← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


10:01 [ai]ܘܰܩܪܳܐ ܠܰܬܼܪ̈ܶܥܣܰܪ ܬܰܠܡܺܝܕܼܰܘܗ̱ܝ̈܃ ܘܝܰܗ̱ܒܼ ܠܗܽܘܢ ܫܽܘܠܛܳܢܳܐ ܥܰܠ ܪ̈ܽܘܚܶܐ ܛܰܢܦܼܳܬܼܳܐ̈ ܕܢܰܦܿܩܽܘܢ܃ ܘܰܠܡܰܐܣܳܝܽܘ ܟܽܠ ܟܺܐܒܼ ܘܟܼܽܘܪܗܳܢ܀
10:02 [ai]ܕܺܝܠܗܽܘܢ ܕܶܝܢ ܕܿܰܬܼܪ̈ܶܥܣܰܪ ܫܠܺܝܚܶܐ̈܃ ܫܡܳܗܶܐ̈ ܐܺܝܬܼܰܝܗܽܘܢ ܗܳܠܶܝܢ܂ ܩܰܕܼܡܳܝܗܽܘܢ܂ ܫܶܡܥܽܘܢ ܕܡܶܬܼܩܪܶܐ ܟܺܐܦܼܳܐ܂ ܘܰܐܢܕܿܪܶܐܘܳܣ ܐܰܚܽܘܗ̱ܝ܂ ܘܝܥܰܩܽܘܒܼ ܒܰܪ ܙܰܒܼܕܼܰܝ܂ ܘܝܽܘܚܰܢܳܢ ܐܰܚܽܘܗ̱ܝ܂
10:03 [ai]ܘܦܼܺܝܠܺܝܦܿܳܘܣ܂ ܘܒܼܰܪ ܬܿܽܘܠܡܰܝ܂ ܘܬܼܳܐܘܡܰܐ܂ ܘܡܰܬܿܰܝ ܡܳܟܼܣܳܐ܂ ܘܝܥܰܩܽܘܒܼ ܒܰܪ ܚܰܠܦܼܰܝ܂ ܘܠܰܒܺܝ ܕܶܐܬܼܟܿܰܢܺܝ ܬܿܰܕܼܰܝ܂
10:04 [ai]ܘܫܶܡܥܽܘܢ ܩܢܳܢܳܝܳܐ܂ ܘܺܝܗܽܘܕܼܳܐ ܣܟܼܰܪܝܽܘܛܳܐ ܗܰܘ ܕܰܐܫܠܡܶܗ ܿ܀ܿ܀ܿ
10:05 [ai]ܠܗܳܠܶܝܢ ܬܿܪ̈ܶܥܣܰܪ ܫܰܕܿܰܪ ܝܶܫܽܘܥ܃ ܘܦܼܰܩܶܕܼ ܐܶܢܽܘܢ܂ ܘܶܐܡܰܪ܂ ܒܽܐܘܪܚܳܐ ܕܚܰܢܦܼܶܐ̈܂ ܠܳܐ ܬܺܐܙܽܠ̱ܘܢ܂ ܘܠܰܡܕܼܺܝܢ̱ܬܳܐ ܕܫܳܡܪ̈ܳܝܶܐ܂ ܠܳܐ ܬܶܥܠܽܘܢ܂
10:06 [ai]ܙܶܠܘ ܠܟܼܽܘܢ ܕܶܝܢ ܝܰܬܿܺܝܪܳܐܺܝܬܼ܃ ܠܘܳܬܼ ܥܶܪ̈ܒܿܶܐ ܕܶܐܒܼܰܕܼܘ ܡܶܢ ܒܶܝܬܼ ܺܝܣܪܳܝܶܠ܂
