← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


06:01 [ai]ܚܽܘܪܘ ܕܶܝܢ ܒܙܶܕܼܩܰܬܼܟܼܽܘܢ܃ ܕܠܳܐ ܬܶܥܒܿܕܼܽܘܢܳܗ ܩܕܼܳܡ ܒܢܰܝ ܐ̱ܢܳܫܳܐ̈܂ ܐܰܝܟܼ ܕܬܶܬܼܚܙܽܘܢ ܠܗܽܘܢ܂ ܘܶܐܠܳܐ ܐܰܓܼܪܳܐ ܠܰܝܬܿ ܠܟܼܽܘܢ ܠܘܳܬܼ ܐܰܒܼܽܘܟܼܽܘܢ ܕܒܰܫܡܰܝܳܐ܂
06:02 [ai]ܐܶܡܰܬܼܝ ܗܳܟܼܺܝܠ ܕܥܳܒܼܶܕܼ ܐܰܢ̱ܬܿ ܙܶܕܼܩܬܼܳܐ܃ ܠܳܐ ܬܶܩܪܶܐ ܩܰܪܢܳܐ ܩܕܼܳܡܰܝܟܿ܃ ܐܰܝܟܼ ܕܥܳܒܼܕܺܝܢ ܢܳܣܒܰܝ̈ ܒܰܐܦܿܶܐ̈ ܒܰܟܼܢܽܘܫܳܬܼܳܐ̈ ܘܰܒܫܽܘܩܶܐ̈܃ ܐܰܝܟܼ ܕܢܶܫܬܿܰܒܿܚܽܘܢ ܡܶܢ ܒܢܰܝ ܐ̱ܢܳܫܳܐ̈܂ ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܩܰܒܿܶܠܘ ܐܰܓܼܪܗܽܘܢ܂
06:03 [ai]ܐܰܢ̱ܬܿ ܕܶܝܢ ܡܳܐ ܕܥܳܒܼܶܕܼ ܐܰܢ̱ܬܿ ܙܶܕܼܩܬܼܳܐ܃ ܠܳܐ ܬܶܕܿܰܥ ܣܶܡܳܠܳܟܼ ܡܳܢܳܐ ܥܳܒܼܕܿܳܐ ܝܰܡܺܝܢܳܟܼ܂
06:04 [ai]ܐܰܝܟܼ ܕܬܶܗܘܶܐ ܙܶܕܼܩܬܼܳܟܼ ܒܟܶܣܝܳܐ܂ ܘܰܐܒܼܽܘܟܼ ܕܚܳܙܶܐ ܒܟܶܣܝܳܐ܃ ܗܽܘ ܢܶܦܼܪܥܳܟܼ ܒܓܶܠܝܳܐ܂
06:05 [ai]ܘܡܳܐ ܕܰܡܨܰܠܶܐ ܐܰܢ̱ܬܿ܃ ܠܳܐ ܬܶܗܘܶܐ ܐܰܝܟܼ ܢܳܣܒܰܝ̈ ܒܰܐܦܿܶܐ̈܃ ܕܪܳܚܡܺܝܢ ܠܰܡܩܳܡ ܒܰܟܼܢܽܘܫܳܬܼܳܐ̈܂ ܘܰܒܙܳܘܝܳܬܼܳܐ̈ ܕܫܽܘܩܶܐ̈ ܠܰܡܨܰܠܳܝܽܘ܃ ܕܢܶܬܼܚܙܽܘܢ ܠܰܒܼܢܰܝ ܐ̱ܢܳܫܳܐ̈܂ ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܩܰܒܿܶܠܘ ܐܰܓܼܪܗܽܘܢ܂
