The Comprehensive Aramaic Lexicon

08:01 [ai]	ܟܰܕܼ ܢܚܶܬܼ ܕܶܝܢ ܡܶܢ ܛܽܘܪܳܐ܃ ܢܰܩܦܿܽܘܗ̱ܝ ܟܶܢܫܶܐ̈ ܣܰܓܿܺܝܶܐܐ̈܂
08:02 [ai]	ܘܗܳܐ ܓܰܪܒܿܳܐ ܚܰܕܼ ܐܶܬܼܳܐ ܣܓܼܶܕܼ ܠܶܗ ܘܶܐܡܰܪ܂ ܡܳܪܝ܃ ܐܶܢ ܨܳܒܼܶܐ ܐܰܢ̱ܬܿ ܡܶܫܟܿܰܚ ܐܰܢ̱ܬܿ ܠܰܡܕܼܰܟܿܳܝܽܘܬܼܝ܂
08:03 [ai]	ܘܰܦܼܫܰܛ ܐܺܝܕܼܶܗ ܝܶܫܽܘܥ ܩܪܶܒܼ ܠܶܗ܂ ܘܶܐܡܰܪ܃ ܨܳܒܼܶܐ ܐ̱ܢܳܐ܂ ܐܶܬܿܕܿܰܟܿܳܐ܂ ܘܒܼܳܗ ܒܫܳܥܬܼܳܐ ܐܶܬܿܕܰܟܿܺܝ ܓܰܪܒܼܶܗ܂
08:04 [ai]	ܘܶܐܡܰܪ ܠܶܗ ܝܶܫܽܘܥ܃ ܚܙܺܝ ܠܡܳܐ ܠܐ̱ܢܳܫ ܐܳܡܰܪ ܐܰܢ̱ܬܿ܂ ܐܶܠܳܐ ܙܶܠ ܚܰܘܳܐ ܢܰܦܼܫܳܟܼ ܠܟܼܳܗܢܶܐ̈܃ ܘܩܰܪܶܒܼ ܩܽܘܪܒܿܳܢܳܐ ܐܰܝܟܼ ܕܦܰܩܶܕܼ ܡܽܘܫܶܐ܂ ܠܣܳܗܕܿܽܘܬܼܗܽܘܢ܀܀
08:05 [ai]	ܟܰܕܼ ܥܰܠ ܕܶܝܢ ܝܶܫܽܘܥ ܠܰܟܼܦܼܰܪܢܰܚܽܘܡ܃ ܩܪܶܒܼ ܠܶܗ ܩܶܢܛܪܽܘܢܳܐ ܚܰܕܼ܃ ܘܒܼܳܥܶܐ ܗ̱ܘܳܐ ܡܶܢܶܗ܂
08:06 [ai]	ܘܳܐܡܰܪ܂ ܡܳܪܝ܃ ܛܰܠܺܝܝ ܪܡܶܐ ܒܒܼܰܝܬܳܐ܃ ܘܰܡܫܰܪܰܝ܃ ܘܒܼܺܝܫܳܐܺܝܬܼ ܡܶܫܬܿܰܢܰܩ܂
08:07 [ai]	ܐܳܡܰܪ ܠܶܗ ܝܶܫܽܘܥ܃ ܐܶܢܳܐ ܐܺܬܼܶܐ ܘܰܐܣܶܝܘܗ̱ܝ܂
08:08 [ai]	ܥܢܳܐ ܩܶܢܛܪܽܘܢܳܐ ܗܰܘ ܘܶܐܡܰܪ܂ ܡܳܪܝ܃ ܠܳܐ ܫܳܘܶܐ ܐ̱ܢܳܐ ܕܬܶܥܽܘܠ ܬܚܶܝܬܼ ܡܰܛܠ̱ܠܝ܂ ܐܶܠܳܐ ܒܰܠܚܽܘܕܼ ܐܶܡܰܪ ܒܡܶܠܬܼܳܐ܂ ܘܢܶܬܼܰܐܣܶܐ ܛܰܠܺܝܝ܂
08:09 [ai]	ܐܳܦܼ ܐܶܢܳܐ ܓܶܝܪ ܓܰܒܼܪܳܐ ܐ̱ܢܳܐ ܕܰܬܼܚܶܝܬܼ ܫܽܘܠܛܳܢܳܐ܂ ܘܺܐܝܬܼ ܬܚܶܝܬܼ ܐܺܝܕܼܝ܂ ܐܶܣܛܪ̈ܰܛܺܝܽܘܛܶܐ܂ ܘܳܐܡܰܪ ܐ̱ܢܳܐ ܠܗܳܢܳܐ ܕܙܶܠ܂ ܘܳܐܙܶܠ܂ ܘܠܰܐ̱ܚܪܺܢܳܐ ܕܬܳܐ܂ ܘܳܐܬܼܶܐ܂ ܘܰܠܥܰܒܼܕܿܝ ܕܰܥܒܼܶܕܼ ܗܳܕܼܶܐ܂ ܘܥܳܒܼܶܕܼ܂