10:07 [ai]ܘܟܼܰܕܼ ܐܳܙܺܠ̱ܝܢ ܐܢ̱ܬܿܽܘܢ܂ ܐܰܟܼܪܶܙܘ܂ ܘܶܐܡܰܪܘ܂ ܕܩܶܪܒܿܰܬܼ ܡܰܠܟܿܽܘܬܼܳܐ ܕܰܫܡܰܝܳܐ܂
10:08 [ai]ܟܿܪ̈ܺܝܗܶܐ ܐܰܣܰܘ܂ ܘܓܼܰܪ̈ܒܿܶܐ ܕܰܟܿܰܘ܂ ܘܕܼܰܝܘܶܐ̈ ܐܰܦܿܶܩܘ܂ ܡܰܓܿܳܢ ܢܣܰܒܼܬܿܽܘܢ܂ ܡܰܓܿܳܢ ܗܰܒܼܘ܀
10:09 [ai]ܠܳܐ ܬܶܩܢܽܘܢ ܕܰܗܒܼܳܐ܂ ܘܠܳܐ ܣܺܐܡܳܐ܂ ܘܠܳܐ ܢܚܳܫܳܐ ܒܟܺܝܣܰܝܟܿܽܘܢ̈܂
10:10 [ai]ܘܠܳܐ ܬܰܪܡܳܠܳܐ ܠܽܐܘܪܚܳܐ܃ ܘܠܳܐ ܬܿܰܪ̈ܬܿܶܝܢ ܟܽܘܬܿܺܝܢܝܳܢ̈܃ ܘܠܳܐ ܡܣܳܢܶܐ̈܂ ܘܠܳܐ ܫܰܒܼܛܳܐ܂ ܫܳܘܶܐ ܗ̱ܘ ܓܶܝܪ ܦܳܥܠܳܐ ܣܰܝܒܿܳܪܬܿܶܗ܀
10:11 [ai]ܠܰܐܝܕܼܳܐ ܕܶܝܢ ܡܕܼܺܝܢ̱ܬܳܐ܂ ܐܰܘ ܩܪܺܝܬܼܳܐ ܕܥܳܐܠܺܝܢ ܐܢ̱ܬܿܽܘܢ ܠܳܗ܃ ܫܰܐܠܘ ܡܰܢܽܘ ܫܳܘܶܐ ܒܿܳܗ܃ ܘܬܼܰܡܳܢ ܗܘܰܘ܂ ܥܕܼܰܡܳܐ ܕܢܳܦܼܩܺܝܢ ܐܢ̱ܬܿܽܘܢ܀
10:12 [ai]ܘܡܳܐ ܕܥܳܐܠܺܝܢ ܐܢ̱ܬܿܽܘܢ ܠܒܼܰܝܬܳܐ܃ ܫܰܐܠܘ ܫܠܳܡܶܗ ܕܒܰܝܬܳܐ܂
10:13 [ai]ܘܶܐܢ ܗܽܘ ܕܫܳܘܶܐ ܒܰܝܬܳܐ܃ ܫܠܳܡܟܼܽܘܢ ܢܺܐܬܼܶܐ ܥܠܰܘܗ̱ܝ܂ ܐܶܢ ܕܶܝܢ ܠܳܐ ܫܳܘܶܐ܃ ܫܠܳܡܟܼܽܘܢ ܥܠܰܝܟܿܽܘܢ ܢܶܦܼܢܶܐ܀
10:14 [ai]ܡܰܢ ܕܠܳܐ ܕܶܝܢ ܡܩܰܒܿܶܠ ܠܟܼܽܘܢ܂ ܘܠܳܐ ܫܳܡܰܥ ܡܶܠܰܝܟܿܽܘܢ̈܃ ܟܰܕܼ ܢܳܦܼܩܺܝܢ ܐܢ̱ܬܿܽܘܢ ܡܶܢ ܒܰܝܬܳܐ܂ ܐܰܘ ܡܶܢ ܩܪܺܝܬܼܳܐ ܗܳܝ܃ ܦܶܨܘ ܚܶܠܳܐ ܡܶܢ ܪ̈ܶܓܼܠܰܝܟܿܽܘܢ܂