06:06 [ai]ܐܰܢ̱ܬܿ ܕܶܝܢ ܐܶܡܰܬܼܝ ܕܰܡܨܰܠܶܐ ܐܰܢ̱ܬܿ܃ ܥܽܘܠ ܠܬܼܰܘܳܢܳܟܼ܃ ܘܰܐܚܽܘܕܼ ܬܰܪܥܳܟܼ܃ ܘܨܰܠܳܐ ܠܰܐܒܼܽܘܟܼ ܕܰܒܼܟܼܶܣܝܳܐ܂ ܘܰܐܒܼܽܘܟܼ ܕܚܳܙܶܐ ܒܟܶܣܝܳܐ ܢܶܦܼܪܥܳܟܼ ܒܓܶܠܝܳܐ܂
06:07 [ai]ܘܡܳܐ ܕܰܡܨܰܠܶܝܢ ܐܢ̱ܬܿܽܘܢ܃ ܠܳܐ ܗܘܰܝܬܿܽܘܢ ܡܦܼܰܩܩܺܝܢ ܐܰܝܟܼ ܚܰܢܦܼܶܐ̈܂ ܣܳܒܼܪܺܝܢ ܓܶܝܪ ܕܰܒܼܡܰܡܠ̱ܠܳܐ ܣܰܓܿܺܝܳܐܐ ܡܶܫܬܿܰܡܥܺܝܢ܂
06:08 [ai]ܠܳܐ ܗܳܟܼܺܝܠ ܬܿܶܕܰܡܽܘܢ ܠܗܽܘܢ܂ ܐܰܒܼܽܘܟܼܽܘܢ ܓܶܝܪ ܝܳܕܼܰܥ ܡܳܢܳܐ ܡܶܬܼܒܿܥܶܐ ܠܟܼܽܘܢ܂ ܥܰܕܼܠܳܐ ܬܶܫܶܐܠܽܘܢܳܝܗ̱ܝ܀
06:09 [ai]ܗܳܟܼܰܢܳܐ ܗܳܟܼܺܝܠ ܨܰܠܰܘ ܐܰܢ̱ܬܿܽܘܢ܂ ܐܰܒܼܽܘܢ ܕܒܰܫܡܰܝܳܐ܂ ܢܶܬܼܩܰܕܿܰܫ ܫܡܳܟܼ܂
06:10 [ai]ܬܺܐܬܼܶܐ ܡܰܠܟܿܽܘܬܼܳܟܼ܂ ܢܶܗܘܶܐ ܨܶܒܼܝܳܢܳܟܼ܃ ܐܰܝܟܿܰܢܳܐ ܕܒܰܫܡܰܝܳܐ ܐܳܦܼ ܒܰܐܪܥܳܐ܂
06:11 [ai]ܗܰܒܼ ܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ܂
06:12 [ai]ܘܰܫܒܼܽܘܩ ܠܰܢ ܚܰܘܒܰܝܢ̈܃ ܐܰܝܟܿܰܢܳܐ ܕܳܐܦܼ ܚܢܰܢ ܫܒܼܰܩܢ ܠܚܰܝܳܒܼܰܝܢ̈܂
06:13 [ai]ܘܠܳܐ ܬܰܥܠܰܢ ܠܢܶܣܝܽܘܢܳܐ܃ ܐܶܠܳܐ ܦܰܨܳܢ ܡܶܢ ܒܺܝܫܳܐ܂ ܡܶܛܽܠ ܕܕܼܺܝܠܳܟܼ ܗ̱ܝ ܡܰܠܟܿܽܘܬܼܳܐ܂ ܘܚܰܝܠܳܐ܂ ܘܬܼܶܫܒܿܽܘܚܬܳܐ܃ ܠܥܳܠܰܡ ܥܳܠܡܺܝܢ܀
06:14 [ai]ܐܶܢ ܓܶܝܪ ܬܶܫܒܿܩܽܘܢ ܠܰܒܼܢܰܝܢܳܫܳܐ ܣܰܟܼܠܘܳܬܼܗܽܘܢ̈܃ ܢܶܫܒܿܽܘܩ ܐܳܦܼ ܠܟܼܽܘܢ ܐܰܒܼܽܘܟܼܽܘܢ ܕܒܰܫܡܰܝܳܐ܂