08:10 [ai]	ܟܰܕܼ ܫܡܰܥ ܕܶܝܢ ܝܶܫܽܘܥ܃ ܐܶܬܿܕܰܡܰܪ܂ ܘܶܐܡܰܪ ܠܕܼܳܐܬܼܶܝܢ ܥܰܡܶܗ܂ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܳܐܦܼ ܠܳܐ ܒܐܺܝܣܪܳܐܝܶܠ ܐܶܫܟܿܚܶܬܼ ܐܰܝܟܼ ܗܳܕܼܶܐ ܗܰܝܡܳܢܽܘܬܼܳܐ܂
08:11 [ai]	ܐܳܡܰܪ ܐ̱ܢܳܐ ܠܟܼܽܘܢ ܕܶܝܢ܃ ܕܣܰܓܿܺܝܶܐܐ̈ ܢܺܐܬܼܽܘܢ ܡܶܢ ܡܰܕܼܢܚܳܐ ܘܡܶܢ ܡܰܥܪܒܼܳܐ܃ ܘܢܶܣܬܿܰܡܟܿܽܘܢ ܥܰܡ ܐܰܒܼܪܳܗܳܡ ܘܺܐܝܣܚܳܩ ܘܝܥܰܩܽܘܒܼ܂ ܒܡܰܠܟܿܽܘܬܼܳܐ ܕܰܫܡܰܝܳܐ̈܂
08:12 [ai]	ܒܢܶܝܗ ܕܶܝܢ ܕܡܰܠܟܿܽܘܬܼܳܐ ܢܶܦܿܩܽܘܢ ܠܚܶܫܽܘܟܼܳܐ ܒܰܪܳܝܳܐ܂ ܬܰܡܳܢ ܢܶܗܘܶܐ ܒܶܟܼܝܳܐ܂ ܘܚܽܘܪܳܩ ܫܶܢܶܐ̈܀
08:13 [ai]	ܘܶܐܡܰܪ ܝܶܫܽܘܥ ܠܩܶܢܛܪܽܘܢܳܐ ܗܰܘ܂ ܙܶܠ܃ ܐܰܝܟܿܰܢܳܐ ܕܗܰܝܡܶܢܬܿ ܢܶܗܘܶܐ ܠܳܟܼ܂ ܘܶܐܬܼܰܐܣܺܝ ܛܰܠܝܶܗ ܒܿܳܗ ܒܫܳܥܬܼܳܐ܀܀
08:14 [ai]	ܘܶܐܬܼܳܐ ܝܶܫܽܘܥ ܠܒܼܰܝܬܿܶܗ ܕܫܶܡܥܽܘܢ܂ ܘܰܚܙܳܐ ܠܰܚܡܳܬܼܶܗ ܕܪܰܡܝܳܐ܂ ܘܰܐܚܺܝܕܼܳܐ ܠܳܗ ܐܶܫܳܬܼܳܐ܂
08:15 [ai]	ܘܰܩܪܶܒܼ ܠܺܐܝܕܼܳܗ܂ ܘܰܫܒܼܰܩܬܼܳܗ ܐܶܫܳܬܼܳܐ܂ ܘܩܳܡܰܬܼ܂ ܘܰܡܫܰܡܫܳܐ ܗ̱ܘܳܬܼ ܠܶܗ܂
08:16 [ai]	ܟܰܕܼ ܗܘܳܐ ܕܶܝܢ ܪܰܡܫܳܐ܃ ܩܰܪܶܒܼܘ ܩܕܼܳܡܰܘܗ̱ܝ ܕܰܝܘܳܢܶܐ̈ ܣܰܓܿܺܝܶܐܐ̈܂ ܘܰܐܦܿܶܩ ܕܰܝܘܰܝܗܽܘܢ̈ ܒܡܶܠܬܼܳܐ܂ ܘܰܠܟܼܽܠܗܽܘܢ ܐܰܝܠܶܝܢ ܕܒܺܝܫܳܐܺܝܬܼ ܥܒܼܺܝܕܼܺܝܢ ܗ̱ܘܰܘ ܐܰܣܺܝ ܐܶܢܽܘܢ܂