10:15 [ai]ܘܰܐܡܺܝܢ ܐܳܡܰܪ ܐ̱ܢܳܐ ܠܟܼܽܘܢ ܕܠܰܐܪܥܳܐ ܕܰܣܕܼܽܘܡ ܘܰܕܼܥܰܡܽܘܪܳܐ܃ ܢܶܗܘܶܐ ܢܺܝܚ ܒܝܰܘܡܳܐ ܕܕܼܺܝܢܳܐ܂ ܐܰܘ ܠܰܡܕܼܺܝܢ̱ܬܳܐ ܗܳܝ܀܀
10:16 [ai]ܗܳܐ ܐܶܢܳܐ ܡܫܰܕܿܰܪ ܐ̱ܢܳܐ ܠܟܼܽܘܢ܃ ܐܰܝܟܼ ܐܶܡܪ̈ܶܐ ܒܰܝܢܰܝ̈ ܕܺܐܒܼܶܐ̈܂ ܗܘܰܘ ܗܳܟܼܺܝܠ ܚܰܟܿܺܝܡܶܐ̈ ܐܰܝܟܼ ܚܘܰܘܳܬܼܳܐ̈܂ ܘܬܼܰܡܺܝܡܶܐ̈ ܐܰܝܟܼ ܝܰܘܢܶܐ̈܂
10:17 [ai]ܐܶܙܕܿܰܗ̱ܪܘ ܕܶܝܢ ܡܶܢ ܒܢܰܝܢܳܫܳܐ܂ ܡܰܫܠܡܺܝܢ ܠܟܼܽܘܢ ܓܶܝܪ ܠܒܼܶܝܬܼ ܕܰܝܳܢܶܐ̈܃ ܘܒܼܰܟܼܢܽܘܫܳܬܼܗܽܘܢ̈ ܢܢܰܓܿܕܼܽܘܢܳܟܼܽܘܢ܂
10:18 [ai]ܘܰܩܕܼܳܡ ܗܺܓܼܡܽܘܢܶܐ̈ ܘܡܰܠܟܿܶܐ̈ ܡܩܰܪܒܼܺܝܢ ܠܟܼܽܘܢ ܡܶܛܽܠܳܬܼܝ܃ ܠܣܳܗܕܿܽܘܬܼܳܐ ܕܺܝܠܗܽܘܢ ܘܰܕܼܥܰܡ̱ܡܶܐ̈܀
10:19 [ai]ܐܶܡܰܬܼܝ ܕܶܝܢ ܕܢܰܫܠܡܽܘܢܳܟܼܽܘܢ܃ ܠܳܐ ܬܺܐܨܦܿܽܘܢ ܐܰܝܟܿܰܢܳܐ ܐܰܘ ܡܳܢܳܐ ܬܡܰܠܠܽܘܢ܂ ܡܶܬܼܺܝܗܶܒܼ ܠܟܼܽܘܢ ܓܶܝܪ ܒܗܳܝ ܫܳܥܬܼܳܐ܂ ܡܳܐ ܕܰܬܼܡܰܠܠܽܘܢ܂
10:20 [ai]ܠܳܐ ܗ̱ܘܳܐ ܓܶܝܪ ܐܰܢ̱ܬܿܽܘܢ ܡܡܰܠܠܺܝܢ܃ ܐܶܠܳܐ ܪܽܘܚܳܐ ܕܰܐܒܼܽܘܟܼܽܘܢ ܡܡܰܠܠܳܐ ܒܟܽܘܢ܂
10:21 [ai]ܢܰܫܠܶܡ ܕܶܝܢ ܐܰܚܳܐ ܠܰܐܚܽܘܗ̱ܝ ܠܡܰܘܬܳܐ܂ ܘܰܐܒܼܳܐ ܠܰܒܼܪܶܗ܂ ܘܰܢܩܽܘܡܽܘܢ ܒܢܰܝܳܐ ܥܰܠ ܐܰܒܼܳܗܰܝܗܽܘܢ̈܂ ܘܰܢܡܺܝܬܼܽܘܢ ܐܶܢܽܘܢ܂