06:15 [ai]ܐܶܢ ܕܶܝܢ ܠܳܐ ܬܶܫܒܿܩܽܘܢ ܠܰܒܼܢܰܝܢܳܫܳܐ܃ ܐܳܦܼܠܳܐ ܐܰܒܼܽܘܟܼܽܘܢ ܫܳܒܼܶܩ ܠܟܼܽܘܢ ܣܰܟܼܠܘܳܬܼܟܼܽܘܢ̈܀
06:16 [ai]ܐܶܡܰܬܼܝ ܕܶܝܢ ܕܨܳܝܡܺܝܢ ܐܢ̱ܬܿܽܘܢ܃ ܠܳܐ ܬܶܗܘܽܘܢ ܟܿܡܺܝܪ̈ܶܐ ܐܰܝܟܼ ܢܳܣܒܰܝ̈ ܒܰܐܦܿܶܐ̈܂ ܡܚܰܒܿܠܺܝܢ ܓܶܝܪ ܦܿܰܪ̈ܨܽܘܦܿܰܝܗܽܘܢ ܐܰܝܟܼ ܕܢܶܬܼܚܙܽܘܢ ܠܰܒܼܢܰܝܢܳܫܳܐ ܕܨܳܝܡܺܝܢ܂ ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܩܰܒܿܶܠܘ ܐܰܓܼܪܗܽܘܢ܂
06:17 [ai]ܐܰܢ̱ܬܿ ܕܶܝܢ ܡܳܐ ܕܨܳܐܶܡ ܐܰܢ̱ܬܿ܃ ܐܰܫܺܝܓܼ ܐܰܦܿܰܝܟܿ̈܂ ܘܰܡܫܽܘܚ ܪܺܫܳܟܼ܂
06:18 [ai]ܐܰܝܟܼ ܕܠܳܐ ܬܶܬܼܚܙܶܐ ܠܰܒܼܢܰܝܢܳܫܳܐ ܕܨܳܐܶܡ ܐܰܢ̱ܬܿ܃ ܐܶܠܳܐ ܠܰܐܒܼܽܘܟܼ ܕܰܒܼܟܼܶܣܝܳܐ܂ ܘܰܐܒܼܽܘܟܼ ܕܚܳܙܶܐ ܒܟܶܣܝܳܐ ܗܽܘ ܢܶܦܼܪܥܳܟܼ܂
06:19 [ai]ܠܳܐ ܬܣܺܝܡܽܘܢ ܠܟܼܽܘܢ ܣܺܝܡܳܬܼܳܐ̈ ܒܰܐܪܥܳܐ܃ ܐܰܬܼܰܪ ܕܣܳܣܳܐ ܘܰܐܟܼܠܳܐ ܡܚܰܒܿܠܺܝܢ܃ ܘܰܐܝܟܿܳܐ ܕܓܰܢܳܒܼܶܐ̈ ܦܳܠܫܺܝܢ ܘܓܼܳܢܒܺܝܢ܂
06:20 [ai]ܐܶܠܳܐ ܣܺܝܡܘ ܠܟܼܽܘܢ ܣܺܝܡܳܬܼܳܐ̈ ܒܰܫܡܰܝܳܐ܃ ܐܰܝܟܿܳܐ ܕܠܳܐ ܣܳܣܳܐ܂ ܘܠܳܐ ܐܰܟܼܠܳܐ ܡܚܰܒܿܠܺܝܢ܃ ܘܰܐܝܟܿܳܐ ܕܓܰܢܳܒܼܶܐ̈ ܠܳܐ ܦܳܠܫܺܝܢ ܘܠܳܐ ܓܿܳܢܒܺܝܢ܂
06:21 [ai]ܐܰܝܟܿܳܐ ܓܶܝܪ ܕܺܐܝܬܼܶܝܗ ܣܺܝܡܰܬܼܟܼܽܘܢ܃ ܬܰܡܳܢ ܗ̱ܘ ܐܳܦܼ ܠܶܒܟܽܘܢ܀