08:17 [ai]	ܐܰܝܟܼ ܕܢܶܬܼܡܰܠܶܐ ܡܶܕܶܡ ܕܶܐܬܼܶܐܡܰܪ ܒܝܰܕܼ ܐܶܫܰܥܝܳܐ ܢܒܼܺܝܳܐ ܕܶܐܡܰܪ܃ ܕܗܽܘ ܢܶܣܰܒܼ ܟܺܐܒܼܰܝܢ̈܂ ܘܟܼܽܘܪ̈ܗܳܢܰܝܢ ܢܶܛܥܰܢ܀܀
08:18 [ai]	ܟܰܕܼ ܚܙܳܐ ܕܶܝܢ ܝܶܫܽܘܥ ܟܶܢܫܶܐ̈ ܣܰܓܿܺܝܶܐܐ̈ ܕܰܚܕܼܺܝܪܺܝܢ ܠܶܗ܃ ܦܩܰܕܼ ܕܢܺܐܙܽܠ̱ܘܢ ܠܥܶܒܼܪܳܐ܀
08:19 [ai]	ܘܰܩܪܶܒܼ ܣܳܦܼܪܳܐ ܚܰܕܼ ܘܶܐܡܰܪ ܠܶܗ܂ ܪܰܒܺܝ܃ ܐܺܬܼܶܐ ܒܳܬܼܪܳܟܼ ܠܰܐܬܼܰܪ ܕܳܐܙܶܠ ܐܰܢ̱ܬܿ܂
08:20 [ai]	ܐܳܡܰܪ ܠܶܗ ܝܶܫܽܘܥ܂ ܠܬܼܰܥܠܶܐ̈ ܢܶܩܥܶܐ̈ ܐܺܝܬܼ ܠܗܽܘܢ܃ ܘܰܠܦܼܳܪܰܚܬܼܳܐ ܕܰܫܡܰܝܳܐ ܡܰܛܠ̱ܠܳܐ܂ ܒܪܶܗ ܕܶܝܢ ܕܐ̱ܢܳܫܳܐ܃ ܠܰܝܬܿ ܠܶܗ ܐܰܝܟܿܳܐ ܕܢܶܣܡܽܘܟܼ ܪܺܫܶܗ܂
08:21 [ai]	ܐ̱ܚܪܺܢܳܐ ܕܶܝܢ ܡܶܢ ܬܰܠܡܺܝܕܼܰܘܗ̱ܝ̈ ܐܶܡܰܪ ܠܶܗ܂ ܡܳܪܝ܃ ܐܰܦܿܶܣ ܠܺܝ ܠܽܘܩܕܼܰܡ ܐܺܙܰܠ ܐܶܩܒܿܽܘܪ ܐܳܒܼܝ܂
08:22 [ai]	ܝܶܫܽܘܥ ܕܶܝܢ ܐܶܡܰܪ ܠܶܗ܂ ܬܳܐ ܒܳܬܼܰܪܝ܃ ܘܰܫܒܼܽܘܩ ܠܡܺܝܬܼܶܐ̈ ܩܳܒܼܪܺܝܢ ܡܺܝܬܼܰܝܗܽܘܢ̈܀
08:23 [ai]	ܘܟܼܰܕܼ ܣܠܶܩ ܝܶܫܽܘܥ ܠܰܣܦܼܺܝܢ̱ܬܳܐ܃ ܣܠܶܩܘ ܥܰܡܶܗ ܬܰܠܡܺܝܕܼܰܘܗ̱ܝ̈܂
08:24 [ai]	ܘܗܳܐ ܙܰܘܥܳܐ ܪܰܒܿܳܐ ܗ̱ܘܳܐ ܒܝܰܡܳܐ܃ ܐܰܝܟܿܰܢܳܐ ܕܶܐܠܦܼܳܐ ܬܶܬܼܟܿܰܣܶܐ ܡܶܢ ܓܰܠ̱ܠܶܐ̈܂ ܗܽܘ ܕܶܝܢ ܝܶܫܽܘܥ ܕܰܡܺܝܟܼ ܗ̱ܘܳܐ܂
08:25 [ai]	ܘܰܩܪܶܒܼܘ ܬܰܠܡܺܝܕܼܰܘܗ̱ܝ̈ ܐܰܥܺܝܪܽܘܗ̱ܝ ܘܳܐܡܪܺܝܢ ܠܶܗ܂ ܡܳܪܰܢ܂ ܦܰܨܳܢ܃ ܐܳܒܼܕܺܝܢ ܚ̱ܢܰܢ܂
08:26 [ai]	ܐܳܡܰܪ ܠܗܽܘܢ ܝܶܫܽܘܥ܃ ܠܡܳܢܳܐ ܕܰܚܽܘܠܬܼܳܢܺܝܢ ܐܢ̱ܬܿܽܘܢ܃ ܙܥܽܘܪ̈ܰܝ ܗܰܝܡܳܢܽܘܬܼܳܐ܃ ܗܳܝܕܶܝܢ ܩܳܡ ܘܰܟܼܐܳܐ ܒܪܽܘܚܳܐ ܘܰܒܝܰܡܳܐ܃ ܘܰܗܘܳܐ ܫܶܠܝܳܐ ܪܰܒܿܳܐ܂