10:22 [ai]ܘܬܼܶܗܘܽܘܢ ܣܢܺܝܐܺܝܢ̈ ܡܶܢ ܟܽܠܢܳܫ ܡܶܛܽܠ ܫܶܡܝ܂ ܐܰܝܢܳܐ ܕܶܝܢ ܕܿܰܢܣܰܝܒܰܪ ܥܕܼܰܡܳܐ ܠܚܰܪܬܼܳܐ܃ ܗܽܘ ܢܺܚܶܐ܂
10:23 [ai]ܡܳܐ ܕܪܳܕܼܦܿܺܝܢ ܠܟܼܽܘܢ ܕܶܝܢ ܒܰܡܕܼܺܝܢ̱ܬܳܐ ܗܳܕܼܶܐ܃ ܥܪܽܘܩܘ ܠܟܼܽܘܢ ܠܰܐ̱ܚܪܺܬܼܳܐ܂ ܐܰܡܺܝܢ ܓܶܝܪ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܳܐ ܬܫܰܠܡܽܘܢ ܐܶܢܶܝܢ̈ ܟܽܠܗܶܝܢ ܡܕܼܺܝܢܳܬܼܳܐ̈ ܕܒܶܝܬܼ ܐܺܝܣܪܳܝܶܠ܃ ܥܕܼܰܡܳܐ ܕܢܺܐܬܼܶܐ ܒܪܶܗ ܕܐ̱ܢܳܫܳܐ܀
10:24 [ai]ܠܰܝܬܿ ܬܰܠܡܺܝܕܼܳܐ ܕܝܰܬܿܺܝܪ ܡܶܢ ܪܰܒܶܗ܂ ܘܠܳܐ ܥܰܒܼܕܿܳܐ ܡܶܢ ܡܳܪܶܗ܂
10:25 [ai]ܣܳܦܼܶܩ ܠܶܗ ܠܬܼܰܠܡܺܝܕܼܳܐ ܕܢܶܗܘܶܐ ܐܰܝܟܼ ܪܰܒܶܗ܂ ܘܰܠܥܰܒܼܕܿܳܐ ܐܰܝܟܼ ܡܳܪܶܗ܂ ܐܶܢ ܠܡܳܪܶܗ ܕܒܰܝܬܳܐ ܩܪܰܘ ܒܥܶܠܙܒܼܽܘܒܼ܃ ܚܰܕܼ ܟܡܳܐ ܠܰܒܼܢܰܝ ܒܰܝܬܿܶܗ܂
10:26 [ai]ܠܳܐ ܗܳܟܼܺܝܠ ܬܶܕܼܚܠܽܘܢ ܡܶܢܗܽܘܢ܂ ܠܰܝܬܿ ܓܶܝܪ ܡܶܕܶܡ ܕܰܟܼܣܶܐ܂ ܕܠܳܐ ܢܶܬܼܓܠܶܐ܃ ܘܕܼܰܡܛܰܫܰܝ܂ ܕܠܳܐ ܢܶܬܼܺܝܕܼܰܥ܂
10:27 [ai]ܡܶܕܶܡ ܕܳܐܡܰܪ ܐ̱ܢܳܐ ܠܟܼܽܘܢ ܒܚܶܫܽܘܟܼܳܐ܃ ܐܽܘܡܪܽܘܗ̱ܝ ܐܰܢ̱ܬܿܽܘܢ ܒܢܰܗܺܝܪܳܐ܂ ܘܡܶܕܶܡ ܕܒܶܐܕܼܢܰܝܟܿܽܘܢ̈ ܫܳܡܥܺܝܢ ܐܢ̱ܬܿܽܘܢ܃ ܐܰܟܼܪܶܙܘ ܥܰܠ ܐܶܓܿܳܪ̈ܶܐ܂