06:22 [ai]ܫܪܳܓܼܳܐ ܕܦܰܓܼܪܳܐ܃ ܐܺܝܬܼܶܝܗ ܥܰܝܢܳܐ܂ ܐܶܢ ܥܰܝܢܳܟܼ ܗܳܟܼܺܝܠ ܬܶܗܘܶܐ ܦܫܺܝܛܳܐ܃ ܐܳܦܼ ܟܽܠܶܗ ܦܰܓܼܪܳܟܼ ܢܰܗܺܝܪ ܗ̱ܽܘ܂
06:23 [ai]ܐܶܢ ܕܶܝܢ ܥܰܝܢܳܟܼ ܬܶܗܘܶܐ ܒܺܝܫܳܐ܃ ܟܽܠܶܗ ܦܰܓܼܪܳܟܼ ܚܶܫܽܘܟܼܳܐ ܢܶܗܘܶܐ܂ ܐܶܢ ܗܳܟܼܺܝܠ ܢܽܘܗܪܳܐ ܕܒܳܟܼ ܚܶܫܽܘܟܼܳܐ ܗܽܘ܃ ܚܶܫܽܘܟܼܳܟܼ ܟܡܳܐ ܢܶܗܘܶܐ܀
06:24 [ai]ܠܳܐ ܐ̱ܢܳܫ ܡܶܫܟܿܰܚ ܠܰܬܼܪ̈ܶܝܢ ܡܳܪ̈ܰܘܳܢ ܠܡܶܦܼܠܰܚ܂ ܐܰܘ ܓܶܝܪ ܠܚܰܕܼ ܢܶܣܢܶܐ܂ ܘܠܰܐ̱ܚܪܺܢܳܐ ܢܶܪܚܰܡ܂ ܐܰܘ ܠܚܰܕܼ ܢܝܰܩܰܪ܂ ܘܠܰܐ̱ܚܪܺܢܳܐ ܢܫܽܘܛ܂ ܠܳܐ ܡܶܫܟܿܚܺܝܢ ܐܢ̱ܬܿܽܘܢ ܠܰܐܠܳܗܳܐ ܠܡܶܦܼܠܰܚ ܘܰܠܡܳܡܽܘܢܳܐ܀
06:25 [ai]ܡܶܛܽܠ ܗܳܢܳܐ ܐܳܡܰܪ ܐ̱ܢܳܐ ܠܟܼܽܘܢ܃ ܠܳܐ ܬܺܐܨܦܿܽܘܢ ܠܢܰܦܼܫܟܼܽܘܢ ܡܳܢܳܐ ܬܶܐܟܼܠܽܘܢ܂ ܘܡܳܢܳܐ ܬܶܫܬܿܽܘܢ܃ ܘܠܳܐ ܠܦܼܰܓܼܪܟܼܽܘܢ ܡܳܢܳܐ ܬܶܠܒܿܫܽܘܢ܂ ܠܳܐ ܗܳܐ ܢܰܦܼܫܳܐ ܝܰܬܿܺܝܪܳܐ ܡܶܢ ܣܰܝܒܿܳܪܬܳܐ܃ ܘܦܼܰܓܼܪܳܐ ܡܶܢ ܠܒܼܽܘܫܳܐ܂
06:26 [ai]ܚܽܘܪܘ ܒܦܳܪܰܚܬܼܳܐ ܕܰܫܡܰܝܳܐ܃ ܕܠܳܐ ܙܳܪܥܺܝܢ܂ ܘܠܳܐ ܚܳܨܕܺܝܢ܂ ܘܠܳܐ ܚܳܡܠܺܝܢ ܒܰܐܘܨܪ̈ܶܐ܂ ܘܰܐܒܼܽܘܟܼܽܘܢ ܕܒܰܫܡܰܝܳܐ ܡܬܼܰܪܣܶܐ ܠܗܽܘܢ܂ ܠܳܐ ܗܳܐ ܐܰܢ̱ܬܿܽܘܢ܃ ܡܝܰܬܿܪܺܝܢ ܐܢ̱ܬܿܽܘܢ ܡܶܢܗܽܘܢ܂
06:27 [ai]ܡܰܢܽܘ ܕܶܝܢ ܡܶܢܟܼܽܘܢ ܟܰܕܼ ܝܳܨܶܦܼ ܡܶܫܟܿܰܚ ܠܡܰܘܣܳܦܼܽܘ ܥܰܠ ܩܰܘܡܬܼܶܗ ܐܰܡܬܼܳܐ ܚܕܼܳܐ܂
