪܛܽܘܛܳܟܼ܀
05:41 [ai]	ܡܰܢ ܕܰܡܫܰܚܰܪ ܠܳܟܼ ܡܺܝܠܳܐ ܚܰܕܼ܃ ܙܶܠ ܥܰܡܶܗ ܬܿܪ̈ܶܝܢ܀
05:42 [ai]	ܡܰܢ ܕܫܳܐܶܠ ܠܳܟܼ܂ ܗܰܒܼ ܠܶܗ܂ ܘܡܰܢ ܕܨܳܒܼܶܐ ܕܢܺܐܙܰܦܼ ܡܶܢܳܟܼ܂ ܠܳܐ ܬܶܟܼܠܶܝܘܗ̱ܝ܀
05:43 [ai]	ܫܡܰܥܬܿܽܘܢ ܕܶܐܬܼܶܐܡܰܪ܃ ܕܰܪܚܰܡ ܠܩܰܪܺܝܒܼܳܟܼ܂ ܘܰܣܢܺܝ ܠܰܒܼܥܶܠܕܿܒܼܳܒܼܳܟܼ܂
05:44 [ai]	ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܐܰܚܶܒܼܘ ܠܰܒܼܥܶܠܕܿܒܼܳܒܼܰܝܟܿܽܘܢ̈܂ ܘܒܼܰܪܶܟܼܘ ܠܡܰܢ ܕܠܳܐܶܛ ܠܟܼܽܘܢ܃ ܘܰܥܒܼܶܕܼܘ ܕܫܰܦܿܺܝܪ ܠܡܰܢ ܕܣܳܢܶܐ̈ ܠܟܼܽܘܢ܂ ܘܨܰܠܰܘ ܥܰܠ ܐܰܝܠܶܝܢ ܕܕܼܳܒܼܪܺܝܢ ܠܟܼܽܘܢ ܒܰܩܛܺܝܪܳܐ܂ ܘܪܳܕܼܦܿܺܝܢ ܠܟܼܽܘܢ܂
05:45 [ai]	ܐܰܝܟܿܰܢܳܐ ܕܬܶܗܘܽܘܢ ܒܢܰܘܗ̱ܝ ܕܰܐܒܼܽܘܟܼܽܘܢ ܕܒܰܫܡܰܝܳܐ܂ ܗܰܘ ܕܡܰܕܼܢܰܚ ܫܶܡܫܶܗ ܥܰܠ ܛܳܒܼܶܐ̈ ܘܥܰܠ ܒܺܝܫܶܐ̈܃ ܘܡܰܚܶܬܼ ܡܶܛܪܶܗ ܥܰܠ ܟܺܐܢܶܐ̈ ܘܥܰܠ ܥܰܘܳܠܶܐ̈܂
05:46 [ai]	ܐܶܢ ܓܶܝܪ ܡܰܚܒܼܺܝܢ ܐܢ̱ܬܿܽܘܢ ܠܰܐܝܠܶܝܢ ܕܡܰܚܒܼܺܝܢ ܠܟܼܽܘܢ܃ ܡܳܢܳܐ ܐܰܓܼܪܳܐ ܐܺܝܬܼ ܠܟܼܽܘܢ܂ ܠܳܐ ܗܳܐ ܐܳܦܼ ܡܳܟܼܣܶܐ̈ ܗܺܝ ܗܳܕܼܶܐ ܥܳܒܼܕܺܝܢ܂
05:47 [ai]	ܘܶܐܢ ܫܳܐܠܺܝܢ ܐܢ̱ܬܿܽܘܢ ܒܰܫܠܳܡܳܐ ܕܰܐܚܰܝܟܿܽܘܢ̈ ܒܰܠܚܽܘܕܼ܃ ܡܳܢܳܐ ܝܰܬܿܺܝܪ ܥܳܒܼܕܺܝܢ ܐܢ̱ܬܿܽܘܢ܂ ܠܳܐ ܗܳܐ ܐܳܦܼ ܡܳܟܼܣܶܐ̈ ܗܺܝ ܗܳܕܼܶܐ ܥܳܒܼܕܺܝܢ܂
05:48 [ai]	ܗܘܰܘ ܗܳܟܼܺܝܠ ܐܰܢ̱ܬܿܽܘܢ ܓܡܺܝܪ̈ܶܐ܃ ܐܰܝܟܿܰܢܳܐ ܕܰܐܒܼܽܘܟܼܽܘܢ ܕܒܰܫܡܰܝܳܐ ܓܡܺܝܪ ܗ̱ܽܘ ܿ܀ܿ܀ܿ

next chapter