10:28 [ai]ܘܠܳܐ ܬܶܕܼܚܠܽܘܢ ܡܶܢ ܐܰܝܠܶܝܢ ܕܩܳܛܠܺܝܢ ܦܰܓܼܪܳܐ܃ ܢܰܦܼܫܳܐ ܕܶܝܢ ܠܳܐ ܡܶܫܟܿܚܺܝܢ ܠܡܶܩܛܰܠ܂ ܕܚܰܠܘ ܕܶܝܢ ܝܰܬܿܺܝܪܳܐܺܝܬܼ܃ ܡܶܢ ܡܰܢ ܕܡܶܫܟܿܰܚ ܕܰܠܢܰܦܼܫܳܐ ܘܰܠܦܼܰܓܼܪܳܐ ܢܰܘܒܿܶܕܼ ܒܓܺܗܰܢܳܐ܂
10:29 [ai]ܠܳܐ ܬܿܰܪ̈ܬܿܶܝܢ ܨܶܦܿܪ̈ܺܝܢ ܡܶܙܕܿܰܒܿܢܳܢ̈ ܒܰܐܣܳܪ܃ ܘܰܚܕܼܳܐ ܡܶܢܗܶܝܢ܂ ܒܶܠܥܳܕܼ ܡܶܢ ܐܰܒܼܽܘܟܼܽܘܢ܂ ܠܳܐ ܢܳܦܼܠܳܐ ܥܰܠ ܐܰܪܥܳܐ܂
10:30 [ai]ܕܺܝܠܟܼܽܘܢ ܕܶܝܢ ܐܳܦܼ ܡܶܢܶܐ̈ ܕܪܺܫܟܼܽܘܢ ܟܽܠܗܶܝܢ ܡܰܢܝܳܢ̈ ܐܶܢܶܝܢ̈܂
10:31 [ai]ܠܳܐ ܗܳܟܼܺܝܠ ܬܶܕܼܚܠܽܘܢ܂ ܡܶܢ ܨܶܦܼܪ̈ܶܐ ܣܰܓܿܺܝܳܐܬܼܳܐ̈ ܡܝܰܬܿܪܺܝܢ ܐܢ̱ܬܿܽܘܢ܂
10:32 [ai]ܟܽܠܢܳܫ ܗܳܟܼܺܝܠ ܕܢܰܘܕܿܶܐ ܒܺܝ ܩܕܼܳܡ ܒܢܰܝܢܳܫܳܐ܃ ܐܰܘܕܿܶܐ ܒܶܗ ܐܳܦܼ ܐܶܢܳܐ ܩܕܼܳܡ ܐܳܒܼܝ ܕܒܰܫܡܰܝܳܐ܂
10:33 [ai]ܡܰܢ ܕܶܝܢ ܕܢܶܟܼܦܿܽܘܪ ܒܺܝ ܩܕܼܳܡ ܒܢܰܝܢܳܫܳܐ܂ ܐܶܟܼܦܿܽܘܪ ܒܶܗ ܐܳܦܼ ܐܶܢܳܐ ܩܕܼܳܡ ܐܳܒܼܝ ܕܒܰܫܡܰܝܳܐ܀
10:34 [ai]ܠܳܐ ܬܶܣܒܿܪܽܘܢ ܕܶܐܬܼܺܝܬܼ ܕܰܐܪܡܶܐ ܫܰܝܢܳܐ ܒܰܐܪܥܳܐ܂ ܠܳܐ ܐܶܬܼܺܝܬܼ ܕܰܐܪܡܶܐ ܫܰܝܢܳܐ܂ ܐܶܠܳܐ ܚܰܪܒܿܳܐ܂