06:28 [ai]ܘܥܰܠ ܠܒܼܽܘܫܳܐ ܡܳܢܳܐ ܝܳܨܦܿܺܝܢ ܐܢ̱ܬܿܽܘܢ܂ ܐܶܬܼܒܿܰܩܰܘ ܒܫܽܘܫܰܢܶܐ̈ ܕܕܼܰܒܼܪܳܐ ܐܰܝܟܿܰܢܳܐ ܪ̈ܳܒܼܝܳܢ܃ ܕܠܳܐ ܠܳܐܝܳܢ̈܂ ܘܠܳܐ ܥܳܙܠܳܢ̈܂
06:29 [ai]ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܳܐܦܼܠܳܐ ܫܠܶܝܡܳܘܢ ܒܟܽܠܶܗ ܫܽܘܒܼܚܶܗ܂ ܐܶܬܼܟܿܰܣܺܝ ܐܰܝܟܼܚܕܼܳܐ ܡܶܢܗܶܝܢ܂
06:30 [ai]ܐܶܢ ܕܶܝܢ ܠܰܥܡܺܝܪܳܐ ܕܚܰܩܠܳܐ܃ ܕܝܰܘܡܳܢܳܐ ܐܺܝܬܼܰܘܗ̱ܝ܂ ܘܰܡܚܳܪ ܢܳܦܼܶܠ ܒܬܰܢܽܘܪܳܐ܂ ܐܰܠܳܗܳܐ ܗܳܟܼܰܢܳܐ ܡܰܠܒܿܶܫ܃ ܠܳܐ ܣܰܓܿܺܝ ܝܰܬܿܺܝܪ ܠܟܼܽܘܢ ܙܥܽܘܪ̈ܰܝ ܗܰܝܡܳܢܽܘܬܼܳܐ܂
06:31 [ai]ܠܳܐ ܗܳܟܼܺܝܠ ܬܺܐܨܦܿܽܘܢ ܐܰܘ ܬܺܐܡܪܽܘܢ܃ ܡܳܢܳܐ ܢܶܐܟܼܽܘܠ܂ ܐܰܘ ܡܳܢܳܐ ܢܶܫܬܿܶܐ܂ ܐܰܘ ܡܳܢܳܐ ܢܶܬܼܟܿܰܣܶܐ܂
06:32 [ai]ܟܽܠܗܶܝܢ ܓܶܝܪ ܗܳܠܶܝܢ܃ ܥܰܡ̱ܡܶܐ̈ ܗ̱ܘ ܒܿܳܥܶܝܢ ܠܗܶܝܢ܂ ܐܰܒܼܽܘܟܼܽܘܢ ܕܶܝܢ ܕܒܰܫܡܰܝܳܐ ܝܳܕܼܰܥ܃ ܕܳܐܦܼ ܠܟܼܽܘܢ ܡܶܬܼܒܿܰܥܝܳܢ̈ ܗܳܠܶܝܢ ܟܽܠܗܶܝܢ܂
06:33 [ai]ܒܥܰܘ ܕܶܝܢ ܠܽܘܩܕܼܰܡ ܡܰܠܟܿܽܘܬܼܶܗ ܕܰܐܠܳܗܳܐ ܘܙܰܕܿܺܝܩܽܘܬܼܶܗ܃ ܘܟܼܽܠܗܶܝܢ ܗܳܠܶܝܢ ܡܶܬܿܬܰܘܣܦܼܳܢ̈ ܠܟܼܽܘܢ܂
06:34 [ai]ܠܳܐ ܗܳܟܼܺܝܠ ܬܺܐܨܦܿܽܘܢ܂ ܕܰܡܚܳܪ܃ ܗܽܘ ܓܶܝܪ ܡܚܳܪ ܝܳܨܶܦܼ ܕܺܝܠܶܗ܂ ܣܳܦܼܶܩ ܠܶܗ ܠܝܰܘܡܳܐ ܒܺܝܫܬܿܶܗ܀܀

next chapter