08:27 [ai]	ܐ̱ܢܳܫܳܐ̈ ܕܶܝܢ ܐܶܬܿܕܰܡܰܪܘ ܘܳܐܡܪܺܝܢ܃ ܡܰܢܽܘ ܗܳܢܳܐ܂ ܕܿܪ̈ܽܘܚܶܐ ܘܝܰܡܳܐ ܡܶܫܬܿܰܡܥܺܝܢ ܠܶܗ܀܀
08:28 [ai]	ܘܟܼܰܕܼ ܐܶܬܼܳܐ ܝܶܫܽܘܥ ܠܥܶܒܼܪܳܐ܃ ܠܰܐܬܼܪܳܐ ܕܿܓܼܳܕܼܪ̈ܳܝܶܐ܃ ܐܰܪܥܽܘܗ̱ܝ ܬܪܶܝܢ ܕܰܝܘܳܢܶܐ̈܂ ܕܢܳܦܼܩܺܝܢ ܡܶܢ ܒܶܝܬܼ ܩܒܼܽܘܪ̈ܶܐ܂ ܒܺܝܫܶܐ̈ ܕܛܳܒܼ܃ ܐܰܝܟܼ ܕܠܳܐ ܐ̱ܢܳܫ ܢܶܫܟܿܰܚ ܢܶܥܒܰܪ ܒܗܳܝ ܐܽܘܪܚܳܐ܂
08:29 [ai]	ܘܰܩܥܰܘ ܘܳܐܡܪܺܝܢ܃ ܡܳܐ ܠܰܢ ܘܠܳܟܼ ܝܶܫܽܘܥ܃ ܒܪܶܗ ܕܰܐܠܳܗܳܐ܂ ܐܶܬܼܰܝܬܿ ܠܟܼܳܐ ܩܕܼܳܡ ܙܰܒܼܢܳܐ ܕܰܬܼܫܰܢܩܰܢ܂
08:30 [ai]	ܐܺܝܬܼ ܗ̱ܘܳܐ ܕܶܝܢ ܠܗܰܠ ܡܶܢܗܽܘܢ܃ ܒܰܩܪܳܐ ܕܰܚܙܺܝܪ̈ܶܐ ܣܰܓܿܺܝܶܐܐ̈ ܕܪܳܥܝܳܐ܂
08:31 [ai]	ܗܳܢܽܘܢ ܕܶܝܢ ܫܺܐܕܼܶܐ̈ ܒܿܳܥܶܝܢ ܗ̱ܘܰܘ ܡܶܢܶܗ܂ ܘܳܐܡܪܺܝܢ܂ ܐܶܢ ܡܰܦܿܶܩ ܐܰܢ̱ܬܿ ܠܰܢ܃ ܐܰܦܿܶܣ ܠܰܢ ܕܢܺܐܙܰܠ ܠܒܼܰܩܪܳܐ ܕܰܚܙܺܝܪ̈ܶܐ܂
08:32 [ai]	ܐܳܡܰܪ ܠܗܽܘܢ ܝܶܫܽܘܥ܃ ܙܶܠܘ܂ ܘܡܶܚܕܼܳܐ ܢܦܼܰܩܘ ܘܥܰܠܘ ܒܰܚܙܺܝܪ̈ܶܐ܂ ܘܟܼܽܠܳܗ ܒܰܩܪܳܐ ܗܳܝ܃ ܬܶܪܨܰܬܼ ܠܥܶܠ ܠܰܫܩܺܝܦܼܳܐ܃ ܘܰܢܦܼܰܠܘ ܒܝܰܡܳܐ܃ ܘܡܺܝܬܼܘ ܒܡܰܝܳܐ̈ ܿ܀ܿ܀ܿ
08:33 [ai]	ܗܳܢܽܘܢ ܕܶܝܢ ܕܪܳܥܶܝܢ ܗ̱ܘܰܘ܃ ܥܪܰܩܘ ܘܶܐܙܰܠܘ ܠܰܡܕܼܺܝܢ̱ܬܳܐ܃ ܘܚܰܘܺܝ ܘܟܽܠ ܡܶܕܶܡ ܕܰܗܘܳܐ܃ ܘܰܕܼܗܳܢܽܘܢ ܕܰܝܘܳܢܶܐ̈܂
08:34 [ai]	ܘܢܶܦܼܩܰܬܼ ܟܽܠܳܗ ܡܕܼܺܝܢ̱ܬܳܐ ܠܽܐܘܪܥܶܗ ܕܝܶܫܽܘܥ܂ ܘܟܼܰܕܼ ܚܙܰܐܘܽܗ̱ܝ܃ ܒܥܰܘ ܡܶܢܶܗ ܕܰܢܫܰܢܶܐ ܡܶܢ ܬܚܽܘܡܰܝܗܽܘܢ̈܂

next chapter