10:35 [ai]ܐܶܬܼܺܝܬܼ ܓܶܝܪ ܕܶܐܦܼܠܽܘܓܼ ܓܰܒܼܪܳܐ ܥܰܠ ܐܰܒܼܽܘܗ̱ܝ܃ ܘܒܼܰܪܬܼܳܐ ܥܰܠ ܐܶܡܳܗ܂ ܘܟܼܰܠܬܼܳܐ ܥܰܠ ܚܡܳܬܼܳܗ܂
10:36 [ai]ܘܰܒܥܶܠܕܿܒܼܳܒܼܰܘܗ̱ܝ̈ ܕܓܰܒܼܪܳܐ܂ ܒܢܰܝ ܒܰܝܬܿܶܗ܀
10:37 [ai]ܡܰܢ ܕܪܳܚܶܡ ܐܰܒܼܳܐ܂ ܐܰܘ ܐܶܡܳܐ܂ ܝܰܬܿܺܝܪ ܡܶܢ ܕܠܺܝ܃ ܠܳܐ ܫܳܘܶܐ ܠܺܝ܂ ܘܡܰܢ ܕܪܳܚܶܡ ܒܪܳܐ܂ ܐܰܘ ܒܰܪܬܼܳܐ܂ ܝܰܬܿܺܝܪ ܡܶܢ ܕܠܺܝ܃ ܠܳܐ ܫܳܘܶܐ ܠܺܝ܂
10:38 [ai]ܘܟܼܽܠ ܕܠܳܐ ܫܳܩܶܠ ܙܩܺܝܦܼܶܗ ܘܳܐܬܼܶܐ ܒܳܬܼܰܪܝ ܠܳܐ ܫܳܘܶܐ ܠܺܝ܂
10:39 [ai]ܡܰܢ ܕܶܐܫܟܿܰܚ ܢܰܦܼܫܶܗ ܢܰܘܒܿܕܼܺܝܗ܂ ܘܡܰܢ ܕܢܰܘܒܿܶܕܼ ܢܰܦܼܫܶܗ ܡܶܛܽܠܳܬܼܝ܃ ܢܶܫܟܿܚܺܝܗ܀
10:40 [ai]ܡܰܢ ܕܰܡܩܰܒܿܶܠ ܠܟܼܽܘܢ܂ ܠܺܝ ܡܩܰܒܿܶܠ܂ ܘܡܰܢ ܕܠܺܝ ܡܩܰܒܿܶܠ܂ ܠܡܰܢ ܕܫܰܠܚܰܢܝ ܡܩܰܒܿܶܠ܂
10:41 [ai]ܡܰܢ ܕܰܡܩܰܒܿܶܠ ܢܒܼܺܝܳܐ ܒܫܶܡ ܢܒܼܺܝܳܐ܃ ܐܰܓܼܪܳܐ ܕܰܢܒܼܺܝܳܐ ܢܳܣܶܒܼ܂ ܘܡܰܢ ܕܰܡܩܰܒܿܶܠ ܙܰܕܿܺܝܩܳܐ ܒܫܶܡ ܙܰܕܿܺܝܩܳܐ܃ ܐܰܓܼܪܳܐ ܕܙܰܕܿܺܝܩܳܐ ܢܳܣܶܒܼ܂
10:42 [ai]ܘܟܼܽܠ ܕܡܰܫܩܶܐ ܠܚܰܕܼ ܡܶܢ ܗܳܠܶܝܢ ܙܥܽܘܪ̈ܶܐ ܟܳܣܳܐ ܕܿܩܰܪ̈ܺܝܪܶܐ ܒܰܠܚܽܘܕܼ܃ ܒܰܫܡܳܐ ܕܬܰܠܡܺܝܕܼܳܐ܃ ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܠܳܐ ܢܰܘܒܿܶܕܼ ܐܰܓܼܪܶܗ܀܀

next chapter